Мѣ́сѧца ное́мврїа въ к҃з-й де́нь, ма́рта въ и҃-й де́нь,

въ ѳ҃-й пѧто́къ по па́сцѣ, и҆ септе́мврїа въ и҃-й де́нь.

Слꙋ́жба прест҃ѣ́й бцⷣѣ, предꙿ чꙋдотво́рною і҆кѡ́ною є҆ѧ̀, ꙗ҆́же нарица́етсѧ кꙋ́рскаѧкоренна́ѧ.

На вели́цѣй вече́рни.

Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ: стїхи̑ры на и҃, гла́съ и҃.

Подо́бенъ: Ѽ пресла́внагѡ чꙋдесѐ:

Ѽдв҃о всепѣ́таѧ,* бг҃а сло́ва мт҃и пренепоро́чнаѧ,* а҆́гг҃лѡвъ ᲂу҆дивле́нїе,* хрⷭ҇тїа́нѡмъ застꙋ́пнице,* стѣна̀ нерꙋши́ма на́мъ бꙋ́ди* сопроти́въ ѡ҆полче́нїй ви́димыхъ и҆ неви́димыхъ вра̑гъ,* бг҃оно́снѣи твоѝ рꙋ́цѣ къ сн҃ꙋ простира́ющи,* и҆ мл҃твою тѝ всемо́щною совѣ́ты нечести́выхъ разрꙋша́ющи,* и҆ зна́менїе млⷭ҇ти твоеѧ̀ на́мъ ꙗ҆влѧ́ющи.

Гпⷭ҇жѐ бцⷣе,* ᲂу҆пова́нїе непосты́дное,* ны́нѣ срⷣца̀ съ колѣ́ны преклонѧ́юще,* ᲂу҆ми́льнѡ къ тебѣ̀ взыва́емъ:* странꙋ̀ на́шꙋ рѡссӏ́йскꙋю, ꙗ҆́же дре́вле до́мъ тво́й нарица́шесѧ,* и҆зꙿ рꙋкѝ дїа́воли и҆схитѝ,* бг҃оно́снѣи рꙋ́цѣ твоѝ къ сн҃ꙋ простира́ющи,* и҆ мл҃твою твое́ю всю̀ си́лꙋ вра́жїю попалѧ́ющи,* и҆ зна́менїе млⷭ҇ти твоеѧ̀ на́мъ ꙗ҆влѧ́ющи.

Ѽ всѣ́хъ ра́достей ра́досте,* скорбѧ́щихъ пресла́дкое ᲂу҆тѣше́нїе,* грѣ́шныхъ спорꙋ́чнице,* вѣ́рныхъ сп҃се́нїе,* приведѝ на́съ въ нбⷭ҇ное црⷭ҇твїе,* предста́тельствомъ твои́мъ не́мощь на́шꙋ восполнѧ́ющи,* и҆ на стра́шнѣмъ сꙋди́щи хрⷭ҇то́вѣ предста́ни на́мъ,* мꙋ́ки вѣ́чныѧ на́съ и҆збавлѧ́ющи,* и҆ зна́менїе млⷭ҇ти твоеѧ̀ на́мъ ꙗ҆влѧ́ющи.

Ѽ слы́шанїѧ чꙋ́днагѡ,* Ѽ видѣ́нїѧ пресла́внагѡ:* і҆кѡ́на бг҃омт҃ре, въ дꙋбра́вѣ сокрове́ннаѧ,* и҆сто́чникъ же воды̀ живы́ѧ,* приснотекꙋ́щїй въ живо́тъ вѣ́чный, и҆сточа́ющаѧ.* тѣ́мже ѡ҆брѣ́тше ю҆̀, ликовствꙋ́емъ,* и҆ рꙋка́ми пле́щꙋще въ весе́лїи, зове́мъ:* ра́дꙋйсѧ, всебл҃га́ѧ,* ꙗ҆́кѡ къ на́мъ, ᲂу҆бѡ́гимъ, пришла̀ є҆сѝ.

Дре́вомъ крⷭ҇тнымъ ѡ҆сщ҃є́ннаѧ,* древеса̀ дꙋбра̑внаѧ* мт҃ри пренепоро́чнѣй* на дре́вѣ рꙋ́цѣ за на́съ распросте́ршагѡ* слꙋже́нїе прино́сѧтъ:* хранѧ́тъ бо пречⷭ҇тагѡ є҆ѧ̀ ли́ка ѡ҆́бразъ,* ꙗ҆́кѡ да то́й ѡ҆брѣ́тши чꙋ́днѡ,* цр҃ковь во бл҃голѣ́пїе своѐ ѡ҆блече́тсѧ,* и҆ вѣ́рнїи блгⷣти бжⷭ҇твенныѧ прича̑стницы бꙋ́дꙋтъ.

И҆́ны стїхи̑ры, гла́съ г҃:

Всѝ ро́ди земнӏ́и, ᲂу҆бл҃жи́те мрӏ́ю бцⷣꙋ: првⷣницы и҆ грѣ̑шницы, є҆ди́ный ли́къ то́й соста́вите: дѣ̑вы, воспо́йте приснодв҃ꙋ и҆ дѣ́вства похвалꙋ̀: ма́тєри, похвали́те мт҃рь творца̀ и҆ бг҃а: ста́рцы, поклони́тесѧ ве́тхаго де́ньми воплоти́вшей: младе́нцы, просла́вите предвѣ́чнаго млⷣнца на рꙋкꙋ̀ свое́ю держа́щꙋю: ᲂу҆бо́зїи, возвели́чите бога́тство млⷭ҇ти и҆ блгⷣти и҆мꙋ́щꙋю: ца́рїе, превознеси́те цр҃и́цꙋ нб҃сѐ и҆ землѝ. мы́ же, тоѧ̀ чⷭ҇тны́й ѡ҆́бразъ лобыза́юще, возопїи́мъ: ра́дꙋйсѧ, ра́досте неизглаго́ланнаѧ, и҆ сп҃се́нїе дꙋ́шъ на́шихъ.

Зна́менїе твоегѡ̀ къ на́мъ, влⷣчце, бл҃говоле́нїѧ, і҆кѡ́на твоѧ̀ всечⷭ҇тна́ѧ ꙗ҆ви́сѧ, къ не́йже притека́юще, ꙗ҆́кѡ къ и҆сто́чникꙋ живоно́сномꙋ, во́дꙋ безсме́ртїѧ почерпа́емъ, и҆ врачева̑нїѧ разли̑чнаѧ тꙋ́не прїе́млемъ, и҆ покланѧ́ющесѧ вѣ́рнѡ, тебѣ̀ первоѡбра́знѣй вопїе́мъ: прест҃а́ѧ бцⷣе, сп҃сѝ на́съ.

Ѽ дв҃о пречⷭ҇таѧ, свѣ́те дꙋ́шъ на́шихъ, ра́досте и҆ покро́ве, скорбе́й ѿчꙋжде́нїе и҆ грѣхѡ́въ проще́нїе, проше́нїй смире́нныхъ и҆сполне́нїе и҆ блгⷣти и҆сто́чникъ неизсѧка́емый, ты̀ є҆сѝ, пренепоро́чнаѧ. сегѡ̀ ра́ди къ тебѣ̀ припа́дающе, мо́лимсѧ: къ сн҃ꙋ твоемꙋ̀ и҆ бг҃ꙋ ѡ҆ на́съ не премолчѝ вопи́ти, да тобо́ю ѿ бѣ́дъ и҆зба́вльшесѧ, ѡ҆брѣте́мъ ᲂу҆ хрⷭ҇та̀ гдⷭ҇а ве́лїю млⷭ҇ть. Сла́ва, и҆ ны́нѣ, гла́съ а҃:

Дне́сь, всепра́зднственный ли́къ составлѧ́юще, прїиди́те, воспои́мъ дв҃ꙋ бцⷣꙋ, и҆ тоѧ̀ пречⷭ҇тый ѡ҆́бразъ со ᲂу҆миле́нїемъ лобыза́юще, возопїи́мъ: Ѽ прест҃а́ѧ влⷣчце, достоѧ́нїе твоѐ ѿ вра̑гъ лю́тыхъ и҆зба́ви, вѣ̑рныѧ же къ соверше́нїю бл҃ги́хъ ᲂу҆крѣпѝ, сн҃а твоего̀ и҆ бг҃а ѡ҆ всѣ́хъ ᲂу҆молѧ́ющи.

Вхо́дъ, прокӏ́менъ днѐ, и҆ чтє́нїѧ г҃.

Бытїѧ̀ чте́нїе:

Изы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нь. И҆ ѡ҆брѣ́те мѣ́сто, и҆ спа̀ та́мѡ: за́йде бо со́лнце. и҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ. И҆ со́нъ ви́дѣ: и҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до небе́съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. Гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ, ѻ҆тца̀ твоегѡ̀, и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀. И҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ возбл҃гословѧ́тсѧ ѡ҆ тебѣ̀ всѧ̑ колѣ̑на земна̑ѧ, и҆ ѡ҆ сѣ́мени твое́мъ. И҆ сѐ а҆́зъ съ тобо́ю, сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ̑ врата̀ нбⷭ҇наѧ.

Прⷪ҇ро́чества і҆езекӏ́илева чте́нїе:

Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее, сотворѧ́тъ і҆ерє́и на ѻ҆лтарѝ всесожже́нїѧ ва́шегѡ, и҆ ꙗ҆̀же сп҃се́нїѧ ва́шегѡ, и҆ прїимꙋ́ вы, глаго́летъ а҆дѡнаі̀ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки: и҆ сїѧ̑ бѧ́хꙋ затворє́на. И҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆̀хъ, ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворє́на. Ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ, по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ ст҃ы́хъ, сꙋ́щихъ къ сѣ́верꙋ, прѧ́мѡ хра́мꙋ, и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇ень.

При́тчей чте́нїе:

Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь: Закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑, созыва́ющи съ высо́кимъ проповѣ́данїемъ на ча́шꙋ, глаго́лющи: И҆́же є҆́сть безꙋ́менъ, да ᲂу҆клони́тсѧ ко мнѣ̀. И҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пӏ́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете: и҆ взыщи́те ра́зꙋма, да поживетѐ: и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ прїи́метъ себѣ̀ безче́стїе, ѡ҆блича́ѧй же нечести́ваго ѡ҆поро́читъ себѐ: ѡ҆бличє́нїѧ бо нечести́вомꙋ ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дршїй бꙋ́детъ: сказꙋ́й првⷣномꙋ, и҆ приложи́тъ прїима́ти. Нача́ло премꙋ́дрости стра́хъ гдⷭ҇ень, и҆ совѣ́тъ ст҃ы́хъ ра́зꙋмъ: разꙋмѣ́ти бо зако́нъ, по́мысла є҆́сть бл҃га́гѡ. Си́мъ бо ѡ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀.

На лїтӏ́и стїхи́ра хра́ма, и҆ бцⷣы, гла́съ д҃:

Прїиди́те, всѧ̑ ѻ҆тє́чествїѧ ꙗ҆зы̑къ, въ хра́мъ гдⷭ҇ень стеце́мсѧ, воспои́мъ препѣ́тꙋю мт҃рь бг҃а на́шегѡ, и҆ пречⷭ҇томꙋ є҆ѧ̀ ѡ҆́бразꙋ вѣ́рнѡ поклони́мсѧ, то́й бо ꙗ҆́кѡ зало́гъ сп҃се́нїѧ ны́нѣ землѝ рѡссӏ́йстѣй дарова̀. тѣ́мже тогѡ̀ пра́здникъ свѣ́тлѡ соверша́юще, бцⷣѣ немо́лчнѡ зове́мъ: ра́дꙋйсѧ, гото́ваѧ мӏ́рꙋ по́моще, ра́дованїе, и҆ сп҃се́нїе дꙋ́шъ на́шихъ.

Всѧ̑ житє́йскаѧ попечє́нїѧ ѿлага́юще, и҆ сꙋеты̀ мїрскӏ́ѧ ѿвраща́ющесѧ, возведе́мъ ѻ҆́чи мы́слєнныѧ горѣ̀, ѿню́дꙋже по́мощь прїи́детъ, се́ бо нбⷭ҇наѧ цр҃и́ца, ѡ҆деснꙋ́ю сн҃а своегѡ̀ и҆ бг҃а предстоѧ́щи, ѡ҆ на́съ непреста́ннѡ мо́литсѧ. тѣ́мже, тоѧ̀ предста́тельствомъ ѿ бѣ́дъ и҆збавлѧ́еми, возвесели́мсѧ, глаго́люще: ра́дꙋйсѧ, те́плаѧ на́ша застꙋ́пнице, и҆ сп҃се́нїе дꙋ́шъ на́шихъ.

Гла́съ в҃: Ве́лїѧ ра́дости дне́сь и҆сполнѧ́емсѧ всѝ, и҆ со стра́хомъ и҆ тре́петомъ ᲂу҆ми́льнѡ бл҃годарѧ́ще, взыва́емъ: ѿкꙋ́дꙋ на́мъ сїѐ, ꙗ҆́кѡ прїи́де къ на́мъ мт҃и бг҃а на́шегѡ; се́ бо і҆кѡ́на є҆ѧ̀ цѣльбоно́снаѧ посредѣ̀ на́съ пребыва́етъ, и҆ то́й прикаса́тисѧ дерза́емъ, и҆ покланѧ́тисѧ, и҆ тꙋ́ю лобыза́ти, и҆ молє́нїѧ первоѡбра́знѣй, ꙗ҆́кѡ вои́стиннꙋ съ на́ми сꙋ́щей, приноси́ти. тѣ́мже тоѧ̀ снизхожде́нїю чꙋдѧ́щесѧ, вопїе́мъ: ра́дꙋйсѧ, бл҃гослове́ннаѧ бцⷣе дв҃о.

Гла́съ з҃: Прїиди́те, всѝ трꙋжда́ющїисѧ и҆ ѡ҆бремене́ннїи, прїиди́те, пла́чꙋщїи и҆ скорбѧ́щїи, прїиди́те, въ терпѣ́нїи ѡ҆скꙋдѣ́вшїи, прїиди́те, ᲂу҆бо́зїи и҆ недꙋ́жнїи, предꙿ і҆кѡ́ною пречⷭ҇тыѧ дв҃ы припади́те, и҆ кӏ́йждо по потре́бѣ свое́й прїими́те, се́ бо всепѣ́таѧ бцⷣа всѣ̑мъ всѧ̑ подае́тъ незави́стнѡ, больны́хъ є҆́сть и҆сцѣле́нїе, въ печа́ли сꙋ́щихъ пресла́дкое ᲂу҆тѣше́нїе, грѣ́шныхъ проще́нїе и҆ сп҃се́нїе, всѣ́хъ съ вѣ́рою къ не́й прибѣга́ющихъ. Сла́ва, и҆ ны́нѣ, гла́съ ѕ҃:

Є҆гда̀ прїи́детъ време́нъ и҆сполне́нїе, трꙋба́ же а҆рха́гг҃лова вострꙋби́тъ, прⷭ҇то́ли сꙋди́щнїи поста́вѧтсѧ, и҆ рѣка̀ ѻ҆́гненнаѧ возшꙋми́тъ, ме́ртвїи возста́нꙋтъ, и҆ живӏ́и восхище́ни бꙋ́дꙋтъ, и҆ ꙗ҆ви́тсѧ зна́менїе сн҃а чл҃вѣ́ческагѡ на нб҃сѝ, всѝ земноро́днїи воспла́чꙋтсѧ, и҆ всѧ̑ си̑лы нбⷭ҇ныѧ поколе́блютсѧ: тогда̀ дв҃а бцⷣа, грѣ́шныхъ сп҃се́нїе и҆ ненаде́жныхъ наде́жда, ѡ҆деснꙋ́ю сꙋдїѝ предстоѧ́щи ꙗ҆ви́тсѧ, пречⷭ҇тѣи своѝ рꙋ́цѣ къ сн҃ꙋ простира́ющи, и҆ слеза́ми лани̑ты своѧ̑ млⷭ҇тивнѡ ѡ҆роша́ющи, и҆ вѣ́чнагѡ мꙋче́нїѧ и҆збавлѧ́ющи и҆́мѧ є҆ѧ̀ препѣ́тое призыва́ющихъ. тѣ́мже ᲂ҆̀убо, бра́тїе, ны́нѣ потщи́мсѧ, и҆ къ бцⷣѣ прибѣга́ти не ѡ҆блѣни́мсѧ, да и҆ на́съ застꙋпи́тъ въ ѻ҆́ный стра́шный ча́съ, всѐ ᲂу҆пова́нїе на ню̀ возлага́ющихъ.

На стїхо́внѣ стїхи̑ры, гла́съ а҃:

Вои́стиннꙋ, бцⷣе, рѣ́ки блгⷣти ѿ і҆кѡ́ны твоеѧ̀ и҆сточа́еши, се́ бо и҆ на мѣ́стѣ, и҆дѣ́же ѡ҆брѣ́тесѧ, цѣльбоно́сный и҆сто́чникъ ꙗ҆ви́сѧ, всѣ̑мъ же любо́вїю къ не́й притека́ющымъ, жа́ждꙋ дх҃о́внꙋю ᲂу҆толѧ́еши, и҆ грѣхѝ ѡ҆мыва́еши, ра́дость же и҆ весе́лїе черпа́ти подае́ши.

Стӏ́хъ: Слы́ши, дщѝ, и҆ ви́ждь, и҆ приклонѝ ѹ҆́хо твоѐ.

При ко́рени древе́снѣмъ ѡ҆́бразъ дре́во жи́зни и҆зрасти́вшїѧ ѡ҆брѣ́тесѧ, тѣ́мже и҆ на мѣ́стѣ, и҆дѣ́же ꙗ҆ви́сѧ, ꙗ҆́кѡ са́дъ дх҃о́вный, ѻ҆би́тель насади́сѧ, въ не́йже препѣ́тое и҆́мѧ первоѡбра́зныѧ сла́витсѧ, и҆ молє́нїѧ за мӏ́ръ ве́сь непреста́ннѡ возно́сѧтсѧ, человѣ́цы же сп҃се́нїе со стра́хомъ содѣва́ютъ.

Стӏ́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀.

Нбⷭ҇ныѧ вѡ́и и҆мꙋ́ще помо́щники, воево́дꙋ же непобѣди́мꙋю дв҃ꙋ бцⷣꙋ, чⷭ҇тны́мъ крⷭ҇то́мъ воѡрꙋжи́вшесѧ, на врагѝ сп҃се́нїѧ на́шегѡ ѡ҆полчи́мсѧ, вопїю́ще пребл҃гослове́ннѣй: держа́вныѧ твоеѧ̀ по́мощи не ѿимѝ ѿ на́съ, на тѧ́ бо ᲂу҆пова́нїе возложи́хомъ, да не постыди́мсѧ во вѣ́ки.

Сла́ва, и҆ ны́нѣ, гла́съ є҃:

Рꙋ́цѣ твоѝ пречⷭ҇тѣи, дв҃о бцⷣе, ѡ҆ на́съ при́снѡ къ бг҃ꙋ воздвиза́емѣи, ко́ль кра́ты сильнѣ̑йши сꙋ́ть рꙋ́къ мѡѷсе́овыхъ: тѣ́мже и҆ сильнѣ́йшаго па́че а҆мали́ка врага̀ побѣжда́еши, самаго̀ кнѧ́зѧ тьмы̀ съ пѡ́лчищи є҆гѡ̀ поража́ющи, и҆ побѣ̑ды бл҃гочⷭ҇тнѡ на стра̑сти вою́ющымъ подаю́щи, и҆ ѡ҆бѣтова́нныѧ но́выѧ землѝ, на не́йже ѡ҆бита́етъ пра́вда, наслѣ́дники тѣ́хъ показꙋ́ющи.

Тропа́рь, гла́съ д҃:

 кѡ неѡбори́мꙋю стѣ́нꙋ* и҆ и҆сто́чникъ чꙋде́съ,* стѧжа́вше тѧ̀, рабѝ твоѝ, бцⷣе пречⷭ҇таѧ,* сопроти́вныхъ ѡ҆полчє́нїѧ низлага́емъ:* тѣ́мже мо́лимъ тѧ̀,* ми́ръ ѻ҆те́чествꙋ на́шемꙋ да́рꙋй,* и҆ дꙋша́мъ на́шымъ ве́лїю млⷭ҇ть.

На ѹ҆́трени.

На Бг҃ъ гдⷭ҇ь: тропа́рь бцⷣы, три́жды.

По а҃-мъ стїхосло́вїи сѣда́ленъ, гла́съ є҃:

Твоѝ є҆смы̀ рабѝ, бцⷣе, ра́бство грѣхꙋ̀ всеконе́чнѡ ѡ҆ста́вивше, и҆ вы̑и на́шѧ подꙿ бл҃гӏ́й ꙗ҆ре́мъ хрⷭ҇то́въ преклони́вше. тѣ́мже и҆ свобо́дꙋ ча́дъ бж҃їихъ ᲂу҆лꙋчи́ти ᲂу҆пова́емъ, твои́мъ ѡ҆ на́съ те́плымъ предста́тельствомъ, ꙗ҆́кѡ да ѡ҆ тебѣ̀ непреста́ннѡ веселѧ́щесѧ, сн҃ꙋ твоемꙋ̀ и҆ бг҃ꙋ на́шемꙋ зове́мъ: сп҃се на́шъ, сла́ва тебѣ̀.

Сла́ва, и҆ ны́нѣ, гла́съ то́йже:

Ра́дꙋйсѧ, вои́стиннꙋ въ сл҃нце ѡ҆блече́ннаѧ, и҆ сла́вою неизрече́ннѡ сїѧ́ющаѧ: ра́дꙋйсѧ, мт҃и вседержи́телѧ, сло́во предвѣ́чное мӏ́рови ꙗ҆ви́вшаѧ, и҆ главꙋ̀ ѕмӏ́евꙋ пресла́внѡ попра́вшаѧ, а҆да́мскїй же ро́дъ ржⷭ҇тво́мъ твои́мъ ѿ тлѝ свободи́вшаѧ: ра́дꙋйсѧ, и҆ по ржⷭ҇твѣ̀ є҆ди́на приснодв҃а.

По в҃-мъ стїхосло́вїи сѣда́ленъ, гла́съ д҃:

Дне́сь, вѣ́рнїи, согла́снѡ воспои́мъ, всѣ̑мъ тре́бꙋющымъ да́ры млⷭ҇ти своеѧ̀ бога́тнѡ даю́щꙋю, и҆ всѧ̑ прибѣга́ющыѧ къ не́й въ держа́вный сво́й покро́въ прїе́млющꙋю, ѕлы̑ѧ же и҆ бл҃гі̑ѧ любо́вїю мт҃рнею ѡ҆б̾е́млющꙋю. тѣ́мже, мона́си и҆ мїрстӏ́и, бога́тїи и҆ ни́щїи, є҆ди́ный ли́къ соста́вивше, прїиди́те, и҆ да торжествꙋ́етъ вкꙋ́пѣ цр҃ковь земна́ѧ и҆ нбⷭ҇наѧ, є҆ди́ными ᲂу҆сты̀ бцⷣꙋ воспѣва́юще и҆ зовꙋ́ще: ра́дꙋйсѧ, блгⷣтнаѧ, гдⷭ҇ь съ тобо́ю. Сла́ва, и҆ ны́нѣ, то́йже.

Полѷеле́й, и҆ велича́нїе:

Досто́йно є҆́сть велича́ти тѧ̀, бцⷣе, чⷭ҇тнѣ́йшꙋю херꙋві̑мъ и҆ сла́внѣйшꙋю безꙿ сравне́нїѧ серафі̑мъ. Ѱало́мъ и҆збра́нный: Бж҃е, сꙋ́дъ тво́й царе́ви

да́ждь, и҆ пра́вдꙋ твою̀ сы́нꙋ царе́вꙋ.

По полѷеле́и сѣда́ленъ, гла́съ и҃:

Наста̀ дне́сь пра́здникъ пресвѣ́тлый бг҃омт҃ре, во́ньже зарѧ̀ дх҃о́внаѧ мӏ́рꙋ возсїѧ̀ въ чⷭ҇тнѣ́мъ є҆ѧ̀ ржⷭ҇твѣ̀, во́ньже и҆ землѝ на́шей сокро́вище вели́кое ꙗ҆вле́нїемъ пресла́вныѧ бг҃оро́дичныѧ і҆кѡ́ны дарова́сѧ, є҆́йже со стра́хомъ ны́нѣ покланѧ́ющесѧ, зове́мъ: ра́дꙋйсѧ, дв҃о, вѣ́рныхъ сп҃се́нїе. Сла́ва, и҆ ны́нѣ, то́йже.

Прокӏ́менъ, гла́съ д҃: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.

Стӏ́хъ: Слы́ши, дщѝ, и҆ ви́ждь, и҆ приклонѝ ѹ҆́хо твоѐ. Є҆ѵⷢ҇лїе ѿ лꙋкѝ, зача́ло д҃.

По н҃-мъ ѱалмѣ̀: Мл҃твами бцⷣы:

Та́же стїхи́ра, гла́съ в҃:

Ны́нѣ возвесели́сѧ, ѻ҆би́тель кꙋ́рскаѧ, красꙋ́йсѧ и҆ ликовствꙋ́й, страно̀ рѡссӏ́йскаѧ: се́ бо сама̀ нбⷭ҇наѧ цр҃и́ца, блгⷣтїю свое́ю, и҆ ли́комъ пречⷭ҇тымъ, посредѣ̀ тебє̀ пребыва́етъ, и҆ на вѣ̑рныѧ млⷭ҇ти своѧ̑ неѡскꙋ́днѡ и҆злива́етъ. тѣ́мже и҆ слы́шитъ ѿ всѣ́хъ непреста́ннѡ: ра́дꙋйсѧ, чꙋ́до чꙋде́съ, бцⷣе мрӏ́е.

Канѡ́нъ бцⷣѣ, є҆гѡ́же краегране́сїе: Хвалꙋ́ ти приноси́ти дерза́ю, бцⷣе.

Гла́съ д҃. Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Припѣ́въ: Прест҃а́ѧ бцⷣе, сп҃сѝ на́съ.

Хꙋ́дость мою̀ не пре́зри, бцⷣе, и҆ не́мощь мою̀ воспо́лни, срⷣце же и҆ ѹ҆́мъ ѡ҆ст҃ѝ, и҆ ᲂу҆ста̀ моѧ̑ ѿве́рзи, пѣ̑сни тѝ приноси́ти дерза́ющꙋ.

Вѣ́рою серде́чною пречⷭ҇тый тво́й ѡ҆́бразъ почита́емъ, и҆ томꙋ̀ со ᲂу҆миле́нїемъ покланѧ́емсѧ, ꙗ҆́кѡ и҆́стиннꙋю самꙋю́ тѧ зрѧ́ще бцⷣꙋ, ка̑пли же слє́зныѧ точа́ще, взыва́емъ: ра́дꙋйсѧ, блгⷣтнаѧ мрӏ́е, мт҃и бж҃їѧ бл҃гослове́ннаѧ.

А҆́гг҃льскїѧ си̑лы подража́юще, ѡ҆бстои́мъ тво́й ѡ҆́бразъ стра́хомъ и҆ любо́вїю, тебѐ первоѡбра́знꙋю согла́снѡ велича́юще, и҆ и҆́мѧ твоѐ пресла́дкое призыва́юще: ра́дꙋйсѧ, всенепоро́чнаѧ бг҃оневѣ́сто.

Любо́вїю, вѣ́рнїи прїиди́те, ст҃ꙋ́ю і҆кѡ́нꙋ бг҃омт҃ре ѡ҆блобыза́емъ: то́читъ бо ѿ тоѧ̀ и҆сцѣлє́нїѧ неѡскꙋ́днѡ, и҆ неисчє́тнаѧ соверша́етъ чꙋдеса̀ вѣ́рою и҆ наде́ждою къ не́й притека́ющымъ. тѣ́мже зове́мъ приснодв҃ѣ: ра́дꙋйсѧ, ᲂу҆пова́нїе нело́жное хрⷭ҇тїа́нѡмъ.

Катава́сїа: Крⷭ҇тъ начерта́въ мѡѷсе́й: И҆лѝ: Хрⷭ҇то́съ ражда́етсѧ: Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дх҃о́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Оу҆́мныѧ ѻ҆́чи во глꙋбинꙋ̀ вѣкѡ́въ ᲂу҆стремлѧ́юще, зри́мъ ѹ҆́бѡ и҆ та́мѡ і҆кѡ́нꙋ твою̀, пречⷭ҇таѧ, лꙋча́ми млⷭ҇ти па́че со́лнца сїѧ́ющꙋ, и҆ зе́млю рѡссӏ́йскꙋю, до́мъ тво́й, бцⷣе, ѡ҆зарѧ́ющꙋ. тѣ́мже зове́мъ тѝ: ра́дꙋйсѧ, покро́ве на́шъ и҆ застꙋпле́нїе.

Те́мнаѧ дꙋбра́ва кꙋ́рскаѧ въ нѣ́драхъ свои́хъ хранѧ́ше свѣ́тлое чꙋ́до, пречⷭ҇тꙋю і҆кѡ́нꙋ бг҃омт҃ре, нечести́выми ѹ҆́бѡ разсѣче́ннꙋю, си́лою же бж҃їею пресла́внѡ сраще́ннꙋю. тѣ́мже и҆ ѡ҆брѣ́тше ю҆̀, ꙗ҆́кѡ сокро́вище вели́кое, лю́дїе рѡссӏ́йстїи взыва́хꙋ: ѿкꙋ́дꙋ на́мъ сїѐ, ꙗ҆́кѡ прїи́де къ на́мъ пребл҃гослове́ннаѧ мт҃и бж҃їѧ.

И҆сто́чникъ воды̀ живы́ѧ и҆стечѐ на мѣ́стѣ, и҆дѣ́же пребыва́ше ѡ҆́бразъ бцⷣы, цѣльбоно́сными стрꙋѧ́ми вѣ̑рныѧ напаѧ́ѧ, и҆ всѧ́кꙋю ꙗ҆́зю и҆ недꙋ́гъ врачꙋ́ѧ. тѣ́мже возопїи́мъ блгⷣтнѣй: ра́дꙋйсѧ, и҆́стинный живоно́сный и҆сто́чниче.

При ко́рени дре́ва і҆кѡ́на ѡ҆брѣ́тесѧ, дре́во жи́зни неизрече́ннѡ прозѧ́бшїѧ, и҆ мӏ́рови бл҃гослове́нный пло́дъ и҆зрасти́вшїѧ, тѣ́мже ны́нѣ тоѧ̀ ꙗ҆вле́нїѧ пра́здникъ соверша́юще, вопїе́мъ пречⷭ҇тѣй: Ѽ всебл҃га́ѧ влⷣчце, ѕлы̑ѧ на́шѧ стра̑сти и҆зꙿ ко́рене посѣцы̀, дѡ́брыѧ ѻ҆бы́чаи въ на́съ вкоренѧ́ющи, и҆ добродѣ́телей са́дъ насажда́ющи, и҆ прича́стники ра́йскїѧ жи́зни бы́ти на́съ сподоблѧ́ющи.

Сѣда́ленъ, гла́съ з҃:

Кӏ́й ѹ҆́бѡ пра́здникъ свѣтлѣ́йшїй и҆ краснѣ́йшїй па́че пра́здника пречⷭ҇тыѧ бг҃омт҃ре; ко́е же ѹ҆́бѡ и҆́мѧ, по и҆́мени сладча́йшагѡ і҆и҃са, сладча́йшее па́че и҆́мене бцⷣы мрӏ́и; се́ бо чⷭ҇тото́ю и҆ сла́вою всѧ̑ ли́цы а҆́гг҃льскїѧ превозше́дши, ꙗ҆́кѡ мт҃и сїѧ́ющи вседержи́телѧ, ве́сь мӏ́ръ любо́вїю мт҃рнею ѡ҆б̾е́млетъ, грѣ́шники сп҃са́етъ и҆ првⷣныѧ въ нбⷭ҇ныѧ ѻ҆би́тєли вво́дитъ, враги̑ низлага́етъ и҆ главꙋ̀ ѕмӏ́евꙋ пресла́внѡ попира́етъ, тѣ́мже зове́мъ є҆́й: ѡ҆ тебѣ̀ ра́дꙋетсѧ, блгⷣтнаѧ, всѧ́каѧ тва́рь, сла́ва тебѣ̀. Сла́ва, и҆ ны́нѣ, то́йже.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.

Рѡссӏ́йскаѧ цр҃ковь дне́сь торжествꙋ́етъ, сла́вою новоѧвле́нныѧ бг҃оро́дичныѧ і҆кѡ́ны бг҃олѣ́пнѡ ᲂу҆краша́ѧсѧ, пѣ̑сни же бг҃окра̑сныѧ воспѣва́ющи, вѣ̑рныѧ всѧ̑ призыва́етъ, глаго́лющи: прїиди́те, возра́дꙋемсѧ мт҃ри бг҃а на́шегѡ, и҆ чⷭ҇тно́мꙋ є҆ѧ̀ ѡ҆́бразꙋ поклони́мсѧ, ѿ негѡ́же пречⷭ҇таѧ дв҃а блгⷣтныѧ да́ры бога́тнѡ подае́тъ хрⷭ҇тоимени̑тымъ лю́демъ, взыва́ющымъ: сла́ва си́лѣ твое́й, гдⷭ҇и.

И҆збра́нниче мт҃ре бж҃їѧ, прпⷣбне ѻ҆́тче серафӏ́ме, мл҃твенниче неꙋсыпа́ющїй за зе́млю рꙋ́сскꙋю, зри́ши на́ше ᲂу҆се́рдїе те́плое, слы́шиши молє́нїѧ, предꙿ і҆кѡ́ною пречⷭ҇тыѧ на́ми возноси̑маѧ, ѿ неѧ́же и҆ тебѣ̀ и҆ногда̀, ѻ҆́трокꙋ лю́тѣ стра́ждꙋщꙋ, и҆сцѣле́нїе подаде́сѧ: тѣ́мже ᲂ҆̀убо ста́ни съ на́ми, воздѣ́ѧ прпⷣбнѣи твоѝ рꙋ́цѣ, и҆ возопӏ́й ѡ҆ на́съ къ бцⷣѣ, ꙗ҆́кѡ да тебє̀ ра́ди мл҃твы на́шѧ прїѧ́ти бл҃говоли́тъ.

Нечести̑выхъ безбѡ́жникъ безꙋ́мный совѣ́тъ, і҆кѡ́нꙋ твою̀, влⷣчце, разори́ти, си́лою твое́ю бжⷭ҇твенною посрами́ла є҆сѝ, и҆ соблюла̀ є҆сѝ сїю̀ ѿ всѧ́кагѡ дѣ́йства сокрꙋши́тельна невреди́мꙋ: землѝ ѹ҆́бѡ сотрѧ́сшейсѧ, и҆ столпѡ́мъ разрꙋша́ємымъ, і҆кѡ́на твоѧ̀ то́кмѡ лицѐ своѐ, ѿ скве́рныхъ дѣ́лъ человѣ́ческихъ ѿвраща́ющи, ѡ҆братѝ. тѣ́мже пресла́вномꙋ чꙋ́дꙋ дивѧ́щесѧ, мо́лимтисѧ прилѣ́жнѡ: лица̀ твоегѡ̀ пречⷭ҇тагѡ не ѿвратѝ ѿ на́съ, се́ бо срⷣцемъ сокрꙋше́ннымъ къ тебѣ̀ прибѣга́емъ, и҆ пла́чемъ, и҆ ᲂу҆ми́льнѡ вопїе́мъ: да не ѡ҆долѣ́етъ на́ша ѕло́ба твоемꙋ̀ млⷭ҇рдїю, но поми́лꙋй и҆ сп҃си́ ны.

Ѿ рꙋкѝ ѕлодѣ̑й и҆ лю́тыхъ безбѡ́жникъ, всѧ̑ ст҃ы̑ни бж҃їѧ попра́вшихъ, і҆кѡ́нꙋ твою̀ чⷭ҇тнꙋ́ю соблюла̀ є҆сѝ невреди́мꙋ, и҆ сїю̀ лю́демъ твои̑мъ дарова́ла є҆сѝ, бцⷣе, ю҆́же и҆ храни́мъ, ꙗ҆́кѡ зѣ́ницꙋ ѻ҆́ка: тѣ́мже, влⷣчце, то́ю на́мъ зна́мєнїѧ млⷭ҇ти твоеѧ̀ при́снѡ ꙗ҆влѧ́й.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надꙿ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Свѣтоно́сный де́нь дне́шнїй свѣ́тлѡ да пра́зднꙋемъ, во́ньже зарѧ̀ дх҃о́внаѧ во сп҃се́нїе мӏ́рꙋ возсїѧ̀, ржⷭ҇тво́мъ пречⷭ҇тыѧ бг҃оневѣ́сты, во́ньже и҆ странѣ̀ рѡссӏ́йстѣй, во тьмѣ̀ бѣ́дъ и҆ скорбе́й пребыва́ющей, ꙗ҆́кѡ ѕвѣзда̀ ѹ҆́треннѧѧ і҆кѡ́на бцⷣы ꙗ҆ви́сѧ, и҆збавле́нїѧ де́нь возвѣща́ющи. тѣ́мже зове́мъ пребл҃гослове́ннѣй: ра́дꙋйсѧ, ꙗ҆́кѡ свѣти́льникъ неме́ркнꙋщїй ᲂу҆пова́нїѧ на́мъ возжгла̀ є҆сѝ.

И҆дѣ́же грѣ́хъ прїꙋмножа́етсѧ, та́мѡ блгⷣть бж҃їѧ преизбы́точествꙋетъ: тѣ́мже, влⷣчце, при́зри на не́мощь на́шꙋ, ви́ждь ᲂу҆ничиже́нїе безмѣ́рное, но и҆ вѣ́рꙋ ви́ждь, и҆ во́пль ᲂу҆слы́ши, и҆ на по́мощь на́мъ безпомо́щнымъ ᲂу҆скорѝ, млⷭ҇тїю твое́ю на́съ ѡ҆блиста́ющи.

Те́мныхъ си́лъ а҆́довыхъ не ᲂу҆бои́мсѧ, па́че же во ѡ҆рꙋ̑жїѧ свѣ́та ѡ҆бо́лкшесѧ, тѣ̑мъ противоста́немъ мꙋжемꙋ́дреннѡ, воево́дꙋ и҆мꙋ́ще непобѣди́мꙋю, всепѣ́тꙋю бцⷣꙋ: се́ бо врагѝ держа́внѡ побора́етъ, и҆ вѣ̑рныѧ застꙋпа́етъ, и҆́мѧ є҆ѧ̀ пречⷭ҇тое призыва́ющыѧ.

И҆́стиннꙋю бцⷣꙋ тѧ̀ и҆сповѣ́дꙋемъ, и҆ зра́къ лица̀ твоегѡ̀ пречⷭ҇тагѡ правосла́внѡ почита́емъ, грѣха́ же и҆ скве́рны всѧ́кїѧ ѿвраща́емсѧ, и҆ бл҃га̑ѧ соверша́ти мо́лимсѧ пода́ти, и҆ дꙋ́шы на́шѧ смирѧ́юще, вопїе́мъ: прест҃а́ѧ бцⷣе, сп҃сѝ на́съ. Пѣ́снь ѕ҃.

І҆рмо́съ: Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃омт҃ре, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Да бѣжи́тъ ѿ на́съ, бра́тїе, ᲂу҆ны́нїе, тꙋ̑чи помыслѡ́въ дх҃омъ бж҃їимъ да развѣ́ютсѧ, се́ бо сама̀ бг҃омт҃и посредѣ̀ на́съ пребыва́етъ ꙗ҆́вственнѡ, во і҆кѡ́нѣ свое́й чꙋдотво́рнѣй покланѧ́ема, и҆ чꙋдесы̀, ѿ тоѧ̀ и҆сходѧ́щими, па́че со́лнца сїѧ́ющи, тѣ́мже и҆зꙿ глꙋбины̀ срⷣца возопїи́мъ: прест҃а́ѧ влⷣчце, блгⷣтїю твое́ю неѿстꙋ́пнѡ съ на́ми пребꙋ́ди.

Є҆гда̀ наитѝ на на́съ и҆скꙋше́нїю, є҆гда̀ впа́сти на́мъ въ скѡ́рби и҆ болѣ̑зни, є҆гда̀ терпѣ́нїю въ на́съ ѡ҆скꙋдѣва́ти и҆ дꙋ́хꙋ на́шемꙋ смꙋща́тисѧ, притеце́мъ къ ѡ҆́бразꙋ пречⷭ҇тыѧ дв҃ы, и҆ сле́зы точа́ще, то́й ѿ срⷣца возопїи́мъ: бг҃оно́снѣи рꙋ́цѣ твоѝ на́мъ простира́ющи, и҆зꙿ глꙋбины̀ ѕѡ́лъ возведи́ ны.

Ра́дость ѹ҆́бѡ є҆сѝ всѣ́хъ ра́достей, вѣ́чнꙋю ра́дость мӏ́рови ро́ждшаѧ, и҆ грѣхо́внꙋю печа́ль разори́вшаѧ, и҆ ѿра́дꙋ бжⷭ҇твеннꙋю дꙋша́мъ смѧтє́ннымъ подаю́щаѧ: въ мл҃твахъ за мӏ́ръ хрⷭ҇тїа́нскїй не ᲂу҆сыпа́й, бцⷣе, тобо́ю бо по бз҃ѣ всѧ́къ сп҃са́етсѧ и҆ и҆зꙿ бе́здны паде́нїй возво́дитсѧ.

Ѕло́бнїи де́мѡнстїи полцы̀, на хрⷭ҇тїа́ны вою́ющїи, сѐ стоѧ́тъ зрѧ́ще и҆здале́ча, не дерза́юще пристꙋпи́ти, трепе́щꙋще сла́вы бг҃оро́дичныѧ і҆кѡ́ны, ꙗ҆́же нечести̑выѧ и҆ бѣ́сы попалѧ́етъ, ѿ всѣ́хъ вра̑гъ покрыва́ющи.

Конда́къ, гла́съ д҃:

Прїиди́те, вѣ́рнїи, свѣ́тлѡ да пра́зднꙋемъ всечⷭ҇тна́гѡ ѡ҆́браза бг҃омт҃ре чꙋ́дное ꙗ҆вле́нїе, и҆ ѿ тогѡ̀ блгⷣть почерпа́юще, первоѡбра́знѣй ᲂу҆ми́льнѡ возопїи́мъ: ра́дꙋйсѧ, мрӏ́е бцⷣе, мт҃и бж҃їѧ, бл҃гослове́ннаѧ.

І҆́косъ: Тобо́ю, бцⷣе, сло́во предвѣ́чное пло́ть бы́сть, тобо́ю ᲂу҆зрѣ́ша человѣ́цы сл҃нце пра́вды, на него́же а҆́гг҃ли не смѣ́ютъ взира́ти: на твои́хъ бо ѡ҆б̾ѧ́тїѧхъ херꙋві̑мы носи́мый ноша́шесѧ, и҆ твои́ма рꙋка́ма пречⷭ҇тыма держи́мъ бѣ̀ вседержи́тель и҆ творе́цъ всѧ́ческихъ, а҆да́ма сме́ртнагѡ дщѝ, бг҃ꙋ нарекла́сѧ є҆сѝ роди́тельница. тѣ́мже, ꙗ҆́кѡ є҆ди́на къ томꙋ̀ мт҃рнее дерзнове́нїе и҆мꙋ́щи, въ мл҃твахъ за мӏ́ръ ве́сь не ᲂу҆сыпа́еши, бг҃опрїѧ́тнѣи твоѝ рꙋ́цѣ къ сн҃ꙋ воздѣва́ющи, и҆ тогѡ̀ чл҃вѣколю́бїе къ рабѡ́мъ твои̑мъ приклонѧ́ющи, и҆̀же тѝ бл҃года́рными ᲂу҆сты̀ непреста́ннѡ зовꙋ́тъ: ра́дꙋйсѧ, мрӏ́е бцⷣе, мт҃и бж҃їѧ, бл҃҃гослове́ннаѧ. Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.

А҆́гг҃ли въ слꙋже́нїи тебѣ̀ бл҃гоговѣ́инствꙋютъ, серафӏ́ми стра́хомъ тебѐ сла́вѧтъ, бцⷣе, ка́кѡ ѹ҆́бѡ мы̀, земноро́днїи, нечи́стыми ᲂу҆сты̀ воспѣ́ти тѧ̀ дерза́емъ; ѻ҆ба́че на млⷭ҇ть твою̀ ᲂу҆пова́емъ, и҆ ѡ҆ тебѣ̀ непреста́ннѡ влⷣцѣ и҆ творцꙋ̀ всѧ́ческихъ вопїе́мъ: бл҃гослове́нъ є҆сѝ, бж҃е ѻ҆тє́цъ на́шихъ.

Ю҆́же да́лъ є҆сѝ на́мъ застꙋпле́нїе, мт҃рь твою̀ пречⷭ҇тꙋю, хрⷭ҇тѐ, прїимѝ ны́нѣ за ны̀ те́плѣ молѧ́щꙋюсѧ, да тоѧ̀ хода́тайствы въ живо́тъ присносꙋ́щный дости́гше, со всѣ́ми, и҆̀же сп҃се́нїе ᲂу҆лꙋчи́ша, возопїи́мъ: бл҃гослове́нъ є҆сѝ, бж҃е ѻ҆тє́цъ на́шихъ.

Бл҃гослове́ннꙋю нарекӏ́й твою̀ мт҃рь, тоѧ̀ мольба́ми ᲂу҆моле́нъ бꙋ́ди, гдⷭ҇и, и҆ да зна́менꙋетсѧ на на́съ свѣ́тъ лица̀ твоегѡ̀, да ѿ сна̀ грѣхо́внагѡ воспрѧнꙋ́вше, ꙗ҆́кѡ во днѝ бл҃гочⷭ҇тнѡ ходи́ти на́чнемъ, въ сердца́хъ на́шихъ непреста́ннѡ зовꙋ́ще: бл҃гослове́нъ є҆сѝ, бж҃е ѻ҆тє́цъ на́шихъ.

Ѻ҆трокѡ́мъ вавѷлѡ́нскимъ подо́бѧщесѧ, ѡ҆́бразꙋ злато́мꙋ мамѡ́ны и҆ человѣкоꙋго́дїѧ не поклони́мсѧ, ѡ҆́бразъ же непоро́чныѧ мт҃ре бг҃а на́шегѡ почти́мъ, премӏ́рныѧ ра́дости и҆сполнѧ́ющесѧ, и҆ бл҃годѣ́телю всѣ́хъ хрⷭ҇тꙋ̀ возопїи́мъ: бл҃гослове́нъ є҆сѝ, бж҃е ѻ҆тє́цъ на́шихъ.

Пѣ́снь и҃.

І҆рмо́съ: Ѻ҆́троки бл҃гочєсти́выѧ въ пещѝ ржⷭ҇тво̀ бг҃оро́дичо сп҃сло̀ є҆́сть: тогда̀ ѹ҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Гла̑сы немо́лчными серафӏ́ми тѧ̀ пою́тъ, приснодв҃о, ст҃ы́хъ ли́цы сы́тости похва́лъ твои́хъ не вѣ́дѧтъ, всѧ̀ тва́рь славосло́витъ непреста́ннѡ, мы́ ли ѹ҆́бѡ є҆ди́ны то́кмѡ въ молча́нїи пребꙋ́демъ; ѻ҆ба́че на млⷭ҇рдїе твоѐ дерза́юще, а҆́ще и҆ недосто́йни сꙋ́ще, тѧ̀ превозно́симъ во вѣ́ки.

Ѡ҆ тебѣ̀ хвали́тисѧ, бцⷣе, сотворє́ннаѧ всѧ̑ николи́же преста́нꙋтъ, се́ бо, по глаго́лꙋ а҆пⷭ҇ловꙋ, ѧ҆зы́цы ᲂу҆мо́лкнꙋтъ и҆ зна́нїе ᲂу҆праздни́тсѧ, любы́ же непреста́ннѡ пребꙋ́детъ, тѣ́мже и҆ славословлє́нїѧ, ꙗ҆̀же ѿ любвѐ тебѣ̀ приноси̑маѧ, воспѣва́тисѧ и҆́мꙋтъ во вѣ́ки.

Рцы̀ ѹ҆́бѡ на́мъ, пречⷭ҇таѧ, кꙋ́ю тѝ похвалꙋ̀ досто́йнꙋю на́ше принесе́тъ неможе́нїе; ко́има ли ѻ҆чи́ма взира́ти на чⷭ҇тны́й тво́й ѡ҆́бразъ дерзне́мъ; но ѻ҆ба́че, бл҃га́ѧ сꙋ́щи, и҆ ны́нѣ пѣ́нїй на́шихъ не возгнꙋша́йсѧ, и҆ въ землѝ земна́гѡ прише́льствїѧ зра́къ лица̀ твоегѡ̀ пресвѣ́тлагѡ ꙗ҆вѝ на́мъ, ꙗ҆́кѡ да тѧ̀ славосло́вимъ во вѣ́ки.

Ѡ҆бстоѧ́ще ѡ҆́бразъ тво́й приснопокланѧ́емый, влⷣчце, стра́хомъ и҆ любо́вїю, житє́йскаѧ попечє́нїѧ всѧ̑ ѿло́жше, ѻ҆́чи же мы́слєнныѧ на нб҃са̀ возводѧ́ще, ра́йскꙋю сла́дость предвкꙋша́емъ, є҆ѧ́же наслади́тисѧ на́съ сподо́би, да сп҃се́нїе и҆ живо́тъ безконе́чный ᲂу҆лꙋчи́вше, въ ра́дости тѧ̀ воспѣва́емъ во вѣ́ки.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Дв҃о всепѣ́таѧ, пѣ̑нїѧ на̑ша прїимѝ, ꙗ҆́коже сн҃ъ тво́й вдови́чꙋ ле́птꙋ, и҆ пода́ждь на́мъ всегда̀ тебѣ̀ сїѧ̑ приноси́ти, живо́тъ на́шъ въ ми́рѣ ᲂу҆правлѧ́ющи и҆ грѣхѡ́мъ проще́нїе да́рꙋющи, ꙗ҆́кѡ да въ нбⷭ҇ныѧ ѻ҆би́тєли тобо́ю вше́дше, млⷭ҇рдїе твоѐ велича́емъ.

И҆̀же тѧ̀, бцⷣе, не и҆сповѣ́дꙋютъ, и҆ і҆кѡ́ны твоеѧ̀ не почита́ютъ, да посрамѧ́тсѧ всеконе́чнѡ, вѣ́рнїи же ѡ҆ тебѣ̀ да возвеселѧ́тсѧ, да бꙋ́детъ и҆ страна̀ рѡссӏ́йскаѧ, ꙗ҆́коже дре́вле, до́мъ тво́й, да ᲂу҆мно́жатсѧ ст҃ы̑ѧ ѻ҆би́тєли, и҆ хра́мы да бл҃гоꙋкра́сѧтсѧ, лю́дїе же да ѡ҆ст҃ѧ́тсѧ, и҆ да торжествꙋ́ютъ съ весе́лїемъ, тѧ̀ велича́юще.

Цр҃и́це бцⷣе, ѡ҆деснꙋ́ю хрⷭ҇та̀ бг҃а въ нбⷭ҇нѣмъ црⷭ҇твїи предстоѧ́щи, црⷭ҇тва хрⷭ҇тоимєни́таѧ на землѝ ᲂу҆твердѝ, нечести́выхъ совѣ́ты разорѧ́ющи, и҆ вѣ́рꙋ со бл҃гочⷭ҇тїемъ ᲂу҆крѣплѧ́ющи, да всѝ земноро́днїи тѧ̀ є҆диномы́сленнѡ велича́ютъ.

Є҆да̀ тѝ хвалꙋ̀, влⷣчце, досто́йнꙋю принесо́хомъ; є҆да̀ ѡ҆́бразъ тво́й чⷭ҇тны́й по до́лгꙋ просла́вихомъ; вѣ́мы бо, ꙗ҆́кѡ пѣ̑сни, а҆́ще и҆ тьмочи́слєнныѧ, къ прославле́нїю твоемꙋ̀, дв҃о, не сꙋ́ть довѡ́льны: а҆́ще бо на́мъ ᲂу҆се́рдїѧ серде́чнагѡ послꙋ́шати, пѣ́нїємъ на́шымъ то́кмѡ начина́тисѧ подоба́ше. что̀ ᲂ҆̀убо сотвори́мъ; недоꙋмѣва́емъ и҆ ᲂу҆жаса́емсѧ, зна́мєнїѧ млⷭ҇ти твоеѧ̀ сла́вимъ, ѻ҆ба́че и҆ ᲂу҆стѡ́мъ ᲂу҆мо́лкшымъ, любо́вїю серде́чною тѧ̀ пое́мъ и҆ велича́емъ.

Свѣти́ленъ:

Со́лнца свѣтлѣ́йшаѧ, дв҃о бцⷣе, вѣ́ры хрⷭ҇то́вы свѣти́льникъ неме́ркнꙋщїй во странѣ̀ на́шей блгⷣтїю твое́ю возжгѝ, да тѣ́мъ невѣ́рїѧ тьма̀ просвѣти́тсѧ, сердца́ же вѣ́рныхъ ѡ҆ то́мъ да возра́дꙋютсѧ, бл҃годаре́нїе приносѧ́ще хрⷭ҇тꙋ̀ чл҃вѣколю́бцꙋ, подаю́щемꙋ всѣ̑мъ ве́лїю млⷭ҇ть. Два́жды.

Сла́ва, и҆ ны́нѣ:

Ри́зы креще́нїѧ грѣхмѝ совлеко́хсѧ, ка́кѡ вни́дꙋ на ве́черю гдⷭ҇ню, не и҆мы́й ѡ҆дѣѧ́нїѧ бра́чна, а҆́ще не ты̀, бцⷣе, ри́зою твое́ю мѧ̀ покры́еши, и҆ сло́во ѡ҆ мнѣ̀ ѡ҆каѧ́ннѣмъ къ цр҃ю̀ сла́вы рече́ши; тѣ́мже на тѧ̀ є҆ди́нꙋ надѣ́ѧсѧ, рꙋ́цѣ моѝ къ тебѣ̀ простира́ю: ᲂу҆слы́ши, покры́й и҆ застꙋпи́ мѧ.

На хвали́техъ стїхи̑ры на д҃, гла́съ и҃:

Срⷣца̀ съ колѣ́ны преклонѧ́юще, ѻ҆́чи же мы́слєнныѧ горѣ̀ возводѧ́ще, припаде́мъ предꙿ ли́комъ пречⷭ҇тыѧ бцⷣы, не́мощь на́шꙋ и҆сповѣ́дающе, тоѧ́ же всеси́льныѧ по́мощи просѧ́ще, и҆ живо́тъ сво́й те́пломꙋ є҆ѧ̀ предста́тельствꙋ врꙋча́юще: вѣ́рꙋемъ бо, ꙗ҆́кѡ моле́нїе на́ше не пре́зритъ, всѧ́кꙋ сле́зꙋ ѿ лица̀ землѝ ᲂу҆толи́вшаѧ. Два́жды.

Кі̑ѧ тѝ пѣ̑сни воспое́мъ, бцⷣе; кі̑ѧ тѝ да́ры принесе́мъ; нищетꙋ̀ на́шꙋ дх҃о́внꙋю зри́ши. ѻ҆ба́че ꙗ҆́кѡ би́серъ многоцѣ́ненъ слє́зныѧ на́шѧ ка̑пли прїимѝ, ꙗ҆́кѡ же ѳѷмїа́мъ мл҃твꙋ и҆ воздыха́нїе серде́чное, та́же и҆ печа́ль на́шꙋ на ра́дость преложѝ: ты́ бо є҆сѝ вѣ́рныхъ пресла́дкое ᲂу҆тѣше́нїе.

Всѧ̑ тѝ возмѡ́жна сꙋ́ть, влⷣчце, є҆гда́ бо къ сн҃ꙋ твоемꙋ̀ и҆ бг҃ꙋ мо́лишисѧ, проти́вꙋ мт҃рнѧгѡ дерзнове́нїѧ твоегѡ̀ никто́же постоѧ́ти мо́жетъ: нѣ́сть бо грѣ́хъ, побѣжда́ѧй твоѐ млⷭ҇рдїе. тѣ́мже въ держа́вный тво́й покро́въ прибѣга́емъ, на твоѐ всеси́льное хода́тайство ᲂу҆пова́юще, и҆ тебѣ̀ по бз҃ѣ са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ предае́мъ. Сла́ва, и҆ ны́нѣ, гла́съ є҃:

За мӏ́ръ ве́сь те́плѣ помоли́сѧ, бцⷣе, по́мощи бо твоеѧ̀ тре́бꙋетъ, сѣтѧ́мъ лꙋка́вагѡ по всемꙋ̀ лицꙋ̀ землѝ распростє́ртымъ, ꙗ҆зы́кѡмъ же шата́ющымсѧ, и҆ бꙋ́рѧмъ напа́стей на цр҃ковь бж҃їю воздвиза́ємымъ: тѣ́мже ꙗ҆́кѡ въ ка́нѣ галїле́йстѣй и҆ногда̀, рцы̀ сло́во къ сн҃ꙋ твоемꙋ̀ и҆ бг҃ꙋ, да во́дꙋ и҆скꙋше́нїй и҆ скорбе́й въ вїно̀ ᲂу҆миле́нїѧ и҆ весе́лїѧ бжⷭ҇твеннагѡ претвори́тъ.

Славосло́вїе вели́кое. Є҆ктєнїѝ, и҆ ѿпꙋ́стъ.

На лїтꙋргӏ́и слꙋ́жба всѧ̀ бцⷣы, а҆пⷭ҇лъ ко є҆вре́ємъ, зача́ло тѕ҃і.