Мѣ́сѧца і҆аннꙋа́рїа въ к҃д-й де́нь.

Слꙋ́жба ст҃ѣ́й, бл҃же́ннѣй во хрⷭ҇тѣ̀, ѯе́нїи, бездо́мнѣй стра́нницѣ петро́ва гра́да.

На ма́лѣй вече́рни.

На Гдⷭ҇и, воззва́хъ: стїхи̑ры на д҃, гла́съ а҃.

Подо́бенъ: Нбⷭ҇ныхъ чинѡ́въ:

Бездо́мнаѧ на землѝ сꙋ́щи,* до́мъ и҆ жили́ще дх҃ꙋ ст҃о́мꙋ* въ срⷣцѣ свое́мъ ᲂу҆гото́вала є҆сѝ* смире́нїемъ твои́мъ,* и҆ ны́нѣ въ черто́зѣ хрⷭ҇то́вѣ ра́дꙋешисѧ,* бл҃же́ннаѧ ѯе́нїе, бг҃ꙋ при́снаѧ. Два́жды.

Внеза́пꙋ твоемꙋ̀ мꙋ́жꙋ ᲂу҆ме́ршꙋ,* ѹ҆́мре мїрска́гѡ житїѧ̀ жела́нїе въ тебѣ̀,* всю̀ себѐ хрⷭ҇тꙋ̀ предала̀ є҆сѝ,* ꙗ҆́кѡ лише́ннаѧ ра́зꙋма* мӏ́рꙋ ꙗ҆влѧ́ющисѧ,* и҆ жи́зни вѣ́чныѧ взыска́ла є҆сѝ.

Бездо́мнаѧ и҆ чꙋжда́ѧ мӏ́рꙋ,* є҆ди́но прибѣ́жище хрⷭ҇та̀ взыска́ла є҆сѝ,* ѯе́нїе, бг҃ꙋ и҆ лю́демъ бли́жнѧѧ,* ны́нѣ же во црⷭ҇твїи хрⷭ҇то́вѣ ра́дꙋющисѧ,* помѧнѝ твоѧ̑ бли̑жнїѧ,* къ твоемꙋ̀ предста́тельствꙋ прибѣга́ющыѧ. Сла́ва, и҆ ны́нѣ, бг҃оро́диченъ, самоподо́бенъ:

Нбⷭ҇ныхъ чинѡ́въ ра́дованїе,* на землѝ человѣ́кѡвъ крѣ́пкое предста́тельство,* пречⷭ҇таѧ дв҃о,* сп҃си́ ны, и҆̀же къ тебѣ̀ прибѣ́гающыѧ,* ꙗ҆́кѡ на тѧ̀ ᲂу҆пова́нїе,* по бз҃ѣ, бцⷣе, возложи́хомъ.

На стїхо́внѣ стїхи̑ры, гла́съ ѕ҃.

Подо́бенъ: Тридне́венъ:

Чꙋжда́ѧ мӏ́рꙋ,* но сꙋ́щихъ въ не́мъ не чꙋжда́ющаѧсѧ,* ѡ҆ лю́дехъ млⷭ҇рдствꙋющи,* ю҆ро́да словꙋ́щи, мꙋ́дрости наставлѧ́еши,* всѧ́кѡ терпѧ́щи, стра́ждꙋщыѧ цѣли́ши:* си́ла бо хрⷭ҇то́ва въ твое́й не́мощи соверша́етсѧ.

Стӏ́хъ: Гдⷭ҇ь храни́тъ прише́льцы, си́ра и҆ вдовꙋ̀ прїи́метъ.

Земно́е бога́тство, ѯе́нїе, раздала̀ є҆сѝ,* ꙗ҆́кѡ непра́ведное,* и҆ до́ма кро́въ ѿве́ргла є҆сѝ,* млⷭ҇тїю бж҃їею покрыва́ющисѧ:* стра́нствїю хрⷭ҇то́вꙋ ревнꙋ́ющи,* црⷭ҇твїѧ хрⷭ҇то́ва дости́гла є҆сѝ.

Стӏ́хъ: Гдⷭ҇ь возво́дитъ низве́ржєнныѧ, гдⷭ҇ь лю́битъ првⷣники.

Ѡ҆́бразъ терпѣ́нїѧ и҆ неѕло́бїѧ, ѯе́нїе, ꙗ҆ви́ла є҆сѝ,* ю҆ро́дство мӏ́ра ѡ҆бличи́вши,* предста́тельство твоѐ къ бг҃ꙋ вѣ́мы:* помоли́сѧ за ны̀ въ нꙋ́ждахъ на́шихъ,* бездѡ́мныѧ же и҆ ѻ҆те́чествїѧ лишє́нныѧ,* ѻ҆те́чествїѧ нбⷭ҇нагѡ дости́гнꙋти наста́ви.

Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже:

Любы̀ и҆зсѧ́че,* ᲂу҆мно́жишасѧ беззакѡ́нїѧ,* ꙗ҆́коже предречѐ гдⷭ҇ь:* ѿ собла́знѡвъ дꙋшегꙋ́бца врага̀ ѡ҆градѝ на́съ, бцⷣе,* и҆ ꙗ҆́кѡ роди́тельница всевы́шнѧгѡ,* вы́шнее застꙋпле́нїе на́мъ и҆спросѝ.

Тропа́рь, гла́съ д҃:

Сꙋеты̀ земна́гѡ мӏ́ра ѿве́ргшисѧ, крⷭ҇тъ житїѧ̀ бездо́мнагѡ во стра́нничествѣ прїѧ́ла є҆сѝ, скорбе́й, лише́нїй, людска́гѡ ѡ҆смѣѧ́нїѧ не ᲂу҆боѧ́ласѧ є҆сѝ, любо́вь же хрⷭ҇то́вꙋ позна́ла є҆сѝ, є҆́юже ны́нѣ на нб҃сѝ ᲂу҆слажда́ешисѧ, ѯе́нїе бл҃же́ннаѧ бг҃омꙋ́драѧ, моли́сѧ ѡ҆ сп҃се́нїи дꙋ́шъ на́шихъ.

Сла́ва, и҆ ны́нѣ, бг҃оро́диченъ.

И҆́҆́нъ тропа́рь, гла́съ и҃:

Тебѐ, Ѽ стра́ннице, ꙗ҆вѝ на́мъ хрⷭ҇то́съ гдⷭ҇ь мл҃твенницꙋ те́плꙋю за ро́дъ на́шъ, въ житїѝ бо твое́мъ страда̑нїѧ и҆ скѡ́рби воспрїѧ́вши, бг҃ꙋ же и҆ человѣ́кѡмъ любо́вїю послꙋжи́вши, дерзнове́нїе ве́лїе стѧжа́ла є҆сѝ. тѣ́мже къ тебѣ̀ въ напа́стехъ и҆ ско́рбехъ ᲂу҆се́рднѡ прибѣга́емъ, и҆зꙿ глꙋбины̀ серде́цъ на́шихъ взыва́юще: ᲂу҆пова́нїѧ на́шегѡ не посрамѝ, ѯе́нїе бл҃же́ннаѧ. Є҆ктенїа̀, и҆ ѿпꙋ́стъ.

На вели́цѣй вече́рни.

Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ: стїхи̑ры на и҃, гла́съ и҃.

Подо́бенъ: Ѽ пресла́внагѡ чꙋдесѐ:

Ѽѯе́нїе бл҃же́ннаѧ,* нбⷭ҇ное ѻ҆те́чествїе возлюби́вши,* на землѝ вои́стиннꙋ стра́нна пребыла̀ є҆сѝ,* ꙗ҆́кѡ на странѣ̀ чꙋжде́й преходѧ́щи.* ны́нѣ ѹ҆́бѡ въ домꙋ̀ ѻ҆ц҃а̀ нбⷭ҇нагѡ водворѧ́ющисѧ,* и҆ стра́нствїѧ влⷣчнѧ въ черто́зѣхъ го́рнихъ наслажда́ющисѧ,* не забꙋ́ди на́съ, па́мѧть твою̀ вѣ́рнѡ творѧ́щихъ,* и҆ ѿ бѣ́дъ многоразли́чныхъ на́съ и҆збавлѧ́й,* предꙿ прⷭ҇то́ломъ гдⷭ҇а сла́вы на́съ помина́ющи.

Ѽ ѯе́нїе сла́внаѧ,* ꙗ҆́кѡ мꙋ́драѧ дѣ́ва, въ полꙋ́нощи житїѧ̀ твоегѡ̀,* женихꙋ̀ хрⷭ҇тꙋ̀ во срѣ́тенїе и҆зшла̀ є҆сѝ,* свѣти́льникъ пламенѣ́ющїй любвѐ бж҃їѧ носѧ́щи,* ю҆ро́да ѿ мӏ́ра нарица́ющисѧ,* премӏ́рныѧ же мꙋ́дрости и҆сполнѧ́ющисѧ.* тѣ́мже ѿ млⷭ҇ти є҆ле́а, є҆го́же бога́тнѡ стѧжа́ла є҆сѝ,* пода́ждь на́мъ, па́мѧть твою̀ вѣ́рнѡ творѧ́щымъ,* ка̑пли тогѡ̀ точа́щи на ꙗ҆́звы на́шѧ.

Ѽ ѯе́нїе мꙋжемꙋ́дреннаѧ,* крѣ́пость дꙋшѝ твоеѧ̀ кто̀ и҆сповѣ́сть;* ꙗ҆́кѡ на бра́нь со кнѧ́земъ тьмы̀ и҆ мӏ́ра сегѡ̀ и҆сходѧ́щи,* а҆ндре́емъ нарекла́сѧ є҆сѝ,* ничто́же бо ᲂу҆страши́ тѧ и҆лѝ стꙋжи́ ти:* гла́дъ же и҆ хла́дъ и҆ наготꙋ̀ терпѧ́щи,* всѧ̑ могꙋ̀ ѡ҆ хрⷭ҇тѣ̀, менѐ ᲂу҆крѣплѧ́ющемъ,* со а҆пⷭ҇ломъ взвыва́ла є҆сѝ.* тѣ́мже и҆ вѣнча́ тѧ хрⷭ҇то́съ подвигополо́жникъ.

И҆́ны стїхи̑ры, гла́съ в҃:

А҆ндре́ю хрⷭ҇та̀ ра́ди ю҆ро́дивомꙋ поревнова́ла є҆сѝ, нищетꙋ̀ во́льнꙋю и҆збра́вши, и҆ всѧ̑ бл҃га̑ѧ мӏ́ра сегѡ̀ презрѣ́ла є҆сѝ, бл҃же́ннаѧ, премі̑рнаѧ же бл҃га̑ѧ ѡ҆брѣ́тши, раздае́ши да́ры тꙋ́не си́хъ тре́бꙋющымъ, и҆ твоегѡ̀ застꙋпле́нїѧ просѧ́щымъ.

Прⷪ҇ро́кѡвъ є҆сѝ соприча́стница, Ѽ ѯе́нїе, ꙗ҆́кѡ грѧдꙋ̑щаѧ дꙋ́хомъ прозрѣва́ла є҆сѝ, прпⷣбнымъ же сожи́тельница ꙗ҆влѧ́ешисѧ, жесто́комꙋ житїю̀ тѣ́хъ послѣ́довавши, и҆ безмє́зднымъ врачє́мъ ревнꙋ́еши, и҆сцѣлє́нїѧ недꙋ̑жнымъ доны́нѣ тꙋ́не подаю́щи.

Что́ тѧ нарече́мъ, Ѽ ѯе́нїе бл҃же́ннаѧ; кі̑ѧ тѝ пѣ̑сни принесе́мъ; ꙗ҆́кѡ въ житїѝ земнѣ́мъ че́сти мїрскӏ́ѧ бѣ́гавши, нбⷭ҇нꙋю сла́вꙋ наслѣ́дила є҆сѝ. тѣ́мже ны́нѣ ѿ всѣ́хъ прославлѧ́ема, не пре́зри и҆ на̑ша хвалє́нїѧ ᲂу҆се́рднаѧ.

Дх҃а ст҃а́гѡ теплото́ю согрѣва́ема, блгⷣтїю тогѡ̀, ꙗ҆́кѡ бг҃отка́нною ѻ҆де́ждею, ѡ҆блече́ннаѧ, наготꙋ̀ и҆ хла́дъ претерпѣва́ла є҆сѝ мꙋжемꙋ́дреннѡ, гла́дъ же дх҃о́вный сло́вомъ бж҃їимъ ᲂу҆толѧ́ющи, ѡ҆ пи́щи тѣле́снѣй небрегла̀ є҆сѝ, ѿ си́лы въ си́лꙋ дꙋ́хомъ восходѧ́щи: тѣ́мже и҆ бл҃же́нство првⷣныхъ наслѣ́дила є҆сѝ.

Вдови́ца чⷭ҇тна́ѧ ѿ ю҆́ности ѡ҆брѣ́тшисѧ, дще́ри фанꙋ́илевѣ поревнова́ла є҆сѝ, хра́мꙋ бж҃їю примета́ющисѧ, посто́мъ же и҆ мл҃твою бг҃ꙋ денноно́щнѡ слꙋжа́щи. тѣ́мже и҆ сподо́биласѧ є҆сѝ зрѣ́ти хрⷭ҇та̀ сп҃са, не на рꙋкꙋ̀ сѷмеѡню носи́ма, но во сла́вѣ присносꙋ́щнѣй, на прⷭ҇то́лѣ превознесе́ннѣмъ на нб҃сѝ возсѣда́юща. Сла́ва, гла́съ г҃:

Сѐ ны́нѣ ѯе́нїа бл҃же́ннаѧ на пра́здникъ сво́й на́съ собира́етъ, церко́внымъ гла́сомъ зовꙋ́щи: Ѽ ча̑да и҆ дрꙋ́зи, вскꙋ́ю лю́бите сꙋетꙋ̀ и҆ и҆́щете лжѝ; что̀ всꙋ́е мѧте́тесѧ; ви́дите мѧ̀, всѧ̑ ꙗ҆́кѡ ᲂу҆ме́ты вмѣни́вшꙋю, и҆ свобо́дꙋ ѿ всѧ́кїѧ тщеты̀ ᲂу҆лꙋчи́вшꙋю: послѣ́дꙋйте ᲂу҆̀бо мнѣ̀, ꙗ҆́коже и҆ а҆́зъ хрⷭ҇тꙋ̀, и҆ къ бога́тствꙋ, а҆́ще тече́тъ, не прилага́йте срⷣца, ꙗ҆́кѡ да вре́мени прише́дшꙋ со мно́ю водворите́сѧ, въ черто́зѣхъ ра́дости несконча́емыѧ.

И҆ ны́нѣ, бг҃оро́диченъ догма́тїкъ, гла́съ то́йже: Ка́кѡ не диви́мсѧ:

Вхо́дъ, прокӏ́менъ днѐ, и҆ чтє́нїѧ г҃.

Премꙋ́дрости соломѡ́новы чте́нїе:

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предꙿ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́новы чте́нїе:

Првⷣницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѡрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый, прпⷣбїе: Поѻстри́тъ же напра́сный гнѣ́въ во ѡ҆рꙋ́жїе: спобо́ретъ же съ ни́мъ мӏ́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, И҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы́кѡвъ: Ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

Премꙋ́дрости соломѡ́новы чте́нїе:

Првⷣникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо чⷭ҇тна̀ не многолѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ, преста́вленъ бы́сть: Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ѹ҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: Оу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На лїтӏ́и стїхи́ра хра́ма, и҆ бл҃же́нныѧ, гла́съ и҃:

Стра́ннице бл҃же́ннаѧ, всѧ̑ сꙋ́єтнаѧ ꙗ҆́кѡ ᲂу҆ме́ты вмѣни́вшаѧ, да би́серъ хрⷭ҇та̀ прїѡбрѧ́щеши, зри́мъ тѧ̀, сто́гны гра́да петро́ва преходѧ́щꙋю, болѣ́зненными стопа́ми ѻ҆́ныѧ ѡ҆ст҃и́вшꙋю, мра́за не страша́щꙋюсѧ, но́щїю внѣ̀ гра́да таѧ́щꙋюсѧ. та́мѡ кѡлѣ́на дꙋшѝ и҆ тѣ́ла прекло́ньши, Ѽ, ко́ль тє́плы мѡльбы̀ бг҃ꙋ ты̀ сказа́ла є҆сѝ, па́ки же ра́достнѡ поноше́нїй сама̀ поиска́ла є҆сѝ, въ ѕлострада́нїихъ хрⷭ҇та̀ ра́ди ю҆ро́дствовавшаѧ, прозрѣ́нїѧ же да́ра та́йнѡ сподо́бльшаѧсѧ, бл҃годѣ́тельнице лю́демъ чꙋдодѣ́тельнаѧ, ѯе́нїе ст҃а́ѧ, бꙋ́ди моле́бница при́снѡ за ны̀.

Сла́ва, гла́съ д҃:

По и҆́мени твоемꙋ̀, ѯе́нїе, и҆ житїѐ твоѐ: была́ бо є҆сѝ мӏ́рꙋ семꙋ̀ ꙗ҆́кѡ стра́ннаѧ, вѣ́кꙋ семꙋ̀ ꙗ҆́кѡ чꙋжда́ѧ, цр҃кви же ст҃ѣ́й ꙗ҆́кѡ при́снаѧ. на землѝ пребыла̀ є҆сѝ ꙗ҆́кѡ го́стїѧ привре́меннаѧ, на нб҃си́ же пребыва́еши ꙗ҆́кѡ жи́тельница вѣ́чнаѧ. та́мѡ є҆сѝ ꙗ҆́кѡ бж҃їѧ и҆збра́нница, мы́ же на землѝ ᲂу҆бл҃жа́емъ тѧ̀, ꙗ҆́кѡ на́шꙋ мл҃твенницꙋ.

И҆ ны́нѣ, бг҃оро́диченъ, гла́съ то́йже:

Бцⷣе, грѣ́шныхъ спорꙋ́чнице, не ѡ҆ста́ви на́съ погиба́юшихъ, но ри́зою застꙋпле́нїѧ твоегѡ̀ покры́й на́съ, ꙗ҆́кѡ да ри́зы тоѧ̀ кра́й вѣ́рою ᲂу҆держа́вше, и҆зꙿ глꙋбины̀ паде́нїй и҆зведе́ни бꙋ́демъ, млⷭ҇рдїе твоѐ прославлѧ́юще.

На стїхо́внѣ стїхи̑ры, гла́съ а҃:

Поспѣша́й на по́мощь на́шꙋ, Ѽ ѯе́нїе првⷣнаѧ, ꙗ҆́кѡ всѝ є҆смы̀ въ бѣда́хъ, вѣ́ры несꙋмнѣ́нныѧ не стѧжа́вше, дерзнове́нїѧ же въ мл҃твахъ не и҆мꙋ́ще. тѣ́мже къ тебѣ̀, бл҃же́ннаѧ, прибѣга́емъ: ты̀ ᲂу҆̀бо не́мощь на́шꙋ воспо́лни, хрⷭ҇та̀ бг҃а ѡ҆ на́съ ᲂу҆молѧ́ющи.

Стӏ́хъ: Гдⷭ҇ь храни́тъ прише́льцы, си́ра и҆ вдовꙋ̀ прїи́метъ.

Проречє́нїѧ твоѧ̑, бл҃же́ннаѧ, и҆́стинꙋ сокрове́ннꙋю провѣщава́хꙋ: тѣ́мже велѣ́нїємъ твои̑мъ вѣ́рою послѣ́дꙋющїи, ра́дость и҆ ѿ бѣ́дъ и҆збавле́нїе ᲂу҆лꙋча́хꙋ. ѻ҆ба́че тѣ̑мъ противлѧ́ющїисѧ, го́рькїѧ печа́ли прича̑стницы быва́хꙋ, ничто́же по́льзꙋющесѧ.

Стӏ́хъ: Гдⷭ҇ь возво́дитъ низве́ржєнныѧ, гдⷭ҇ь лю́битъ првⷣники.

Вои́стиннꙋ, ѯе́нїе, по и҆́мени твоемꙋ̀ и҆ житїѐ твоѐ бы́сть, на нб҃сѝ бо дꙋ́хомъ живꙋ́щи, на землѝ стра́нна ꙗ҆ви́ласѧ є҆сѝ, гра́да здѣ̀ пребыва́ющагѡ не и҆мꙋ́щи, но грѧдꙋ́щагѡ взыскꙋ́ющи, въ не́мъ же ны́нѣ водворѧ́ешисѧ. Сла́ва, гла́съ з҃:

Но́вый а҆ндре́й, ю҆ро́дства по́двигъ во́лею на себѐ взе́мшїй, ꙗ҆влѧ́ешисѧ, Ѽ ѯе́нїе, а҆ндре́емъ наре́кшаѧсѧ: тѣ́мже и҆ видѣ́нїѧ премӏ́рныхъ, ꙗ҆́кѡ то́й, сподоблѧ́ющисѧ, ѿверза́еши ѻ҆́чи сꙋето́ю ѡ҆мрачє́ннымъ, и҆ предста́тельствꙋеши ѡ҆ всѣ́хъ, тебє̀ ра́ди ми́лѡсти ᲂу҆ хрⷭ҇та̀ сп҃са просѧ́щихъ, є҆го́же молѝ, бл҃же́ннаѧ, сп҃сти́сѧ дꙋша́мъ на́шымъ. И҆ ны́нѣ, бг҃оро́диченъ, гла́съ то́йже:

Подꙿ кро́въ тво́й, влⷣчце, всѝ земноро́днїи прибѣга́юще, вопїе́мъ тѝ: бцⷣе, ᲂу҆пова́нїе на́ше, и҆зба́ви ны̀ ѿ безмѣ́рныхъ прегрѣше́нїй, и҆ сп҃сѝ дꙋ́шы на́шѧ.

А҆́ще бдѣ́нїе соверша́етсѧ: тропа́рь ст҃ы́ѧ, пи́санъ на

ма́лѣй вече́рни, два́жды, и҆ Бцⷣе, дв҃о: є҆ди́ножды.

На ѹ҆́трени.

На Бг҃ъ гдⷭ҇ь: тропа́рь два́жды. Сла́ва, и҆ ны́нѣ, бг҃оро́диченъ.

По а҃-мъ стїхосло́вїи сѣда́ленъ, гла́съ а҃:

Не ктомꙋ̀ ѡ҆ѕлоблє́нїѧ и҆ скѡ́рби претерпѣва́еши, бл҃же́ннаѧ, на землѝ чꙋжде́й стра́нствꙋющи, но во ѻ҆те́чествїи нбⷭ҇нѣмъ водворѧ́ешисѧ, и҆ та́мѡ съ ли̑ки првⷣныхъ ᲂу҆тѣша́ешисѧ. тѣ́мже и҆ на́съ, непреста́ннѡ тебѐ призыва́ющихъ, ѿ бѣ́дъ и҆ напа́стей многоѡбра́зныхъ при́снѡ и҆збавлѧ́й. Два́жды.

Сла́ва, и҆ ны́нѣ, бг҃оро́диченъ:

Бцⷣе дв҃о, ра́дꙋйсѧ, ра́дость ѿ а҆́гг҃ла прїѧ́вшаѧ, и҆ ра́дость мӏ́рꙋ прине́сшаѧ, ра́дꙋйсѧ, ро́ждшаѧ зижди́телѧ твоего̀ и҆ гдⷭ҇а, ра́дꙋйсѧ, сподо́бльшаѧсѧ бы́ти мт҃и бж҃їѧ.

По в҃-мъ стїхосло́вїи сѣда́ленъ, гла́съ и҃:

Тебѣ̀, бл҃же́ннаѧ, ѿ бг҃а даде́сѧ блгⷣть пещи́сѧ ѡ҆ лю́дехъ, недꙋ̑жныѧ цѣли́ти, и҆ скѡ́рбныѧ ᲂу҆тѣша́ти, ѡ҆бꙋрева́ємыѧ напа́стьми ко приста́нищꙋ бл҃гоꙋти́шномꙋ направлѧ́ти, заблꙋ́ждшыѧ и҆ ѿча̑ѧнныѧ на пꙋ́ть сп҃се́нїѧ наставлѧ́ти. тѣ́мже мы̀ ны́нѣ, па́мѧть твою̀ соверша́юще, те́плѣ зове́мъ: не забꙋ́ди на́съ, бл҃же́ннаѧ, въ твои́хъ дерзнове́нныхъ мл҃твахъ. Два́жды.Сла́ва, и҆ ны́нѣ, бг҃оро́диченъ:

Тебѐ, влⷣчце, є҆ди́нꙋ на́деждꙋ и҆ прибѣ́жище и҆́мамы, тебѐ стѣ́нꙋ нерꙋши́мꙋю ѿ всѣ́хъ вра̑гъ и҆ напа́стей стѧжа́хомъ, не ѡ҆ста́ви на́съ ны́нѣ и҆ при́снѡ и҆ во вѣ́ки.

Полѷеле́й, и҆ велича́нїе:

Оу҆бл҃жа́емъ тѧ̀, ст҃а́ѧ бл҃же́ннаѧ ѯе́нїе, и҆ чти́мъ ст҃ꙋ́ю па́мѧть твою̀, ты́ бо мо́лиши за на́съ хрⷭ҇та̀ бг҃а на́шего. Ѱало́мъ и҆збра́нный: Терпѧ̀,

потерпѣ́хъ гдⷭ҇а, и҆ внѧ́тъ мѝ, и҆ ᲂу҆слы́ша мл҃твꙋ мою̀.

По полѷеле́и сѣда́ленъ, гла́съ є҃:

Ѿве́рзи ᲂу҆ста̀ на̑ша, сп҃се, да́ждь сло́во ра́зꙋма рабѡ́мъ неключи̑мымъ, воспѣ́ти досто́йнѡ ѯе́нїю бл҃же́ннꙋю, тоѧ́ бо по́двизи мїрскӏ́й ра́зꙋмъ превосхо́дѧтъ, и҆ тоѧ̀ смире́нїе, ꙗ҆́кѡ покро́вомъ, житїѐ є҆ѧ̀ сокрыва́етъ. ѻ҆ба́че чꙋдесы̀ и҆ предста́тельствомъ тоѧ̀ просвѣща́еми, ѿ любвѐ серде́чныѧ непре́станнѡ зове́мъ: не ѡ҆ста́ви на́съ застꙋпле́нїемъ твои́мъ, ѯе́нїе премꙋ́драѧ. Два́жды.

Сла́ва, и҆ ны́нѣ, бг҃оро́диченъ:

Не мꙋ́дростїю и҆ си́лою, ни бога́тствомъ хва́лимсѧ, но тобо́ю, пренепоро́чнаѧ, ты́ бо ро́дъ человѣ́чь на высотꙋ̀, а҆́гг҃лы превосходѧ́щꙋю, вознесла̀ є҆сѝ, сло́во предвѣ́чное ро́ждши, и҆ мт҃рнее дерзнове́нїе къ сн҃ꙋ твоемꙋ̀ и҆ бг҃ꙋ стѧжа́вши. тѣ́мже тѝ припа́дающе, мо́лимсѧ: не забꙋ́ди на́съ си́рыхъ, Ѽ всепѣ́таѧ мт҃и и҆ дв҃о.

Та́же степє́нна, а҃-й а҆҆нтїфѡ́нъ д҃-гѡ гла́са.

Прокӏ́менъ, гла́съ д҃: Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на него̀. Стӏ́хъ: Оу҆слы́ши, бж҃е, гла́съ мо́й, внегда̀ моли́ти ми сѧ къ тебѣ̀.

Є҆ѵⷢ҇лїе ѿ лꙋкѝ, зача́ло ѻ҃и: Во вре́мѧ ѻ҆́но, бѧ́хꙋ приближа́ющесѧ і҆и҃сꙋ:

По н҃-мъ ѱалмѣ̀: Мл҃твами ст҃ы́ѧ бл҃же́нныѧ ѯе́нїи:

Та́же стїхи́ра, гла́съ ѕ҃:

Жесто́кое житїѐ во́лею и҆збра́ла є҆сѝ, и҆ ѡ҆ѕлоблє́нїѧ всѧ́чєскаѧ претерпѣ́ла є҆сѝ, ю҆ро́дство мӏ́ра сегѡ̀ ѡ҆бличи́вши, премꙋ́дрость же бж҃їю ꙗ҆ви́вши. и҆ ны́нѣ на нб҃сѝ ᲂу҆тѣша́ешисѧ, мы́ же, на землѝ стра́нствꙋюще, тебѣ̀ непреста́ннѡ зове́мъ: не забꙋ́ди на́съ, бл҃же́ннаѧ, хрⷭ҇та̀ бг҃а ѡ҆ на́съ ᲂу҆молѧ́ющи.

Канѡ́нъ бцⷣѣ со і҆рмосо́мъ на ѕ҃: Во́дꙋ проше́дъ: и҆ бл҃же́ннѣй ѯе́нїи на и҃,

є҆гѡ́же краегране́сїе: Ѯе́нїю мꙋжеꙋ́мнꙋю похвала́ми почита́емъ.

Гла́съ д҃. Пѣ́снь а҃.

І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ, да тебѣ̀, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.

Припѣ́въ: Ст҃а́ѧ бл҃же́ннаѧ Ѯе́нїе, молѝ бг҃а ѡ҆ на́съ.

Ѯе́нїе бл҃же́ннаѧ, вои́стиннꙋ по и҆́мени твоемꙋ̀ и҆ житїѐ твоѐ бы́сть, на земли́ бо, ꙗ҆́кѡ во странѣ̀ чꙋжде́й, преходѧ́щи, и҆ во ѻ҆те́чествїе нбⷭ҇ное преста́витисѧ ча́ющи, всѧ̑ земна̑ѧ, ꙗ҆́кѡ сѣ́нь и҆ со́нїе, презрѣ́ла є҆сѝ.

Сꙋетꙋ̀ всѧ́ческꙋю, ꙗ҆́кѡ пра́хъ ѿ ногꙋ̀ твоє́ю ѿтрѧ́сши, жесто́кимъ пꙋте́мъ въ зе́млю ѡ҆бѣтова́нїѧ ше́ствовати и҆зво́лила є҆сѝ, ѯе́нїе мꙋжемꙋ́дреннаѧ, человѣкоꙋбӏ́йцꙋ врага̀, ꙗ҆́кѡ а҆мали́ка, побѣжда́ющи, и҆ гдⷭ҇еви побѣ́дное пѣ́нїе приносѧ́щи.

Є҆гѵ́пєтскїѧ котлы̀ бл҃годе́нствїѧ презрѣ́вши, и҆ мӏ́рꙋ кичли́вомꙋ посмѣѧ́вшисѧ, ѯе́нїе мꙋ́драѧ, мо́рѧ жите́йскагѡ дно̀ прешла̀ є҆сѝ неврежде́ннѡ, бг҃ꙋ тѧ̀ ведꙋ́щꙋ рꙋко́ю крѣ́пкою, є҆мꙋ́же воспѣ́ла є҆сѝ побѣ́дное пѣ́нїе.

Бг҃оро́диченъ: Ненадѣ́ющихсѧ наде́ждо, и҆ бори́мыхъ по́моще, пречⷭ҇таѧ, въ мо́ри сꙋ́щихъ ѕвѣздо̀ бг҃оте́чнаѧ, и҆ въ пꙋсты́ни заблꙋ́ждшихъ и҆сто́чниче живоно́сный, ѿра́дꙋ дꙋша́мъ на́шымъ, дв҃о бл҃гослове́ннаѧ, да́ждь.

Катава́сїа срѣ́тенїѧ: Сꙋ́шꙋ глꙋбороди́тельнꙋю зе́млю: Пѣ́снь г҃.

І҆рмо́съ: Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо ст҃ъ, па́че тебє̀, чл҃҃вѣколю́бче.

І҆ѡа́нна, возлю́бленнаго ᲂу҆ченика̀ сп҃сова, слы́шавши глаго́люща: и҆́же лю́битъ мӏ́ръ, въ не́мъ любвѐ ѻ҆́ч҃и нѣ́сть: мӏ́ръ грѣхолюби́вый возненави́дѣвши, въ до́мъ ѻ҆́ч҃їй поспѣша́ла є҆сѝ, бл҃же́ннаѧ.

Ю҆ро́дꙋ себѐ хрⷭ҇та̀ ра́ди сотво́рши, мꙋ́дрости же премӏ́рныѧ и҆сполнѧ́ющисѧ, ѻ҆́комъ чⷭ҇тымъ бꙋ̑дꙋщаѧ, ꙗ҆́кѡ настоѧ̑щаѧ, прозрѣва́ющи, прⷪ҇ро́кѡмъ бж҃їимъ поревнова́ла є҆сѝ, ѯе́нїе бг҃омꙋ́драѧ.

Мл҃тва ᲂу҆се́рднаѧ пи́ща тебѣ̀ бы́сть, првⷣнице: рꙋга̑нїѧ же и҆ ѡ҆смѣѧ̑нїѧ, питїѐ сла́дкое: смиренномꙋ́дрїе, ѻ҆де́жда ᲂу҆краше́нїѧ: и҆ вѣне́цъ, дх҃а ѡ҆сїѧ́нїе.

Бг҃оро́диченъ: Оу҆ста̀ двиза́ти на мл҃твꙋ, ꙗ҆́коже ма́ти самꙋи́лова, ника́коже ѡ҆блѣни́мсѧ, вѣ́рнїи, нб҃сѐ и҆ землѝ цр҃и́цꙋ призыва́ющи.

Сѣда́ленъ, гла́съ є҃:

Є҆гда̀ но́щїю, мл҃твы твоѧ̑ тайнолѣ́пнѡ творѧ́щи, на снѣ́гъ колѣ̑на твоѧ̑ преклонѧ́ла є҆сѝ, бл҃же́ннаѧ: дꙋша̀ твоѧ̀ па́че снѣ́га ᲂу҆бѣлѧ́шесѧ, сле́зы же, ѿ теплоты̀ серде́чныѧ пролива́ємыѧ, зе́млю согрѣва́хꙋ, гра́дъ тво́й спѧ́щїй бдѣ́нїемъ твои́мъ сп҃са́шесѧ, и҆ гнѣ́въ бж҃їй ѿ тогѡ̀ ѿвраща́шесѧ. ны́нѣ ѹ҆́бѡ, тебѣ̀ ѿ мӏ́ра сегѡ̀ ѿше́дшей, бѣ́дствꙋемъ лю́тѣ, но́щь несвѣтла̀ наста̀ на́мъ, ѡ҆гꙋстѣ̀ тьма̀ грѣхо́внаѧ, со́нъ лѣ́ности и҆ нерадѣ́нїѧ зѣ̑ницы на́шѧ смежѝ, гра́дъ тво́й въ рꙋ́цѣ безбѡ́жникъ предаде́сѧ, и҆ ѻ҆те́чествїе твоѐ врагꙋ̀ порабо́тисѧ: потщи́сѧ ᲂу҆̀бо на мл҃твꙋ, и҆ на по́мощь на́мъ поспѣша́й, ѯе́нїе, дерзнове́нїемъ ве́лїѧ. Два́жды.Сла́ва, и҆ ны́нѣ, бг҃оро́диченъ:

Предста́тельнице и҆ ско́раѧ застꙋ́пнице ро́да хрⷭ҇тїа́нскагѡ, бездо́мныхъ и҆ ѻ҆те́чествїѧ лише́нныхъ покрови́тельнице, молѝ при́снѡ сн҃а твоего̀ и҆ бг҃а, съ бл҃же́нною ѯе́нїею, за рꙋ̑сскїѧ лю́ди, во ѻ҆те́чествїи и҆ въ разсѣ́ѧнїи сꙋ́щыѧ, да ѻ҆те́чествїѧ неѿе́млемагѡ, нбⷭ҇нагѡ дости́гнемъ.

Пѣ́снь д҃.

І҆рмо́съ: Оу҆слы́шахъ сла́вное смотре́нїе твоѐ, хрⷭ҇тѐ бж҃е, ꙗ҆́кѡ роди́лсѧ є҆сѝ ѿ дв҃ы, да ѿ ле́сти и҆зба́виши зовꙋ́щыѧ: сла́ва си́лѣ твое́й, гдⷭ҇и.

Же́нскꙋю не́мощь ѿлага́ющи, а҆ндре́емъ нарекла́сѧ є҆сѝ, мꙋжеꙋ́мнаѧ, проти́вꙋ дꙋхѡ́въ ѕло́бы подвиза́ющисѧ: сла́ва си́лѣ твое́й, къ подаю́щемꙋ тѝ си́лꙋ взыва́ющи.

Є҆́ѵино высокоꙋ́мїе, ра́й затвори́вшее, ѿве́ргши всеконе́чнѡ, бг҃омꙋ́драѧ, ю҆ро́да нарещи́сѧ и҆зволѧ́еши, ѕмӏ́ѧ льсти́ваго посрами́вши.

Оу҆́мъ хрⷭ҇то́въ внꙋтрьꙋ́дꙋ таѧ́щи, премꙋ́драѧ, мӏ́ра мꙋ́дрость попира́еши, вразꙋмлѧ́еши же лю́ди, сꙋдьбы̑ бж҃їѧ предвозвѣща́ющи, и҆ стопы̑ на́шѧ на пꙋ́ть пра́вый направлѧ́ющи.

Бг҃оро́диченъ: Млⷭ҇рдїе твоѐ къ на́мъ преклони́ти тщи́мсѧ, бцⷣе, мл҃твенницꙋ тебѣ̀ предлага́юще ѯе́нїю бл҃же́ннꙋю, є҆ѧ́же предста́тельство стѧжа́ти ᲂу҆пова́емъ, па́мѧть є҆ѧ̀ те́плѣ воспѣва́юще. Пѣ́снь є҃.

І҆рмо́съ: Стѧжа́вый ны̀ и҆збра̑нныѧ лю́ди, кро́вїю твое́ю, гдⷭ҇и, тво́й ми́ръ да́ждь на́мъ, во є҆диномы́слїи сохранѧ́ѧ ста́до твоѐ.

Наготꙋ̀ и҆ хла́дъ терпѧ́щи, ри̑зы же ни́щымъ раздаю́щи: довлѣ́етъ мѝ ри́за креще́нїѧ, въ себѣ̀ взыва́ла є҆сѝ, бл҃же́ннаѧ.

Оу҆врачꙋ́й на́шѧ ра̑ны, ᲂу҆слы́ши мл҃твы, ᲂу҆мирѝ на́шꙋ жи́знь, и҆ на по́мощь на́мъ поспѣша́й, ѯе́нїе бл҃голюби́ваѧ.

Ю҆́ныѧ вразꙋмѝ и҆ на пꙋ́ть и҆́стины наста́ви, ста̑рыѧ ᲂу҆мꙋдрѝ и҆ бжⷭ҇твєннаѧ разꙋмѣ́ти наꙋчѝ, всѧ́кѡ на дѣла̀ бл҃га̑ѧ и҆̀хъ подвиза́ющи, Ѽ ѯе́нїе, мꙋ́дрость нбⷭ҇нꙋю стѧжа́вшаѧ.

Бг҃оро́диченъ: Печа̑ли ѿло́жше, восклони́мсѧ и҆ горѣ̀ воззри́мъ, бра́тїе, и҆ ѹ҆́зримъ въ нб҃сѣ́хъ цр҃и́цꙋ бцⷣꙋ, покро́вомъ свои́мъ свѣтоно́снымъ на́съ покрыва́ющꙋю.

Пѣ́снь ѕ҃.

І҆рмо́съ: Внегда̀ скорбѣ́ти мѝ, возопи́хъ ко гдⷭ҇ꙋ, и҆ ᲂу҆слы́ша мѧ̀ бг҃ъ сп҃се́нїѧ моегѡ̀.

Ѡ҆кормѝ на́съ, въ мо́ри жите́йстѣмъ бѣ́дствꙋющихъ, бл҃же́ннаѧ, ко приста́нищꙋ бл҃гоꙋти́шномꙋ на́съ провожда́ющи, и҆ молѧ́щисѧ ко є҆ди́номꙋ, и҆́же на́съ сп҃стѝ могꙋ́щемꙋ.

Хотѧ́ще бл҃га̑ѧ твори́ти, ѕла̑ѧ содѣва́емъ: за́пѡвѣди бж҃їѧ вѣ́дꙋще, ѡ҆ тѣ́хъ небреже́мъ и҆ согрѣша́емъ: помозѝ на́мъ, немощны̑мъ, ѯе́нїе бл҃госе́рдаѧ.

Возопѝ ѡ҆ на́съ ко гдⷭ҇ꙋ, є҆мꙋ́же послꙋжи́ла є҆сѝ, Ѽ ѯе́нїе, гла́сомъ крѣ́пкимъ, ꙗ҆́коже мѡѷсе́й въ пꙋсты́ни, и҆ ᲂу҆слы́шитъ тѧ̀ бг҃ъ, сп҃стѝ хотѧ́й человѣ́ки.

Бг҃оро́диченъ: А҆́ще не ты̀ на́мъ рꙋ́цѣ простре́ши, Ѽ бг҃омт҃и, не и҆́мамы и҆збы́ти поги́бельнагѡ ро́ва, сегѡ̀ ра́ди тѝ зове́мъ: влⷣчце, сп҃си́ ны.

Конда́къ, гла́съ г҃:

На землѝ ꙗ҆́кѡ стра́нна пребы́вши, ѡ҆ нбⷭ҇нѣмъ же ѻ҆те́чествїи воздыха́ющи, ю҆ро́да ѿ бꙋ́їихъ и҆ невѣ́рныхъ, премꙋ́дра же и҆ ст҃а̀ ѿ вѣ́рныхъ познава́ешисѧ, и҆ ѿ бг҃а сла́вою и҆ че́стїю вѣнча́ешисѧ, ѯе́нїе мꙋжеꙋ́мнаѧ и҆ бг҃оꙋ́мнаѧ, сегѡ̀ ра́ди зове́мъ тѝ: ра́дꙋйсѧ, ꙗ҆́кѡ по стра́нствїи земнѣ́мъ въ домꙋ̀ ѻ҆́ч҃емъ водворѧ́ешисѧ.

І҆́косъ: Кто̀ сїѧ̀, во врата̀ црⷭ҇твїѧ нбⷭ҇нагѡ толкꙋ́щаѧ, є҆ѧ́же ри̑зы бѣлы̑, лице́ же сїѧ́етъ па́че со́лнца; ѿкꙋ́дꙋ прихо́дитъ, и҆ ꙗ҆ковы́хъ тре́бꙋетъ; сїѧ̀ є҆́сть дщѝ ѻ҆ц҃а̀ нбⷭ҇нагѡ, сн҃а бж҃їѧ раба̀ вѣ́рнаѧ, и҆ дх҃а ст҃а́гѡ сосꙋ́дъ и҆збра́нный, на землѝ ꙗ҆́кѡ стра́нница преше́льствовавшаѧ. ны́нѣ во ѻ҆те́чествїе нбⷭ҇ное преставлѧ́етсѧ, со тща́нїемъ ᲂу҆̀бо се́й двє́ри ѿве́рзите, и҆ срѣта́йте ю҆̀, съ весе́лїемъ зовꙋ́ще: ра́дꙋйсѧ, ѯе́нїе, ꙗ҆́кѡ по стра́нствїи земнѣ́мъ въ домꙋ̀ ѻ҆́ч҃емъ водворѧ́ешисѧ.

Пѣ́снь з҃.

І҆рмо́съ: Ю҆́нѡши трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жше, посредѣ̀ пла́мене вопїѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆҆тє́цъ на́шихъ.

Ле́гкое бре́мѧ хрⷭ҇то́во на ра́мо твоѐ взе́мши, всѧ̑ тѧ̑жкаѧ зємна́ѧ нивочто́же вмѣнѧ́ющи, бл҃же́ннаѧ, неꙋдобоноси́мое ка́менїе на ве́рхъ церко́вный преноси́ла є҆сѝ, ᲂу҆се́рднѡ трꙋдѧ́щисѧ и҆ зовꙋ́щи: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

А҆́лчемъ и҆ жа́ждемъ и҆ наготꙋ́емъ дх҃о́внѡ: пи́щꙋ сла́дкꙋю, твоѐ наставле́нїе, да́ждь ᲂу҆̀бо на́мъ, бл҃же́ннаѧ, прохладѝ горта̑ни на́шѧ росо́ю мл҃твъ твои́хъ ѡ҆ на́съ ᲂу҆бо́гихъ, ꙗ҆́кѡ да гдⷭ҇еви бл҃года́рнѣ зове́мъ: бл҃гослове́нъ є҆сѝ, бж҃е ѻ҆тє́цъ на́шихъ.

Мытаре́во грѣхолю́бное житїѐ подража́юще, смиренномꙋ́дрїѧ тогѡ̀ не стѧжа́хомъ, па́че же и҆ фарїсе́евѣй го́рдости преда́хомсѧ, добродѣ́телей же не и҆мꙋ́ще, что̀ ѹ҆́бѡ сотвори́мъ, немощнӏ́и, а҆́ще не къ тебѣ̀, ѯе́нїе, прибѣ́гнемъ и҆ возопїи́мъ: ᲂу҆молѝ ѡ҆ на́съ бг҃а ѻ҆тє́цъ на́шихъ.

Бг҃оро́диченъ: И҆ны́ѧ нѣ́сть во вселе́ннѣй, ꙗ҆́коже ты̀, бцⷣе, ꙗ҆́же мт҃рнее дерзнове́нїе ко сп҃сꙋ и҆мꙋ́щаѧ, и҆ а҆́гг҃лы пресла́вною чⷭ҇тото́ю превозше́дшаѧ: тѣ́мже тѝ припа́даемъ, влⷣчце, молѝ ѡ҆ на́съ при́снѡ бг҃а ѻ҆тє́цъ на́шихъ.

Пѣ́снь и҃.

І҆рмо́съ: Всѧ́чєскаѧ, влⷣко, премꙋ́дростїю твое́ю соста́вилъ є҆сѝ, земли́ же па́ки ᲂу҆тверди́лъ є҆сѝ, ꙗ҆́коже вѣ́си, дно̀, ѡ҆снова́нїемъ водрꙋзи́вый на вода́хъ безмѣ́рныхъ. тѣ́мъ всѝ вопїе́мъ воспѣва́юще: бл҃гослови́те, дѣла̀ гдⷭ҇нѧ, непреста́ннѡ гдⷭ҇а.

Помо́щница на́мъ бꙋ́ди, бл҃же́ннаѧ, и҆зꙿима́ющи на́съ ѿ скорбе́й и҆ болѣ́зней, ѿ собла́знѡвъ же, нестрое́нїй и҆ бѣ́дъ, и҆ жєла́нїѧ серде́цъ на́шихъ во бл҃го и҆спо́лни, ꙗ҆́кѡ да ѡ҆ тебѣ̀ бг҃а бл҃годарѧ́ще, вопїе́мъ: бл҃гослови́те, дѣла̀ гдⷭ҇нѧ, непреста́ннѡ гдⷭ҇а.

Ѻ҆гне́вицꙋ держа́вствꙋющемꙋ ᲂу҆ста́вила є҆сѝ, цари́цѣ же въ видѣ́нїи со́ннѣмъ предста́вши, прорекла̀ є҆сѝ то́й рожде́нїе ча́да, тѣ́мже бл҃года́рственнѣ вопїѧ́ше: бл҃гослови́те, дѣла̀ гдⷭ҇нѧ, непреста́ннѡ гдⷭ҇а.

Ча̑да твоѧ̑ є҆смы̀, Ѽ ѯе́нїе бл҃же́ннаѧ, не ѡ҆ста́ви на́съ си́рыхъ, но на по́мощь къ на́мъ прїидѝ. не забꙋ́ди ѡ҆ сла́вѣ твое́й пекꙋ́щихсѧ, но ра́дованїемъ и҆̀мъ возда́ждь, да всѝ согла́снѡ пое́мъ: бл҃гослови́те, дѣла̀ гдⷭ҇нѧ, непреста́ннѡ гдⷭ҇а.

Бг҃оро́диченъ: И҆́мѧ твоѐ пресла́дкое и҆ мѷроꙋха́нное да не ѿхо́дитъ ѿ ѹ҆́стъ на́шихъ, бцⷣе, сердца́ же на̑ша, любо́вїю бжⷭ҇твенною горѧ̑ща, всю̀ тва́рь да приглаша́ютъ вопи́ти: бл҃гослови́те, дѣла̀ гдⷭ҇нѧ, непреста́ннѡ мт҃рь бж҃їю. Пѣ́снь ѳ҃.

І҆рмо́съ: Тѧ̀ пресла́внꙋю невѣ́стꙋ, и҆ всест҃ꙋ́ю бцⷣꙋ, зижди́телѧ ро́ждшꙋю, неви́димыхъ же и҆ всѣ́хъ ви́димыхъ, пѣ́сньми велича́емъ.

Тайнолѣ̑пнаѧ житїѧ̀ твоегѡ̀, и҆ по́двизи твоѝ сокрове́ннїи, ны́нѣ мӏ́рꙋ ꙗ҆ви́шасѧ, ѯе́нїе бл҃же́ннаѧ, тѣ́мже ѡ҆ тебѣ̀ веселѧ́щесѧ, хрⷭ҇та̀ бг҃а, тебѐ просла́вльшаго, немо́лчнѡ велича́емъ.

А҆́ще и҆ преста́виласѧ є҆сѝ ѿ земны́хъ, ѻ҆ба́че вѣ́дꙋще тѧ̀ и҆ по сме́рти на́мъ спребыва́ющꙋю, и҆ мл҃твами твои́ми при́снѡ на́съ ѿ бѣ́дъ покрыва́ющꙋ, бл҃года́рнѣ тѧ̀, бл҃же́ннаѧ, велича́емъ.

Є҆́же ѡ҆ на́съ, немощны́хъ и҆ ᲂу҆бо́гихъ, попече́нїе твоѐ воспомина́юще, съ любо́вїю къ тебѣ̀ припа́даемъ, мл҃твеннице на́ша крѣ́пкаѧ: не ѡ҆ста́ви ѹ҆́бѡ на́съ си́рыхъ, но при́снѡ на́мъ помога́й, ꙗ҆́кѡ да ѡ҆ тебѣ̀ бг҃а и҆ ѻ҆ц҃а̀ нбⷭ҇наго при́снѡ велича́емъ.

Бг҃оро́диченъ: Мл҃твы ѯе́нїи бл҃же́нныѧ, къ тебѣ̀, влⷣчце, ѡ҆ на́съ принѡси́мыѧ, къ сн҃ꙋ твоемꙋ̀ и҆ бг҃ꙋ, дв҃о, принесѝ, твои́мъ мт҃рнимъ хода́тайствомъ ты̑ѧ подкрѣплѧ́ющи, и҆ сп҃са́й, пречⷭ҇таѧ, тѧ̀ велича́ющыѧ.

Свѣти́ленъ:

До́ме ѻ҆́ч҃їй, ѿве́рзи мѝ двє́ри, ѿ землѝ чꙋжде́й преста́вльшейсѧ, вопїе́тъ ѯе́нїа бл҃же́ннаѧ, во врата̀ црⷭ҇твїѧ нбⷭ҇нагѡ толкꙋ́щи. Два́жды.

Сла́ва, и҆ ны́нѣ, бг҃оро́диченъ:

Две́ре нбⷭ҇наѧ, пала́то цре́ва, хрⷭ҇тїа́нъ нерꙋши́маѧ стѣно̀, бг҃опрїе́мнѣи твоѝ рꙋ́цѣ на́мъ простира́ющи, введѝ на́съ, влⷣчце, въ вѣ̑чныѧ кро́вы.

На хвали́техъ стїхи̑ры на д҃, гла́съ и҃:

Со́лнца пра́вды, хрⷭ҇та̀ безꙋ́мнѡ ᲂу҆клони́хомсѧ, и҆ зима̀ на́мъ є҆́сть лю́таѧ жестосе́рдїѧ, но ты̀, бл҃же́ннаѧ, теплото́ю мл҃твъ твои́хъ ѡ҆леденѣ̑вшаѧ сердца̀ на̑ша согрѣва́й, ꙗ҆́кѡ да ѿ сна̀ нечꙋ́вствїѧ восклони́мсѧ, ве́снꙋ дх҃о́внꙋю возвѣща́юще.

Въ нощѝ грѣхо́внѣй заблꙋди́хомсѧ, ѡ҆гꙋстѣ̀ тьма̀ дх҃о́внаѧ: ка́кѡ и҆збѣ́гнемъ паде́нїй и҆ поги́бельнагѡ ро́ва; ка́кѡ ѡ҆брѣте́мъ пꙋ́ть ко сп҃се́нїю; ты̀, бл҃же́ннаѧ, свѣти́льникъ млⷭ҇рдїѧ твоегѡ̀ возже́гши, и҆зы́ди въ срѣ́тенїе на́съ погиба́ющихъ, и҆ просте́рши на́мъ рꙋ́цѣ твоѝ, на стєзѝ пра̑выѧ и҆зведи́ ны.

Гдѣ̀ премꙋ́дръ, гдѣ̀ кни́жникъ, гдѣ̀ совопро́сникъ вѣ́ка сегѡ̀; не ѡ҆бꙋи́ ли бг҃ъ премꙋ́дрость мїрскꙋ́ю; тѣ́мже и҆ ты̀, ѯе́нїе, мӏ́рꙋ ю҆ро́да ꙗ҆влѧ́ешисѧ, хрⷭ҇та̀, бж҃їю премꙋ́дрость проповѣ́дающи, и҆ тогѡ̀ блгⷣтїю просвѣща́ема, всѣ́хъ наꙋча́еши сꙋеты̀ мїрскӏ́ѧ ѡ҆греба́тисѧ.

Нищетꙋ̀ соверше́ннꙋю стѧжа́вши, премꙋ́драѧ, мїрска̑ѧ мꙋдрѡва́нїѧ ѿве́ргши, бг҃ꙋ же, ꙗ҆́кѡ вдови́чꙋ ле́птꙋ, въ же́ртвꙋ ра́зꙋмъ прине́сши, ю҆ро́да человѣ́кѡмъ ꙗ҆влѧ́ешисѧ, ѻ҆ба́че тѧ̀ вѣ́мы мꙋдрѣ́йшꙋю премꙋ́дрыхъ. тѣ́мже ѿ тебє̀ наꙋче́нїѧ про́симъ: просвѣтѝ на́шъ ѹ҆́мъ твое́ю свѣ́тлостїю, мра́къ невѣ́дѣнїѧ ѿгонѧ́ющи.

Сла́ва, гла́съ ѕ҃:

Всѐ ѿложи́вши мїрско́е попече́нїе, ри́зою ю҆ро́дства премꙋ́дрость сокрыва́ющи, бг҃ꙋ же и҆ человѣ́кѡмъ тайнолѣ́пнѡ послꙋжи́вши, стѧжа́ла є҆сѝ ст҃а́гѡ дх҃а блгⷣть, Ѽ ѯе́нїе бл҃же́ннаѧ. тѣ́мже, ꙗ҆́кѡ дерзнове́нїе ко сп҃сꙋ и҆мꙋ́щаѧ, не преста́й моли́ти того̀, сп҃сти́сѧ дꙋша́мъ на́шымъ.

И҆ ны́нѣ, бг҃оро́диченъ:

Всѧ̑ превозше́дши непоро́чнагѡ дѣ́вства добро́тою, бг҃а родила̀ є҆сѝ неизрече́ннѡ, прест҃а́ѧ дв҃о мт҃и, тѣ́мже ро́дъ человѣ́чь ѡ҆ тебѣ̀ ра́дꙋетсѧ, и҆ тобо́ю, и҆́стинною бцⷣею, дерзнове́ннѡ хва́литсѧ, на тѧ̀ ᲂу҆пова́нїе возлага́ѧ, ты́ бо є҆сѝ предста́тельница и҆ сп҃се́нїе мӏ́рꙋ.

Славосло́вїе вели́кое.

Є҆ктєнїѝ, и҆ ѿпꙋ́стъ.

На лїтꙋргӏ́и.

Бл҃жє́нна ѿ канѡ́на ст҃ы́ѧ, пѣ́снь г҃ и҆ ѕ҃.

Прокӏ́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Стӏ́хъ:

Въ це́рквахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.

А҆пⷭ҇лъ къ гала́тѡмъ, зача́ло с҃и.

А҆ллилꙋ́їа, гла́съ а҃: Терпѧ̀, потерпѣ́хъ гдⷭ҇а, и҆ внѧ́тъ мѝ, и҆ ᲂу҆слы́ша мл҃твꙋ мою̀. Стӏ́хъ: Поста́ви на ка́мени но́зѣ моѝ, и҆ и҆спра́ви стѡпы̀ моѧ̑.

Є҆ѵⷢ҇лїе ѿ матѳе́а, зача́ло р҃д.

Прича́стенъ: Въ па́мѧть вѣ́чнꙋю бꙋ́детъ првⷣникъ, ѿ слꙋ́ха ѕла̀ не ᲂу҆бои́тсѧ.

Мл҃тва ко ст҃ѣ́й бл҃же́ннѣй ѯе́нїи,

бездо́мнѣй стра́нницѣ петро́ва гра́да:

Ѽ препро́стаѧ ѡ҆́бразомъ житїѧ̀ своегѡ̀, бездо́мнаѧ на землѝ, наслѣ́днице же ѻ҆ц҃а̀ нбⷭ҇нагѡ, бл҃же́ннаѧ стра́ннице ѯе́нїе! ꙗ҆́коже пре́жде къ надгро́бїю твоемꙋ̀ припа́давшїи, си́це ны́нѣ и҆ мы̀, къ тебѣ̀ прибѣга́юще, про́симъ: помоли́сѧ, ꙗ҆́кѡ да напра́вѧтсѧ стѡпы̀ на́шѧ, по словесѝ гдⷭ҇ню, къ дѣ́ланїю за́повѣдей є҆гѡ̀, и҆ да не возѡблада́етъ ро́домъ на́шимъ ѿ безбѡ́жникъ всѣ́ѧнное беззако́нїе дꙋшетлѣ́нное, но є҆щѐ да ѹ҆́зримъ всѝ гра́да твоегѡ̀, и҆ страны̀ тѝ при́сныѧ рѡссӏ́йскїѧ, ѿ настоѧ́щїѧ бѣды̀ лю́тыѧ и҆збавле́нїе. ᲂу҆таи́вшаѧ себѐ ѿ мꙋ́дрыхъ вѣ́ка сегѡ̀, но бг҃ꙋ зна́емаѧ, и҆спроси́ же смире́нїѧ, кро́тости и҆ любвѐ зало́гъ въ сердца̀ на̑ша, въ мл҃твахъ вѣ́рꙋ, въ покаѧ́нїи наде́ждꙋ, въ трꙋдѣ́хъ крѣ́пость, въ болѣ́знехъ млⷭ҇ть и҆сцѣле́нїѧ, всегѡ́же житїѧ̀ понѐ ѿны́нѣ ѡ҆бновле́нїе, ꙗ҆́кѡ да ᲂу҆бл҃жа́юще тѧ̀, со ᲂу҆миле́нїемъ и҆сповѣ́мы ѻ҆ц҃а̀ и҆ сн҃а и҆ ст҃а́го дх҃а, трⷪ҇цꙋ є҆диносꙋ́щнꙋю и҆ нераздѣ́льнꙋю, во вѣ́ки вѣкѡ́въ. А҆ми́нь.