Мѣ́­сѧ­ца ѻ҆ктѡ́­врїа въ з҃-й де́нь.

Слꙋ́жба и҆́же во ст҃ы́хъ ѻ҆тцꙋ̀ на́шемꙋ і҆ѡ́нѣ, є҆пӏ́скопꙋ ханько́ꙋскомꙋ.

На вели́цѣй вече́рни.

Бл҃же́нъ мꙋ́жъ: а҃-й а҆н­тї­фѡ́нъ.

На Гдⷭ҇и, воз­зва́хъ: стї­хи̑­ры на ѕ҃, гла́съ ѕ҃.

По­до́­бенъ: Всѐ ѿло́ж­ше:

По­хва­ло̀ козе́ль­ска и҆ ка­лꙋ́­ги сла́­во,* ка­за́н­ска­гѡ вер­то­гра́­да бг҃о­сло́­вїѧ ᲂу҆­кра­ше́­нїе* и҆ мань­чжꙋ́­рїи па́­сты­рю пре­до́­брый,* всѧ̑ кон­цы̀ ѻ҆те́­че­ствїѧ и҆ раз­сѣ́­ѧ­нїѧ рꙋ́с­ска­гѡ* ве­се́­лїѧ бжⷭ҇твен­на­гѡ и҆с­по­лѧ́­е­ши,* жи­тї­е́мъ бо и҆ пи­са̑­нїи тво­и́­ми ᲂу҆­тѣ­ша́­е­ши* и҆ сп҃се́­нїѧ на­де́­ждꙋ по­да­е́­ши,* и҆з­не­мо́г­шихъ ѿ ꙗ҆́звъ грѣ­хо́в­ныхъ блгⷣти при­ча­ща́­е­ши* те́­плымъ пред­ста́­тель­ствомъ тво­и́мъ,* бг҃о­мꙋ́­дре і҆ѡ́но, ст҃и́­те­лю хрⷭ҇то́въ.

По­хва́ль­нꙋю пѣ́снь во­пї­е́мъ тѝ,* и҆́же ѡ҆ дс҃ѣ бжⷭ҇твен­нѣмъ сла́в­ный ᲂу҆­чи́­те­лю,* пи­са́­нїй бжⷭ҇твен­ныхъ ска­за́­те­лю пре­ди́в­ный* и҆ сꙋ­е­мꙋ́­дрен­ныхъ ѡ҆б­ли­чи́­те­лю до­бро­ꙋ́м­ный,* а҆́ще и҆ сло­ве­сы̀ тво­и́­ми на­сла­ди́­хом­сѧ,* ѻ҆ба́­че въ не­бре­же́­нїи до­се́­лѣ пре­бы­ва́­емъ,* но мо­ли́­сѧ ѡ҆ на́съ, бг҃о­гла́с­не і҆ѡ́но,* да и҆ жи­тї­е́мъ по­слѣ́­дꙋ­емъ бл҃ги̑мъ ᲂу҆­че́­нї­ємъ,* и҆́ми­же ѿ тебє̀ на­ста́в­ле­ни бы́­хомъ.

Ст҃о́е вос­прї­и́мъ по­стри­же́­нїе, бг҃о­но́­се і҆ѡ́но,* въ ѻ҆́пти­нꙋ пꙋ́­стынь все­ли́л­сѧ є҆сѝ,* и҆ та́мѡ въ срⷣцѣ сво­е́мъ* сла­га́ѧ пре­мꙋ́­дрыхъ ста́р­цєвъ гла­го́­лы,* хрⷭ҇то́­вымъ ра́з­ꙋ­момъ ѡ҆бо­га­ти́л­сѧ є҆сѝ.* тѣ́м­же всѝ пѣ́снь­ми вос­хва­лѧ́­емъ* свѣ̑т­лыѧ трꙋ­ды̀ твоѧ̑,* и҆́ми­же па́­ствꙋ твою̀ на­ста́­вилъ є҆сѝ,* нра́­вомъ ѻ҆тцє́мъ ѻ҆́птин­скимъ по­до́б­ни­че.

Воз­ве­се­ли́­сѧ и҆ воз­ра́­до­ва­сѧ рꙋ́сь,* во и҆з­гна́­нїи сꙋ́­щаѧ,* въ не́й бо мно­го­свѣ́т­лꙋю свѣ­щꙋ̀ воз­жжѐ хрⷭ҇то́съ,* бг҃о­мꙋ́­дра­го і҆ѡ́нꙋ ст҃и́­те­лѧ,* во стра­нѣ̀ мань­чжꙋ́р­стѣй* и҆но­вѣ́р­ныхъ и҆ ѿчꙋ­жде́н­ныхъ ѿ жи́­зни бж҃їѧ,* до­бро­дѣ́­тель­нымъ жи­тї­е́мъ при­вле́к­ша­го.* тогѡ̀ мл҃тва­ми, хрⷭ҇тѐ бж҃е,* низ­по­слѝ на́мъ ве́­лїю млⷭ҇ть.

Хрⷭ҇то́­ва є҆ѵⷢ҇лїа вѣ́р­ный и҆с­по́л­ни­тель бы́въ,* ѻ҆́тче прпⷣбне і҆ѡ́но,* взал­ка́в­шым­сѧ да́лъ є҆сѝ ꙗ҆́сти,* воз­жа­да́в­ших­сѧ на­по­и́лъ є҆сѝ,* боль­ны́хъ же и҆ въ тем­ни́­цѣ за­то­че́н­ныхъ по­сѣ­ти́лъ є҆сѝ.* Ѽ ст҃е і҆ѡ́но, влⷣкꙋ всѣ́хъ молѝ,* сп҃сти́­сѧ на́мъ въ де́нь сꙋ́д­ный.

Сла́­ва, гла́съ г҃:

Ѻ҆́тче і҆ѡ́но, і҆е­ра́р­хꙋ но­ва́­гра­да те­зо­и­ме­ни́­те, въ жи­тїѝ томꙋ̀ по­до́б­ни­че и҆ си́­рыхъ пред­ста́­те­лю! ꙗ҆́ко­же бо то́й, ско́рбь си­ротства̀ по­зна́въ, врꙋ­че́н­ное тѝ ста́­до до́­брѣ ᲂу҆­па́слъ є҆сѝ, ѻ҆те́­че­ски є҆го̀ сна­бдѣ­ва́ѧ, тѣ́мъ и҆ по сме́р­ти сї­ѧ́­е­ши чꙋ­де­сы̀. съ ни́м­же мо­ли́­сѧ гдⷭ҇е­ви сп҃стѝ и҆ про­свѣ­ти́­ти вѣ́р­нѡ со­вер­ша́­ю­щихъ до­сто­чꙋ́д­нꙋю па́­мѧть твою̀.

И҆ ны́нѣ, бг҃о­ро́­ди­ченъ до­гма́­тїкъ, гла́съ то́й­же: Ка́кѡ не ди­ви́м­сѧ:

Вхо́дъ, про­кӏ́­менъ днѐ, и҆ чтє́­нїѧ г҃.

При́­тчей чте́­нїе:

Па́­мѧть првⷣна­гѡ съ по­хва­ла́­ми, и҆ бл҃҃҃҃҃го­сло­ве́­нїе гдⷭ҇не на гла­вѣ̀ є҆гѡ̀. Бл҃же́нъ че­ло­вѣ́къ, и҆́же ѡ҆брѣ́­те пре­мꙋ́­дрость, и҆ сме́р­тенъ, и҆́же ᲂу҆­вѣ́­дѣ ра́з­ꙋмъ. Лꙋ́ч­ше бо сїю̀ кꙋ­по­ва́­ти, не́­же­ли зла́­та и҆ сре­бра̀ со­крѡ́­ви­ща. Чест­нѣ́й­шаѧ же є҆́сть ка́­ме­нїй мно­го­цѣ́н­ныхъ: все́ же чⷭ҇тно́е не­до­сто́й­но є҆ѧ̀ є҆́сть. Дол­го­та́ бо дне́й и҆ лѣ̑та жи­во­та̀ въ де­сни́­цѣ є҆ѧ̀, въ шꙋ́й­цѣ же є҆ѧ̀ бо­га́т­ство и҆ сла́­ва: ѿ ѹ҆́стъ є҆ѧ̀ и҆с­хо́­дитъ пра́­вда, за­ко́нъ же и҆ млⷭ҇ть на ѧ҆зы́­цѣ но́­ситъ. По­слꙋ́­шай­те ᲂу҆̀бо менѐ, Ѽ ча̑да, чⷭ҇тна̑ѧ бо рекꙋ̀: и҆ бл҃же́нъ че­ло­вѣ́къ, и҆́же пꙋти̑ моѧ̑ со­хра­ни́тъ: и҆с­хо́­ди бо моѝ, и҆с­хо́­ди жи­во­та̀, и҆ ᲂу҆­го­тов­лѧ́­ет­сѧ хо­тѣ́­нїе ѿ гдⷭ҇а. Сегѡ̀ ра́ди молю̀ ва́съ, и҆ пред­ла­га́ю мо́й гла́съ сы­но­вѡ́мъ че­ло­вѣ́­чє­скимъ: ꙗ҆́кѡ а҆́зъ, пре­мꙋ́­дрость, ᲂу҆­стро́­ихъ со­вѣ́тъ, и҆ ра́з­ꙋмъ и҆ смы́слъ а҆́зъ при­зва́хъ. Мо́й со­вѣ́тъ и҆ ᲂу҆­твер­жде́­нїе, мо́й ра́з­ꙋмъ, моѧ́ же крѣ́­пость. А҆́зъ менѐ лю́­бѧ­щыѧ люб­лю̀, и҆́щꙋ­щїи же менѐ ѡ҆брѧ́­щꙋтъ блгⷣть. Раз­ꙋ­мѣ́й­те ᲂу҆̀бо, не­ѕло́­би­вїи, ко­ва́р­ство, не­на­ка́­зан­нїи же, при­ла­га́й­те срⷣца̀. По­слꙋ́­шай­те менѐ и҆ па́ки, чⷭ҇тна̑ѧ бо рекꙋ̀, и҆ ѿве́р­зꙋ ѿ ᲂу҆­сте́нъ пра̑­ваѧ: ꙗ҆́кѡ и҆́сти­нѣ по­ꙋ­чи́т­сѧ гор­та́нь мо́й, мє́рз­ки же пре­до мно́ю ᲂу҆ст­ны̑ лжи̑­выѧ. Съ пра́­вдою всѝ гла­го́­лы ѹ҆́стъ мо­и́хъ: ни­что́­же въ ни́хъ стро́­пот­но, нижѐ раз­вра­ще́н­но. Всѧ̑ пра̑­ва сꙋ́ть раз­ꙋ­мѣ­ва́­ю­щымъ, и҆ прѡ́­ста ѡ҆брѣ­та́­ю­щымъ ра́з­ꙋмъ. На­ꙋ­чꙋ́ бо ва́съ и҆́сти­нѣ, да бꙋ́­детъ ѡ҆ гдⷭ҇ѣ на­де́­жда ва́ша, и҆ и҆с­по́л­ни­те­сѧ дх҃а.

При́­тчей чте́­нїе:

Оу҆­ста̀ првⷣна­гѡ ка́­плютъ пре­мꙋ́­дрость: ѧ҆зы́къ же не­пра́­вед­на­гѡ по­ги́б­нетъ. Оу҆ст­нѣ̀ мꙋ­же́й првⷣныхъ ка́­плютъ бл҃го­да̑­ти: ᲂу҆­ста́ же не­че­сти́­выхъ раз­вра­ща́­ют­сѧ. Мѣ̑ри­ла льсти̑­ваѧ ме́р­зость предꙿ гдⷭ҇емъ: вѣ́съ же пра́­вед­ный прї­ѧ́­тенъ є҆мꙋ̀. И҆дѣ́­же а҆́ще вни́­детъ до­са­жде́­нїе, та́мѡ и҆ без­че́­стїе: ᲂу҆­ста́ же сми­ре́н­ныхъ по­ꙋ­ча́­ют­сѧ пре­мꙋ́­дро­сти. Со­вер­ше́­нїе пра́­выхъ на­ста́­витъ и҆̀хъ, и҆ по­полз­но­ве́­нїе ѿрица́­ю­щих­сѧ ᲂу҆­па­се́тъ и҆̀хъ. Не по́ль­зꙋ­ютъ и҆мѣ̑­нїѧ въ де́нь ꙗ҆́ро­сти: пра́­вда же и҆з­ба́­витъ ѿ сме́р­ти. Оу҆́­меръ првⷣный, ѡ҆ста́­ви рас­ка́­ѧ­нїе: на­рꙋ́ч­на же бы­ва́­етъ и҆ по­смѣ­ѧ́­тель­на не­че­сти́­выхъ па́­гꙋ­ба. Пра́­вда не­по­ро́ч­на­гѡ и҆с­прав­лѧ́­етъ пꙋти̑, въ не­че́­стїе же па́­да­етъ не­пра́­вда. Пра́­вда мꙋ­же́й пра́­выхъ и҆з­ба́­витъ и҆̀хъ: без­со­вѣ́­тї­емъ же плѣ­нѧ́­ют­сѧ без­за­ко́н­нїи. Скон­ча́в­шꙋ­сѧ мꙋ́жꙋ првⷣнꙋ, не по­ги́б­нетъ на­де́­жда: по­хва­ла́ же не­че­сти́­выхъ по­ги́б­нетъ. Првⷣникъ ѿ ло́ва ᲂу҆­бѣ́г­нетъ, въ не­гѡ́­же мѣ́­сто пре­да­е́т­сѧ не­че­сти́­вый. Во ᲂу҆­стѣ́хъ не­че­сти́­выхъ сѣ́ть гра́­жда­нѡмъ, чꙋ́в­ство же првⷣныхъ бл҃го­спѣ́ш­ное. Во бл҃ги́хъ првⷣныхъ и҆с­пра́­вит­сѧ гра́дъ, и҆ въ по­ги́­бе­ли не­че­сти́­выхъ ра́­до­ва­нїе. Во бл҃го­сло­ве́­нїи пра́­выхъ воз­вы́­сит­сѧ гра́дъ, ᲂу҆­сты́ же не­че­сти́­выхъ ра­ско­па́­ет­сѧ. Рꙋ­га́­ет­сѧ гра́­жда­нѡмъ ли­ше́н­ный ра́з­ꙋ­ма, мꙋ́жъ же мꙋ́­дрый без­мо́л­вїе во́­дитъ.

Пре­мꙋ́­дро­сти со­ло­мѡ́­но­вы чте́­нїе:

Првⷣникъ, а҆́ще по­сти́г­нетъ скон­ча́­ти­сѧ, въ по­ко́и бꙋ́­детъ. Ста́­рость бо чⷭ҇тна̀ не мно­го­лѣ́т­на, нижѐ въ чис­лѣ̀ лѣ́тъ и҆с­чи­та́­ет­сѧ. Сѣ­ди́­на же є҆́сть мꙋ́­дрость че­ло­вѣ́­кѡмъ, и҆ во́з­растъ ста́­ро­сти жи­тїѐ не­скве́р­ное. Бл҃го­ꙋ­го́­денъ бг҃о­ви бы́въ, воз­лю́б­ленъ бы́сть, и҆ жи­вы́й по­сре­дѣ̀ грѣ̑ш­никъ, пре­ста́в­ленъ бы́сть: Вос­хи­ще́нъ бы́сть, да не ѕло́­ба и҆з­мѣ­ни́тъ ра́з­ꙋ­ма є҆гѡ̀, и҆лѝ ле́сть пре­льсти́тъ дꙋ́шꙋ є҆гѡ̀. Ра­че́­нїе бо ѕло́­бы по­мра­ча́­етъ дѡ́­браѧ, и҆ па­ре́­нїе по́­хо­ти пре­мѣ­нѧ́­етъ ѹ҆́мъ не­ѕло́­бивъ. Скон­ча́в­сѧ вма́­лѣ, и҆с­по́л­ни лѣ̑та дѡ́л­га: Оу҆­го́д­на бо бѣ̀ гдⷭ҇е­ви дꙋша̀ є҆гѡ̀: сегѡ̀ ра́ди по­тща́­сѧ ѿ сре­ды̀ лꙋ­ка́в­ствїѧ. Лю́­дїе же ви́­дѣв­ше, и҆ не раз­ꙋ­мѣ́в­ше, нижѐ по­ло́ж­ше въ по­мыш­ле́­нїи та­ко­во́е: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ по­сѣ­ще́­нїе во и҆з­бра́н­ныхъ є҆гѡ̀.

На лї­тӏ́и стї­хи́­ра хра́­ма, и҆ ст҃а́­гѡ, гла́съ д҃:

Лю­бо́­вїю къ бг҃ꙋ и҆ лю́­демъ дви́­жи­мый, ѻ҆́тче прпⷣбне і҆ѡ́но, со вѡ́­и­ны хрⷭ҇тѡ́­вы вмѣ­ни́л­сѧ є҆сѝ, дꙋ­хо́в­нѡ на­став­лѧ́ѧ и҆̀хъ, дꙋ­ше́ю воз­ста́въ сꙋ­про­ти́въ вра­га̀ мы́­слен­на­гѡ. на­че́н­шей­сѧ же бра́­ни бра­то­ꙋбӏ́й­ствен­нѣй, ты̀, ꙗ҆́кѡ і҆е­ре́й бж҃їй, за­щи́­ти­тель вѣ́ры и҆ бли́ж­нѧ­гѡ бл҃го­дер­зно­ве́н­нѡ ꙗ҆ви́л­сѧ є҆сѝ, дꙋ́шꙋ свою̀ за дрꙋ́­ги по­ла­га́ѧ, сло­ве­сы̀ и҆ ᲂу҆­че́нь­ми ᲂу҆­тѣ­ша́ѧ, и҆ ѡ҆́бра­зомъ жи­тїѧ̀ тво­е­гѡ̀ со­грѣ­ва́ѧ.

Про­по­вѣ́­дꙋ­етъ тѧ̀ цр҃ковь бж҃їѧ стра́­жа вѣ́р­на ѻ҆ве́цъ сло­ве́с­ныхъ, и҆̀хже ты̀ въ без­го́­дїе и҆ дни̑ тре­вол­не́­нїй мꙋ́­дрѣ ᲂу҆­па́слъ є҆сѝ, въ вѣ́рѣ до кон­ца̀ со­блю́лъ є҆сѝ, и҆ въ мл҃твѣ за ни́хъ же́р­твен­ни­кꙋ гдⷭ҇ню пред­сто­ѧ́лъ є҆сѝ. тѣ́м­же, ст҃и́­те­лю ѻ҆́тче і҆ѡ́но, та́кѡ про­свѣ­ти́­сѧ свѣ́тъ тво́й предꙿ че­ло­вѣ̑­ки, и҆̀же ви́­дѣв­ше дѡ́­браѧ дѣла̀ твоѧ̑, про­сла́­ви­ша ѻ҆ц҃а̀ на́­ше­го нбⷭ҇на­го.

Сла́­ва, гла́съ то́й­же:

Вѣ́­ренъ бг҃ꙋ и҆ цр҃кви бы́лъ є҆сѝ да́же до сме́р­ти, ст҃че і҆ѡ́но, ны́нѣ же со ст҃ы́­ми, въ зе­млѝ рꙋ́с­ской про­сї­ѧ́в­ши­ми, молѝ гдⷭ҇а ѡ҆ сп҃се́­нїи всѣ́хъ, бл҃го­чⷭ҇тнѡ чтꙋ́­щихъ па́­мѧть твою̀.

И҆ ны́нѣ, бг҃о­ро́­ди­ченъ, гла́съ то́й­же:

Бы́сть чре́­во твоѐ ст҃а́ѧ тра­пе́­за, и҆мꙋ́­щаѧ нбⷭ҇на­го хлѣ́­ба, хрⷭ҇та̀ бг҃а на́­ше­го, ѿ не­гѡ́­же всѧ́къ ꙗ҆ды́й не ᲂу҆­ми­ра́­етъ, ꙗ҆́ко­же речѐ всѣ́хъ, бг҃о­ро­ди́­тель­ни­це, пи­та́­тель.

На стї­хо́в­нѣ стї­хи̑­ры, гла́съ є҃.

По­до́­бенъ: Ра́­дꙋй­сѧ:

Ра́­дꙋй­сѧ, ѻ҆́тче і҆ѡ́но,* бл҃го­чⷭ҇тїѧ крѣ́п­кое ᲂу҆­твер­жде́­нїе,* ѻ҆те́­че­скихъ пре­да́­нїй не­ꙋ­сы́п­ный хра­ни́­те­лю,* па́д­шихъ кро́т­кїй и҆ млⷭ҇ти­вый ѡ҆б­ли­чи́­те­лю,* ѡ҆ ча́­дѣхъ же сво­и́хъ мл҃твен­ни­че* и҆ пред­ста́­те­лю предꙿ гдⷭ҇емъ ᲂу҆­се́рд­ный,* є҆мꙋ́­же ны́нѣ во сла́­вѣ пред­сто­и́­ши,* по­ми­на́й на́съ, лю­бо́­вїю чтꙋ́­щихъ па́­мѧть твою̀.

Стӏ́хъ: Чтна̀ предꙿ гдⷭ҇емъ сме́рть прпⷣбныхъ є҆гѡ̀.

Ра́­дꙋй­сѧ, ѻ҆́тче і҆ѡ́но,* і҆е­ра́р­ше бж҃їй и҆з­рѧ́д­ный,* пра́­ви­ло вѣ́ры и҆ до­бро­дѣ́­ла­нїѧ,* та­ко́въ по­до­ба́­ше а҆р­хї­е­ре́й на́мъ,* прпⷣбенъ, чⷭ҇тенъ, не­ѕло́­бивъ,* че­ло­вѣ́­кѡмъ ᲂу҆­до­бо­при­стꙋ́п­ный и҆ вѣ́р­ный слꙋ­жи́­тель хрⷭ҇то́въ,* є҆мꙋ́­же ны́нѣ во сла́­вѣ пред­сто­и́­ши,* по­ми­на́й на́съ, лю­бо́­вїю чтꙋ́­щихъ па́­мѧть твою̀.

Стӏ́хъ: Что̀ воз­да́мъ гдⷭ҇е­ви ѡ҆ всѣ́хъ, ꙗ҆̀же воз­да­де́ ми;

Ра́­дꙋй­сѧ, ѻ҆́тче і҆ѡ́но,* бл҃го­се́р­дый пла́чь ѡ҆ па́­ствѣ и҆з­гна́н­нѣй вос­прї­е́­мый,* ско́рбь ѡ҆ не́й въ срⷣцѣ тво­е́мъ но­си́­вый,* подꙿ крⷭ҇то́мъ слꙋ­же́­нїѧ бли̑ж­нимъ не и҆з­не­мо­гӏ́й,* но ѡ҆ ча́­дѣхъ рꙋсѝ ст҃ы́ѧ со ᲂу҆­ми­ле́­нї­емъ хрⷭ҇тꙋ̀ мо­ли́­вый­сѧ,* мно́­ги­ми сле­за́­ми гдⷭ҇а на млⷭ҇ть при­кло­ни́­вый,* є҆мꙋ́­же ны́нѣ во сла́­вѣ пред­сто­и́­ши,* по­ми­на́й на́съ, лю­бо́­вїю чтꙋ́­щихъ па́­мѧть твою̀.

Сла́­ва, гла́съ ѕ҃:

Дне́сь без­за­ко́н­нꙋ­ю­щїи ᲂу҆­мол­ча́­ша, и҆ не­на­ви̑ст­ни­цы цр҃кве хрⷭ҇то́­вы по­сра­ми́­ша­сѧ, ма́­лое же ста́­до дер­за́­етъ, и҆ па́­ства, во ѻ҆те́­че­ствїи и҆ въ раз­сѣ́­ѧ­нїи сꙋ́­щаѧ, свѣ́т­лѡ кра­сꙋ́­ет­сѧ въ бжⷭ҇твен­нѣй па́­мѧ­ти ст҃и́­те­лѧ і҆ѡ́ны. тѣ́м­же и҆ мы̀ во­пї­е́мъ є҆мꙋ̀: да́­рꙋй и҆ на́мъ бл҃го­сло­ве́­нїе твоѐ, ѻ҆́тче, крⷭ҇тъ сво́й но­си́­ти до­сто́й­нѡ, и҆ сте­зе́ю тво­е́ю ше́­ствꙋ­ю­ще не­ꙋ­кло́н­нѡ, сла́­вꙋ нбⷭ҇нꙋю съ то­бо́ю ᲂу҆­лꙋ­чи́­ти.

И҆ ны́нѣ, бг҃о­ро́­ди­ченъ, гла́съ то́й­же: Тво­ре́цъ и҆ и҆з­ба́­ви­тель мо́й:

Тро­па́рь, гла́съ д҃:

Па́­стырь до́­брый бы́лъ є҆сѝ рