Мѣ́сѧца септе́мврїа въ а҃і-й де́нь, и҆ і҆ꙋ́нїа въ к҃и-й де́нь.

Слꙋ́жба прпⷣбнымъ ѻ҆тцє́мъ се́ргїю и҆ ге́рманꙋ, валаа̑мскимъ чꙋдотво́рцємъ.

На ма́лѣй вече́рни.

На Гдⷭ҇и, воззва́хъ: стїхи̑ры на д҃, гла́съ а҃. Подо́бенъ: Нбⷭ҇ныхъ чинѡ́въ:

Нбⷭ҇ныхъ чинѡ́въ зри́телей,* и҆ свѣ́томъ трисо́лнечнымъ въ ра́йскомъ селе́нїи ѡ҆сїѧва́емыхъ,* всесвѣ́тлыхъ свѣти́льникѡвъ на́шихъ се́ргїа и҆ ге́рмана,* въ земно́мъ селе́нїи и҆́хъ наста̀ де́нь свѣ́тлагѡ торжества̀.

Сра́дꙋйтесѧ на́мъ, всѐ вѣ́рныхъ мно́жество,* сликовствꙋ́йте, го́ры и҆ хо́лми,* мо́ре и҆ всѧ̑ ꙗ҆̀же въ не́мъ,* въ свѣтоно́сный де́нь па́мѧти ди́вныхъ по́стникѡвъ,* на гора́хъ си́хъ* ꙗ҆́кѡ фӏ́нїѯъ процвѣ́тшихъ.

Мїрскі̑ѧ сла́дѡсти и҆ грѣхѡ́вныѧ стра̑сти* мꙋ́жески попра́вше ѻ҆тцы̀ бг҃оно́снїи,* и҆ въ тѣ́сномъ житїѝ дꙋ́шы своѧ̑ ѡ҆чⷭ҇тивше,* въ блгⷣтный ра́й внидо́ша,* и҆ плоды̀ безсме́ртїѧ дне́сь вкꙋша́ютъ,* и҆ сла́дость вѣ́чныѧ жи́зни.

На тве́рди мы́сленнѣй во ѻ҆би́тели се́й,* ꙗ҆́кѡ двѣ̀ пресвѣ̑тлыѧ ѕвѣзды̑,* се́ргїй ди́вный и҆ ге́рманъ чꙋ́дный* добродѣ́тельми возсїѧ́ша* и҆ чꙋде́съ свѣ́тлостїю:* и҆́хже свѣ́тъ сла́вы пребꙋ́детъ въ ро́дъ и҆ ро́дъ.

Сла́ва, гла́съ г҃:

По́стникѡвъ торжество̀ по́стнически пра́зднꙋимъ: бѣжи́мъ грѣхо́вныхъ страсте́й, невоздержа́нїѧ, тщесла́вїѧ и҆ горды́ни, гнѣ́ва, не́нависти и҆ ѕло́бы: посто́мъ же, смире́нїемъ и҆ братолю́бїемъ почти́мъ ѻ҆тцє́въ чⷭ҇тнꙋ́ю па́мѧть, да ра́дости и҆́хъ въ торжествѣ̀ премӏ́рномъ прича̑стницы всѝ бы́ти сподо́бимсѧ.

И҆ ны́нѣ, пра́здника: и҆лѝ бг҃оро́диченъ, гла́съ то́йже:

Безсѣ́меннѡ заче́ншаѧ и҆ безстра́стнѡ роди́вшаѧ бг҃а сло́ва, хрⷭ҇тїа́нъ предста́тельнице, бцⷣе влⷣчце! къ тебѣ̀ припа́даемъ, тѧ̀ пое́мъ и҆ славосло́вимъ, и҆ тебѣ̀ всѝ мо́лимсѧ со слеза́ми: воззрѝ на на́съ млⷭ҇рдымъ ѻ҆́комъ, ѿ и҆́га страсте́й и҆зба́ви на́съ, и҆ безстра́стїе да́рꙋй дꙋша́мъ на́шымъ.

На стїхо́внѣ стїхи̑ры, гла́съ в҃.

Подо́бенъ: До́ме є҆ѵфра́ѳовъ:

До́мъ ст҃о́мꙋ дх҃ꙋ* ст҃ъ и҆ чⷭ҇тенъ* сотво́рше себѐ ст҃ӏ́и ѻ҆тцы̀,* добродѣ́тельными дѣѧ́ньми* и҆ чꙋде́съ дарова́ньми ѡ҆богати́шасѧ.

Стӏ́хъ: Чтна̀ предꙿ гдⷭ҇емъ сме́рть прпⷣбныхъ є҆гѡ̀.

Цвѣ́ти ра́йстїи* процвѣто́ша на́мъ* прпⷣбнїи,* по́стническихъ трꙋдѡ́въ по́тами,* ѡ҆благоꙋха́юще всѣ́хъ на́съ.

Стӏ́хъ: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ.

Два̀ чꙋде́съ и҆стѡ́чника,* се́ргїа и҆ ге́рмана дарова̀ се́й ѻ҆би́тели* ди́вный во ст҃ы́хъ гдⷭ҇ь,* въ наслажде́нїе вѣ́рнѡ чтꙋ́щымъ* ст҃ꙋ́ю па́мѧть и҆́хъ. Сла́ва, гла́съ є҃:

А҆́гг҃льскихъ чинонача́лїй и҆ прпⷣбныхъ премӏ́рное торжество̀ возсїѧ̀ на́мъ въ па́мѧти прпⷣбныхъ ѻ҆тє́цъ се́ргїа и҆ ге́рмана, презрѣ́вшихъ земна̑ѧ, да наслѣ́дѧтъ нбⷭ҇наѧ, попра́вшихъ плотска̑ѧ, да воспрїи́мꙋтъ дх҃ѡ́внаѧ: и҆̀мже и҆ мздꙋ̀ вѣ́рныхъ рабѡ́въ гдⷭ҇ь дарова̀, на землѝ и҆ на нб҃сѣ́хъ просла́ви. И҆ ны́нѣ, бг҃оро́диченъ, гла́съ то́йже:

Мы́сленнаѧ ста́мно, носи́вшаѧ во чре́вѣ маннода́вца хрⷭ҇та̀, бцⷣе дв҃о! того̀ молѝ прилѣ́жнѡ, ѿ го́рькїѧ страсте́й рабо́ты и҆зба́вити на́съ, и҆ въ пꙋсты́ни безстра́стїѧ ма́нны дх҃о́вныѧ всѧ̑ ны̀ прича́стники сотвори́ти, ѿ всѣ́хъ ѕѡ́лъ сп҃стѝ, и҆ просвѣти́ти дꙋ́шы на́шѧ.

Тропа́рь, гла́съ д҃:

Е ѵⷢ҇лїа хрⷭ҇то́ва и҆́стиннїи послꙋ̑шницы ꙗ҆ви́стесѧ, прпⷣбнїи, мӏ́ръ и҆ всѧ̑, ꙗ҆̀же въ не́мъ, ꙗ҆́кѡ не сꙋ̑щаѧ преѡби́дѣвше любвѐ ра́ди хрⷭ҇то́вы, и҆ въ морскӏ́й ѻ҆́стровъ всели́стесѧ, и҆ трꙋдолю́бнѡ въ не́мъ проти́вꙋ ко́зней неви́димыхъ врагѡ́въ подвиза́стесѧ, посто́мъ, бдѣ́нїемъ же и҆ всено́щнымъ стоѧ́нїемъ плѡ́ти своѧ̑ дꙋ́хꙋ мꙋ́дрѣ повинꙋ́ли є҆стѐ. сегѡ̀ ра́ди ѿ вседержи́тельныѧ десни́цы достѡ́йныѧ вѣнцы̀ прїѧ́ли є҆стѐ. и҆ ны́нѣ прест҃ѣ́й трⷪ҇цѣ предстоѧ́ще, моли́тесѧ, всебл҃же́ннїи ѻ҆тцы̀ се́ргїе и҆ ге́рмане, сохрани́тисѧ въ ми́рѣ ѻ҆те́чествꙋ на́емꙋ, и҆ сп҃сти́сѧ дꙋша́мъ на́шымъ.

И҆́нъ тропа́рь, гла́съ а҃:

Ѿмїрскӏ́ѧ молвы̀ бѣ́гающе, безмо́лвїѧ и҆ бл҃гочⷭ҇тїѧ рачи́тєли, въ ти́хое приста́нище валаа́ма ѿ восто́ка прїидо́сте, и҆ въ не́мъ є҆ѵⷢ҇льски хрⷭ҇тꙋ̀ добродѣ́тельми послѣ́довавше, на ве́рхъ соверше́нства востеклѝ є҆стѐ: и҆ ны́нѣ въ торжествѣ̀ премӏ́рномъ бг҃озрѣ́нїемъ наслажда́ющесѧ, всебл҃же́ннїи ѻ҆тцы̀ се́ргїе и҆ ге́рмане, чл҃вѣколю́бца бг҃а моли́те, є҆́же сп҃стѝ всѣ́хъ на́съ, бл҃гочⷭ҇тнѡ ва́съ почита́ющихъ. Сла́ва, и҆ ны́нѣ, пра́здника.

И҆лѝ бг҃оро́диченъ а҃-гѡ гла́са: Гаврїи́лꙋ вѣща́вшꙋ тебѣ̀, дв҃о:

На вели́цѣй вече́рни.

Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ: стїхи̑ры на и҃.

А҆́ще слꙋ́жба сїѧ̀ соверша́етсѧ септе́мврїа во а҃і-й де́нь,

глаго́лемъ попра́зднства стїхи̑ры г҃ и҆ ст҃ы́хъ на є҃.

Гла́съ и҃. Подо́бенъ: Ѽ пресла́внагѡ чꙋдесѐ:

Ѽ пресла́внагѡ чꙋдесѐ!* мӏ́ра жи́тєли се́ргїй и҆ ге́рманъ,* ко хрⷭ҇тꙋ̀ любо́вїю распали́вшесѧ,* мӏ́ръ и҆ мїроде́ржца кꙋ́пнѡ доблемꙋ́дреннѡ побѣжда́ютъ,* и҆ добродѣ́телей лѣ́ствицею* къ соверше́нствꙋ житїѧ̀ є҆ѵⷢ҇льскагѡ восхо́дѧтъ:* и҆̀хже ꙗ҆́кѡ свѣти̑ла вє́лїѧ* пꙋсты́ни се́й хрⷭ҇то́съ бг҃ъ дарова̀,* свѣ́томъ дѣ́лъ и҆́хъ ѡ҆зарѧ́ѧ дꙋ́шы на́шѧ.

Ѽ ди́внагѡ мꙋ́жества!* многостра́стныѧ пло́ти* не щадѧ́тъ ст҃ӏ́и,* но ꙗ҆́кѡ на врага̀ востаю́тъ,* распина́юще ю҆̀ со страстьмѝ и҆ похотьмѝ* и҆ покарѧ́юще дꙋ́хови.* тѣ́мъ нетлѣ̑нныѧ да́ры ѿ хрⷭ҇та̀ прїе́млютъ,* ѿ земны́хъ къ нбⷭ҇нымъ прехо́дѧтъ,* ѿ а҆́гг҃лъ и҆ человѣ̑къ прославлѧ́ютсѧ.

Ѽ столпѝ ѡ҆дꙋшевле́ннїи се́ргїе и҆ ге́рмане,* добродѣ́тельми ᲂу҆кра́шеннїи,* ка́кѡ ва́съ по достоѧ́нїю воспое́мъ въ пѣ́снехъ;* предѣ́лъ бо є҆стества̀ преше́дше,* во пло́ти а҆́гг҃ли показа́стесѧ,* житїю̀ безпло́тныхъ подража́юще.* тѣ́мъ ꙗ҆́кѡ по́стникѡвъ ᲂу҆добре́нїе и҆ нбⷭ҇нагѡ сїѡ́на жи́тєли,* хода̑таи же и҆ мл҃твєнницы ко гдⷭ҇ꙋ,* при́снѡ ᲂу҆бл҃жа́етесѧ.

Ꙗ҆́кѡ ма̑слины плодови̑ты,* въ домꙋ̀ бж҃їи возрасто́ша:* ꙗ҆́коже фӏ́нїѯы, добродѣ́тельми процвѣто́ша на́мъ прпⷣбнїи:* и҆ ꙗ҆́кѡ сосꙋ́ди ст҃а́гѡ дх҃а,* не зла́томъ, но дарова́ньми бжⷭ҇твенными ᲂу҆краси́шасѧ.* и҆́хже пра́зднꙋюще па́мѧть, Ѽ празднолю́бцы,* житїю̀ и҆́хъ подража́имъ,* ꙗ҆́кѡ да сподо́битъ на́съ бг҃ъ* слы́шати съ ни́ми гла́съ пра́зднꙋющихъ въ нбⷭ҇номъ сїѡ́нѣ.

Сла́ва, гла́съ ѕ҃:

Сла́вимъ тѧ̀, трїѷпоста́сный бж҃е, тво́рче нб҃сѐ и҆ землѝ, ꙗ҆́кѡ дарова́лъ є҆сѝ на́мъ во ѡ҆́бразъ бл҃гоꙋгожда́ти тебѣ̀, тобо́ю и҆збра́нныхъ по́стникѡвъ, всебл҃же́нныхъ ѻ҆тцє́въ на́шихъ се́ргїа и҆ ге́рмана: и҆́хже любы̀ къ тебѣ̀ бы́сть неразлꙋ́чна, сою́зъ братолю́бїѧ и҆́стиненъ, мл҃тва непреста́нна, нра́ва кро́тость, сле́зъ стрꙋи̑ приснотекꙋ́щыѧ, по́стъ, бдѣ́нїе и҆ трꙋды̀, є҆стества̀ предѣ́лъ превосходѧ́щїи. тѣ́мже ѹ҆́мъ и҆ срⷣце предꙿѡчⷭ҇тивше, ѿ землѝ на нб҃о восхо́дѧтъ, и҆ ны́нѣ въ вѣ́чной сла́вѣ тебѐ со а҆́гг҃лы славосло́вѧтъ. тѣ́хъ мл҃твами, влⷣко чл҃вѣколю́бче, мӏ́рꙋ ми́ръ низпослѝ, и҆ дꙋша́мъ на́шымъ ве́лїю млⷭ҇ть.

И҆ ны́нѣ, пра́здника: и҆лѝ бг҃оро́диченъ: Кто̀ тебє̀ не ᲂу҆бл҃жи́тъ:

Вхо́дъ, прокӏ́менъ днѐ, и҆ чтє́нїѧ г҃.

Премꙋ́дрости соломѡ́новы чте́нїе:

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предꙿ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́новы чте́нїе:

Првⷣницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѡрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый, прпⷣбїе: Поѻстри́тъ же напра́сный гнѣ́въ во ѡ҆рꙋ́жїе: спобо́ретъ же съ ни́мъ мӏ́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, И҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы́кѡвъ: Ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

Премꙋ́дрости соломѡ́новы чте́нїе:

Првⷣникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо чⷭ҇тна̀ не многолѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ, преста́вленъ бы́сть: Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ѹ҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: Оу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На лїтӏ́и стїхи́ра хра́ма, и҆ прпⷣбныхъ, гла́съ г҃:

Безнача́льнаго свѣ́та, и҆зꙿ тьмы̀ свѣ́тъ ди́вный созда́вшаго, и҆ свѣ́томъ позна́нїѧ своегѡ̀ просвѣти́вшаго вѣ́рныхъ срⷣца̀, чл҃вѣколю́бца хрⷭ҇та̀, возлюби́вше ѻ҆тцы̀ бг҃омꙋ́дрїи, во свѣ́тѣ тогѡ̀ повелѣ́нїй до́брѣ ходи́ша, и҆ ѿ негѡ̀ свѣ́томъ блгⷣти просвѣ́щшесѧ, на́мъ со тьмо́ю страсте́й борю́щымсѧ свѣти́льницы ꙗ҆ви́шасѧ: и҆́хже мл҃твами, свѣтода́вче гдⷭ҇и, ᲂу҆мы̀ просвѣтѝ, и҆ срⷣца̀ на̑ша ѡ҆чⷭ҇ти, ꙗ҆́кѡ бл҃гоꙋтро́бенъ.

Во́льнꙋю нищетꙋ̀, ꙗ҆́кѡ две́рь къ соверше́нствꙋ, и҆збра́ша ѻ҆тцы̀ бг҃оно́снїи, и҆ ни́щи бы́вше дꙋ́хомъ, блгⷣтїю ѡ҆богати́шасѧ, ꙗ҆́же свѣ́томъ свои́мъ наста́ви и҆ рꙋководѝ и҆̀хъ на высотꙋ̀ добродѣ́телей соверше́нства. тоѧ̀ ᲂу҆̀бо и҆ на́съ, влⷣко хрⷭ҇тѐ, прпⷣбныхъ мл҃твами прича́стники бы́ти сподо́би, и҆ сп҃сѝ дꙋ́шы на́шѧ, ꙗ҆́кѡ чл҃вѣколю́бецъ.

Поста̀ и҆ мл҃твы си́ла во пло́ти сꙋ́щыѧ вы̀, се́ргїе и҆ ге́рмане, а҆́ки безплѡ́тныѧ содѣ́ла. зако́нъ бо пло́ти тве́рдости ᲂу҆ма̀ ва́шегѡ не возмо́же поколеба́ти: но зако́нꙋ ᲂу҆ма̀ ѡ҆ бз҃ѣ влады́чествꙋщꙋ, зако́нъ во ᲂу҆десѣ́хъ побѣжде́нъ быва́етъ. и҆ на́мъ ᲂу҆̀бо, Ѽ всебл҃же́ннїи, да́ръ цѣломꙋ́дрїѧ дарова́ти, хрⷭ҇та̀ бг҃а моли́те, и҆ сп҃стѝ дꙋ́шы на́шѧ.

Сла́ва, гла́съ в҃:

Бл҃года́тный свѣ́тъ трїѷпоста́снагѡ бж҃ества̀, ѿ дꙋ́шъ ва́шихъ, се́ргїе и҆ ге́рмане, мра́къ земна́гѡ пристра́стїѧ ѿгна́въ, на трꙋдолю́бный по́стничества пꙋ́ть наста́ви, сквозѣ̀ страсте́й свирѣ́пое мо́ре проведѐ: на го́рꙋ безстра́стїѧ возведѐ, зако́нъ на скрижа́лехъ серде́цъ ва́шихъ написа̀: дх҃о́вныѧ ма́нны прича́стники сотворѝ, и҆ въ зе́млю ѡ҆бѣтова́нїѧ, въ нбⷭ҇ный сїѡ́нъ введѐ: и҆дѣ́же со а҆́гг҃лы ликꙋ́юще, всебл҃га́го творца̀ моли́те, є҆́же сп҃стѝ дꙋ́шы на́шѧ.

И҆ ны́нѣ, пра́здника: и҆лѝ бг҃оро́диченъ: Ѽ чꙋдесѐ но́вагѡ:

На стїхо́внѣ стїхи̑ры, гла́съ є҃.

Подо́бенъ: Ра́дꙋйсѧ:

Ра́дꙋйсѧ, бг҃оизбра́ннаѧ дво́ице,* се́ргїе и҆ ге́рмане,* непобѣди́мїи хрⷭ҇тѡ́вы во́ини,* мы́сленныхъ врагѡ́въ побѣ́дою сла́внїи,* мона́шествꙋющихъ ᲂу҆твержде́нїе,* ѻ҆би́тели ѡ҆гражде́нїе,* и҆́миже въ на́съ тлетвѡ́рныѧ стра̑сти разрꙋша́ютсѧ,* недꙋ́зи и҆сцѣлѧ́ютсѧ,* де́мони прогони́ми быва́ютъ,* врагѡ́въ горды́нѧ низпа́даетъ, и҆ мы̀ спаса́емсѧ.* сла́ва ди́вномꙋ во ст҃ы́хъ свои́хъ бг҃ꙋ,* тѣ́хъ мл҃твами подаю́щемꙋ вѣ̑рнымъ ве́лїю млⷭ҇ть.

Стӏ́хъ: Чтна̀ предꙿ гдⷭ҇емъ сме́рть прпⷣбныхъ є҆гѡ̀.

Ра́дꙋйсѧ, ра́дости на́шеѧ вино́вне,* всебл҃же́нне ѻ҆́тче се́ргїе,* съ бг҃омꙋ́дрымъ ге́рманомъ!* внидо́сте бо въ ра́дость првⷣныхъ,* воспрїе́млете мздꙋ̀ трꙋдѡ́въ ва́шихъ ѿ влⷣки хрⷭ҇та̀:* на землѝ вре́меннѡ томꙋ̀ послꙋжи́вше,* ны́нѣ вѣ́чнѡ на нб҃сѣ́хъ съ ни́мъ ца́рствꙋете.* є҆гѡ́же бжⷭ҇твенною сла́вою ѡ҆сїѧва́еми,* въ свѣтоно́сный де́нь па́мѧти ва́шеѧ на́мъ спра́зднꙋйте,* томꙋ̀ прилѣ́жнѡ молѧ́щесѧ,* низпосла́ти вѣ̑рнымъ ве́лїю млⷭ҇ть.

Стӏ́хъ: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ.

Ра́дꙋйсѧ, ѻ҆би́тель ст҃а́ѧ:* ра́дꙋйсѧ, бжⷭ҇твенный хра́ме,* въ не́мже бл҃гоизво́ли всебл҃гӏ́й гдⷭ҇ь тѣлесє́мъ ст҃ы́хъ почи́ти,* и҆ ра́кꙋ и҆́хъ чꙋде́съ и҆сто́чникомъ содѣ́лати.* прїиди́те ᲂу҆̀бо, вѣ́рнїи,* почерпи́те и҆ пӏ́йте ѿ сегѡ̀ и҆сто́чника врачева́нїй блгⷣтныѧ воды̀,* и҆ къ винѡ́внымъ на́шеѧ ра́дости съ на́ми воззове́мъ ѱало́мски:* ра́дꙋйтесѧ, првⷣнїи се́ргїе и҆ ге́рмане:* ва́мъ бо подоба́етъ похвала̀:* ва́мъ прино́симъ по бз҃ѣ же́ртвꙋ хвале́нїѧ.

Сла́ва, гла́съ и҃:

Мона́хѡвъ ли́цы, бг҃а въ трⷪ҇цѣ славосло́вѧщихъ, и҆ всѐ мно́жество, соше́дшесѧ ᲂу҆бл҃жи́мъ ѻ҆тцы̀ всехва̑льныѧ, безмо́лвїѧ рачи́тєли, и҆́стинныѧ по́стники, всеизрѧ̑дныѧ дѣ́латєли зако́на бж҃їѧ, свѣти́льники бл҃года̑тныѧ, плотонѡ́сныѧ а҆́гг҃лы, и҆ возопїе́мъ къ ни̑мъ, глаго́люще: ѻ҆тцы̀ бг҃оизбра́ннїи се́ргїе и҆ ге́рмане, нбⷭ҇нїи сꙋ́ще гра́ждане, влⷣкꙋ всѣ́хъ моли́те, всѧ̑ гра́ды и҆ страны̑ рѡссі̑йскїѧ ѿ гла́да и҆ меча̀ сохрани́ти, ми́ръ цр҃кви свое́й дарова́ти, и҆ сп҃стѝ дꙋ́шы на́шѧ.

И҆ ны́нѣ, попра́зднства: и҆лѝ бг҃оро́диченъ: Безневѣ́стнаѧ дв҃о:

На бл҃гослове́нїи хлѣ́бѡвъ, тропа́рь прпⷣбныхъ, два́жды,

и҆ Бцⷣе, дв҃о: и҆лѝ пра́здника.

На ѹ҆́трени.

На Бг҃ъ гдⷭ҇ь: тропа́рь прпⷣбныхъ, два́жды.

Сла́ва, и҆ ны́нѣ, бг҃оро́диченъ.

А҆́ще слꙋ́жба соверша́етсѧ септе́мврїа во а҃і-й де́нь, є҆гда̀ є҆́сть попра́зднство,

тогда̀ пое́мъ тропа́рь пра́здника, два́жды: Сла́ва, ст҃ы́хъ: И҆ ны́нѣ, пра́здника.

По а҃-мъ стїхосло́вїи сѣда́ленъ, гла́съ а҃:

Бжⷭ҇твеннымъ жела́нїемъ распали́вшесѧ прпⷣбнїи, ѱало́мски ко хрⷭ҇тꙋ̀ взыва́хꙋ: что̀ на́мъ є҆́сть на нб҃сѝ па́че тебє̀, бж҃е, вожделѣ́ннѣйше, жела́нїй на́шихъ кра́ю; и҆ ѿ тебє̀ что̀ восхотѣ́хомъ на землѝ; всѧ̑ земна̑ѧ презрѣ́хомъ, всѧ̑ тлѣ̑ннаѧ вмѣни́хомъ за ᲂу҆ме́ты, да тебѐ є҆ди́наго прїѡбрѧ́щемъ, все́ю дꙋше́ю возлю́бимъ, и҆ тебѣ̀ є҆ди́номꙋ послꙋ́жимъ. тѣ́хъ мл҃твами, чл҃вѣколю́бче гдⷭ҇и, любвѐ твоеѧ̀ срⷣца̀ на̑ша и҆спо́лни, и҆ сп҃сѝ на́съ, ꙗ҆́кѡ бл҃гоꙋтро́бенъ. Два́жды.

Сла́ва, и҆ ны́нѣ, пра́здника: и҆лѝ бг҃оро́диченъ, гла́съ то́йже:

Ꙗ҆́кѡ нбⷭ҇нагѡ цр҃ѧ̀ чⷭ҇тѣ́йшїй хра́мъ была̀ є҆сѝ, пречⷭ҇таѧ, и҆ къ немꙋ̀ и҆мꙋ́щаѧ мт҃рнее дерзнове́нїе, того̀ ᲂу҆моли́ти потщи́сѧ, є҆́же ѡ҆чⷭ҇тити дꙋ́шы на́шѧ ѿ мно́жества прегрѣше́нїй, и҆ хра́мы чє́стны въ жили́ще себѣ̀ чл҃вѣколю́бїемъ свои́мъ на́съ содѣ́лати: тогѡ́ бо є҆смы̀ творе́нїе. а҆́ще и҆ согрѣша́емъ, но наде́жды, є҆́же сп҃сти́сѧ, не ѿпа́даемъ, и҆мꙋ́ще тѧ̀ къ немꙋ̀, влⷣчце, те́плꙋю ѡ҆ на́съ предста́тельницꙋ.

По в҃-мъ стїхосло́вїи сѣда́ленъ, гла́съ є҃:

Не внѣ́шнее стклѧ́ницы и҆ блю́да ѿ хрⷭ҇то́выхъ слове́съ наꙋчи́шасѧ прпⷣбнїи ѡ҆чища́ти, но внꙋ́треннѧго человѣ́ка ѿ страсте́й грѣхо́вныхъ: ѿ срⷣца бо и҆схо́дѧтъ помышлє́нїѧ ѕла̑ѧ. тѣ́мъ въ безмо́лвїи, добродѣ́телей дѣ́ланїемъ и҆ блгⷣти дѣ́йствомъ, серде́чнꙋю чⷭ҇тотꙋ̀ стѧжа́вше, сосꙋ́ди чⷭ҇тни ꙗ҆ви́шасѧ ст҃о́мꙋ дх҃ꙋ, и҆ ны́нѣ на́мъ свы́ше, хрⷭ҇тꙋ̀ предстоѧ́ще, неѡскꙋ́днꙋю блгⷣть и҆сцѣле́нїй подаю́тъ, и҆ всѣ̑мъ вѣ́рнѡ чтꙋ́щымъ свѣтоно́снꙋю па́мѧть и҆́хъ. Два́жды.

Сла́ва, и҆ ны́нѣ, пра́здника: и҆лѝ бг҃оро́диченъ, гла́съ то́йже:

Мы́сленнаѧ зарѐ, возсїѧ́вшаѧ мӏ́рꙋ несозда́нное сл҃нце хрⷭ҇та̀, пренепоро́чнаѧ дв҃о! къ томꙋ̀ ꙗ҆́кѡ сн҃ꙋ твоемꙋ̀ прострѝ твоѝ мт҃рнїѧ рꙋ́цѣ съ моле́нїемъ, є҆́же возсїѧ́ти на́мъ грѣ̑шнымъ незаходи́мымъ свѣ́томъ блгⷣти, ꙗ҆́кѡ да ѿло́жше дѣла̀ тьмы̀, є҆ле́емъ до́брыхъ дѣ́лъ просвѣти́мъ дꙋ́шы на́шѧ, и҆ досто́йни бꙋ́демъ вни́ти въ черто́гъ съ мꙋ́дрыми дѣ́вами, тебѐ, влⷣчце, велича́юще во всѧ̑ вѣ́ки.

По полѷеле́и сѣда́ленъ, гла́съ д҃:

Хва́лѧще и҆́мѧ гдⷭ҇не въ бжⷭ҇твеннѣмъ є҆гѡ̀ хра́мѣ, восхва́лимъ кꙋ́пнѡ вѣ̑рныѧ є҆гѡ̀ рабы̑, всехва̑льныѧ ѻ҆тцы̀ на́шѧ се́ргїѧ и҆ ге́рмана, и҆̀же просла́виша бг҃а въ дꙋша́хъ свои́хъ и҆ тѣлесѣ́хъ, и҆ свѣ́томъ добродѣ́телей, ꙗ҆́кѡ ѕвѣ́зды новоѧвлє́нныѧ, просвѣти́шасѧ во странѣ̀ каре́льстѣй. тѣ́мже и҆ бг҃ъ и҆̀хъ въ нбⷭ҇нѣмъ црⷭ҇твїи просла́ви, и҆ на́мъ помо́щники показа̀, при́снѡ молѧ́щыѧсѧ ѡ҆ дꙋша́хъ на́шихъ. Два́жды.

Сла́ва, и҆ ны́нѣ, пра́здника: и҆лѝ бг҃оро́диченъ, гла́съ то́йже:

Сбытїѐ слове́съ твои́хъ, влⷣчце, зри́тсѧ: се́ бо ᲂу҆бл҃жа́ютъ тѧ̀ всѝ ро́ди, и҆ мы̀ рабѝ твоѝ превозно́симъ вы́нꙋ по бз҃ѣ и҆́мѧ твоѐ, и҆ вопїе́мъ: ра́дꙋйсѧ, земноро́дныхъ ра́досте: ра́дꙋйсѧ, дѣ́вственныхъ похвало̀: ра́дꙋйсѧ, страстьмѝ ѡ҆бꙋрева́ємымъ ти́хое приста́нище: ра́дꙋйсѧ, ѿча̑ѧннымъ прибѣ́жище и҆ сп҃се́нїе: ра́дꙋйсѧ, вѣ̑рнымъ застꙋ́пнице и҆ покро́ве: ра́дꙋйсѧ, въ жена́хъ є҆ди́на бл҃гослове́ннаѧ, бцⷣе мрӏ́е, ро́ждшаѧ всѣ̑мъ жи́знь. Та́же степє́нна, а҃-й а҆нтїфѡ́нъ д҃-гѡ гла́са.

Прокӏ́менъ, гла́съ д҃: Чтна̀ предꙿ гдⷭ҇емъ сме́рть прпⷣбныхъ є҆гѡ̀. Стӏ́хъ:

Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;

Є҆ѵⷢ҇лїе ѿ матѳе́а, зача́ло м҃г: Речѐ гдⷭ҇ь свои̑мъ ᲂу҆ченикѡ́мъ: всѧ̑ мнѣ̀ предана̑ сꙋ́ть:

По н҃-мъ ѱалмѣ̀: Мл҃твами се́ргїа и҆ ге́рмана:

Та́же стїхи́ра, гла́съ ѕ҃:

Свѣтоно́снаѧ ѻ҆тцє́въ па́мѧть, ꙗ҆́кѡ трꙋба̀ велегла́снаѧ, ѿ всѣ́хъ стра́нъ вѣ́рныхъ мно́жєства созыва́етъ, и҆ гла́съ ѻ҆рга́нѡвъ ѹ҆́мныхъ ко хвале́нїю возбꙋжда́етъ. восхва́лимъ ᲂу҆̀бо, и҆ вознесе́мъ въ пѣ́снехъ ра́дости на́шеѧ винѡ́вныѧ, всехва̑льныѧ ѻ҆тцы̀ на́шѧ се́ргїа и҆ ге́рмана, и҆̀же на́мъ ны́нѣ неви́димѡ спра́зднꙋютъ, дꙋ́хомъ сра́дꙋютсѧ, и҆ бл҃года̑тныѧ да́ры ᲂу҆ хрⷭ҇та̀ про́сѧтъ, є҆́же ᲂу҆ще́дрити всѧ̑, досто́йнѡ пра́зднꙋющыѧ всечⷭ҇тнꙋ́ю па́мѧть и҆́хъ.

Канѡ́нъ пра́здника пе́рвый, и҆лѝ во ѻ҆ктѡ́ихѣ бцⷣы со і҆рмосо́мъ на ѕ҃:

и҆ прпⷣбныхъ настоѧ́щїй на и҃.

Гла́съ д҃. Пѣ́снь а҃.

І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ, да тебѣ̀, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.

Припѣ́въ:Прпⷣбнїи ѻ҆тцы̀ се́ргїе и҆ ге́рмане, моли́те бг҃а ѡ҆ на́съ.

Сл҃нце пра́вды хрⷭ҇тѐ, возсїѧ́й мѝ дне́сь свѣ́томъ ра́зꙋма твоегѡ̀, да свѣти́льники на́шѧ, се́ргїа и҆ ге́рмана, срⷣцемъ и҆ ᲂу҆стна́ми воспою̀ во сла́вꙋ твою̀, влⷣко.

Реко́ша въ себѣ̀ ст҃ӏ́и: бѣжи́мъ простра́ннагѡ пꙋтѝ, занѐ въ па́гꙋбꙋ веде́тъ: бѣжи́мъ грѣхо́вныхъ страсте́й, до а҆́да бо низво́дѧтъ: тѣ́сный же пꙋ́ть возлю́бимъ, да наслѣ́димъ жи́знь вѣ́чнꙋю.

Ꙗ҆́коже дожде́мъ, слеза́ми зе́млю срⷣца ва́шегѡ напаѧ́юще, и҆ ꙗ҆́кѡ со́лнцемъ теплото́ю мл҃твы согрѣва́юще, добродѣ́телей плоды̀, се́ргїе и҆ ге́рмане, вїногра́да дѣ́лателю принесо́сте.

Бг҃оро́диченъ: Добродѣ́тєли ст҃ы́хъ пою̀ и҆ сла́влю, са́мъ же ѕла̑ѧ твори́ти, ᲂу҆вы̀ мнѣ̀, не престаю̀. но, влⷣко хрⷭ҇тѐ, мл҃твами мт҃ре твоеѧ̀, и҆ менѐ ѡ҆каѧ́ннаго ѿ сна̀ лѣ́ности къ добродѣ́телей дѣ́ланїю возбꙋдѝ.

Пѣ́снь г҃.

І҆рмо́съ: Не мꙋ́дростїю и҆ си́лою и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо ст҃ъ па́че тебє̀, чл҃вѣколю́бче.

Преслꙋ́шавъ за́повѣдь, пра́ѻтецъ сла́дости ра́йскїѧ лише́нъ бы́сть: послꙋша́нїемъ же ст҃ӏ́и вѣ́чнꙋю жи́знь наслѣ́довавше, бг҃озрѣ́нїемъ наслажда́ютсѧ.

Та́йное дѣ́ланїе ва́ше, безмо́лвїѧ люби́телїе, ви́дѧ ѻ҆ц҃ъ нбⷭ҇ный, ꙗ҆́кѡ сы́ны своѧ̑ ᲂу҆ще́дри, блгⷣтїю ѡ҆богатѝ, и҆ на нб҃сѣ́хъ просла́ви.

Чтоты̀ рачи́тєли, земны̑ѧ а҆́гг҃лы, и҆збра̑нныѧ сосꙋ́ды ст҃а́гѡ дх҃а, чⷭ҇тое зерца́ло цѣломꙋ́дрїѧ, се́ргїа и҆ ге́рмана, чⷭ҇тото́ю срⷣца почти́мъ.

Бг҃оро́диченъ: Ра́бъ сы́й чре́ва, ка́кѡ возмогꙋ̀ пло́ть дꙋ́хꙋ покори́ти и҆ чⷭ҇тотꙋ̀ а҆́гг҃льскꙋю стѧжа́ти; но, Ѽ дѣ́вственныхъ похвало̀, пречⷭ҇таѧ! ты̀ и҆зꙿ плѣ́на сегѡ̀ и҆зба́ви менѐ несмы́сленнаго.

Конда́къ и҆ і҆́косъ пра́здника, а҆́ще є҆́сть попра́зднство.

Сѣда́ленъ, гла́съ г҃:

Ѿ шꙋ́ма жите́йскихъ во́лнъ ᲂу҆далѧ́ющесѧ, во ѻ҆́стровъ нева̀ по́нта съ восто́чныхъ стра́нъ прїидо́сте: и҆дѣ́же ни глꙋбина̀ страсте́й, ни бꙋ́рѧ дꙋхѡ́въ проти́вныхъ тве́рдости ᲂу҆ма̀ ва́шегѡ, се́ргїе и҆ ге́рмане, не возмо́же поколеба́ти: но по́двигомъ до́брымъ въ безмо́лвїи подвиза́ющесѧ, бл҃гоꙋго́дни хрⷭ҇тꙋ̀ ꙗ҆ви́стесѧ. є҆гѡ́же ны́нѣ предстоѧ́ще прⷭ҇то́лꙋ, мольбꙋ̀ сотвори́те, да призира́етъ вы́нꙋ млⷭ҇рдымъ ѻ҆́комъ свои́мъ на мѣ́сто селе́нїѧ ва́шегѡ, сп҃са́ѧ въ ми́рѣ дꙋ́шы на́шѧ.

Сла́ва, и҆ ны́нѣ, пра́здника: и҆лѝ бг҃оро́диченъ, гла́съ то́йже:

Не ѿ а҆́гг҃лъ, не ѿ человѣ̑къ, но ѿ твоегѡ̀ сн҃а, влⷣчце, творца̀ а҆́гг҃лѡвъ и҆ человѣ́кѡвъ, кро́ткагѡ и҆ смире́ннагѡ срⷣцемъ і҆и҃са, смире́нїю ᲂу҆до́бь навы́кнꙋти могꙋ̀, и҆ не прилѣжꙋ̀. ᲂу҆вы̀ мнѣ̀! го́рдъ сы́й, презо́рливъ и҆ непокори́въ при́снѡ ѿ нерадѣ́нїѧ моегѡ̀ ꙗ҆влѧ́юсѧ. тѧ̀ ᲂу҆̀бо, Ѽ дв҃о пренепоро́чнаѧ, молю̀ смире́ннѡ съ те́плыми слеза́ми, є҆́же дꙋ́хъ кро́тости и҆ смире́нїѧ срⷣцꙋ моемꙋ̀ дарова́ти, да вкꙋ́ситъ поко́й сладча́йшїй дꙋша̀ моѧ̀.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѡ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.

Ꙗ҆́кѡ ло́зы вїногра́да хрⷭ҇то́ва сꙋ́ще, се́ргїе и҆ ге́рмане, грозда́ми добродѣ́телей процвѣ́тшїи, вїно́мъ бжⷭ҇твеннагѡ весе́лїѧ и҆спо́лните срⷣца̀ на̑ша.

Мо́лимъ ва́съ, ꙗ҆́кѡ въ ра́дости сꙋ́щыѧ првⷣныхъ, всебл҃же́ннїи, всѧ́кꙋ печа́ль и҆ го́ресть ѿ дꙋ́шъ на́шихъ ѿгна́ти, ꙗ҆́кѡ да ра́дꙋющесѧ сла́вимъ ва́съ.

Те́мнаѧ страсте́й бꙋ́рѧ воста̀ на мѧ̀, и҆ свѣ́тъ блгⷣти сокрыва́етсѧ ѿ ѻ҆че́съ мои́хъ. но, Ѽ свидѣ́тєльницы мы́сленнїи! моемꙋ̀ ѡ҆мраче́нїю ᲂу҆скори́те въ по́мощь.

Бг҃оро́диченъ: Ли́цы а҆́гг҃лѡвъ и҆ прпⷣбныхъ и҆ мы̀ грѣ́шнїи мо́лимъ тѧ̀, бл҃гоꙋтро́бне гдⷭ҇и: предста́тельствомъ мт҃ре твоеѧ̀, ᲂу҆ще́дри и҆ сп҃сѝ всѣ́хъ на́съ. Пѣ́снь є҃.

І҆рмо́съ: Нечести́вїи не ѹ҆́зрѧтъ сла́вы твоеѧ̀, хрⷭ҇тѐ, но мы̀ тѧ̀, є҆диноро́дне, ѻ҆́ч҃ескїѧ сла́вы сїѧ́нїе бж҃ества̀, ѿ но́щи ѹ҆́тренююще, воспѣва́емъ тѧ̀, чл҃вѣколю́бче.

Кра́йнимъ безмо́лвїемъ, мл҃твою же и҆ посто́мъ и҆ бдѣ́нїемъ дꙋ́шы своѧ̑ ѡ҆чⷭ҇тивше, пꙋстыннолю́бцы трисїѧ́ннагѡ свѣ́та прїѧ́телище содѣ́лашасѧ.

Не ꙗ҆́коже трѡ́сти вѣ́тромъ коле́блємыѧ, но ꙗ҆́кѡ тве́рдїи столпѝ, се́ргїй и҆ ге́рманъ на краеꙋго́льномъ ка́мени, хрⷭ҇тѣ̀, вѣ́рою ᲂу҆тверди́вшесѧ, добродѣ́тельми просїѧ́ша.

І҆ѡа́нновꙋ житїю̀ въ пꙋсты́ни і҆ѻрда́новѣ и҆ и҆лїинꙋ̀ безмо́лвїю на горѣ̀ ревнꙋ́юще прпⷣбнїи, страсте́й и҆́га дѣѧ́нїемъ свобо́ждшесѧ, бг҃озрѣ́нїемъ просвѣти́шасѧ.

Бг҃оро́диченъ: Ты̀ покро́въ мо́й ѿ напа́стей вра́жїихъ, влⷣчце, ты̀ свѣ́тъ срⷣцꙋ моемꙋ̀, печа́льми жите́йскими ѡ҆мраче́нномꙋ, при́снѡ бꙋ́ди, бцⷣе, и҆ сп҃си́ мѧ. Пѣ́снь ѕ҃.

І҆рмо́съ: Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зꙿ глꙋбины̀ возведѝ живо́тъ мо́й, многомлⷭ҇тиве.

Ꙗ҆́кѡ же́ртвꙋ непоро́чнꙋ и҆ всесожже́нїе тꙋ́чно, принесо́ша себѐ ст҃ӏ́и бг҃ꙋ, и҆ па́че всѧ́кагѡ всепло́дїѧ же́ртвы и҆ приноше́нїѧ, бл҃гоꙋго́дни є҆мꙋ̀ ꙗ҆ви́шасѧ.

Оу҆́мныма ѻ҆чи́ма зрѧ́ще предꙿ собо́ю гдⷭ҇а, бг҃обл҃же́ннїи, непоро́чнѡ ше́ствовали є҆стѐ по стезѧ́мъ за́повѣдей є҆гѡ̀, ᲂу҆твержде́ни и҆мꙋ́ще но́зѣ блгⷣтїю ст҃а́гѡ дх҃а.

Не и҆мѣ̀ поко́ѧ бг҃олюби́вый дꙋ́хъ ва́шъ, се́ргїе и҆ ге́рмане, до́ндеже не ѡ҆брѣто́сте себѣ̀ мѣ́сто безмо́лвїѧ: въ то́мъ бо вѣ́рою и҆ любо́вїю съ бг҃омъ соедини́вшесѧ, вѣ́чный поко́й наслѣ́довасте.

Бг҃оро́диченъ: Не ки́томъ, ꙗ҆́коже і҆ѡ́на, но грѣхо́мъ пожре́нъ сы́й, вопїю̀: влⷣко хрⷭ҇тѐ! мл҃твами пречⷭ҇тыѧ твоеѧ̀ мт҃ре и҆ прпⷣбныхъ ѻ҆тє́цъ ѿ и҆стлѣ́нїѧ мѧ̀ и҆зба́ви, ꙗ҆́кѡ бл҃гоꙋтро́бенъ.

Конда́къ, гла́съ д҃:

Ѿмїрска́гѡ житїѧ̀ и҆зше́дше, ѿверже́нїемъ мӏ́ра хрⷭ҇тꙋ̀ послѣ́довасте, и҆ достиго́сте вели́кагѡ нева̀ є҆́зера, и҆ въ не́мъ на ѻ҆́стровѣ валаа́мѣ все́льшесѧ, равноа́гг҃льное житїѐ пожи́ли є҆стѐ: ѿѻнꙋ́дꙋже веселѧ́щесѧ прешлѝ є҆стѐ къ нбⷭ҇нымъ черто́гѡмъ. и҆ ны́нѣ со а҆́гг҃лы влⷣчню прⷭ҇то́лꙋ предстоѧ́ще, помина́йте на́съ ча̑дъ свои́хъ, ꙗ҆̀же собра́ли є҆стѐ, бг҃омꙋ́дрїи, да ра́достнѡ ѿ дꙋшѝ вопїе́мъ: ра́дꙋйтесѧ, се́ргїе и҆ ге́рмане, ѻ҆тцы̀ пребл҃же́ннїи.

І҆́косъ:

Ка́кѡ, неразꙋ́менъ сы́й, воспою̀ по́стники всехва̑льныѧ; сло́во бо премꙋ́дрости и҆ сло́во ра́зꙋма нѣ́сть дано̀ мѝ, безслове́сїемъ ѡ҆держи́мꙋ сꙋ́щꙋ. ты̀ са́мъ, смы́сла пода́телю і҆и҃се, премꙋ́дрость вѣ́чнаѧ и҆ сло́во бж҃їе ѵ҆поста́сное, мл҃твами прпⷣбныхъ ѹ҆́мъ мо́й просвѣтѝ и҆ да́рꙋй сло́во, да гла́сомъ а҆́гг҃льскимъ воспою̀ и҆̀хъ, глаго́лѧ: Ра́дꙋйтесѧ, ѕвѣ́зды мы́слєнныѧ, ѿ восто́ка на́мъ возсїѧ́вшыѧ: ра́дꙋйтесѧ, безмо́лвїѧ люби́тєли всеизрѧ́днїи: Ра́дꙋйтесѧ, хрⷭ҇то́выхъ за́повѣдей дѣ́латєли непоро́чнїи: ра́дꙋйтесѧ, златӏ́и сосꙋ́ди, дх҃омъ ст҃ы́мъ и҆спо́лненнїи: Ра́дꙋйтесѧ, столпѝ ѡ҆дꙋшевле́ннїи, зда́нїе по́стничества ᲂу҆твержда́ющїи: ра́дꙋйтесѧ, крӏ́ни, чⷭ҇тото́ю серде́чною а҆́ки снѣ́гомъ ᲂу҆бѣле́ннїи: Ра́дꙋйтесѧ, ма̑слины, ѿ хрⷭ҇та̀ на́мъ є҆ле́й млⷭ҇рдїѧ плодоносѧ́щыѧ: ра́дꙋйтесѧ, вѣ̑рнымъ побѡ́рницы, мл҃твеннымъ копїе́мъ сопроти̑вныѧ поража́ющїи: Ра́дꙋйтесѧ, цѣли́телїе тѣле́сныхъ не́мощей и҆ страсте́й дꙋше́вныхъ: ра́дꙋйтесѧ, ᲂу҆скорѧ́ющїи въ по́мощь ѡ҆бꙋрева́ємымъ и҆ ва́мъ молѧ́щымсѧ: Ра́дꙋйтесѧ, валаа́мꙋ свѣти̑ла вє́лїѧ и҆ пресвѣ̑тлаѧ: ра́дꙋйтесѧ, всеѧ̀ рꙋсѝ застꙋ́пники тє́плыѧ.

Ра́дꙋйтесѧ, се́ргїе и҆ ге́рмане, ѻ҆тцы̀ всебл҃же́ннїи.

Пѣ́снь з҃.

І҆рмо́съ: Ю҆́нѡши трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жше, посредѣ̀ пла́мене вопїѧ́хꙋ: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.

Ѻ҆гню̀ сꙋ́щꙋ въ ва́съ, се́ргїе и҆ ге́рмане, бжⷭ҇твенныѧ любвѐ, пла́мень по́хоти и҆ ѻ҆́гнь ꙗ҆́рости претвори́сѧ въ ро́сꙋ. тѣ́мъ ра́дꙋющесѧ въ безмо́лвїи воспѣва́сте: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.

Пло́ти свое́й, ꙗ҆́коже злато́мꙋ і҆́дѡлꙋ ѻ҆́троцы, прпⷣбнїи не послꙋжи́ша: но а҆пⷭ҇льски распина́юще ю҆̀ со страстьмѝ и҆ похотьмѝ, покори́ша дꙋ́хꙋ, и҆ хра́мы чⷭ҇тни сотво́ршесѧ ст҃о́мꙋ дх҃ꙋ, взыва́хꙋ: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.

Ꙗ҆́кѡ чⷭ҇тоты̀ храни́тєли, чⷭ҇тѣ́йшемꙋ бж҃ествꙋ̀ вмѣсти́лище содѣ́лашасѧ любомꙋ́дрїи, и҆ во пло́ти сꙋ́ще, тайнодѣ́йствїемъ ᲂу҆тѣ́шителѧ, къ премӏ́рныхъ зрѣ́нїю восхища́хꙋсѧ, пою́ще: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.

Бг҃оро́диченъ: Ꙗ҆́кѡ мт҃рь безнача́льнагѡ бг҃а сло́ва сꙋ́щꙋю тѧ̀, влⷣчце, прошꙋ̀ ᲂу҆миле́ннѡ ѿ безслове́сныхъ страсте́й и҆зба́вити мѧ̀, ꙗ҆́кѡ ѻ҆́троки ѿ пе́щи халде́йскїѧ, да съ ни́ми ра́дꙋѧсѧ воспою̀: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ. Пѣ́снь и҃.

І҆рмо́съ: И҆зба́вителю всѣ́хъ всеси́льне, посредѣ̀ пла́мене бл҃гочⷭ҇твовавшыѧ снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣ́ла̀, бл҃гослови́те, по́йте гдⷭ҇а.

Бо́дреннымъ ᲂу҆ма̀ трезве́нїемъ, и҆ те́плымъ ко хрⷭ҇тꙋ̀ моле́нїемъ, дїа́вола, ꙗ҆́кѡ льва̀ рыка́ющаго и҆ и҆́щꙋщаго кого̀ поглоти́ти, прпⷣбнїи посрами́ша, стра̑стныѧ тогѡ̀ прило́ги ѿсѣ́кше. тѣ́мъ со ѻ҆́трѡки поѧ́хꙋ: всѧ̑ дѣ́ла̀, бл҃гослови́те, по́йте гдⷭ҇а.

Всѧ̑ ѡ҆рꙋ̑жїѧ бж҃їѧ се́ргїй и҆ ге́рманъ воспрїи́мше на гора́хъ валаа́ма, ꙗ҆́коже мѡѷсе́й и҆ а҆арѡ́нъ воздѣѧ́нїемъ ᲂу҆ма̀ и҆ рꙋ́къ на высотꙋ̀, сопроти́вныхъ си́лꙋ, вѣ̑рнымъ спобо́рствꙋюще, ѡ҆сла́биша, пою́ще пѣ́снь: всѧ̑ дѣ́ла̀, бл҃гослови́те, по́йте гдⷭ҇а.

Безнача́льнаѧ, вседержи́тельнаѧ, є҆диносꙋ́щнаѧ ст҃а́ѧ трⷪ҇це, мл҃твами прпⷣбныхъ твои́хъ, ѿ тре́хъ мы́сленныхъ врагѡ́въ боре́нїй дꙋ́шы на́шѧ и҆зба́ви, поми́лꙋй и҆ сп҃сѝ всѣ́хъ, бл҃гочⷭ҇тнѡ тѧ̀ и҆сповѣ́дающихъ.

Бг҃оро́диченъ: Бг҃оꙋго́днѡ пожи́вшымъ послѣ́довати менѐ сотворѝ до́брыми дѣ́лы, всенепоро́чнаѧ, потреблѧ́ющи ѿ дꙋшѝ моеѧ̀ прило́ги лꙋка́выхъ де́монѡвъ и҆ возводѧ́щи при́снѡ ѹ҆́мъ мо́й къ зрѣ́нїю за́повѣдей сн҃а твоегѡ̀ и҆ творца̀ моегѡ̀.

Пѣ́снь ѳ҃.

І҆рмо́съ: Є҆́ѵа ѹ҆́бѡ, недꙋ́гомъ преслꙋша́нїѧ, клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мӏ́рови бл҃гослове́нїе процвѣла̀ є҆сѝ. тѣ́мъ тѧ̀ всѝ велича́емъ.

На тве́рдомъ вѣ́ры ка́мени блгⷣтїю ᲂу҆твержде́ни сꙋ́ще, въ безмо́лвїи подвиза́ющесѧ, тече́нїе по́стничества до́брѣ сконча́вше, и҆ мздовоздаѧ́нїе ѿ хрⷭ҇та̀ прїи́мше, томꙋ̀ ны́нѣ моли́тесѧ, всебл҃же́ннїи, въ вѣ́рѣ и҆ добродѣ́тели вѣ̑рныѧ своѧ̑ ᲂу҆тверди́ти.

Ꙗ҆́кѡ побѣди́тєли мы́сленныхъ врагѡ́въ, се́ргїе и҆ ге́рмане, предстоѧ́ще ны́нѣ прⷭ҇то́лꙋ нбⷭ҇ныхъ си́лъ цр҃ѧ̀, моли́те бл҃гость є҆гѡ̀, правосла̑внымъ хрⷭ҇тїа́нѡмъ на сꙋпоста́ты побѣ́дꙋ и҆ ѡ҆долѣ́нїе дарова́ти.

Въ нбⷭ҇ныхъ сꙋ́ще ѻ҆би́телехъ, прпⷣбнїи, влⷣкꙋ всѣ́хъ моли́те, ѻ҆би́тель сїю̀ и҆ всѧ̑ гра́ды и҆ страны̑ хрⷭ҇тїа̑нскїѧ въ ми́рѣ сохрани́ти, и҆ всѧ̑ ны̀ сп҃стѝ, бл҃гочⷭ҇тнѡ ва́съ почита́ющыѧ.

Бг҃оро́диченъ: Ка́мень краеꙋго́льный, хрⷭ҇то́съ, вѣ̑рнымъ є҆́сть ѡ҆снова́нїе, невѣ̑рнымъ же ка́мень претыка́нїѧ и҆ собла́зна: на се́мъ ка́мени, влⷣчце, ᲂу҆твердѝ моѐ помышле́нїе, и҆ сп҃си́ мѧ, ꙗ҆́кѡ къ немꙋ̀ и҆мꙋ́щаѧ мт҃рнее дерзнове́нїе.

Свѣти́ленъ:

Свѣтода́вче гдⷭ҇и! свѣти́льникѡвъ на́шихъ се́ргїа и҆ ге́рмана мл҃твами просвѣтѝ на́съ, вѣ́рою тебѣ̀ слꙋжа́щихъ и҆ бл҃гочⷭ҇тнѡ пра́зднꙋющихъ свѣтоно́снꙋю тѣ́хъ па́мѧть. Два́жды.

Сла́ва, и҆ ны́нѣ, пра́здника: и҆лѝ бг҃оро́диченъ:

Свѣщѐ та́инственнаѧ, бг҃оневѣ́сто! сꙋ́щымъ во тьмѣ̀ неразꙋ́мїѧ, свѣ́томъ ра́зꙋма и҆́стины возсїѧ́й, и҆ сп҃сѝ всѣ́хъ, бл҃гочⷭ҇тнѡ тѧ̀, ꙗ҆́кѡ мт҃рь бж҃їю, велича́ющихъ.

На хвали́техъ стїхи̑ры на д҃, гла́съ д҃.

Подо́бенъ: Да́лъ є҆сѝ зна́менїе:

Да́лъ є҆сѝ во ѡ҆́бразъ на́мъ* бл҃гоꙋгожда́ти тебѣ̀, гдⷭ҇и,* бл҃гі̑ѧ и҆ вѣ̑рныѧ рабы̑ твоѧ̑ се́ргїа и҆ ге́рмана,* и҆̀же ѹ҆́мнымъ бо́дреннымъ трезве́нїемъ* бори́тєли де́моны посрами́ша,* стра̑стныѧ прило́ги и҆́хъ доблемꙋ́дреннѡ ѿрази́вше,* и҆ грѣхꙋ̀ не бы́вше рабѝ,* тебѣ̀ бл҃гоꙋго́дни ꙗ҆ви́шасѧ,* і҆и҃се всеси́льне, сп҃се дꙋ́шъ на́шихъ.

Творе́нїемъ гдⷭ҇нихъ за́повѣдей* и҆ непреста́нныѧ мл҃твы дѣ́йствомъ,* бжⷭ҇твенныѧ любвѐ теплотꙋ̀ стѧжа́вше ст҃ӏ́и ѻ҆тцы̀,* и҆ сла́дость тоѧ̀ дꙋше́внымъ чꙋ́вствомъ вкꙋси́вше,* ко хрⷭ҇тꙋ̀ взыва́хꙋ:* ника́ѧ и҆на́ѧ сла́дость* не разлꙋчи́тъ на́съ ѿ любвѐ твоеѧ̀,* і҆и҃се сладча́йший, сп҃се дꙋ́шъ на́шихъ.

Ꙗ҆́кѡ неистощи́мое сокро́вище* и҆ непрестае́мый пото́къ дх҃о́вныхъ дарова́нїй,* прпⷣбныхъ ѻ҆тє́цъ ра́ка* въ бжⷭ҇твеннѣмъ се́мъ хра́мѣ ѿ тебє̀ намъ дарова́сѧ,* і҆и҃се чл҃вѣколю́бче, сп҃се всегѡ̀ мӏ́ра,* бл҃года́телю ще́дрый,* врачꙋ̀ дꙋ́шъ и҆ тѣле́съ на́шихъ.

Ра́дꙋйсѧ, пꙋсты́не,* пре́жде безпло́дна и҆ неѡбита́ема бы́вшаѧ,* ны́нѣ же ꙗ҆́кѡ крӏ́нъ цвѣтꙋ́щаѧ* и҆ и҆́нѡкъ мно́жествомъ и҆спо́лненнаѧ:* взыгра́йте, го́ры валаа́ма и҆ всѧ̑ древа̀ дꙋбра̑внаѧ,* во дне́шнїй де́нь ра́достнагѡ торжества̀,* хва́лѧще съ на́ми се́ргїа и҆ ге́рмана,* ѻ҆тцы̀ всехва̑льныѧ.

Сла́ва, гла́съ ѕ҃:

Бл҃года́рнымъ срⷣцемъ и҆ ᲂу҆стна́ми хва́лимъ тѧ̀, всеси́льне гдⷭ҇и, ди́вный во ст҃ы́хъ твои́хъ и҆ творѧ́й и҆́ми вє́лїѧ и҆ пресла̑внаѧ: ди́венъ бо ꙗ҆ви́лсѧ є҆сѝ и҆ въ прпⷣбныхъ ѻ҆тцѣ́хъ на́шихъ, и҆́миже въ нꙋ́ждахъ вѣ̑рнымъ посо́бствꙋеши, предста́тельствомъ и҆́хъ больны̑мъ подае́ши здра́вїе, ѿ ѕлы́хъ дꙋхѡ́въ свобожда́еши, ѿ потопле́нїѧ спаса́еши. тѣ́мъ ны́нѣ соверша́юще па́мѧть и҆́хъ, покланѧ́емсѧ держа́вѣ твое́й, и҆ славосло́вѧще вопїе́мъ: безнача́льный ѻ҆́ч҃е, собезнача́льный сн҃е, и҆ равночⷭ҇тный ст҃ы́й дш҃е, трⷪ҇це ст҃а́ѧ, сла́ва тебѣ̀.

И҆ ны́нѣ, пра́здника: и҆лѝ бг҃оро́диченъ:

Бцⷣе, ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀, тебѣ̀ мо́лимсѧ: моли́сѧ, влⷣчце, съ прпⷣбными се́ргїемъ и҆ ге́рманомъ, поми́ловатисѧ дꙋша́мъ на́шымъ.

Славосло́вїе вели́кое. По трист҃о́мъ тропа́рь ст҃ы́хъ.

Сла́ва, и҆ ны́нѣ, пра́здника, и҆лѝ бг҃оро́диченъ.

Є҆ктєнїѝ, и҆ ѿпꙋ́стъ.

На лїтꙋргӏ́и слꙋ́жба всѧ̀ прпⷣбныхъ.

Бл҃жє́нна ѿ канѡ́на пра́здника, а҆́ще є҆́сть, и҆ прпⷣбныхъ.