Мѣ́сѧца і҆ꙋ́лїа въ д҃-й де́нь.

Слꙋ́жба ст҃ы̑мъ ца́рствєннымъ мч҃никѡмъ:

ст҃о́мꙋ бл҃говѣ́рномꙋ царю̀ мч҃никꙋ нїкола́ю, цари́цѣ мч҃ницѣ а҆леѯа́ндрѣ,

царе́вичꙋ а҆леѯӏ́ю, царе́внамъ ѻ҆́льгѣ, татїа́нѣ, марӏ́и и҆ а҆настасӏ́и,

прпⷣⷣбномч҃ницамъ кнѧги́нѣ є҆лїсаве́тѣ и҆ и҆́нокинѣ варва́рѣ,

ст҃ы̑мъ бл҃говѣ̑рнымъ мч҃никѡмъ ца́рскагѡ ро́да,

и҆ вѣ̑рнымъ слꙋга́мъ, съ ни́ми ᲂу҆бїє́ннымъ.

На вели́цѣй вече́рни.

Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ: стїхи̑ры на и҃, гла́съ ѕ҃.

Подо́бенъ: Всѐ ѿло́жше:

Ꙗже и҆здре́вле ст҃а́ѧ рꙋ́сь* є҆гда̀ нача́тъ ѿстꙋпа́ти ѿ созда́телѧ и҆ бг҃а своегѡ̀,* долготерпѣли́вый гдⷭ҇ь посла̀ мнѡ́гїѧ првⷣныѧ мꙋ́жы и҆ прⷪ҇ро́ки,* ѿ ни́хже послѣ́днїй бы́сть ст҃ы́й првⷣный па́стырь кроншта́дтскїй і҆ѡа́ннъ,* призыва́ѧ грѣ̑шныѧ къ покаѧ́нїю,* и҆ возвѣща́ѧ гнѣ́въ гдⷭ҇ень на нераска́ѧвшихсѧ,* но не послꙋ́ша си́хъ наро́дъ.* тогда̀ предадѐ бг҃ъ пре́жде бл҃гочⷭ҇ти́вꙋю зе́млю рꙋ́сскꙋю вє́лїимъ гоне́нїємъ на вѣ́рꙋ,* ꙗ҆́кѡ да грѣ̑шныѧ вразꙋми́тъ,* вѣ̑рныѧ же возвели́читъ и҆ просла́витъ* чрезꙿ терпѣ́нїе, страда̑нїѧ и҆ сме́рть за хрⷭ҇та̀,* ꙗ҆влѧ́ѧ со́нмъ ст҃ы́хъ новомч҃никѡвъ,* ѿ ни́хже вели́кїй бы́сть страстоте́рпецъ ца́рь мч҃никъ нїкола́й,* съ цари́цею и҆ ча́ды и҆ слꙋга́ми,* ꙗ҆̀же ны́нѣ мо́лѧтсѧ ѡ҆ дꙋша́хъ на́шихъ. Два́жды.

И҆́ны стїхи̑ры, гла́съ в҃. Подо́бенъ: Є҆гда̀ ѿ дре́ва:

Є҆гда̀ ты̀, царю̀ мч҃ниче,* ѿ богобо́рцєвъ заключе́нъ бы́въ,* ве́лїю ра́дость съ цари́цею и҆ ча́ды и҆мѣ́лъ є҆сѝ,* є҆гда̀ слꙋжи́тель бж҃їй посѣща́ше тѧ̀,* слꙋ́жбꙋ бж҃їю соверша́ѧ.* такова̀ бл҃гочⷭ҇ти́вагѡ царѧ̀ и҆ пома́занника бж҃їѧ мно́жайшїи ѿ наро́да ѿврати́шасѧ,* ꙗ҆́кѡ забы́ша сло́во бж҃їе,* призыва́ющее почита́ти царѧ̀,* и҆ прїи́де на всѧ̑ ны̀ гнѣ́въ бж҃їй.* сегѡ̀ ра́ди въ покаѧ́нїи зове́мъ:* гдⷭ҇и, пода́ждь стра́ждꙋщей странѣ̀ рѡссӏ́йстѣй,* предста́тельствомъ вели́кагѡ страстоте́рпца царѧ̀ мч҃ника,* ѿ богобо́рныхъ и҆збавле́нїе, и҆ возставле́нїе прⷭ҇то́ла правосла́вныхъ царе́й.

Воспѣва́емъ тѧ̀, царю̀ мч҃ниче,* и҆ многострада́льный страстоте́рпче,* поне́же всѣ́хъ въ срⷣцѣ свое́мъ вмѣща́лъ є҆сѝ,* ꙗ҆́коже па́ѵелъ а҆пⷭ҇лъ,* а҆́лчꙋщаго насыща́ѧ,* скорбѧ́щаго ᲂу҆тѣша́ѧ, и҆ стра́ждꙋщемꙋ соскорбѧ̀,* ѡ҆ заблꙋжда́ющихъ печа́лꙋѧ,* ѡ҆сꙋжде́ннаго ѕлодѣ́ѧ ми́лꙋѧ,* клеветꙋ̀ и҆ непра́вдꙋ кро́ткѡ сносѧ̀,* ѡ҆ вѣ́рѣ и҆ бл҃гочⷭ҇тїи ревнꙋ́ѧ,* сла́вꙋ и҆ бога́тство мӏ́ра сегѡ̀ нивочто́же вмѣнѧ́ѧ,* па́че же ѡ҆тѧгоща́ѧсѧ и҆́ми,* попече́нїе ѡ҆ ми́рѣ всегѡ̀ мӏ́ра и҆мѣ́ѧ,* любо́вїю ко всѣ̑мъ пламенѣ́ѧ.* прїимѝ и҆ на́съ въ срⷣце твоѐ,* Ѽ многострада́льный царю̀ и҆ вели́кїй страстоте́рпче,* и҆ молѝ млⷭ҇тиваго бг҃а, да поми́лꙋетъ на́съ,* и҆ пода́стъ на́мъ крѣ́пость подража́телємъ твои̑мъ бы́ти.

И҆́ны стїхи̑ры, гла́съ ѕ҃. Подо́бенъ: Всѐ ѿло́жше:

Бг҃овѣнча́ннаѧ мч҃нице, ст҃а́ѧ цари́це а҆леѯа́ндро,* кто̀ и҆зрече́тъ твоѐ вои́стиннꙋ є҆ѵⷢ҇льское житїѐ;* прешла̀ є҆сѝ ѿ и҆новѣ́рїѧ къ вѣ́рѣ правосла́внѣй,* ю҆́же воспрїѧ́ла є҆сѝ всѣ́мъ срⷣцемъ твои́мъ,* возлюби́вши мл҃твꙋ, хра́мъ и҆ ст҃а̑ѧ та́инства,* є҆ще́ же поꙋчє́нїѧ ст҃ы́хъ ѻ҆тє́цъ,* возрасти́вши ча̑да твоѧ̑ во бл҃гочⷭ҇тїи,* и҆ ᲂу҆готовлѧ́ющи и҆̀хъ къ мꙋче́нїю за хрⷭ҇та̀,* терпѧ́щи кро́ткѡ клеветꙋ̀ забы́вшихъ бг҃а,* и҆ не разꙋмѣва́ющихъ и҆́стиннагѡ бл҃гочⷭ҇тїѧ твоегѡ̀,* сегѡ̀ ра́ди мо́лимъ тѧ̀:* молѝ хрⷭ҇та̀ бг҃а, є҆го́же возлюби́ла є҆сѝ,* да сп҃се́тъ дꙋ́шы на́шѧ.

Ве́лїѧ вѣ́ра твоѧ̀,* ст҃а́ѧ мч҃нице цари́це а҆леѯа́ндро,* въ го́рцѣмъ заточе́нїи ѿ богобо́рцєвъ бы́вши,* и҆ ча́ющи мч҃ническїѧ сме́рти,* глаго́лала є҆сѝ си́це:* да ᲂу҆гото́вимъ себѐ къ срѣ́тенїю нбⷭ҇нагѡ жениха̀,* бг҃ъ и҆сполнѧ́етъ и҆ ѡ҆зарѧ́етъ дꙋ́шꙋ мою̀ неизглаго́ланною ра́достїю и҆ тишино́ю,* дꙋша̀ моѧ̀ ликꙋ́етъ,* разꙋмѣ́ющи, ꙗ҆́кѡ жени́хъ приближа́етсѧ,* дꙋша̀ моѧ̀ трепе́щетъ, ꙗ҆́кѡ бг҃ъ близꙿ є҆́сть,* да про́симъ ᲂу҆ гдⷭ҇а себѣ̀ и҆ всемꙋ̀ мӏ́рꙋ грѣхѡ́въ проще́нїѧ,* помо́лимсѧ ѡ҆ забыва́ющихъ моли́тисѧ, и҆ ѡ҆ всѣ́хъ лю́дехъ.* и҆схода́тайствꙋй, ст҃а́ѧ мч҃нице, и҆ на́мъ грѣхѡ́въ проще́нїе,* и҆ ве́лїю млⷭ҇ть.

Ст҃ы́й мч҃никъ царе́вичъ а҆леѯӏ́й* возлюбѝ си́лꙋ крⷭ҇тнꙋю:* сїѧ̀ вѣ́ра крⷭ҇тнаѧ помо́же є҆мꙋ̀* безꙿ ропта́нїѧ понестѝ страда́льческїй крⷭ҇тъ неисцѣ́льнагѡ недꙋ́га,* чрезꙿ всю̀ є҆гѡ̀ маловре́меннꙋю жи́знь,* и҆ съ терпѣ́нїемъ и҆ ᲂу҆пова́нїемъ прїѧ́ти мч҃ническꙋю кончи́нꙋ за хрⷭ҇та̀.* и҆ ны́нѣ на нб҃сѣ́хъ моли́сѧ ѡ҆ на́съ,* вѣ́рою и҆ любо́вїю соверша́ющихъ па́мѧть твою̀,* да пода́стъ и҆ на́мъ гдⷭ҇ь* вѣ́рꙋ и҆ терпѣ́нїе и҆ любо́вь.

Ст҃ы̑ѧ мч҃ницы хрⷭ҇тѡ́вы,* царє́вны ѻ҆́льго, татїа́но, марӏ́е и҆ а҆настасӏ́е,* ꙗ҆вѝ ва́съ хрⷭ҇то́съ, ꙗ҆́кѡ а҆́гг҃лы во странѣ̀ рѡссӏ́йстѣй,* бы́сте бо чⷭ҇тоты̀, любвѐ и҆ сострада́нїѧ ѡ҆́бразъ,* и҆̀мже наꙋчи́стесѧ ѿ бл҃гочⷭ҇ти́вѣйшихъ роди́телей свои́хъ,* любо́вь ве́лїю и҆мꙋ́щѧ ко всѣ̑мъ,* наипа́че ко стра́ждꙋщымъ,* и҆̀мже послꙋжи́сте, по за́повѣди хрⷭ҇то́вой:* бо́ленъ бѣ́хъ, и҆ посѣти́сте менѐ.* є҆гда́ же гоне́нїе, заточе́нїе и҆ поноше́нїе наста̀,* добродѣ́тєли велича́йшїѧ вѣ́ры,* кро́тости, терпѣ́нїѧ и҆ всепроще́нїѧ показа́сте,* воспѣва́ющѧ ст҃ы̑ѧ мл҃твы,* и҆ полага́ющѧ наде́ждꙋ на бг҃а,* взыва́ющѧ ко гдⷭ҇ꙋ предꙿ і҆кѡ́нами мно́гими, ꙗ҆̀же ᲂу҆стро́исте ᲂу҆ себє̀,* молѧ́щѧсѧ кро́ткѡ за врагѡ́въ, непови́ннѡ ва́съ терза́ющихъ и҆ ᲂу҆бива́ющихъ:* кро́тость и҆ терпѣ́нїе ва́ше сердца̀ ѕлодѣ́євъ ᲂу҆мѧгча́ше.* вє́лїѧ ва́шѧ добродѣ́тєли на землѝ,* ве́лїѧ сла́ва на нб҃сѣ́хъ,* ст҃ы̑ѧ невѣ̑сты хрⷭ҇тѡ́вы,* моли́тесѧ ѡ҆ дꙋша́хъ на́шихъ. Сла́ва, гла́съ и҃:

Бг҃оизбра́ннаѧ прпⷣбномч҃нице кнѧги́не є҆лїсаве́то, є҆гда̀ бꙋ́рѧ безбо́жїѧ на зе́млю рꙋ́сскꙋю на́йде, сїѧ̑ глаго́лала є҆сѝ: ꙗ҆́коже въ бꙋ́ри є҆сте́ственнѣй быва́ютъ: нѣ́цыи бѣгꙋ́тъ, и҆нӏ́и поража́ютсѧ, и҆нѣ̑мъ же ѻ҆́чи дꙋше́внѣи ѿкрыва́ютсѧ, да ви́дѧтъ вели́чїе бж҃їе, та́кѡ и҆ въ ви́хрѣ жите́йстѣмъ приключа́ютсѧ, дꙋша́ бо твоѧ̀ въ потрѧсе́нїихъ ᲂу҆зрѣ̀ десни́цꙋ бж҃їю: лю́тое ᲂу҆бїе́нїе твоегѡ̀ мꙋ́жа приведе́ тѧ къ слꙋже́нїю бг҃ꙋ и҆ бли̑жнимъ: немощны̑мъ, ѡ҆ста́влєннымъ и҆ ᲂу҆вѣ̑чнымъ слꙋжи́ла є҆сѝ со смире́нїемъ и҆ любо́вїю, є҆ще́ же воспрїѧ́ла є҆сѝ и҆́ноческое житїѐ, и҆ бѣжа́ти ѿ богобо́рцєвъ не восхотѣ́ла є҆сѝ, безꙿ стра́ха прїи́мши мч҃ническꙋю сме́рть за хрⷭ҇та̀. мы́ же, почита́юще бл҃гоꙋха̑нныѧ мѡ́щи твоѧ̑, ᲂу҆се́рднѡ про́симъ: молѝ ѡ҆ чтꙋ́щихъ твоѧ̑ по́двиги и҆ страда̑нїѧ. И҆ ны́нѣ, бг҃оро́диченъ догма́тїкъ: Цр҃ь нбⷭ҇ный:

Премꙋ́дрости соломѡ́новы чте́нїе:

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предꙿ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Ца́рствъ тре́тїихъ чте́нїе:

Ста̀ соломѡ́нъ предꙿ лице́мъ ѻ҆лтарѧ̀ гдⷭ҇нѧ, предꙿ всѣ́мъ собо́ромъ і҆и҃левымъ, и҆ воздви́же рꙋ́цѣ своѝ на нб҃о, И҆ речѐ: гдⷭ҇и бж҃е і҆и҃левъ, нѣ́сть, ꙗ҆́коже ты̀, бг҃ъ на нб҃сѝ горѣ̀, и҆ на землѝ ни́зꙋ. А҆́ще нб҃о, и҆ нб҃о небесѐ не довлѣ́ютъ тѝ, кольмѝ па́че хра́мъ се́й, є҆го́же созда́хъ и҆́мени твоемꙋ̀; И҆ да при́зриши на мл҃твꙋ мою̀, гдⷭ҇и бж҃е і҆и҃левъ, послꙋ́шати мл҃твы, є҆́юже мо́литсѧ ра́бъ тво́й предꙿ тобо́ю къ тебѣ̀ дне́сь, Да бꙋ́дꙋтъ ѻ҆́чи твоѝ ѿвє́рсты на хра́мъ се́й де́нь и҆ но́щь, на мѣ́сто сїѐ, ѡ҆ не́мже ре́клъ є҆сѝ: бꙋ́детъ и҆́мѧ моѐ та́мѡ на ᲂу҆слы́шанїе мл҃твы, є҆́юже мо́литсѧ ра́бъ тво́й на мѣ́стѣ се́мъ де́нь и҆ но́щь. И҆ ᲂу҆слы́шиши мл҃твꙋ раба̀ твоегѡ̀, и҆ люде́й твои́хъ і҆и҃лѧ, ѡ҆ ни́хже помо́лѧтсѧ на мѣ́стѣ се́мъ: и҆ ты̀ ᲂу҆слы́шиши на мѣ́стѣ ѡ҆бита́лища твоегѡ̀ на нб҃сѝ, и҆ сотвори́ши и҆ поми́лꙋеши.

Прⷪ҇ро́чества и҆са́їина чте́нїе:

Да возра́дꙋетсѧ дꙋша̀ моѧ̀ ѡ҆ гдⷭ҇ѣ: ѡ҆блече́ бо мѧ̀ въ ри́зꙋ сп҃се́нїѧ, и҆ ѻ҆де́ждею весе́лїѧ ѡ҆дѣ́ѧ мѧ̀, ꙗ҆́кѡ женихꙋ̀, возложѝ мнѣ̀ вѣне́цъ, и҆ ꙗ҆́кѡ невѣ́стꙋ, ᲂу҆краси́ мѧ красото́ю. И҆ ꙗ҆́кѡ землѧ̀, растѧ́щаѧ цвѣ́тъ сво́й, и҆ ꙗ҆́кѡ вертогра́дъ сѣ́мена своѧ̑ прозѧба́етъ: та́кѡ возрасти́тъ гдⷭ҇ь пра́вдꙋ, и҆ весе́лїе предꙿ всѣ́ми ꙗ҆зы̑ки. Сїѡ́на ра́ди не ᲂу҆молчꙋ̀, и҆ і҆ерⷭ҇ли́ма ра́ди не попꙋщꙋ̀, до́ндеже и҆зы́детъ ꙗ҆́кѡ свѣ́тъ пра́вда моѧ̀, и҆ сп҃се́нїе моѐ ꙗ҆́кѡ свѣти́ло разжже́тсѧ. И҆ ѹ҆́зрѧтъ ꙗ҆зы́цы пра́вдꙋ твою̀, и҆ ца́рїе сла́вꙋ твою̀, и҆ прозовꙋ́тъ тѧ̀ и҆́менемъ но́вымъ, и҆́мже гдⷭ҇ь наименꙋ́етъ є҆̀. И҆ бꙋ́деши вѣне́цъ добро́ты въ рꙋцѣ̀ гдⷭ҇ни, и҆ дїади́ма црⷭ҇твїѧ въ рꙋцѣ̀ бг҃а твоегѡ̀. И҆ не прозове́шисѧ ктомꙋ̀ ѡ҆ста́вленъ, и҆ землѧ̀ твоѧ̀ ктомꙋ̀ не нарече́тсѧ пꙋста̀: тебѣ́ бо прозове́тсѧ во́лѧ моѧ̀, и҆ землѧ̀ твоѧ̀ вселе́ннаѧ: ꙗ҆́кѡ бл҃говолѝ гдⷭ҇ь въ тебѣ̀, и҆ землѧ̀ твоѧ̀ вкꙋ́пѣ насели́тсѧ. И҆ ꙗ҆́коже живѧ́й ю҆́ноша съ дѣ́вою, та́кѡ поживꙋ́тъ сы́нове твоѝ съ тобо́ю: и҆ бꙋ́детъ, ꙗ҆́коже ра́дꙋетсѧ жени́хъ ѡ҆ невѣ́стѣ, та́кѡ возра́дꙋетсѧ гдⷭ҇ь ѡ҆ тебѣ̀.

На лїтӏ́и стїхи́ра хра́ма, и҆ мч҃никѡвъ, гла́съ г҃:

Сла́ва и҆́стиннаѧ страда́нїе є҆́сть, та́кѡ бо речѐ гдⷭ҇ь: ны́нѣ просла́висѧ сн҃ъ чл҃вѣ́ческїй, сла́вою свое́ю на крⷭ҇тѣ̀ страда́нїе и҆менꙋ́ѧ. сеѧ̀ крⷭ҇тныѧ сла́вы сподо́бишасѧ црⷭ҇твеннїи мч҃ницы, и҆̀же подража́ша страсте́мъ сп҃сѡвымъ, сегѡ̀ ра́ди возлюбѝ и҆̀хъ хрⷭ҇то́съ, и҆ возвели́чи на нб҃сѣ́хъ, да мо́лѧтсѧ ѡ҆ дꙋша́хъ на́шихъ. Сла́ва, гла́съ и҃:

Не сꙋ́ть совѣ́ти бж҃їи, ꙗ҆́коже совѣ́ти человѣ́честїи, и҆ не ꙗ҆́кѡ пꙋтїѐ человѣ́честїи, пꙋтїѐ бж҃їи, глаго́летъ гдⷭ҇ь, сего́ бо смирѧ́етъ, и҆ сего̀ возно́ситъ, гдⷭ҇ь мертви́тъ и҆ живи́тъ, ᲂу҆бо́житъ и҆ богати́тъ, возставлѧ́етъ ѿ землѝ ᲂу҆бо́га, прⷭ҇то́лъ сла́вы даѧ̀ є҆мꙋ̀. та́кѡ прⷭ҇то́лъ сла́вы ᲂу҆гото́ва гдⷭ҇ь возлю́бленномꙋ своемꙋ̀, сла́вномꙋ мч҃никꙋ царю̀ нїкола́ю, воздаѧ̀ є҆мꙋ̀ за бл҃гочⷭ҇тїе, и҆ по крⷭ҇тнѣмъ пꙋтѝ содѣ́лавъ є҆го̀ жи́ва на нб҃сѣ́хъ, ꙗ҆́кѡ да мо́литсѧ за наро́дъ сво́й, да попече́нїе воспрїи́мемъ ѡ҆ црⷭ҇твїи нбⷭ҇нѣмъ, и҆ ѡ҆ сп҃се́нїи дꙋ́шъ на́шихъ.

И҆ ны́нѣ, бг҃оро́диченъ, гла́съ то́йже: Безневѣ́стнаѧ дв҃о:

На стїхо́внѣ стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ:

Не ѡ҆ сла́вѣ ца́рства земна́гѡ попече́нїе и҆мѣ́лъ є҆сѝ,* сла́вный мч҃ниче царю̀ нїко́лае,* є҆гда̀ вѣнча́нїе на ца́рство и҆ мѵ́ромъ пома́занїе воспрїѧ́лъ є҆сѝ,* но помышлѧ́лъ є҆сѝ ѡ҆ сла́вѣ бж҃їей и҆ ѡ҆ црⷭ҇твѣ нбⷭ҇нѣмъ,* въ мл҃твѣ предꙿ наро́домъ глаго́лѧ:* влⷣко мо́й и҆ гдⷭ҇и,* наста́ви мѧ̀ и҆ вразꙋмѝ въ вели́комъ слꙋже́нїи се́мъ,* да бꙋ́детъ со мно́ю твоѧ̀ бжⷭ҇твеннаѧ премꙋ́дрость,* послѝ ю҆̀ съ нб҃съ ст҃ы́хъ твои́хъ,* да разꙋмѣ́ю, что̀ є҆́сть ᲂу҆го́дно предꙿ ѻ҆чи́ма твои́ма,* и҆ что̀ є҆́сть пра́во по за́повѣдемъ твои̑мъ,* бꙋ́ди срⷣце моѐ тобо́ю ᲂу҆пра́влено,* є҆́же всѧ̑ ᲂу҆стро́ити ко сла́вѣ твое́й,* и҆ къ по́льзѣ дꙋше́внѣй врꙋче́нныхъ мнѣ̀ люде́й.* Сїѧ̀ мл҃тва ᲂу҆го́дна бы́сть предꙿ бг҃омъ,* и҆ ны́нѣ, ꙗ҆́кѡ мч҃никъ, не преста́й моли́ти бг҃а ѡ҆ по́льзѣ дꙋше́внѣй твои́хъ люде́й,* ꙗ҆́кѡ да млⷭ҇тивъ бꙋ́детъ къ ни́мъ,* подаѧ̀ на́мъ ѡ҆ставле́нїе грѣхѡ́въ,* ми́ръ и҆ ве́лїю млⷭ҇ть.

Стӏ́хъ: Вознесо́хъ и҆збра́ннаго ѿ люде́й мои́хъ.

Ꙗ҆́кѡ а҆́гнецъ неѕло́бивый,* веде́нъ бы́сть ца́рь мч҃никъ нїкола́й на ᲂу҆бїе́нїе,* съ цари́цею, и҆ ча́ды, и҆ вѣ́рными слꙋга́ми,* и҆ и҆мѣ́ѧ дꙋ́шꙋ чⷭ҇тꙋ,* ввѣрѧ́ѧ себѐ и҆ при́сныхъ бг҃ꙋ, никогда́ же поропта́въ,* прїѧ́тъ же кро́ткѡ сме́рть за хрⷭ҇та̀.* и҆ ны́нѣ предстоѧ̀ со а҆́гг҃лы и҆ вели́кимъ со́нмомъ новомч҃никъ на нб҃сѣ́хъ,* мо́литъ ѡ҆ сп҃се́нїи страны̀ рѡссӏ́йскїѧ ѿ лю́тыхъ безбѡ́жникъ,* да ѡ҆братѧ́тсѧ къ бг҃ꙋ всѝ ѿстꙋпи́вшїи ѿ негѡ̀,* да ᲂу҆тверди́тсѧ стра́хъ бж҃їй въ сердца́хъ,* и҆ да возсїѧ́етъ па́ки вѣ́ра хрⷭ҇то́ва.

Стӏ́хъ: Є҆ле́емъ ст҃ы́мъ мои́мъ пома́захъ є҆го̀.

Сїѧ̑ и҆сповѣ́дахꙋ ст҃ӏ́и ца́рственнїи мч҃ницы предꙿ непови́нною сме́ртїю за хрⷭ҇та̀,* повторѧ́юще ст҃оѻте́ческое завѣща́нїе:* мч҃ницы дре́внїи, и҆̀же вѣ́ровахꙋ въ гдⷭ҇а і҆и҃са хрⷭ҇та̀,* на сме́рть и҆дѧ́хꙋ, ꙗ҆́кѡ на пра́здникъ,* ѡ҆крили́вше ѹ҆́мъ и҆ срⷣце вѣ́рою,* ѡ҆сꙋжде́ни же на сме́рть, дꙋ́хъ ми́ренъ и҆мѣ́ѧхꙋ,* и҆́же и҆̀хъ не ѡ҆ставлѧ́ше никогда́же,* ми́рнѡ бо на сме́рть и҆дѧ́хꙋ,* вни́ти во и҆нꙋ́ю жи́знь дх҃о́внꙋю ᲂу҆пова́юще,* ꙗ҆́же ѿверза́етсѧ за гро́бомъ.* дѣ́ломъ сїѧ̑ словеса̀ и҆спыта́вше,* ны́нѣ ст҃ӏ́и црⷭ҇твеннїи мч҃ницы ра́дꙋютсѧ со хрⷭ҇то́мъ на нб҃сѣ́хъ,* со дерзнове́нїемъ молѧ́щесѧ ѡ҆ дꙋша́хъ на́шихъ. Сла́ва, гла́съ ѕ҃:

Кто̀ и҆зрече́тъ трꙋды̀ твоѧ̑ и҆ страда̑нїѧ, страстоте́рпче вели́кїй и҆ мч҃ниче царю̀ нїко́лае; тѧ́жкое бре́мѧ вла́сти воспрїѧ́лъ є҆сѝ, не сла́вы ра́ди, но ꙗ҆́кѡ хрⷭ҇тїа́нскїй ца́рь и҆ слꙋга̀ хрⷭ҇то́въ, пекӏ́йсѧ ѡ҆ по́льзѣ наро́да, мно́жество скорбе́й претерпѣ́въ. всѧ̑ сїѧ̑ попꙋстѝ гдⷭ҇ь за грѣхѝ наро́да, и҆ да ꙗ҆ви́тъ бл҃гочⷭ҇тїе твоѐ, показꙋ́ѧ мӏ́рꙋ терпѣ́нїе твоѐ, ꙗ҆́кѡ многострада́льнагѡ і҆́ѡва, да полꙋчи́ши сла́вный мч҃ническїй вѣне́цъ на нб҃сѣ́хъ, а҆́велевꙋ вѣнцꙋ̀ подо́бный, и҆дѣ́же ны́нѣ ликꙋ́ѧ со а҆́гг҃лы, предста́тельствꙋеши за ны̀ предꙿ бг҃омъ, молѧ́сѧ ѡ҆ сп҃се́нїи дꙋ́шъ на́шихъ.

И҆ ны́нѣ, бг҃оро́диченъ, гла́съ то́йже: Творе́цъ и҆ и҆зба́витель мо́й:

Тропа́рь ст҃а́гѡ царѧ̀ мч҃ника нїкола́ѧ, гла́съ є҃:

Црⷭ҇тва земна́гѡ лише́нїе, ѹ҆́зы и҆ страда̑нїѧ многоразли̑чныѧ, кро́ткѡ претерпѣ́лъ є҆сѝ, свидѣ́тельствовавъ ѡ҆ хрⷭ҇тѣ̀ да́же до сме́рти ѿ богобо́рцєвъ, страстоте́рпче вели́кїй бг҃овѣнча́нный царю̀ нїко́лае, сегѡ̀ ра́ди мч҃ническимъ вѣнце́мъ на нб҃сѣ́хъ вѣнча́ тѧ съ цари́цею, и҆ ча́ды, и҆ слꙋга́ми твои́ми хрⷭ҇то́съ бг҃ъ, є҆го́же молѝ поми́ловати странꙋ̀ рѡссӏ́йскꙋю, и҆ сп҃стѝ дꙋ́шы на́шѧ.

Сла́ва, и҆ ны́нѣ, бг҃оро́диченъ, гла́съ то́йже: Ра́дꙋйсѧ, две́ре гдⷭ҇нѧ:

А҆́ще бдѣ́нїе соверша́етсѧ: тропа́рь два́жды, Бцⷣе, дв҃о: є҆ди́ножды.

На ѹ҆́трени.

На Бг҃ъ гдⷭ҇ь: тропа́рь ст҃а́гѡ царѧ̀ мч҃ника, два́жды. Сла́ва:

Тропа́рь прпⷣбномч҃ницы кнѧги́ни є҆лїсаве́ты, гла́съ д҃:

Кро́тость и҆ смире́нїе и҆ любо́вь всели́вши въ дꙋ́шꙋ свою̀, ᲂу҆се́рднѡ послꙋжи́ла є҆сѝ стра́ждꙋщымъ, страстоте́рпице ст҃а́ѧ кнѧги́не є҆лїсаве́то, та́же съ вѣ́рою претерпѣ́ла є҆сѝ страда̑нїѧ и҆ сме́рть за хрⷭ҇та̀, кꙋ́пнѡ съ и҆́нокинею варва́рою: съ не́юже молѝ ѡ҆ всѣ́хъ съ любо́вїю почита́ющихъ ва́съ. И҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́ное:

По а҃-мъ стїхосло́вїи сѣда́ленъ, гла́съ з҃:

Три́жды ѿве́ргсѧ пе́тръ, но принесѐ сле́зы покаѧ́нїѧ, и҆ а҆́бїе поми́лованъ бы́сть, и҆ возведе́нъ въ чи́нъ первоверхо́внагѡ а҆пⷭ҇ла. ца́рь же и҆ вели́кїй страстоте́рпецъ нїкола́й, а҆́ще и҆ ѿрече́сѧ ѿ прⷭ҇то́ла, ви́дѧ ѡ҆́крестъ себє̀ и҆змѣ́нꙋ и҆ боѧ́знь и҆ ѡ҆бма́нъ, и҆ разꙋмѣ́ѧ, ꙗ҆́кѡ всѝ бли́жнїи военача̑льницы и҆ наро́дъ ѿреко́шасѧ ѿ негѡ̀, ѻ҆́нъ же не ѿрече́сѧ ѿ хрⷭ҇та̀, ни ѿ любвѐ къ наро́дꙋ своемꙋ̀, и҆ не восхотѣ̀ бѣжа́ти ѿ богобо́рцєвъ, но кро́ткѡ всѧ̑ претерпѣ́въ, прїѧ́тъ непови́ннѡ мч҃ническꙋю сме́рть за хрⷭ҇та̀, ꙗ҆́коже срѡ́дницы є҆гѡ̀, бл҃говѣ́рнїи кнѧ̑зи бори́съ и҆ глѣ́бъ. сегѡ̀ ра́ди мо́лимъ тѧ̀, страстоте́рпче царю̀, моли́сѧ хрⷭ҇тꙋ̀ бг҃ꙋ, прегрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀. Два́жды.Сла́ва, и҆ ны́нѣ, бг҃оро́диченъ:

Мл҃твꙋ прїе́мши ѿ на́съ, въ кро́въ тво́й, пречⷭ҇таѧ дв҃о, прибѣга́ющихъ, не преста́й молѧ́щи чл҃вѣколю́бца, сп҃сти́сѧ рабѡ́мъ твои̑мъ.

По в҃-мъ стїхосло́вїи сѣда́ленъ, гла́съ з҃:

Съ любо́вїю ве́лїею къ неблагода̑рнымъ лю́демъ, прине́слъ є҆сѝ себѐ, вели́кїй страстоте́рпче царю̀, въ же́ртвꙋ за наро́дъ тво́й, ꙗ҆́коже ре́клъ є҆сѝ: а҆́ще потре́бна є҆́сть же́ртва за наро́дъ, а҆́зъ же́ртва сїѧ̀ бꙋ́дꙋ. бо́льши сеѧ̀ любвѐ никто́же и҆́мать, а҆́ще кто̀ дꙋ́шꙋ свою̀ положи́тъ за дрꙋ́ги своѧ̑. ны́нѣ же предстоѧ̀ хрⷭ҇тꙋ̀, є҆мꙋ́же послꙋжи́лъ є҆сѝ, молѝ ѡ҆ на́съ, чтꙋ́щихъ любо́вїю па́мѧть твою̀. Два́жды.

Сла́ва, и҆ ны́нѣ, бг҃оро́диченъ:

Оу҆жа́сно чꙋ́до зача́тїѧ, и҆ несказа́ненъ ѡ҆́бразъ ржⷭ҇тва̀ въ тебѣ̀ позна́сѧ, приснодв҃о чⷭ҇таѧ, ᲂу҆жаса́етъ мо́й ѹ҆́мъ, и҆ ᲂу҆дивлѧ́етъ помышле́нїе: сла́ва твоѧ̀, бцⷣе, всѣ̑мъ бы́сть ра́дость, во сп҃се́нїе дꙋ́шъ на́шихъ.

Полѷеле́й, и҆ велича́нїе:

Велича́емъ ва́съ, страстоте́рпцы ст҃ӏ́и, црⷭ҇твеннїи мч҃ницы, и҆ чти́мъ чⷭ҇тна̑ѧ страда̑нїѧ ва̑ша, ꙗ҆̀же за хрⷭ҇та̀ претерпѣ́ли є҆стѐ. Ѱало́мъ и҆збра́нный: Бг҃ъ на́мъ прибѣ́жище и҆ си́ла, помо́щникъ въ ско́рбехъ, ѡ҆брѣ́тшихъ ны̀ ѕѣлѡ̀.

По полѷеле́и сѣда́ленъ, гла́съ з҃:

Є҆гда̀ ты̀, царю̀ мч҃ниче нїко́лае, ца́рскїй прⷭ҇то́лъ воспрїѧ́лъ є҆сѝ, не проси́лъ є҆сѝ ᲂу҆ бг҃а бога́тства и҆мѣ́нїй, ни сла́вы, нижѐ дꙋ́шъ проти́вѧщихсѧ тебѣ̀, нижѐ днӏ́й мно́гихъ, но ѿ срⷣца проси́лъ є҆сѝ, ꙗ҆́коже премꙋ́дрый соломѡ́нъ, глаго́лѧ: да́ждь мѝ, гдⷭ҇и бж҃е, премꙋ́дрость и҆ ра́зꙋмъ. сегѡ̀ ра́ди ᲂу҆слы́ша тѧ̀ гдⷭ҇ь, и҆ дадѐ тебѣ̀ по проше́нїю твоемꙋ̀, ꙗ҆влѧ́ѧ тѧ̀ ревни́телѧ ѡ҆ бл҃гочⷭ҇тїи, мꙋ́драго и҆ смире́ннаго царѧ̀, и҆ вѣнча́ тѧ за бл҃гочⷭ҇тїе сла́внымъ вѣнце́мъ нбⷭ҇нымъ, да мо́лишисѧ ѡ҆ правосла́вныхъ лю́дехъ, предстоѧ̀ со а҆́гг҃лы ст҃ы́ми на нб҃сѣ́хъ ᲂу҆ прⷭ҇то́ла бж҃їѧ. Два́жды. Сла́ва, и҆ ны́нѣ, бг҃оро́диченъ:

Пречⷭ҇таѧ дв҃о, поми́лꙋй на́съ, прибѣга́ющихъ вѣ́рою къ тебѣ̀, млⷭ҇рднѣй, и҆ просѧ́щихъ те́плагѡ твоегѡ̀ застꙋпле́нїѧ: ꙗ҆́кѡ мт҃и бг҃а вы́шнѧгѡ, молѝ сн҃а твоего̀, хрⷭ҇та̀ бг҃а на́шего, сп҃сти́сѧ рабѡ́мъ твои̑мъ.

Та́же степє́нна, а҃-й а҆нтїфѡ́нъ д҃-гѡ гла́са.

Прокӏ́менъ, гла́съ д҃: Тебє̀ ра́ди, гдⷭ҇и, ᲂу҆мерщвлѧ́еми є҆смы̀ ве́сь де́нь.

Стӏ́хъ: Вмѣни́хомсѧ ꙗ҆́кѡ ѻ҆́вцы заколе́нїѧ. Є҆ѵⷢ҇лїе ѿ матѳе́а, зача́ло л҃ѕ.

По н҃-мъ ѱалмѣ̀: Мл҃твами ца́рственныхъ мч҃никъ:

Та́же стїхи́ра, гла́съ ѕ҃:

Ве́лїю вѣ́рꙋ и҆ ди́вное терпѣ́нїе, и҆ любо́вь ко врагѡ́мъ стѧжа́лъ є҆сѝ, ст҃ы́й мч҃ниче царю̀ нїко́лае, во и҆спыта́нїихъ на бг҃а надѣ́ѧсѧ, во страда́нїихъ долготерпѧ̀, врагѡ́въ и҆ ᲂу҆бива́ющихъ тѧ̀ проща́ѧ, и҆ просѧ̀ не мсти́ти за себѐ, поне́же ре́клъ є҆сѝ, ꙗ҆́кѡ ѕло̀ не побѣди́тъ ѕла̀, но то́кмѡ любы̀, и҆ кончи́нꙋ мч҃ническꙋю за хрⷭ҇та̀ кро́ткѡ прїе́млѧ. тѣ́мже возвели́чи тѧ̀ хрⷭ҇то́съ на нб҃сѣ́хъ, є҆го́же молѝ ѡ҆ вѣ́рою и҆ любо́вїю чтꙋ́щихъ тѧ̀.

Канѡ́нъ бцⷣѣ, со і҆рмосо́мъ на ѕ҃: Во́дꙋ проше́дъ: и҆ ст҃о́мꙋ на и҃,

пла́чь царѧ̀ мч҃ника, є҆гѡ́же краегране́сїе: Пощадѝ, бж҃е, лю́ди согрѣши́вшыѧ.

Гла́съ в҃. Пѣ́снь а҃.

І҆рмо́съ: Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зꙿ рабо́ты є҆гѵ́петскїѧ, ꙗ҆́кѡ просла́висѧ.

Припѣ́въ: Ст҃ӏ́и ца́рственнїи мч҃ницы, моли́те бг҃а ѡ҆ на́съ.

Порꙋга́нїе зрѧ̀ и҆ разоре́нїе землѝ своеѧ̀ ѿ безбо́жныхъ вра̑гъ, пла́касѧ и҆зꙿ глꙋбины̀ срⷣца бл҃гочⷭ҇ти́вый ца́рь, ꙗ҆́коже прⷪ҇ро́къ і҆еремӏ́а и҆ трїѐ ѻ҆́троцы, молѧ́сѧ за лю́ди согрѣши́вшыѧ, и҆ го́рькѡ стенѧ́ше: млⷭ҇тиве гдⷭ҇и, не ѡ҆ста́ви на́съ.

Ѽ ка́кѡ землѧ̀ рꙋ́сскаѧ, пре́жде сла́внаѧ въ мӏ́рѣ и҆ бл҃годе́нствꙋющаѧ, плѣне́на бы́сть ѿ богобо́рцєвъ; всѝ дрꙋжа́щїисѧ съ не́ю ѿверго́шасѧ є҆ѧ̀, бы́ша є҆́й вразѝ. ѿри́нꙋлъ є҆́сть гдⷭ҇ь царѧ̀, и҆ кнѧ́зѧ, и҆ сщ҃е́нника: ви́ждь, гдⷭ҇и, при́зри и҆ поми́лꙋй.

Щедрѡ́ты гдⷭ҇ни бе́здна мно́га, не во вѣ́къ ѿри́нетъ гдⷭ҇ь, но поми́лꙋетъ смири́вшихсѧ и҆ ка́ющихсѧ, по мно́жествꙋ млⷭ҇ти своеѧ̀, и҆ и҆зба́витъ лю́ди своѧ̑, ꙗ҆́коже дре́вле і҆и҃лѧ ѿ ра́бства є҆гѵ́петскагѡ.

Бг҃оро́диченъ: Съ вѣ́рою и҆ любо́вїю притека́ющихъ къ тебѣ̀, и҆ со стра́хомъ пою́щихъ тѧ̀, мл҃твенный гла́съ ᲂу҆слы́ши, влⷣчце.

Катава́сїа: Ѿве́рзꙋ ᲂу҆ста̀ моѧ̑:

Пѣ́снь г҃.

І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть првⷣнъ, па́че тебє̀, гдⷭ҇и.

А҆́гг҃лъ храни́тель попꙋще́нїемъ бж҃їимъ ѿѧ́тъ бы́сть ѿ землѝ рѡссӏ́йскїѧ, вразѝ є҆ѧ̀ ста́ша во главѣ̀, ненави́дѧщїи ю҆̀ бл҃годе́нствꙋютъ, за мно́жество нече́стїѧ пре́жде бл҃гочⷭ҇ти́выѧ землѝ, кнѧ̑зи є҆ѧ̀ пребыва́ютъ въ наро́дѣхъ чꙋжди́хъ. не ѿри́ни, гдⷭ҇и, стра́ждꙋщихъ люде́й твои́хъ до конца̀, но ѡ҆братѝ и҆ ᲂу҆твердѝ и҆̀хъ, на ка́мени за́повѣдей твои́хъ.

Доко́лѣ, гдⷭ҇и, пꙋ́ть нечести́выхъ спѣ́етсѧ, доко́лѣ пла́кати и҆́мать землѧ̀ ѿ ѕло́бы живꙋ́щихъ на не́й; а҆рхїерє́и, сщ҃е́нницы, кнѧ̑зи и҆ вѣ́рнїи лю́дїе низложе́ни и҆ ᲂу҆бїе́ни бы́ша: доко́лѣ, гдⷭ҇и, влⷣко ст҃ы́й и҆ и҆́стинный, не сꙋ́диши врагѡ́мъ твои̑мъ за кро́вь и҆́хъ; поми́лꙋй и҆ и҆зба́ви всѣ́хъ на́съ ѿ врагѡ́въ твои́хъ, и҆ сп҃сѝ дꙋ́шы на́шѧ.

И҆збавле́нїѧ не и҆мꙋ́щи, ско́рби и҆ стена́нїѧ и҆спо́лнисѧ землѧ̀, пре́жде хрⷭ҇тоимени́таѧ, во страда́нїи свое́мъ глаго́лющи: согрѣши́хомъ и҆ беззако́нновахомъ, ѿстꙋпи́вше ѿ тебє̀, гдⷭ҇и, и҆ за́повѣдей твои́хъ не послꙋ́шахомъ, нижѐ соблюдо́хомъ. ѡ҆братѝ на́съ, бж҃е, къ покаѧ́нїю, и҆ ᲂу҆твердѝ на недви́жимѣмъ ка́мени за́повѣдей твои́хъ.

Бг҃оро́диченъ: Оу҆пова́нїе и҆ наде́жда на́ша ты̀ є҆сѝ, прест҃а́ѧ влⷣчце, сп҃сѝ стра́ждꙋщее ѻ҆те́чество на́ше, и҆ лю́ди твоѧ̑ молѧ́щыѧсѧ и҆ и҆́мѧ твоѐ призыва́ющыѧ.

Конда́къ прпⷣбномч҃ницы кнѧги́ни є҆лїсаве́ты, гла́съ д҃:

Ѿсла́вы црⷭ҇твенныѧ, взе́мши крⷭ҇тъ хрⷭ҇то́въ, прешла̀ є҆сѝ къ сла́вѣ нбⷭ҇нѣй, молѧ́щисѧ за врагѝ, и҆ ѡ҆брѣла̀ є҆сѝ ра́дость вѣ́чнꙋю, ст҃а́ѧ мч҃нице кнѧги́не є҆лїсаве́то, съ варва́рою мч҃ницею: тѣ́мже моли́те ѡ҆ дꙋша́хъ на́шихъ.

Сѣда́ленъ, гла́съ з҃:

Страстоте́рпице ст҃а́ѧ кнѧги́не є҆лїсаве́то, є҆гда̀ тѧ̀ жи́вꙋ во а҆лапа́евскꙋю ша́хтꙋ вверго́ша, кꙋ́пнѡ со ст҃ы́ми мч҃ники ца́рскїѧ кро́ве, и҆̀же бѧ́хꙋ кнѧ́зїе се́ргїй, і҆ѡа́ннъ, кѡнстантӏ́нъ, и҆́горь и҆ влади́мїръ, та́кожде мч҃ница варва́ра, и҆ ст҃ы́й мч҃никъ ѳео́дѡръ: и҆знемога́ющымъ же надо́лзѣ всѣ̑мъ ѿ ра́нъ, ѡ҆блегча́ла є҆сѝ, є҆́ле жива̀ сꙋ́щи, страда̑нїѧ ᲂу҆мира́ющихъ, воспѣва́ющи сщ҃є́ннаѧ пѣснопѣ̑нїѧ, ꙗ҆̀же слы́шахꙋ мимоходѧ́щїи. сегѡ̀ ра́ди мо́лимъ тѧ̀: моли́сѧ хрⷭ҇тꙋ̀ бг҃ꙋ, прегрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.

Сла́ва, и҆ ны́нѣ, бг҃оро́диченъ, гла́съ то́йже:

Є҆гда̀ предста́нꙋ предꙿ лице́мъ созда́телѧ моегѡ̀ въ де́нь првⷣнагѡ сꙋда̀ є҆гѡ̀, тогда̀, влⷣчце, предста́ни мѝ, и҆ вѣ́чныѧ мꙋ́ки и҆зба́ви мѧ̀, да не сни́дꙋ во а҆́дъ, но да сп҃сꙋ́сѧ твои́мъ, прест҃а́ѧ бцⷣе, застꙋпле́нїемъ.

Пѣ́снь д҃.

І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Беззакѡ́нїѧ люде́й твои́хъ вели̑ка бы́ша предꙿ ѻ҆чи́ма твои́ма, гдⷭ҇и, сегѡ̀ ра́ди безбо́жнїи вразѝ ст҃и̑лища твоѧ̑ ѡ҆скверни́ша и҆ разори́ша, ꙗ҆́коже прⷪ҇ро́къ и҆са́їа речѐ: пра́здникѡвъ ва́шихъ ненави́дитъ дꙋша̀ моѧ̀, не стерплю̀ грѣхѡ́въ ва́шихъ, є҆гда̀ простре́те рꙋ́ки ва́шѧ ко мнѣ̀, ѿвращꙋ̀ ѻ҆́чи моѝ ѿ ва́съ: приближа́ютсѧ бо мнѣ̀ лю́дїе сӏ́и ᲂу҆сты̀ свои́ми, срⷣце же и҆́хъ дале́че ѿстои́тъ ѿ менє̀. разꙋмѣ́юще сїѐ, ны́нѣ ка́емсѧ, и҆ ѡ҆браща́емсѧ къ тебѣ̀, да преста́нетъ гнѣ́въ тво́й, да побо́реши борю́щыѧ ны̀, и҆ да рече́мъ: сла́ва си́лѣ твое́й, гдⷭ҇и.

Ѽ ка́кѡ бре́мѧ беззако́нїй наро́да твоегѡ̀, гдⷭ҇и, ᲂу҆мно́жисѧ! ты̀ ѿѧ́лъ є҆сѝ си́лꙋ на́шꙋ, пре́далъ є҆сѝ на́съ въ рꙋ́ки беззако́нникѡвъ, и҆ содѣ́лашасѧ всѝ рабѝ. то́кмѡ ты̀, є҆ди́не гдⷭ҇и, мо́жеши, а҆́ще хо́щеши, свободи́ти ны̀, є҆гда̀ позна́емъ грѣхѝ своѧ̑, и҆ ѡ҆брати́мсѧ къ тебѣ̀, созда́телю на́шемꙋ, и҆ просла́вимъ тѧ̀.

Жи́знь во вѣ́ки бл҃же́ннаѧ то́кмѡ въ бз҃ѣ є҆́сть, но ѹ҆́зокъ пꙋ́ть, вводѧ́й въ живо́тъ: сїѧ̑ забы̀ наро́дъ тво́й, гдⷭ҇и, и҆ не послꙋ́ша словесѐ твоегѡ̀, хрⷭ҇тѐ цр҃ю̀, но широ́кимъ пꙋте́мъ грѣха̀ по́йде. прїи́де же на ны̀ наси́лїе и҆ па́гꙋба, и҆згна́нїе и҆ сме́рть, да ᲂу҆разꙋмѣ́емъ є҆ди́ный и҆́стинный пꙋ́ть тво́й, сп҃си́телю на́шъ, и҆ ѡ҆брати́мсѧ, и҆ просла́вимъ тѧ̀.

Бг҃оро́диченъ: Ты̀ є҆сѝ, пречⷭ҇таѧ бцⷣе, прибѣ́жище на́ше и҆ ᲂу҆твержде́нїе: молѝ сн҃а твоего̀ и҆ бг҃а на́шего, пода́ти на́мъ сп҃се́нїе, и҆ грѣхѡ́въ ѡ҆ставле́нїе. Пѣ́снь є҃.

І҆рмо́съ: Свѣ́та пода́телю, и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бг҃а не зна́емъ.

Є҆гда̀ ѿри́нꙋлъ є҆́сть гдⷭ҇ь царѧ̀, и҆ кнѧ́зѧ, и҆ сщ҃е́нника, хра́мы же и҆ же́ртвенники и҆ ст҃и̑лища своѧ̑ не пощадѣ̀, тогда̀ возскорбѣ́хъ, срⷣце моѐ смѧте́сѧ во мнѣ̀, воздыха́ю, и҆ нѣ́сть ᲂу҆тѣша́ющагѡ: при́зри, гдⷭ҇и, и҆ пощадѝ, просвѣти́ ны повелѣ̑нїи твои́ми, да ѡ҆брати́мсѧ къ тебѣ̀, и҆ послꙋ́жимъ тѝ.

Лю́дїе твоѝ, гдⷭ҇и, бѣжа́ти вожделѣ́ша ѿ наси́лїѧ врагѡ́въ, и҆ не возмого́ша, и҆нӏ́и же въ наро́дѣхъ чꙋжди́хъ скита́ютсѧ: сїѐ бы́сть, ꙗ҆́кѡ ло́жнїи вожди̑ вѣща́ша сꙋетꙋ̀ и҆ безꙋ́мїе, и҆ не глаго́лахꙋ ѡ҆ грѣсѣ́хъ, да ѿвратѧ́тъ гнѣ́въ бж҃їй, плѣне́нїе и҆ и҆згна́нїе. ны́нѣ ѿверзо́ша на ны̀ ᲂу҆ста̀ своѧ̑ всѝ вразѝ на́ши, поскрежета́ша зꙋбы̑ свои́ми, и҆ рѣ́ша: поглоти́мъ и҆̀хъ. возста́ни, воззовѝ въ нощѝ, и҆злива́й мл҃твꙋ ко гдⷭ҇ꙋ, простира́ѧ къ немꙋ̀ рꙋ́цѣ и҆ глаго́лѧ: ви́ждь, гдⷭ҇и, поги́бель на́шꙋ, просвѣтѝ, при́зри и҆ поми́лꙋй.

Ю҆́нѡши и҆ дѣ̑вы, ста́рцы и҆ младе́нцы непови́ннїи ᲂу҆бїе́ни бы́ша, погна̀ вра́гъ дꙋ́шꙋ мою̀, смири́лъ є҆́сть въ зе́млю живо́тъ мо́й, посади́лъ мѧ̀ є҆́сть въ те́мныхъ, ꙗ҆́кѡ мє́ртвыѧ ѿ вѣ́ка, и҆ ᲂу҆ны̀ во мнѣ̀ дꙋ́хъ мо́й, во мнѣ̀ смѧте́сѧ срⷣце моѐ, поги́бе си́ла моѧ̀ и҆ наде́жда моѧ̀ на гдⷭ҇а: помѧнѝ, гдⷭ҇и, нищетꙋ̀ мою̀ и҆ го́ресть. сїѧ̑ глаго́лахъ въ срⷣцѣ мое́мъ, сегѡ̀ ра́ди потерплю̀ страда́нїе ѿ бг҃а, ꙗ҆́кѡ да при́зритъ гдⷭ҇ь на смире́нїе моѐ.

Бг҃оро́диченъ: Бг҃а, є҆го́же родила̀ є҆сѝ, пречⷭ҇таѧ мрӏ́е, молѝ рабѡ́мъ твои̑мъ пода́ти прегрѣше́нїй ѡ҆ставле́нїе. Пѣ́снь ѕ҃.

І҆рмо́съ: Во глꙋбинѣ̀ грѣхо́внѣй содержи́мь є҆́смь, сп҃се, и҆ въ пꙋчи́нѣ жите́йстѣй ѡ҆бꙋрева́емь: но ꙗ҆́коже і҆ѡ́нꙋ ѿ ѕвѣ́рѧ, и҆ менѐ ѿ страсте́й возведѝ, и҆ сп҃си́ мѧ.

Дадѐ гдⷭ҇ь ᲂу҆тѣше́нїе, ꙗ҆́кѡ млⷭ҇ть гдⷭ҇нѧ не ѡ҆ста́ви на́съ, и҆ не сконча́шасѧ щедрѡ́ты є҆гѡ̀, ѡ҆бновлѧ́ютсѧ бо на всѧ́къ де́нь. сегѡ̀ ра́ди бꙋ́демъ надѣ́ющесѧ на бг҃а, гдⷭ҇ь ча́сть на́ша є҆́сть, пребꙋ́демъ ᲂу҆пова́юще на него̀, могꙋ́щаго и҆зба́вити на́съ ѿ всѣ́хъ бѣ́дъ, ꙗ҆́коже і҆ѡ́нꙋ ѿ ѕвѣ́рѧ морска́гѡ.

И҆́щꙋщымъ бг҃а бл҃го є҆́сть, бл҃гъ бо гдⷭ҇ь надѣ́ющымсѧ на него̀, бл҃го дꙋшѣ̀, въ терпѣ́нїи ѡ҆жида́ющей сп҃се́нїѧ бж҃їѧ, даю́щей лицѐ своѐ бїю́щемꙋ, и҆ прїе́млющей поноше́нїе, ꙗ҆́кѡ не на вѣ́ки ѿри́нетъ гдⷭ҇ь, но и҆зба́витъ ѿ поги́бели дꙋ́шы смири́вшихсѧ, и҆ ᲂу҆пова́ющихъ на него̀.

Согрѣши́вшымъ лю́демъ посла̀ гдⷭ҇ь го́ре, но поми́лꙋетъ по вели́цѣй бл҃гости и҆ любвѝ въ попече́нїи свое́мъ, порази́ бо и҆ ѡ҆горчѝ сы́ны человѣ́чєскїѧ не ѿ и҆зволе́нїѧ срⷣца своегѡ̀, но є҆гда̀ попра́ша за́пѡвѣди є҆гѡ̀, ꙗ҆́кѡ ѿ вы́шнѧгѡ и҆схо́дитъ наказа́нїе и҆ бл҃годе́нствїе. да не возро́пщетъ ѡ҆ наказа́нїи всѧ́къ живы́й, да сѣ́тꙋетъ же ѡ҆ грѣсѣ́хъ свои́хъ и҆ воспла́четъ, до́ндеже приклони́тсѧ и҆ ᲂу҆ви́дитъ гдⷭ҇ь съ нб҃сѐ.

Бг҃оро́диченъ: Ны́нѣ къ тебѣ̀ прибѣга́ю, пречⷭ҇таѧ, сп҃си́ мѧ мл҃твами твои́ми и҆ соблюдѝ: є҆ли̑ка бо хо́щеши, мо́жеши, ꙗ҆́кѡ мт҃и всемогꙋ́щагѡ.

Конда́къ, гла́съ ѕ҃:

Наде́жда царѧ̀ мч҃ника съ цари́цею и҆ ча́ды и҆ слꙋга́ми ᲂу҆крѣпѝ, и҆ къ твое́й любвѝ ѡ҆крилѝ, бꙋ́дꙋщїй и҆̀мъ поко́й предвозвѣсти́вши: тѣ́хъ мл҃твами, гдⷭ҇и, поми́лꙋй на́съ.

І҆́косъ: Зрѧ̀ вѣ́рꙋ хрⷭ҇то́вꙋ, бл҃гочⷭ҇ти́вымъ царе́мъ во странѣ̀ рѡссӏ́йстѣй ᲂу҆крѣплѧ́емꙋ, и҆ не терпѧ̀ сегѡ̀, вразѝ бж҃їи погꙋби́ти хрⷭ҇толюби́ваго царѧ̀ мч҃ника нїкола́а ᲂу҆мы́слиша, и҆ преда́ша є҆го̀ непови́ннѣй сме́рти, со бл҃гочⷭ҇ти́вою цари́цею и҆ ча̑ды и҆ слꙋга́ми и҆ со всѣ́мъ ца́рственнымъ ро́домъ: но прельсти́шасѧ, ꙗ҆́кѡ пꙋ́ть нечести́выхъ поги́бнетъ, првⷣницы же во вѣ́ки жи́ви бꙋ́дꙋтъ, и҆ вмѣ́стѡ па́гꙋбы и҆ вре́да, сотвори́ша и҆̀хъ сла̑вныѧ мч҃ники и҆ застꙋ́пники предꙿ бг҃омъ. кро́вїю и҆́хъ и҆ новомч҃никъ всѣ́хъ страна̀ рѡссӏ́йскаѧ, богобѡ́рцы ᲂу҆гнета́емаѧ, сп҃се́на бꙋ́детъ, поне́же кро́вь сїѧ̀ сѣ́мѧ но́выѧ жи́зни во хрⷭ҇тѣ̀ є҆́сть: тѣ́хъ мл҃твами, гдⷭ҇и, поми́лꙋй на́съ.

Пѣ́снь з҃.

І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆҆҆тє́цъ на́шихъ.

Ѡ҆брати́ ны, гдⷭ҇и, къ тебѣ̀, и҆ ѡ҆брати́мсѧ, ѡ҆бновѝ дни̑ на́шѧ слꙋже́нїемъ тебѣ̀, ꙗ҆́коже пре́жде, ꙗ҆́кѡ бл҃гослове́нъ є҆сѝ, и҆ хва́льно и҆ просла́влено и҆́мѧ твоѐ во вѣ́ки. ꙗ҆́кѡ првⷣнъ є҆сѝ во все́мъ, є҆́же сотвори́лъ є҆сѝ на́мъ, и҆ всѧ̑ дѣла̀ твоѧ̑ и҆́стинна, и҆ пра́ви пꙋтїѐ твоѝ, и҆ всѝ сꙋдѝ твоѝ и҆́стинни. сегѡ̀ ра́ди дꙋше́ю сокрꙋше́нною и҆ дꙋ́хомъ смире́ннымъ глаго́лемъ: бл҃гослове́нъ є҆сѝ, бж҃е, препѣ́тый и҆ превозноси́мый во вѣ́ки.

Гдⷭ҇и бж҃е, бл҃гослове́нъ є҆сѝ, ꙗ҆́кѡ и҆́стиннымъ сꙋдо́мъ наве́лъ є҆сѝ сїѧ̑ всѧ̑ страда̑нїѧ на ны̀, грѣ̑хъ ра́ди на́шихъ. ꙗ҆́кѡ согрѣши́хомъ и҆ беззако́нновахомъ, и҆ не соблюдо́хомъ, и҆ не сохрани́хомъ, ꙗ҆́коже заповѣ́далъ є҆сѝ на́мъ, да бл҃го на́мъ бꙋ́детъ, и҆ да просла́вимъ и҆́мѧ сла́вы твоеѧ̀ ст҃о́е, препѣ́тое и҆ превозноси́мое во вѣ́ки.

Рѣши́телю всѣ́хъ долгѡ́въ грѣхо́вныхъ, гдⷭ҇и, блгⷣть пода́ждь проще́нїѧ прегрѣши́вшей странѣ̀ рѡссӏ́йстѣй, ю҆́же наказа́лъ є҆сѝ ра́нами го́рькими. ѻ҆ба́че не во гнѣ́вѣ твое́мъ, но по мно́жествꙋ щедро́тъ твои́хъ, и҆ неизрече́ннѣй млⷭ҇ти твое́й, ѡ҆чⷭ҇ти зе́млю правосла́внꙋю ѿ безбо́жныхъ врагѡ́въ, возста́ви, ще́дрый, царѧ̀ пома́занника твоего̀, и҆ ᲂу҆слы́ши ны̀, ми́ръ цр҃кви и҆ сп҃се́нїе лю́демъ твои̑мъ да́рꙋй, мо́литъ тѧ̀ ца́рь страстоте́рпецъ, и҆ ве́сь безчи́сленный со́нмъ но́выхъ мч҃никъ, є҆ди́наго бл҃гослове́ннаго бг҃а ѻ҆тє́цъ на́шихъ.

Бг҃оро́диченъ: Бцⷣе дв҃о, ро́ждшаѧ сло́во па́че сло́ва, зижди́телѧ твоего̀, того̀ молѝ, съ царе́мъ великомч҃никомъ, цари́цею и҆ ча́ды и҆ слꙋга́ми, и҆ про́чими ца́рственными мч҃ники, и҆ всѣ́ми новомч҃ники рѡссӏ́йскими, поми́ловати дꙋ́шы на́шѧ. Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Шꙋ́їѧгѡ стоѧ́нїѧ и҆зба́ви на́съ, гдⷭ҇и, всѧ̑ къ по́льзѣ на́шей стро́ѧй, посла́вый ѻ҆́гненное ѡ҆чище́нїе странѣ̀ на́шей, да непреста́ннѡ взыва́емъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

И҆́мамы сокро́вище ве́лїе вѣ́рꙋ ст҃ꙋ́ю, ю҆́же хрⷭ҇то́съ на́мъ недостѡ́йнымъ дадѐ, да сохрани́мъ ю҆̀ во бл҃годе́нствїи и҆ во страда́нїихъ, ꙗ҆́коже со́нмъ вели́кїй но́выхъ страстоте́рпєцъ да́же до сме́рти вѣ́рꙋ сохранѝ, и҆ да глаго́лемъ съ ни́ми: гдⷭ҇а по́йте, дѣла̀, и҆ превозноси́те во вѣ́ки.

Возжела́въ всебл҃гӏ́й бг҃ъ, ꙗ҆ви́ти крѣ́пость вѣ́ры и҆ си́лꙋ терпѣ́нїѧ ца́рственныхъ мч҃никъ, дадѐ и҆̀мъ и҆спи́ти ча́шꙋ го́рькихъ страда́нїй, и҆ прїѧ́ти мч҃ническꙋю сме́рть, ѻ҆ни́ же не поропта́ша, но ꙗ҆́кѡ а҆́гнцы неѕло́бивїи, не ѿверзо́ша ѹ҆́стъ свои́хъ, съ терпѣ́нїемъ же и҆ ра́достїю всѧ̑ претерпѣ́ша, взыва́юще: гдⷭ҇а по́йте и҆ превозноси́те во вѣ́ки.

Бг҃оро́диченъ: Сп҃се́нїѧ хода́таица на́мъ ꙗ҆ви́ласѧ є҆сѝ, бцⷣе, ро́ждшаѧ сп҃са и҆ влⷣкꙋ всѣ́хъ. тѣ́мже мо́лимъ тѧ̀: и҆збавле́нїе ѿ безбѡ́жникъ и҆схода́тайствꙋй, лю́тѣ стра́ждꙋщей странѣ̀ рѡссӏ́йстѣй, и҆ сп҃се́нїѧ сподо́би всѣ́хъ, пѣсносло́вѧщихъ тѧ̀ вѣ́рнѡ во всѧ̑ вѣ́ки. Пѣ́снь ѳ҃.

І҆рмо́съ: Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ: ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.

Широ́кїй пꙋ́ть грѣха̀, вводѧ́й въ поги́бель, и҆ мно́зи сꙋ́ть входѧ́щїи и҆́мъ, речѐ гдⷭ҇ь. не послꙋ́шаша сегѡ̀ є҆ѵⷢ҇льскагѡ гла́са лю́дїе рѡссӏ́йстїи, и҆ гнѣ́въ бж҃їй пости́же и҆̀хъ, ѿ негѡ́же и҆зба́ви на́съ, хрⷭ҇тѐ, мо́литъ тѧ̀ ст҃ы́й великомч҃никъ ца́рь нїкола́й, и҆ и҆̀же съ ни́мъ ᲂу҆бїе́ннїи, и҆ ꙗ҆́кѡ чл҃вѣколю́бецъ, поми́лꙋй и҆ сп҃сѝ дꙋ́шы на́шѧ.

І҆и҃се хрⷭ҇тѐ, бж҃е на́шъ, ѡ҆брати́ ны по мно́жествꙋ млⷭ҇ти твоеѧ̀, и҆ сп҃се́мсѧ, при́зри съ нб҃сѐ млⷭ҇тїю и҆ любо́вїю, и҆ ви́ждь, ꙗ҆́кѡ пре́далъ є҆сѝ на́съ въ рꙋ́ки беззако́нныхъ, и҆ є҆смы̀ смире́ни по все́й землѝ, грѣ̑хъ ра́ди на́шихъ. и҆ ны́нѣ возслѣ́дꙋемъ всѣ́мъ срⷣцемъ, и҆ бои́мсѧ тебє̀, и҆ и҆́щемъ лица̀ твоегѡ̀: не посрамѝ на́съ, мл҃твами ст҃ы́хъ ца́рственныхъ страстоте́рпцєвъ, но сп҃сѝ дꙋ́шы на́шѧ.

Ꙗ҆вѝ, гдⷭ҇и, си́лꙋ твою̀, мо́литъ тѧ̀ ца́рь страстоте́рпецъ, и҆змѝ на́съ ѿ безбо́жныхъ вра̑гъ на́шихъ, по чꙋдесє́мъ твои̑мъ, и҆ сотворѝ съ на́ми по кро́тости твое́й, и҆ по мно́жествꙋ млⷭ҇ти твоеѧ̀, и҆ да посра́мѧтсѧ всѝ ꙗ҆влѧ́ющїи рабѡ́мъ твои̑мъ ѕла̑ѧ, и҆ крѣ́пость и҆́хъ да сокрꙋши́тсѧ, и҆ да разꙋмѣ́ютъ, ꙗ҆́кѡ ты̀ є҆сѝ гдⷭ҇ь бг҃ъ є҆ди́нъ по все́й вселе́ннѣй, сла́венъ и҆ сп҃са́ѧй дꙋ́шы на́шѧ.

Бг҃оро́диченъ: Ты̀ є҆сѝ крѣ́пость на́ша, ты̀ є҆сѝ похвала̀ и҆ ра́дованїе, храни́тельница на́ша, застꙋпле́нїе, прибѣ́жище, предста́тельница непобѣди́маѧ и҆ покро́въ страны̀ рѡссӏ́йскїѧ: пречⷭ҇таѧ бцⷣе, съ царе́мъ мч҃никомъ и҆ вели́кимъ со́нмомъ новомч҃никъ, молѝ сп҃стѝ рабы̑ твоѧ̑.

Свѣти́ленъ, гла́съ в҃:

Страда́вшїи тебє̀ ра́ди ца́рственнїи мч҃ницы, хрⷭ҇тѐ, мнѡ́гїѧ мꙋ́ки претерпѣ́ша, и҆ сла̑вныѧ вѣнцы̀ прїѧ́ша на нб҃сѣ́хъ, да мо́лѧтсѧ ѡ҆ дꙋша́хъ на́шихъ. Два́жды.Сла́ва, и҆ ны́нѣ, бг҃оро́диченъ:

По бз҃ѣ ᲂу҆пова́нїе и҆мꙋ́ще на тѧ̀, пречⷭ҇таѧ бцⷣе, мо́лимъ тѝ сѧ: ро́ждшагосѧ и҆зꙿ тебє̀ ᲂу҆молѝ, дарова́ти ми́ръ вселе́ннѣй и҆ ве́лїю млⷭ҇ть.

На хвали́техъ стїхи̑ры на д҃, гла́съ г҃:

Агнцы чⷭ҇тїи приведо́стесѧ ко влⷣцѣ, страстоте́рпцы ца́рственнїи мч҃ницы, того̀ моли́те сп҃стѝ дꙋ́шы на́шѧ. Два́жды.

Ра̑ны ва́шѧ и҆ ꙗ҆́звы, сла́внїи ца́рственнїи мч҃ницы, ꙗ҆́звы грѣхѡ́вныѧ и҆сцѣлѧ́ютъ всѣ́хъ вѣ́рныхъ, ст҃ӏ́и страда́льцы гдⷭ҇ни, мно́гомꙋ терпѣ́нїю наꙋча́юще.

Лю́тыми ра́нами и҆ страда́ньми мꙋ́чими, ст҃ӏ́и ца́рственнїи страстоте́рпцы, не ѿверго́стесѧ и҆́стинныѧ жи́зни, гдⷭ҇а на́шегѡ, ни богобо́рцєвъ ᲂу҆страши́стесѧ: тѣ́мже мл҃твами ва́шими всѣ́хъ на́съ ᲂу҆тверди́те. Сла́ва, гла́съ ѕ҃:

Мл҃твами, хрⷭ҇тѐ, ст҃ы́хъ мч҃никъ твои́хъ, ᲂу҆бїе́нныхъ за вѣ́рꙋ въ тѧ̀, вели́кихъ кнѧзе́й мїхаи́ла, па́ѵла, дими́трїа и҆ геѡ́ргїа, и҆ вѣ́рныхъ ца́рскихъ слꙋ́гъ: и҆лїѝ, васӏ́лїа и҆ є҆ѵге́нїа, а҆настасӏ́и, є҆катерӏ́ны и҆ а҆́нны, а҆леѯӏ́а, і҆ѡа́нна, кли́мента, і҆ѡа́нна и҆ нїкола́а, поми́лꙋй и҆ сп҃сѝ дꙋ́шы на́шѧ, ꙗ҆́кѡ бл҃гъ и҆ чл҃вѣколю́бецъ.

И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:

Славосло́вїе вели́кое. Є҆ктєнїѝ, и҆ ѿпꙋ́стъ.

На лїтꙋргӏ́и, бл҃жє́нна ѿ канѡ́на, пѣ́снь г҃ и҆ ѕ҃.

Прокӏ́менъ, гла́съ д҃: Тебє̀ ра́ди, гдⷭ҇и, ᲂу҆мерщвлѧ́еми є҆смы̀ ве́сь де́нь.

Стӏ́хъ: Вмѣни́хомсѧ ꙗ҆́кѡ ѻ҆́вцы заколе́нїѧ.А҆пⷭ҇лъ къ ри́млѧнѡмъ, зача́ло ч҃ѳ.

А҆ллилꙋ́їа, гла́съ а҃: Бг҃ъ на́мъ прибѣ́жище и҆ си́ла, помо́щникъ въ ско́рбехъ, ѡ҆брѣ́тшихъ ны̀ ѕѣлѡ̀. Стӏ́хъ: Гдⷭ҇и, сп҃сѝ цр҃ѧ̀, и҆ ᲂу҆слы́ши ны̀, во́ньже

а҆́ще де́нь призове́мъ тѧ̀. Є҆ѵⷢ҇лїе ѿ і҆ѡа́нна, зача́ло н҃в.

Прича́стенъ: Ра́дꙋйтесѧ, првⷣнїи, ѡ҆ гдⷭ҇ѣ:

Покаѧ́ннаѧ мл҃тва, что́маѧ на лїтꙋргӏ́и

въ де́нь ᲂу҆бїе́нїѧ ца́рственныхъ мч҃никѡвъ:

Бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки, ꙗ҆́кѡ првⷣнъ є҆сѝ ѡ҆ всѣ́хъ, ꙗ҆̀же сотвори́лъ є҆сѝ на́мъ, и҆ всѧ̑ дѣла̀ твоѧ̑ и҆́стинна, и҆ пра́ви пꙋтїѐ твоѝ, и҆ всѝ сꙋдѝ твоѝ и҆́стинни: и҆ сꙋдьбы̑ и҆́стинны сотвори́лъ є҆сѝ по всѣ̑мъ, ꙗ҆̀же наве́лъ є҆сѝ на ны̀, ꙗ҆́кѡ согрѣши́хомъ и҆ беззако́нновахомъ, ѿстꙋпи́вше ѿ тебє̀, и҆ прегрѣши́хомъ во всѣ́хъ, и҆ за́повѣдей твои́хъ не послꙋ́шахомъ, нижѐ соблюдо́хомъ, нижѐ сотвори́хомъ, ꙗ҆́коже заповѣ́далъ є҆сѝ на́мъ, да бл҃го на́мъ бꙋ́детъ. И҆ пре́далъ є҆сѝ на́съ въ рꙋ́ки врагѡ́въ беззако́нныхъ, ме́рзкихъ ѿстꙋ́пникѡвъ, и҆ человѣ́кѡмъ непра́вєднымъ и҆ лꙋка́внѣйшымъ па́че всеѧ̀ землѝ. И҆ ны́нѣ нѣ́сть на́мъ ѿве́рсти ѹ҆́стъ: стꙋ́дъ и҆ поноше́нїе бы́хомъ рабѡ́мъ твои̑мъ, и҆ чтꙋ́щымъ тѧ̀. Не преда́ждь же на́съ до конца̀, и҆́мене твоегѡ̀ ра́ди, и҆ не разорѝ завѣ́та твоегѡ̀, и҆ не ѿста́ви млⷭ҇ти твоеѧ̀ ѿ на́съ. Ꙗ҆́кѡ, влⷣко, ᲂу҆ма́лихомсѧ па́че всѣ́хъ ꙗ҆зы̑къ, и҆ є҆смы̀ смире́ни по все́й землѝ дне́сь, грѣ̑хъ ра́ди на́шихъ, и҆ нѣ́сть во вре́мѧ сїѐ нача́льника, прⷪ҇ро́ка и҆ вожда̀. И҆ ны́нѣ, возслѣ́дꙋемъ всѣ́мъ срⷣцемъ, и҆ бои́мсѧ тебє̀, и҆ и҆́щемъ лица̀ твоегѡ̀: не посрамѝ на́съ, но сотворѝ съ на́ми по кро́тости твое́й, и҆ по мно́жествꙋ млⷭ҇ти твоеѧ̀, и҆ мл҃твъ ра́ди пречⷭ҇тыѧ мт҃ре твоеѧ̀, и҆ всѣ́хъ ст҃ы́хъ твои́хъ, и҆змѝ на́съ по чꙋдесє́мъ твои̑мъ, и҆ да́ждь сла́вꙋ и҆́мени твоемꙋ̀, гдⷭ҇и. И҆ да посра́мѧтсѧ всѝ ꙗ҆влѧ́ющїи рабѡ́мъ твои̑мъ ѕла̑ѧ, и҆ да постыдѧ́тсѧ ѿ всѧ́кїѧ си́лы, и҆ крѣ́пость и҆́хъ да сокрꙋши́тсѧ, и҆ да разꙋмѣ́ютъ всѝ, ꙗ҆́кѡ ты̀ є҆сѝ гдⷭ҇ь бг҃ъ на́шъ, є҆ди́нъ и҆ сла́венъ по все́й вселе́ннѣй. А҆ми́нь.

Мл҃тва ко ст҃о́мꙋ царю̀ мч҃никꙋ нїкола́ю:

Ѽст҃ы́й страстоте́рпче, царю̀ мч҃ниче нїко́лае, пома́занника своего̀ тѧ̀ гдⷭ҇ь и҆збра̀, во є҆́же млⷭ҇тивнѡ и҆ пра́вѡ сꙋди́ти лю́демъ твои̑мъ, и҆ храни́телемъ ца́рства правосла́внагѡ бы́ти. Ца́рское слꙋже́нїе сїѐ, и҆ ѡ҆ дꙋша́хъ попече́нїе, со стра́хомъ бж҃їимъ соверша́лъ є҆сѝ. И҆спытꙋ́ѧ же тѧ̀, ꙗ҆́кѡ зла́то въ горни́лѣ, скѡ́рби гѡ́рькїѧ гдⷭ҇ь тѝ попꙋстѝ, ꙗ҆́коже і҆́ѡвꙋ многострада́льномꙋ, послѣди́ же престо́ла ца́рскагѡ лише́нїе и҆ мч҃ническꙋю сме́рть посла́ ти. Всѧ̑ сїѧ̑ кро́ткѡ претерпѣ́вый, ꙗ҆́кѡ и҆́стинный ра́бъ хрⷭ҇то́въ, наслажда́ешисѧ ны́нѣ вы́шнїѧ сла́вы ᲂу҆ прⷭ҇то́ла всѣ́хъ цр҃ѧ̀, кꙋ́пнѡ со ст҃ы́ми мч҃ники: ст҃о́ю цари́цею а҆леѯа́ндрою, ст҃ы́мъ ѻ҆́трокомъ царе́вичемъ а҆леѯӏ́емъ, ст҃ы́ми царе́внами ѻ҆́льгою, татїа́ною, марӏ́ею и҆ а҆настасӏ́ею, и҆ съ вѣ́рными слꙋга́ми твои́ми, та́же со ст҃о́ю мч҃ницею кнѧги́нею є҆лїсаве́тою, и҆ со всѣ́ми ца́рственными мч҃ники, и҆ ст҃о́ю мч҃ницею варва́рою. Но ꙗ҆́кѡ и҆мѣ́ѧ дерзнове́нїе ве́лїе ᲂу҆ хрⷭ҇та̀ цр҃ѧ̀, є҆гѡ́же ра́ди всѝ пострада́ша, молѝ съ ни́ми, да ѿпꙋ́ститъ гдⷭ҇ь грѣ́хъ наро́да, не возбрани́вшагѡ ᲂу҆бїе́нїе твоѐ, царѧ̀ и҆ пома́занника бж҃їѧ, да и҆зба́витъ гдⷭ҇ь многострада́льнꙋю странꙋ̀ рѡссӏ́йскꙋю ѿ лю́тыхъ безбѡ́жникъ, за грѣхѝ на́шѧ и҆ ѿстꙋпле́нїе ѿ бг҃а попꙋще́нныхъ, и҆ возста́витъ престо́лъ правосла́вныхъ царе́й, на́мъ же пода́стъ грѣхѡ́въ проще́нїе, и҆ на всѧ́кꙋю добродѣ́тель наста́витъ на́съ, да стѧжи́мъ смире́нїе, кро́тость и҆ любо́вь, ꙗ҆̀же сӏ́и мч҃ницы ꙗ҆ви́ша, да сподо́бимсѧ нбⷭ҇нагѡ црⷭ҇твїѧ, и҆дѣ́же кꙋ́пнѡ съ тобо́ю, и҆ всѣ́ми ст҃ы́ми новомч҃ники и҆ и҆сповѣ̑дники рѡссӏ́йскими, просла́вимъ ѻ҆ц҃а̀ и҆ сн҃а и҆ ст҃а́го дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.