Мѣ́­сѧ­ца і҆ꙋ́­лїа въ к҃г-й де́нь.

Слꙋ́жба прест҃ѣ́й бцⷣѣ, предꙿ чꙋдотво́рною є҆ѧ̀ і҆кѡ́ною поча́евскою пѣва́емаѧ.

На ма́лѣй вече́рни.

На Гдⷭ҇и, воз­зва́хъ: стї­хи̑­ры на д҃, гла́съ д҃:

На­ста̀ де́нь пра́з­дни­ка тво­е­гѡ̀, пре­чⷭ҇таѧ, на­ста̀ на́­шеѧ ра́­до­сти пре­свѣ́т­лый де́нь: прї­и­ди́­те, мо­на́­ше­ствꙋ­ю­щихъ ли́цы, прї­и­ди́­те, всѝ вѣ́р­нїи лю́­дїе, вос­по­и́мъ ѿ чⷭ҇та­гѡ срⷣца мт҃рь бж҃їю, и҆ чꙋ­де­са̀ є҆ѧ̀ на горѣ̀ по­ча́­ев­стѣй ꙗ҆в­лє́н­наѧ про­сла́­вимъ. Два́­жды.

Ве́­лїѧ чꙋ­де́съ тво­и́хъ си́ла, бцⷣе, ꙗ҆́кѡ мнѡ́­ги, то́­кмѡ воз­зва́в­шыѧ къ тебѣ̀, ѿ не­дꙋ́­гѡвъ тѧ́ж­кихъ сп҃сла̀ є҆сѝ, вѣ̑р­ныѧ ви­дѣ́нь­ми ᲂу҆­твер­ди́­ла є҆сѝ, и҆ не­вѣ̑р­ныѧ къ вѣ́рѣ ѡ҆б­ра­ти́­ла є҆сѝ.

А҆́ки сї­на́й и҆ ѳа­вѡ́ръ ᲂу҆­бл҃жа́­емъ го́рꙋ по­ча́­ев­скꙋю, а҆́ки влахе́рн­скꙋю це́р­ковь чти́мъ здѣ̀ сто­ѧ́­щїй хра́мъ влⷣчцы, занѐ по­дѡ́б­наѧ тѣ̑мъ мѣ́­стѡмъ въ по­ча́­ев­стѣй ѻ҆би́­те­ли со­дѣ́­ѧ­ша­сѧ, ꙗ҆́кѡ пре­бы­ва́­нїе сла́­вы при­сно­дв҃ы здѣ̀ ꙗ҆ви́­сѧ.

Сла́­ва, и҆ ны́нѣ, гла́съ в҃:

Нбⷭ҇наѧ вра­та̀, и҆ спо­рꙋ́ч­ни­ца сп҃се́­нїѧ на́­ше­гѡ, и҆ вѣ́ры пра­во­сла́в­ныѧ ᲂу҆­твер­жде́­нїе ты̀ є҆сѝ, бцⷣе пре­чⷭ҇таѧ: тво­е­гѡ̀ ᲂу҆̀бо пред­ста́­тель­ства ча́­ю­ще, во є҆ди́нъ мл҃твен­ный ли́къ сни­до́­хом­сѧ рабѝ твоѝ, и҆ под­но́­жїю но́гъ тво­и́хъ по­кла­нѧ́­ем­сѧ, и҆ про́­симъ про­свѣ­ще́­нїѧ и҆ сп҃се́­нїѧ дꙋ­ша́мъ на́­шымъ.

На стї­хо́в­нѣ стї­хи̑­ры, гла́съ а҃:

Оу҆­ми­ле́­нїе сер­де́цъ и҆ ѡ҆ грѣ­сѣ́хъ по­ка­ѧ́­нїе дне́сь воз­но́­сит­сѧ ѿ хрⷭ҇тї­а́нъ ко прⷭ҇то́­лꙋ пре­чⷭ҇тыѧ дв҃ы: та́ бо ѡ҆ на́съ мо́­литъ хрⷭ҇та̀ бг҃а.

Стӏ́хъ: Слы́­ши, дщѝ, и҆ ви́ждь, и҆ при­кло­нѝ ѹ҆́хо твоѐ.

Про­ре­че́­нїе твоѐ сбы́в­ше­е­сѧ здѣ̀ зри́мъ, влⷣчце: вси́ бо ро́ди тебѐ ра́­дост­нѡ ᲂу҆­бл҃жа́­ютъ. тѣ́м­же воз­зо­ве́мъ тѝ съ првⷣною є҆лї­са­ве́­тою: бл҃го­сло­ве́­на ты̀ въ же­на́хъ, и҆ бл҃го­сло­ве́нъ пло́дъ чре́­ва тво­е­гѡ̀.

Стӏ́хъ: Лицꙋ̀ тво­е­мꙋ̀ по­мо́­лѧт­сѧ бо­га́­тїи лю́д­стїи.

Во­и́­стин­нꙋ бл҃же́­но чре́­во но­си́в­шее тѧ̀, гдⷭ҇и, и҆ сѡсца̀, ꙗ҆̀же є҆сѝ с̾са́лъ: на́мъ же со­вер­ша́­ю­щымъ пра́з­дне­ство тво­еѧ̀ пре­чⷭ҇тыѧ мт҃ре, но­си́­ти тѧ̀ въ серд­ца́хъ на́­шихъ по­мо­зѝ, да и҆ мы̀ бл҃же́н­ства сегѡ̀, по сло́­вꙋ тво­е­мꙋ̀, при­ча­сти́м­сѧ.

Сла́­ва, и҆ ны́нѣ, гла́съ є҃:

Ра́­дꙋй­сѧ, пре­бл҃го­сло­ве́н­наѧ бцⷣе дв҃о: ра́­дꙋй­сѧ, бы́­строе мо­лѧ́­щих­сѧ ᲂу҆­слы́­ша­нїе: ра́­дꙋй­сѧ, бѣ­сѡ́мъ ᲂу҆­стра­ше́­нїе и҆ ка́­ю­щым­сѧ при­бѣ́­жи­ще: ра́­дꙋй­сѧ, и҆с­то́ч­никъ блгⷣти въ чꙋ­до­тво́р­нѣмъ тво­е́мъ ѡ҆́бра­зѣ ла́ѵ­рѣ по­ча́­ев­стѣй да­ро­ва́в­шаѧ.

Тро­па́рь, гла́съ є҃:

Предꙿ ст҃о́ю тво­е́ю і҆кѡ́­ною, влⷣчце, мо­лѧ́­щї­и­сѧ и҆с­цѣ­ле́­нїй спо­доб­лѧ́­ют­сѧ, вѣ́ры и҆́стин­ныѧ по­зна́­нїе прї­е́м­лютъ, и҆ а҆га̑рѧн­скаѧ на­шє́­ствїѧ ѿра­жа́­ютъ. тѣ́м­же и҆ на́мъ, къ тебѣ̀ при­па́­да­ю­щымъ, грѣ­хѡ́въ ѡ҆став­ле́­нїе и҆с­про­сѝ, пѡ́­мы­сла­ми бл҃го­чⷭ҇тїѧ серд­ца̀ на̑ша про­свѣ­тѝ, и҆ къ сн҃ꙋ тво­е­мꙋ̀ мл҃твꙋ воз­не­сѝ ѡ҆ сп҃се́­нїи дꙋ́шъ на́­шихъ.

На вели́цѣй вече́рни.

Бл҃же́нъ мꙋ́жъ: а҃-й а҆н­тї­фѡ́нъ.

На Гдⷭ҇и, воз­зва́хъ: стї­хи̑­ры на и҃, гла́съ є҃:

Прї­и­ди́­те, рѡс­сӏ́й­стїи со­бо́­ри, и҆ ѿ всѣ́хъ ꙗ҆зы̑къ вѣ́р­нїи со­бе­ри́­те­сѧ, на го́рꙋ по­ча́­ев­скꙋю взы́­демъ и҆ въ до́мъ мт҃ре бж҃їѧ, и҆ ѹ҆́зримъ мѣ́­сто сто­пы̀ є҆ѧ̀, и҆дѣ́­же во ѻ҆́гнен­нѣмъ стол­пѣ̀ дре́в­ле ꙗ҆ви́­сѧ, и҆ ѿ и҆с­то́ч­ни­ка, ѿтꙋ́­дꙋ и҆с­те́к­ша­гѡ, вѣ́­рою ѡ҆кро­пле́­нїе прї­и́­мемъ, и҆ чꙋ­до­тво́р­нѣй і҆кѡ́­нѣ є҆ѧ̀ по­кло­ни́м­сѧ, про­ще́­нїѧ пре­грѣ­ше́­нїй на́­шихъ про­сѧ́­ще и҆ дꙋ­ша́мъ на́­шымъ ве́­лїѧ млⷭ҇ти. Два́­жды.

Ко тво­е­мꙋ̀ за­стꙋ­пле́­нїю при­те­ка́­емъ, пре­чⷭ҇таѧ, и҆ чꙋ­де­са̀, во ѻ҆би́­те­ли по­ча́­ев­стѣй ѿ тебє̀ бы̑в­шаѧ, вос­пѣ­ва́­емъ: и҆с­цѣ­лє́­нїѧ бо здѣ̀ слѣ­пӏ́и и҆ хро́­мїи ра́­дост­нѡ прї­и­ма́­хꙋ, бѣ­снӏ́и сво­бо­жда́­хꙋ­сѧ, и҆ ме́р­твїи во­скре­со́­ша, и҆ нѣ́сть та­ко­ва́­гѡ же­сто́­ка­гѡ срⷣца, є҆́же зрѣ́­нї­емъ ст҃ы́­ни тво­еѧ̀ не ᲂу҆­ми­ли́т­сѧ. но ᲂу҆­твер­дѝ, все­пѣ́­таѧ, бл҃го́е и҆з­во­ле́­нїе мо­лѧ́­щих­сѧ тебѣ̀, и҆ по­да́ждь дꙋ­ша́мъ на́­шымъ ве́­лїю млⷭ҇ть.

Ра́­дꙋй­сѧ, блгⷣт­наѧ бцⷣе, твоѐ ста́­до ѿ нб҃съ на­зи­ра́­ю­щи, ѿ а҆гг҃лъ ѹ҆́бѡ пѣ́­нїе прї­е́м­лю­щи, ѿ на́съ же и҆з­ли­ва́­є­мыѧ ᲂу҆­ми­лє́н­ныѧ сле́­зы ви́­дѧ­щи и҆ мл҃твєн­наѧ воз­ды­ха̑­нїѧ дꙋ́шъ на́­шихъ слы́­ша­щи: сїѧ̑ бо па́че ви­тӏ́й­ства сло­ве́с­на­гѡ на млⷭ҇рдїе тебѐ пре­кло­нѧ́­ютъ, во є҆́же по­да́­ти дꙋ­ша́мъ на́­шымъ ве́­лїю млⷭ҇ть.

Гла́съ в҃:

Твою̀ і҆кѡ́­нꙋ цѣ­лꙋ́­ю­ще, влⷣчце, и҆ слѣ́­дꙋ сто­пы̀ тво­еѧ̀ по­кла­нѧ́­ю­ще­сѧ, и҆ за­стꙋплє́­нїѧ твоѧ̑ мнѡ́­гаѧ по­ми­на́­ю­ще, до­сто́й­ныхъ сло­ве́съ ѡ҆ про­слав­ле́­нїи тебє̀ не ѡ҆брѣ­та́­емъ: но бл҃го­го­вѣ̑й­ныѧ сле́­зы тебѣ̀ въ мол­ча́­нїи при­но­сѧ́­ще, а҆́ки на нб҃сѝ себѐ мни́мъ тво­е́й сла́­вѣ пред­сто­ѧ́­щыѧ: сп҃сѝ тебѐ ве­ли­ча́­ю­щыѧ. Два́­жды.

На горѣ̀ ѳа­вѡ́р­стѣй пе́тръ со дрꙋ́­ги гдⷭ҇не пре­ѡ­бра­же́­нїе ви́­дѣвъ, и҆ лѣ́­по­тою сла́­вы є҆гѡ̀ ᲂу҆­сла­жда́­ѧ­сѧ, та́кѡ во­пї­ѧ́­ше є҆мꙋ̀: гдⷭ҇и, до­бро̀ є҆́сть на́мъ здѣ̀ бы́ти. си­це­вы́й же гла­го́лъ рце́мъ, бра́­тїе, на го́рꙋ ꙗ҆в­ле́­нїѧ мт҃ре бж҃їѧ со­бра́в­ше­сѧ, и҆ пре­ѡ­бра­же́­нїе сла́­вы є҆ѧ̀ здѣ̀ бы́в­шее по­мыш­лѧ́­ю­ще, и҆ во ᲂу҆­ми­ле́­нїи во­пї­ю́­ще къ не́й: сп҃сѝ тебѐ ве­ли­ча́­ю­щыѧ.

На ска­лѣ̀ пꙋ­сты́н­нѣй пе́р­вѣе ꙗ҆ви́­ла­сѧ є҆сѝ, влⷣчце, свѣ́­томъ ѻ҆гнѧ̀ про­свѣ­ще́­нїе вѣ́р­ныхъ здѣ̀ про­ѡ­бра­зꙋ́­ю­щи и҆ кꙋ­пи­нꙋ̀ не­ѡ­па­ли́­мꙋю на па́­мѧть лю́­демъ при­во­дѧ́­щи: по­то́м­же съ нб҃съ ви­дѣ́­нїе тво­е­гѡ̀ за­стꙋ­пле́­нїѧ и҆́но­кѡмъ по­ча́­єв­скимъ ꙗ҆ви́­ла є҆сѝ, ꙗ҆́кѡ по­кро́въ тво́й, а҆н­дре́­емъ дре́в­ле ви́­дѣн­ный. на́съ же мо­лѧ́­щих­сѧ свѣ́­томъ ѡ҆за­рѝ дх҃о́в­нымъ, и҆ сп҃сѝ тебѐ ве­ли­ча́­ю­щыѧ.

Сла́­ва, и҆ ны́нѣ, гла́съ то́й­же:

Не­про­хо­ди̑­маѧ вра­та̀, та́й­нѡ за­пе­ча́т­ство­ван­наѧ, бл҃го­сло­ве́н­наѧ бцⷣе дв҃о, прї­и­мѝ мо­лє́­нїѧ на̑ша, и҆ при­не­сѝ тво­е­мꙋ̀ сн҃ꙋ и҆ бг҃ꙋ, да сп҃се́тъ то­бо́ю дꙋ́шы на́шѧ.

Вхо́дъ, про­кӏ́­менъ днѐ, и҆ чтє́­нїѧ г҃.

Бы­тїѧ̀ чте́­нїе:

И҆зы́­де і҆а́­кѡвъ ѿ стꙋ­ден­ца̀ клѧ́т­вен­на­гѡ, и҆ и҆́де въ хар­ра́нь. И҆ ѡ҆брѣ́­те мѣ́­сто, и҆ спа̀ та́мѡ: за́й­де бо со́лн­це. и҆ взѧ́тъ ѿ ка́­ме­нїѧ мѣ́­ста тогѡ̀, и҆ по­ло­жѝ воз­гла́­вїе себѣ̀, и҆ спа̀ на мѣ́­стѣ ѻ҆́номъ. И҆ со́нъ ви́дѣ: и҆ сѐ лѣ́­стви­ца ᲂу҆­твер­жде́­на на зе­млѝ, є҆ѧ́же гла­ва̀ до­сѧ­за́­ше до не­бе́съ, и҆ а҆́гг҃ли бж҃їи вос­хо­жда́­хꙋ и҆ низ­хо­жда́­хꙋ по не́й. Гдⷭ҇ь же ᲂу҆­твер­жда́­ше­сѧ на не́й, и҆ речѐ: а҆́зъ бг҃ъ а҆вра­а́­мовъ, ѻ҆тца̀ тво­е­гѡ̀, и҆ бг҃ъ і҆са­а́­ковъ, не бо́й­сѧ: зе­млѧ̀, и҆дѣ́­же ты̀ спи́­ши на не́й, тебѣ̀ да́мъ ю҆̀, и҆ сѣ́­ме­ни тво­е­мꙋ̀. И҆ бꙋ́­детъ сѣ́мѧ твоѐ ꙗ҆́кѡ пе­со́къ зем­ны́й, и҆ рас­про­стра­ни́т­сѧ на мо́ре, и҆ лі́вꙋ, и҆ сѣ́­веръ, и҆ на во­сто́­ки: и҆ воз­бл҃го­сло­вѧ́т­сѧ ѡ҆ тебѣ̀ всѧ̑ ко­лѣ̑­на зем­на̑ѧ, и҆ ѡ҆ сѣ́­ме­ни тво­е́мъ. И҆ сѐ а҆́зъ съ то­бо́ю, со­хра­нѧ́­ѧй тѧ̀ на всѧ́­комъ пꙋтѝ, а҆́мо­же а҆́ще по́й­деши, и҆ воз­вра­щꙋ́ тѧ въ зе́­млю сїю̀: ꙗ҆́кѡ не и҆́мамъ тебѐ ѡ҆ста́­ви­ти, до́н­де­же со­тво­ри́­ти мѝ всѧ̑, є҆ли̑­ка гла­го́­лахъ тебѣ̀. И҆ во­ста̀ і҆а́­кѡвъ ѿ сна̀ сво­е­гѡ̀, и҆ речѐ: ꙗ҆́кѡ є҆́сть гдⷭ҇ь на мѣ́­стѣ се́мъ, а҆́зъ же не вѣ́­дѣхъ. И҆ ᲂу҆­бо­ѧ́­сѧ, и҆ речѐ: ꙗ҆́кѡ стра́ш­но мѣ́­сто сїѐ: нѣ́сть сїѐ, но до́мъ бж҃їй, и҆ сїѧ̑ вра­та̀ нбⷭ҇наѧ.

И҆с­хо́­да чте́­нїе:

Вни́­де мѡ­ѷ­се́й въ го́рꙋ бж҃їю хѡ­ри́въ. Ꙗ҆ви́ же сѧ є҆мꙋ̀ а҆гг҃лъ гдⷭ҇ень въ пла́­ме­ни ѻ҆́гнен­нѣ и҆зꙿ кꙋ­пи­ны̀: и҆ ви́дѣ, ꙗ҆́кѡ кꙋ­пи­на̀ го­рѧ́­ше ѻ҆гне́мъ, и҆ кꙋ­пи­на̀ не сга­ра́­ше. Рече́ же мѡ­ѷ­се́й: пре­ше́́дъ ᲂу҆­зрю̀ ви­дѣ́­нїе ве­ли́­кое сїѐ, что̀ ꙗ҆́кѡ не сга­ра́­етъ кꙋ­пи­на̀; Ꙗ҆́ко­же ви́дѣ гдⷭ҇ь, ꙗ҆́кѡ при­стꙋ­па́­етъ ви́­дѣ­ти, при­зва̀ є҆го̀ гдⷭ҇ь и҆зꙿ кꙋ­пи­ны̀, гла­го́­лѧ: мѡ­ѷ­се́е, мѡ­ѷ­се́е. Ѻ҆́нъ же речѐ: что̀ є҆́сть; И҆ речѐ: не при­бли́­жи­сѧ сѣ́мѡ: и҆зꙋ́й са­по́гъ ѿ ногꙋ̀ тво­є́ю: мѣ́­сто бо, на не́м­же ты̀ сто­и́­ши, зе­млѧ̀ ст҃а̀ є҆́сть. И҆ речѐ є҆мꙋ̀: а҆́зъ є҆́смь бг҃ъ ѻ҆тца̀ тво­е­гѡ̀, бг҃ъ а҆вра­а́­мовъ, и҆ бг҃ъ і҆са­а́­ковъ, и҆ бг҃ъ і҆а́­кѡвль. Ѿвра­ти́ же мѡ­ѷ­се́й лицѐ своѐ: сты­дѧ́­ше бо сѧ зрѣ́­ти предꙿ бг҃омъ. Рече́ же гдⷭ҇ь къ мѡ­ѷ­се́ю: ви́дѧ ви́­дѣхъ ѡ҆ѕло­бле́­нїе лю­де́й мо­и́хъ, и҆́же во є҆гѵ́­птѣ, и҆ во́пль и҆́хъ ᲂу҆­слы́­шахъ ѿ на­си́ль­ствꙋ­ю­щихъ въ дѣ́­лѣхъ: вѣ́мъ бо бо­лѣ́знь и҆́хъ, и҆ сни­до́хъ є҆́же и҆зꙿѧ́­ти и҆́хъ ѿ рꙋкѝ є҆гѵ́­птѧнъ, и҆ и҆з­ве­стѝ и҆́хъ ѿ зе­млѝ ѻ҆́ныѧ, и҆ вве­стѝ и҆̀хъ въ зе́­млю бл҃гꙋ и҆ мно́­гꙋ, въ зе́­млю то­ча́­щꙋ ме́дъ и҆ мле­ко̀.

Прⷪ҇ро́­че­ства і҆е­зе­кӏ́­и­ле­ва чте́­нїе:

Та́кѡ гла­го́­летъ гдⷭ҇ь: бꙋ́­детъ ѿ днѐ ѻ҆сма́­гѡ и҆ про́­чее, со­тво­рѧ́тъ і҆е­рє́и на ѻ҆л­та­рѝ все­сож­же́­нїѧ ва́­ше­гѡ, и҆ ꙗ҆̀же сп҃се́­нїѧ ва́­ше­гѡ, и҆ прї­и­мꙋ́ вы, гла­го́­летъ а҆дѡ­наі̀ гдⷭ҇ь. И҆ ѡ҆б­ра­ти́ мѧ на пꙋ́ть вра́тъ ст҃ы́хъ внѣ́ш­нихъ, зрѧ́­щихъ на во­сто́­ки: и҆ сїѧ̑ бѧ́хꙋ за­тво­рє́­на. И҆ речѐ гдⷭ҇ь ко мнѣ̀: вра­та̀ сїѧ̑ за­тво­рє́­на бꙋ́­дꙋтъ, и҆ не ѿве́р­зꙋт­сѧ, и҆ ни­кто́­же про́й­детъ скво­зѣ̀ и҆̀хъ, ꙗ҆́кѡ гдⷭ҇ь бг҃ъ і҆и҃левъ про́й­детъ и҆́ми, и҆ бꙋ́­дꙋтъ за­тво­рє́­на. Ꙗ҆́кѡ и҆гꙋ́­менъ сѧ́­детъ въ ни́хъ снѣ́­сти хлѣ́бъ, по пꙋтѝ є҆ла́м­скихъ вра́тъ вни́­детъ, и҆ по пꙋтѝ є҆гѡ̀ и҆зы́­детъ. И҆ вве­де́ мѧ по пꙋтѝ вра́тъ ст҃ы́хъ, сꙋ́­щихъ къ сѣ́­ве­рꙋ, прѧ́­мѡ хра́­мꙋ, и҆ ви́­дѣхъ, и҆ сѐ и҆с­по́лнь сла́­вы хра́мъ гдⷭ҇ень.

На лї­тӏ́и стї­хи́­ра хра́­ма, и҆ бцⷣы, гла́съ ѕ҃:

Стрꙋи̑ и҆с­цѣ­ле́­нїй все­гда̀ и҆с­то­ча́­е­ши, дв҃о, вѣ́р­нымъ, при­те­ка́­ю­щымъ къ цѣль­бо­но́с­нѣй сто­пѣ̀ тво­е́й, бг҃о­не­вѣ́­сто! тꙋ́не бо и҆з­ли­ва́­е­ши ѿ неѧ̀ ѻ҆би́ль­нѡ и҆ бо­га́т­нѡ не­дꙋ́­гꙋ­ю­щымъ и҆с­цѣ­лє́­нїѧ: слѣ­пы̑ѧ ꙗ҆в­лѧ́­е­ши ви́­дѧ­щѧ ꙗ҆́снѡ, при­те­ка́­ю­щыѧ къ тебѣ̀ хро­мы̑ѧ мнѡ́­гїѧ и҆с­пра́­ви­ла є҆сѝ, и҆ раз­сла́б­лєн­ныѧ стѧ­гнꙋ́­ла є҆сѝ, по­да­ю́­щи все́мъ ꙗ҆̀же ко сп҃се́­нїю про­шє́­нїѧ, и҆ дꙋ­ша́мъ на́­шымъ ве́­лїю млⷭ҇ть.

Прї­и­ди́­те, праз­дно­лю́б­цы, чꙋ́д­ное ꙗ҆в­ле́­нїе і҆кѡ́­ны бж҃їѧ мт҃ре, є҆́же на горѣ̀ по­ча́­ев­стѣй, про­сла́­вимъ: пре­сла́в­нѡ бо и҆ бг҃о­лѣ́п­нѡ во ѻ҆би́­те­ли по­ча́­ев­стѣй воз­сїѧ̀, не­и­сто­щи́­мꙋю чꙋ­де́съ блгⷣть всѣ̑мъ и҆з­ли­ва́­ю­щи. тѣ́мъ ᲂу҆­сты̀ и҆ серд­цы̀, и҆ пѣ́снь­ми, и҆ пѣ́­нїи дх҃о́в­ны­ми, се́й ст҃ы́й де́нь со всѣ́­ми, на го́рꙋ по­ча́­ев­скꙋю при­те­ка́­ю­щи­ми, пра́з­днꙋ­емъ свѣ́т­лѡ.

Сла́­ва, и҆ ны́нѣ, гла́съ то́й­же:

Вос­по́й­те, рѡс­сӏ́й­стїи на­ро́­ди, цр҃и́­цѣ бж҃ї­ей мт҃ри пѣ́снь но́вꙋ, со­дѣ́­ѧв­шей чꙋ́до, но­вѣ́й­шее всѣ́хъ дре́в­нихъ чꙋ­де́съ, на горѣ̀ по­ча́­ев­стѣй: си̑ль­ныѧ бо со­крꙋ­шѝ, стрѣ́­лы а҆га̑рѧн­скїѧ, на ню̀ ѿ та­та́ръ на­прав­лѧ́­є­мыѧ, на гла­вꙋ̀ и҆́хъ вспѧ́ть ѡ҆б­ра­ща́­ю­щи: не­мощ­ны̑ѧ же пре­по­ѧ́­са си́­лою свы́­ше, и҆ воз­не­сѐ сми­рє́н­ныѧ. то́й по­бѣ­ди́­тєль­наѧ воз­сы­ла́­емъ, и҆ при­па́­да­ю­ще во­пї­е́мъ: за­стꙋ́п­ни­це на́ша ᲂу҆­се́рд­наѧ, мт҃и гдⷭ҇а вы́ш­нѧ­гѡ, сла́­ва тебѣ̀.

На стї­хо́в­нѣ стї­хи̑­ры, гла́съ г҃:

Кто̀ воз­гла­го́­летъ си̑лы твоѧ̑, бцⷣе, цѣль­бо­но́с­ный по­ча́­ев­скїй и҆с­то́ч­ни­че; не­и­сто­щи́­мы­ми бо да­ро­ва̑­нїи и҆зꙿѻ­би́­лꙋ­ю­щи, мнѡ́­гаѧ и҆ па́че є҆сте­ства̀ со­дѣ­ва́­е­ши и҆с­цѣ­лє́­нїѧ, не то́­кмѡ тѣ­лє́с­ныѧ бо­лѣ̑­зни вра­чꙋ́­ю­щи, но и҆ дꙋ­шє́в­ныѧ стра̑­сти на́шѧ и҆з­мы­ва́­ю­щи, и҆ всѣ̑мъ по­да­е́­ши ве́­лїю млⷭ҇ть.

Стӏ́хъ: Слы́­ши, дщѝ, и҆ ви́ждь, и҆ при­кло­нѝ ѹ҆́хо твоѐ.

Тво­и́­ми чꙋ­де­сы̀, бцⷣе, не­вѣ́р­нїи ᲂу҆­ми­ли́в­ше­сѧ, пра­во­сла́в­нꙋю вѣ́рꙋ и҆с­по­вѣ́­да­хꙋ, и҆ є҆ре­тї­цы̀ ѿ є҆́ре­си ѿре­ко́­ша­сѧ и҆ ко ста́­дꙋ цр҃ко́в­но­мꙋ со­при­ч­то́­ша­сѧ, бѣ­снӏ́и ѿ мꙋ­чи́­тель­ства де́­мо­нѡвъ сво­бо­жда́­хꙋ­сѧ, и҆ же­стѡ́­каѧ серд­ца̀ сми­ри́­ша­сѧ. ᲂу҆̀бо и҆ дꙋ́шы на́шѧ по­ка­ѧ́­нї­емъ про­свѣ­тѝ, по­да­ю́­щи на́мъ ве́­лїю млⷭ҇ть.

Стӏ́хъ: Лицꙋ̀ тво­е­мꙋ̀ по­мо́­лѧт­сѧ бо­га́­тїи лю́д­стїи.

По и҆з­ба­вле́­нїи ѿ не­вѣ́р­ныхъ тво­еѧ̀ ла́ѵ­ры, влⷣчце, і҆кѡ́­нꙋ твою̀ пра­во­сла́в­нїи лю́­дїе ра́­дост­нѡ прї­ѧ́­ша, ꙗ҆́ко­же дре́в­ле жи­во­тво­рѧ́­щїй крⷭ҇тъ сн҃а тво­е­гѡ̀ ѿ плѣ­не́­нїѧ пе́рсска­гѡ: тѣ́м­же и҆с­цѣ­лє́­нїѧ ѿ неѧ̀ бы­ва́­є­маѧ та́­ко­жде ᲂу҆­мно́­жи­ша­сѧ, и҆́хже не лишѝ и҆ на́съ мо­лѧ́­щихъ ти сѧ, по­да­ю́­щи дꙋ­ша́мъ на́­шымъ ми́ръ и҆ ве́­лїю млⷭ҇ть.

Сла́­ва, и҆ ны́нѣ, гла́съ и҃:

Сѣ­дѧ́й на хе­рꙋ­вӏ́­мѣхъ и҆ пѣ­ва́­е­мый ѿ се­ра­фі̑мъ, и҆зꙿ ᲂу҆­тро́­бы дв҃ы бл҃го­во­лѝ ро­ди́­ти­сѧ, и҆ сїю̀, ꙗ҆́кѡ мт҃рь бж҃їю, въ мл҃твꙋ при­зы­ва́­ти на́съ на­ꙋ­чѝ, пе́р­вѣе въ ка́нѣ га­лї­ле́й­стѣй, тоѧ̀ мо­лє́­нїѧ ѡ҆ лю́­дехъ прї­е́­мый, и҆ до­ны́­нѣ мл҃твъ є҆ѧ̀ ра́ди про­шє́­нїѧ на̑ша и҆с­пол­нѧ́­ѧй. прї­и­ди́­те ᲂу҆̀бо, хрⷭ҇то­и­ме­ни́­тїи лю́­дїе, на мѣ́­сто чꙋ­де́съ пре­ст҃ы́ѧ бцⷣы, и҆ мо­лє́­нїѧ ва̑ша предꙿ і҆кѡ́­ною є҆ѧ̀ и҆з­ли­ва́­ю­ще, не­со­мнѣ́н­ною вѣ́­рою ᲂу҆­твер­ди́­те­сѧ, є҆́же прї­ѧ́­ти на́мъ ѿ неѧ̀ ве́­лїю млⷭ҇ть.

На ѹ҆́трени.

На Бг҃ъ гдⷭ҇ь: тро­па́рь бцⷣы, три́­жды.

По а҃-мъ стї­хо­сло́­вїи сѣ­да́­ленъ, гла́съ д҃:

Бцⷣа хрⷭ҇тї­а́­нѡмъ все­гда̀ бы́сть млⷭ҇ти­ваѧ ᲂу҆­слы́­ша­тель­ни­ца, ѿ ко­нє́цъ зе­млѝ къ не́й воз­но­сѧ́­щымъ мл҃твєн­ныѧ гла́­сы, по­ча́­ев­скꙋю же го́рꙋ ꙗ҆́кѡ мѣ́­сто ꙗ҆в­ле́­нїй сво­и́хъ и҆з­бра̀, и҆ сегѡ̀ ра́ди здѣ̀ бы́ти по­спѣ­ша́­ютъ хрⷭ҇тї­а́­не: и҆́хже мо­лє́­нїѧ не ѿвра­тѝ, влⷣчце, но и҆ првⷣнымъ и҆ грѣ̑ш­нымъ бꙋ́ди хо­да́­та­и­ца.

Сла́­ва, и҆ ны́нѣ, то́й­же.

По в҃-мъ стї­хо­сло́­вїи сѣ­да́­ленъ, гла́съ з҃:

Ѿве́р­зи вра­та̀ твоѧ̑, ст҃а́ѧ ла́ѵ­ро по­ча́­ев­скаѧ, и҆ прї­и­мѝ при­хо­дѧ́­щыѧ без­чи́­слєн­ныѧ на­ро́­ды, ст҃ꙋ́ю і҆кѡ́­нꙋ влⷣчцы ѡ҆б­ло­бы­за́­ти ᲂу҆­ми­ле́н­нѡ тща́­щы­ѧ­сѧ, и҆ вкꙋ́­пѣ со бра́­тї­ею мо­на́­ше­ствꙋ­ю­щихъ ᲂу҆сє́рд­наѧ мо­лє́­нїѧ воз­но­сѧ́­щыѧ ко хрⷭ҇тꙋ̀ бг҃ꙋ, да мл҃тва­ми при­сно­дв҃ы, мт҃ре сво­еѧ̀, млⷭ҇тивъ бꙋ́­детъ ра­бѡ́мъ сво­и̑мъ.

Сла́­ва, и҆ ны́нѣ, то́й­же.

По­лѷ­е­ле́й, и҆ ве­ли­ча́­нїе:

Ве­ли­ча́­емъ тѧ̀, пре­ст҃а́ѧ дв҃о, и҆ по­чи­та́­емъ чⷭ҇тнꙋ́ю і҆кѡ́­нꙋ твою̀, ю҆́же ѿ лѣ́тъ дре́в­нихъ на горѣ̀ по­ча́­ев­стѣй про­сла́­ви­ла є҆сѝ.

Ѱа­ло́мъ и҆з­бра́н­ный: По­мѧ­нѝ, гдⷭ҇и, дв҃да и҆ всю̀ кро́­тость є҆гѡ̀.

По по­лѷ­е­ле́и сѣ­да́­ленъ, гла́съ ѕ҃:

Дне́сь ѡ҆ всѣ́хъ чꙋ­де­сѣ́хъ тво­и́хъ, влⷣчце, на горѣ̀ по­ча́­ев­стѣй бы́в­шихъ, бл҃го­да­рє́­нїѧ тѝ цр҃ковь при­но́­ситъ. тѣ́м­же со­ше́д­шы­ѧ­сѧ лю́ди твоѧ̑ ѿ нб҃съ бл҃го­сло­вѝ, ра́з­ꙋмъ на́шъ ᲂу҆цѣ­ло­мꙋ́­дри, и҆ жи­тїѐ на́ше и҆с­пра́­ви­ти по­мо­зѝ, и҆ ѡ҆ сп҃се́­нїи дꙋ́шъ на́­шихъ мо­ле́­нїе къ бг҃ꙋ воз­не­сѝ, мо́­лимъ ти сѧ.

Сла́­ва, и҆ ны́нѣ, то́й­же.

Та́же сте­пє́н­на, а҃-й а҆н­тї­фѡ́нъ д҃-гѡ гла́­са.

Про­кӏ́­менъ, гла́съ д҃: По­мѧ­нꙋ̀ и҆мѧ твоѐ во всѧ́­комъ ро́дѣ и҆ ро́дѣ.

Стӏ́хъ: Слы́­ши, дщѝ, и҆ ви́ждь, и҆ при­кло­нѝ ѹ҆́хо твоѐ.

Є҆ѵⷢ҇лїе ѿ лꙋкѝ, за­ча́­ло д҃:

По н҃-мъ ѱал­мѣ̀: Мл҃тва­ми бцⷣы:

Та́же стї­хи́­ра, гла́съ є҃:

Прї­и­ди́­те, рѡс­сӏ́й­стїи со­бо́­ри, и҆ ѿ всѣ́хъ ꙗ҆зы̑къ вѣ́р­нїи со­бе­ри́­те­сѧ, на го́рꙋ по­ча́­ев­скꙋю взы́­демъ и҆ въ до́мъ мт҃ре бж҃їѧ, и҆ ѹ҆́зримъ мѣ́­сто сто­пы̀ є҆ѧ̀, и҆дѣ́­же во ѻ҆́гнен­нѣмъ стол­пѣ̀ дре́в­ле ꙗ҆ви́­сѧ, и҆ ѿ и҆с­то́ч­ни­ка, ѿтꙋ́­дꙋ и҆с­те́к­ша­гѡ, вѣ́­рою ѡ҆кро­пле́­нїе прї­и́­мемъ, и҆ чꙋ­до­тво́р­нѣй і҆кѡ́­нѣ є҆ѧ̀ по­кло­ни́м­сѧ, про­ще́­нїѧ пре­грѣ­ше́­нїй на́­шихъ про­сѧ́­ще и҆ дꙋ­ша́мъ на́­шымъ ве́­лїѧ млⷭ҇ти.

Ка­нѡ́нъ бцⷣѣ, є҆гѡ́­же кра­е­гра­не́­сїе: Бцⷣе по­ча́­ев­скаѧ, сп҃сѝ и҆ со­хра­нѝ пра­во­сла́в­нꙋю рꙋ́сь.

Гла́съ и҃. Пѣснь а҃.

І҆р­мо́съ: По­и́мъ гдⷭ҇е­ви, про­ве́д­ше­мꙋ лю́ди своѧ̑ скво­зѣ̀ черм­но́е мо́ре, ꙗ҆́кѡ є҆ди́нъ сла́в­нѡ про­сла́­ви­сѧ.

Бж҃їю мт҃рь вос­по­и́мъ, вѣ́р­нїи, мо­лє́­нїѧ къ не́й при­но­сѧ́­ще и҆ чꙋ­до­тво́р­но­мꙋ є҆ѧ̀ ѡ҆́бра­зꙋ по­кла­нѧ́­ю­ще­сѧ вѣ́­рою и҆ лю­бо́­вїю.

Ѽ влⷣчце, ᲂу҆­бо́­гїѧ хва­лы̀ на́­шеѧ не ѿве́р­жи и҆ грѣ­хо́в­ныѧ ни­ще­ты̀ не воз­гнꙋ­ша́й­сѧ, но при­па́­да­ю­щыѧ лю́ди прї­и­мѝ, ꙗ҆́кѡ, бл҃га́ѧ, бл҃га́­гѡ же ро­ди́­тель­ни­ца.

Гора̀ по­ча́­ев­скаѧ, пре́­жде те́м­наѧ и҆ без­вѣ́ст­наѧ, ꙗ҆в­ле́­нї­емъ тво­и́мъ, влⷣчце, сї­на́ю ᲂу҆­по­до́­би­сѧ: та́мѡ бо ѻ҆́гнь, кꙋ­пи­нꙋ̀ не па­лѧ́й, тебѐ про­ѡ­бра­зо­ва́­ше, здѣ̀ же сама̀, во ѻ҆гнѝ зри́­маѧ, хрⷭ҇тї­а́­нѡмъ ꙗ҆ви́­ла­сѧ є҆сѝ.

Ѻ҆́чи ва́ши бл҃же́­ни, Ѽ па́­сты­рїе ѻ҆́в­чїи, влⷣчцꙋ на горѣ̀ по­ча́­ев­стѣй ᲂу҆­зрѣ́в­шїи и҆ тѣ́мъ ча́­сти ви­ѳле­е́м­скихъ па́­сты­рей спо­до́бль­шї­и­сѧ: тѣ́м­же ᲂу҆̀бо бл҃же́­ни сꙋ́ть хрⷭ҇тї­а́­не сегѡ̀ не ви́­дѣв­шїи, но вѣ́­рою мѣ́­стꙋ томꙋ̀ по­кла­нѧ́­ю­щї­и­сѧ.

Ро́ди рѡс­сӏ́й­стїи и҆ ѿ всѧ́­ка­гѡ ꙗ҆зы́­ка вѣ́р­нїи, со­ше́д­ше­сѧ къ мѣ́­стꙋ ꙗ҆в­ле́­нїѧ влⷣчцы, чꙋ­до­тво́р­но­мꙋ є҆ѧ̀ ѡ҆́бра­зꙋ по­кло­ни́м­сѧ, и҆ ѡ҆ сво­и́хъ со­грѣ­ше́­нї­ихъ вос­пла́­чемъ, ѡ҆ млⷭ҇рдїи же гдⷭ҇ни воз­ра́­дꙋ­ем­сѧ.

Ѻ҆́гнен­ный сто́лпъ, влⷣчце, тебѐ и҆́но­кѡмъ и҆ па́­сты­рємъ ꙗ҆в­лѧ́­ше: на́мъ же ѻ҆́гнь ре́­вно­сти вло­жѝ въ дꙋ́шꙋ, є҆́же вѣ́рꙋ и҆́стин­нꙋю хра­ни́­ти, ѿ всѧ́­ка­гѡ же гла­го́­ла є҆ре­тӏ́­че­ска­гѡ ѿвра­ща́­ти­сѧ, и҆ грѣ­хо́в­нꙋю ѿрѣ­ва́­ти пре́­лесть ѿ сер­де́цъ на́­шихъ.

Ка­та­ва́­сїа: Ѿве́р­зꙋ ᲂу҆­ста̀ моѧ̑:

Пѣснь г҃.

І҆р­мо́съ: Ты̀ є҆сѝ ᲂу҆­твер­жде́­нїе при­те­ка́­ю­щихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мра­че́н­ныхъ, и҆ по­е́тъ тѧ̀ дꙋ́хъ мо́й.

Да́ръ сщ҃е́н­ный, стран­но­прї­и́м­ства мздꙋ̀, прї­ѧ́тъ хрⷭ҇то­лю­би́­ваѧ а҆́нна і҆кѡ́­нꙋ твою̀, влⷣчце, рꙋ­ко́ю ст҃и́­те­лѧ, ѿ не­ѧ́­же и҆с­цѣ­ле́­нїе бра́­тꙋ сво­е­мꙋ̀ слѣ́­пꙋ ро­жде́­нꙋ ви́­дѣв­ши, сїю̀ во ѻ҆би́­тель по­ча́­ев­скꙋю на ѻ҆́бщꙋю по́ль­зꙋ да́рствꙋ­етъ.

І҆кѡ́­нꙋ по­ча́­ев­скꙋю пре­чⷭ҇тыѧ бцⷣы ло­бы­за́­имъ, вѣ́р­нїи, и҆ по­ка­ѧ́­нїе ѡ҆ грѣ­сѣ́хъ на́­шихъ при­не́с­ше, здра́­вїѧ и҆ ѿ нꙋ́ждъ и҆з­ба­вле́­нїѧ и҆ во всѣ́хъ бл҃ги́хъ на­чи­на́­нї­ихъ по́­мо­щи ѿ влⷣчцы вос­про́­симъ.

Цвѣ́тъ пре­кра́с­ный на дре́­вѣ бл҃го­сѣн­но­ли́­ствен­нѣмъ ꙗ҆ви́­сѧ чꙋ­до­тво́р­наѧ і҆кѡ́­на бцⷣы на ст҃ѣ́й горѣ̀ по­ча́­ев­стѣй: про­си́­те, вѣ́р­нїи, и҆ да́ст­сѧ ва́мъ, по гла­го́­лꙋ хрⷭ҇то́­вꙋ, млⷭ҇рдїѧ да́ръ, жи­тїю̀ ва́­ше­мꙋ по­тре́б­ный.

Є҆́же вре́­мен­но­мꙋ жи­тїю̀ по­тре́б­но бы­ва́­етъ, Ѽ бра́­тїе, вма́­лѣ по­ле́з­но є҆́сть: и҆ сїѧ̑ да́рствꙋ­етъ на́мъ гдⷭ҇ь, по мл҃твѣ мт҃ре сво­еѧ̀. ѻ҆ба́­че тер­пѧ́­щыѧ па́че си́хъ бл҃жи́тъ и҆ вѣ́ч­ною ра́­до­стїю на нб҃сѝ на­гра­жда́­етъ: ю҆́же на́мъ да­ро­ва́­ти, влⷣчце, по­мо­ли́­сѧ.

По­ча́­ев­скаѧ це́р­ковь, чꙋ­до­тво́р­ный слѣ́дъ сто­пы̀ тво­еѧ̀, бцⷣе, по­кры­ва́­ю­щаѧ и҆ і҆кѡ́­нꙋ твою̀ хра­нѧ́­щаѧ, а҆́ки нбⷭ҇ный вхо́дъ вѣ̑р­нымъ ꙗ҆в­лѧ́­ет­сѧ, въ не́й­же мо­лѧ́­щым­сѧ по­мо­зѝ, Ѽ влⷣчце, зем­на̑ѧ по­пе­чє́­нїѧ ѿло­жи́­ти, и҆ є҆ди́­на­гѡ, є҆́же на по­тре́­бꙋ, же­ла́­ти, и҆ въ мл҃твѣ те́­плѣ про­си́­ти.

Ѽле без­ꙋ́­мїѧ і҆кѡно­бо́р­цєвъ, и҆́же і҆кѡ́­нꙋ твою̀, влⷣчце, ѿ по­ча́­ев­скїѧ ѻ҆би́­те­ли плѣ­ни́­ша, и҆ по­рꙋ­га́­нїю пре­да­ю́­ще, ка́рꙋ бж҃їю а҆́бїе на сѧ̀ на­ве­до́­ша, бѣ­сно­ва́­нї­емъ же ѡ҆б­ли­че́­нѣ бы́в­шей женѣ̀, ѹ҆́жа­сомъ мно́­гимъ со­дер­жа́­хꙋ­сѧ.

Сѣ­да́­ленъ, гла́съ ѕ҃:

Рѣка̀ ѻ҆би́ль­нѡ те­кꙋ́­щаѧ по­ко́ю не на­вы́­че, нижѐ пре­ста́­ти ѿ те­че́­нїѧ вод­на́­гѡ воз­мо́­жетъ: та́кѡ и҆ мо­лє́­нїѧ твоѧ̑, влⷣчце, ѡ҆ лю́­дехъ при́­снѡ воз­но­си̑­маѧ, не пре­ста­ю́тъ, но првⷣныѧ ѿ па­де́­нїй хра­нѧ́тъ, па́д­шыѧ же на по­ка­ѧ́­нїе воз­став­лѧ́­ютъ: на́мъ же, тво­е­мꙋ̀ ѡ҆́бра­зꙋ по­кла­нѧ́­ю­щым­сѧ, сꙋ­гꙋ́­бꙋю ᲂу҆­ми­ле́­нїѧ блгⷣть да́­рꙋ­ютъ, и҆ во­пи́­ти тебѣ̀ со а҆р­ха́гг҃ломъ и҆ є҆лї­са­ве́­тою воз­дви­за́­ютъ: бл҃го­сло­ве́­на ты̀ є҆сѝ въ же­на́хъ, и҆ тво­е­гѡ̀ чре́­ва пло́дъ бл҃го­сло­ве́нъ є҆́сть.

Сла́­ва, и҆ ны́нѣ, то́й­же.

Пѣ́снь д҃.

І҆р­мо́съ: Оу҆­слы́­шахъ, гдⷭ҇и, смо­тре́­нїѧ тво­е­гѡ̀ та́­ин­ство, раз­ꙋ­мѣ́хъ дѣла̀ твоѧ̑, и҆ про­сла́­вихъ твоѐ бж҃е­ство̀.

Часꙋ̀ и҆ днѝ при­ше́д­шꙋ воз­вра­ще́­нїѧ і҆кѡ́­ны тво­еѧ̀ во ѻ҆би́­тель по­ча́­ев­скꙋю ѿ і҆кѡно­бо́р­цєвъ, сїю̀ плѣ­ни́в­шихъ, воз­ра́­до­ва­сѧ прпⷣбный і҆́ѡвъ со бра́­тї­ею, тꙋ́ю ло­бы­за́­ю­ще: ны́нѣ же на всѧ́къ де́нь и҆ ча́съ при­хо­дѧ́­щїи во ѻ҆би́­тель твою̀ хрⷭ҇тї­а́­не тꙋ́­ю­же ра́­дость и҆ вѣ́рꙋ предꙿ не́ю сви­дѣ́­тель­ствꙋ­ютъ.

А҆́зъ грѣш­ный лѣ́­но­стїю по­ра­бо­ще́нъ, Ѽ влⷣчце, бл҃га́­го бг҃а при́­снѡ грѣ­хѝ сво­и́­ми про­гнѣвлѧ́ю, нижѐ ѻ҆́чи своѝ воз­ве­стѝ къ немꙋ̀ дер­за́ю, но ко тво­е­мꙋ̀ при­па́­даю чꙋ­до­тво́р­но­мꙋ ѡ҆́бра­зꙋ, предꙿ ни́м­же ка́­ю­щї­и­сѧ про­ще́­нїе ѿ тебє̀ прї­ѧ́­ша, и҆ во­пїю̀: гдⷭ҇а, сн҃а тво­е­го̀, ᲂу҆­млⷭ҇ти­ви и҆ мнѣ̀ пред­ста́­тель­ствомъ тво­и́мъ.

Є҆да̀ ѡ҆брѧ́­щет­сѧ то­ли́­кѡ ѡ҆ка­ме­не́н­ный срⷣцемъ и҆ без­ꙋ́­менъ мꙋ́жъ, и҆́же не ᲂу҆­ми­ли́т­сѧ въ це́р­кви по­ча́­ев­стѣй пред­сто­ѧ́й и҆ ст҃ы́­нѧмъ тво­и̑мъ, влⷣчце, по­кла­нѧ́­ѧй­сѧ, чꙋ­де­са́ же ѿ ни́хъ бы̑в­шаѧ по­мыш­лѧ́­ѧй, и҆ вѣ́­рою мо­лѧ́­щы­ѧ­сѧ ви́­дѧй на­ро́­ды;

Ви́­дѣ­ни бы́ша мно́­зи и҆с­цѣ­ле́н­нїи предꙿ і҆кѡ́­ною тво­е́ю, влⷣчце, слѣ­пӏ́и и҆ хро́­мїи, слы́­ша­ни бы́ша глꙋ­сӏ́и и҆ нѣ­мӏ́и воз­гла­го́­лав­шїи: та́мѡ бѣ­снӏ́и, воды̀ ѿ сто­пы̀ тво­еѧ̀ пї­ю́­ще, ѿ бѣ­сѡ́въ сво­бо­жда́­хꙋ­сѧ: тѣ́м­же и҆ мою̀ прї­и­мѝ мл҃твꙋ, є҆́же ѿ бѣ­со́в­скихъ стра­сте́й сво­бо­ди́­ти­сѧ и҆ свѣ́тъ сп҃се́­нїѧ хрⷭ҇то́­ва вы́нꙋ со­зер­ца́­ти.

Сы́й во ᲂу҆­зи́­ли­щи зе­млѝ тꙋ́р­скїѧ плѣ­не́нъ, и҆́нокъ тво­е́ю си́­лою, влⷣчце, на воз­дꙋ́­сѣ въ го́рꙋ по­ча́­ев­скꙋю при­не­се́­сѧ: ᲂу҆̀бо и҆ менѐ, во ѹ҆́захъ стра­сте́й сꙋ́ща, ны́нѣ, въ де́нь сла́­вы тво­еѧ̀, ѿ тѣ́хъ сво­бо­дѝ, и҆ ли́кꙋ вѣ́­рою и҆ лю­бо́­вїю по­ю́­щихъ тѧ̀ со­при­чтѝ.

Ко тво­е­мꙋ̀ чꙋ­до­тво́р­но­мꙋ ѡ҆́бра­зꙋ при­те́къ, влⷣчце, и҆ во­до́ю ѿ слѣ́­да сто­пы̀ тво­еѧ̀ ѡ҆мы́в­сѧ, слѧ­че́н­ный не­дꙋ́­гомъ ю҆́но­ша а҆́бїе и҆с­цѣ­лѣ̀, слѣ­па́ѧ же ѻ҆тро­ко­ви́­ца, здѣ̀ при­не­се́н­наѧ, про­зрѣ̀, и҆ предꙿꙋ­ме́­рый мла­де́­нецъ во­скре­сѐ: ᲂу҆̀бо и҆ менѐ при­па́­да­ю­ща ѿ смер­то­но́с­на­гѡ ᲂу҆­ны́­нїѧ воз­дви́г­ни, и҆ дꙋ­шє́в­ныѧ моѝ ѿве́р­зи ѻ҆́чи.

Пѣ́снь є҃.

І҆р­мо́съ: Оу҆́­тре­ню­ю­ще во­пї­е́мъ тѝ, гдⷭ҇и, сп҃си́ ны: ты́ бо є҆сѝ бг҃ъ на́шъ, ра́з­вѣ тебє̀ и҆но́­гѡ не вѣ́мы.

А҆́ще и҆ всѣ́хъ грѣш­нѣ́й­шїй є҆́смь ѿ те́мъ лю­де́й, ко тво­е́й, влⷣчце, і҆кѡ́­нѣ при­па́­да­ю­щихъ, а҆́ще и҆ всѝ вѣ́­рою сво­е́ю мѧ̀ пре­взы­до́­ша, ѻ҆ба́­че и҆ менѐ ѡ҆ка­ѧ́н­на­го не ѿри́­ни ѿ тво­е­гѡ̀ за­стꙋ­пле́­нїѧ, млⷭ҇тей бе́з­днꙋ лю́­демъ во ѻ҆би́­те­ли тво­е́й ꙗ҆ви́в­шаѧ.

Ꙗ҆́ко­же ко всѣ̑мъ при­зы­ва́­ю­щымъ тѧ̀ млⷭ҇ти­ва ꙗ҆в­лѧ́­е­ши­сѧ, и҆з­да­ле́­ча і҆кѡ́­нѣ тво­е́й мы́­слен­нѡ по­кла­нѧ́­ю­щы­ѧ­сѧ слы́­ши­ши, и҆ та́кѡ ѻ҆́тро­чи­ща нѣ́­ко­е­го, по мл҃твѣ пра­ба́­бы є҆гѡ̀, во­скре­си́­ла є҆сѝ: и҆ ны́нѣ, Ѽ влⷣчце, ко всѣ̑мъ ѿ ко­нє́цъ зе­млѝ тебѣ̀ мо­лѧ́­щым­сѧ бл҃го­ꙋ­вѣ́т­ли­ва бꙋ́ди.

Сѐ, влⷣчце, лю­де́й мнѡ́­гаѧ мно́­жє­ства, на ст҃ꙋ́ю го́рꙋ твою̀ при­те­ка́­ю­ще, млⷭ҇ти тво­еѧ̀ по­лꙋ­чи́­ти и҆́щꙋтъ, вѣ́р­нїи вкꙋ́­пѣ съ ма­ло­вѣ́р­ны­ми, првⷣнїи и҆ грѣ́ш­нїи, съ ни́­ми­же и҆ цр҃кви ст҃ѣ́й чꙋ­ждӏ́и при­ме­та́­ют­сѧ: всѣ́хъ ᲂу҆̀бо по­ми́­лꙋй, всѣ̑мъ свѣ́тъ и҆́стин­ныѧ вѣ́ры ꙗ҆вѝ во сп҃се́­нїе.

По­что̀ а҆́зъ грѣ́ш­ный, пре­чⷭ҇тѣй бг҃о­мт҃ри по­кла­нѧ́­ѧ­сѧ и҆ и҆с­пра́­ви­ти жи­тїѐ своѐ ѡ҆бѣ­ща­ва́ѧ, па́ки на прє́жнѧѧ пре­грѣ­шє́­нїѧ ѡ҆б­ра­ща́­ю­сѧ; ᲂу҆вы̀ мнѣ̀! є҆да̀ ѕлѣ́й­шїй є҆́смь не­вѣ́р­ныхъ а҆га́­рѧнъ, и҆̀же, на горѣ̀ по­ча́­ев­стѣй по­ка­ѧ́­нїе при­не́с­ше, до́­брїи хрⷭ҇тї­а́­не со­дѣ́­ѧ­ша­сѧ;

А҆́ще и҆ лю́ти бы́ша а҆га́­рѧ­не тꙋ́р­стїи, ст҃ꙋ́ю ѻ҆би́­тель твою̀, влⷣчце, ѡ҆са­жда́­ю­ще, а҆́ще и҆ стрѣ́­лы въ тѧ̀, на не­бе­сѝ ꙗ҆́вль­шꙋ­ю­сѧ, пꙋ­ща́­ти дер­знꙋ́­ша, но си̑мъ на гла­вы̑ и҆́хъ воз­вра­ща́­ю­щым­сѧ, срⷣцемъ со­крꙋ­ше́н­нымъ по­ка́­ѧ­ша­сѧ и҆ си́лꙋ твою̀ и҆с­по­вѣ́­да­ша.

Со і҆́ѡ­вомъ прпⷣбнымъ на нб҃сѣ́хъ тебѐ зрѧ́­ще, влⷣчце, а҆га́­рѧ­нѡмъ смѧ­тє́н­нымъ и҆ бѣ­жа́­щымъ, и҆́но­цы по­ча́­ев­стїи пѣ́снь вос­пѣ́­ша тѝ до­сто́й­нꙋю, со ᲂу҆­го́д­ни­комъ тебѐ бл҃го­да­рѧ́­ще те́­плѣ.

Пѣ́снь ѕ҃.

І҆р­мо́съ: Ри́зꙋ мнѣ̀ по­да́ждь свѣ́т­лꙋ, ѡ҆дѣ­ѧ́й­сѧ свѣ́­томъ ꙗ҆́кѡ ри́­зою, мно­го­млⷭ҇ти­ве хрⷭ҇тѐ бж҃е на́шъ.

И҆́же ѿ а҆га́­рѧнъ тѧ̀, влⷣчце, на не­бе­сѣ́хъ ᲂу҆­зрѣ́­ша, дрꙋ́гъ дрꙋ́­га во­про­ша́­хꙋ, что̀ є҆́сть ви­дѣ́­нїе сїѐ ᲂу҆­жа́с­ное; и҆ ѻ҆́ви смѧ­те́­ни бы́в­ше, дрꙋ́гъ дрꙋ́­га ᲂу҆­би­ва́­хꙋ, ѻ҆́ви же вѣ́рꙋ въ срⷣце своѐ прї­е́м­ше, кре­ще́­нїѧ тре́­бо­ва­хꙋ, по си́хъ же и҆́но­цы бы́ша чрезꙿ всѐ жи­тїѐ, си́лꙋ твою̀ вос­пѣ­ва́­ю­ще.

И҆́но­ки и҆ мїр­скӏ́ѧ лю́ди тво­е­мꙋ̀ за­стꙋ­пле́­нїю вѣ́­рꙋ­ю­щыѧ, влⷣчце, ѡ҆бо­га­тѝ дх҃о́в­ны­ми да­ро­ва́нь­ми, ма­ло­вѣ̑р­ныѧ же про­свѣ­тѝ и҆ ѡ҆за­рѝ, ꙗ҆́ко­же то­гда̀ не­вѣ́­дѣв­шыѧ хрⷭ҇та̀ а҆га́­рѧ­ны въ по­зна́­нїе є҆гѡ̀ при­ве­ла̀ є҆сѝ.

Со­хра­ни́­ша па́­мѧть тво­е­гѡ̀ за­стꙋ­пле́­нїѧ, влⷣчце, а҆га́­рѧ­не, въ зе́­млю тꙋ́р­скꙋю воз­вра́щ­ше­сѧ, и҆ ча́­дѡмъ сво­и̑мъ ѡ҆ ꙗ҆в­ле́­нїи тво­е́мъ па́­мѧть пре­да́­ша: коль­мѝ па́че на́мъ хрⷭ҇тї­а́­нѡмъ чꙋ­де­са̀ твоѧ̑, на горѣ̀ по­ча́­ев­стѣй бы̑в­шаѧ, па́­мѧ­то­ва­ти по­до­ба́­етъ;

Ѡ҆́бра­зꙋ тво­е­мꙋ̀ мы́­слен­нѡ при­па́­даѧ, во глꙋ­бо́­кїй кла́­дѧзь впа­ды́й мꙋ́жъ ѿ не­сꙋ­мнѣ́н­ныѧ сме́р­ти сп҃се́­сѧ, и҆ не­вре­ди́мь и҆зꙿ глꙋ­би­ны̀ по­дꙿѧ́тъ бы́въ, твоѐ про­по­вѣ́­да­ше млⷭ҇рдїе.

Хо­тѣ́лъ бы́хъ и҆ а҆́зъ, влⷣчце, вѣ́рѣ сп҃се́н­ныхъ то­бо́ю лю­де́й по­дра­жа́­ти, хо­тѣ́лъ бы́хъ и҆ а҆́зъ твоѐ за­стꙋ­пле́­нїе въ жи­тїѝ мо­е́мъ ᲂу҆­лꙋ­чи́­ти: но за мно́­же­ство пре­грѣ­ше́­нїй мо­и́хъ ѡ҆скꙋ­дѣ­ва́­етъ моѧ̀ вѣ́ра. сїю̀ ᲂу҆̀бо ᲂу҆­крѣ­пѝ во мнѣ̀, влⷣчце, во­пї­ю́­щемъ: вѣ́­рꙋю, по­мо­зѝ мо­е­мꙋ̀ не­вѣ́­рїю.

Ро́въ прельще́­нїй ла­ти́н­скихъ чрезꙿ сто̀ и҆ де́­сѧть лѣ́тъ по­гло­тѝ ѻ҆би́­тель по­ча́­ев­скꙋю: но тво­и́мъ, бцⷣе, за­стꙋ­пле́­нї­емъ па́ки та́ѧ къ вы­со­тѣ̀ пра­во­сла́­вїѧ и҆зꙿе́м­лет­сѧ и҆ ла́ѵ­ра и҆ме­нꙋ́­ет­сѧ. сїю̀ ᲂу҆̀бо въ пра­во­сла́в­нѣй вѣ́рѣ не­по­ко­ле­би́­мꙋ со­блю­дѝ да́же до часа̀ вто­ра́­гѡ при­ше́­ствїѧ сн҃а тво­е­гѡ̀ и҆ бг҃а.

Кон­да́къ, гла́съ а҃:

И҆с­то́ч­никъ и҆с­цѣ­ле́­нїй и҆ вѣ́ры пра­во­сла́в­ныѧ ᲂу҆­твер­жде́­нїе по­ча́­ев­скаѧ твоѧ̀ і҆кѡ́­на, бцⷣе, ꙗ҆ви́­сѧ: тѣ́м­же и҆ на́съ, къ не́й при­те­ка́­ю­щихъ, ѿ бѣ́дъ и҆ и҆с­кꙋ­ше́­нїй сво­бо­дѝ, ла́ѵ­рꙋ твою̀ не­вре­ди́­мꙋ со­хра­нѝ, пра­во­сла́­вїе во ѻ҆́крестъ сто­ѧ́­щихъ стра­на́хъ ᲂу҆­твер­дѝ, и҆ грѣ­хѝ раз­рѣ­шѝ мл҃твєн­никъ тво­и́хъ: є҆ли̑­ка бо хо́­ще­ши, мо́­же­ши.

І҆́косъ: Во­ста́­ни­те ѿ грѡ́бъ ва́­шихъ, и҆́но­цы по­ча́­ев­стїи, и҆ рцы́­те на́мъ: ко­ли́­кихъ чꙋ­де́съ пре­ст҃ы́ѧ бцⷣы бы́­сте зри́­тє­ли и҆ сви­дѣ́­тє­ли, ка́кѡ ме́р­твїи предꙿ тоѧ̀ і҆кѡ́­ною во­скре­са́­хꙋ, ка́кѡ де́­мо­ни ѿ мꙋ́­чи­мыхъ лю­де́й ѿбѣ­га́­хꙋ, ка́кѡ не­дꙋ́ж­нїи та́мѡ и҆с­цѣ­лѧ́­хꙋ­сѧ, ка́кѡ не­вѣ́р­нїи вѣ́­ро­ва­хꙋ, ка́кѡ хꙋ­ли́­тє­ли та́мѡ ка́­ѧ­хꙋ­сѧ; сїѧ̑ бо ди̑в­на бы­ва́­хꙋ че­ло­вѣ́­кѡмъ и҆ а҆гг҃лѡмъ. мы́ же всѧ̑ сїѧ̑ бы̑в­шаѧ и҆ до­дне́сь бы­ва́­є­маѧ вос­по­ми­на́­ю­ще, со стра́­хомъ и҆ ᲂу҆­ми­ле́­нї­емъ ко ст҃ѣ́й і҆кѡ́­нѣ пре­чⷭ҇тыѧ бг҃о­мт҃ре мл҃твен­нѡ при­па́­да­емъ и҆ гла­го́­лемъ си́це: Ѽ млⷭ҇тей бе́з­дно и҆ бл҃го­дѣ­ѧ́­нїй со­кро­ви́­ще, грѣ­хѝ раз­рѣ­шѝ мл҃твєн­никъ тво­и́хъ: є҆ли̑­ка бо хо́­ще­ши, мо́­же­ши.

Пѣснь з҃.

І҆р­мо́съ: Ѿ і҆ꙋ­де́и до­ше́д­ше ѻ҆́тро­цы, въ ва­вѷ­лѡ́­нѣ и҆но­гда̀, вѣ́­рою трⷪ҇че­скою пла́­мень пе́щ­ный по­пра́­ша, по­ю́­ще: ѻ҆тцє́въ бж҃е, бл҃го­сло­ве́нъ є҆сѝ.

А҆ка́­ѳї­сто­во пѣ́­нїе воз­но­ша́­хꙋ предꙿ і҆кѡ́­ною тво­е́ю, пре­чⷭ҇таѧ, пра­во­сла́в­нїи лю́­дїе, є҆гда̀ ѻ҆би́­тель по­ча́­ев­скаѧ по­ве­лѣ́­нї­емъ ца­ре́­вымъ цр҃кви воз­вра­ще́­на бы́сть: тѣ̑мъ ѹ҆́бѡ ѡ҆став­ле́­нїе грѣ­хѡ́въ и҆с­про­сѝ, на́мъ же мо­лѧ́­щымъ тѝ сѧ̀ на вра­гѝ по­со́б­ствꙋй.

Нї­ко­ла́а пе́р­ва­гѡ, са­мо­де́рж­ца, дꙋ́шꙋ ᲂу҆­по­ко́­и­ти мо­ли́­сѧ, влⷣчце, вкꙋ́­пѣ же и҆ всѣ́хъ, ѡ҆ воз­вра­ще́­нїи ла́ѵ­ры тво­еѧ̀ и҆зꙿ є҆ре­тӏ́­че­ска­гѡ плѣ́­на по­трꙋ­ди́в­ших­сѧ, на́мъ же къ тебѣ̀ при­бѣ­га́­ю­щымъ по­да́ждь є҆ди­но­мы́­слїе и҆ ми́ръ.

И҆ ны́нѣ млⷭ҇ти­ва бꙋ́ди, влⷣчце, пра­во­сла́в­нымъ хрⷭ҇тї­а́­нѡмъ, по­ка­рѧ́­ю­щи подꙿ но́зѣ и҆́хъ про­ти­во­бо́р­ствꙋ­ю­щыѧ вра­гѝ и҆ сꙋ­по­ста́­ты.

Предꙿ тво­е́ю і҆кѡ́­ною, бцⷣе, пра­во­сла̑в­нымъ хрⷭ҇тї­а́­нѡмъ воз­вра­ще́н­ною, па́ки и҆с­цѣ­лє́­нїѧ прї­и­ма́­ти вѣ́р­нїи на­вы­ко́­ша: не ᲂу҆̀ и҆с­те́к­шꙋ бо є҆ди́­но­мꙋ лѣ́тꙋ ѿ тогѡ̀ днѐ, ᲂу҆жѐ че­ты́р­ми чꙋ­де­сы̀ цр҃ковь хрⷭ҇то́­вꙋ про­сла́­ви­ла є҆сѝ во ᲂу҆­тѣ­ше́­нїе лю́­демъ.

Раѧ̀ нбⷭ҇на­гѡ спо­до́­би ны̀, влⷣчце, ст҃ꙋ́ю ла́ѵ­рꙋ твою̀ а҆́ки зем­ны́й ра́й по­чи­та́­ю­щыѧ и҆ твоѧ̑ млⷭ҇ти те́­плою вѣ́­рою вос­пѣ­ва́­ю­щыѧ.

А҆вра­а́мъ гдⷭ҇ень де́нь и҆з­да­ле́­ча ви́дѣ и҆ ра́­до­ва­сѧ, и҆ ча́­ѧ­нї­емъ тогѡ̀ днѐ жи­вѧ́­ше: ᲂу҆­зрѣ́в­ши же и҆з­да­ле́­ча твою̀ по­ча́­ев­скꙋю це́р­ковь нѣ́­каѧ хро­ма́ѧ жена̀, и҆ ᲂу҆­по­ва́­нї­емъ тво­еѧ̀ по́­мо­щи и҆с­по́л­нив­ши­сѧ, а҆́бїе и҆с­цѣ­лѣ̀, и҆ а҆́ки є҆ле́нь во­спрѧ­нꙋ́в­ши, ко ѻ҆би́­те­ли тво­е́й по­спѣ­ша́­ше.

Пѣ́снь и҃.

І҆р­мо́съ: Цр҃ѧ̀ нбⷭ҇на­го, є҆го́­же по­ю́тъ вѡ́и а҆гг҃ль­стїи, хва­ли́­те и҆ пре­воз­но­си́­те во всѧ̑ вѣ́ки.

Во гра́дъ кӏ́­евъ ѿ пре­дѣ̑лъ ᲂу҆­ра́ль­скихъ при­ше́д­шей женѣ̀ бѣ́снѣй ꙗ҆ви́­сѧ бцⷣа со прпⷣбнымъ і҆́ѡ­вомъ, и҆ на го́рꙋ по­ча́­ев­скꙋю тꙋ́ю при­зы­ва́­ше: и҆дѣ́­же здра́­вїе є҆́й по­да́в­ши, сла́­ви­ти на­ꙋ­чѝ своѐ за­стꙋ­пле́­нїе.

Ѡ҆мы́въ ѻ҆че­са̀ своѧ̑ въ кꙋ­пѣ́­ли сїлѡ­а́м­стѣй, прї­е́м­летъ слѣ­поро­жде́н­ный зрѣ́­нїе хрⷭ҇то́­вымъ ве­лѣ́­нї­емъ: ѡ҆мы́в­ши­сѧ же ѿ воды̀ сто­пны́ѧ въ це́р­кви по­ча́­ев­стѣй, и҆с­цѣ­лѣ̀ слѣ­па́ѧ ѻ҆тро­ко­ви́­ца. ᲂу҆̀бо и҆ на́ше стра́ст­ное ѡ҆слѣп­ле́­нїе и҆с­цѣ­лѝ, влⷣчце, во­до́ю ѿ слѣ́­да сто­пы̀ тво­еѧ̀ съ вѣ́­рою кро­пѧ́­щих­сѧ.

Сїю̀ ѻ҆тро­ко­ви́­цꙋ и҆с­цѣ­ле́­нꙋ ᲂу҆­зрѣ́в­ши, пра­ба́­ба є҆ѧ̀ а҆́бїе прельще́­нїѧ ᲂу҆­нӏ́т­ска­гѡ ѿрица́­ет­сѧ и҆ пра­во­сла́в­нꙋю и҆с­по­вѣ́­дꙋ­етъ вѣ́рꙋ: въ не́й­же ᲂу҆­твер­дѝ и҆ ны̀, рабы̑ твоѧ̑, Ѽ влⷣчце.

Лю́­дїе бж҃їи, на го́рꙋ твою̀, влⷣчце, при­те­ка́­ю­щїи, ѡ҆бѣ́­ты пѡ́­двигъ бл҃го­чⷭ҇ти́­выхъ та́мѡ при­но́­сѧтъ, ꙗ҆̀же дѣ́лы и҆с­по́л­ни­ти по­мо­зѝ и҆̀мъ, бцⷣе.

А҆́гг҃ли на нб҃сѝ твою̀ сла́­вꙋ не­пре­ста́н­нѡ вос­пѣ­ва́­ютъ, бцⷣе, на зе­мли́ же че­ло­вѣ́­цы ко тво­е­мꙋ̀ за­стꙋ­пле́­нїю при­те­ка́­ти не пре­ста­ю́тъ: и҆́хже воз­ды­ха̑­нїѧ не ѿри́­ни, ꙗ҆́кѡ бл҃га́ѧ, па́че же на мѣ́­стѣ ꙗ҆в­ле́­нїѧ тво­е­гѡ̀ тѣ́хъ мо­лє́­нїѧ ᲂу҆­слы́­ши.

Ве́­лїѧ тво­е­гѡ̀ за­стꙋ­пле́­нїѧ си́ла, Ѽ влⷣчце: є҆гѡ́­же ра́ди сн҃ъ тво́й и҆ бг҃ъ на́шъ грє́ш­нымъ про­ще́­нїе да́­рꙋ­етъ, по­дви­за́­ю­щым­сѧ же крѣ́­пость и҆ ᲂу҆­ны­ва́­ю­щымъ ᲂу҆­тѣ­ше́­нїе.

Пѣ́снь ѳ҃.

І҆р­мо́съ: Во­и́­стин­нꙋ бцⷣꙋ тѧ̀ и҆с­по­вѣ́­дꙋ­емъ, сп҃се́н­нїи то­бо́ю, дв҃о чⷭ҇таѧ, съ без­пло́т­ны­ми ли̑ки тѧ̀ ве­ли­ча́­ю­ще.

Не то́­чїю є҆ди́нъ по є҆ди́­но­мꙋ по­дви­за́­ют­сѧ хрⷭ҇тї­а́­не на го́рꙋ по­ча́­ев­скꙋю, но и҆ ѿ сꙋ­гꙋ́­бѡ сщ҃е́н­на­гѡ гра́­да кӏ́­е­ва со­во­кꙋ́пль­ше­сѧ вѣ́р­нїи, по́­мощь ѿ сеѧ̀ чꙋ­до­тво́р­ныѧ і҆кѡ́­ны въ го­ди́­нꙋ бы́в­ша­гѡ гꙋ­би́­тель­ства и҆с­по­вѣ́­да­ша, и҆ по­до́­бїе є҆ѧ̀ на­пи­са́в­ше, во ст҃ꙋ́ю ла́ѵ­рꙋ сїѐ при­не­со́­ша.

Оу҆́бѡ и҆ во грѧ­дꙋ́­щаѧ лѣ̑та сп҃са́й на́съ, влⷣчце, ѿ гꙋ­би́­тель­ства и҆ ме­ждо­ꙋ­со́б­ныѧ бра́­ни, ѿ гла́­да же и҆ ѻ҆́гнен­на­гѡ за­па­ле́­нїѧ: занѐ ѡ҆скꙋ­дѣ́в­шей крѣ́­по­сти дꙋ́шъ на́­шихъ, ᲂу҆­ны́­нїѧ и҆с­пол­нѧ́­ем­сѧ въ бѣ­да́хъ, не­раз­ꙋ́м­ли­ви сꙋ́ще.

Ю҆́ж­скїй пре­дѣ́лъ зе­млѝ рѡс­сӏ́й­скїѧ по­ча́­ев­скꙋю і҆кѡ́­нꙋ влⷣчцы и҆ ст҃ꙋ́ю ла́ѵ­рꙋ є҆ѧ̀ ꙗ҆́кѡ дї­а­ди́­мꙋ црⷭ҇твїѧ хра­ни́тъ, и҆ си́ми хва́­лит­сѧ: ѻ҆ба́­че же и҆ сѣ́­вер­скїй, во гра́­дѣ то­бо́ль­стѣмъ, чꙋ­до­тво́р­ное по­до́­бїе то­ѧ́­жде по­ча́­ев­скїѧ і҆кѡ́­ны мл҃твою и҆́но­кѡвъ себѣ̀ и҆с­про­сѝ.

Рꙋ́с­скꙋю зе́­млю, Ѽ влⷣчце, ꙗ҆́кѡ без­пре­дѣ́ль­ное горы̀ тво­еѧ̀ под­но́­жїе, ѿ бѣ́дъ и҆ и҆с­кꙋ­ше́­нїй сво­бо­дѝ, и҆ во бл҃го­че́­стїи тꙋ́ю со­хра­нѝ до скон­ча́­нїѧ вѣ́ка.

Оу҆жѐ не­сты́д­нѡ под­нѧ́в­шым­сѧ хꙋ́ль­нымъ гла­сѡ́мъ по­сре­дѣ̀ хрⷭ҇тї­а́н­ска­гѡ жи́­тель­ства, не ѡ҆ста́­ви, бцⷣе, ра̑бъ тво­и́хъ въ тѣ́хъ прельщє́­нїѧ впа́­сти, но вѣ́рꙋ не­сꙋ­мнѣ́н­нꙋ воз­грѣ­ва́й въ серд­ца́хъ на́­шихъ вы́нꙋ.

Сѐ вре́­мѧ за­стꙋ­пле́­нїѧ пре­ст҃ы́ѧ бцⷣы прї­и́­де, ᲂу҆­мно́­жив­шым­сѧ со­бла́з­нѡмъ, сѐ вре́­мѧ на́­шихъ къ не́й воз­ды­ха́­нїй, Ѽ бра́­тїе! рце́мъ ᲂу҆̀бо ѿ все­гѡ̀ срⷣца на́­ше­гѡ: влⷣчце, влⷣчце! по­мо­зѝ лю́­демъ тво­и̑мъ.

Свѣ­ти́­ленъ.

По­до́­бенъ: Чер­то́гъ тво́й ви́­ждꙋ:

Ви­дѣ́­нїе ди́в­ное: во ѻ҆гнѝ пре­ст҃а́ѧ дв҃а, чꙋ­де­са́ же не­ис­чи̑­сли­маѧ ѿ і҆кѡ́­ны по­ча́­ев­скїѧ на́мъ и҆з­вѣ­сти́­ша­сѧ: во­спрѧ́­немъ ᲂу҆̀бо, Ѽ лю́­дїе, ѿ грѣ­хо́в­на­гѡ сна̀, и҆с­прав­ле́­нїѧ жи­тїю̀ на́­ше­мꙋ со сле­за́­ми да про́­симъ, и҆ мт҃ри бж҃ї­ей съ вѣ́­рою дне́сь по­кло­ни́м­сѧ.

На хва­ли́­техъ стї­хи̑­ры на д҃, гла́съ д҃:

Вос­по­и́мъ, лю́­дїе, пре­ст҃ꙋ́ю дв҃ꙋ чⷭ҇тꙋю, на горѣ̀ по­ча́­ев­стѣй дре́в­ле па́­сты­рємъ ꙗ҆́вль­шꙋ­ю­сѧ, ны́нѣ же всю̀ стра­нꙋ̀ на́шꙋ ѿтꙋ́­дꙋ бл҃го­дѣ́­ю­щꙋю: вѣ́сть бо влⷣчца про­шє́­нїѧ на̑ша во бл҃го́е и҆с­пол­нѧ́­ти, и҆ серд­ца̀ на̑ша ᲂу҆­ми­ле́­нї­емъ рас­тво­рѧ́­ти, и҆ рабы̑ своѧ̑ ѿ бѣ́дъ и҆ ѕѡ́лъ со­хра­нѧ́­ти. Два́­жды.

Не воз­гнꙋ­ша́й­сѧ на́съ грѣ́ш­ныхъ, млⷭ҇рдаѧ мт҃и, ма­ло­вѣ́­рїѧ ра́ди на́­ше­гѡ ѿ на́съ не ѿвра­ти́­сѧ: но па́че вѣ́рꙋ на́шꙋ блгⷣт­ною по́­мо­щїю тво­е́ю ᲂу҆­мно́­жи, и҆ же́р­твꙋ хва­лы̀ при­но­си́­ти тебѣ̀ рабы̑ твоѧ̑ на­ꙋ­чѝ.

Слѣ­пы̑ѧ и҆ хро­мы̑ѧ и҆ слѧ­чє́н­ныѧ, ко тво­е́й ст҃ѣ́й і҆кѡ́­нѣ при­па́­да­ю­щыѧ, все­мо́щ­нымъ дѣ́й­ствомъ тво­е­гѡ̀ пред­ста́­тель­ства и҆с­цѣ­ли́­ла є҆сѝ, бцⷣе: бѣ́сы, лю­де́й мꙋ́­ча­щыѧ, ѿгна́­ла є҆сѝ, пра­во­сла́в­нꙋю вѣ́рꙋ а҆га́­рѧ­нѡмъ и҆ є҆ре­тї­кѡ́мъ ѿкры́­ла є҆сѝ. ᲂу҆̀бо и҆ на́­шихъ мо­ле́­нїй не ѿри́­ни, пре­не­по­ро́ч­наѧ, но ꙗ҆̀же ко сп҃се́­нїю про­шє́­нїѧ на̑ша и҆с­по́л­ни.

Сла́­ва, и҆ ны́нѣ, гла́съ и҃:

Ѡ҆ тво­и́хъ зна́­ме­нї­ихъ, бцⷣе влⷣчце, сла́­вит­сѧ гора̀ по­ча́­ев­скаѧ, и҆ всѧ́къ ꙗ҆зы́къ хрⷭ҇тї­а́н­скїй си́лꙋ твою̀ и҆с­по­вѣ́­дꙋ­етъ: и҆́хже ра́ди не­вѣ́р­нїи пра­во­вѣ́р­ни со­дѣ́­ѧ­ша­сѧ, грѣ́ш­нїи въ по­ка­ѧ́­нїе прї­и­до́­ша, лѣ­ни́­вїи къ дх҃о́в­но­мꙋ дѣ́­ла­нїю ᲂу҆­стре­ми́­ша­сѧ: и҆́мже и҆ на́съ по­дра­жа́­ти, бл҃га́ѧ, на­ꙋ­чѝ, тебѐ те́­плѣ бл҃го­да­ри́­ти ᲂу҆­стро́й на́съ, и҆ воз­дви́г­ни вы́нꙋ вос­пѣ­ва́­ти сла́­вꙋ сн҃а тво­е­гѡ̀, є҆ди́­на­гѡ ѿ ст҃ы́ѧ трⷪ҇цы сла́­ви­ма­гѡ бг҃а на́­ше­гѡ.

Сла­во­сло́­вїе ве­ли́­кое. Є҆ктє­нїѝ, и҆ ѿпꙋ́стъ.

На лї­тꙋр­гӏ́и, бл҃жє́н­на ѿ ка­нѡ́­на бцⷣы, пѣ́снь г҃ и҆ ѕ҃, на и҃.

Про­кӏ́­менъ, гла́съ г҃, пѣ́снь бцⷣы: Ве­ли́­читъ дꙋша̀ моѧ̀ гдⷭ҇а, и҆ воз­ра́­до­ва­сѧ дꙋ́хъ мо́й ѡ҆ бз҃ѣ сп҃сѣ мо­е́мъ.

Стӏ́хъ: Ꙗ҆́кѡ при­зрѣ̀ на сми­ре́­нїе рабы̀ сво­еѧ̀: се́ бо ѿны́­нѣ ᲂу҆­бл҃жа́тъ мѧ̀ всѝ ро́ди.

А҆пⷭ҇лъ къ є҆вре́­ємъ, за­ча́­ло т҃к.

А҆л­ли­лꙋ́­їа, гла́съ в҃: Во­скре­снѝ, гдⷭ҇и, въ по­ко́й тво́й, ты̀ и҆ кї­вѡ́тъ ст҃ы́­ни тво­еѧ̀.

Стӏ́хъ: Клѧ́т­сѧ гдⷭ҇ь дв҃дꙋ и҆́сти­ною, и҆ не ѿве́р­жет­сѧ є҆ѧ̀.

Є҆ѵⷢ҇лїе ѿ лꙋкѝ, за­ча́­ло н҃д.

При­ча́­стенъ: Ча́шꙋ сп҃се́­нїѧ прї­и­мꙋ̀, и҆ и҆́мѧ гдⷭ҇не при­зо­вꙋ̀.