Мѣ́­сѧ­ца і҆ан­нꙋ­а́­рїа во в҃-й де́нь, и҆ і҆ꙋ­лїа въ ѳ҃і-й де́нь.

Слꙋ́жба прпⷣбномꙋ серафӏ́мꙋ, саро́вскомꙋ чꙋдотво́рцꙋ.

На ма́лѣй вече́рни.

На Гдⷭ҇и, воз­зва́хъ: стї­хи̑­ры на д҃, гла́съ д҃҃. Са­мо­гла̑­с­ны:

Со­ше́д­ше­сѧ дне́сь, хрⷭ҇то­и­ме­ни́­тїи лю́­дїе, по­хва́ль­ны­ми пѣ́снь­ми вѣн­ча́­имъ зем­на́­го а҆́гг҃ла и҆ нбⷭ҇на­го че­ло­вѣ́­ка, и҆ къ немꙋ̀ те́­плѣ во­зо­пї­и́мъ: Ѽ бл҃же́н­не ѻ҆́тче се­ра­фӏ́­ме, по́ст­ни­кѡмъ пре­сла́в­наѧ по­хва­ло̀, ѡ҆ на́съ мо­ли́­сѧ ко гдⷭ҇ꙋ, по­ми́­ло­ва­ти­сѧ дꙋ­ша́мъ на́­шымъ. Два́­жды.

Цѣ­ло­мꙋ́­дрїе и҆ кро́­тость ѿ ю҆́но­сти воз­лю­би́въ, ѻ҆́тче се­ра­фӏ́­ме, чⷭ҇то­то́ю ᲂу҆ма̀ и҆ срⷣца лю­бо́вь хрⷭ҇то́­вꙋ стѧ­жа́лъ є҆сѝ, є҆́юже бг҃о­ви при­бли́­зил­сѧ є҆сѝ. того̀ ᲂу҆̀бо ны́нѣ молѝ, ѿ бѣ́дъ и҆з­ба́­ви­ти вѣ́­рою тво­рѧ́­щыѧ чⷭ҇тнꙋ́ю па́­мѧть твою̀.

Дне́сь со­ше́д­ше­сѧ хрⷭ҇то­и­ме­ни́­тыхъ лю­де́й мно́­жє­ства въ про­слав­ле́­нїе чⷭ҇тны́хъ мо­ще́й тво­и́хъ, прпⷣбне ѻ҆́тче се­ра­фӏ́­ме, ра́­до­сти и҆ ве­се́­лїѧ всѝ и҆с­по́л­ни­ша­сѧ: ꙗ҆ви́лъ бо сѧ є҆сѝ бо­лѧ́­щымъ и҆с­цѣ­ле́­нїе и҆ хро­мы̑мъ хо­жде́­нїе, съ вѣ́­рою при­те­ка́­ю­щымъ къ ра́цѣ мо­ще́й тво­и́хъ.

Сла́­ва, гла́съ ѕ҃:

Ве­се­ли́­сѧ и҆ ра́­дꙋй­сѧ ѡ҆ гдⷭ҇ѣ, ѻ҆би́­тель са­ро́в­скаѧ: въ тебѣ́ бо воз­сїѧ̀ свѣ­ти́ль­никъ но́­вый рѡс­сӏ́й­скїѧ зе­млѝ. кра­сꙋ́й­сѧ и҆ ли­кꙋ́й, цр҃ковь бж҃їѧ, и҆ и҆́но­кѡвъ мно́­жє­ства, со­ра́­дꙋй­те­сѧ. праз­дно­лю́б­цєвъ со­бо́­ри, взы­гра́й­те, и҆ вѣ­не́цъ ѿ дх҃о́в­ныхъ цвѣ­тѡ́въ спле́т­ше, съ дв҃домъ вос­по́й­те: чⷭ҇тна̀ предꙿ гдⷭ҇емъ сме́рть прпⷣбныхъ є҆гѡ̀. сїѧ́ бо прпⷣбно­мꙋ се­ра­фӏ́­мꙋ на­ча́­ло сла́­вы по­ла­га́­етъ, є҆ѧ́же ѻ҆́бщ­ни­ки и҆ на́съ со­тво­рѝ тво­и́­ми мл҃тва­ми, бл҃же́н­не.

И҆ ны́нѣ, бг҃о­ро́­ди­ченъ:

Ни­кто́­же при­те­ка́­ѧй къ тебѣ̀ по­сра́м­ленъ ѿ тебє̀ и҆с­хо́­дитъ, пре­чⷭ҇таѧ бцⷣѣ дв҃о: но про́­ситъ блгⷣти, и҆ прї­е́м­летъ да­ро­ва́­нїе къ по­ле́з­но­мꙋ про­ше́­нїю.

На стї­хо́в­нѣ стї­хи̑­ры, гла́съ в҃:

Из­ше́дъ ѿ ѻ҆те́­че­ствїѧ тво­е­гѡ̀, прпⷣбне ѻ҆́тче се­ра­фӏ́­ме, и҆ гра́­да кӏ́­е­ва до­ше́дъ, та́мѡ ᲂу҆ мо­ще́й чꙋ­до­тво́­рєцъ на пꙋ́ть сп҃си́­тель­на­гѡ по́­дви­га бл҃го­сло­ве́­нїе прї­ѧ́лъ є҆сѝ: сїѐ ѹ҆́бѡ и҆ на́мъ низ­по­слѝ, тво­рѧ́­щымъ все­ст҃ꙋ́ю и҆ пре­чⷭ҇тнꙋ́ю па́­мѧть твою̀.

Стӏ́хъ: Ч҇ⷭтна̀ предꙿ гдⷭ҇емъ сме́рть прпⷣбныхъ є҆гѡ̀.

Ве́­лїй и҆с­кꙋ́съ въ по­слꙋ­ша́­нїи и҆́но­че­скихъ по́­дви­гѡвъ, прпⷣбне ѻ҆́тче се­ра­фӏ́­ме, съ лю­бо́­вїю прї­ѧ́лъ є҆сѝ, и҆ бра́­тїю тво­и́мъ тер­пѣ́­нї­емъ и҆ лю­бо́­вїю ᲂу҆­ди­ви́лъ є҆сѝ: молѝ сп҃сти́­сѧ дꙋ­ша́мъ на́­шымъ.

Стӏ́хъ: Бл҃же́нъ мꙋ́жъ, бо­ѧ́й­сѧ гдⷭ҇а, въ за́­по­вѣ­дехъ є҆гѡ̀ вос­хо́­щетъ ѕѣлѡ̀.

На­став­лє́­нїи и҆гꙋ́­ме­на ᲂу҆­крѣп­лѧ́­емь, въ пꙋ­сты́н­ное мѣ́­сто са­ро́­ва все­ли́л­сѧ є҆сѝ, ѻ҆́тче, и҆ та́мѡ мл҃твен­но­мꙋ по́­дви­гꙋ крѣ́п­кѡ при­лѣ­жа́­ти по­тщи́л­сѧ є҆сѝ, и҆ ꙗ҆ви́л­сѧ є҆сѝ до́мъ пре­ст҃а́­гѡ дх҃а: молѝ хрⷭ҇та̀ бг҃а ѡ҆ всѣ́хъ на́съ.

Сла́­ва, та́­ѧ­жде стї­хи́­ра: На­став­лє́­нїи и҆гꙋ́­ме­на:

И҆ ны́нѣ, бг҃о­ро́­ди­ченъ:

Пред­ста́­тель­ни­ца и҆ по­кро́въ ты̀ є҆сѝ, пре­чⷭ҇таѧ, и҆з­ба́­ви на́съ ѿ бѣ́дъ лю́­тыхъ и҆ ѡ҆б­сто­ѧ́­нїй, и҆ дꙋ́шы на́шѧ сп҃сѝ бжⷭ҇твен­ны­ми тво­и́­ми мл҃тва­ми.

Тро­па́рь, гла́съ д҃:

Ѿ ю҆́но­сти хрⷭ҇та̀ воз­лю­би́лъ є҆сѝ, бл҃же́н­не, и҆ томꙋ̀ є҆ди́­но­мꙋ ра­бо́­та­ти пла́­мен­нѣ во­жде­лѣ́въ, не­пре­ста́н­ною мл҃твою и҆ трꙋ­до́мъ въ пꙋ­сты́­ни по­дви­за́л­сѧ є҆сѝ, ᲂу҆­ми­ле́н­нымъ же срⷣцемъ лю­бо́вь хрⷭ҇то́­вꙋ стѧ­жа́въ, и҆з­бра́н­никъ воз­лю́б­ленъ бж҃їѧ мт҃ре ꙗ҆ви́л­сѧ є҆сѝ. сегѡ̀ ра́ди во­пї­е́мъ тѝ: сп҃са́й на́съ мл҃тва­ми тво­и́­ми, се­ра­фӏ́­ме, прпⷣбне ѻ҆́тче на́шъ.

Сла́­ва, и҆ ны́нѣ, бг҃о­ро́­ди­ченъ: Є҆́же ѿ вѣ́ка ᲂу҆­та­е́­ное: И҆лѝ пред­пра́здн­ства: Го­то́­ви­сѧ, за­вꙋлѡ́­не:

На вели́цѣй вече́рни.

Бл҃же́нъ мꙋ́жъ: а҃-й а҆н­тї­фѡ́нъ.

На Гдⷭ҇и, воз­зва́хъ: стї­хи̑­ры на и҃.

А҆́ще ѹ҆́бѡ є҆́сть пред­пра́здн­ство ст҃ы́хъ бг҃о­ѧв­ле́­нїй, пе́р­вѣе по­е́мъ трѝ стї­хи̑­ры пред­пра́здн­ства: а҆́ще же нѣ́сть, сїѧ̑ стї­хи̑­ры, по­вто­рѧ́­ю­ще пе́р­вꙋю и҆ вто­рꙋ́ю.

Гла́съ а҃. По­до́­бенъ: Ѽ ди́в­ное чꙋ́до:

Ѽ пре­сла́в­ное чꙋ́до,* по­дви́ж­никъ бл҃го­че́­стїѧ въ са­ро́­вѣ ꙗ҆в­лѧ́­ет­сѧ,* и҆ мл҃твен­никъ къ бг҃ꙋ те́­плый* се­ра­фӏ́мъ пре­чꙋ́д­ный на́мъ бы­ва́­етъ:* ве­се­ли́­сѧ ѻ҆би́­тель са­ро́в­скаѧ,* и҆мꙋ́­щи въ себѣ̀ мѡ́щи прпⷣбна­гѡ:* взы­гра́й­те, пра­во­сла́в­ныхъ мно́­жє­ства,* пре­ди́в­на­го се­ра­фӏ́­ма и҆мꙋ́­ще въ бѣ­да́хъ за­стꙋ́п­ни­ка и҆ во­пї­ю́­ще къ немꙋ̀:* ра́­дꙋй­сѧ, свѣ­ти́ль­ни­че рѡс­сӏ́й­скїѧ зе­млѝ,* тьмы̑ со­про­ти́в­ныхъ да­ле́­че ѿрѣ­ва́й,* и҆ гдⷭ҇е­ви мо­ли́­сѧ,* да­ро­ва́­ти дꙋ­ша́мъ на́­шымъ ми́ръ и҆ ве́­лїю млⷭ҇ть.

Ѽ ди́в­ное чꙋ́до,* се́ бо во­и́­стин­нꙋ во ѻ҆би́­те­ли са­ро́в­стѣй* бл҃го­че́­стїѧ сто́лпъ не­по­ко­ле­би́­мый* се­ра­фӏ́мъ бл҃же́н­ный ꙗ҆в­лѧ́­ет­сѧ на́мъ:* тѣ́м­же, бг҃о­мꙋ́­дрыхъ со­бо́­ри,* на вы­со­тꙋ̀ дꙋ́­хомъ воз­но­си́­те­сѧ,* къ прпⷣбно­мꙋ во­пї­ю́­ще:* прпⷣбне ѻ҆́тче се­ра­фӏ́­ме,* гдⷭ҇е­ви мо­ли́­сѧ,* да­ро­ва́­ти дꙋ­ша́мъ на́­шымъ ми́ръ и҆ ве́­лїю млⷭ҇ть.

Ди̑в­ны твоѧ̑ та̑й­ны,* хрⷭ҇тѐ бж҃е,* ꙗ҆́кѡ да­ро­ва́лъ є҆сѝ на́мъ* свѣ­ти́ль­ни­ка прпⷣбна­го се­ра­фӏ́­ма,* вѣ̑р­нымъ лю́­демъ на со­прѡ­ти́в­ныѧ крѣ́п­ка­го по­бо́р­ни­ка,* и҆́но­кѡмъ и҆ всѣ̑мъ пра­во­сла̑в­нымъ хрⷭ҇тї­а́­нѡмъ мл҃твен­ни­ка,* ст҃ѣ́й ѻ҆би́­те­ли по­хва­лꙋ̀ и҆ ᲂу҆­твер­жде́­нїе:* то́й и҆ ны́нѣ мо́­литъ тѧ̀, гдⷭ҇и,* да­ро­ва́­ти дꙋ­ша́мъ на́­шымъ ми́ръ и҆ ве́­лїю млⷭ҇ть.

Є҆гда̀ вше́лъ є҆сѝ, прпⷣбне,* въ пꙋ­сты́­ню са­ро́в­скꙋю,* то­гда̀, сво­еѧ̀ во́ли до кон­ца̀ со­вле́к­сѧ,* тве́р­дое ко всѣ̑мъ по­слꙋ­ша́­нїе по­ка­за́лъ є҆сѝ:* до­са̑­ды бо и҆ без­чє́­стїѧ пре­тер­пѣ́лъ є҆сѝ ра́­дꙋ­ѧ­сѧ:* ᲂу҆­да­рє́­нїѧ и҆ ра̑ны ѿ ѕлы́хъ че­ло­вѣ̑къ прї­ѧ́лъ є҆сѝ,* ѡ҆ ни́х­же и҆ мо­ли́л­сѧ є҆сѝ, прпⷣбне:* мы́ же, про­слав­лѧ́­ю­ще пре­чⷭ҇тнꙋ́ю па́­мѧть твою̀,* мо́­лимъ ти́ сѧ, прпⷣбне,* гдⷭ҇е­ви мо­ли́­сѧ,* ми́ръ мӏ́­ро­ви да­ро­ва́­ти* и҆ дꙋ­ша́мъ на́­шымъ ве́­лїю млⷭ҇ть.

Бл҃же́н­на ѻ҆би́­тель са­ро́в­скаѧ,* и҆мꙋ́­щи тебѐ, прпⷣбне ѻ҆́тче се­ра­фӏ́­ме,* до­бро­дѣ́­те­лей со­кро́­ви­ще, со­сꙋ́дъ чⷭ҇то­ты̀,* цѣ­ло­мꙋ́­дрїѧ хра­ни́­те­лѧ,* прї­ѧ́­те­ли­ще блгⷣти, и҆с­то́ч­никъ и҆с­цѣ­ле́­нїй,* бо­лѧ́­щымъ вра­ча̀ без­ме́з­дна,* по́ст­ни­ка и҆́стин­на,* въ ско́р­бехъ ᲂу҆­тѣ́­ши­те­лѧ,* жи­те́й­ски­ми страсть­мѝ ѡ҆бꙋ­ре­ва́­є­мымъ ти́­хое при­ста́­ни­ще:* на́мъ же, тво­рѧ́­щымъ чⷭ҇тнꙋ́ю па́­мѧть твою̀,* молѝ, прпⷣбне ѻ҆́тче се­ра­фӏ́­ме,* да­ро­ва́­ти ми́ръ и҆ ве́­лїю млⷭ҇ть.

Дне́сь ли­кꙋ́­ютъ со­бо́­ри вѣ́р­ныхъ* въ па́­мѧть твою̀, прпⷣбне се­ра­фӏ́­ме,* и҆ ве­ле­гла́с­нѡ во­пї­ю́тъ:* ты̀ люб­вѐ ра́ди хрⷭ҇то́­вы* всѧ̑ кра̑с­наѧ мӏ́ра ѡ҆ста́­вивъ,* и҆ въ пꙋ­сты́­ню са­ро́в­скꙋю все­ли́в­сѧ,* ни­ка́­ко­же ᲂу҆­стра­ши́л­сѧ є҆сѝ не­ви́­ди­мыхъ вра̑гъ бо­ре́­нїѧ:* но сїѧ̑ мл҃тва­ми тво­и́­ми, ꙗ҆́кѡ пра́хъ, ѿме­та́лъ є҆сѝ:* тѣ́м­же гдⷭ҇е­ви мо­ли́­сѧ,* да­ро­ва́­ти дꙋ­ша́мъ на́­шымъ ми́ръ и҆ ве́­лїю млⷭ҇ть.

Сла́­ва, гла́съ и҃:

Прї­и­ди́­те, вѣ́р­ныхъ со­бо́­ри, по­хва́ль­ны­ми пѣ́снь­ми дне́сь пре­чꙋ́д­на­го ѻ҆тца̀ про­сла́­вимъ, и҆ си́це є҆мꙋ̀ во­зо­пї­и́мъ: прпⷣбне ѻ҆́тче се­ра­фӏ́­ме, во­и́­стин­нꙋ спо­до́­бил­сѧ є҆сѝ бжⷭ҇твен­ныѧ жи́­зни, прї­и́мъ ѿ бг҃а вѣ­не́цъ не­тлѣ́н­ныѧ сла́­вы. сегѡ̀ ра́ди ѻ҆би́­тель са­ро́в­скаѧ то­бо́ю хва́­лит­сѧ, лю́­дїе же, зрѧ́­ще чⷭ҇тнꙋ́ю ра́кꙋ мо­ще́й тво­и́хъ и҆ чꙋ­де­са̀ бы­ва́­є­маѧ, сла́­вѧтъ про­слав­лѧ́­ю­ща­го тѧ̀ гдⷭ҇а: є҆мꙋ́­же мо­ли́­сѧ, прпⷣбне, да­ро­ва́­ти дꙋ­ша́мъ на́­шымъ ми́ръ и҆ ве́­лїю млⷭ҇ть.

И҆ ны́нѣ, пред­пра́здн­ства, гла́съ ѕ҃: Грѧ­де́тъ ко і҆ѡр­да́­нꙋ: и҆лѝ бг҃о­ро́­ди­ченъ до­гма́­тїкъ, гла́съ и҃: Цр҃ь нбⷭ҇ный:

Вхо́дъ, про­кӏ́­менъ днѐ, и҆ чтє́­нїѧ г҃.

Пре­мꙋ́­дро­сти со­ло­мѡ́­но­вы чте́­нїе:

Првⷣныхъ дꙋ́шы въ рꙋцѣ̀ бж҃ї­ей, и҆ не при­ко́с­нет­сѧ и҆́хъ мꙋ́ка. Не­пще­ва́­ни бы́ша во ѻ҆че­сѣ́хъ без­ꙋ́м­ныхъ ᲂу҆­мре́­ти, и҆ вмѣ­ни́­сѧ ѡ҆ѕло­бле́­нїе и҆с­хо́дъ и҆́хъ, и҆ є҆́же ѿ на́съ ше́­ствїе со­крꙋ­ше́­нїе: ѻ҆ни́ же сꙋ́ть въ ми́рѣ. И҆́бо предꙿ ли­це́мъ че­ло­вѣ́­че­скимъ а҆́ще и҆ мꙋ́кꙋ прї­и́­мꙋтъ, ᲂу҆­по­ва́­нїе и҆́хъ без­сме́р­тїѧ и҆с­по́л­не­но. И҆ вма́­лѣ на­ка́­за­ни бы́в­ше, ве­ли́­ки­ми бл҃го­дѣ́­тель­ство­ва­ни бꙋ́­дꙋтъ: ꙗ҆́кѡ бг҃ъ и҆с­кꙋ­сѝ ѧ҆̀, и҆ ѡ҆брѣ́­те и҆̀хъ до­стѡ́й­ны себѣ̀. Ꙗ҆́кѡ зла́­то въ гор­ни́­лѣ и҆с­кꙋ­сѝ и҆̀хъ, и҆ ꙗ҆́кѡ все­пло́­дїе же́р­твен­ное прї­ѧ́тъ ѧ҆̀. И҆ во вре́­мѧ по­сѣ­ще́­нїѧ и҆́хъ воз­сї­ѧ́­ютъ, и҆ ꙗ҆́кѡ и҆́скры по сте́­блїю по­те­кꙋ́тъ. Сꙋ́­дѧтъ ꙗ҆зы́­кѡмъ, и҆ ѡ҆бла­да́­ютъ людь­мѝ, и҆ во­цр҃и́т­сѧ гдⷭ҇ь въ ни́хъ во вѣ́ки. На­дѣ́­ю­щї­и­сѧ на́нь раз­ꙋ­мѣ́­ютъ и҆́сти­нꙋ, и҆ вѣ́р­нїи въ люб­вѝ пре­бꙋ́­дꙋтъ є҆мꙋ̀: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ по­сѣ­ще́­нїе во и҆з­бра́н­ныхъ є҆гѡ̀.

Пре­мꙋ́­дро­сти со­ло­мѡ́­но­вы чте́­нїе:

Првⷣни­цы во вѣ́ки жи­вꙋ́тъ, и҆ въ гдⷭ҇ѣ мзда̀ и҆́хъ, и҆ по­пе­че́­нїе и҆́хъ ᲂу҆ вы́ш­нѧ­гѡ. Сегѡ̀ ра́ди прї­и́­мꙋтъ црⷭ҇твїе бл҃го­лѣ́­пїѧ, и҆ вѣ­не́цъ до­бро́­ты ѿ рꙋкѝ гдⷭ҇ни: занѐ де­сни́­цею по­кры́­етъ ѧ҆̀, и҆ мы́ш­цею за­щи­ти́тъ и҆̀хъ. Прї­и́­метъ все­ѡ­рꙋ́­жїе рве́­нїе своѐ, и҆ во­ѡ­рꙋ­жи́тъ тва́рь въ ме́сть вра­гѡ́мъ. Ѡ҆б­ле­че́т­сѧ въ бро­нѧ̀ пра́­вды, и҆ воз­ло­жи́тъ шле́мъ, сꙋ́дъ не­ли­це­мѣ́­ренъ. Прї­и́­метъ щи́тъ не­по­бѣ­ди́­мый, прпⷣбїе: По­ѻ­стри́тъ же на­пра́с­ный гнѣ́въ во ѡ҆рꙋ́­жїе: спо­бо́­ретъ же съ ни́мъ мӏ́ръ на без­ꙋ̑м­ныѧ. По́й­дꙋтъ пра­во­лꙋ̑ч­ныѧ стрѣ́­лы мѡ́л­нї­и­ны, и҆ ꙗ҆́кѡ ѿ бл҃го­крꙋ́­гла лꙋ́ка ѻ҆бла­кѡ́въ, на на­мѣ́­ре­нїе по­ле­тѧ́тъ. И҆ ѿ ка­ме­но­ме́т­ныѧ ꙗ҆́ро­сти и҆с­по́лнь па­дꙋ́тъ гра́­ды: воз­не­го­дꙋ́­етъ на ни́хъ вода̀ мор­ска́ѧ, рѣ́ки же по­то­пѧ́тъ ѧ҆̀ на́­глѡ. Со­про­ти́въ ста́­нетъ и҆̀мъ дꙋ́хъ си́лы, и҆ ꙗ҆́кѡ ви́­хоръ раз­вѣ́­етъ и҆̀хъ, И҆ ѡ҆пꙋ­сто­ши́тъ всю̀ зе́­млю без­за­ко́­нїе, и҆ ѕло­дѣ́й­ство пре­вра­ти́тъ пре­сто́­лы си́ль­ныхъ. Слы́­ши­те ᲂу҆̀бо, ца́­рїе, и҆ раз­ꙋ­мѣ́й­те: на­вы́­кни­те, сꙋ­дїи̑ кон­цє́въ зе­млѝ. Внꙋ­ши́­те, дер­жа́­щїи мно́­жє­ства, и҆ гор­дѧ́­щї­и­сѧ ѡ҆ на­ро́­дѣхъ ꙗ҆зы́­кѡвъ: Ꙗ҆́кѡ дана̀ є҆́сть ѿ гдⷭ҇а дер­жа́­ва ва́мъ, и҆ си́ла ѿ вы́ш­нѧ­гѡ.

Пре­мꙋ́­дро­сти со­ло­мѡ́­но­вы чте́­нїе:

Првⷣникъ, а҆́ще по­сти́г­нетъ скон­ча́­ти­сѧ, въ по­ко́и бꙋ́­детъ. Ста́­рость бо чⷭ҇тна̀ не мно­го­лѣ́т­на, нижѐ въ чис­лѣ̀ лѣ́тъ и҆с­чи­та́­ет­сѧ. Сѣ­ди́­на же є҆́сть мꙋ́­дрость че­ло­вѣ́­кѡмъ, и҆ во́з­растъ ста́­ро­сти жи­тїѐ не­скве́р­ное. Бл҃го­ꙋ­го́­денъ бг҃о­ви бы́въ, воз­лю́б­ленъ бы́сть, и҆ жи­вы́й по­сре­дѣ̀ грѣ̑ш­никъ, пре­ста́в­ленъ бы́сть: Вос­хи­ще́нъ бы́сть, да не ѕло́­ба и҆з­мѣ­ни́тъ ра́з­ꙋ­ма є҆гѡ̀, и҆лѝ ле́сть пре­льсти́тъ дꙋ́шꙋ є҆гѡ̀. Ра­че́­нїе бо ѕло́­бы по­мра­ча́­етъ дѡ́­браѧ, и҆ па­ре́­нїе по́­хо­ти пре­мѣ­нѧ́­етъ ѹ҆́мъ не­ѕло́­бивъ. Скон­ча́в­сѧ вма́­лѣ, и҆с­по́л­ни лѣ̑та дѡ́л­га: Оу҆­го́д­на бо бѣ̀ гдⷭ҇е­ви дꙋша̀ є҆гѡ̀: сегѡ̀ ра́ди по­тща́­сѧ ѿ сре­ды̀ лꙋ­ка́в­ствїѧ. Лю́­дїе же ви́­дѣв­ше, и҆ не раз­ꙋ­мѣ́в­ше, нижѐ по­ло́ж­ше въ по­мыш­ле́­нїи та­ко­во́е: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ по­сѣ­ще́­нїе во и҆з­бра́н­ныхъ є҆гѡ̀.

На лї­тӏ́и стї­хи́­ра хра́­ма, и҆ прпⷣбна­гѡ, гла́съ а҃:

Кӏ́­и­ми по­хва́ль­ны­ми вѣн­цы̑ вѣн­ча́­имъ по­дви́ж­ни­ка ве­ли́­ка­го, прпⷣбна­го се­ра­фӏ́­ма; то́й бо ꙗ҆́кѡ на­ста́в­никъ до́­брый въ тве́р­до­сти вѣ́ры и҆ до­бро­дѣ́­те­ли ꙗ҆ви́­сѧ, бг҃одх҃но­ве́н­ны­ми ᲂу҆­чє́­нїи и҆ рав­но­а́гг҃ль­нымъ жи­тї­е́мъ при­хо­дѧ́­щыѧ къ немꙋ̀ на­ꙋ­ча́ѧ. тѣ́м­же во­пї­е́мъ є҆мꙋ̀: мо­ли́­сѧ, прпⷣбне, хрⷭ҇тꙋ̀ бг҃ꙋ, пра­во­сла́в­нꙋю вѣ́рꙋ ᲂу҆­твер­ди́­ти, и҆ дꙋ­ша́мъ на́­шымъ сп҃сти́­сѧ.

Прї­и­ди́­те, и҆́нѡкъ мно́­жє­ства, дне́сь прпⷣбна­го бл҃го­чⷭ҇тнѡ вос­хва́­лимъ, и҆́стин­на­го ᲂу҆­че­ни­ка̀ сп҃со­ва, мїр­скꙋ́ю пре́­лесть по­пра́в­ша­го, ꙗ҆ре́мъ хрⷭ҇то́въ на ра́мо взе́м­ша­го, и҆ пол­кѝ бѣ­сѡ́въ по­сра­ми́в­ша­го. къ не­мꙋ́­же во­зо­пї­и́мъ си́це: не за­бꙋ́­ди на́съ, ѻ҆́тче се­ра­фӏ́­ме, вос­хва­лѧ́­ю­щихъ и҆ чтꙋ́­щихъ ст҃ꙋ́ю па́­мѧть твою̀.

Свѣ́т­лаѧ и҆ бжⷭ҇твен­наѧ па́­мѧть твоѧ̀, прпⷣбне се­ра­фӏ́­ме, ᲂу҆­ди­вѝ цари̑, кнѧ̑­зи и҆ ст҃и́­тє­ли, а҆́ки без­пло́­тенъ бо, во пло́­ти вра­гѝ не­ви̑­ди­мыѧ по­сра­ми́лъ є҆сѝ: всѧ́ же стра­на̀ там­бо́в­скаѧ и҆ ст҃а́ѧ ѻ҆би́­тель са­ро́в­скаѧ, и҆мꙋ́­щи твоѧ̑ ст҃ы̑ѧ мѡ́щи, хва́­лит­сѧ, си́ми бо здра́­вїе всѣ̑мъ съ вѣ́­рою при­те­ка́­ю­щымъ къ чⷭ҇тнѣ́й тво­е́й ра́цѣ по­да­е́т­сѧ. тѣ́м­же, про­свѣ­ти́в­ше­сѧ то­бо́ю, во­пї­е́мъ тѝ, прпⷣбне: молѝ сп҃сти́­сѧ дꙋ­ша́мъ на́­шымъ.

Сла́­ва, гла́съ є҃:

Ра́­дꙋй­сѧ дне́сь, всѧ̀ рѡс­сӏ́й­скаѧ зе­млѐ, и҆ ст҃а́ѧ ѻ҆би́­тель са­ро́в­скаѧ, ве­се­ли́­сѧ. вѣ́р­ныхъ же мно́­жє­ства, сте́к­ше­сѧ дне́сь, про­сла́­вимъ прпⷣбна­го ѻ҆҆тца̀, па́­сты­рѧ и҆ ᲂу҆­чи́­те­лѧ, бг҃о­мꙋ́­дра­го на­ста́в­ни­ка за­блꙋ́жд­шымъ, ско́­ра­го всѣ́хъ бо­лѧ́­щихъ цѣ­ли́­те­лѧ, рѡс­сӏ́й­скїѧ зе­млѝ ве­ли́­кое ᲂу҆­кра­ше́­нїе, є҆го́­же по­хва­лѧ́­ю­ще, си́це рце́мъ: прпⷣбне се­ра­фӏ́­ме, сп҃сѝ на́съ мл҃тва­ми тво­и́­ми.

И҆ ны́нѣ, бг҃о­ро́­ди­ченъ, гла́съ то́й­же: Хра́мъ и҆ две́рь є҆сѝ:

И҆лѝ пред­пра́здн­ства, гла́съ а҃:

Свѣ́­телъ ѹ҆́бѡ ми­мо­ше́д­шїй пра́з­дникъ, свѣт­лѣ́й­шїй же, сп҃се, при­хо­дѧ́­щїй: ѻ҆́нъ а҆́гг҃ла и҆мѣ́­ѧ­ше бл҃го­вѣ́ст­ни­ка, и҆ се́й прⷣте́­чꙋ ѡ҆брѣ́­те предꙿꙋ­го­то́­ви­те­лѧ. ѻ҆́нъ, кро́­вемъ и҆з­ли­ва́­є­мымъ, ꙗ҆́кѡ без­ча́­денъ, ры­да́­ше ви­ѳле­е́мъ: и҆ се́й, во­да́мъ бл҃го­сло­вє́н­нымъ, мно­го­ча́д­на по­зна­ва́­ет­сѧ кꙋ­пѣ́ль. то­гда̀ ѕвѣз­да̀ вол­хвѡ́мъ воз­вѣ­стѝ, ны́нѣ же ѻ҆ц҃ъ мӏ́рꙋ тѧ̀ по­ка­за̀: во­пло­ти́­вый­сѧ и҆ па́ки грѧ­ды́й ꙗ҆́вѣ, гдⷭ҇и, сла́­ва тебѣ̀.

На стї­хо́в­нѣ стї­хи̑­ры, гла́съ є҃.

По­до́­бенъ: Ра́­дꙋй­сѧ:

Ра́­дꙋй­сѧ, а҆́гг҃лѡмъ со­бе­сѣ́д­ни­че,* прпⷣбне се­ра­фӏ́­ме:* бл҃го­че́ст­нѡ бо на зе­млѝ по­жи́въ,* мнѡ́­ги при­хо­дѧ́­щыѧ къ тебѣ̀* стра́­хꙋ гдⷭ҇ню по­ꙋ­ча́лъ є҆сѝ:* блгⷣтїю пре­ст҃а́­гѡ дх҃а ѡ҆за­рѧ́­емь,* зрѣ́лъ є҆сѝ бꙋ̑­дꙋ­щаѧ, ꙗ҆́кѡ на­сто­ѧ̑­щаѧ,* и҆ ᲂу҆­ми­ле́­нїѧ и҆ ра́­до­сти* мнѡ́­ги скор­бѧ́­щыѧ дꙋ­ше́ю и҆с­пол­нѧ́лъ є҆сѝ.* тѣ́м­же мо́­лимъ ти сѧ,* мо­ли́­сѧ гдⷭ҇е­ви ѡ҆ чтꙋ́­щихъ тѧ̀.

Стӏ́хъ: Ч҇ⷭтна̀ предꙿ гдⷭ҇емъ сме́рть прпⷣбныхъ є҆гѡ̀.

Ра́­дꙋй­сѧ, за­блꙋ́жд­шихъ ᲂу҆­чи́­те­лю пре­ди́в­ный,* хрⷭ҇та̀ гдⷭ҇а во хра́­мѣ со а҆р­ха̑гг҃лы и҆ а҆́гг҃лы* ви́­дѣ­ти спо­до́­би­вый­сѧ.* и҆ ны́нѣ, прпⷣбне, на нб҃сѣ́хъ тогѡ̀ зрѣ́­нїѧ вы́нꙋ на­сла­жда́­ѧ­сѧ,* мо­ли́­сѧ ѡ҆ на́съ,* вѣ́­рою тво­рѧ́­щихъ па́­мѧть твою̀.

Стӏ́хъ: Бл҃же́нъ мꙋ́жъ, бо­ѧ́й­сѧ гдⷭ҇а, въ за́­по­вѣ­дехъ є҆гѡ̀ вос­хо́­щетъ ѕѣлѡ̀.

Ра́­дꙋй­сѧ, прпⷣбне се­ра­фӏ́­ме,* всѣ̑мъ бо хра­ни́­ти и҆́стин­нꙋю вѣ́рꙋ хрⷭ҇то́­вꙋ за­по­вѣ́­далъ є҆сѝ,* и҆ вы́ш­нѧ­гѡ жи­тїѧ̀ во­жде­лѣ́въ,* бо­га́т­ство воз­не­на­ви́­дѣлъ є҆сѝ:* ны́нѣ же не­из­ре­че́н­нꙋю кра­со­тꙋ̀ нбⷭ҇нꙋю зри́­ши,* и҆ сла́д­ка­гѡ пѣ́­нїѧ а҆́гг҃ль­ска­гѡ на­сла­жда́­е­ши­сѧ.* тѣ́м­же мо­ли́­сѧ гдⷭ҇е­ви,* да­ро­ва́­ти на́мъ ми́ръ и҆ ве́­лїю млⷭ҇ть.

Сла́­ва, гла́съ ѕ҃:

Прпⷣбне ѻ҆́тче се­ра­фӏ́­ме, кто̀ и҆с­по­вѣ́сть трꙋ­ды̀ твоѧ̑ и҆ бо­лѣ̑­зни; и҆лѝ кӏ́й ѧ҆зы́къ и҆з­ре­че́тъ же­сто́­кое пꙋ­сты́н­ное твоѐ жи­тїѐ, бдѣ́­нїе же и҆ по­ще́­нїе, є҆ще́ же и҆ въ за­тво́­рѣ пре­бы­ва́­нїе, ᲂу҆­сте́нъ без­мо́л­вїе и҆ мо­ле́­нїе не­пре­ста́н­ное; во­и́­стин­нꙋ ꙗ҆ви́л­сѧ є҆сѝ по́ст­ни­кѡмъ ᲂу҆­кра­ше́­нїе, мл҃твен­никъ къ бг҃ꙋ не­по­сты́д­ный. тѣ́м­же къ тебѣ̀ во­пї­е́мъ: ра́­дꙋй­сѧ, и҆́но­че­ска­гѡ жи­тїѧ̀ пра́­ви­ло: ра́­дꙋй­сѧ, въ бѣ­да́хъ и҆ ско́р­бехъ ве­ли́­кое ᲂу҆­тѣ­ше́­нїе и҆ те́­плый всѣ̑мъ пред­ста́­те­лю: мо­ли́­сѧ, прпⷣбне, сп҃сти́­сѧ дꙋ­ша́мъ на́­шымъ.

И҆ ны́нѣ, пред­пра́здн­ства, гла́съ г҃: Прї­и­ди́­те, всѝ вѣ́р­нїи: и҆лѝ бг҃о­ро́­ди­ченъ, гла́съ ѕ҃: Тво­ре́цъ и҆ и҆з­ба́­ви­тель мо́й:

А҆́ще бдѣ́­нїе со­вер­ша́­ет­сѧ: тро­па́рь прпⷣбна­гѡ, пи́­санъ на ма́­лѣй ве­че́р­ни, два́­жды, и҆ Бцⷣе, дв҃о: є҆ди́­но­жды. А҆́ще пред­пра́здн­ство: тро­па́рь прпⷣбна­гѡ два́­жды, и҆ пред­пра́здн­ства, є҆ди́­но­жды.

На ѹ҆́трени.

На Бг҃ъ гдⷭ҇ь: тро­па́рь ст҃а́­гѡ два́­жды. Сла́­ва, и҆ ны́нѣ, бг҃о­ро́­ди­ченъ: Є҆́же ѿ вѣ́ка ᲂу҆­та­е́­ное:

А҆́ще пред­пра́здн­ство: тро­па́рь пред­пра́здн­ства: Го­то́­ви­сѧ, за­вꙋлѡ́­не: два́­жды, Сла́­ва: ст҃а́­гѡ, И҆ ны́нѣ: пред­пра́здн­ства.

По а҃-мъ стї­хо­сло́­вїи сѣ­да́­ленъ, гла́съ д҃:

Зна́­ме­нї­емъ крⷭ҇тнымъ и҆ мл҃твою вра̑­жїѧ и҆с­кꙋ­шє́­нїѧ по­бѣ­ди́въ, по­сто́мъ и҆ воз­дер­жа́­нї­емъ гдⷭ҇е­ви бл҃го­ꙋ­го­ди́лъ є҆сѝ: тѣ́м­же чꙋ­де́съ прї­ѧ́лъ є҆сѝ да́ръ, всѣ̑мъ и҆с­цѣ­лє́­нїѧ по­да­ва́ѧ, вѣ́­рою при­те­ка́­ю­щымъ къ ра́цѣ мо­ще́й тво­и́хъ, се­ра­фӏ́­ме прпⷣбне: молѝ хрⷭ҇та̀ бг҃а, грѣ­хѡ́въ ѡ҆став­ле́­нїе да­ро­ва́­ти чтꙋ́­щымъ лю­бо́­вїю ст҃ꙋ́ю па́­мѧть твою̀. Два́­жды.

Сла́­ва, и҆ ны́нѣ, пред­пра́здн­ства. И҆лѝ бг҃о­ро́­ди­ченъ:

Оу҆­жа́с­но чꙋ́до за­ча́­тїѧ, и҆ не­ска­за́­ненъ ѡ҆́бразъ ржⷭ҇тва̀ въ тебѣ̀ по­зна́­сѧ, при­сно­дв҃о чⷭ҇таѧ, ᲂу҆­жа­са́­етъ мо́й ѹ҆́мъ и҆ ᲂу҆­див­лѧ́­етъ по­мыш­ле́­нїе: сла́­ва твоѧ̀, бцⷣе, всѣ̑мъ про­стре́­сѧ, во сп҃се́­нїе дꙋ́шъ на́­шихъ.

По в҃-мъ стї­хо­сло́­вїи сѣ­да́­ленъ, гла́съ а҃:

Во глꙋ­би­нѣ̀ пꙋ­сты́­ни са­ро́в­скїѧ ко­лѣ̑­на пре­кло­нѧ́лъ є҆сѝ на ка́­ме­ни, воз­дѣ­ва́ѧ прпⷣбнѣи твоѝ рꙋ́цѣ ко гдⷭ҇ꙋ: тѣ́м­же ѿ сп҃са блгⷣть ст҃а́­гѡ дх҃а прї­ѧ́лъ є҆сѝ, стра́­ждꙋ­щыѧ тѣ­ле­сы̀ и҆с­цѣ­лѧ́­ти, и҆ дꙋ́шы вѣ́р­ныхъ про­свѣ­ща́­ти. сегѡ̀ ра́ди во­пї­е́мъ тѝ: молѝ, прпⷣбне, хрⷭ҇та̀ бг҃а, сп҃сти́­сѧ на́мъ, пра́з­днꙋ­ю­щымъ ст҃ꙋ́ю па́­мѧть твою̀. Два́­жды.

Сла́­ва, и҆ ны́нѣ, пред­пра́здн­ства. И҆лѝ бг҃о­ро́­ди­ченъ:

Мл҃твꙋ прї­е́м­ши ѿ на́съ, въ кро́въ тво́й, пре­чⷭ҇таѧ дв҃о, при­бѣ­га́­ю­щихъ, не пре­ста́й мо­лѧ́­щи чл҃вѣ­ко­лю́б­ца, сп҃сти́­сѧ ра­бѡ́мъ тво­и̑мъ.

По по­лѷ­е­ле́и сѣ­да́­ленъ, гла́съ з҃:

Про­сїѧ̀ до­бро­дѣ́­тель­ное жи­тїѐ твоѐ, прпⷣбне, ны́нѣ въ рѡс­сӏ́й­стѣй зе­млѝ, и҆ ѿ всѣ́хъ пѣ́снь­ми по­хва́ль­ны­ми сла́­ви­ши­сѧ: ты́ бо, ꙗ҆́кѡ и҆лїа̀, на ко­ле­сни́­цꙋ до­бро­дѣ́­те­лей вше́дъ, на нб҃са̀ дꙋ­ше́ю воз­ле­тѣ́лъ є҆сѝ, и҆ та́мѡ првⷣнѡ пре­свѣ́т­лымъ вѣн­це́мъ вѣн­ча́л­сѧ є҆сѝ. тѣ́м­же бл҃го­да­рѧ́­ще во­пї­е́мъ тѝ, бл҃же́н­не се­ра­фӏ́­ме: молѝ хрⷭ҇та̀ бг҃а, грѣ­хѡ́въ ѡ҆став­ле́­нїе да­ро­ва́­ти чтꙋ́­щымъ лю­бо́­вїю ст҃ꙋ́ю па́­мѧть твою̀. Два́­жды.

Сла́­ва, и҆ ны́нѣ, пред­пра́здн­ства. И҆лѝ бг҃о­ро́­ди­ченъ:

Пре­чⷭ҇таѧ дв҃о, по­ми́­лꙋй на́съ, при­бѣ­га́­ю­щихъ вѣ́­рою къ тебѣ̀ млⷭ҇рд­нѣй, и҆ про­сѧ́­щихъ те́­пла­гѡ тво­е­гѡ̀ за­стꙋ­пле́­нїѧ: ꙗ҆́кѡ мт҃и бг҃а вы́ш­нѧ­гѡ, молѝ сн҃а тво­е­го̀, хрⷭ҇та̀ бг҃а на́­ше­го, сп҃сти́­сѧ ра­бѡ́мъ тво­и̑мъ.

Та́же сте­пє́н­на, а҃-й а҆н­тї­фѡ́нъ д҃-гѡ гла́­са.

Про­кӏ́­менъ, гла́съ д҃: Ч҇ⷭтна̀ предꙿ гдⷭ҇емъ сме́рть прпⷣбныхъ є҆гѡ̀.

Стӏ́хъ: Что̀ воз­да́мъ гдⷭ҇е­ви ѡ҆ всѣ́хъ, ꙗ҆̀же воз­да­де́ ми;

Є҆ѵⷢ҇лїе ѿ ма­тѳе́а, за­ча́­ло м҃г: Речѐ гдⷭ҇ь сво­и̑мъ ᲂу҆­че­ни­кѡ́мъ: всѧ̑ мнѣ̀ пре­да­на̑ сꙋ́ть:

По н҃-мъ ѱал­мѣ̀: Мл҃тва­ми прпⷣбна­гѡ се­ра­фӏ́­ма:

Та́же стї­хи́­ра, гла́съ ѕ҃:

Дне́сь, вѣ́р­нїи, дх҃о́в­нѡ тор­же­ствꙋ́­ю­ще въ на­ро́­читѣмъ пра́з­дни­цѣ прпⷣбна­гѡ ѻ҆тца̀, и҆ бл҃го­че́ст­нѡ ра́­дꙋ­ю­ще­сѧ, томꙋ̀ те́­плѣ во­зо­пї­и́мъ: ра́­дꙋй­сѧ, се­ра­фӏ́­ме бл҃же́н­не: ра́­дꙋй­сѧ, нбⷭ҇ный че­ло­вѣ́­че и҆ зем­ны́й а҆́гг҃ле: ра́­дꙋй­сѧ, мно́­гихъ на пꙋ́ть сп҃се́­нїѧ на­ста́­ви­вый: ра́­дꙋй­сѧ, вѣ̑р­нымъ по­хва­ло̀ и҆ рѡс­сӏ́й­стѣй зе­млѝ ᲂу҆­твер­жде́­нїе: мо­ли́­сѧ ѡ҆ дꙋ­ша́хъ на́­шихъ.

Ка­нѡ́нъ пред­пра́здн­ства. И҆лѝ бцⷣы со і҆р­мо­со́мъ на ѕ҃:

Во́дꙋ про­ше́дъ: и҆ прпⷣбно­мꙋ ка­нѡ̑­на два̀ на и҃.

Гла́съ ѕ҃. Пѣ́снь а҃.

І҆р­мо́съ: Ꙗ҆́кѡ по сꙋ́хꙋ пѣ­ше­ше́­ство­вавъ і҆и҃ль, по бе́з­днѣ сто­па́­ми, го­ни́­те­лѧ фа­ра­ѡ́­на ви́дѧ по­топ­лѧ́­е­ма, бг҃ꙋ по­бѣ́д­нꙋю пѣ́снь по­и́мъ, во­пї­ѧ́­ше.

При­пѣ́въ: Прпⷣбне ѻ҆́тче се­ра­фӏ́­ме, молѝ бг҃а ѡ҆ на́съ.

Гдⷭ҇и, ѿве́р­зи моѝ не­до­сто́й­нѣи ᲂу҆ст­нѣ̀, и҆ да́ждь мѝ сло́­во ра́з­ꙋ­ма, вос­пѣ́­ти до­сто́й­нѡ па́­мѧть бл҃же́н­на­гѡ се­ра­фӏ́­ма, ны́нѣ со а҆́гг҃лы мо­лѧ́­ща­гѡ­сѧ тебѣ̀, и҆з­ба́­ви­ти на́съ ѿ всѧ́­ка­гѡ лю́­та­гѡ ѡ҆б­сто­ѧ́­нїѧ.

Къ бцⷣѣ ве­ли́­кїй мл҃твен­никъ бы́лъ є҆сѝ, прпⷣбне, ю҆́же ви́­дѣ­ти со а҆пⷭ҇лы спо­до́­бил­сѧ є҆сѝ: и҆ ны́нѣ не пре­ста́й мл҃тва­ми тво­и́­ми по­сѣ­ща́­ти ча̑дъ тво­и́хъ.

Ѿ ю҆́но­сти тво­еѧ̀, прпⷣбне, пре­да́л­сѧ є҆сѝ ᲂу҆­мо́мъ бг҃о­ви, и҆ стра̑­сти тѣ­лє́с­ныѧ крѣ́п­кимъ воз­дер­жа́­нї­емъ ᲂу҆­кро­ти́въ, всѧ́­ки­ми до­бро­дѣ́­тель­ми ᲂу҆­кра­си́л­сѧ є҆сѝ, пре­мꙋ́­дре.

Бг҃о­ро́­ди­ченъ: Все­бл҃га́ѧ влⷣчце, ꙗ҆́же пре­бл҃га́­го бг҃а пло́­тїю ро́жд­ши, ѡ҆ѕло́б­лен­ное страсть­мѝ моѐ срⷣце ѡ҆чⷭ҇ти, да вѣ́­рою и҆ лю­бо́­вїю ве­ли­ча́ю тѧ̀.

И҆́нъ ка­нѡ́нъ. Гла́съ и҃. Пѣ́снь а҃.

І҆р­мо́съ: Во́дꙋ про­ше́дъ, ꙗ҆́кѡ сꙋ́шꙋ, и҆ є҆гѵ́­пет­ска­гѡ ѕла̀ и҆з­бѣ­жа́въ, і҆и҃ль­тѧ­нинъ во­пї­ѧ́­ше: и҆з­ба́­ви­те­лю и҆ бг҃ꙋ на́­ше­мꙋ по­и́мъ.

По за́­по­вѣ­ди влⷣки хрⷭ҇та̀, ѹ҆́з­кимъ и҆ тѣ́­снымъ пꙋ­те́мъ вше́лъ є҆сѝ, прпⷣбне, въ црⷭ҇тво нбⷭ҇ное, ши­ро́­кїй и҆ про­стра́н­ный пꙋ́ть воз­не­на­ви́­дѣвъ: и҆ ны́нѣ мо­ли́­сѧ ѡ҆ на́съ, тво­рѧ́­щихъ пре­свѣ́т­лꙋю па́­мѧть твою̀.

Ѿ ю҆́но­сти на без­стра́­стїѧ го́рꙋ воз­ше́дъ и҆ крⷭ҇тъ сво́й взе́мъ, не­воз­вра́т­нѡ хрⷭ҇тꙋ̀ по­слѣ́­до­валъ є҆сѝ: и҆ дх҃о́в­нꙋю мꙋ́­дрость стѧ­жа́въ, го́р­нѧ­гѡ і҆ерⷭ҇ли́­ма до­сти́глъ є҆сѝ, прпⷣбне: молѝ ѡ҆ на́съ є҆ди́­на­го чл҃вѣ­ко­лю́б­ца.

Ны́нѣ пред­стоѧ̀, прпⷣбне, прⷭ҇то́­лꙋ бж҃їю, хрⷭ҇то­лю­би̑­вымъ лю́­демъ зе­млѝ рѡс­сӏ́й­скїѧ сп҃се́­нїе и҆с­про­сѝ мл҃тва­ми тво­и́­ми, прпⷣбне.

Бг҃о­ро́­ди­ченъ: Съ вѣ́­рою и҆ лю­бо́­вїю при­те­ка́­ю­щихъ къ тебѣ̀, и҆ со стра́­хомъ по­ю́­щихъ тѧ̀, мл҃твен­ный гла́съ ᲂу҆­слы́­ши, влⷣчце.

Пѣ́снь г҃.

І҆р­мо́съ: Нѣ́сть ст҃ъ, ꙗ҆́ко­же ты̀, гдⷭ҇и бж҃е мо́й, воз­не­сы́й ро́гъ вѣ́р­ныхъ тво­и́хъ, бл҃же, и҆ ᲂу҆­твер­ди́­вый на́съ на ка́­ме­ни и҆с­по­вѣ́­да­нїѧ тво­е­гѡ̀.

Мл҃тва­ми тво­и́­ми, прпⷣбне, пред­стоѧ̀ бг҃ꙋ со а҆́гг҃лы, за ве́сь мӏ́ръ мо­ли́­сѧ, бра̑­ни вра̑­жїѧ по­тре­би́­ти, и҆ по­бѣ́­дꙋ на сꙋ­по­ста́­ты да­ро­ва́­ти пра­во­сла̑в­нымъ хрⷭ҇тї­а́­нѡмъ.

Ѿ ю҆́но­сти вѣ́­рою и҆ лю­бо́­вїю при­лѣ­пи́л­сѧ є҆сѝ влⷣцѣ вы́ш­нихъ си́лъ, прпⷣбне се­ра­фӏ́­ме: и҆ воз­сї­ѧ́въ въ пꙋ­сты́­ни са­ро́в­стѣй, ꙗ҆́кѡ со́лн­це, въ ско́р­бехъ при­хо­дѧ́­щымъ къ тебѣ̀ ᲂу҆­тѣ́­ши­тель бы́лъ є҆сѝ: молѝ сп҃сти́­сѧ на́мъ.

Ꙗ҆ви́л­сѧ є҆сѝ, прпⷣбне, мо­лѧ́­щым­сѧ тебѣ̀ сто́лпъ не­по­ко­ле­би́мь, и҆ при­бѣ́­жи­ще всѣ̑мъ при­те­ка́­ю­щымъ во ѻ҆би́­тель са­ро́в­скꙋю, и҆ прї­е́м­лю­щымъ и҆с­цѣ­ле́­нїѧ блгⷣть не­ѡ­скꙋ́д­нꙋю.

Бг҃о­ро́­ди­ченъ: Оу҆­слы́­ша є҆́ѵа пра­ма́­терь: въ пе­ча́­лехъ ро­ди́­ши ча̑да. ты́ же, чⷭ҇таѧ дв҃о, ᲂу҆­слы́­шав­ши: гдⷭ҇ь съ то­бо́ю, ра́­дꙋй­сѧ: ра́­до­ван­нымъ гла́­сомъ пе­ча́ль пра­ма́­те­ре по­тре­би́­ла є҆сѝ.

И҆́нъ. І҆р­мо́съ: Нбⷭ҇на­гѡ крꙋ́­га вер­хо­тво́р­че, гдⷭ҇и, и҆ цр҃кве зи­жди́­те­лю, ты̀ менѐ ᲂу҆­твер­дѝ въ люб­вѝ тво­е́й, же­ла́­нїй кра́ю, вѣ́р­ныхъ ᲂу҆­твер­жде́­нїе, є҆ди́­не чл҃вѣ­ко­лю́б­че.

Мо­ли́­сѧ, бл҃же́н­не, хрⷭ҇тꙋ̀ бг҃ꙋ, и҆з­ба́­ви­ти­сѧ на́мъ ѿ гла́­да и҆ па́­гꙋ­бы, ѿ на­пра́с­ныѧ сме́р­ти, ѿ та́й­ныхъ пре­грѣ­ше́­нїй и҆ по­мыш­ле́­нїй лꙋ­ка́­выхъ, да чⷭ҇тымъ срⷣцемъ хрⷭ҇тꙋ̀ во­зо­пї­и́мъ: мл҃тва­ми прпⷣбна­гѡ сп҃сѝ на́съ, гдⷭ҇и.

Кро́­то­стїю и҆ сми­ре́­нї­емъ по­слѣ́­дꙋѧ влⷣцѣ хрⷭ҇тꙋ̀, всѣ̑мъ всѧ̑ во­и́­стин­нꙋ бы́лъ є҆сѝ, бо­га́­тыхъ же и҆ ᲂу҆­бо́­гихъ не­ѡ­сла́б­нѡ бл҃го­че́­стїю по­ꙋ­ча́ѧ, бꙋ̑­дꙋ­щаѧ ꙗ҆́кѡ на­сто­ѧ̑­щаѧ про­ви́­дѣлъ є҆сѝ: молѝ хрⷭ҇та̀ бг҃а, прпⷣбне, со­грѣ­ше́­нїй на́­шихъ ѡ҆став­ле́­нїе да­ро­ва́­ти.

И҆з­ба́­ви ѻ҆би́­тель твою̀, прпⷣбне, ѿ всѧ́­ка­гѡ на­вѣ́­та вра́­жїѧ, и҆ и҆с­по́л­ни ю҆̀ люб­вѐ и҆ блгⷣти, є҆́же не по­мыш­лѧ́­ти ѡ҆ жи­те́й­скихъ, но дꙋ­ше­сп҃си́­тель­ныѧ до­сти́г­нꙋ­ти до­бро́­ты мл҃тва­ми тво­и́­ми.

Бг҃о­ро́­ди­ченъ: Оу҆­по­ва́­нїе и҆ на­де́­жда на́ша ты̀ є҆сѝ, пре­ст҃а́ѧ влⷣчце, сп҃сѝ лю́ди твоѧ̑ мо­лѧ́­щы­ѧ­сѧ, и҆ и҆́мѧ твоѐ при­зы­ва́­ю­щыѧ.

Кон­да́къ и҆ і҆́косъ пред­пра́здн­ства.

Сѣ­да́­ленъ, гла́съ д҃:

Жи­те́й­ское мо́ре стра­сте́й воз­дер­жа́­нї­емъ пре­по­бѣ­ди́въ, и҆ въ при­ста́­ни­ще без­стра́­стїѧ при­те́къ, со­сꙋ́дъ воз­дер­жа́­нїѧ ꙗ҆ви́л­сѧ є҆сѝ, прпⷣбне се­ра­фӏ́­ме: молѝ хрⷭ҇та̀ бг҃а, да­ро­ва́­ти на́мъ ве́­лїю млⷭ҇ть. Два́­жды.

Сла́­ва, и҆ ны́нѣ, пред­пра́здн­ства. И҆лѝ бг҃о­ро́­ди­ченъ:

Є҆гда̀ пред­ста́­нꙋ предꙿ ли­це́мъ со­зда́­те­лѧ мо­е­гѡ̀ въ де́нь првⷣна­гѡ сꙋда̀ є҆гѡ̀, то­гда̀, влⷣчце, пред­ста́­ни мѝ, и҆ мꙋ́ки и҆з­ба́­ви мѧ̀ вѣ́ч­ныѧ, да не сни́­дꙋ во а҆́дъ, но да сп҃сꙋ́­сѧ тво­и́мъ, пре­ст҃а́ѧ бцⷣе, за­стꙋ­пле́­нї­емъ.

Пѣ́снь д҃.

І҆р­мо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, чⷭ҇тна́ѧ цр҃ковь бг҃о­лѣ́п­нѡ по­е́тъ взы­ва́­ю­щи, ѿ смы́­сла чⷭ҇та ѡ҆ гдⷭ҇ѣ пра́з­днꙋ­ю­щи.

Дне́сь свѣ́т­лѡ пра́з­днꙋ­етъ са­ро́в­скаѧ ѻ҆би́­тель па́­мѧть твою̀, прпⷣбне, и҆ мо́­литъ тѧ̀: и҆с­про­сѝ ᲂу҆ гдⷭ҇а все­ле́н­нѣй ми́ръ, и҆ дꙋ­ша́мъ на́­шымъ ве́­лїю млⷭ҇ть.

Ве­ли́­ки­ми пѡ́­дви­ги тво­и́­ми, прпⷣбне, ꙗ҆́кѡ фӏ́­нїѯъ про­цвѣ́лъ є҆сѝ, сло­ве­сы̀ бл҃го­пло́д­ны­ми и҆ не­по­ро́ч­нымъ жи­тї­е́мъ серд­ца̀ при­те­ка́­ю­щихъ къ тебѣ̀ ᲂу҆­сла­жда́ѧ: и҆ ны́нѣ ᲂу҆̀бо мо­ли́­сѧ, да ѡ҆брѧ́­щемъ млⷭ҇ть ᲂу҆ хрⷭ҇та̀ сп҃са на́­ше­гѡ.

Тво­и́­ми мл҃тва­ми ѡ҆ на́съ ᲂу҆­мо­лѝ бг҃а, прпⷣбне се­ра­фӏ́­ме, и҆ грѣ­хо́в­ный мра́къ пе­ча́­ли на́­шеѧ ра­зо­рѝ: без­стра́­стї­емъ, вѣ́­рою и҆ лю­бо́­вїю ᲂу҆­кра­сѝ всѣ́хъ, пре­сла́в­нꙋю па́­мѧть твою̀ чтꙋ́­щихъ.

Бг҃о­ро́­ди­ченъ: Ра́­дꙋй­сѧ, влⷣчце дв҃о, це́р­квамъ кра­со­то̀, бл҃го­чⷭ҇ти̑­вымъ лю́­демъ дер­жа́­во и҆ по­хва­ло̀: не­пре­ста́н­нѡ мо­ли́­сѧ хрⷭ҇тꙋ̀ бг҃ꙋ, да со­хра­ни́тъ на́съ ѿ бѣ́дъ мл҃тва­ми тво­и́­ми.

И҆́нъ. І҆р­мо́съ: Оу҆­слы́­шахъ, гдⷭ҇и, смо­тре́­нїѧ тво­е­гѡ̀ та́­ин­ство, раз­ꙋ­мѣ́хъ дѣла̀ твоѧ̑, и҆ про­сла́­вихъ твоѐ бж҃е­ство̀.

Не то́­кмѡ ст҃а́ѧ ѻ҆би́­тель са­ро́в­скаѧ, но и҆ всѧ̀ рѡс­сӏ́й­скаѧ зе­млѧ̀ и҆мѣ́­етъ тѧ̀, бл҃же́н­не, мл҃твен­ни­ка те́­пла­го и҆ ско́­ра­го по­мо́щ­ни­ка, крѣ́п­ка­го и҆ не­по­бѣ­ди́­ма­го за­стꙋ́п­ни­ка, и҆ хо­да́­таѧ ѡ҆ дꙋ­ша́хъ на́­шихъ.

Бꙋ́ди ѡ҆ на́съ мо­ле́б­никъ и҆ хо­да́­тай ко пре­ст҃ѣ́й трⷪ҇цѣ, и҆ по­дви́г­ни на мл҃твꙋ съ то­бо́ю ли́ки ст҃ы́хъ, и҆́хже жи­тїю̀ по­ре­вно­ва́лъ є҆сѝ, прпⷣбне: съ ни́­ми­же кꙋ́п­нѡ мо­ли́­сѧ ѡ҆ ми́рѣ и҆ ᲂу҆­стро­е́­нїи все­гѡ̀ мӏ́ра, да ти́­хое и҆ без­мо́лв­ное жи­тїѐ по­жи­ве́мъ въ вѣ́цѣ се́мъ, и҆ въ бꙋ́­дꙋ­щемъ жи́знь вѣ́ч­нꙋю на­слѣ́­дꙋ­емъ.

Въ по́ст­ни­цѣхъ ве­ли́къ бы́въ, прпⷣбне, тѣ́­сное и҆́но­че­ское въ пꙋ­сты́­ни жи­тїѐ про­хо­ди́лъ є҆сѝ, и҆ сїѐ во ᲂу҆­ми­ле́н­нѣй мл҃твѣ скон­ча́лъ є҆сѝ: молѝ сп҃сти́­сѧ на́мъ.

Бг҃о­ро́­ди­ченъ: Ты̀ є҆сѝ, пре­чⷭ҇таѧ бцⷣе, при­бѣ́­жи­ще на́ше и҆ ᲂу҆­твер­жде́­нїе: молѝ сн҃а тво­е­го̀ и҆ бг҃а на́­ше­го, по­да́­ти на́мъ сп҃се́­нїе и҆ грѣ­хѡ́въ ѡ҆став­ле́­нїе.

Пѣ́снь є҃.

І҆р­мо́съ: Бж҃ї­имъ свѣ́­томъ тво­и́мъ, бл҃же, ѹ҆́тре­ню­ю­щихъ тѝ дꙋ́шы лю­бо́­вїю ѡ҆за­рѝ, мо­лю́­сѧ, тѧ̀ вѣ́­дѣ­ти, сло́­ве бж҃їй, и҆́стин­на­го бг҃а, ѿ мра́­ка грѣ­хо́в­на­гѡ взы­ва́­ю­ща.

Всѣ̑мъ при­хо­дѧ́­щымъ къ тебѣ̀ бы́лъ є҆сѝ ᲂу҆­чи́­тель и҆́стин­ный, и҆ къ бцⷣѣ ве­ли́­кїй мл҃твен­никъ: и҆ ны́нѣ, прпⷣбне, не пре­ста́й мо­лѧ́­сѧ ѡ҆ ча́­дѣхъ тво­и́хъ, ꙗ҆́кѡ и҆́ма­ши дер­зно­ве́­нїе ве́­лїе.

Да вни́­дꙋтъ ны́нѣ хрⷭ҇то­и­ме­ни́­тїи лю́­дїе во хра́мъ ѻ҆би́­те­ли са­ро́в­скїѧ, къ чⷭ҇тны̑мъ мо­ще́мъ тво­и̑мъ, прпⷣбне се­ра­фӏ́­ме, при­па́­да­ю­ще, и҆ да про́­сѧтъ ѿ тебє̀ и҆с­цѣ­ле́­нїѧ, здра́­вїѧ и҆ сп҃се́­нїѧ, хрⷭ҇та̀ ве­ли­ча́­ю­ще.

Въ нощѝ мо­лѧ́­щꙋ ти сѧ бг҃ꙋ, прпⷣбне, вра́гъ не­ви́­ди­мый хо­тѧ́­ше ᲂу҆­стра­ши́­ти тѧ̀: но мл҃твою тво­е́ю по­сра́м­ленъ, и҆с­че­зѐ все­лꙋ­ка́­вый.

Бг҃о­ро́­ди­ченъ: Бг҃а, є҆го́­же ро­ди­ла̀ є҆сѝ, пре­чⷭ҇таѧ мр҃ӏ́е, молѝ, ра­бѡ́мъ тво­и̑мъ по­да́­ти пре­грѣ­ше́­нїй ѡ҆став­ле́­нїе.

И҆́нъ.І҆р­мо́съ: Про­свѣ­тѝ на́съ по­ве­лѣ́­нїи тво­и́­ми, гдⷭ҇и, и҆ мы́ш­цею тво­е́ю вы­со́­кою тво́й ми́ръ по­да́ждь на́мъ, чл҃вѣ­ко­лю́б­че.

По­сто́мъ и҆ не­пре­ста́н­ною мл҃твою про­сла́­вилъ є҆сѝ, прпⷣбне, ѻ҆би́­тель са­ро́в­скꙋю, є҆ле́­емъ ѿ і҆кѡ́­ны влⷣчцы по­ма­зꙋ́ѧ не­дꙋ̑ж­ныѧ, и҆ тѣ́мъ и҆с­цѣ­ле́­нїе не­ѡ­скꙋ́д­нѡ по­да­ва́ѧ: и҆ ны́нѣ мо­ли́­сѧ сп҃сти́­сѧ дꙋ­ша́мъ на́­шымъ.

Ст҃и́­те­лїе и҆ сщ҃е́н­ни­цы, со­ра́­дꙋй­те­сѧ и҆́но­кѡмъ са­рѡ́в­скимъ, и҆ про­стӏ́и лю́­дїе, вкꙋ́­пѣ вос­по́й­те бл҃же́н­на­го ѻ҆҆тца̀, ѡ҆бꙋ­ре­ва́­е­мыхъ скорбь­мѝ ти́­хое при­ста́­ни­ще, вра­ча̀ дꙋ­шє́в­нымъ и҆ тѣ­лє́с­нымъ не­дꙋ́­гѡмъ ско́­ра­го.

При­не­сѝ мл҃твы твоѧ̑, прпⷣбне, ꙗ҆́кѡ же́р­твꙋ бл҃го­прї­ѧ́т­нꙋ и҆ не­по­ро́ч­нꙋ ко пре­ст҃ѣ́й трⷪ҇цѣ, и҆ не за­бꙋ́­ди на́съ, ны́нѣ тво­рѧ́­щихъ па́­мѧть твою̀: млⷭ҇ть и҆с­про­сѝ не­на­ви́­дѧ­щымъ, ѡ҆би́­дѧ­щымъ и҆ вра­ждꙋ́­ю­щымъ на на́съ, и҆ и҆з­ба́­ви всѣ́хъ ѿ всѧ́­кїѧ ско́р­би.

Бг҃о­ро́­ди­ченъ: Оу҆­пра́­ви ѹ҆́мъ мо́й, влⷣчце, ѡ҆бꙋ­ре­ва́­е­мый страсть­мѝ мно́­ги­ми: сп҃сѝ, бцⷣе, къ тебѣ̀ при­бѣ­га́­ю­щыѧ, и҆ны́ѧ бо по́­мо­щи, чⷭ҇таѧ, ра́з­вѣ тебє̀ не зна́­емъ.

Пѣ́снь ѕ҃.

І҆р­мо́съ: Жи­те́й­ское мо́ре воз­дви­за́­е­мое зрѧ̀ на­па́­стей бꙋ́­рею, къ ти́­хо­мꙋ при­ста́­ни­щꙋ тво­е­мꙋ̀ при­те́къ, во­пїю́ ти: воз­ве­дѝ ѿ тлѝ жи­во́тъ мо́й, мно­го­млⷭ҇ти­ве.

Ст҃а́ѧ дꙋша̀ твоѧ̀ ѻ҆би́­тель бы́сть бг҃ꙋ, въ не́й­же ѻ҆ц҃ъ, сн҃ъ и҆ ст҃ы́й дх҃ъ все­ли́­сѧ: тѣ́м­же мо́­лимъ тѧ̀, прпⷣбне, на­ва­ждє́­нїѧ вра̑­жїѧ ѿ чтꙋ́­щихъ тѧ̀ ѿже­нѝ, и҆ вѣ̑р­нымъ лю́­демъ ми́ръ и҆ здра́­вїе да́­рꙋй.

Ве­ли̑­кїѧ твоѧ̑ пꙋ­сты̑н­ныѧ по́­дви­ги и҆ трꙋ­ды̀, и҆ сла́­дость ᲂу҆­че́­нїѧ тво­е­гѡ̀ по­чи­та́­емъ, прпⷣбне се­ра­фӏ́­ме, и҆́ми­же мнѡ́­гїѧ при­хо­дѧ́­щыѧ къ тебѣ̀ про­свѣ­ти́лъ є҆сѝ, и҆ на­ꙋ­чи́лъ є҆сѝ вос­пѣ­ва́­ти є҆ди­но­сꙋ́щ­нꙋю трⷪ҇цꙋ.

Жи­тї­е́мъ чⷭ҇тымъ по­слѣ́­до­валъ влⷣцѣ хрⷭ҇тꙋ̀, те­че́­нїе до́­брое скон­ча́лъ є҆сѝ, прпⷣбне: къ вѣ̑ч­нымъ же ѻ҆би́­те­лемъ воз­ше́дъ, бл҃же́н­не, зри́­ши та́мѡ, ꙗ҆̀же а҆́гг҃ли ви́­дѧтъ: тѣ́м­же, чтꙋ́­ще па́­мѧть твою̀, хрⷭ҇та̀ ве­ли­ча́­емъ.

Бг҃о­ро́­ди­ченъ: Ны́нѣ къ тебѣ̀ при­бѣ­га́ю, пре­чⷭ҇таѧ, сп҃си́ мѧ мл҃тва­ми тво­и́­ми и҆ со­блю­дѝ: є҆ли̑­ка бо хо́­ще­ши, мо́­же­ши, ꙗ҆́кѡ мт҃и все­мо­гꙋ́­ща­гѡ.

И҆́нъ. І҆р­мо́съ: Мл҃твꙋ про­лїю̀ ко гдⷭ҇ꙋ, и҆ томꙋ̀ воз­вѣ­щꙋ̀ пе­ча̑­ли моѧ̑, ꙗ҆́кѡ ѕѡ́лъ дꙋша̀ моѧ̀ и҆с­по́л­ни­сѧ, и҆ жи­во́тъ мо́й а҆́дꙋ при­бли́­жи­сѧ, и҆ мо­лю́­сѧ ꙗ҆́кѡ і҆ѡ́на: ѿ тлѝ, бж҃е, воз­ве­ди́ мѧ.

Грѣ­хѡ́въ и҆с­по́л­не­ни всѝ є҆смы̀, твоѧ̑ же мл҃твы, прпⷣбне се­ра­фӏ́­ме, ꙗ҆́кѡ ка­ди́­ло бл҃го­во́н­но, ко гдⷭ҇е­ви вос­хо́­дѧтъ. ны́нѣ мо́­лимъ тѧ̀: вол­нꙋ́­ю­ще­е­сѧ въ зе­млѝ на́­шей мо́ре ѕла́­гѡ не­вѣ́­рїѧ и҆з­сꙋ­шѝ, и҆ сп҃се́­нїе дꙋ­ша́мъ на́­шымъ ѿ гдⷭ҇а и҆с­про­сѝ.

Бл҃же́нъ во­и́­стин­нꙋ бы́лъ є҆сѝ, прпⷣбне се­ра­фӏ́­ме, ни­ще­то́ю бо­га́т­ство и҆ пла́­чемъ ра́­дость стѧ­жа́въ, ю҆́же при­хо­дѧ́­щымъ ѻ҆би́ль­нѡ по­да­ва́лъ є҆сѝ: и҆ ны́нѣ лꙋчы̀ чꙋ­де́съ и҆с­то­ча́­е­ши, и҆ и҆с­цѣ­лѧ́­е­ши всѣ́хъ, съ вѣ́­рою къ тебѣ̀ при­те­ка́­ю­щихъ.

Въ пꙋ­сты́­ни кла­де­не́цъ и҆ско­па́въ тво­и́­ма рꙋ­ка́­ма, прпⷣбне, при­хо­дѧ́­щыѧ жа́­ждꙋ­щыѧ лю́ди на­по­и́лъ є҆сѝ, и҆ ны́нѣ мнѡ́­гимъ не­дꙋ̑ж­нымъ во­до́ю кла­ден­ца̀ сегѡ̀ бо­лѣ̑­зни и҆с­цѣ­лѧ́­е­ши: во­и́­стин­нꙋ ди́в­на­го мл҃твен­ни­ка и҆ чꙋ­до­тво́р­ца всѣ̑мъ, прпⷣбне, влⷣка тѧ̀ по­ка­за̀.

Бг҃о­ро́­ди­ченъ: Во­и́­стин­нꙋ тѧ̀ мт҃рь бж҃їю и҆с­по­вѣ́­дꙋ­емъ, и҆́стин­нꙋю бцⷣꙋ: тво­и́мъ бо ржⷭ҇тво́мъ тлѣ́н­на­гѡ ѡ҆сꙋ­жде́­нїѧ и҆з­ба́­ви­хом­сѧ, млⷭ҇рдїѧ ра́ди чл҃вѣ­ко­лю́б­ца бг҃а, и҆ къ жи́­зни не­тлѣ́н­нѣй воз­зва́­ни бы́­хомъ.

Кон­да́къ, гла́съ в҃:

Мӏ́ра кра­со­тꙋ̀ и҆ ꙗ҆̀же въ не́мъ тлѣ̑н­наѧ ѡ҆ста́­вивъ, прпⷣбне, въ са­ро́в­скꙋю ѻ҆би́­тель все­ли́л­сѧ є҆сѝ: и҆ та́мѡ а҆́гг҃ль­ски по­жи́въ, мнѡ́­гимъ пꙋ́ть бы́лъ є҆сѝ ко сп҃се́­нїю: сегѡ̀ ра́ди и҆ хрⷭ҇то́съ тебѐ, ѻ҆́тче се­ра­фӏ́­ме, про­сла́­ви, и҆ да́­ромъ и҆с­цѣ­ле́­нїй и҆ чꙋ­де́съ ѡ҆бо­га­тѝ. тѣ́м­же во­пї­е́мъ тѝ: ра́­дꙋй­сѧ, се­ра­фӏ́­ме, прпⷣбне ѻ҆́тче на́шъ.

І҆́косъ: Ѡ҆ста́­вивъ ро́дъ и҆ дрꙋ́­ги, бо­га́т­ство ꙗ҆́кѡ пра́хъ вмѣ­ни́въ, въ пꙋ­сты́­ни са­ро́в­стѣй во­дво­ри́л­сѧ є҆сѝ: и҆ на стра̑­сти ꙗ҆́кѡ без­пло́­тенъ по­дви­за́в­сѧ, а҆́гг҃лѡвъ ли­ко­сто­ѧ́­нїѧ спо­до́­бил­сѧ є҆сѝ. тѣ́м­же дх҃ѡ́в­наѧ раз­ꙋ­мѣ̑­нїѧ прї­и́мъ, по­да́ждь и҆ на́мъ, прпⷣбне, раз­ꙋ́м­нѡ пѣ́снь­ми вос­пѣ́­ти тѧ̀, си́це гла­го́­лю­щымъ: Ра́­дꙋй­сѧ, се­ра­фӏ́­ме бл҃же́н­не, нбⷭ҇ный че­ло­вѣ́­че и҆ зем­ны́й а҆́гг҃ле: ра́­дꙋй­сѧ, въ люб­вѝ хрⷭ҇тꙋ̀ по­дра­жа́­те­лю. Ра́­дꙋй­сѧ, ст҃а́­гѡ дх҃а ѻ҆би́­тель: ра́­дꙋй­сѧ, ᲂу҆­ны­ва́­ю­щымъ ве́­лїе ра́­до­ва­нїе. Ра́­дꙋй­сѧ, и҆с­то́ч­ни­че и҆с­цѣ­ле́­нїй: ра́­дꙋй­сѧ, скор­бѧ́­щымъ дꙋ­ша́мъ сла́д­кое ᲂу҆­тѣ­ше́­нїе. Ра́­дꙋй­сѧ, и҆́но­кѡмъ ти́­хое при­ста́­ни­ще и҆ ᲂу҆­чи́­те­лю пре­мꙋ́­дрый: ра́­дꙋй­сѧ, по­хва­ло̀ зе­млѝ рѡс­сӏ́й­скїѧ. Ра́­дꙋй­сѧ, се­ра­фӏ́­ме, прпⷣбне ѻ҆́тче на́шъ.

Пѣ́снь з҃.

І҆р­мо́съ: Ро­со­да́­тель­нꙋ ѹ҆́бѡ пе́щь со­дѣ́­ла а҆́гг҃лъ прпⷣбнымъ ѻ҆тро­кѡ́мъ, хал­дє́и же ѡ҆па­лѧ́­ю­щее ве­лѣ́­нїе бж҃їе мꙋ­чи́­те­лѧ ᲂу҆­вѣ­ща̀ во­пи́­ти: бл҃го­сло­ве́нъ є҆сѝ, бж҃е ѻ҆҆҆тє́цъ на́­шихъ.

Чꙋ́д­но жи­тїѐ твоѐ ꙗ҆ви́­сѧ, прпⷣбне, блгⷣтїю бжⷭ҇твен­на­гѡ дх҃а и҆с­по́л­не­но: бл҃же́н­нꙋ во­и́­стин­нꙋ кон­чи́­нꙋ првⷣныхъ прї­ѧ́лъ є҆сѝ, ѡ҆ хрⷭ҇тѣ̀ ра́­дꙋ­ѧ­сѧ. мы́ же къ про­сла́вль­ше­мꙋ тѧ̀ взы­ва́­емъ: ѻ҆тє́цъ на́­шихъ бж҃е, бл҃го­сло­ве́нъ є҆сѝ.

Мно́­же­ство лю­де́й, во ст҃ꙋ́ю ѻ҆би́­тель со­ше́д­ше­сѧ дне́сь, прпⷣбне се­ра­фӏ́­ме, чⷭ҇тны̑мъ мо­ще́мъ тво­и̑мъ по­кла­нѧ́­ет­сѧ, ѿ ни́х­же и҆с­цѣ­лє́­нїѧ всѝ по­чер­па́­емъ, не­пре­ста́н­нѡ зо­вꙋ́­ще: ѻ҆тє́цъ на́­шихъ бж҃е, бл҃го­сло­ве́нъ є҆сѝ.

Во всю̀ зе́­млю и҆зы́­де вѣ­ща́­нїе сїѐ, ꙗ҆́кѡ въ са­ро́­вѣ чꙋ­до­тво́­рецъ пре­сла́­венъ ꙗ҆ви́­сѧ, и҆с­цѣ­ле́­нїй мно́­же­ство и҆с­то­ча́ѧ всѣ̑мъ, съ вѣ́­рою при­хо­дѧ́­щымъ и҆ во­пї­ю́­щымъ: ѻ҆тє́цъ на́­шихъ бж҃е, бл҃го­сло­ве́нъ є҆сѝ.

Бг҃о­ро́­ди­ченъ: Бцⷣе дв҃о, ро́жд­шаѧ сло́­во па́че сло́­ва, зи­жди́­те­лѧ тво­е­го̀, того̀ молѝ съ прпⷣбнымъ се­ра­фӏ́­момъ, по­ми́­ло­ва­ти дꙋ́шы на́шѧ.

И҆́нъ. І҆р­мо́съ: Ѿ і҆ꙋ­де́и до­ше́д­ше ѻ҆́тро­цы, въ ва­вѷ­лѡ́­нѣ и҆но­гда̀, вѣ́­рою трⷪ҇че­скою пла́­мень пе́щ­ный по­пра́­ша, по­ю́­ще: ѻ҆тцє́въ бж҃е, бл҃го­сло­ве́нъ є҆сѝ.

По­ми́­лꙋй на́съ, гдⷭ҇и, и҆ ѿ всѧ́­ка­гѡ ѕла̀ дꙋ­ше­тлѣ́н­на­гѡ со­хра­нѝ, мл҃тва­ми ᲂу҆­го́д­ни­ка тво­е­гѡ̀, прпⷣбна­гѡ се­ра­фӏ́­ма, да всѝ ᲂу҆­ми́ль­нѡ во­пї­е́мъ тѝ: ѻ҆тє́цъ на́­шихъ бж҃е, бл҃го­сло­ве́нъ є҆сѝ.

Кто̀ не по­чꙋ­ди́т­сѧ, кто̀ не про­сла́­витъ не­из­слѣ́­ди­мꙋю глꙋ­би­нꙋ̀ млⷭ҇рдїѧ тво­е­гѡ̀, гдⷭ҇и; ꙗ҆́кѡ ꙗ҆ви́лъ є҆сѝ все­мꙋ̀ мӏ́рꙋ ᲂу҆­го­д­ни́­ка тво­е­го̀, прпⷣбна­го се­ра­фӏ́­ма, мл҃твен­ни­ка те́­пла­го ѡ҆ на́съ, во­пї­ю́­щихъ тебѣ̀: ѻ҆тє́цъ на́­шихъ бж҃е, бл҃го­сло­ве́нъ є҆сѝ.

Бл҃го­да́р­ное сїѐ пѣ́­нїе, ѿ на́съ при­но­си́­мое тебѣ̀, прпⷣбне се­ра­фӏ́­ме, прї­и­мѝ, и҆ всѣ̑мъ на́мъ, пра́з­днꙋ­ю­щымъ ст҃ꙋ́ю па́­мѧть твою̀, и҆ по­кла­нѧ́­ю­щым­сѧ ра́цѣ мо­ще́й тво­и́хъ, и҆с­цѣ­ле́­нїе да́­рꙋй, во­пї­ю́­щымъ: ѻ҆тє́цъ на́­шихъ бж҃е, бл҃го­сло­ве́нъ є҆сѝ.

Бг҃о­ро́­ди­ченъ: Ты̀ є҆сѝ, пре­ст҃а́ѧ бцⷣе, при­бѣ́­жи­ще на́ше и҆ ᲂу҆­твер­жде́­нїе: молѝ сн҃а тво­е­го̀ и҆ бг҃а на́­ше­го, по­да́­ти на́мъ сп҃се́­нїе и҆ грѣ­хѡ́въ ѡ҆став­ле́­нїе.

Пѣ́снь и҃.

І҆р­мо́съ: И҆зꙿ пла́­ме­не прпⷣбнымъ ро́сꙋ и҆с­то­чи́лъ є҆сѝ, и҆ првⷣна­гѡ же́р­твꙋ во­до́ю по­па­ли́лъ є҆сѝ: всѧ̑ бо тво­ри́­ши, хрⷭ҇тѐ, то́­кмѡ є҆́же хо­тѣ́­ти. тѧ̀ пре­воз­но́­симъ во всѧ̑ вѣ́ки.

Плот­скі̑ѧ стра̑­сти ᲂу҆­кро­ти́въ и҆ мӏ́­ро­ви ᲂу҆­мер­тви́в­сѧ, гла­го́­лы жи́­зни вѣ́ч­ныѧ срⷣцемъ тво­и́мъ, бл҃же́н­не, прї­ѧ́лъ є҆сѝ, на­ꙋ­ча́ѧ всѣ́хъ къ тебѣ̀ при­те­ка́в­шихъ взы­ва́­ти: гдⷭ҇а по́й­те, дѣла̀, и҆ пре­воз­но­си́­те є҆го̀ во вѣ́ки.

Въ про­слав­ле́­нїи чⷭ҇тны́хъ мо­ще́й тво­и́хъ, прпⷣбне, ѻ҆би́­тель са­ро́в­скаѧ ра́­до­сти и҆с­по́л­ни­сѧ: лю́­дїе же всѝ ди́в­но­мꙋ во ст҃ы́хъ сво­и́хъ бг҃ꙋ взы­ва́­хꙋ: гдⷭ҇а по́й­те, дѣла̀, и҆ пре­воз­но­си́­те є҆го̀ во вѣ́ки.

Бл҃го­да́­тїю бжⷭ҇твен­на­гѡ дх҃а и҆с­по́л­ненъ сы́й, прпⷣбне се­ра­фӏ́­ме, вѣ̑р­нымъ лю́­демъ, тво­рѧ́­щымъ ст҃ꙋ́ю па́­мѧть твою̀, мл҃тва­ми тво­и́­ми и҆с­про­сѝ грѣ­хѡ́въ про­ще́­нїе, во­пї­ю́­щымъ: дѣ́ти, бл҃го­сло­ви́­те, сщ҃е́н­ни­цы, вос­по́й­те, лю́­дїе, пре­воз­но­си́­те гдⷭ҇а во вѣ́ки.

Бг҃о­ро́­ди­ченъ: Сп҃се́­нїѧ хо­да́­та­и­ца на́мъ ꙗ҆ви́­ла­сѧ є҆сѝ, бцⷣе, ро́жд­шаѧ сп҃са и҆ влⷣкꙋ всѣ́хъ: тѣ́м­же мо́­лимъ тѧ̀, сп҃се́­нїѧ спо­до́­би всѣ́хъ пѣ­сно­сло́­вѧ­щихъ тѧ̀ вѣ́р­нѡ во всѧ̑ вѣ́ки.

И҆́нъ. І҆р­мо́съ: Цр҃ѧ̀ нбⷭ҇на­го, є҆го́­же по­ю́тъ вѡ́и а҆́гг҃ль­стїи, хва­ли́­те и҆ пре­воз­но­си́­те во всѧ̑ вѣ́ки.

До­бро­дѣ́­тель­но­мꙋ жи­тїю̀ тво­е­мꙋ̀, прпⷣбне, по­за­ви́­дѣвъ вра́гъ все­лꙋ­ка́­вый, вос­хо­тѣ̀ за­пѧ́­тїе тебѣ̀ со­тво­ри́­ти: ты́ же, блгⷣтїю бж҃ї­ею и҆ мл҃тва­ми влⷣчцы по­сра­ми́въ того̀, бг҃а про­сла́­вилъ є҆сѝ, пѣ­сно­сло́­вѧ: гдⷭ҇а по́й­те, дѣла̀, и҆ пре­воз­но­си́­те є҆го̀ во вѣ́ки.

Ꙗ҆́кѡ мо́л­нїѧ бли­ста́­ю­щи­сѧ свѣ́­тит­сѧ на по­д­не­бе́с­нѣй, та́кѡ и҆ вѣ­ща̑­нїѧ ѡ҆ тво­и́хъ, прпⷣбне, чꙋ­де­сѣ́хъ во всю̀ зе́­млю и҆зы­до́­ша. мы́ же, ди­вѧ́­ще­сѧ сла́­вѣ тво­е́й, во­пї­е́мъ: дѣ́ти, бл҃го­сло­ви́­те, сщ҃е́н­ни­цы, вос­по́й­те, лю́­дїе, пре­воз­но­си́­те гдⷭ҇а во вѣ́ки.

Сꙋ́­ет­ны­ми и҆ стра́ст­ны­ми по­мыш­лє́­нїи мѧ­тꙋ́­щїй­сѧ ѹ҆́мъ на́шъ и҆с­цѣ­лѝ, прпⷣбне, вѡ́л­ны ѕла́­гѡ не­вѣ́­рїѧ въ зе­млѝ на́­шей ᲂу҆­кро­тѝ, раз­сла́б­лєн­наѧ жи­те́й­ски­ми по­пе­чє́­нїи серд­ца̀ на̑ша ᲂу҆­крѣ­пѝ, да сла́­вимъ хрⷭ҇та̀ со­дѣ́­те­лѧ во всѧ̑ вѣ́ки.

Бг҃о­ро́­ди­ченъ: Ра́­дꙋй­сѧ, прⷭ҇то́­ле гдⷭ҇ень ѻ҆гне­зра́ч­ный: ра́­дꙋй­сѧ, зарѐ не­ве­ще́­ствен­на­гѡ бли­ста́­нїѧ: ра́­дꙋй­сѧ, ѻ҆́бла­че воз­сї­ѧ́в­ша­гѡ сл҃нца првⷣна­гѡ, хрⷭ҇та̀ сп҃са на́­ше­гѡ, є҆го́­же пре­воз­но́­симъ во всѧ̑ вѣ́ки.

Пѣ́снь ѳ҃.

І҆р­мо́съ: Бг҃а че­ло­вѣ́­кѡмъ не­воз­мо́ж­но ви́­дѣ­ти, на не­го́­же не смѣ́­ютъ чи́ни а҆́гг҃ль­стїи взи­ра́­ти. то­бо́ю же, все­чⷭ҇таѧ, ꙗ҆ви́­сѧ че­ло­вѣ́­кѡмъ сло́­во во­пло­ще́н­но, є҆го́­же ве­ли­ча́­ю­ще, съ нбⷭ҇ны­ми вѡ́и тѧ̀ ᲂу҆­бл҃жа́­емъ.

Не­до­сто́й­ны­ми ᲂу҆­сты̀ вос­пѣ­ва́­е­мое тебѣ̀ ма́­лое хва­ле́­нїе на́ше, прпⷣбне, не пре́­зри, но прї­и­мѝ: и҆ всѣ́хъ про­слав­лѧ́­ю­щихъ тѧ̀ ѡ҆свѧ­тѝ, бѣ́дъ и҆ на­па́­стей и҆ вѣ́ч­на­гѡ мꙋ­че́­нїѧ и҆з­ба́­ви, да тѧ̀ при́­снѡ вос­пѣ­ва́­емъ.

Мра́зъ нощ­ны́й и҆ ва́ръ днев­ны́й во ᲂу҆­е­ди­не́­нїи пꙋ­сты́н­нѣмъ до́­бле­ствен­нѣ пре­тер­пѣ́въ, до́мъ пре­мꙋ́­дро­сти бж҃їѧ бы́лъ є҆сѝ, и҆ къ сї­ѧ́­нїю не­ве­че́р­не­мꙋ во­сте́клъ є҆сѝ: молѝ сп҃сти́­сѧ на́мъ.

Сла́­вит­сѧ дне́сь ѻ҆би́­тель, въ не́й­же ꙗ҆ре́мъ хрⷭ҇то́въ прї­ѧ́­ти и҆з­во́­лилъ є҆сѝ: та́мѡ бо въ пꙋ­сты́­ни дни̑ твоѧ̑ пре­бы́лъ є҆сѝ, и҆ тво­и́­ми ᲂу҆­че́нь­ми мнѡ́­ги при­хо­дѧ́­щыѧ къ тебѣ̀ вра­зꙋ­ми́въ, на­ꙋ­чи́лъ є҆сѝ бы́ти ча̑да цр҃кве хрⷭ҇то́­вы.

Бг҃о­ро́­ди­ченъ: Ты̀ є҆сѝ крѣ́­пость на́ша, ты̀ є҆сѝ по­хва­ла̀ и҆ ра́­до­ва­нїе, хра­ни́­тель­ни­ца на́ша, за­стꙋ­пле́­нїе, при­бѣ́­жи­ще и҆ пред­ста́­тель­ни­ца не­по­бѣ­ди́­маѧ: пре­чⷭ҇таѧ бцⷣе, сп҃сѝ рабы̑ твоѧ̑.

И҆́нъ. І҆р­мо́съ: Во­и́­стин­нꙋ бцⷣꙋ тѧ̀ и҆с­по­вѣ́­дꙋ­емъ, сп҃се́н­нїи то­бо́ю, дв҃о чⷭ҇таѧ, съ без­пло́т­ны­ми ли̑ки тѧ̀ ве­ли­ча́­ю­ще.

Ве­ли̑­кимъ ѻ҆тцє́мъ, дре́в­ле въ по­стѣ̀ и҆ по́­дви­зѣхъ про­сї­ѧ́в­шымъ, по­ре­вно­ва́въ, прпⷣбне, чрезꙿ всѧ̑ дни̑ жи­во­та̀ тво­е­гѡ̀ въ мл҃твѣ, сле­за́хъ и҆ трꙋ­дѣ́хъ пре­бы́лъ є҆сѝ, до́н­де­же до­сти́глъ є҆сѝ нбⷭ҇ныѧ ѻ҆би́­те­ли: тѣ́м­же тѧ̀ до­сто́й­нѡ ᲂу҆­бл҃жа́­емъ.

Крѣ́п­кою си́­лою хрⷭ҇то́съ бг҃ъ тѧ̀ пре­по­ѧ́­са, и҆ ᲂу҆­крѣ­пѝ по­бѣ­жда́­ти кѡ́з­ни де́­мѡн­скїѧ, прпⷣбне. тѣ́м­же ны́нѣ мо́­лимъ тѧ̀: молѝ чл҃вѣ­ко­лю́б­ца бг҃а, да и҆з­ба́­витъ всѣ́хъ на́съ ѿ вра́­жї­ихъ на­хо­жде́­нїй и҆ и҆с­кꙋ­ше́­нїй, и҆ сп҃се́тъ дꙋ́шы на́шѧ.

Въ бо­лѣ́­знехъ и҆ ско́р­бехъ на́­шихъ къ тебѣ̀, прпⷣбне, при­бѣ­га́­емъ, и҆ и҆зꙿ глꙋ­би­ны̀ дꙋ­ше́в­ныѧ во­пї­е́мъ: бꙋ́ди на́мъ не­бꙋ́р­ное при­ста́­ни­ще и҆ бо­лѣ́­знемъ ско́­рый цѣ­ли́­тель, и҆ и҆з­ба́­ви на́съ ѿ всѧ́­ка­гѡ не­дꙋ́­га и҆ нꙋ́­жды, да тѧ̀ не­пре­ста́н­нѡ ве­ли­ча́­емъ.

Бг҃о­ро́­ди­ченъ: Є҆ди́­на­го ѿ ст҃ы́ѧ трⷪ҇цы, сло́­ва и҆ сн҃а ро­ди­ла̀ є҆сѝ, дв҃о пре­чⷭ҇таѧ, є҆го́­же съ прпⷣбны­ми и҆ првⷣны­ми молѝ ѡ҆ ра­бѣ́хъ тво­и́хъ, вѣ́­рою про­сѧ́­щихъ грѣ­хѡ́въ про­ще́­нїѧ.

Свѣ­ти́­ленъ. По­до́­бенъ: Жєны̀, ᲂу҆­слы́­ши­те:

Прї­и­ди́­те, всѝ вѣ́р­нїи, сщ҃е́н­ны­ми пѣ́снь­ми вос­хва́­лимъ ди́в­на­го въ чꙋ­де­сѣ́хъ прпⷣбна­го се­ра­фӏ́­ма, но́­ва­го свѣ­ти́ль­ни­ка рѡс­сӏ́й­скїѧ зе­млѝ, а҆́гг҃лѡмъ со­бе­сѣ́д­ни­ка, и҆ те́­пла­го мл҃твен­ни­ка къ бг҃ꙋ ѡ҆ чтꙋ́­щихъ ст҃ꙋ́ю па́­мѧть є҆гѡ̀. Два́­жды.

Сла́­ва, и҆ ны́нѣ, пред­пра́здн­ства. И҆лѝ бг҃о­ро́­ди­ченъ:

По бз҃ѣ ᲂу҆­по­ва́­нїе и҆мꙋ́­ще на тѧ̀, пре­чⷭ҇таѧ бцⷣе, мо́­лимъ ти сѧ: ро́жд­ша­го­сѧ и҆зꙿ тебє̀ ᲂу҆­мо­лѝ, да­ро­ва́­ти ми́ръ все­ле́н­нѣй и҆ ве́­лїю млⷭ҇ть.

На хва­ли́­техъ стї­хи̑­ры на ѕ҃: пред­пра́здн­ства г҃, и҆ прпⷣбно­мꙋ г҃.

А҆́ще же нѣ́сть пред­пра́здн­ства, прпⷣбно­мꙋ на д҃, гла́съ и҃:

При­спѣ̀ все­чⷭ҇тны́й пра́з­дникъ ѻ҆би́­те­ли са­ро́в­скїѧ, па́­мѧть прпⷣбна­гѡ се­ра­фӏ́­ма, є҆мꙋ́­же ны́нѣ си́це во­зо­пї­и́мъ: ра́­дꙋй­сѧ, по́ст­ни­кѡмъ свѣ­ти́­ло и҆ ᲂу҆­твер­жде́­нїе, и҆́но­кѡмъ ѕвѣз­до̀, ꙗ҆́ко­же вол­хвѡ́мъ, по­ка­зꙋ́­ю­щаѧ пꙋ́ть въ нбⷭ҇ныѧ ѻ҆би́­тє­ли, сщ҃е́н­ни­кѡмъ по­хва­ло̀ пре­сла́в­наѧ, люб­вѐ и҆ цѣ­ло­мꙋ́­дрїѧ и҆с­то́ч­ни­че не­из­сѧ­ка́­е­мый, свѣ­ти́ль­ни­че пре­свѣ́т­лый дх҃о́в­на­гѡ раз­сꙋ­жде́­нїѧ: ра́­дꙋй­сѧ, пра́­ви­ло до­бро­дѣ́­те­лемъ ве­ли́­кое.

Бл҃же́н­не ѻ҆́тче се­ра­фӏ́­ме, хрⷭ҇то́­ви во­и́­стин­нꙋ по­слѣ́­до­валъ є҆сѝ, бра­то­лю́­бї­емъ и҆ не­ѕло́­бї­емъ всѣ́хъ къ себѣ̀ при­вле­ка́ѧ, кро́­то­стїю же и҆ сми­ре́­нї­емъ мнѡ́­ги до­бро­дѣ́­тель­но­мꙋ пꙋтѝ на­ꙋ­ча́ѧ. тѣ́м­же лю­бо́­вїю па́­мѧть твою̀, прпⷣбне се­ра­фӏ́­ме, ᲂу҆­бл҃жа́­емъ.

Въ пꙋ­сты́­ню все­ли́л­сѧ є҆сѝ, прпⷣбне, и҆ та́мѡ и҆с­по́л­нив­сѧ дх҃о́в­ныѧ пре­мꙋ́­дро­сти, на вы­со­тꙋ̀ до­бро­дѣ́­те­ли воз­ше́лъ є҆сѝ. тѣ́м­же во­пї­е́мъ тѝ: ра́­дꙋй­сѧ, цр҃ко́в­ное ᲂу҆­кра­ше́­нїе, сщ҃е́н­ни­кѡмъ до́­брое ᲂу҆­тѣ­ше́­нїе, и҆́но­кѡмъ бл҃го­лѣ́­пїе и҆ по­хва­ло̀, се­ра­фӏ́­ме бл҃же́н­не: молѝ хрⷭ҇та̀ бг҃а ми́ръ все­ле́н­нѣй да­ро­ва́­ти, и҆ дꙋ­ша́мъ на́­шымъ ве́­лїю млⷭ҇ть.

Сла́­ва, гла́съ ѕ҃:

Прї­и­ди́­те, н҆́но­кѡвъ со­бо́­ри и҆ по́ст­ни­кѡвъ со­сло́­вїе, прї­и­ди́­те, хрⷭ҇то­и­ме­ни́­тыхъ лю­де́й мно́­жє­ства, пѣ́снь­ми и҆́стин­на­го по́ст­ни­ка по­чти́мъ, во­пї­ю́­ще: ра́­дꙋй­сѧ, по сто­па́мъ влⷣки хрⷭ҇та̀ ѹ҆́з­кимъ пꙋ­те́мъ ᲂу҆­прав­лѧ́­е­мый, и҆ при­те­ка́­ю­щымъ къ тебѣ̀ въ бѣ­да́хъ и҆ ско́р­бехъ ско́­рый по­мо́щ­ни­че, и҆ сп҃се́­нїѧ хо­да́­таю пре­ди́в­ный: ра́­дꙋй­сѧ, да́­ромъ прⷪ҇ро́­че­ства ᲂу҆­кра́­шен­ный, про­рица́­ѧй ꙗ҆́кѡ на­сто­ѧ̑­щаѧ грѧ­дꙋ̑­щаѧ: мо­ли́­сѧ, прпⷣбне се­ра­фӏ́­ме, ѡ҆ чтꙋ́­щихъ вѣ́­рою и҆ лю­бо́­вїю ст҃ꙋ́ю па́­мѧть твою̀.

И҆ ны́нѣ, пред­пра́здн­ства. И҆лѝ бг҃о­ро́­ди­ченъ:

Бцⷣе, ты̀ є҆сѝ лоза̀ и҆́стин­наѧ, воз­ра­сти́в­шаѧ на́мъ пло́дъ жи­во­та̀: тебѣ̀ мо́­лим­сѧ, мо­ли́­сѧ, влⷣчце, съ прпⷣбнымъ се­ра­фӏ́­момъ, по­ми́­ло­ва­ти дꙋ́шы на́шѧ.

Сла­во­сло́­вїе ве­ли́­кое. Є҆ктє­нїѝ, и҆ ѿпꙋ́стъ.

На лїтꙋргӏ́и.

Бл҃жє́н­на ѿ ка­нѡ́­на пред­пра́здн­ства, пѣ́снь г҃, и҆ ст҃а́­гѡ, пѣ́снь ѕ҃.

А҆́ще нѣ́сть пред­пра́здн­ства: ѿ ка­нѡ́­на пе́р­ва­гѡ, пѣ́снь г҃, и҆ вто­ра́­гѡ, пѣ́снь ѕ҃.

Про­кӏ́­менъ, гла́съ з҃: Ч҇ⷭтна̀ предꙿ гдⷭ҇емъ сме́рть прпⷣбныхъ є҆гѡ̀.

Стӏ́хъ: Что̀ воз­да́мъ гдⷭ҇е­ви ѡ҆ всѣ́хъ, ꙗ҆̀же воз­да­де́ ми;

А҆пⷭ҇лъ къ га­ла́­тѡмъ, за­ча́­ло сг҃і.

А҆л­ли­лꙋ́­їа, гла́съ ѕ҃: Бл҃же́нъ мꙋ́жъ, бо­ѧ́й­сѧ гдⷭ҇а, въ за́­по­вѣ­дехъ є҆гѡ̀ вос­хо́­щетъ ѕѣлѡ̀.

Стӏ́хъ: Си́ль­но на зе­млѝ бꙋ́­детъ сѣ́мѧ є҆гѡ̀.

Є҆ѵⷢ҇лїе ѿ лꙋкѝ, за­ча́­ло к҃д, и҆лѝ ѿ ма­тѳе́а, за­ча́­ло і.

При­ча́­стенъ: Въ па́­мѧть вѣ́ч­нꙋю: