Мѣ́­сѧ­ца ма́їа въ а҃-й де́нь.

Слꙋ́жба ст҃ѣ́й бл҃говѣ́рнѣй цари́цѣ тама́рѣ.

На вели́цѣй вече́рни.

Бл҃же́нъ мꙋ́жъ: а҃-й а҆н­тї­фѡ́нъ.

На Гдⷭ҇и, воз­зва́хъ: стї­хи̑­ры, гла́съ а҃:

Съ ли̑ки и҆ тѷм­па́­ны срѣ­та́­емъ тѧ̀, ца­ри́­це, во і҆ерⷭ҇ли́мъ го́р­нїй грѧ­дꙋ́­щꙋю, ѿ рꙋкѝ все­дер­жи́­те­ле­вы ᲂу҆­вѣн­ча́­ти­сѧ, и҆ вхо­дѧ́­щꙋю во ст҃ы́й и҆ вѣ́ч­ный гра́дъ, во́нь­же по сло́­вꙋ а҆пⷭ҇ло­вꙋ сла́­вꙋ свою̀ при­но́­си­ши, ꙗ҆́кѡ да́ръ хрⷭ҇тꙋ̀ бг҃ꙋ.

І҆́вер­скаѧ стра­но̀, кра­сꙋ́й­сѧ, го́ры и҆ хо́л­ми, взы­гра́й­те, по­то́ци, вос­пле­щи́­те ве­се́­лї­емъ, и҆ лю́­дїе, тор­же­ствꙋ́й­те: се́ бо ца­ри́­ца ва́ша въ вѣ̑ч­ныѧ кро́­вы съ че́­стїю прї­е́м­лет­сѧ, и҆ ᲂу҆ прⷭ҇то́­ла стра́ш­на­гѡ цр҃ѧ̀ ца­ре́й по­став­лѧ́­ет­сѧ, во є҆́же мо­лє́­нїѧ за ро́дъ сво́й при́­снѡ при­но­си́­ти.

Нӏ́но ст҃а́ѧ, а҆пⷭ҇лѡмъ по­ре­вно­ва́в­шаѧ, и҆ і҆́вер­скꙋю стра­нꙋ̀ хрⷭ҇то́­вою вѣ́­рою про­свѣ­ти́в­шаѧ, прї­и­дѝ ны́нѣ, цѣ­лꙋ́й та­ма́­рꙋ сла́в­нꙋю, твоѐ бл҃го́е сѣ́­ѧ­нїе воз­ра­сти́в­шꙋю, и҆ сто­ри́ч­ный пло́дъ хрⷭ҇то́­ви при­не́с­шꙋю, и҆ сꙋ­гꙋ́­бꙋю сла́­вꙋ по­жа́в­шꙋю, зем­нꙋ́ю ᲂу҆̀бо и҆ нбⷭ҇нꙋю.

Сла́­ва, гла́съ є҃:

І҆́вер­скїѧ зе­млѝ сла́­ва не­за­хо­ди́­маѧ, цр҃кве пра­во­сла́в­ныѧ свѣ́т­лое ᲂу҆­кра­ше́­нїе, по­сре­дѣ̀ ца­ри́цъ, ꙗ҆́кѡ лꙋна̀ по­сре­дѣ̀ ѕвѣ́здъ, сї­ѧ́­етъ та­ма́­ра пре­ве­ли́­каѧ.

И҆ ны́нѣ, пра́з­дни­ка.

Вхо́дъ, про­кӏ́­менъ днѐ, и҆ чтє́­нїѧ трѝ.

Ца́рствъ тре́­тї­ихъ чте́­нїе:

Ста̀ со­ло­мѡ́нъ предꙿ ли­це́мъ ѻ҆л­та­рѧ̀ гдⷭ҇нѧ, предꙿ всѣ́мъ со­бо́­ромъ і҆и҃ле­вымъ, и҆ воз­дви́­же рꙋ́цѣ своѝ на нб҃о, И҆ речѐ: гдⷭ҇и бж҃е і҆и҃левъ, нѣ́сть, ꙗ҆́ко­же ты̀, бг҃ъ на нб҃сѝ горѣ̀, и҆ на зе­млѝ ни́зꙋ. А҆́ще нб҃о, и҆ нб҃о не­бе­сѐ не до­влѣ́­ютъ тѝ, коль­мѝ па́че хра́мъ се́й, є҆го́­же со­зда́хъ и҆́ме­ни тво­е­мꙋ̀; И҆ да при́­зри­ши на мл҃твꙋ мою̀, гдⷭ҇и бж҃е і҆и҃левъ, по­слꙋ́­ша­ти мл҃твы, є҆́юже мо́­лит­сѧ ра́бъ тво́й предꙿ то­бо́ю къ тебѣ̀ дне́сь, Да бꙋ́­дꙋтъ ѻ҆́чи твоѝ ѿвє́р­сты на хра́мъ се́й де́нь и҆ но́щь, на мѣ́­сто сїѐ, ѡ҆ не́м­же ре́клъ є҆сѝ: бꙋ́­детъ и҆́мѧ моѐ та́мѡ на ᲂу҆­слы́­ша­нїе мл҃твы, є҆́юже мо́­лит­сѧ ра́бъ тво́й на мѣ́­стѣ се́мъ де́нь и҆ но́щь. И҆ ᲂу҆­слы́­ши­ши мл҃твꙋ раба̀ тво­е­гѡ̀, и҆ лю­де́й тво­и́хъ і҆и҃лѧ, ѡ҆ ни́х­же по­мо́­лѧт­сѧ на мѣ́­стѣ се́мъ: и҆ ты̀ ᲂу҆­слы́­ши­ши на мѣ́­стѣ ѡ҆би­та́­ли­ща тво­е­гѡ̀ на нб҃сѝ, и҆ со­тво­ри́­ши и҆ по­ми́­лꙋ­е­ши.

