Мѣ́­сѧ­ца ѻ҆ктѡ́­врїа въ і҃-й де́нь.

Слꙋ́жба прпⷣбнымъ ѻ҆тцє́мъ ста́рцємъ, и҆̀же въ ѻ҆́птинѣ пꙋ́стыни подвиза́вшымсѧ.

На вели́цѣй вече́рни.

Бл҃же́нъ мꙋ́жъ: а҃-й а҆н­тї­фѡ́нъ.

На Гдⷭ҇и, воз­зва́хъ: стї­хи̑­ры на и҃, гла́съ д҃.

По­до́­бенъ: Ꙗ҆́кѡ до́­блѧ:

Прпⷣбнїи ста́р­цы ѻ҆́птин­стїи,* вы̀ и҆́го хрⷭ҇то́­во взе́м­ше,* по­сто́мъ и҆ мл҃тва­ми* и҆ ча́­сты­ми бдѣ̑­нїи по­трꙋ­ди́в­ше­сѧ,* про­сї­ѧ́­сте на­де́­ждею и҆ вѣ́­рою,* на­и­па́­че же лю­бо́­вїю,* ꙗ҆́же є҆́сть гла­ва̀ до­бро­дѣ́­те­лемъ,* є҆́юже со­грѣ­ва́­сте* при­хо­дѧ́­щыѧ къ ва́мъ. Два́­жды.

По­слꙋ­ша́­нїѧ ᲂу҆­се́рд­нїи по­дви̑ж­ни­цы,* вѡ́ли своѧ̑ по­ко­ри́в­шїи* ѡ҆кор­мле́­нїю ѻ҆тє́цъ сво­и́хъ,* дх҃о́в­нѣ ва́съ по­ро­ди́в­шихъ,* вос­прї­ѧ́­сте по́­мощь на со­про­ти́в­ни­ка,* глꙋ­бо­ча́й­шее сми­ре́­нїе,* и҆́мже раз­рꙋ­ши́­сте кѡ́з­ни вра̑­жїѧ:* ни­что́­же бо мо́­жетъ вра́гъ* на сми­рє́н­ныѧ.

Пра­во­сла́в­ныхъ лю­де́й ѡ҆кор­ми́­те­лїе,* вы̀ а҆пⷭ҇ль­ски взы­ва́­сте:* ни­что́­же ны̀ раз­лꙋ­чи́тъ ѿ люб­вѐ бж҃їѧ.* вы̀ хꙋ́жд­шее по­ко­ри́­сте лꙋ́ч­ше­мꙋ,* и҆ пло́ть по­ра­бо́­ти­сте дх҃ꙋ.* тѣ́мъ ꙗ҆ви́­сте­сѧ свѣ­ти́ль­ни­цы цр҃кве,* не подꙿ спꙋ́­домъ, но на свѣ́щ­ни­цѣ по­ста́в­ле­ни,* да про­сла́­вѧтъ ѻ҆ц҃а̀ нбⷭ҇на­го* ви́­дѧ­щїи дѣла̀ ва̑ша.

И҆́ны стї­хи̑­ры, гла́съ и҃. По­до́­бенъ: Ѽ пре­сла́в­на­гѡ чꙋ­де­сѐ:

Ѽ пре­сла́в­на­гѡ чꙋ­де­сѐ!* по­сре­дѣ̀ жи­те́й­скїѧ мол­вы̀* ѻ҆тцы̀ бг҃о­мꙋ́­дрїи* не­смꙋ­ще́­но срⷣце со­хра­ни́­ша,* пре­бы­ва́­ю­ще съ че­ло­вѣ̑­ки тѣ­ле́с­нѣ,* мы́­слен­нѣ же бг҃ꙋ пред­сто­ѧ́­ще,* по­кры­ва́­е­ми кро́­вомъ кри­лꙋ̀ є҆гѡ̀,* но­сѧ́­щїи дꙋ́хъ ми́­ренъ,* и҆́мже мнѡ́­ги ко хрⷭ҇тꙋ̀ при­вле­ко́­ша. Два́­жды.

Ѽ мл҃твєн­ни­цы пре­бо­га́­тїи,* дх҃а ст҃а́­гѡ ѻ҆р­га́­ни,* гла­го́­лю­ще мл҃твꙋ не­пре­ста́н­нꙋю* въ срⷣцѣ со­крꙋ­ше́н­номъ и҆ сми­ре́н­номъ,* про­сї­ѧ́­сте а҆́гг҃ль­скимъ без­стра́­стї­емъ,* и҆ сегѡ̀ ра́ди по­ка­за́­сте­сѧ* вра́­че­ве дꙋ­ша́мъ и҆ тѣ­ле­сє́мъ:* по­ща­ди́­те и҆ сп҃си́­те на́съ,* плѣ­нѧ́­е­мыхъ стра́ст­ны­ми при­лѡ́­ги.

Ѽ ста́р­цы прпⷣбнїи,* дх҃а ст҃а́­гѡ со­сꙋ́­ди,* да­ро­ва̑­нїи блгⷣтны­ми* на­зда́в­шїи цр҃ковь хрⷭ҇то́­вꙋ,* вы̀ по­ре­вно­ва́­сте дх҃ѡ́в­нымъ,* прⷪ҇ро́­че­ства да́ръ стѧ­жа́в­ше,* гла­го́­лю­ще че­ло­вѣ́­кѡмъ по­лє́з­наѧ* въ на­зи­да́­нїе и҆ ᲂу҆­тѣ­ше́­нїе,* прⷪ҇ро́­кѡмъ дрє́в­нимъ ᲂу҆­по­до́бль­ше­сѧ.

Сла́­ва, гла́съ ѕ҃:

Оу҆́зы раз­рѣ́ш­ше стра­сте́й, при­лѣ­пи́­сте­сѧ люб­вѝ бл҃ги́хъ, во хрⷭ҇та̀ ѡ҆б­ле­ко́­сте­сѧ, воз­дер­жа́­нї­емъ и҆ сми­ре́­нї­емъ на­слѣ̑д­ни­цы бы́в­ше вы́ш­нѧ­гѡ жи­во­та̀: тѣ́м­же ѿ трꙋ­дѡ́въ ѡ҆брѣ́т­ше ᲂу҆­по­ко­е́­нїе, до­сто́й­нѡ ра́­дꙋ­е­те­сѧ съ го́р­ни­ми си́­ла­ми, прпⷣбнїи ѻ҆тцы̀ ѻ҆́птин­стїи: пре­грѣ­ше́­нїй ѡ҆став­ле́­нїе и҆с­про­си́­те пра́з­днꙋ­ю­щымъ лю­бо́­вїю ст҃ꙋ́ю па́­мѧть ва́шꙋ.

И҆ ны́нѣ, бг҃о­ро́­ди­ченъ до­гма́­тїкъ: Кто̀ тебє̀ не ᲂу҆­бл҃жи́тъ:

Вхо́дъ, про­кӏ́­менъ днѐ, и҆ чтє́­нїѧ г҃.

Пре­мꙋ́­дро­сти со­ло­мѡ́­но­вы чте́­нїе:

Првⷣникъ, а҆́ще по­сти́г­нетъ скон­ча́­ти­сѧ, въ по­ко́и бꙋ́­детъ. Ста́­рость бо чⷭ҇тна̀ не мно­го­лѣ́т­на, нижѐ въ чис­лѣ̀ лѣ́тъ и҆с­чи­та́­ет­сѧ. Сѣ­ди́­на же є҆́сть мꙋ́­дрость че­ло­вѣ́­кѡмъ, и҆ во́з­растъ ста́­ро­сти жи­тїѐ не­скве́р­ное. Бл҃го­ꙋ­го́­денъ бг҃о­ви бы́въ, воз­лю́б­ленъ бы́сть, и҆ жи­вы́й по­сре­дѣ̀ грѣ̑ш­никъ, пре­ста́в­ленъ бы́сть: Вос­хи­ще́нъ бы́сть, да не ѕло́­ба и҆з­мѣ­ни́тъ ра́з­ꙋ­ма є҆гѡ̀, и҆лѝ ле́сть пре­льсти́тъ дꙋ́шꙋ є҆гѡ̀. Ра­че́­нїе бо ѕло́­бы по­мра­ча́­етъ дѡ́­браѧ, и҆ па­ре́­нїе по́­хо­ти пре­мѣ­нѧ́­етъ ѹ҆́мъ не­ѕло́­бивъ. Скон­ча́в­сѧ вма́­лѣ, и҆с­по́л­ни лѣ̑та дѡ́л­га: Оу҆­го́д­на бо бѣ̀ гдⷭ҇е­ви дꙋша̀ є҆гѡ̀: сегѡ̀ ра́ди по­тща́­сѧ ѿ сре­ды̀ лꙋ­ка́в­ствїѧ. Лю́­дїе же ви́­дѣв­ше, и҆ не раз­ꙋ­мѣ́в­ше, нижѐ по­ло́ж­ше въ по­мыш­ле́­нїи та­ко­во́е: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ по­сѣ­ще́­нїе во и҆з­бра́н­ныхъ є҆гѡ̀.

При́­тчей чте́­нїе:

Па́­мѧть првⷣна­гѡ съ по­хва­ла́­ми, и҆ бл҃҃҃҃҃го­сло­ве́­нїе гдⷭ҇не на гла­вѣ̀ є҆гѡ̀. Бл҃же́нъ че­ло­вѣ́къ, и҆́же ѡ҆брѣ́­те пре­мꙋ́­дрость, и҆ сме́р­тенъ, и҆́же ᲂу҆­вѣ́­дѣ ра́з­ꙋмъ. Лꙋ́ч­ше бо сїю̀ кꙋ­по­ва́­ти, не́­же­ли зла́­та и҆ сре­бра̀ со­крѡ́­ви­ща. Чест­нѣ́й­шаѧ же є҆́сть ка́­ме­нїй мно­го­цѣ́н­ныхъ: все́ же чⷭ҇тно́е не­до­сто́й­но є҆ѧ̀ є҆́сть. Дол­го­та́ бо дне́й и҆ лѣ̑та жи­во­та̀ въ де­сни́­цѣ є҆ѧ̀, въ шꙋ́й­цѣ же є҆ѧ̀ бо­га́т­ство и҆ сла́­ва: ѿ ѹ҆́стъ є҆ѧ̀ и҆с­хо́­дитъ пра́­вда, за­ко́нъ же и҆ млⷭ҇ть на ѧ҆зы́­цѣ но́­ситъ. По­слꙋ́­шай­те ᲂу҆̀бо менѐ, Ѽ ча̑да, чⷭ҇тна̑ѧ бо рекꙋ̀: и҆ бл҃же́нъ че­ло­вѣ́къ, и҆́же пꙋти̑ моѧ̑ со­хра­ни́тъ: и҆с­хо́­ди бо моѝ, и҆с­хо́­ди жи­во­та̀, и҆ ᲂу҆­го­тов­лѧ́­ет­сѧ хо­тѣ́­нїе ѿ гдⷭ҇а. Сегѡ̀ ра́ди молю̀ ва́съ, и҆ пред­ла­га́ю мо́й гла́съ сы­но­вѡ́мъ че­ло­вѣ́­чє­скимъ: ꙗ҆́кѡ а҆́зъ, пре­мꙋ́­дрость, ᲂу҆­стро́­ихъ со­вѣ́тъ, и҆ ра́з­ꙋмъ и҆ смы́слъ а҆́зъ при­зва́хъ. Мо́й со­вѣ́тъ и҆ ᲂу҆­твер­жде́­нїе, мо́й ра́з­ꙋмъ, моѧ́ же крѣ́­пость. А҆́зъ менѐ лю́­бѧ­щыѧ люб­лю̀, и҆́щꙋ­щїи же менѐ ѡ҆брѧ́­щꙋтъ блгⷣть. Раз­ꙋ­мѣ́й­те ᲂу҆̀бо, не­ѕло́­би­вїи, ко­ва́р­ство, не­на­ка́­зан­нїи же, при­ла­га́й­те срⷣца̀. По­слꙋ́­шай­те менѐ и҆ па́ки, чⷭ҇тна̑ѧ бо рекꙋ̀, и҆ ѿве́р­зꙋ ѿ ᲂу҆­сте́нъ пра̑­ваѧ: ꙗ҆́кѡ и҆́сти­нѣ по­ꙋ­чи́т­сѧ гор­та́нь мо́й, мє́рз­ки же пре­до мно́ю ᲂу҆ст­ны̑ лжи̑­выѧ. Съ пра́­вдою всѝ гла­го́­лы ѹ҆́стъ мо­и́хъ: ни­что́­же въ ни́хъ стро́­пот­но, нижѐ раз­вра­ще́н­но. Всѧ̑ пра̑­ва сꙋ́ть раз­ꙋ­мѣ­ва́­ю­щымъ, и҆ прѡ́­ста ѡ҆брѣ­та́­ю­щымъ ра́з­ꙋмъ. На­ꙋ­чꙋ́ бо ва́съ и҆́сти­нѣ, да бꙋ́­детъ ѡ҆ гдⷭ҇ѣ на­де́­жда ва́ша, и҆ и҆с­по́л­ни­те­сѧ дх҃а.

Пре­мꙋ́­дро­сти со­ло­мѡ́­но­вы чте́­нїе:

Оу҆­ста̀ првⷣна­гѡ ка́­плютъ пре­мꙋ́­дрость: ᲂу҆ст­нѣ́ же мꙋ­же́й мꙋ́­дрыхъ вѣ́­дѧтъ блгⷣть. Ѹ҆ста̀ мꙋ́­дрыхъ по­ꙋ­ча́т­сѧ пре­мꙋ́­дро­сти, пра́­вда же и҆з­ба­влѧ́­етъ и҆̀хъ ѿ сме́р­ти. Скон­ча́в­шꙋ­сѧ мꙋ́жꙋ првⷣнꙋ, не по­ги́б­нетъ на­де́­жда. Сы́нъ бо првⷣнъ ра­жда́­ет­сѧ въ жи­во́тъ, и҆ во бл҃ги́хъ сво­и́хъ пло́дъ пра́­вды ѡ҆б̾­и́­метъ. Свѣ́тъ првⷣнымъ все­гда̀, и҆ ѿ гдⷭ҇а ѡ҆брѧ́­щꙋтъ блгⷣть и҆ сла́­вꙋ. Ѧ҆зы́къ мꙋ́­дрыхъ дѡ́­браѧ свѣ́сть, и҆ въ срⷣцѣ и҆́хъ по­чӏ́­етъ мꙋ́­дрость. Лю́­битъ гдⷭ҇ь прпⷣбнаѧ серд­ца̀, прї­ѧ́т­ни же є҆мꙋ̀ всѝ не­по­ро́ч­нїи въ пꙋтѝ. Мꙋ́­дрость гдⷭ҇нѧ про­свѣ­ща́­етъ лицѐ раз­ꙋ́м­на­гѡ: по­сти­га́­етъ бо же­ла́­ю­щыѧ ю҆̀, пре́­жде да́же раз­ꙋ­мѣ́­ти ю҆̀, и҆ ᲂу҆­до́бь ѹ҆́зрит­сѧ ѿ лю́­бѧ­щихъ ю҆̀. Оу҆́­тре­не­ва­вый къ не́й, не ᲂу҆­трꙋ­ди́т­сѧ: и҆ бдѧ́й є҆ѧ̀ ра́ди, вско́­рѣ безꙿ пе­ча́­ли бꙋ́­детъ. Ꙗ҆́кѡ до­сто́й­ныхъ є҆ѧ̀ сама̀ ѡ҆б­хо́­дитъ и҆́щꙋ­щи, и҆ во сте­зѧ́хъ є҆ѧ̀ ꙗ҆в­лѧ́­ет­сѧ и҆̀мъ бл҃го­прї­е́м­нѣ. Мꙋ́­дро­сти ни­ко­гда́­же ѡ҆до­лѣ́­етъ ѕло́­ба. Си́хъ ра́ди и҆ ра­чи́­тель бы́хъ до­бро́­ты є҆ѧ̀: и҆ воз­лю­би́хъ ю҆̀, и҆ по­иска́хъ ѿ ю҆́но­сти моеѧ̀: и҆ взы­ска́хъ не­вѣ́­стꙋ при­ве­стѝ себѣ̀, ꙗ҆́кѡ всѣ́хъ влⷣка воз­лю­бѝ ю҆̀. Та­и́б­ни­ца бо є҆́сть бж҃їѧ хи́­тро­сти, и҆ ѡ҆брѣ­та́­тель­ни­ца дѣ́лъ є҆гѡ̀. Трꙋ­ды̀ є҆ѧ̀ сꙋ́ть до­бро­дѣ́­тє­ли: цѣ­ло­мꙋ́­дрїю же и҆ ра́з­ꙋ­мꙋ та̀ ᲂу҆­чи́тъ, пра́­вдѣ и҆ мꙋ́­же­ствꙋ, и҆́хже по­тре́б­нѣе ни­что́­же є҆́сть въ жи­тїѝ че­ло­вѣ́­кѡмъ. А҆́ще же и҆ мно́­га­гѡ и҆с­кꙋ́с­ства же­ла́­етъ кто̀, вѣ́сть дрє́в­нѧѧ, и҆ бы́ти хо­тѧ̑­щаѧ раз­смо́­тритъ: свѣ́сть и҆з­ви̑­тїѧ сло­ве́съ и҆ раз­рѣ­шє́­нїѧ га­да́­нїй: зна́­мє­нїѧ и҆ чꙋ­де­са̀ про­разꙋ­мѣ́­етъ, и҆ сбы­тїѧ̑ вре­ме́нъ и҆ лѣ́тъ: и҆ всѣ̑мъ со­вѣ́т­никъ є҆́сть бл҃гъ, ꙗ҆́кѡ без­сме́р­тїе є҆́сть въ не́й, и҆ бл҃го­сла́­вїе во ѡ҆бще́­нїи сло­ве́съ є҆ѧ̀. Сегѡ̀ ра́ди бе­сѣ́­до­вахъ ко гдⷭ҇ꙋ, и҆ по­мо­ли́х­сѧ є҆мꙋ̀, и҆ рѣ́хъ ѿ все­гѡ̀ срⷣца мо­е­гѡ̀: бж҃е ѻ҆тцє́въ и҆ гдⷭ҇и млⷭ҇ти, со­тво­ри́­вый всѧ̑ сло́­вомъ тво­и́мъ, и҆ мꙋ́­дро­стїю тво­е́ю ᲂу҆­стро́­и­вый че­ло­вѣ́­ка, да вла­дѣ́­етъ бы́в­ши­ми ѿ тебє̀ тварь­мѝ, и҆ да ᲂу҆­прав­лѧ́­етъ мӏ́ръ въ прпⷣбїи и҆ пра́­вдѣ: да́ждь мѝ тво­и́хъ прⷭ҇то́­лѡвъ при­сѣ­дѧ́­щꙋю пре­мꙋ́­дрость: и҆ не ѿлꙋ­чѝ менѐ ѿ ѻ҆́трѡкъ тво­и́хъ, ꙗ҆́кѡ а҆́зъ ра́бъ тво́й и҆ сы́нъ ра­бы́­ни тво­еѧ̀. По­слѝ ю҆̀ съ нб҃съ, ѿ ст҃а́­гѡ жи­ли́­ща тво­е­гѡ̀, и҆ ѿ прⷭ҇то́­ла сла́­вы тво­еѧ̀, да сꙋ́щи со мно́ю на­ꙋ­чи́тъ мѧ̀, что̀ бл҃го­ꙋ­го́д­но є҆́сть предꙿ то­бо́ю: и҆ на­ста́­витъ мѧ̀ въ ра́з­ꙋмъ, и҆ со­хра­ни́тъ мѧ̀ въ сла́­вѣ сво­е́й. По­мыш­лє́­нїѧ бо сме́рт­ныхъ всѧ̑ бо­ѧ­з­ли̑­ва, и҆ по­грѣ­ши́­тєль­на ᲂу҆­мыш­лє́­нїѧ и҆́хъ.

На лї­тӏ́и стї­хи́­ра хра́­ма, и҆ прпⷣбныхъ ѻ҆тє́цъ, гла́съ в҃:

Ꙗ҆вѝ на́мъ ди́в­ный во ст҃ы́хъ сво­и́хъ бг҃ъ, нѡ́­выѧ по­дви́ж­ни­ки бл҃го­чⷭ҇тїѧ, прпⷣбныѧ ста́р­цы ѻ҆́птин­скїѧ, и҆̀же въ бз҃ѣ пре­бы­ва́­ю­ще, ᲂу҆­зрѣ́­ша хрⷭ҇то́­вꙋ до­бро́­тꙋ, ѡ҆сї­ѧ́­е­ми та́й­нѡ бжⷭ҇твен­ны­ми свѣт­лость­мѝ.

Гла́съ д҃: Не да́­сте сна̀ ѻ҆че­сє́мъ ва́­шымъ, бл҃же́н­нїи, ни вѣ́ждѡмъ дре­ма́­нїѧ, до́н­де­же до­сти­го́­сте въ лю­бо́вь бж҃їю, ꙗ҆́же и҆з­лї­ѧ́­сѧ и҆зꙿѻ­би́ль­нѡ на вы̀: тѣ́м­же вос­прї­ѧ́­сте бжⷭ҇твєн­наѧ да­ро­ва̑­нїѧ, дꙋ­ше­тлѣ̑н­ныѧ стра̑­сти и҆с­цѣ­лѧ́­е­те, и҆ не­дꙋ́­ги вѣ́­рою вра­чꙋ́­е­те, и҆ ѿго́­ни­те сквє́р­ныѧ дꙋ́хи: ѻ҆тцы̀ прпⷣбнїи, мо­ли́­те ѡ҆ дꙋ­ша́хъ на́­шихъ.

Сла́­ва, гла́съ є҃:

Прї­и­ди́­те, бл҃го­чⷭ҇тїѧ ре­вни́­тє­ли, ѻ҆тцы̀ на́шѧ дх҃ѡ́в­ныѧ по­хва́­лимъ: ле­о­ні́­да, мѡ­ѷ­се́а и҆ а҆н­тѡ́­нїа, і҆са­а́­кїа, ма­ка́­рїа и҆ а҆на­то́­лїа, съ ни́­ми­же і҆ла­рї­ѡ́­на и҆ вар­со­но́­фїа, со і҆ѡ́­си­фомъ ве­ли́­ка­го а҆м­вро́­сїа, и҆на́­го а҆на­то́­лїа и҆ не­кта́­рїа, и҆ мч҃никъ нӏ́­кѡ­на и҆ і҆са­а́­кїа. ста́р­цєвъ ве­ли́­кихъ пѣ́снь­ми по­чти́мъ, къ ни́м­же взы­ва́­ю­ще во­зо­пї­и́мъ: прпⷣбнїи ѻ҆тцы̀ бг҃о­мꙋ́­дрїи, не пре­ста́й­те ѡ҆ на́съ мо­лѧ́­ще­сѧ, вы́ бо є҆стѐ за­стꙋ̑п­ни­цы на́ши.

И҆ ны́нѣ, бг҃о­ро́­ди­ченъ, гла́съ то́й­же: Хра́мъ и҆ две́рь є҆сѝ:

На стї­хо́в­нѣ стї­хи̑­ры, гла́съ д҃.

По­до́­бенъ: Зва́н­ный свы́­ше:

Воз­ло­жи́л­сѧ є҆сѝ все­дер­жи́­те­лю, ѻ҆́тче прпⷣбне львѐ, є҆гда̀ дꙋша̀ твоѧ̀ рас­па­ли́­сѧ бжⷭ҇твен­нымъ же­ла́­нї­емъ, и҆ ѹ҆́мъ тво́й къ гѡ́р­нимъ ѡ҆кри­лѝ. то­гда̀ мӏ́ръ ѡ҆ста́­вилъ є҆сѝ, и҆ всѧ̑ ꙗ҆̀же въ мӏ́рѣ, и҆ по­слѣ́­до­валъ є҆сѝ хрⷭ҇тꙋ̀ не­воз­вра́т­нымъ по́­мы­сломъ, ни­что́­же пред­по­че́тъ па́че люб­вѐ є҆гѡ̀. є҆го́­же молѝ сп҃стѝ и҆ про­свѣ­ти́­ти дꙋ́шы на́шѧ.

Стӏ́хъ: Ч҇ⷭтна̀ предꙿ гдⷭ҇емъ сме́рть прпⷣбныхъ є҆гѡ̀.

Ѿ ю҆́но­сти, прпⷣбне ма­ка́­рїе, бг҃а воз­лю­би́въ, томꙋ̀ все­дꙋ́ш­нѡ по­слѣ́­до­валъ є҆сѝ, ни­что́­же пред­по­че́тъ сꙋ́­щихъ въ мӏ́рѣ, но всѧ̑ ᲂу҆­ме́­ты вмѣ­ни́въ, по­тща́л­сѧ є҆сѝ бл҃го­ꙋ­го­ди́­ти бг҃ꙋ, за́­по­вѣдь­ми є҆гѡ̀ ᲂу҆­твер­жда́­ѧ­сѧ: тѣ́м­же же­ла́­нїѧ ко­не́ч­на­гѡ до­сти́гъ, хрⷭ҇тꙋ̀ пред­сто­и́­ши, є҆го́­же молѝ сп҃стѝ и҆ про­свѣ­ти́­ти дꙋ́шы на́шѧ.

Стӏ́хъ: Что̀ воз­да́мъ гдⷭ҇е­ви ѡ҆ всѣ́хъ, ꙗ҆̀же воз­да­де́ ми;

Прпⷣбне ѻ҆́тче а҆м­вро́­сїе, ѡ҆сно­ва́­нїе до­бро­дѣ́­те­лемъ по­ло­жи́лъ є҆сѝ стра́хъ бж҃їй. се́й бо є҆́сть на­ча́­ло пре­мꙋ́­дро­сти, и҆ ѡ҆кор­мле́­нїе во все́мъ жи­тїѝ хо­тѧ́­щымъ ᲂу҆­го­ди́­ти бг҃ꙋ, и҆ на се́мъ ѡ҆сно­ва́­нїи на­зда́лъ є҆сѝ кра̑с­ныѧ до­бро­дѣ́­тє­ли, со­блю­де́­нї­емъ за́­по­вѣ­дей влⷣки, є҆го́­же молѝ сп҃стѝ и҆ про­свѣ­ти́­ти дꙋ́шы на́шѧ.

Сла́­ва, гла́съ и҃:

Свѣ́­томъ трⷪ҇че­скимъ ѡ҆сї­ѧ́в­ше­сѧ, ѻ҆тцы̀ прпⷣбнїи, тьмы̀ и҆з­бѣ­жа́­сте сла­сте́й глꙋ­бо́­кїѧ, и҆ свѣ­ти́ль­ни­цы ꙗ҆ви́­сте­сѧ, про­свѣ­ща́­ю­ще вѣ́р­ныхъ срⷣца̀. тѣ́м­же свѣ­то­но́с­нꙋю ва́шꙋ па́­мѧть со­вер­ша́­ю­ще, со­гла́с­нѡ взы­ва́­емъ: бг҃о­но́с­нїи и҆ пре­бо­га́­тїи, мо­ли́­те хрⷭ҇та̀ бг҃а, со­грѣ­ше́­нїй ѡ҆став­ле́­нїе да­ро­ва́­ти чтꙋ́­щымъ лю­бо́­вїю ст҃ꙋ́ю па́­мѧть ва́шꙋ.

И҆ ны́нѣ, бг҃о­ро́­ди­ченъ, гла́съ то́й­же: Без­не­вѣ́ст­наѧ дв҃о:

Тро­па́рь, гла́съ а҃:

Въ мл҃твахъ не­пре­ста́н­ныхъ пре­бы­ва́­ю­ще, бла­гі̑ѧ же и҆ ѕлы̑ѧ лю­бо́­вїю ѡ҆б̾­е́м­лю­ще, прпⷣбнїи ста́р­цы ѻ҆́птин­стїи, бг҃ꙋ и҆ бли̑ж­нимъ по­слꙋ­жи́­сте, бдѣ́­нї­емъ, сле­за́­ми и҆ по­ще́­нї­емъ да­ро­ва́­нїе мно­го­раз­ли́ч­ныхъ чꙋ­де́съ прї­ѧ́­сте. сла́­ва да́в­ше­мꙋ на́мъ та­ко­вы̑ѧ хо­да̑­таи, сла́­ва про­сла́вль­ше­мꙋ ва́съ, сла́­ва бг҃ꙋ ди́в­но­мꙋ во ст҃ы́хъ сво­и́хъ.

Сла́­ва, и҆ ны́нѣ, бг҃о­ро́­ди­ченъ: Га­врї­и́­лꙋ вѣ­ща́в­шꙋ тебѣ̀, дв҃о:

А҆́ще бдѣ́­нїе со­вер­ша́­ет­сѧ: тро­па́рь два́­жды, Бцⷣе, дв҃о: є҆ди́­но­жды.

На ѹ҆́трени.

На Бг҃ъ гдⷭ҇ь: тро­па́рь прпⷣбныхъ, два́­жды. Сла́­ва, и҆ ны́нѣ, бг҃о­ро́­ди­ченъ.

По а҃-мъ стї­хо­сло́­вїи сѣ­да́­ленъ, гла́съ и҃.

По­до́­бенъ: По­ве­лѣ́н­ное та́й­нѡ:

Стра̑­сти без­сло­вє́с­ныѧ дш҃е́в­ны­ми си́­ла­ми по­ко́р­ше, прпⷣбнїи, сло­ве́с­но­мꙋ ва́­ше­мꙋ ста́­дꙋ бл҃го­дѣ­ѧ̑­нїѧ по­да­ва́­е­те, ѿ хрⷭ҇та̀ бг҃а да­ро­ва́­нї­емъ и҆с­цѣ­ле́­нїй ѡ҆бо­га́щ­ше­сѧ. тѣ́м­же сщ҃е́н­ное ва́ше и҆ свѣ­то­но́с­ное тор­же­ство̀ со­вер­ша́­ю­ще, про́­симъ ѡ҆чи­ще́­нїѧ дꙋ­ша́мъ на́­шымъ. Два́­жды.

Сла́­ва, и҆ ны́нѣ, бг҃о­ро́­ди­ченъ:

Бг҃о­ра́­до­ван­наѧ, чⷭ҇таѧ, бл҃го­сло­ве́н­наѧ, за млⷭ҇рдїе ще­дро́тъ и҆зꙿ тебє̀ ро́жд­ша­гѡ­сѧ, съ прпⷣбны­ми ѻ҆тцы̑ и҆ ста̑р­цы, и҆ со всѣ́­ми ст҃ы́­ми, ѡ҆ на́съ молѝ не­пре­ста́н­нѡ, да́ти на́мъ пре́­жде кон­ца̀ про­ще́­нїе грѣ­хѡ́въ, и҆ жи­тїѧ̀ и҆с­прав­ле́­нїе: ꙗ҆́кѡ да ѡ҆брѧ́­щемъ млⷭ҇ть.

По в҃-мъ стї­хо­сло́­вїи сѣ­да́­ленъ, гла́съ и҃.

По­до́­бенъ: По­ве­лѣ́н­ное та́й­нѡ:

Ве­ли́­кихъ да­рѡ́въ спо­до́бль­ше­сѧ, прпⷣбнїи, во сми­ре́н­номъ жи­тїѝ на зе­млѝ по­жи́­сте, тꙋ́не не­дꙋ́­гꙋ­ю­щихъ стра̑­сти вра­чꙋ́­ю­ще, ꙗ҆ви́­сте­сѧ а҆́гг҃лѡмъ со­бесѣ̑д­ни­цы, все­бл҃же́н­нїи ѻ҆тцы̀ ѻ҆́птин­стїи: и҆ на́шѧ стра̑­сти мл҃тва­ми ва́­ши­ми ᲂу҆­вра­чꙋ́й­те. Два́­жды.

Сла́­ва, и҆ ны́нѣ, бг҃о­ро́­ди­ченъ:

Не­по­сти­жи́­ма­го сло́­ва, сн҃а бж҃їѧ, не­ска­за́н­нѡ па́че ᲂу҆ма̀ и҆зꙿ тебє̀ ро́жд­ша­го­сѧ, бцⷣе, молѝ съ прпⷣбны­ми, ᲂу҆­ми­ре́­нїе чⷭ҇то все­ле́н­нѣй по­да́­ти, и҆ пре­грѣ­ше́­нїй да­ро­ва́­ти на́мъ пре́­жде кон­ца̀ про­ще́­нїе, и҆ црⷭ҇твїѧ нбⷭ҇на­гѡ, кра́й­нїѧ ра́ди бл҃го­сти, спо­до́­би­ти рабы̑ твоѧ̑.

По­лѷ­е­ле́й, и҆ ве­ли­ча́­нїе:

Оу҆­бл҃жа́­емъ ва́съ, прпⷣбнїи ѻ҆тцы̀ ѻ҆́птин­стїи, и҆ чти́мъ ст҃ꙋ́ю па́­мѧть ва́шꙋ, на­ста̑в­ни­цы мо­на́­хѡвъ и҆ со­бесѣ̑д­ни­цы а҆́гг҃лѡвъ.

Ѱа­ло́мъ и҆з­бра́н­ный: Тер­пѧ̀, по­тер­пѣ́хъ гдⷭ҇а, и҆ внѧ́тъ мѝ, и҆ ᲂу҆­слы́­ша мл҃твꙋ мою̀.

По по­лѷ­е­ле́и сѣ­да́­ленъ, гла́съ а҃.

По­до́­бенъ: Гро́бъ тво́й, сп҃се:

Не­из­ре­че́н­на ст҃ы́хъ блгⷣть, ю҆́же ѿ хрⷭ҇та̀ прї­ѧ́­ша: тѣ́м­же и҆ мѡ́щи и҆́хъ бжⷭ҇твен­ною си́­лою не­пре­ста́н­нѡ дѣ́й­ствꙋ­ютъ чꙋ­де­са̀, и҆ме­на́ же и҆́хъ вѣ́­рою при­зы­ва́­є­ма не­ис­цѣ̑ль­ныѧ бо­лѣ̑­зни и҆с­цѣ­лѧ́­ютъ. си́хъ ра́ди, гдⷭ҇и, и҆ на́съ дꙋ­ше́в­ныхъ и҆ тѣ­ле́с­ныхъ стра­сте́й сво­бо­дѝ, ꙗ҆́кѡ чл҃вѣ­ко­лю́­бецъ. Два́­жды.

Сла́­ва, и҆ ны́нѣ, бг҃о­ро́­ди­ченъ:

Мт҃рь тѧ̀ бж҃їю свѣ́­мы всѝ, дв҃ꙋ во­и́­стин­нꙋ и҆ по ржⷭ҇твѣ̀ ꙗ҆́вль­шꙋ­ю­сѧ, и҆̀же лю­бо́­вїю при­бѣ­га́­ю­щїи къ тво­е́й бл҃го­сти: тебе́ бо и҆́ма­мы грѣ́ш­нїи пред­ста́­тель­ство, тебѐ стѧ­жа́­хомъ въ на­па́­стѣхъ сп҃се́­нїе, є҆ди́­нꙋ все­не­по­ро́ч­нꙋю. Та́же сте­пє́н­на, а҃-й а҆н­тї­фѡ́нъ д҃-гѡ гла́­са.

Про­кӏ́­менъ, гла́съ д҃: Ч҇ⷭтна̀ предꙿ гдⷭ҇емъ сме́рть прпⷣбныхъ є҆гѡ̀.

Стӏ́хъ: Что̀ воз­да́мъ гдⷭ҇е­ви ѡ҆ всѣ́хъ, ꙗ҆̀же воз­да­де́ ми;

Є҆ѵⷢ҇лїе ѿ ма­тѳе́а, за­ча́­ло м҃г:

Речѐ гдⷭ҇ь сво­и̑мъ ᲂу҆­че­ни­кѡ́мъ: всѧ̑ мнѣ̀ пре­да­на̑ сꙋ́ть:

По н҃-мъ ѱал­мѣ̀: Мл҃тва­ми прпⷣбныхъ ста́р­цєвъ ѻ҆́птин­скихъ:

Та́же стї­хи́­ра, гла́съ ѕ҃:

Всѐ ѿри́­нꙋв­ше стра́ст­ное мꙋ­чи́­тель­ство, и҆ всѧ́­ко ᲂу҆­мыш­ле́­нїе лꙋ­ка́­ва­гѡ ѕмӏ́ѧ по­пра́в­ше ѡ҆ хрⷭ҇тѣ̀, прпⷣбнїи ѻ҆тцы̀ ѻ҆́птин­стїи, свѣ­то­ѡ­бра́зни ꙗ҆ви́­сте­сѧ, ꙗ҆́кѡ свѣ­ти̑­ла ѡ҆за­рѧ́­ю­ще всю̀ под­со́л­неч­нꙋю, тьмꙋ̀ ѿго­нѧ́­ю­ще, и҆ не­дꙋ́­ги блгⷣтїю вра­чꙋ́­ю­ще, и҆ всѣ̑мъ сп҃си́­тє­ли ꙗ҆в­лѧ́­ю­ще­сѧ, вѣ́­рою тво­рѧ́­щымъ ст҃ꙋ́ю па́­мѧть ва́шꙋ.

Ка­нѡ́нъ бцⷣѣ со і҆р­мо­со́мъ на ѕ҃: Во́дꙋ про­ше́дъ: и҆ прпⷣбнымъ на и҃.

Гла́съ и҃. Пѣ́снь а҃.

І҆р­мо́съ: Во́дꙋ про­ше́дъ, ꙗ҆́кѡ сꙋ́шꙋ, и҆ є҆гѵ́­пет­ска­гѡ ѕла̀ и҆з­бѣ­жа́въ, і҆и҃ль­тѧ­нинъ во­пї­ѧ́­ше: и҆з­ба́­ви­те­лю и҆ бг҃ꙋ на́­ше­мꙋ по­и́мъ.

При­пѣ́въ: Прпⷣбнїи ѻ҆тцы̀ ѻ҆́птин­стїи, мо­ли́­те бг҃а ѡ҆ на́съ.

Мо­на́­ше­ствꙋ­ю­щымъ вы̀ пра́­ви­ло є҆стѐ, въ не­дꙋ́­зѣхъ сꙋ́­щымъ и҆ скор­бѧ́­щымъ и҆с­цѣ­ли́­тє­ли, и҆ па́­сты­рїе за­блꙋ­жда́­ю­щихъ ѻ҆ве́цъ, ва́мъ на­ꙋ­чи́­те пѣ́снь до­сто́й­нѡ при­нес­тѝ.

На­ста̑в­ни­ки на́шѧ вос­хва­лѧ́­ю­ще, зо­ве́мъ: вы̀ є҆стѐ сѣ́мѧ ст҃о, прпⷣбнїи ѻ҆тцы̀, зе­млѝ рѡс­сӏ́й­скїѧ хва­ле́­нїе, и҆ ча́­дѡмъ ва́­шымъ ᲂу҆­твер­жде́­нїе.

Ста­до­на­ча́ль­ни­че мо­на́­ше­скихъ дво­рѡ́въ, чре­ды̑ на­ста́­вивъ и҆́но­кѡвъ къ нбⷭ҇нѣй па́­жи­ти, ра́­дꙋй­сѧ, ѻ҆́тче на́шъ па­ѵ́­сїе чⷭ҇тны́й, на­ста́­ви­вый зе­млѝ рѡс­сӏ́й­скїѧ кон­цы̀.

Сле­за́­ми мно́­ги­ми и҆ ско́рб­нымъ жи­тї­е́мъ ѳе­о́­дѡръ, и҆́нокъ сви́р­скїй, ѕла̑ѧ пре­тер­пѣ̀, ѻ҆ба́­че тве́рдъ и҆ крѣ́­покъ сы́й ᲂу҆­мо́мъ, въ бо­лѣ́­знехъ сы́на льва̀ дх҃о́в­нѡ по­ро­дѝ.

Бг҃о­ро́­ди­ченъ: Ѽ мт҃и дв҃о бцⷣе, хрⷭ҇та̀ молѝ, во­пло́щ­ша­го­сѧ и҆зꙿ тебє̀, да со­хра­ни́тъ рѡс­сӏ́й­скꙋю стра­нꙋ̀, и҆ дш҃ы на́шѧ, ꙗ҆́кѡ млⷭ҇тивъ, сп҃се́тъ.

Ка­та­ва́­сїа: Ѿве́р­зꙋ ᲂу҆­ста̀ моѧ̑:

Пѣ́снь г҃.

І҆р­мо́съ: Нбⷭ҇на­гѡ крꙋ́­га вер­хо­тво́р­че, гдⷭ҇и, и҆ цр҃кве зи­жди́­те­лю, ты̀ менѐ ᲂу҆­твер­дѝ въ люб­вѝ тво­е́й, же­ла́­нїй кра́ю, вѣ́р­ныхъ ᲂу҆­твер­жде́­нїе, є҆ди́­не чл҃вѣ­ко­лю́б­че.

Ѡ҆сно­ва́­нїе тве́р­до по́­дви­гѡмъ по­ло­жи́лъ є҆сѝ, ка́­мень кра­е­ꙋ­го́ль­ный, хрⷭ҇та̀: и҆ бы́сть пер­во­на­ча́ль­никъ со́н­мꙋ ста́р­цєвъ, Ѽ львѐ, и҆ прї­ѧ́тъ блгⷣть ѿго­нѧ́­ти не­дꙋ́­ги ѿ лю́тѣ стра́­ждꙋ­щихъ.

Во­пї­ѧ́лъ є҆сѝ си́це, Ѽ львѐ, ко ѡ҆би́­дѧ­щымъ: пою̀ бг҃о­ви, до́н­де­же є҆́смь, кто̀ менѐ раз­лꙋ­чи́тъ ѿ люб­вѐ є҆гѡ̀; въ не́й­же пре­бы́сть до кон­чи́­ны, со­вер­ша́ѧ во́лю є҆гѡ̀ со дер­зно­ве́­нї­емъ.

Прпⷣбный ма­ка́­рїй бл҃же́нъ бы́сть во­и́­стин­нꙋ, на­сы́­ти бо а҆́л­чꙋ­щихъ дꙋ́шы, тꙋ́не пи­та́ѧ всѣ́хъ сло́­вомъ, блгⷣти и҆с­по́л­нен­нымъ, по­треб­лѧ́ѧ дꙋ­ше́в­ный гла́дъ, ᲂу҆­ми­рѧ́ѧ дꙋ́шы, страсть­мѝ ѡ҆бꙋ­ре­ва́­є­мыѧ.

Бг҃о­ро́­ди­ченъ: Ѿ тебє̀, бг҃о­мт҃и, и҆с­те­чѐ по­то́къ сла́д­кїй, всѧ̑ на­па­ѧ́ѧ лю́ди, сквє́р­ны дꙋ́шъ и҆з­мы­ва́ѧ, Ѽ бцⷣе дв҃о: тѣ́м­же сп҃са́й ѿ бѣ́дъ всѣ́хъ, и҆̀же ѡ҆́бразъ тво́й чⷭ҇тны́й по­чи­та́­ю­щихъ.

Сѣ­да́­ленъ, гла́съ д҃:

Ꙗ҆ви́­сте­сѧ дх҃а ст҃а́­гѡ ѻ҆р­га́­ни, ѻ҆тцы̀ прпⷣбнїи, и҆ прⷪ҇ро́­че­ства да́ра спо­до́­би­сте­сѧ: и҆́бо въ ва́­шихъ дꙋ­ша́хъ воз­сїѧ̀ свѣ́тъ не­при­стꙋ́п­ный. Два́­жды.

Сла́­ва, и҆ ны́нѣ, бг҃о­ро́­ди­ченъ:

Ꙗ҆́кѡ всѣ́хъ є҆сѝ тво­ре́­нїй вы́ш­шаѧ, вос­пѣ­ва́­ти тѧ̀ до­сто́й­нѡ не­до­ꙋ­мѣ́­ю­ще, мо́­лимъ тѧ̀, бцⷣе: тꙋ́не по­ми́­лꙋй на́съ.

Пѣ́снь д҃.

І҆р­мо́съ: Оу҆­слы́­шахъ, гдⷭ҇и, смо­тре́­нїѧ тво­е­гѡ̀ та́­ин­ство, раз­ꙋ­мѣ́хъ дѣла̀ твоѧ̑, и҆ про­сла́­вихъ твоѐ бж҃е­ство̀.

Ѽ мꙋ­дрѣ́й­шїй ма­ка́­рїе, ты̀ во­стор­га́лъ є҆сѝ кла́­сы дх҃ѡ́в­ныѧ ѿ пи­са́­нїй сщ҃е́н­ныхъ ѻ҆тє́цъ, и҆ на­сы́­тилъ є҆сѝ дꙋ́шы а҆́л­чꙋ­щихъ.

Ты̀ на­ста́в­никъ бы́въ и҆́но­кѡмъ, во пред­те́­чи ѻ҆би́­те­ли, Ѽ а҆н­тѡ́­нїе, воз­дер­жа́­тель­нымъ жи­тї­е́мъ: по­мо­ли́­сѧ ѡ҆ вос­хва­лѧ́­ю­щихъ тѧ̀.

Мѡ­ѷ­се́е, а҆н­тѡ́­нїе, и҆ по пло́­ти и҆ по дх҃ꙋ сꙋ́ще бра́­тїе, бг҃о­мꙋ́­дрїи па́­сты­рїе, вы̀ на­ста́­ви­сте ѻ҆́вцы на па̑­жи­ти.

Бг҃о­ро́­ди­ченъ: Бцⷣе чⷭ҇таѧ, цвѣ́­те бжⷭ҇твен­ный и҆ про­зѧ́б­шїй ко́­ре­ню, ты̀ ѡ҆ на́съ не­пре­ста́н­нѡ молѝ, бцⷣꙋ тѧ̀ вос­пѣ­ва́­ю­щихъ.

Пѣ́снь є҃.

І҆р­мо́съ: Про­свѣ­тѝ на́съ по­ве­лѣ́­нїи тво­и́­ми, гдⷭ҇и, и҆ мы́ш­цею тво­е́ю вы­со́­кою тво́й ми́ръ по­да́ждь на́мъ, чл҃вѣ­ко­лю́б­че.

Прї­ѧ́тъ є҆лї­се́й ѿ и҆лїѝ блгⷣть сꙋ­гꙋ́­бꙋю, на тебѣ́ же, ѻ҆́тче а҆м­вро́­сїе, блгⷣть почѝ ѻ҆тє́цъ, льва̀ и҆ ма­ка́­рїа.

Ѽ а҆м­вро́­сїе, ты̀ лю­бо́вь въ себѣ̀ стѧ­жа́лъ є҆сѝ, со­вер­ше́­нїе до­бро­дѣ́­те­лей: всѣ̑мъ бо всѧ̑ бы́лъ є҆сѝ, и҆ ᲂу҆­бѡ́­гимъ при­бѣ́­жи­ще.

Ѽ а҆м­вро́­сїе, ты̀ бжⷭ҇твен­ною пи́­щею на­пи­та́лъ є҆сѝ а҆́л­чꙋ­щаѧ срⷣца̀, ѻ҆́вцы своѧ̑ ᲂу҆­па́съ на сло­ве́с­нѣй па́­жи­ти.

Бг҃о­ро́­ди­ченъ: Мт҃и бж҃їѧ, и҆ за­стꙋ́п­ни­це ᲂу҆­се́рд­наѧ, про­свѣ­тѝ на́съ, мо­лѧ́­щих­сѧ тебѣ̀, при́­снѡ мо­лѧ́­щи ѡ҆ на́съ, не­до­сто́й­ныхъ ра­бѣ́хъ тво­и́хъ.

Пѣ́снь ѕ҃.

І҆р­мо́съ: Мл҃твꙋ про­лїю̀ ко гдⷭ҇ꙋ, и҆ томꙋ̀ воз­вѣ­щꙋ̀ пе­ча̑­ли моѧ̑, ꙗ҆́кѡ ѕѡ́лъ дꙋша̀ моѧ̀ и҆с­по́л­ни­сѧ, и҆ жи­во́тъ мо́й а҆́дꙋ при­бли́­жи­сѧ, и҆ мо­лю́­сѧ, ꙗ҆́кѡ і҆ѡ́на: ѿ тлѝ, бж҃е, воз­ве­ди́ мѧ.

Сы́нъ и҆́стин­ный ꙗ҆ви́л­сѧ є҆сѝ, і҆ѡ́­си­фе, стѧ­жа́въ ро­ди́­тель­ни­цꙋ без­стра́­стїѧ, не­ли­це­мѣ́р­ное по­слꙋ­ша́­нїе: и҆ ꙗ҆́кѡ кро́­токъ, чⷭ҇тъ же и҆ млⷭ҇тивъ, сми­ре́н­нѡ гла­го́­лалъ є҆сѝ: не­по­тре́­бенъ є҆́смь безꙿ ѻ҆тца̀ мо­е­гѡ̀.

І҆ѡ́­сифъ цѣ­ло­мꙋ́­дрен­ный и҆́стин­нѡ по сто­па́мъ ѻ҆тца̀ сво­е­гѡ̀ хо­жда́­ше: да́же до сме́р­ти са́мъ себѐ сми­рѧ́­ше, си́це влⷣцѣ хрⷭ҇тꙋ̀ ᲂу҆­по­до́­бив­сѧ. сегѡ̀ ра́ди мо́­лимъ є҆го̀: на­ꙋ­чѝ и҆ на́съ грѣ́ш­ныхъ сми­ре́­нїю.

Ѻ҆тца̀ сво­е­гѡ̀ лю­бо́вь стѧ­жа́въ, а҆на­то́­лїе, съ ни́мъ ᲂу҆­па́слъ є҆сѝ сло­ве́с­ное ста́­до: и҆ ны́нѣ, ѻ҆́тче, на́съ не за­бꙋ́­ди, ѻ҆́вцы своѧ̑ по­мѧ­нѝ и҆ на­ста́­ви ѧ҆̀, взы­щѝ за­блꙋ­жда́­ю­щихъ ча́дъ, на­став­лѧ́ѧ всѣ́хъ на́съ ко сп҃се́­нїю.

Бг҃о­ро́­ди­ченъ: За­стꙋ́п­ни­цꙋ тѧ̀ вѣ́мъ въ жи­во­тѣ̀ мо­е́мъ, и҆ хра­ни́­тель­ни­цꙋ тве́р­дꙋ, дв҃о, сво­бо­жда́­ю­щꙋ мѧ̀ ѿ стра­сте́й, и҆ при­ло́­ги бѣ­сѡ́въ ѿго­нѧ́­ю­щꙋ, и҆ си́це мо­лю́­сѧ все­гда̀: ѿ стра­сте́й мо­и́хъ мѧ̀ да и҆з­ба́­ви­ши.

Кон­да́къ, гла́съ и҃. По­до́­бенъ: Взбра́н­ной:

И҆́же ѿ мӏ́ра сꙋ́­ет­на­гѡ ᲂу҆­кло­ни́в­ше­сѧ, и҆ чⷭ҇тымъ жи­тї­е́мъ со­кро́­ви­ще ѡ҆брѣ́т­шїи, по­пе­че́­нїѧ ѡ҆ грѣ́ш­ныхъ, сꙋ́­щихъ въ мӏ́рѣ, не ѡ҆ста́­ви­сте: но ꙗ҆́кѡ сꙋ́ще за­блꙋ­жда́­ю­щымъ на­ста̑в­ни­цы, и҆ на́съ ѿ сꙋ­е­ты̀ мїр­скӏ́ѧ и҆з­ба́­ви­те, ꙗ҆́кѡ да зо­ве́мъ: ра́­дꙋй­те­сѧ, ста́р­цы бг҃о­мꙋ́­дрїи.

І҆́косъ: А҆́гг҃лѡмъ по­ре­вно­ва́в­ше, ᲂу҆­стра­ни́­сте­сѧ мӏ́ра, во­жде­лѣ́в­ше въ пꙋ­сты́­ню все­ли́­ти­сѧ: но и҆ на́съ, сꙋ́­щихъ въ мӏ́рѣ є҆щѐ, не за­бꙋ́­ди­те, мо́­лим­сѧ мы̀, грѣ́ш­нїи, да пре́­ле­сти и҆з­ба́вль­ше­сѧ, къ ва́мъ воз­гла­го́­лемъ си́це: Ра́­дꙋй­те­сѧ, вра́­че­ве дш҃е́в­ныхъ бо­лѣ́­зней: ра́­дꙋй­те­сѧ, цѣ­ли́­тє­ли не­дꙋ́­гѡвъ тѣ­ле́с­ныхъ. Ра́­дꙋй­те­сѧ, пре­мꙋ́­дрыхъ ра́з­ꙋ­момъ пре­вос­хо­дѧ́­щїи: ра́­дꙋй­те­сѧ, не­мꙋ́­дрыхъ къ ра́з­ꙋ­мꙋ на­став­лѧ́­ю­щїи. Ра́­дꙋй­те­сѧ, не­пре­ста́н­ныѧ мл҃твы дѣ́­ла­тє­ли: ра́­дꙋй­те­сѧ, ѡ҆ грѣ́ш­ни­цѣхъ къ бг҃ꙋ хо­да̑­таи. Ра́­дꙋй­те­сѧ, ста́р­цы бг҃о­мꙋ́­дрїи.

Пѣ́снь з҃.

І҆р­мо́съ: Ѿ і҆ꙋ­де́и до­ше́д­ше ѻ҆́тро­цы, въ ва­вѷ­лѡ́­нѣ и҆но­гда̀, вѣ́­рою трⷪ҇че­скою пла́­мень пе́щ­ный по­пра́­ша, по­ю́­ще: ѻ҆тцє́въ бж҃е, бл҃го­сло­ве́нъ є҆сѝ.

Ѻ҆́тче і҆ла­рї­ѡ́­не, ᲂу҆­кло­ни́в­сѧ ѿ мӏ́ра, и҆ всѧ̑, ꙗ҆̀же въ мӏ́рѣ, ѡ҆ста́вль и҆ ᲂу҆­ме́­ты вмѣ­ни́въ, ста́р­цємъ при­лѣ­пи́л­сѧ є҆сѝ, ле­о­нӏ́­дꙋ съ ма­ка́­рї­емъ, вла́сть ѿ хрⷭ҇та̀ прї­ѧ́въ бѣ́сы про­го­нѧ́­ти.

Оу҆­тѣ­ша́­ше і҆са­а́­кїй со­стра­да́­тель­ный и҆́но­ки, и҆̀же къ немꙋ̀ при­хо­дѧ́­щыѧ, и҆ си́­лою мл҃твы ѿ ѕлы́хъ ѡ҆гра­жда́­ше и҆̀хъ, за­стꙋ­па́ѧ всѧ́­че­ски, ꙗ҆́кѡ ѻ҆тє́цъ и҆лѝ ма́ти сы́й ча́­дѡмъ сво­и̑мъ.

Нѣ́сть прⷪ҇ро́­ка безꙿ че́­сти, но въ домꙋ̀ сво­е́мъ то́­кмѡ, всѣ́хъ бо и҆з­гна́­ша прⷪ҇рѡ́къ: и҆ ты̀ и҆з­гна́нъ бы́въ, ѻ҆́тче, спо­до́­би­сѧ бл҃же́н­ства, вар­со­но́­фїе првⷣне, и҆з­гна́­нїе пре­тер­пѣ́­вый пра́­вды ра́ди.

Бг҃о­ро́­ди­ченъ: Подꙿ твою̀, дв҃о, млⷭ҇ть при­бѣ­га́­ю­щихъ вѣ́р­нѡ, и҆ по­кла­нѧ́­ю­щих­сѧ тво­е­мꙋ̀ сн҃ꙋ, бг҃о­ро­ди́­тель­ни­це, по­мо­ли́­сѧ є҆мꙋ̀ ѡ҆ на́съ, ꙗ҆́кѡ да и҆з­ба́­вим­сѧ ѿ бѣ́дъ и҆ и҆с­кꙋ­ше́­нїй.

Пѣ́снь и҃.

І҆р­мо́съ: Цр҃ѧ̀ нбⷭ҇на­го, є҆го́­же по­ю́тъ вѡ́и а҆́гг҃ль­стїи, хва­ли́­те и҆ пре­воз­но­си́­те во всѧ̑ вѣ́ки.

Сла́­вѣ вѣ́ч­нѣй при­ча́ст­никъ бы́сть не­кта́­рїй, ᲂу҆­кло­ни́в­сѧ жи­те́й­скїѧ сла́­вы: всѧ́къ бо сми­рѧ́­ѧй себѐ воз­не­се́т­сѧ.

Да ᲂу҆­бл҃жа́т­сѧ ѻ҆тцы̀: а҆на­то́­лїй, не­кта́­рїй, съ ни́­ми­же і҆са­а́­кїй и҆ нӏ́­кѡнъ: за­ко́н­нѡ бо по­стра­да́в­ше, ли­кꙋ́­ютъ во всѧ̑ вѣ́ки.

Бы́в­ше и҆з­гна́­ни ѻ҆тцы̀ ѿ ѿстꙋ̑п­никъ, не смꙋ­ти́­ша­сѧ, но во­зо­пи́­ша: на́ше жи­тїѐ на нб҃сѣ́хъ є҆́сть.

Бг҃о­ро́­ди­ченъ: По́­мо­щи, ꙗ҆́же ѿ тебє̀, тре́­бꙋ­ю­щыѧ не пре́­зри, дв҃о, по­ю́­щыѧ и҆ пре­воз­но­сѧ́­щыѧ тѧ̀ во вѣ́ки.

Пѣ́снь ѳ҃.

І҆р­мо́съ: Во­и́­стин­нꙋ бцⷣꙋ тѧ̀ и҆с­по­вѣ́­дꙋ­емъ, сп҃се́н­нїи то­бо́ю, дв҃о чⷭ҇таѧ, съ без­пло́т­ны­ми ли̑ки тѧ̀ ве­ли­ча́­ю­ще.

Во­и́­стин­нꙋ стѧ­жа́­сте всѧ́­кꙋ до­бро­дѣ́­тель, да­ро­ва́­нїе же всѧ́­ко да­ро­ва́­сѧ ва́мъ: но сп҃си́­те ста́­до ва́ше, мо­лѧ́­ще­сѧ за ны̀.

Ѡ҆ все́мъ бл҃го­да­ри́­те, за́­по­вѣдь прї­ѧ́­хомъ: да по­хва́­лимъ бг҃а, ꙗ҆́кѡ да­ро­ва́лъ є҆́сть на́мъ ва́съ, на­ста́в­ни­ки ст҃ы̑ѧ во црⷭ҇твїе є҆гѡ̀.

Пред­ста́­те­лїе на́ши, ѡ҆ стра­нѣ̀ рѡс­сӏ́й­стѣй по­мо­ли́­те­сѧ при­лѣ́ж­нѡ, и҆ сп҃си́­те всѣ́хъ, и҆̀же па́­мѧть ва́шꙋ вѣ́р­нѡ со­вер­ша́­ютъ.

Бг҃о­ро́­ди­ченъ: Влⷣчце ст҃а́ѧ, по­мо­га́й на́мъ, грѣ̑ш­нымъ, и҆ ѿ ѕлы́хъ вра­гѡ́въ и҆з­ба́­ви ѻ҆те́­че­ство на́ше: тебѐ мо́­лимъ, со­хра­нѝ на́съ подꙿ кро́­вомъ тво­и́мъ.

Свѣ­ти́­ленъ. По­до́­бенъ: Нб҃о ѕвѣз­да́­ми:

Ста́р­цы по­чти́мъ бг҃о­мꙋ̑­дрыѧ, свѣ­ти́ль­ни­ки свѣ̑т­лыѧ, по­дви́ж­ни­ки бл҃го­чⷭ҇тїѧ, до­бро­дѣ́­те­лей ᲂу҆­чи́­тє­ли, ѡ҆ на́съ мл҃твен­ни­ки, и҆ на­ста́в­ни­ки вѣ́ры. Два́­жды.

Сла́­ва, и҆ ны́нѣ, бг҃о­ро́­ди­ченъ:

Сла́­дость а҆́гг҃лѡвъ, скор­бѧ́­щихъ ра́­дость, хрⷭ҇тї­а́нъ пред­ста́­тель­ни­це, дв҃о мт҃и гдⷭ҇нѧ, за­стꙋ­пѝ на́съ, и҆ и҆з­ба́­ви вѣ́ч­ныхъ мꙋ́къ.

На хва­ли́­техъ стї­хи̑­ры на д҃, гла́съ ѕ҃.

По­до́­бенъ: Всѐ ѿло́ж­ше:

Всѐ ѿло́ж­ше* ѡ҆ зем­ны́хъ по­пе­че́­нїе,* и҆ стра­сте́й мꙋ­чи́­тель­ство* да­ле́­че ѿ себє̀ ѿри́­нꙋв­ше,* прпⷣбнїи ѻ҆тцы̀ бг҃о­мꙋ́­дрїи,* въ пꙋ­сты́­ню все­ли́­сте­сѧ,* и҆ срⷣце ѡ҆чⷭ҇тив­ше,* про­свѣ­ти́­сте­сѧ блгⷣтїю,* и҆ ꙗ҆́кѡ свѣ­ти̑­ла воз­сї­ѧ́в­ше,* про­свѣ­ща́­е­те всю̀ под­со́л­неч­нꙋю,* тьмꙋ̀ ѿго­нѧ́­ще* ѿ чтꙋ́­щихъ ст҃ꙋ́ю па́­мѧть ва́шꙋ.

Дх҃ѡ́в­наѧ свѣ­ти̑­ла,* на тве́р­ди цр҃ко́в­нѣй воз­сї­ѧ̑в­шаѧ* въ по­слѣ̑д­нѧѧ вре­ме­на̀,* на­став­лѧ́­ютъ къ ти́­хо­мꙋ при­ста́­ни­щꙋ* ѡ҆бꙋ­ре­ва́­е­мыхъ въ пꙋ­чи́­нѣ,* и҆ жи­те́й­ски­ми сласть­мѝ по­грꙋ­жа́­е­мыхъ,* грѣ­хо́в­нꙋю мглꙋ̀ ѿго­нѧ́­ютъ,* и҆ бꙋ́рю стра­сте́й ᲂу҆­ти­ша́­ютъ,* и҆ со дер­зно­ве́­нї­емъ мо́­лѧт­сѧ* ѡ҆ сп҃се́­нїи дꙋ́шъ на́­шихъ.

На­ста̑в­ни­цы дх҃о́в­нїи* на­став­лѧ́­ютъ къ нбⷭ҇но­мꙋ црⷭ҇твїю* хо­тѧ́­щихъ сп҃сти́­сѧ,* и҆ пꙋ́ть на́мъ ᲂу҆­ка­зꙋ́­ютъ ко сп҃се́­нїю,* пꙋ́ть ѹ҆́з­кїй и҆ тѣ̑­снаѧ вра­та̀,* вво­дѧ̑­щаѧ въ црⷭ҇тво,* ѿ пꙋти́ же по­ги́­бель­на­гѡ воз­бра­нѧ́­ютъ,* ши­ро́­ка­гѡ и҆ про­стра́н­на­гѡ,* да не по­ги́б­немъ, не­ра­ди́в­ше* ѡ҆ сп҃се́­нїи дꙋ́шъ на́­шихъ.

Не кто­мꙋ̀ въ га­да́­нї­ихъ,* но и҆́сти­ною и҆ ли­це́мъ къ лицꙋ̀,* зер­ца́­лѡмъ раз­рѣ́ш­шым­сѧ,* зри́­те сла́­вꙋ гдⷭ҇ню,* и҆́хже ѻ҆́чи не ви́­дѣ­ша и҆ ѹ҆́ши не слы́­ша­ша,*и҆ на срⷣце че­ло­вѣ́­кѡмъ не взы­до́­ша,* ꙗ҆̀же ᲂу҆­го­то́­ва бг҃ъ лю́­бѧ­щымъ є҆го̀.* си́хъ бл҃ги́хъ мо­ли́­те­сѧ и҆ на́мъ ᲂу҆­лꙋ­чи́­ти,* со­вер­ша́­ю­щымъ па́­мѧть ва́шꙋ.

Сла́­ва, гла́съ и҃:

Воз­дви́г­ше крⷭ҇тъ на ра́­ме­на своѧ̑, и҆ пло́ть рас­пе́н­ше со страсть­мѝ и҆ по­хоть­мѝ, со­тро́­сте ѕмӏ́­е­вꙋ гла­вꙋ̀: и҆ на́съ ꙗ҆ви́­те по­бѣ­ди́­тє­ли грѣ­ха̀, и҆ по­ка­ѧ́­нїѧ до­стѡ́й­ныѧ пло­ды̀ при­но­си́­ти на­ꙋ­чи́­те.

И҆ ны́нѣ, бг҃о­ро́­ди­ченъ, гла́съ то́й­же:

Влⷣчце, прї­и­мѝ мл҃твы ра̑бъ тво­и́хъ, и҆ и҆з­ба́­ви ны̀ ѿ всѧ́­кїѧ нꙋ́­жды и҆ пе­ча́­ли.

Сла­во­сло́­вїе ве­ли́­кое. Є҆ктє­нїѝ, и҆ ѿпꙋ́стъ.

На лїтꙋргӏ́и.

Бл҃жє́н­на ѿ ка­нѡ́­на прпⷣбныхъ, пѣ́снь г҃ и҆ ѕ҃, на и҃.

Про­кӏ́­менъ, гла́съ з҃: Ч҇ⷭтна̀ предꙿ гдⷭ҇емъ сме́рть прпⷣбныхъ є҆гѡ̀.

Стӏ́хъ: Что̀ воз­да́мъ гдⷭ҇е­ви ѡ҆ всѣ́хъ, ꙗ҆̀же воз­да­де́ ми;

А҆пⷭ҇лъ къ га­ла́­тѡмъ, за­ча́­ло сг҃і.

А҆л­ли­лꙋ́­їа, гла́съ ѕ҃: Бл҃же́нъ мꙋ́жъ, бо­ѧ́й­сѧ гдⷭ҇а, въ за́­по­вѣ­дехъ є҆гѡ̀ вос­хо́­щетъ ѕѣлѡ̀.

Стӏ́хъ: Си́ль­но на зе­млѝ бꙋ́­детъ сѣ́мѧ є҆гѡ̀.

Є҆ѵⷢ҇лїе ѿ лꙋкѝ, за­ча́­ло к҃д.

При­ча́­стенъ: Ра́­дꙋй­те­сѧ, првⷣнїи, ѡ҆ гдⷭ҇ѣ, пра̑­вымъ по­до­ба́­етъ по­хва­ла̀.

Мл҃тва ко прпⷣбнымъ ѻ҆тцє́мъ ѻ҆́птин­скимъ:

Ѽ бжⷭ҇твен­ный со́н­ме прпⷣбныхъ ѻ҆тє́цъ, бг҃о­но́с­нїи ста́р­цы ѻ҆́птин­стїи, а҆́гг҃ль­скимъ жи­тї­е́мъ на зе­млѝ про­сї­ѧ́в­шїи, и҆ въ нбⷭ҇нѣмъ гра́­дѣ про­сла́в­лен­нїи! Вѣ́мы, ꙗ҆́кѡ во дни̑ зем­на́­гѡ слꙋ­же́­нїѧ ва́­ше­гѡ ни­кто́­же то́щъ и҆ не­ꙋ­тѣ́­шенъ ѿ ва́съ ѿи́де, но всѣ̑мъ всѧ̑ бы́­сте: бо­лѧ́­щымъ цѣ­ли́­те­лїе, со­мнѧ́­щым­сѧ ᲂу҆­твер­жде́­нїе, пе­ча́ль­нымъ ᲂу҆­тѣ́­ши­те­лїе: ꙗ҆́кѡ блгⷣть и҆с­цѣ­ле́­нїѧ, про­зрѣ́­нїѧ, не­мощ­ны́хъ дꙋ́шъ вра­че­ва́­нїѧ ѻ҆би́ль­на въ ва́съ ꙗ҆ви́­сѧ. Но и҆ ны́нѣ всѣ̑мъ на́мъ є҆стѐ пред­ста́­те­лїе, и҆ ѡ҆ стра́­ждꙋ­щемъ ѻ҆те́­че­ствѣ на́­шемъ при́­снїи предꙿ прⷭ҇то́­ломъ бж҃ї­имъ пе­ча̑ль­ни­цы, ва́мъ бо да­де́­сѧ є҆́же за ны̀ мо­ли́­ти­сѧ. При́­зри­те ѹ҆́бѡ ѿ го́р­нїѧ сла́­вы, и҆ ви́­ди­те ста́­до ва́ше, є҆́же па­слѝ є҆стѐ на па́­жи­ти ᲂу҆­че́­нїѧ хрⷭ҇то́­ва, ꙗ҆́кѡ смѧ­те́­но є҆́сть и҆ по­ве́р­же­но, и҆ ѿ вол­кѡ́въ дꙋ­ше­тлѣ́н­ныхъ рас­хи­ща́­е­мо: по­сѣ­ти́­те на́съ, не­мощ­ны́хъ и҆ без­по­мо́щ­ныхъ, бл҃го­се́р­дї­емъ ва́­шимъ, за­блꙋ̑жд­шыѧ взы­щи́­те, рас­то­чє́н­ныѧ со­бе­ри́­те, прельщє́н­ныѧ ѡ҆б­ра­ти́­те, и҆ со­во­кꙋ­пи́­те ст҃ѣ́й, со­бо́р­нѣй и҆ а҆пⷭ҇ль­стѣй цр҃кви: ꙗ҆̀же во и҆́но­че­стѣмъ жи­тїѝ, ѡ҆гра­ди́­те ѿ всѣ́хъ на­вѣ̑тъ вра́­жї­ихъ, ю҆́ность вра­зꙋ­ми́­те, ста́­рость под­дер­жи́­те, сꙋ­прꙋ́­жє­ства въ мӏ́рѣ и҆ є҆ди­но­мы́­слїи со­блю­ди́­те. Ѹ҆слы́­ши­те на́съ, дꙋ́шъ бжⷭ҇твен­нїи вра́­че­ве, и҆ на­ста́­ви­те на́съ на пꙋ́ть по­ка­ѧ́­нїѧ, да по­слѣ́­дꙋ­ю­ще сло­ве­сє́мъ ва́­шымъ, воз­ло­жи́мъ себѐ и҆ ве́сь жи­во́тъ на́шъ въ рꙋ́цѣ пре­ве­ли́­ка­гѡ млⷭ҇рдїѧ бж҃їѧ, да рꙋ­ко­во­ди́тъ во́лѧ є҆гѡ̀ на́­ши­ми мы́сль­ми и҆ чꙋ́в­ствы, во всѣ́хъ дѣ́­лѣхъ и҆ сло­ве­сѣ́хъ на́­шихъ. Про­стри́­те на́мъ рꙋ́кꙋ по́­мо­щи, ѻ҆тцы̀ все­бл҃же́н­нїи, и҆ на­ꙋ­чи́­те на́съ мо­ли́­ти­сѧ, вѣ́­ро­ва­ти, ᲂу҆­по­ва́­ти, тер­пѣ́­ти, про­ща́­ти и҆ лю­би́­ти: да та́кѡ въ за́­по­вѣ­дехъ гдⷭ҇нихъ при́­снѡ хо­дѧ́­ще, спо­до́­бим­сѧ хо­да́­тай­ствомъ ва́­шимъ вѣ́ч­ныѧ ра́­до­сти, црⷭ҇твїѧ нбⷭ҇на­гѡ, и҆дѣ́­же вкꙋ́­пѣ съ ва́ми про­сла́­вимъ бг҃а, ди́в­на­го во ст҃ы́хъ сво­и́хъ, ѻ҆ц҃а̀ и҆ сн҃а и҆ ст҃а́­го дх҃а, во вѣ́ки. А҆ми́нь.