Мѣ́­сѧ­ца ѻ҆ктѡ́­врїа въ г҃і-й де́нь, и҆ феѵ­рꙋ­а́­рїа въ в҃і-й де́нь.

Слꙋ́жба прест҃ѣ́й бцⷣѣ, въ че́сть и҆ па́мѧть ꙗ҆вле́нїѧ чꙋдотво́рныѧ є҆ѧ̀ і҆кѡ́ны, нарица́емыѧ і҆́верскїѧ.

На ма́лѣй вече́рни.

На Гдⷭ҇и, воз­зва́хъ: стї­хи̑­ры на д҃, гла́съ а҃:

Прї­и­ди́­те, всѝ лю́­дїе, вѣ́­рою со­ше́д­ше­сѧ, про­сла́­вимъ влⷣчцꙋ бцⷣꙋ, за­стꙋ́п­ни­цꙋ ро́да на́­ше­гѡ, и҆ ѡ҆б­сто­ѧ́­ще чⷭ҇тнꙋ́ю і҆кѡ́­нꙋ, лю­бе́з­нѡ ѡ҆б­ло­бы­за́­имъ ю҆̀, гла­го́­лю­ще: ра́­дꙋй­сѧ, пре­чⷭ҇таѧ дв҃о: ра́­дꙋй­сѧ, мт҃и гдⷭ҇а вы́ш­нѧ­гѡ: ра́­дꙋй­сѧ, по­кро́­ве и҆ сп҃се́­нїе дꙋ́шъ на́­шихъ.

Ра́­дꙋй­сѧ, а҆ѳѡ́н­скаѧ горо̀: сла́­ва бо гдⷭ҇нѧ на тебѣ̀ воз­сїѧ̀, ꙗ҆́кѡ бо мно­го­свѣ́т­лаѧ ѕвѣз­да̀ прї­и́­де ѿ во­сто́­ка къ за́­па­дꙋ, въ стол­пѣ̀ ѻ҆́гнен­нѣ, ꙗ҆ви́­сѧ і҆кѡ́­на бг҃о­мт҃ре, ѡ҆за­рѧ́­ю­щи а҆ѳѡ́нъ сво­и́мъ при­ше́­ствї­емъ.

Ꙗ҆́ко­же мѡ­ѷ­се́ю въ сї­на́и кꙋ­пи­на̀ ꙗ҆ви́­сѧ и҆но­гда̀, ѻ҆гне́мъ ѹ҆́бѡ ѡ҆па­лѧ́­е­ма, и҆ не­вре­ди́­ма пре­бы́в­ши: та́кѡ и҆ все­не­по­ро́ч­ныѧ сщ҃е́н­ный ѡ҆́бразъ ѻ҆гне́мъ ѡ҆дѣ­ва́­ет­сѧ, и҆ не­ѡ­па­ли́мь пре­бы­ва́­етъ, ѡ҆сщ҃а́ѧ взи­ра́­ю­щыѧ съ вѣ́­рою на него̀.

Грѧ­ди́­те ра́­дост­нѡ, и҆́но­кѡвъ а҆ѳѡ́н­скихъ ли́цы, по­чер­пи́­те блгⷣть не­ѡ­скꙋ́д­нꙋю ѿ і҆кѡ́­ны бг҃о­мт҃ре, ѻ҆гне́мъ бли­ста́­ю­щї­ѧ­сѧ, и҆ прї­и­ми́­те ю҆̀ съ вѣ́­рою и҆ лю­бо́­вїю: ꙗ҆́кѡ во стѣ́­нꙋ и҆ ѡ҆гра­жде́­нїе ѻ҆би́­те­лемъ ва́­шымъ пре­сла́в­нѡ да́­рꙋ­ет­сѧ, да по­кры́­етъ ва́съ ѿ всѣ́хъ вра̑гъ, ви́­ди­мыхъ и҆ не­ви́­ди­мыхъ.

Сла́­ва, и҆ ны́нѣ, гла́съ є҃:

Прї­и­ди́­те, лю́­дїе, чꙋ­до­тво́р­но­мꙋ и҆ все­чⷭ҇тно́­мꙋ по­кло­ни́м­сѧ бж҃їѧ мт҃ре ѡ҆́бра­зꙋ, є҆го́­же да­ро­ва̀ ѻ҆би́­те­ли і҆́вер­стѣй, ꙗ҆́кѡ стра́­жа не­ꙋ­сы́п­на и҆ не­ѡ­бо­ри́­ма: ѡ҆гра­жда́­етъ бо ст҃ꙋ́ю ѻ҆би́­тель и҆ всѧ̑ жи­вꙋ́­щыѧ на а҆ѳѡ́­нѣ сво­и́мъ по­кро́­вомъ, и҆ да́­рꙋ­етъ ѻ҆би̑ль­ныѧ да́ры и҆с­цѣ­ле́­нїй, ѿ не­и­сто­щи́­ма­гѡ и҆с­то́ч­ни­ка ст҃ы́ѧ і҆кѡ́­ны, всѣ̑мъ тꙋ́ю по­чи­та́­ю­щымъ. тѣ́м­же вос­пѣ­ва́­ю­ще воз­зо­ве́мъ пер­во­ѡ­бра́з­нѣй: ра́­дꙋй­сѧ, мӏ́­ро­ви по́­мо­ще, и҆ ᲂу҆­тѣ­ше́­нїе дꙋ́шъ на́­шихъ.

На стї­хо́в­нѣ стї­хи̑­ры, гла́съ в҃:

Вмѣ­сти́­ли­ще чⷭ҇тое свѣ́­та пре­чⷭ҇та­гѡ, бцⷣе, сла́­вимъ тѧ̀ и҆ по­е́мъ, рабѝ твоѝ, ꙗ҆́кѡ ꙗ҆в­ле́­нї­емъ пре­чⷭ҇тны́ѧ тво­еѧ̀ і҆кѡ́­ны на́съ ѡ҆сщ҃а́­е­ши.

Стӏ́хъ: Во­скре­снѝ, гдⷭ҇и, въ по­ко́й тво́й, ты̀ и҆ кї­вѡ́тъ ст҃ы́­ни тво­еѧ̀.

Сла́­ва тебѣ̀, хрⷭ҇тѐ цр҃ю̀, сла́­ва мно́­го­мꙋ ѡ҆ на́съ млⷭ҇рдїю: и҆́бо да­ро­ва́лъ є҆сѝ і҆кѡ́­нꙋ тво­еѧ̀ пре­чⷭ҇тыѧ мт҃ре, блгⷣти то́ки на́мъ не­ѡ­скꙋ́д­нѡ и҆з­ли­ва́­ю­щꙋю.

Стӏ́хъ: Клѧ́т­сѧ гдⷭ҇ь дв҃дꙋ и҆́сти­ною, и҆ не ѿве́р­жет­сѧ є҆ѧ̀.

Дне́сь, бл҃го­вѣ́р­нїи лю́­дїе, свѣ́т­лѡ пра́з­днꙋ­емъ, ѡ҆сѣ­нѧ́­е­ми і҆кѡ́­ны бг҃о­мт҃ре при­ше́­ствї­емъ, съ вѣ́­рою прї­е́м­лю­ще въ не́й стра́­жа на́мъ не­ѿ­стꙋ́п­на, и҆ во­зо­пї­и́мъ бцⷣѣ: по­кры́й на́съ ѿ всѧ́­ка­гѡ ѕла̀, и҆ сп҃сѝ дꙋ́шы на́шѧ.

Сла́­ва, и҆ ны́нѣ, гла́съ ѕ҃:

При­те­це́мъ къ ти́­хо­мꙋ при­ста́­ни­щꙋ, и҆ за­стꙋ́п­ни­цѣ ро́да на́­ше­гѡ, дв҃ѣ мр҃ӏ́и, по­кло­ни́м­сѧ чⷭ҇тно́­мꙋ є҆ѧ̀, а҆́гг҃лы по­чи­та́­е­мо­мꙋ, ѡ҆́бра­зꙋ, ᲂу҆­ми́ль­нѡ зо­вꙋ́­ще: при́­зри, бл҃го­се́р­даѧ мт҃и, на лю̑­тыѧ скѡ́р­би на́съ ѡ҆б­дер­жа́­щыѧ, и҆ и҆с­цѣ­лѝ бо­лѣ̑­зни дꙋ́шъ на́­шихъ.

Тро­па́рь, гла́съ а҃:

Де́р­зость не­на­ви́­дѧ­щихъ ѡ҆́бразъ гдⷭ҇ень и҆ дер­жа́­ва не­че­сти́­выхъ без­бо́ж­нѡ въ нї­ке́ю прї­и́­де, и҆ по́­слан­нїи без­че­ло­вѣ́ч­нѡ вдо­ви́­цꙋ, бл҃го­чⷭ҇тнѡ чтꙋ́­щꙋю і҆кѡ́­нꙋ бг҃о­мт҃ре, и҆стѧ­зꙋ́­ютъ. но та́ѧ но́­щїю съ сы́­номъ і҆кѡ́­нꙋ въ мо́ре пꙋ­стѝ, во­пї­ю́­щи: сла́­ва тебѣ̀, чⷭ҇таѧ, ꙗ҆́кѡ не­про­хо­ди́­мое мо́ре пле­щы̀ своѧ̑ по­да­дѐ: сла́­ва пра­воше́­ствїю тво­е­мꙋ̀, є҆ди́­на не­тлѣ́н­наѧ.

И҆́нъ тро­па́рь, гла́съ то́й­же:

Ѿ ст҃ы́ѧ і҆кѡ́­ны тво­еѧ̀, Ѽ влⷣчце бцⷣе, и҆с­цѣ­лє́­нїѧ и҆ цѣль­бы̑ по­да­ю́т­сѧ ѻ҆би́ль­нѡ, съ вѣ́­рою и҆ лю­бо́­вїю при­хо­дѧ́­щымъ къ не́й: та́кѡ и҆ мою̀ не́­мощь по­сѣ­тѝ, и҆ дꙋ́шꙋ мою̀ по­ми́­лꙋй, бл҃га́ѧ, и҆ тѣ́ло и҆с­цѣ­лѝ блгⷣтїю тво­е́ю, пре­чⷭ҇таѧ.

На вели́цѣй вече́рни.

На Гдⷭ҇и, воз­зва́хъ: стї­хи̑­ры на и҃, гла́съ є҃:

Кра­сꙋ́й­сѧ, а҆ѳѡ́­не: ра́­дꙋй­сѧ и҆ ве­се­ли́­сѧ, ѻ҆би́­тель і҆́вер­скаѧ: се́ бо грѧ­де́тъ чꙋ́д­наѧ і҆кѡ́­на бг҃о­мт҃ре, а҆́гг҃лы по мо́рю до­рѷ­но­си́­ма, свѣ́­томъ не­из­ре­че́н­нымъ сї­ѧ́­ю­щи, мра́къ скор­бе́й и҆ пе­ча́­лей про­го­нѧ́­ю­щи, и҆ всѣ́хъ лꙋ­ча́­ми сво­еѧ̀ млⷭ҇ти ѡ҆за­рѧ́­ю­щи.

Тебѣ̀ при­па́­да­ютъ, гпⷭ҇жѐ, и҆́но­кѡвъ ли́цы и҆ по́ст­ни­кѡвъ со­слѡ́­вїѧ, и҆ лю­бе́з­нѡ взи­ра́­ю­ще на ст҃ꙋ́ю і҆кѡ́­нꙋ твою̀, во­пї­ю́тъ тѝ: прї­и­дѝ къ на́мъ, бл҃га́ѧ мт҃и, ᲂу҆­ще́­дри чтꙋ́­щыѧ тѧ̀, и҆ да́­рꙋй на́мъ ст҃ы́й ѡ҆́бразъ тво́й, въ за­ло́гъ млⷭ҇ти и҆ сп҃се́­нїѧ.

Ѽ пре­сла́в­на­гѡ чꙋ­де­сѐ! ꙗ҆́ко­же бо мѡ­ѷ­се́ю въ сї­на́и кꙋ­пи­на̀ ꙗ҆ви́­сѧ и҆но­гда̀, ѻ҆гне́мъ ѹ҆́бѡ ѡ҆па­лѧ́­е­ма, и҆ не­вре­ди́­ма пре­бы́в­ши: си́це и҆ все­не­по­ро́ч­ныѧ бг҃о­ро­ди́­тель­ни­цы ѡ҆́бразъ ѻ҆гне́мъ ѡ҆дѣ­ва́­ет­сѧ, но не­ѡ­па­ли́мь пре­бы­ва́­етъ, про­свѣ­ща́ѧ и҆ на́съ, сꙋ́­щихъ во мра́­цѣ, и҆ не­вре­ди̑­мы въ пещѝ и҆с­кꙋ­ше́­нїй и҆ бѣ́дъ со­хра­нѧ́ѧ.

Грѧ­дѝ, га­врї­и́­ле, сни́­ди не­мо́­крен­ны­ми но­га́­ми въ мо́ре, и҆ прї­и­мѝ во ѡ҆б̾­ѧ̑­тїѧ і҆кѡ́­нꙋ бг҃о­мт҃ре, на ра́­дость а҆ѳѡ́­нꙋ, на ѡ҆гра­жде́­нїе ѻ҆би́­те­ли і҆́вер­скїѧ, и҆ всѣ̑мъ хрⷭ҇тї­а́­нѡмъ во ᲂу҆­тѣ­ше́­нїе.

Бцⷣе дв҃о, дер­жа́в­наѧ по­мо́щ­ни­це, ны́нѣ ѻ҆би́­тель і҆́вер­скаѧ ѡ҆ тебѣ̀ хва́­лит­сѧ и҆ ве­се­ли́т­сѧ, и҆мꙋ́­щи тѧ̀ за­стꙋ́п­ни­цꙋ не­по­сты́д­нꙋ и҆ стѣ́­нꙋ не­рꙋ­ши́­мꙋ, ѡ҆сно­ва́­нїе не­по­ко­ле­би́­мо, стра́­жа не­ꙋ­сы́п­на: не пре­ста́й, гпⷭ҇жѐ, тво­и́­ми мл҃тва­ми и҆ все­гда̀ и҆з­ба­влѧ́­ти ѻ҆би́­тель твою̀ и҆ всѧ̑ лю́ди ѿ всѣ́хъ на­па́­стей.

По­да́ждь ᲂу҆­тѣ­ше́­нїе ра­бѡ́мъ тво­и̑мъ, чⷭ҇таѧ, на­па́сть­ми ѡ҆дер­жи̑­мымъ, и҆ ро́гъ вѣ́р­ныхъ воз­не­сѝ, бг҃о­ро­ди́­тель­ни­це: сп҃сѝ мл҃тва­ми тво­и́­ми ѻ҆би́­тель сїю̀ и҆ гра́­ды пра­во­сла̑в­ныѧ, и҆ ᲂу҆­крѣ­пѝ на вра­гѝ всѧ̑ вѣ̑р­ныѧ рабы̑, хва́­лѧ­щыѧ тѧ̀, и҆ за­щи­тѝ.

Пре­чⷭ҇таѧ твоѧ̀ і҆кѡ́­на, бцⷣе дв҃о, вра­чев­ство̀ дх҃о́в­ное все­гѡ̀ мӏ́ра ꙗ҆ви́­сѧ: къ не́й­же при­бѣ­га́­емъ, тебѣ̀ по­кла­нѧ́­ю­ще­сѧ, по­чи­та́­емъ и҆ ло­бы­за́­емъ ю҆̀, и҆ и҆с­цѣ­ле́­нїй блгⷣть по­лꙋ­ча́­емъ, не­дꙋ́­гѡвъ дꙋ­ше́в­ныхъ и҆ тѣ­ле́с­ныхъ стра­сте́й тво­и́­ми мл҃тва­ми сво­бо­жда́­ю­ще­сѧ.

Ꙗ҆́кѡ пор­фѵ́­рою ца́р­скою и҆ вѵ́с­сомъ, і҆кѡ́­ною тво­е́ю и҆ тво­е­гѡ̀ сн҃а, бцⷣе, ѻ҆би́­тель і҆́вер­скаѧ ᲂу҆­кра­си́в­ши­сѧ, дне́сь сї­ѧ́­етъ чꙋ­де­сы̀, блгⷣтїю ст҃а́­гѡ дх҃а па́че свѣ́­та со́л­неч­на­гѡ бли­ста́­ю­щи­сѧ: въ то́й бо на бо­лѧ́­щихъ и҆ не­дꙋ́ж­ныхъ и҆с­цѣ­лє́­нїѧ и҆з­ли­ва́­ют­сѧ, и҆ всѣ̑мъ да́­рꙋ­ет­сѧ бо­га́­таѧ млⷭ҇ть.

Сла́­ва, и҆ ны́нѣ, гла́съ и҃:

Ѽ мт҃и бл҃га́ѧ, гпⷭ҇жѐ бцⷣе дв҃о! не ѿри́­ни на́съ, сми­ре́н­ныхъ ра̑бъ тво­и́хъ, предꙿ пре­чⷭ҇тою тво­е́ю і҆кѡ́­ною не­до­стѡ́й­ныѧ мо­ли̑­твы при­но­сѧ́­щихъ: бꙋ́ди те́­плаѧ хо­да́­та­и­ца ѡ҆ на́съ грѣ́ш­ныхъ къ сн҃ꙋ тво­е­мꙋ̀, и҆з­ба́­ви на́съ ѿ всѣ́хъ бѣ́дъ и҆ и҆с­кꙋ­ше́­нїй, да сп҃са́­е­ми то­бо́ю вы́нꙋ во­пї­е́мъ тѝ: ра́­дꙋй­сѧ, бл҃га́ѧ вра­та́р­ни­це, двє́­ри ра́й­скїѧ на́мъ ѿвер­за́­ю­щаѧ.

Вхо́дъ, про­кӏ́­менъ днѐ, и҆ чтє́­нїѧ г҃.

Бы­тїѧ̀ чте́­нїе:

Изы́­де і҆а́­кѡвъ ѿ стꙋ­ден­ца̀ клѧ́т­вен­на­гѡ, и҆ и҆́де въ хар­ра́нь. И҆ ѡ҆брѣ́­те мѣ́­сто, и҆ спа̀ та́мѡ: за́й­де бо со́лн­це. и҆ взѧ́тъ ѿ ка́­ме­нїѧ мѣ́­ста тогѡ̀, и҆ по­ло­жѝ воз­гла́­вїе себѣ̀, и҆ спа̀ на мѣ́­стѣ ѻ҆́номъ. И҆ со́нъ ви́дѣ: и҆ сѐ лѣ́­стви­ца ᲂу҆­твер­жде́­на на зе­млѝ, є҆ѧ́же гла­ва̀ до­сѧ­за́­ше до не­бе́съ, и҆ а҆́гг҃ли бж҃їи вос­хо­жда́­хꙋ и҆ низ­хо­жда́­хꙋ по не́й. Гдⷭ҇ь же ᲂу҆­твер­жда́­ше­сѧ на не́й, и҆ речѐ: а҆́зъ бг҃ъ а҆вра­а́­мовъ, ѻ҆тца̀ тво­е­гѡ̀, и҆ бг҃ъ і҆са­а́­ковъ, не бо́й­сѧ: зе­млѧ̀, и҆дѣ́­же ты̀ спи́­ши на не́й, тебѣ̀ да́мъ ю҆̀, и҆ сѣ́­ме­ни тво­е­мꙋ̀. И҆ бꙋ́­детъ сѣ́мѧ твоѐ ꙗ҆́кѡ пе­со́къ зем­ны́й, и҆ рас­про­стра­ни́т­сѧ на мо́ре, и҆ лі́вꙋ, и҆ сѣ́­веръ, и҆ на во­сто́­ки: и҆ воз­бл҃го­сло­вѧ́т­сѧ ѡ҆ тебѣ̀ всѧ̑ ко­лѣ̑­на зем­на̑ѧ, и҆ ѡ҆ сѣ́­ме­ни тво­е́мъ. И҆ сѐ а҆́зъ съ то­бо́ю, со­хра­нѧ́­ѧй тѧ̀ на всѧ́­комъ пꙋтѝ, а҆́мо­же а҆́ще по́й­деши, и҆ воз­вра­щꙋ́ тѧ въ зе́­млю сїю̀: ꙗ҆́кѡ не и҆́мамъ тебѐ ѡ҆ста́­ви­ти, до́н­де­же со­тво­ри́­ти мѝ всѧ̑, є҆ли̑­ка гла­го́­лахъ тебѣ̀. И҆ во­ста̀ і҆а́­кѡвъ ѿ сна̀ сво­е­гѡ̀, и҆ речѐ: ꙗ҆́кѡ є҆́сть гдⷭ҇ь на мѣ́­стѣ се́мъ, а҆́зъ же не вѣ́­дѣхъ. И҆ ᲂу҆­бо­ѧ́­сѧ, и҆ речѐ: ꙗ҆́кѡ стра́ш­но мѣ́­сто сїѐ: нѣ́сть сїѐ, но до́мъ бж҃їй, и҆ сїѧ̑ вра­та̀ нбⷭ҇наѧ.

И҆с­хо́­да чте́­нїе:

Мѡ­ѷ­се́й бѧ́ше па­сы́й ѻ҆́вцы і҆о­ѳо́­ра, те́­стѧ сво­е­гѡ̀, свѧ­ще́н­ни­ка ма­дї­а́м­ска: и҆ гна́­ше ѻ҆́вцы въ пꙋ­сты́­ню: и҆ прї­и́­де въ го́рꙋ бж҃їю хѡ­ри́въ. Ꙗ҆ви́­сѧ же є҆мꙋ̀ а҆́гг҃лъ гдⷭ҇ень въ пла́­ме­ни ѻ҆́гнен­нѣ и҆зꙿ кꙋ­пи­ны̀: и҆ ви́­дитъ, ꙗ҆́кѡ кꙋ­пи­на̀ го­ри́тъ ѻ҆гне́мъ, кꙋ­пи­на́ же не сга­ра́­ше. Рече́ же мѡ­ѷ­се́й: ми­мо­ше́дъ ᲂу҆­ви́­ждꙋ ви­дѣ́­нїе ве­ли́­кое сїѐ, ꙗ҆́кѡ не сга­ра́­етъ кꙋ­пи­на̀. Є҆гда́ же ви́дѣ гдⷭ҇ь, ꙗ҆́кѡ при­стꙋ́­па­етъ ви́­дѣ­ти, воз­зва̀ є҆го̀ гдⷭ҇ь и҆зꙿ кꙋ­пи­ны̀, гла­го́­лѧ: мѡ­ѷ­се́е, мѡ­ѷ­се́е. Ѻ҆́нъ же речѐ: что̀ є҆́сть, гдⷭ҇и; Ѻ҆́нъ же речѐ: не при­бли­жа́й­сѧ сѣ́мѡ: и҆зꙋ́й са­по­гѝ ѿ но́гъ тво­и́хъ: мѣ́­сто бо, на не́м­же ты̀ сто­и́­ши, зе­млѧ̀ свѧ­та̀ є҆́сть.

И҆с­хо́­да чте́­нїе:

Ꙍ҆б­ве­дѐ бг҃ъ лю́ди пꙋ­те́мъ, и҆́же въ пꙋ­сты́­ни, къ черм­но́­мꙋ мо́рю: пѧ́­та­гѡ же ро́да и҆зы­до́­ша сы́­но­ве і҆и҃лє­вы ѿ зе­млѝ є҆гѵ́­пет­скїѧ. И҆ взѧ̀ мѡ­ѷ­се́й кѡ́­сти і҆ѡ́­си­фѡ­вы съ со­бо́ю: клѧ́т­вою бо за­клѧ̀ і҆ѡ́­сифъ сы́ны і҆и҃лє­вы, гла­го́­лѧ: при­сѣ­ще́­нї­емъ при­сѣ­ти́тъ ва́съ гдⷭ҇ь, и҆ и҆з­не­се́­те ѿсю́­дꙋ кѡ́­сти моѧ̑ съ со­бо́ю. Воз­дви́г­ше­сѧ же сы́­но­ве і҆и҃лє­вы ѿ со­кх­ѡ́­ѳа, ѡ҆пол­чи́­ша­сѧ во ѻ҆ѳѡ́­мѣ при пꙋ­сты́­ни. Бг҃ъ же во­жда́­ше и҆̀хъ, въ де́нь ѹ҆́бѡ стол­по́мъ ѻ҆́блач­нымъ, по­ка­за́­ти и҆̀мъ пꙋ́ть: но́­щїю же стол­по́мъ ѻ҆́гнен­нымъ, свѣ­ти́­ти и҆̀мъ. И҆ не ѡ҆скꙋ­дѣ̀ сто́лпъ ѻ҆́блач­ный во днѝ, и҆ сто́лпъ ѻ҆́гнен­ный но́­щїю, предꙿ всѣ́­ми людь­мѝ.

На лї­тӏ́и стї­хи́­ра хра́­ма, и҆ бцⷣы, гла́съ и҃:

Прї­и­ди́­те, праз­дно­лю́б­цы и҆ по́ст­ни­кѡвъ со­сло́­вїе, вѣ́­рою со­ше́д­ше­сѧ, хва­лє́б­ныѧ пѣ̑­сни при­не­се́мъ мр҃ӏ́и при­сно­дв҃ѣ: дне́сь бо на­ста̀ свѣ́т­лое тор­же­ство̀, ꙗ҆в­ле́­нїе чⷭ҇тны́ѧ є҆ѧ̀ і҆кѡ́­ны і҆́вер­скїѧ, ю҆́же ѡ҆б­сто­ѧ́­ще со стра́­хомъ и҆ лю­бо́­вїю, вос­по­и́мъ бцⷣѣ: ра́­дꙋй­сѧ, не­и­с­по­вѣ­ди́­маѧ ра́­до­сте всѣ̑мъ: ра́­дꙋй­сѧ, ѡ҆́бра­зомъ тво­и́мъ ст҃ы́мъ на́съ про­свѣ­ща́­ю­щаѧ: ра́­дꙋй­сѧ, всѣ̑мъ по­хва­ло̀ и҆ ᲂу҆­твер­жде́­нїе: ра́­дꙋй­сѧ, сп҃се́­нїе дꙋ́шъ на́­шихъ.

Что́ тѧ на­ре­че́мъ, бцⷣе дв҃о; сто́лпъ ли ѻ҆́гнен­ный, къ вѣ́ч­но­мꙋ на­слѣ́­дїю на́съ ве­дꙋ́­щїй; стѣ́­нꙋ ли крѣ́п­кꙋю; ꙗ҆́кѡ пра­во­сла́в­ный ро́дъ за­щи­ща́­е­ши: стра́­жа ли не­ꙋ­сы́п­на; ꙗ҆́кѡ ѻ҆би́­тель твою̀ ѡ҆хра­нѧ́­е­ши и҆ сп҃са́­е­ши. тѣ́м­же, ѿ на­ле­жа́­щихъ бѣ́дъ и҆з­ба­влѧ́­е­ми, во­зо­пї­и́мъ влⷣчцѣ: ра́­дꙋй­сѧ, бл҃ги́хъ ви­но́в­наѧ, и҆з­вѣ́ст­ное хрⷭ҇тї­а́нъ ᲂу҆­по­ва́­нїе.

Сла́­ва, и҆ ны́нѣ, гла́съ є҃:

Ра́­дꙋ­ет­сѧ а҆ѳѡ́нъ, ли­ков­ствꙋ́­етъ ѻ҆би́­тель і҆́вер­скаѧ, тор­же­ствꙋ́­етъ и҆ всѧ̀ стра­на̀ рѡс­сӏ́й­скаѧ: бж҃їѧ бо мт҃и чꙋ­до­тво́р­нымъ сво­и́мъ ѡ҆́бра­зомъ млⷭ҇тив­нѡ на́съ по­сѣ­ти́­ла є҆́сть, да́­рꙋ­етъ же на́мъ въ нꙋ́­ждахъ по́­мощь, въ ско́р­бехъ ᲂу҆­тѣ­ше́­нїе, въ бо­лѣ́­знехъ и҆с­цѣ­ле́­нїе, въ бѣ­да́хъ и҆з­ба­вле́­нїе, и҆ всѣ̑мъ вѣ̑р­нымъ ве́­лїю млⷭ҇ть.

На стї­хо́в­нѣ стї­хи̑­ры, гла́съ д҃:

Сла́в­ное і҆кѡ́­ны тво­еѧ̀ ꙗ҆в­ле́­нїе, бцⷣе пре­не­по­ро́ч­наѧ, сла­во­сло́­вимъ дне́сь, и҆ твоѐ за­стꙋ­пле́­нїе на́мъ пра́з­днꙋ­емъ: ꙗ҆́кѡ бо мт҃и сꙋ́щи жи­во­та̀, мо́­ли­ши ѡ҆ на́съ хрⷭ҇та̀ бг҃а на́­ше­го, на тѧ̀ крѣ́п­кꙋю на­де́­ждꙋ воз­ло­жи́в­шихъ, пꙋ­те­во­ди́­тель­ни­це не­ло́ж­наѧ на́­ше­гѡ сп҃се́­нїѧ.

Стӏ́хъ: По­мѧ­нꙋ̀ и҆́мѧ твоѐ, во всѧ́­комъ ро́дѣ и҆ ро́дѣ.

Ѿло­жи́мъ, вѣ́р­нїи, пе­ча́ль: се́ бо вто­ра́ѧ не­ѡ­па­ли́­маѧ кꙋ­пи­на̀ і҆кѡ́­на бг҃о­мт҃ре, и҆́нѡ­ки а҆ѳѡ́н­ски­ми зри́­маѧ, на ѡ҆чи­ще́­нїе грѣ́ш­ныхъ ꙗ҆в­лѧ́­ет­сѧ.

Стӏ́хъ: Слы́­ши, дщѝ, и҆ ви́ждь, и҆ при­кло­нѝ ѹ҆́хо твоѐ.

На­зна́­ме­нꙋ­ю­щи во стра́н­ствїи жи­те́й­стѣмъ твоѐ на́мъ во­ди́­тель­ство, ꙗ҆в­лѧ́­е­ши­сѧ, бг҃о­мт҃и, въ стол­пѣ̀ ѻ҆́гнен­нѣ, да на́съ блꙋ­жда́­ю­щихъ пꙋ­те­во́­ди­ши къ вѣ̑ч­нымъ ѻ҆би́­те­лемъ.

Сла́­ва, и҆ ны́нѣ, гла́съ є҃:

Прї­и­ди́­те, всѝ мо­на́­си и҆ мїр­стӏ́и, про­сла́­вимъ пре­чⷭ҇тꙋю дв҃ꙋ бцⷣꙋ: дне́сь бо, ра́ди сщ҃е́н­ныѧ і҆кѡ́­ны, въ мо́ри пꙋ­тїѐ є҆ѧ̀, и҆ стє­зѝ є҆ѧ̀ въ во­да́хъ мно́­гихъ: ѿ нї­ке́и бо въ стол­пѣ̀ ѻ҆́гнен­нѣ по́нтъ мор­скӏ́й ко а҆ѳѡ́­нꙋ пре­хо́­дитъ, и҆ да́ръ при­ше́­ствї­емъ сво­и́мъ вѣ̑р­нымъ по­да­е́тъ. мы́ же, про­свѣ­ща́­е­ми лꙋ­ча́­ми блгⷣти, хо­да́­та­и­цꙋ сп҃се́­нїѧ на́­ше­гѡ ᲂу҆­бл҃жа́­емъ.

Тро­па́рь бцⷣы, пи́­санъ на ма́­лѣй ве­че́р­ни, три́­жды.

На ѹ҆́трени.

На Бг҃ъ гдⷭ҇ь: тро­па́рь бцⷣы, три́­жды.

По а҃-мъ стї­хо­сло́­вїи сѣ­да́­ленъ, гла́съ а҃:

Пре­свѣ́т­ла­гѡ зра́­ка тво­е­гѡ̀ ꙗ҆в­ле́­нїе ра́­дость при­но́­ситъ всѣ̑мъ вѣ́­рꙋ­ю­щымъ, и҆ ѻ҆би́­те­ли і҆́вер­стѣй да́­рꙋ­етъ стра́­жа не­ꙋ­сы́п­на и҆ ѿ бѣ́дъ и҆з­ба­вле́­нїе. тѣ́м­же по­е́мъ тѝ, пре­чⷭ҇таѧ: по­кры­ва́й на́съ при́­снѡ по­кро́­вомъ тво­и́мъ.

Сла́­ва, и҆ ны́нѣ, гла́съ и҃:

Се́й де́нь гдⷭ҇ень, ра́­дꙋй­те­сѧ, лю́­дїе: се́ бо свѣ­то­но́с­ный ѻ҆́блакъ на воз­дꙋ́­сѣ чꙋ́д­нѡ про­сти­ра́­ет­сѧ, и҆ стол­по́мъ ѻ҆́гнен­нымъ предꙿ а҆ѳѡ́­номъ ꙗ҆в­лѧ́­ет­сѧ, є҆ди́­на и҆ є҆ди́­на­го на рꙋ­ка́хъ мт҃рнихъ дер­жа́­щи хрⷭ҇та̀, зи­жди́­те­лѧ все­ле́н­ныѧ, во сп҃се́­нїе дꙋ́шъ на́­шихъ.

По в҃-мъ стї­хо­сло́­вїи сѣ­да́­ленъ, гла́съ г҃:

Ве­се­лѧ́т­сѧ дне́сь свѣ́т­лѡ а҆ѳѡ́­на па̑­ствы: пѣ́­сней мно́­же­ство сла­га́­ютъ, лю­бо́­вїю не­по­ро́ч­нꙋю по­чи­та́­ю­ще, ве­ли́­че­ствомъ блгⷣти кра­сѧ́­ще­сѧ, ю҆́же прї­ѧ́­ша при­ше́­ствї­емъ і҆кѡ́­ны все­не­по­ро́ч­ныѧ ѻ҆тро­ко­ви́­цы, за­рѧ́­ми бг҃о­вѣ́­дѣ­нїѧ бл҃го­чⷭ҇тнѡ по­ю́­щихъ ѡ҆за­рѧ́­ю­щїѧ.

Сла́­ва, и҆ ны́нѣ, гла́съ є҃:

Чꙋ́до пре­сла́в­ное зри́т­сѧ дне́сь: въ во­да́хъ бо ѻ҆гне­но́с­наѧ бг҃о­ѻ­тро­ко­ви́­цы і҆кѡ́­на по­ка­зꙋ́­ет­сѧ, и҆ зна́­ме­нїѧ лꙋчы̀ и҆с­пꙋ­ща́­етъ, и҆ пре­бы­ва́­нїе по́ст­ни­кѡвъ чꙋ́­домъ сп҃са́­етъ. сегѡ̀ ра́ди бл҃го­да́р­ствен­нѡ во­пї­е́мъ: ра́­дꙋй­сѧ, блгⷣт­наѧ.

По­лѷ­е­ле́й, и҆ ве­ли­ча́­нїе:

Ве­ли­ча́­емъ тѧ̀, пре­ст҃а́ѧ дв҃о, бг҃о­из­бра́н­наѧ ѻ҆тро­ко­ви́­це, и҆ чти́мъ ѡ҆́бразъ тво́й ст҃ы́й, и҆́мже то́­чи­ши и҆с­цѣ­лє́­нїѧ всѣ̑мъ съ вѣ́­рою при­те­ка́­ю­щымъ.

Ѱа­ло́мъ и҆з­бра́н­ный: По­мѧ­нѝ, гдⷭ҇и, дв҃да и҆ всю̀ кро́­тость є҆гѡ̀:

По по­лѷ­е­ле́и сѣ­да́­ленъ, гла́съ и҃:

Ве­ли́­чїе твоѐ кто̀ и҆с­по­вѣ́сть, бцⷣе; ꙗ҆в­ле́­нї­емъ бо тво­еѧ̀ і҆кѡ́­ны ᲂу҆­ди­ви́­ла є҆сѝ всѧ̑ пра­во­сла̑в­ныѧ, мнѡ́­гїѧ не­дꙋ́­ги вра­чꙋ́­ю­щи и҆ бо­лѣ̑­зни и҆с­цѣ­лѧ́­ю­щи. Ѽ все­млⷭ҇ти­ваѧ влⷣчце, не лишѝ на́съ и҆ ны́нѣ тво­е­гѡ̀ за­стꙋ­пле́­нїѧ, но мл҃тва­ми тво­и́­ми за­щи­тѝ и҆ сп҃сѝ пра­во­сла̑в­ныѧ хрⷭ҇тї­а́­ны, ѡ҆гра­дѝ ѧ҆̀ си́­лою тво­е́ю, да то­бо́ю хва́­лѧ­ще­сѧ и҆ всѐ ᲂу҆­по­ва́­нїе на тѧ̀ воз­ла­га́­ю­ще, не по­сты­ди́м­сѧ во вѣ́ки.

Сла́­ва, и҆ ны́нѣ, то́й­же.

Про­кӏ́­менъ, гла́съ д҃: По­мѧ­нꙋ̀ и҆́мѧ твоѐ, во всѧ́­комъ ро́дѣ и҆ ро́дѣ.

Стӏ́хъ: Ѿры́г­нꙋ срⷣце моѐ сло́­во бл҃го, гла­го́­лю а҆́зъ дѣла̀ моѧ̑ ца­ре́­ви.

Є҆ѵⷢ҇лїе ѿ лꙋкѝ, за­ча́­ло д҃: Во дни̑ ѻ҆́ны во­ста́в­ши ма­рї­а́мъ:

По н҃-мъ ѱал­мѣ̀: Мл҃тва­ми бцⷣы:

Та́же стї­хи́­ра, гла́съ ѕ҃:

Е҆гда̀ ꙗ҆в­ле́­нїе чꙋ́д­на­гѡ тво­е­гѡ̀ ѡ҆́бра­за при­спѣ̀, то­гда̀ а҆ѳѡ́н­стїи ѻ҆тцы̀, сто́лпъ ѻ҆́гнен­ный на мо́ри зрѧ́­ще, стра́­хомъ ѡ҆дер­жи́­ми, не­до­ꙋ­мѣ­ва́­хꙋ: га­врї­и́лъ же, ꙗ҆́кѡ вто­ры́й пе́тръ, по мо́рю ходѧ̀, со сле­за́­ми во­пї­ѧ́­ше тебѣ̀: Ѽ пре­ст҃а́ѧ, прї­и­дѝ и҆ со­хра­нѝ до­сто­ѧ́­нїе твоѐ ѿ вра̑гъ не­на­вѣ́т­но.

Ка­нѡ́нъ бцⷣѣ на и҃, і҆р­мо­сы̀ по два́­жды.

Гла́съ и҃. Пѣ́снь а҃.

І҆р­мо́съ: Ко­ле­сни­це­го­ни́­те­лѧ фа­ра­ѡ́­нѧ по­грꙋ­зѝ, чꙋ­до­тво­рѧ́й и҆но­гда̀ мѡ­ѷ­се́й­скїй же́злъ, крⷭ҇то­ѡ­бра́з­нѡ по­ра­зи́въ, и҆ раз­дѣ­ли́въ мо́ре: і҆и҃лѧ же бѣ­гле­ца̀, пѣ­ше­хо́д­ца сп҃сѐ, пѣ́снь бг҃о­ви вос­пѣ­ва́­ю­ща.

При­пѣ́въ: Пре­ст҃а́ѧ бцⷣе, сп҃сѝ на́съ.

Ѿ скве́р­ныхъ ᲂу҆­сте́нъ хва­ле́­нїе прї­и­мѝ, все­не­по­ро́ч­наѧ, ꙗ҆́ко­же пре́­жде сн҃ъ тво́й, бг҃ъ же мо́й и҆ гдⷭ҇ь, прї­ѧ́тъ двѣ̀ лє́­пты вдо­ви́­цы, и҆ раз­рѣ­ше́­нїе пре­грѣ­ше́­нїй мо­и́хъ по­да́ждь, ꙗ҆́кѡ да по до́л­гꙋ ве­ли­ча́ю тѧ̀.

А҆́гг҃ль­ское пѣ́­нїе по­до­ба́­ше тебѣ̀, мт҃ри бж҃ї­ей, твор­ца́ бо си́хъ ро­ди­ла̀ є҆сѝ стра́н­нѡ. но и҆ ѿ на́съ прї­и­мѝ, влⷣчце, сми­рє́н­ныѧ сїѧ̑ мо­ли̑­твы, да по­е́мъ гдⷭ҇е­ви: сла́в­нѡ про­сла́­ви­сѧ въ на́­шей не́­мо­щи.

Ѡ҆гꙋ­стѣ́­ша во́ды, ѡ҆гꙋ­стѣ́­ша и҆ во́л­ны по­сре­дѣ̀ мо́рѧ, но­сѧ́­щѧ твою̀, бг҃о­мт҃и, і҆кѡ́­нꙋ: ᲂу҆­твер­дѝ и҆ моѐ по­дви́г­ше­е­сѧ срⷣце на ка́­ме­ни за́­по­вѣ­дей хрⷭ҇то́­выхъ.

По­мо́щ­ни­ца и҆ по­кро­ви́­тель­ни­ца была̀ є҆сѝ, дв҃о, ѻ҆би́­те­ли і҆́вер­скїѧ, во́­євъ а҆ми́­ры съ ко­ра­бли̑ и҆́хъ въ мо́ри по­грꙋ­зи́в­ши: но по­то­пѝ въ пꙋ­чи́­нѣ млⷭ҇рдїѧ сн҃а тво­е­гѡ̀ всѧ̑ моѧ̑ дꙋ­шє́в­ныѧ стра̑­сти и҆ без­чи́­слєн­наѧ моѧ̑ пре­грѣ­шє́­нїѧ.

Пѣ́снь г҃.

І҆р­мо́съ: Оу҆­твер­жде́й въ на­ча́­лѣ нб҃са̀ ра́з­ꙋ­момъ, и҆ зе́­млю на во­да́хъ ѡ҆сно­ва́­вый, на ка́­ме­ни мѧ̀, хрⷭ҇тѐ, за́­по­вѣ­дей тво­и́хъ ᲂу҆­твер­дѝ, ꙗ҆́кѡ нѣ́сть ст҃ъ, па́че тебє̀, є҆ди́­не чл҃вѣ­ко­лю́б­че.

Оу҆­твер­дѝ срⷣце моѐ во ᲂу҆­по­ва́­нїи на тѧ̀, бг҃о­мт҃и, и҆змѝ всѧ́­кꙋю гор­ды́­ню и҆ пре­воз­но­ше́­нїе и҆зꙿ по­мра­че́н­на­гѡ ᲂу҆ма̀ мо­е­гѡ̀, да во­пїю̀: нѣ́сть ст҃ъ, ꙗ҆́кѡ гдⷭ҇ь, и҆ нѣ́сть првⷣнъ, ꙗ҆́кѡ бг҃ъ на́шъ.

Ты̀, Ѽ бг҃о­мт҃и, не­мощ­ствꙋ́­ю­щыѧ пре­по­ѧ­сꙋ́­е­ши си́­лою, а҆́л­чꙋ­щыѧ на­сы­ща́­е­ши: по­сѣ­тѝ и҆ мою̀ не́­мощь, и҆ а҆́л­чꙋ­ща­го и҆ жа́­ждꙋ­ща­го менѐ на­сы́­ти жи­во́т­на­гѡ хлѣ́­ба, чрезꙿ твою̀ дѣ́в­ствен­нꙋю ᲂу҆­тро́­бꙋ сше́д­ша­гѡ съ нб҃сѐ на зе́­млю.

Воз­ста́­ви, влⷣчце, ѿ зе­млѝ менѐ ᲂу҆­бо́­га­го, и҆ ѿ гно́и­ща грѣ­хо́в­на­гѡ воз­дви́г­ни ни́­ща­го: да́ждь мл҃твꙋ мнѣ̀ мо­лѧ́­ще­мꙋ­сѧ, да ве­ли­ча́ѧ пою̀ твоѐ за­стꙋ­пле́­нїе.

Не­пло́д­ствꙋ­ю­щїй мо́й ѹ҆́мъ пло­до­но́­сенъ по­ка­жѝ, бл҃га́ѧ дв҃о, ѿ не­пло́­до­ве ро́жд­ша­ѧ­сѧ: ты́ бо пло­до­но́­сїе всѣ́хъ бла̑гъ ꙗ҆в­ле́­нї­емъ і҆кѡ́­ны тво­еѧ̀ по­да­е́­ши.

Сѣ­да́­ленъ, гла́съ и҃:

Свѣ́т­лое дне́сь за­стꙋ́п­ни­цы на́­шеѧ на­ста̀ тор­же­ство̀: да взы­гра́­ет­сѧ тва́рь, да ли­ков­ствꙋ́­ютъ че­ло­вѣ́­че­стїи со­бо́­ри: со­зы­ва́­етъ бо на́съ ст҃а́ѧ бцⷣа ви́­дѣ­ти ѻ҆гне­но́с­нꙋю і҆кѡ́­нꙋ свою̀, лꙋ­ча́­ми млⷭ҇ти вѣ̑р­ныѧ про­свѣ­ща́­ю­щꙋю. тѣ́м­же ра́­дꙋ­ю­ще­сѧ во­пї­е́мъ: сп҃сѝ, гпⷭ҇жѐ, ѿ гла́­да, ѻ҆гнѧ̀, меча̀ и҆ бѣ́дъ всѧ̑ по­чи­та́­ю­щыѧ ꙗ҆в­ле́­нїе і҆кѡ́­ны тво­еѧ̀.

Сла́­ва, и҆ ны́нѣ, то́й­же.

Пѣ́снь д҃.

І҆р­мо́съ: Ты̀ моѧ̀ крѣ́­пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́­до­ва­нїе, не ѡ҆ста́вль нѣ́­дра ѻ҆́ч҃а и҆ на́шꙋ ни­ще­тꙋ̀ по­сѣ­ти́въ. тѣ́мъ съ прⷪ҇ро́­комъ а҆в­ва­кꙋ́­момъ зовꙋ́ ти: си́лѣ тво­е́й сла́­ва, чл҃вѣ­ко­лю́б­че.

По­кры̀ нб҃са̀ до­бро­дѣ́­тель твоѧ̀, бг҃о­мт҃и, и҆ хва­лы̀ тво­еѧ̀ и҆с­по́л­ни­сѧ зе­млѧ̀: но по­ло­жѝ лю­бо́вь дер­жа́в­нꙋю крѣ́­по­сти тво­еѧ̀ и҆ на мнѣ̀ ѿча́­ѧн­номъ.

Оу҆­го­тов­лѧ́­ю­щи ше́­ствїе чꙋ́д­нѣй і҆кѡ́­нѣ тво­е́й, дадѐ бе́з­дна гла́съ сво́й, воз­дви́­же­сѧ со́лн­це, и҆ сї­ѧ́­нїе є҆ѧ̀ ꙗ҆́кѡ свѣ́тъ бы́сть: но ты̀ и҆з­шла̀ є҆сѝ на сп҃се́­нїе лю­де́й, сп҃стѝ твоѐ на­слѣ́­дїе при­шла̀ є҆сѝ.

Оу҆­слы́­шав­ше слꙋ́хъ при­ше́­ствїѧ тво­е­гѡ̀, и҆́но­цы ᲂу҆­бо­ѧ́­ша­сѧ, ᲂу҆­ра­зꙋ­мѣ́в­ше же дѣла̀ твоѧ̑, ᲂу҆­жа­со́­ша­сѧ. но вне­гда̀ смꙋ­ти́­ти­сѧ дꙋшѝ мое́й, млⷭ҇ть твою̀ по­мѧ­нѝ, влⷣчце, да взы­ва́ю: сла́­ва за­стꙋ­пле́­нїю тво­е­мꙋ̀, бг҃о­мт҃и.

Ты̀ є҆сѝ моѧ̀ крѣ́­пость и҆ си́ла, бцⷣе, то­бо́ю по­чӏ́ю въ де́нь ско́р­би моеѧ̀, и҆ и҆зꙿ стра­ны̀ при­ше́ль­ствїѧ взы́­дꙋ то­бо́ю въ нбⷭ҇ное на­слѣ́­дїе, и҆ воз­ра́­дꙋ­ю­сѧ ѡ҆ гдⷭ҇ѣ и҆ бз҃ѣ сп҃сѣ мо­е́мъ.

Пѣ́снь є҃.

І҆р­мо́съ: Вскꙋ́ю мѧ̀ ѿри́­нꙋлъ є҆сѝ ѿ лица̀ тво­е­гѡ̀, свѣ́­те не­за­хо­ди́­мый, и҆ по­кры́­ла мѧ̀ є҆́сть чꙋ­жда́ѧ тьма̀ ѡ҆ка­ѧ́н­на­го; но ѡ҆б­ра­ти́ мѧ, и҆ къ свѣ́­тꙋ за́­по­вѣ­дей тво­и́хъ пꙋти̑ моѧ̑ на­пра́­ви, мо­лю́­сѧ.

Ви́ждь, чⷭ҇таѧ, ѿ но́щи ѹ҆́тре­ню­ю­щыѧ лю́ди па́­ствы тво­еѧ̀, і҆кѡ́­нꙋ твою̀ бг҃о­хва́ль­нꙋю ѡ҆б­сто­ѧ́­щыѧ, раз­рѣ­ше́­нїѧ же грѣ­хѡ́въ про­сѧ́­щыѧ, и҆ жи­тїѧ̀ и҆с­прав­ле́­нїѧ, и҆ бжⷭ҇твен­ныѧ сла́­вы при­ча́­стїѧ: не ѿри́­ни ᲂу҆̀бо на́съ ѿ лица̀ тво­е­гѡ̀, свѣ́­та не­за­хо­ди́­ма­гѡ мт҃и.

Все́ю дꙋ­ше́ю и҆ мы́­слїю въ па́­ствѣ тво­е́й всѝ сли­кꙋ́­ю­ще, ѱал­мы̑ и҆ пѣ́снь­ми дх҃о́в­ны­ми и҆ пѣ́­нї­емъ бжⷭ҇твен­нымъ і҆кѡ́­нꙋ твою̀ по­чи­та́­ютъ, про­ще́­нїѧ грѣ­хѡ́въ про­сѧ́­ще и҆ дꙋ́шъ сп҃се́­нїѧ. ты́ же, и҆с­цѣ­ле́­нїе на́ше сꙋ́щи, сїѧ̑ всѧ̑ по­да́ждь, влⷣчце бг҃о­не­вѣ́­сто.

Хра́мъ тво́й, дв҃о, ꙗ҆́кѡ ра́й дрꙋ­гӏ́й по­ка­за́­сѧ ны́нѣ, ꙗ҆́кѡ дре́­во жи́­зни и҆мѣ́ѧ і҆кѡ́­нꙋ кра­со­ты̀ тво­еѧ̀, ю҆́же всѝ ᲂу҆­се́рд­нѡ съ бл҃го­го­вѣ́­нї­емъ и҆ лю­бо́­вїю цѣ­лꙋ́­ю­ще, взы­ва́­емъ: влⷣчце, ми́ръ да́ждь на́мъ, влⷣчце, стѧ­жѝ на́съ, и҆но́­гѡ бо ра́з­вѣ тебє̀ ᲂу҆­тѣ­ше́­нїѧ не вѣ́мы.

Рѣкꙋ̀ тѧ̀ сла́д­кꙋю и҆ по­то́къ на­сы­ще́­нїѧ, ма́н­нꙋ нбⷭ҇нꙋю, и҆зꙿѻ­би́­лїе и҆ блгⷣть при­сно­те­кꙋ́­щꙋю во ѻ҆би́­те­ли тво­е́й жи­вꙋ́­щїи стѧ­жа́в­ше, по­ю́тъ ржⷭ҇тво̀ твоѐ, ѻ҆тро­ко­ви́­це.

Пѣ́снь ѕ҃.

І҆р­мо́съ: Ѡ҆чⷭ҇ти мѧ̀, сп҃се, мнѡ́­га бо без­за­кѡ́­нїѧ моѧ̑, и҆ и҆зꙿ глꙋ­би­ны̀ ѕѡ́лъ воз­ве­дѝ, мо­лю́­сѧ: къ тебѣ́ бо во­зо­пи́хъ, и҆ ᲂу҆­слы́­ши мѧ̀, бж҃е сп҃се́­нїѧ мо­е­гѡ̀.

Въ ско́р­би срⷣца во­пїю́ ти, влⷣчце, жи­те́й­ска­гѡ мо́рѧ по­топ­лѧ́­емь бꙋ́­рею, къ тебѣ̀ ꙗ҆́кѡ ти́­хо­мꙋ при­ста́­ни­щꙋ при­бѣ­га́ю: воз­ве­дѝ ѿ тлѝ жи­во́тъ мо́й.

Бе́з­дна по­слѣ́д­нѧѧ грѣ­хѡ́въ ѡ҆бы́­де мѧ̀, и҆ и҆с­че­за́­етъ дꙋ́хъ мо́й: но про­стрѝ, влⷣчце, вы­со́­кꙋю твою̀ мы́ш­цꙋ, и҆ ꙗ҆́кѡ га­врї­и́­ла, и҆ менѐ, ко тво­е́й і҆кѡ́­нѣ при­бѣ­га́­ю­ща, не­вре­ди́­ма со­тво­рѝ.

Не ѿри́­ни менє̀ до кон­ца̀ ѿ лица̀ тво­е­гѡ̀, мт҃и не­за­хо­ди́­ма­гѡ свѣ́­та, не по­пꙋ­стѝ мнѣ̀ по­грѧ́з­нꙋ­ти въ пꙋ­чи́­нѣ без­за­ко́­нїй: но воз­ве­дѝ менѐ ѿ бла́­та стра­сте́й, да взы́­детъ и҆зꙿ и҆с­тлѣ́­нїѧ жи­во́тъ мо́й, и҆ по­жрꙋ̀ тебѣ̀ со гла́­сомъ хва­ле́­нїѧ и҆ и҆с­по­вѣ́­да­нїѧ.

Хра́мъ но­сѧ́й тѣ­ле́с­ный ве́сь ѡ҆сквер­не́нъ, тебѣ̀, пре­чⷭ҇то­мꙋ хра́­мꙋ вѣ́ч­на­гѡ сло́­ва, дер­за́ю въ чⷭ҇тнѣ́мъ хра́­мѣ тво­е́мъ, предꙿ тво­е́ю ст҃о́ю і҆кѡ́­ною, при­но­си́­ти сми­рє́н­ныѧ моѧ̑ мо­ли̑­твы. ты́ же, ꙗ҆́кѡ млⷭ҇ти­ваѧ, ѡ҆чⷭ҇ти мѧ̀ тво­и́мъ бл҃го­ꙋ­тро́­бї­емъ.

Кон­да́къ, гла́съ и҃:

А҆ще и҆ въ мо́ре вве́р­же­на бы́сть ст҃а́ѧ і҆кѡ́­на твоѧ̀, бцⷣе, ѿ вдо­ви́­цы, не мо­гꙋ́­щїѧ сп҃стѝ сїю̀ ѿ вра­гѡ́въ: но ꙗ҆ви́­ла­сѧ є҆́сть хра­ни́­тель­ни­ца а҆ѳѡ́­на и҆ вра­та́р­ни­ца ѻ҆би́­те­ли і҆́вер­скїѧ, вра­гѝ ᲂу҆­стра­ша́­ю­щаѧ, и҆ въ пра­во­сла́в­нѣй рѡс­сӏ́й­стѣй стра­нѣ̀ чтꙋ́­щыѧ тѧ̀ ѿ всѣ́хъ бѣ́дъ и҆ на­па́­стей и҆з­ба­влѧ́­ю­щаѧ.

І҆́косъ: Въ стол­пѣ̀ ѻ҆́гнен­нѣ ꙗ҆́вль­шꙋ­ю­сѧ бг҃о­мт҃ре і҆кѡ́­нꙋ ви́­дѣв­ше, во­зо­пи́­ша по́ст­ни­кѡвъ і҆́вер­скихъ ли́цы: Ѽ влⷣко, спо­до́­би на́съ прї­ѧ́­ти і҆кѡ́­нꙋ мт҃ре тво­еѧ̀, во ᲂу҆­тѣ­ше́­нїе стра́н­ствїѧ на́­ше­гѡ: ты́ же, га­врї­и́­ле, дер­за́й и҆ вни́­ди въ мо́ре, и҆ прї­и­мѝ во ѡ҆б̾­ѧ̑­тїѧ твоѧ̑ со­кро́­ви­ще, на́мъ ꙗ҆в­лѧ́­е­мое, да бꙋ́­детъ на́мъ стра́жъ не­ꙋ­сы́п­ный, по­кро́въ же и҆ ра́­дость всѣ̑мъ хрⷭ҇тї­а́­нѡмъ, и҆ хра­ни́­тель­ни­ца, ѿ бѣ́дъ и҆ на­па́­стей и҆з­ба­влѧ́­ю­щаѧ.

Пѣ́снь з҃.

І҆р­мо́съ: Бж҃їѧ сниз­хо­жде́­нїѧ ѻ҆́гнь ᲂу҆­сты­дѣ́­сѧ въ ва­вѷ­лѡ́­нѣ и҆но­гда̀: сегѡ̀ ра́ди ѻ҆́тро­цы въ пещѝ, ра́­до­ван­ною но­го́ю ꙗ҆́кѡ во цвѣ́т­ни­цѣ, ли­кꙋ́­ю­ще, по­ѧ́­хꙋ: бл҃го­сло­ве́нъ є҆сѝ, бж҃е ѻ҆тє́цъ на́­шихъ.

Со­грѣ­ши́­хомъ, без­за­ко́н­но­ва­хомъ, не­пра́­вдо­ва­хомъ предꙿ гдⷭ҇емъ: но, влⷣчце моѧ̀ бцⷣе, ꙗ҆́кѡ бл҃га́ѧ, ᲂу҆­га­сѝ ѻ҆́гнь є҆гѡ̀ првⷣна­гѡ гнѣ́­ва тво­и́мъ те́­плымъ хо­да́­тай­ствомъ, да по­е́мъ є҆мꙋ̀: ѻ҆тє́цъ на́­шихъ бж҃е, бл҃го­сло­ве́нъ є҆сѝ.

Въ пещѝ и҆с­кꙋ­ше́­нїй и҆ бѣ́дъ ѡ҆па­лѧ́­є­мыѧ ѡ҆ро­сѝ, бг҃о­мт҃и, стрꙋ­ѧ́­ми тво­и́хъ ще­дро́тъ, да по­сра­мѧ́т­сѧ вра­зѝ на́ши, и҆ да раз­ꙋ­мѣ́­ютъ всѝ, ꙗ҆́кѡ ты̀ є҆ди́­на є҆сѝ влⷣчца бцⷣа, по все́й все­ле́н­нѣй сла́­ви­маѧ.

Прⷭ҇то́­ле цр҃ѧ̀ сла́­вы, чⷭ҇тнѣ́й­шаѧ хе­рꙋ­ві̑мъ, ѡ҆дꙋ­шев­ле́н­ный хра́­ме, въ не́м­же все­ли́­сѧ гдⷭ҇ь, тве́рдь нбⷭ҇наѧ, на не́й­же воз­сїѧ̀ сл҃нце пра́­вды хрⷭ҇то́съ, тѧ̀ по­е́мъ, бг҃о­мт҃и, и҆ пре­воз­но́­симъ во всѧ̑ вѣ́ки.

Ты̀ є҆сѝ ве­се́­лїе и҆ въ пꙋ­сты́­нехъ жи­вꙋ́­щымъ, ты̀ є҆сѝ и҆ ца́р­ствꙋ­ю­ща­гѡ гра́­да ᲂу҆­тѣ­ше́­нїе и҆ по­хва­ла̀, дв҃о мр҃ӏ́е, пре­пѣ́­таѧ и҆ пре­воз­но­си́­маѧ во вѣ́ки.

Пѣ́снь и҃.

І҆р­мо́съ: Се­дме­ри́­цею пе́щь хал­де́й­скїй мꙋ­чи́­тель бг҃о­че­сти̑­вымъ не­и́­стов­нѡ раз­жжѐ, си́­лою же лꙋ́ч­шею сп҃сє́­ны сїѧ̑ ви́­дѣвъ, твор­цꙋ̀ и҆ и҆з­ба́­ви­те­лю во­пї­ѧ́­ше: ѻ҆́тро­цы, бл҃го­сло­ви́­те, сщ҃е́н­ни­цы, вос­по́й­те, лю́­дїе, пре­воз­но­си́­те во всѧ̑ вѣ́ки.

По­ю́тъ тѧ̀ а҆́гг҃ль­скїѧ си̑лы, пре­воз­но́­ситъ че­ло­вѣ́­че­скїй ро́дъ, бл҃го­сло­ви́тъ тѧ̀ всѧ̀ тва́рь, пре­чⷭ҇таѧ дв҃о бцⷣе: прї­и­мѝ и҆ ѿ менє̀ не­до­сто́й­на­гѡ при­но­си́­мое тебѣ̀ хва­ле́­нїе.

По́й­те, и҆́но­цы а҆ѳѡ́­на, бл҃го­слов­лѧ́й, зе­млѐ і҆́вер­скаѧ, пре­воз­но­сѝ, всѧ̀ стра­но̀ рѡс­сӏ́й­скаѧ, бл҃гꙋ́ю влⷣчцꙋ, рѣ́ки чꙋ­де́съ ѿ сво­еѧ̀ чꙋ­до­тво́р­ныѧ і҆кѡ́­ны и҆с­то­ча́­ю­щꙋю. хва́­лимъ, бл҃го­сло­ви́мъ, по­кла­нѧ́­ем­сѧ тѝ, бцⷣе, по­ю́­ще и҆ пре­воз­но­сѧ́­ще во всѧ̑ вѣ́ки.

По­до́­бї­емъ і҆кѡ́­ны і҆́вер­скїѧ не то́­чїю ст҃ы́й а҆ѳѡ́нъ про­свѣ­ща́­ет­сѧ, но и҆ ца́р­ствꙋ­ѧй гра́дъ мо­сква̀ ᲂу҆­кра­ша́­ет­сѧ, ѿ тогѡ̀ чꙋ­де́с­нꙋю по́­мощь прї­е́м­лѧ, и҆ и҆с­то́ч­никъ ᲂу҆­тѣ­ше́­нїѧ въ не́мъ ѡ҆брѣ­та́ѧ.

Є҆щѐ и҆ стра­на̀ нов­го­ро́д­скаѧ, и҆ и҆нӏ́и гра́­ди и҆ вє́си, по­до́­бї­емъ і҆́вер­скїѧ і҆кѡ́­ны тво­еѧ̀, влⷣчце, ѡ҆ст҃и́­ша­сѧ, и҆ чꙋ­де­сы̀ про­свѣ­ти́­ша­сѧ, во­пї­ю́­ще: гдⷭ҇а по́й­те и҆ пре­воз­но­си́­те во всѧ̑ вѣ́ки.

Пѣ́снь ѳ҃.

І҆р­мо́съ: Оу҆­жа­се́­сѧ ѡ҆ се́мъ нб҃о, и҆ зе­млѝ ᲂу҆­ди­ви́­ша­сѧ кон­цы̀, ꙗ҆́кѡ бг҃ъ ꙗ҆ви́­сѧ че­ло­вѣ́­кѡмъ пло́т­ски, и҆ чре́­во твоѐ бы́сть про­стра́н­нѣй­шее нб҃съ: тѣ́мъ тѧ̀ бцⷣꙋ а҆́гг҃лѡвъ и҆ че­ло­вѣ̑къ чи­но­на­ча̑­лїѧ ве­ли­ча́­ютъ.

Та́й­на глꙋ­би­ны̀ ржⷭ҇тва̀ тво­е­гѡ̀ ѹ҆́мъ а҆́гг҃ль­скїй ᲂу҆­жа­са́­етъ, дв҃о, и҆ пре­чⷭ҇таѧ і҆кѡ́­на твоѧ̀ де́­мѡ­ны про­го­нѧ́­етъ: не тер­пѧ́­ще бо взи­ра́­ти на си́лꙋ є҆ѧ̀, бѣ́­га­ютъ и҆ и҆с­че­за́­ютъ. мы́ же то́й лю­бе́з­нѡ по­кла­нѧ́­ем­сѧ и҆ ѡ҆б­ло­бы­за́­емъ, и҆ тѧ̀ бцⷣꙋ ве­ли­ча́­емъ.

Прї­и­ди́­те всѝ, по­кло­ни́м­сѧ, при­па­де́мъ и҆ воз­ве­ли́­чимъ бж҃їю мт҃рь, при­зрѣ́в­шꙋю на на́съ сми­ре́н­ныхъ, а҆́л­чꙋ­щыѧ и҆с­пол­нѧ́­ю­щꙋю бла̑гъ, и҆ по­ло­жи́в­шꙋю съ на́ми за­вѣ́тъ млⷭ҇ти во ꙗ҆в­ле́­нїи сво­еѧ̀ ди́в­ныѧ і҆кѡ́­ны.

Бцⷣе дв҃о, ᲂу҆­по­ва́­нїе хрⷭ҇тї­а́­нѡмъ, про­ба́­ви и҆ на́­ше­мꙋ ро́дꙋ млⷭ҇ти твоѧ̑, бы́в­шыѧ ѻ҆тцє́мъ на́­шымъ, по­кры́й и҆ со­блю́­ди на́съ ѿ всѧ́­ка­гѡ ѕла̀.

Ѽ все­млⷭ҇ти­ваѧ хрⷭ҇тї­а́­нѡмъ по­мо́щ­ни­це, не мо́­жетъ тѧ̀ вос­пѣ́­ти до­сто́й­нѡ ѧ҆зы́къ че­ло­вѣ́­че­скїй и҆ а҆́гг҃ль­скїй, ꙗ҆́кѡ всеѧ̀ тва́­ри чⷭ҇тнѣ́й­шꙋю и҆ зем­ны́хъ сла́в­нѣй­шꙋю: но прї­и­мѝ млⷭ҇тив­нѡ сїѐ при­но­си́­мое тебѣ̀ ѿ на́съ мо­ле́­нїе, и҆ сп҃са́й на́съ все­гда̀, на тѧ́ бо ᲂу҆­по­ва́­нїе воз­ло­жи́­хомъ.

Свѣ­ти́­ленъ:

І҆кѡ́­нꙋ твою̀ все­чⷭ҇тнꙋ́ю прї­и́мъ га­врї­и́лъ во ѡ҆б̾­ѧ̑­тїѧ, во­пї­ѧ́­ше тебѣ̀ влⷣчцѣ: Ѽ сла́д­каѧ мт҃и цр҃ѧ̀ хрⷭ҇та̀, бꙋ́ди по­кро́въ тво­е́й ѻ҆би́­те­ли, ра́­дость же всѣ̑мъ хрⷭ҇тї­а́­нѡмъ, и҆ спо­рꙋ́ч­ни­ца жи́­зни вѣ́ч­ныѧ. Три́­жды.

На хва­ли́­техъ стї­хи̑­ры на д҃, гла́съ д҃:

Ѽ не­ска­за́н­ныѧ бл҃го­сти! Ѽ сла́в­на­гѡ ꙗ҆в­ле́­нїѧ і҆кѡ́­ны бг҃о­мт҃ре, ꙗ҆́же сї­ѧ́­етъ чꙋ­де­сы̀ и҆ про­свѣ­ща́­етъ блгⷣтїю вѣ́р­нѡ при­хо­дѧ́­щыѧ! ю҆́же съ ве­се́­лї­емъ прї­е́м­лю­ще, чⷭ҇тꙋю бг҃о­ѻ­тро­ко­ви́­цꙋ до­сто­до́лж­нѡ пѣ́снь­ми по­чи­та́­емъ и҆ ᲂу҆­бла­жа́­емъ. Два́­жды.

Ѽ пре­сла́в­на­гѡ тво­е­гѡ̀ ѡ҆ на́съ, влⷣчце, про­мыш­ле́­нїѧ! чꙋ́д­нꙋю бо твою̀ і҆кѡ́­нꙋ а҆ѳѡ́­нꙋ по­сы­ла́­е­ши, и҆ ꙗ҆́кѡ стра́­жа на́мъ не­ꙋ­сы́п­на тꙋ́ю по­да­е́­ши млⷭ҇тив­нѡ, и҆ ᲂу҆­тѣ­ше́­нїе стра́н­ствїю на́­ше­мꙋ. тѣ́м­же по­зна́в­ше твоѧ̑ чⷭ҇тна̑ѧ чꙋ­де­са̀, пѣ́снь­ми тѧ̀ ве­ли­ча́­емъ.

Ѽ пре­сла́в­на­гѡ чꙋ­де­сѐ! ка́кѡ ѻ҆гне­но́с­наѧ і҆кѡ́­на на вол­на́хъ мор­ски́хъ, ꙗ҆́кѡ на ко­ле­сни́­цѣ, но́­сит­сѧ, свѣ́т­лы­ми лꙋ­ча́­ми блгⷣти ᲂу҆мы̀ про­свѣ­ща́­ю­щи; є҆ѧ́же тор­же­ство̀ пѣ́снь­ми по­чи­та́­ю­ще ра́­дост­нѡ, сла́­вꙋ воз­сы­ла́­емъ бг҃о­ро­ди́­тель­ни­цѣ.

Сла́­ва, и҆ ны́нѣ, гла́съ то́й­же:

Тво́й гла­го́лъ и҆с­пол­нѧ́ѧ, бг҃о­мт҃и, прпⷣбный га­врї­и́лъ не­мо́­крен­нѡ по водѣ̀ мор­стѣ́й пѣ­ше­ше́­ство­ва, и҆ вос­прї­и́мъ сщ҃е́н­нꙋю і҆кѡ́­нꙋ твою̀, ли́къ пѣ́­снен­ный со­ста́­ви, и҆ тор­же­ство̀ съ пѡ́ст­ни­ки а҆ѳѡ́н­ски­ми со­во­кꙋ­пѝ. тѣ́м­же и҆ мы̀ ᲂу҆­див­лѧ́­ю­ще­сѧ во­пї­е́мъ пер­во­ви­но́в­но­мꙋ: сла́­ва тебѣ̀, со­тво́р­ше­мꙋ ди̑в­наѧ, є҆ди́­но­мꙋ цр҃ю̀ и҆ бг҃ꙋ, млⷭ҇твъ ра́ди бцⷣы! со­хра­нѝ пра­во­сла̑в­ныѧ хрⷭ҇тї­а́­ны, и҆ по­бѣ̑­ды и҆̀мъ на вра­гѝ да́­рꙋй, ꙗ҆́кѡ все­си́­ленъ.

Сла­во­сло́­вїе ве­ли́­кое. Є҆ктє­нїѝ, и҆ ѿпꙋ́стъ.

На лї­тꙋр­гӏ́и слꙋ́ж­ба всѧ̀ бцⷣы.

Вѣ́­до­мо бꙋ́ди, ꙗ҆́кѡ пра́з­дно­ва­нїе пре­ст҃ѣ́й бцⷣѣ, ст҃ы́ѧ ра́ди є҆ѧ̀ і҆кѡ́­ны і҆́вер­скїѧ, тво­ри́т­сѧ ѻ҆ктѡ́­врїа въ г҃і-й де́нь, и҆ феѵ­рꙋ­а́­рїа въ в҃і-й де́нь, во гра́­дѣ же мо­сквѣ̀ є҆щѐ и҆ во вто́р­никъ свѣ́т­лыѧ се­дми́­цы по ᲂу҆­ста́­вꙋ ст҃а́­гѡ бл҃го­вѣ́­ще­нїѧ.