Прⷪ҇ро́­че­ства и҆са́­ї­и­на чте́­нїе:

Да воз­ра́­дꙋ­ет­сѧ дꙋша̀ моѧ̀ ѡ҆ гдⷭ҇ѣ: ѡ҆б­ле­че́ бо мѧ̀ въ ри́зꙋ сп҃се́­нїѧ, и҆ ѻ҆де́­ждею ве­се́­лїѧ ѡ҆дѣ́ѧ мѧ̀, ꙗ҆́кѡ же­ни­хꙋ̀, воз­ло­жѝ мнѣ̀ вѣ­не́цъ, и҆ ꙗ҆́кѡ не­вѣ́­стꙋ, ᲂу҆­кра­си́ мѧ кра­со­то́ю. И҆ ꙗ҆́кѡ зе­млѧ̀, ра­стѧ́­щаѧ цвѣ́тъ сво́й, и҆ ꙗ҆́кѡ вер­то­гра́дъ сѣ́­ме­на своѧ̑ про­зѧ­ба́­етъ: та́кѡ воз­ра­сти́тъ гдⷭ҇ь пра́­вдꙋ, и҆ ве­се́­лїе предꙿ всѣ́­ми ꙗ҆зы̑­ки. Сї­ѡ́­на ра́ди не ᲂу҆­мол­чꙋ̀, и҆ і҆ерⷭ҇ли́­ма ра́ди не по­пꙋ­щꙋ̀, до́н­де­же и҆зы́­детъ ꙗ҆́кѡ свѣ́тъ пра́­вда моѧ̀, и҆ сп҃се́­нїе моѐ ꙗ҆́кѡ свѣ­ти́­ло раз­жже́т­сѧ. И҆ ѹ҆́зрѧтъ ꙗ҆зы́­цы пра́­вдꙋ твою̀, и҆ ца́­рїе сла́­вꙋ твою̀, и҆ про­зо­вꙋ́тъ тѧ̀ и҆́ме­немъ но́­вымъ, и҆́мже гдⷭ҇ь на­и­ме­нꙋ́­етъ є҆̀. И҆ бꙋ́­де­ши вѣ­не́цъ до­бро́­ты въ рꙋцѣ̀ гдⷭ҇ни, и҆ дї­а­ди́­ма црⷭ҇твїѧ въ рꙋцѣ̀ бг҃а тво­е­гѡ̀. И҆ не про­зо­ве́­ши­сѧ кто­мꙋ̀ ѡ҆ста́в­ленъ, и҆ зе­млѧ̀ твоѧ̀ кто­мꙋ̀ не на­ре­че́т­сѧ пꙋ­ста̀: тебѣ́ бо про­зо­ве́т­сѧ во́лѧ моѧ̀, и҆ зе­млѧ̀ твоѧ̀ все­ле́н­наѧ: ꙗ҆́кѡ бл҃го­во­лѝ гдⷭ҇ь въ тебѣ̀, и҆ зе­млѧ̀ твоѧ̀ вкꙋ́­пѣ на­сели́т­сѧ. И҆ ꙗ҆́ко­же жи­вѧ́й ю҆́но­ша съ дѣ́­вою, та́кѡ по­жи­вꙋ́тъ сы́­но­ве твоѝ съ то­бо́ю: и҆ бꙋ́­детъ, ꙗ҆́ко­же ра́­дꙋ­ет­сѧ же­ни́хъ ѡ҆ не­вѣ́­стѣ, та́кѡ воз­ра́­дꙋ­ет­сѧ гдⷭ҇ь ѡ҆ тебѣ̀.

Прⷪ҇ро́­че­ства и҆са́­ї­и­на чте́­нїе:

Свѣ­ти́­сѧ, свѣ­ти́­сѧ, і҆ерⷭ҇ли́­ме, прї­и́­де бо тво́й свѣ́тъ, и҆ сла́­ва гдⷭ҇нѧ на тебѣ̀ воз­сїѧ̀. Сѐ тьма̀ по­кры́­етъ зе́­млю, и҆ мра́къ на ꙗ҆зы́­ки, на тебѣ́ же ꙗ҆ви́т­сѧ гдⷭ҇ь, и҆ сла́­ва є҆гѡ̀ на тебѣ̀ ѹ҆́зрит­сѧ. И҆ по́й­дꙋтъ ца́­рїе свѣ́­томъ тво­и́мъ, и҆ ꙗ҆зы́­цы свѣ́т­ло­стїю тво­е́ю. Воз­ве­дѝ ѡ҆́крестъ ѻ҆́чи твоѝ, и҆ ви́ждь со­бра̑­наѧ ча̑да твоѧ̑: сѐ прї­и­до́­ша всѝ сы́­но­ве твоѝ и҆з­да­ле́­ча, и҆ дщє́­ри твоѧ̑ на ра́­мѣхъ во́зьмꙋт­сѧ. То­гда̀ ѹ҆́зри­ши, и҆ воз­ра́­дꙋ­е­ши­сѧ, и҆ ᲂу҆­бо­и́­ши­сѧ, и҆ ᲂу҆­жа́с­неши­сѧ се́рд­цемъ, ꙗ҆́кѡ при­ло­жи́т­сѧ къ тебѣ̀ бо­га́т­ство мор­ско́е, и҆ ꙗ҆зы́­кѡвъ, и҆ лю­де́й. И҆ прї­и́­дꙋтъ къ тебѣ̀ ста­да̀ вель­блю̑дъ, и҆ по­кры́­ютъ тѧ̀ вель­блю́­ди ма­дї­а́м­стїи и҆ ге­фа́р­стїи: всѝ ѿ савы̀ прї­и́­дꙋтъ, но­сѧ́­ще зла́­то, и҆ лї­ва́нъ при­не­сꙋ́тъ, и҆ ка́­мень че́­стенъ, и҆ сп҃се́­нїе гдⷭ҇не бл҃го­воз­вѣ­стѧ́тъ. И҆ всѧ̑ ѻ҆́вцы кида̑р­скїѧ со­бе­рꙋ́т­сѧ тебѣ̀, и҆ ѻ҆внѝ на­ве­ѡ́­ѳстїи прї­и́­дꙋтъ къ тебѣ̀, и҆ воз­не­сꙋ́т­сѧ прї­ѧ̑т­наѧ на же́р­твен­никъ мо́й, и҆ до́мъ мл҃твы моеѧ̀ про­сла́­вит­сѧ. Кӏ́и сꙋ́ть, и҆̀же ꙗ҆́кѡ ѻ҆́бла­цы ле­тѧ́тъ, и҆ ꙗ҆́кѡ го́­лꙋ­бїе со птен­цы̑ ко мнѣ̀; Менѐ ѻ҆́стро­ви жда́­ша, и҆ ко­ра­бли̑ ѳар­сӏ́й­стїи въ пе́р­выхъ, при­ве­стѝ ча̑да твоѧ̑ и҆з­да­ле́­ча, и҆ сре­бро̀ и҆ зла́­то и҆́хъ съ ни́ми, и҆́ме­не ра́ди гдⷭ҇нѧ ст҃а́­гѡ, и҆ за є҆́же ст҃о́­мꙋ і҆и҃ле­вꙋ сла́в­нꙋ бы́ти. И҆ со­зи́­ждꙋтъ сы́­но­ве и҆но­ро́д­нїи стѣ́­ны твоѧ̑, и҆ ца́­рїе и҆́хъ пред­сто­ѧ́­ти бꙋ́­дꙋтъ тебѣ̀: за гнѣ́въ бо мо́й по­ра­зи́хъ тѧ̀, и҆ за млⷭ҇ть мою̀ воз­лю­би́хъ тѧ̀. И҆ ѿве́р­зꙋт­сѧ вра­та̀ твоѧ̑ при́­снѡ, де́нь и҆ но́щь не за­тво­рѧ́т­сѧ, вве­стѝ къ тебѣ̀ си́лꙋ ꙗ҆зы̑къ, и҆ царѝ и҆́хъ ве­дѡ́­мыѧ. Ꙗ҆зы́­цы бо и҆ ца́­рїе, и҆̀же не по­ра­бо́­та­ютъ тѝ, по­ги́б­нꙋтъ, и҆ ꙗ҆зы́­цы за­пꙋ­стѣ́­нї­емъ за­пꙋ­стѣ́­ютъ. И҆ сла́­ва лї­ва́­но­ва къ тебѣ̀ прї­и́­детъ, кѷ­па­рӏ́­сомъ, и҆ пе́ѵгомъ, и҆ ке́­дромъ вкꙋ́­пѣ, про­сла́­ви­ти мѣ́­сто ст҃о́е моѐ, и҆ мѣ́­сто но́гъ мо­и́хъ про­сла́в­лю. И҆ по́й­дꙋтъ къ тебѣ̀ бо­ѧ́­ще­сѧ сы́­но­ве сми­ри́в­шихъ тѧ̀ и҆ раз­дра­жи́в­шихъ тѧ̀, и҆ по­кло́­нѧт­сѧ слѣ­да́мъ ногꙋ̀ тво­є́ю всѝ про­гнѣ́­вав­шїи тѧ̀, и҆ на­ре­че́­ши­сѧ гра́дъ гдⷭ҇нь, сї­ѡ́нъ ст҃а́­гѡ і҆и҃ле­ва. За сїѐ, ꙗ҆́кѡ бы́лъ є҆сѝ ѡ҆ста́в­ленъ и҆ воз­не­на­ви́­дѣнъ, и҆ не бѣ̀ по­мо­га́­ю­ща­гѡ тѝ: по­ло­жꙋ́ тѧ въ ра́­дость вѣ́ч­нꙋю, ве­се́­лїе ро­дѡ́мъ ро­дѡ́въ. И҆ и҆зссе́­ши мле­ко̀ ꙗ҆зы́­кѡвъ, и҆ бо­га́т­ство ца­ре́й снѣ́­си, и҆ ᲂу҆­ра­зꙋ­мѣ́­е­ши, ꙗ҆́кѡ а҆́зъ гдⷭ҇ь сп҃са́­ѧй тѧ̀, и҆ и҆з­ба­влѧ́­ѧй тѧ̀ бг҃ъ і҆и҃левъ.

На стї­хо́в­нѣ стї­хи̑­ры, гла́съ в҃:

Мт҃ре бж҃їѧ жре́­бїй ᲂу҆­па­с­ла̀ є҆сѝ до́­брѣ, Ѽ та­ма́­ро, свѣ́­томъ ᲂу҆­че́­нїѧ хрⷭ҇то́­ва лю́ди про­свѣ­ща́­ю­щи, и҆ пра­во­сла́­вї­емъ ᲂу҆­твер­жда́­ю­щи.

Стӏ́хъ: Воз­не­со́хъ и҆з­бра́н­на­го ѿ лю­де́й мо­и́хъ, ѡ҆брѣ­то́хъ дв҃да, раба̀ мо­е­го̀.

Тѣ­ле́с­ною до­бро́­тою всѧ̑ пре­воз­ше́д­ши, дх҃о́в­ны­ми лѣ́­по­та­ми па́че про­сї­ѧ́­ла є҆сѝ, та­ма́­ро ди́в­наѧ, до­бро­дѣ́­тель­ми мно­го­раз­ли́ч­ны­ми, ꙗ҆́кѡ рѧ́сны зла­ты́­ми, пре­ꙋ­кра́­ше­на.

Стӏ́хъ: Сегѡ̀ ра́ди по­ма́­за тѧ̀, бж҃е, бг҃ъ тво́й є҆ле́­емъ ра́­до­сти.

Ми́­ромъ пре­дѣ́­лы зе­млѝ тво­еѧ̀ ѡ҆гра́жд­ши, на стра̑­сти во­е­ва́­ти ни­ко­ли́­же пре­ста́­ла є҆сѝ, ца­ри́­це мꙋ́­драѧ, хрⷭ҇тꙋ̀ по­бѣ́­дꙋ тѝ по­да­ю́­щꙋ.

Сла́­ва, гла́съ в҃:

Ца́р­ство твоѐ бл҃го­де́н­ствї­емъ бл҃го­сло­вѝ хрⷭ҇то́съ, сла́­ва твоѧ̀ да́же до ко­нє́цъ зе­млѝ до­сти́­же, та­ма́­ро ве­ли­ко­и­ме­ни́­таѧ, ми́­ромъ бо пре­дѣ́­лы твоѧ̑ ѡ҆гра­ди́в­ши, на стра̑­сти дꙋ­шє́в­ныѧ во­е­ва́­ти не пре­ста́­ла є҆сѝ: тѣ́м­же вра­гѝ зе­млѝ тво­еѧ̀, вкꙋ́­пѣ же и҆ вра­гѝ дꙋшѝ тво­еѧ̀ без­сме́рт­ныѧ, пре­сла́в­нѡ по­бѣ­ди́в­ши, ти­ши­но́ю же на­сла­жда́­ю­щи­сѧ, бл҃го­да­ре́­нїе не­пре­ста́н­ное бг҃ꙋ при­но­си́­ла є҆сѝ.

И҆ ны́нѣ, пра́з­дни­ка.

Тро­па́рь, гла́съ и҃:

Лю­бо́вь и҆ со­вер­ше́н­ное млⷭ҇рдїе, ꙗ҆́кѡ пор­фѵ́­рꙋ но­сѧ́­щи, все­ли́­ла­сѧ є҆сѝ ны́нѣ въ вы̑ш­нѧѧ црⷭ҇твїѧ, и҆ со­во­кꙋ­пи́­ла­сѧ є҆сѝ со без­пло́т­ныхъ ли­ко­сто­ѧ̑­нїи, бл҃го­вѣ́р­наѧ ца­ри́­це та­ма́­ро, бг҃ꙋ при́­снѡ мо­лѧ́­сѧ за чтꙋ́­щыѧ тѧ̀.

И҆́нъ тро­па́рь, гла́съ а҃:

Цр҃ю̀ ца­ре́й на зе­млѝ ᲂу҆­се́рд­нѡ по­слꙋ­жи́в­ши, та­ма́­ро, ца­ри́­це ве­ли­ко­и­ме­ни́­таѧ, во і҆ерⷭ҇ли́мъ го́р­нїй съ че́­стїю вош­ла̀ є҆сѝ, и҆ сла́­вꙋ твою̀ ꙗ҆́кѡ да́ръ хрⷭ҇то́­ви при­нес­ла̀ є҆сѝ. тѣ́м­же тор­же­ствꙋ́­ю­ще дне́сь и҆ ли­кꙋ́­ю­ще, ра́­до­стїю не­мо́лч­нѡ во­пї­е́мъ: сла́­ва да́в­ше­мꙋ тѝ сла́­вꙋ, сла́­ва вѣн­ча́в­ше­мꙋ тѧ̀, сла́­ва по­да­ю́­ще­мꙋ всѣ̑мъ пред­ста́­тель­ствомъ тво­и́мъ про­ше́­нїй и҆с­пол­не́­нїе.

А҆́ще бдѣ́­нїе со­вер­ша́­ет­сѧ: тро­па́рь ст҃ы́ѧ, два́­жды, и҆ Бцⷣе, дв҃о: є҆ди́­но­жды.

На ѹ҆́трени.

На Бг҃ъ гдⷭ҇ь: тро­па́рь два́­жды. Сла́­ва, и҆ ны́нѣ, бг҃о­ро́­ди­ченъ.

По а҃-мъ стї­хо­сло́­вїи сѣ­да́­ленъ, гла́съ д҃:

Ме́чь пра́­вды въ де­сни́­цѣ, въ шꙋ́й­цѣ же щи́тъ вѣ́ры дер­жа́­щи, до­сто­хва́ль­наѧ, вра­гѝ твоѧ̑ внѣ­ꙋ́­дꙋ и҆ внꙋтрь­ꙋ́­дꙋ, въ дꙋшѝ тво­е́й, по­бѣ­ди́­ла є҆сѝ.

Сла́­ва, и҆ ны́нѣ, пра́з­дни­ка.

По в҃-мъ стї­хо­сло́­вїи сѣ­да́­ленъ, гла́съ д҃:

Ю҆́ж­ныѧ ца­ри́­цы пре­мꙋ́­дрѣй­шаѧ, и҆ со­ло­мѡ́­на сла́в­нѣй­шаѧ, та­ма́­ро ца­ри́­це, ꙗ҆́кѡ ѕвѣз­да̀ на тве́р­ди нбⷭ҇нѣй, сї­ѧ́­е­ши, ю҆́же пѣ́снь­ми ве­ли­ча́­емъ.

Сла́­ва, и҆ ны́нѣ, пра́з­дни­ка.

По­лѷ­е­ле́й, и҆ ве­ли­ча́­нїе:

Ве­ли­ча́­емъ тѧ̀, бл҃го­вѣ́р­наѧ ца­ри́­це та­ма́­ро, и҆ чти́мъ ст҃ꙋ́ю па́­мѧть твою̀, ты́ бо мо́­ли­ши за на́съ хрⷭ҇та̀ бг҃а на́­ше­го.

Ѱа­ло́мъ и҆з­бра́н­ный: Гдⷭ҇и, си́­лою тво­е́ю воз­ве­се­ли́т­сѧ ца́рь, и҆ ѡ҆ сп҃се́­нїи тво­е́мъ воз­ра́­дꙋ­ет­сѧ ѕѣлѡ̀.

По по­лѷ­е­ле́и сѣ­да́­ленъ, гла́съ д҃:

Ꙗ҆ви́лъ є҆сѝ на́мъ, хрⷭ҇тѐ, та­ма́­рꙋ мл҃твен­ни­цꙋ те́­плꙋю, ца­рє́мъ же дер­жа́­вꙋ и҆ ѡ҆гра­жде́­нїе, лю́­демъ і҆́вєр­скимъ по­кро́въ и҆ за­стꙋ­пле́­нїе. тѣ́м­же тѝ зо­ве́мъ: сла́­ва си́лѣ тво­е́й, гдⷭ҇и.

Сла́­ва, и҆ ны́нѣ, пра́з­дни­ка.

Про­кӏ́­менъ, гла́съ д҃: Воз­не­со́хъ и҆з­бра́н­на­го ѿ лю­де́й мо­и́хъ.

Стӏ́хъ: Сегѡ̀ ра́ди по­ма́­за тѧ̀, бж҃е, бг҃ъ тво́й є҆ле́­емъ ра́­до­сти, па́че при­ча̑ст­никъ тво­и́хъ.

Є҆ѵⷢ҇лїе ѿ ма­тѳе́а, за­ча́­ло р҃д: Речѐ гдⷭ҇ь при́­тчꙋ сїю̀: ᲂу҆­по­до́­би­сѧ црⷭ҇твїе нбⷭ҇ное:

По н҃-мъ ѱал­мѣ̀: Мл҃тва­ми ст҃ы́ѧ та­ма́­ры:

Та́же стї­хи́­ра, гла́съ ѕ҃:

По́­мощь твою̀ да́й ца­рє́мъ пра­во­сла̑в­нымъ, и҆ всѣ̑мъ лю­бо́­вїю тѧ̀ при­зы­ва́­ю­щымъ, мл҃тва­ми тво­и́­ми те́­плы­ми, всѧ̑ ѿ бѣ́дъ и҆зꙿи­ма́­ю­щи, та­ма́­ро все­бл҃го­чⷭ҇ти́­вѣй­шаѧ.

Ка­нѡ́нъ ст҃ѣ́й ца­ри́­цѣ та­ма́­рѣ, є҆гѡ́­же кра­е­гра­не́­сїе:

Се́рд­цемъ го­рѧ́­щимъ та­ма́­рꙋ дер­жа́в­нꙋю пою̀.

Гла́съ д҃. Пѣ́снь а҃.

І҆р­мо́съ: Нѣ́сть тебѣ̀ по­до́­бенъ, пре­про­сла́в­лен­ный гдⷭ҇и, рꙋ­ко́ю бо крѣ́п­кою и҆з­ба́­вилъ є҆сѝ лю́ди, ꙗ҆̀же стѧ­жа́лъ є҆сѝ, чл҃вѣ­ко­лю́б­че.

При­пѣ́въ: Ст҃а́ѧ ца­ри́­це та­ма́­ро, молѝ бг҃а ѡ҆ на́съ.

Сла́­ва твоѧ̀, Ѽ ца­ри́­це, да́же до ко­нє́цъ зе­млѝ до­сти́­же, бл҃го­че́­стїе же со сми­рен­но­мꙋ́­дрї­емъ на нб҃са̀ тѧ̀ воз­ве­дѐ, и҆дѣ́­же ны́нѣ свѣ́т­лѡ пре­бы­ва́­е­ши.

Є҆ле́­нꙋ ст҃ꙋ́ю по­дра­жа́­ю­щи, стра­нꙋ̀ і҆́вер­скꙋю хра̑мы бж҃ї­и­ми ᲂу҆­кра­си́­ла є҆сѝ ᲂу҆­се́рд­нѡ, та­ма́­ро ве­ли­ко­и­ме­ни́­таѧ.

Ра́б­ство хрⷭ҇то́­во че́сть вмѣ­нѧ́­ю­щи, бо­га́т­ство и҆ вла­ды́­че­ство зем­но́е за сѣ́нь и҆ со́­нїе по­чи­та́­ю­щи, томꙋ̀ не при­ла­га́­ла є҆сѝ срⷣца тво­е­гѡ̀, та­ма́­ро пре­мꙋ́­драѧ.

Бг҃о­ро́­ди­ченъ: Дв҃о та́­ин­ствен­наѧ, и҆са́­ї­емъ прⷪ҇ро́­комъ про­на­ре­че́н­наѧ, га­врї­и́­ломъ же ѡ҆ бж҃ї­емъ во­пло­ще́­нїи и҆з­вѣ­ще́н­наѧ, ка́кѡ дер­за́­емъ вос­пѣ­ва́­ти тѧ̀;

Пѣ́снь г҃.

І҆р­мо́съ: Лꙋ́къ си́ль­ныхъ и҆з­не­мо́­же, и҆ не­мощ­ствꙋ́­ю­щїи пре­по­ѧ́­са­ша­сѧ си́­лою, сегѡ̀ ра́ди ᲂу҆­твер­ди́­сѧ въ гдⷭ҇ѣ срⷣце моѐ.

Ца́р­ство твоѐ хрⷭ҇то́­ви пре­да­ла̀ є҆сѝ, Ѽ та­ма́­ро: тѣ́м­же то́й ᲂу҆­твер­дѝ є҆̀ не­по­ко­ле­би́­мѡ, и҆ сла́­вꙋ со­ло­мѡ́­на вѧ́щ­шꙋю даде́ ти.

Є҆ле́й млⷭ҇ти стѧ­жа́­ла є҆сѝ, ꙗ҆́кѡ мꙋ́­драѧ дѣ́ва, мѷ­ро­ꙋ­ха́­нїе же до­бро­дѣ́­те­лей хрⷭ҇то́­ви при­нес­ла̀ є҆сѝ, ꙗ҆́кѡ мѷ­ро­но́­си­ца, вѣн­це­но́­си­це пре­сла́в­наѧ.

Ми́­ромъ пре­дѣ́­лы зе­млѝ тво­еѧ̀ ѡ҆гра́жд­ши, на стра̑­сти во­е­ва́­ти ни­ко­ли́­же пре­ста́­ла є҆сѝ, ца­ри́­це мꙋ́­драѧ, хрⷭ҇тꙋ̀ по­бѣ́­дꙋ тѝ по­да­ю́­щꙋ.

Бг҃о­ро́­ди­ченъ: Грѧ­де́­ши въ го́р­нѧѧ со тща́­нї­емъ, бцⷣе пре­чⷭ҇таѧ, ᲂу҆­слы́­ша­ти є҆лї­са­ве́тинъ свѣ́т­лый гла́съ, є҆го́­же тѝ не­пре­ста́н­нѡ при­пѣ­ва́­емъ.

Сѣ­да́­ленъ, гла́съ з҃:

Го́ры тѧ̀ воз­ра­сти́­ша, гѡ́р­нѧѧ при́­снѡ мꙋ́др­ство­ва­ти хо­тѧ́­щꙋю, Ѽ та­ма́­ро! тѣ́м­же и҆ моѧ̑ по́­мы­слы, до́лꙋ по­ни́к­шыѧ, впе­рѝ къ вы­со­тѣ̀, и҆ на всѧ́къ де́нь вос­хо­жде́­нїе въ срⷣцѣ мо­е́мъ по­ла­га́­ти на­ꙋ­чи́ мѧ, ꙗ҆́кѡ да то­бо́ю ᲂу҆­крѣп­лѧ́­емь, въ се­лє́­нїѧ гѡ́р­нѧѧ до­сти́г­нꙋ, и҆дѣ́­же ты̀ въ не­за­хо­ди́­мѣй сї­ѧ́­е­ши сла́­вѣ.

Пѣ́снь д҃.

І҆р­мо́съ: Се́й бг҃ъ на́шъ, ѿ дв҃ы во­пло́щ­сѧ, и҆ є҆сте­ство̀ ѡ҆бо­жи́въ, є҆го́­же вос­пѣ­ва́­ю­ще, во­пї­е́мъ: сла́­ва си́лѣ тво­е́й, гдⷭ҇и.

Ѻ҆рлꙋ̀ го́р­не­мꙋ по­до́­бѧ­щи­сѧ, вос­па­ри́­ла є҆сѝ дꙋ́­хомъ да́же до нбе́съ, та­ма́­ро все­хва́ль­наѧ, на сл҃нце пра́­вды хрⷭ҇та̀ не­бо­ѧ́знен­нѡ взи­ра́­ю­щи, и҆ зо­вꙋ́­щи: сла́­ва си́лѣ тво­е́й, гдⷭ҇и.

Рцы̀ на́мъ, ца­ри́­це бл҃го­вѣ́р­наѧ, ка́кѡ, жена̀ не­мощ­на сꙋ́щи, то­ли́­кꙋ сла́­вꙋ стѧ­жа́­ла є҆сѝ; ка́кѡ, сла́­вꙋ стѧ­жа́в­ши, ᲂу҆­мо́мъ не воз­не­сла́­сѧ є҆сѝ; ѻ҆ба́­че за всѧ̑ бл҃го­да­рѧ́­щи, хрⷭ҇то́­ви пѣ́ла є҆сѝ: сла́­ва си́лѣ тво­е́й, гдⷭ҇и.

Ꙗ҆ви́лъ є҆сѝ на́мъ, хрⷭ҇тѐ, та­ма́­рꙋ мл҃твен­ни­цꙋ те́­плꙋю, ца­рє́мъ же дер­жа́­вꙋ и҆ ѡ҆гра­жде́­нїе, лю́­демъ і҆́вєр­скимъ по­кро́въ и҆ за­стꙋ­пле́­нїе. тѣ́м­же тѝ зо­ве́мъ: сла́­ва си́лѣ тво­е́й, гдⷭ҇и.

Бг҃о­ро́­ди­ченъ: Ще́­дра­го бг҃а и҆ всеѧ̀ тва́­ри влⷣкꙋ, на́съ ра́ди да́же до ꙗ҆́слей ѡ҆б­ни­ща́в­ша­го, молѝ за ро́дъ хрⷭ҇тї­а́н­скїй, бцⷣе все­пѣ́­таѧ.

Пѣ́снь є҃.

І҆р­мо́съ: Ѿ свѣ́­та пре­сѣ­кӏ́й пер­во­ро́д­ный свѣ́тъ, ꙗ҆́кѡ во свѣ́­тѣ дѣла̀ по­ю́тъ тѧ̀, хрⷭ҇тѐ, со­дѣ́­те­лѧ, во свѣ́­тѣ тво­е́мъ пꙋти̑ на́шѧ на­пра́­ви.

І҆́вер­скїѧ зе­млѝ сла́­ва не­за­хо­ди́­маѧ, цр҃кве пра­во­сла́в­ныѧ свѣ́т­лое ᲂу҆­кра­ше́­нїе, по­сре­дѣ̀ ца­ри́цъ, ꙗ҆́кѡ лꙋна̀ по­сре­дѣ̀ ѕвѣ́здъ, сї­ѧ́­етъ та­ма́­ра пре­ве­ли́­каѧ.

Мт҃ре бж҃їѧ жре́­бїй ᲂу҆­па­с­ла̀ є҆сѝ до́­брѣ, Ѽ та­ма́­ро, свѣ́­томъ ᲂу҆­че́­нїѧ хрⷭ҇то́­ва лю́ди про­свѣ­ща́­ю­щи, и҆ пра­во­сла́в­нꙋю вѣ́рꙋ ᲂу҆­твер­жда́­ю­щи.

Тѣ­ле́с­ною до­бро́­тою всѧ̑ пре­воз­ше́д­ши, дх҃о́в­ны­ми лѣ́­по­та­ми па́че про­сї­ѧ́­ла є҆сѝ, та­ма́­ро ди́в­наѧ, до­бро­дѣ́­тель­ми мно­го­ѡ­бра́з­ны­ми, ꙗ҆́кѡ рѧ́сны зла­ты́­ми, пре­ꙋ­кра́­ше­на.

Бг҃о­ро́­ди­ченъ: А҆́ще ᲂу҆̀бо чꙋ­до­тво­ре́­нїѧ ча́съ не ᲂу҆ прї­и́­де, сн҃ъ тво́й бжⷭ҇твен­ный, дв҃о, во́дꙋ въ вїно̀ пре­тво­рѧ́­етъ, по сло́­вꙋ тво­е­мꙋ̀ є҆ди́­но­мꙋ, є҆го́­же и҆ ѡ҆ на́съ, влⷣчце, рцы̀.

Пѣ́снь ѕ҃.

І҆р­мо́съ: Бꙋ́рѧ мѧ̀ по­мыш­ле́­нїй по­сти́г­ши, во глꙋ­би­нꙋ̀ низ­вла­чи́тъ без­мѣ́р­ныхъ грѣ­хѡ́въ, но ты̀, ᲂу҆­пра́­ви­те­лю бл҃гӏ́й, пред­ва­ри́въ, ᲂу҆­пра́­ви, ꙗ҆́кѡ прⷪ҇ро́­ка, и҆ сп҃си́ мѧ.

Ме́чь пра́­вды въ де­сни́­цѣ, въ шꙋ́й­цѣ же щи́тъ вѣ́ры дер­жа́­щи, до­сто­хва́ль­наѧ, вра­гѝ твоѧ̑ внѣ­ꙋ́­дꙋ и҆ внꙋтрь­ꙋ́­дꙋ, въ дꙋшѝ тво­е́й, по­бѣ­ди́­ла є҆сѝ.

А҆́ще и҆ не­до­сто́й­ни є҆смы̀ тво­е­гѡ̀ за­стꙋ­пле́­нїѧ, ца­ри́­це ве­ле­мꙋ́­драѧ, ѻ҆ба́­че и҆зꙿ бе́з­дны грѣ­хо­па­де́­нїй мно́­гихъ ны̀ воз­ве­дѝ, ро́ва по­ги́­бель­на­гѡ сла́в­нѡ и҆з­бѣ́г­шаѧ.

Рꙋ́цѣ на́мъ по́­мо­щи про­стрѝ, ца­ри́­це хрⷭ҇то­и­ме­ни́­таѧ, пꙋ­те́мъ же́­сто­кимъ взы́­ти тща́­щым­сѧ на го́рꙋ гдⷭ҇ню, на не́й­же ты̀ бг҃ꙋ пред­сто­и́­ши во сла́­вѣ.

Бг҃о­ро́­ди­ченъ: Оу҆вы̀ мѝ, свѣ́­те мо́й, пре­чⷭ҇таѧ взы­ва́­ше, при крⷭ҇тѣ̀ сто­ѧ́­щи сн҃а сво­е­гѡ̀, дꙋ­ше́ю томꙋ̀ сра­спи­на́­ю­щи­сѧ: тѣ́м­же и҆ всы­но­в­лє́н­нымъ лю́­демъ мт҃и всѧ́­ка­гѡ ᲂу҆­тѣ­ше́­нїѧ ꙗ҆в­лѧ́­ет­сѧ.

Кон­да́къ, гла́съ д҃.

По­до́­бенъ: Го­то́­ви­сѧ, ви­ѳле­е́­ме:

Го­то́­ви­сѧ, го́р­нїй і҆ерⷭ҇ли́­ме, ѿве́р­зи вра­та̀, є҆де́­ме, првⷣныхъ ли́цы, на́мъ сли­кꙋ́й­те, и҆ лю́­дїе і҆́вер­стїи, тор­же­ствꙋ́й­те, и҆ ты̀, нӏ́но ст҃а́ѧ, цѣ­лꙋ́й та­ма́­рꙋ сла́в­нꙋю, въ нбⷭ҇ное црⷭ҇твїе дне́сь грѧ­дꙋ́­щꙋю, ѿ рꙋкѝ бж҃їѧ ᲂу҆­вѣн­ча́­ти­сѧ.

І҆́косъ: Сла́­вꙋ твою̀ пре­ве­ли́­кꙋю, Ѽ та­ма́­ро, всѝ кон­цы̀ зе­млѝ по­вѣ́­да­ютъ, и҆ ѡ҆ то́й ка́­ме­нїе во­пї­ю́тъ, ѻ҆ба́­че ты̀, пре­мꙋ́­дра сꙋ́щи, дꙋ́­хомъ и҆ ᲂу҆­мо́мъ не воз­не­сла́­сѧ є҆сѝ, но со є҆к­кле­сї­а́­стомъ всѧ̑ сꙋ­е­тꙋ̀ сꙋ­е́тъ вмѣ­нѧ́­ла є҆сѝ, ѡ҆҆ є҆ди́­нѣй сла́­вѣ бж҃ї­ей ᲂу҆­се́рд­нѡ пе­кꙋ́­щи­сѧ, и҆ тоѧ̀ при­ча­сти́­ти­сѧ хо­тѧ́­щи: сегѡ̀ ра́ди ны́нѣ съ ве­се́­лї­емъ ко цр҃ю̀ ца­ре́й грѧ­де́­ши, ѿ рꙋкѝ є҆гѡ̀ ᲂу҆­вѣн­ча́­ти­сѧ.

Пѣ́снь з҃.

І҆р­мо́съ: А҆вра­а́м­стїи и҆но­гда̀ въ ва­вѷ­лѡ́­нѣ ѻ҆́тро­цы, пе́щ­ный пла́­мень по­пра́­ша, пѣ́снь­ми взы­ва́­ю­ще: ѻ҆тє́цъ на́­шихъ бж҃е, бл҃го­сло­ве́нъ є҆сѝ.

До́мъ бж҃їй дꙋ́шꙋ твою̀ со­тво­ри́­ла є҆сѝ, та­ма́­ро дер­жа́в­наѧ, всѧ́­кꙋю до­бро­дѣ́­тель въ не́мъ стран­но­прї­е́м­лю­щи, гдⷭ҇е­ви же зо­вꙋ́­щи: ѻ҆тє́цъ на́­шихъ бж҃е, бл҃го­сло­ве́нъ є҆сѝ.

Є҆ле́­ню на го­ра́хъ а҆ра­ра́т­скихъ по­до́­бѧ­щи­сѧ, при­па­да́­ла є҆сѝ ᲂу҆­се́рд­нѡ ко и҆с­то́ч­ни­кꙋ воды̀ жи­вы́ѧ, є҆́юже жа́­ждꙋ дх҃о́в­нꙋю ᲂу҆­то­лѧ́­ю­щи, стра­сте́й пла́­мень ᲂу҆­га­си́­ла є҆сѝ.

Ри́зꙋ гдⷭ҇ню ꙗ҆́кѡ да́ръ сщ҃е́н­нѣй­шїй, і҆кѡ́­нꙋ же бг҃о­мт҃ре ꙗ҆́кѡ со­кро́­ви­ще мно­го­цѣ́н­ное, та­ма́­рꙋ же ст҃ꙋ́ю ꙗ҆́кѡ но́­вꙋю мл҃твен­ни­цꙋ те́­плꙋю стра­на̀ і҆́вер­скаѧ ца́р­ствꙋ мо­ско́в­ско­мꙋ при­нес­ла̀ є҆́сть.

Бг҃о­ро́­ди­ченъ: Жи­во­но́с­но­мꙋ гро́­бꙋ и҆с­празд­ни́в­шꙋ­сѧ, во­скре́с­ше­мꙋ же сн҃ꙋ тво­е­мꙋ̀ тѝ ꙗ҆ви́в­шꙋ­сѧ, ѻ҆тє́цъ на́­шихъ бж҃е, бл҃го­сло­ве́нъ є҆сѝ, вос­пѣ́­ла є҆сѝ, при­сно­дв҃о.

Пѣ́снь и҃.

І҆р­мо́съ: Всѧ́­чє­скаѧ но­сѧ́й не­при­стꙋ́п­ною тво­е́ю си́­лою, хрⷭ҇тѐ, прпⷣбныѧ твоѧ̑ ѻ҆́тро­ки въ пла́­ме­ни ѡ҆ро­си́лъ є҆сѝ, зо­вꙋ́­щыѧ: бл҃го­сло­ви́­те, всѧ̑ дѣла̀ гдⷭ҇нѧ, гдⷭ҇а.

А҆ра́­гва рѣка̀ съ кꙋ­ро́ю, мцхе́т­скїй гра́дъ, хї­тѡ́нъ гдⷭ҇ень со­блю́д­шїй, ѡ҆бте­ка́­ю­ще, ска­за́­нїе сла́­вы та­ма́­ры ца­ри́­цы до по́н­та и҆ да́же до пре­дѣ̑лъ зе­млѝ пре­но́­сѧтъ, всѧ̑ го́ры и҆ хо́л­мы при­зы­ва́­ю­ще во­пи́­ти: бл҃го­сло­ви́­те, всѧ̑ дѣла̀ гдⷭ҇нѧ, гдⷭ҇а.

Вї­но­гра́дъ, є҆го́­же на­са­дѝ про­свѣ­ти́­тель­ни­ца і҆ве́­рїи рав­ноапⷭ҇ль­наѧ, воз­дѣ́­ла­ла є҆сѝ ᲂу҆­се́рд­нѡ, ца­ри́­це мꙋ́­драѧ, пло­ды̀ є҆гѡ̀ гдⷭ҇е­ви при­но­сѧ́­щи, вїно̀ ᲂу҆­ми­ле́­нїѧ пї­ю́­щи, и҆ во­пї­ю́­щи: бл҃го­сло­ви́­те, всѧ̑ дѣла̀ гдⷭ҇нѧ, гдⷭ҇а.

Нӏ́но ст҃а́ѧ, хрⷭ҇то́­вы вѣ́ры сѣ́мѧ въ і҆́вер­стѣй стра­нѣ̀ на­са­ди́в­шаѧ, и҆ ты̀, та­ма́­ро сла́в­наѧ, то́е воз­ра­сти́в­шаѧ, прпⷣбныхъ со́нмъ, ѿ зе­млѝ ва́­шеѧ грѧ­дꙋ́­щїй, срѣ­та́­ю­ще, ра́­дꙋй­те­сѧ, и҆ вос­по́й­те: бл҃го­сло­ви́­те, всѧ̑ дѣла̀ гдⷭ҇нѧ, гдⷭ҇а.

Бг҃о­ро́­ди­ченъ: Оу҆зрѣ́в­ши сла́в­ное во­скрⷭ҇нїе хрⷭ҇то́­во, мт҃и бж҃їѧ, ра́­до­сти не­из­ре­че́н­ныѧ и҆с­по́л­нив­ши­сѧ, воз­зва­ла̀ є҆сѝ: бл҃го­сло­ви́­те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃.

І҆р­мо́съ: Тѧ̀ пре­сла́в­нꙋю не­вѣ́­стꙋ, и҆ все­ст҃ꙋ́ю бцⷣꙋ, зи­жди́­те­лѧ ро́жд­шꙋю, не­ви́­ди­мыхъ же и҆ всѣ́хъ ви́­ди­мыхъ, пѣ́снь­ми ве­ли­ча́­емъ.

Ю҆́ж­ныѧ ца­ри́­цы пре­мꙋ́­дрѣй­шаѧ, и҆ со­ло­мѡ́­на сла́в­нѣй­шаѧ, та­ма́­ра ца­ри́­ца, ꙗ҆́кѡ ѕвѣз­да̀ на тве́р­ди нбⷭ҇нѣй, сї­ѧ́­етъ: ю҆́же пѣ́снь­ми ве­ли­ча́­емъ.

По́­мощь твою̀ да́ждь ца­рє́мъ пра­во­сла̑в­нымъ, мл҃тва­ми тво­и́­ми те́­плы­ми всѧ̑ ѿ бѣ́дъ и҆зꙿи­ма́­ю­щи, та­ма́­ро все­бл҃го­чⷭ҇ти́­вѣй­шаѧ.

Ѽ со­кро́­ви­ща до­бро­дѣ́­те­лей, Ѽ сми­ре́­нїѧ хрⷭ҇то­мꙋ́­дрен­на­гѡ, Ѽ пре­свѣ́т­лыѧ сла́­вы, и҆́ми­же па́­мѧть твоѧ̀ чⷭ҇тна́ѧ, Ѽ та­ма́­ро, пре­ꙋ­кра́­ше­на: тѣ́м­же лю­бо́­вїю тѧ̀ ве­ли­ча́­емъ.

Бг҃о­ро́­ди­ченъ: Ю҆́нїи и҆ ста́р­цы, бо­га́­тїи и҆ ни́­щїи, мо­на́­си и҆ мїр­стӏ́и, ца́­рїе и҆ вла­до́­мїи, здра́­вїи и҆ не­дꙋ́ж­нїи, прї­и­ди́­те, и҆ при­па­де́мъ къ мрӏ́и при­сно­дв҃ѣ, є҆ди́­нѣй че­ло­вѣ́­кѡвъ на­де́­ждѣ, ꙗ҆́кѡ мт҃рь бж҃їю тꙋ̀ ве­ли­ча́­ю­ще.

Свѣ­ти́­ленъ:

Лоза̀ бл҃го­пло́д­наѧ та­ма́­ра, ѿ ко́­ре­не ца́р­ска­гѡ на го­ра́хъ і҆́вер­скихъ про­зѧ́б­шаѧ, ро­со́ю блгⷣти ѡ҆ро­ша́­е­ма, сл҃нцемъ же пра́­вды со­грѣ­ва́­е­ма, пло́дъ сто­ри́ч­ный хрⷭ҇то́­ви при­нес­ла̀ є҆́сть.

На хва­ли́­техъ стї­хи̑­ры на д҃, гла́съ д҃:

Сла́­ва твоѧ̀, Ѽ ца­ри́­це, да́же до ко­нє́цъ зе­млѝ до­сти́­же, бл҃го­че́­стїе же со сми­рен­но­мꙋ́­дрї­емъ на нб҃са̀ тѧ̀ воз­ве­дѐ, и҆дѣ́­же ны́нѣ свѣ́т­лѡ пре­бы­ва́­е­ши. Два́­жды.

Є҆ле́­нꙋ ст҃ꙋ́ю по­дра­жа́­ю­щи, стра­нꙋ̀ і҆́вер­скꙋю хра̑мы бж҃ї­и­ми ᲂу҆­кра­си́­ла є҆сѝ ᲂу҆­се́рд­нѡ, та­ма́­ро ве­ли­ко­и­ме­ни́­таѧ.

Ра́б­ство хрⷭ҇то́­во че́сть вмѣ­нѧ́­ю­щи, бо­га́т­ство и҆ вла­ды́­че­ство зем­но́е за сѣ́нь и҆ со́­нїе по­чи­та́­ю­щи, томꙋ̀ не при­ла­га́­ла є҆сѝ срⷣца тво­е­гѡ̀, та­ма́­ро пре­мꙋ́­драѧ.

Сла́­ва, и҆ ны́нѣ, пра́з­дни­ка.

Сла­во­сло́­вїе ве­ли́­кое. Є҆ктє­нїѝ, и҆ ѿпꙋ́стъ.

На лї­тꙋр­гӏ́и, бл҃жє́н­на пра́з­дни­ка: и҆ ст҃ы́ѧ, пѣ́снь г҃-ѧ.

Про­кӏ́­менъ, гла́съ д҃: Ди́­венъ бг҃ъ во ст҃ы́хъ сво­и́хъ, бг҃ъ і҆и҃левъ.

Стӏ́хъ: Въ це́р­квахъ бл҃го­сло­ви́­те бг҃а, гдⷭ҇а ѿ и҆стѡ́ч­никъ і҆и҃ле­выхъ.

А҆пⷭ҇лъ къ га­ла́­тѡмъ, за­ча́­ло с҃и.

А҆л­ли­лꙋ́­їа, гла́съ а҃: Тер­пѧ̀, по­тер­пѣ́хъ гдⷭ҇а, и҆ внѧ́тъ мѝ, и҆ ᲂу҆­слы́­ша мл҃твꙋ мою̀.

Стӏ́хъ: Воз­не­со́хъ и҆з­бра́н­на­го ѿ лю­де́й мо­и́хъ:

Є҆ѵⷢ҇лїе ѿ ма­тѳе́а, за­ча́­ло ѯ҃в.

При­ча́­стенъ: Въ па́­мѧть вѣ́ч­нꙋю: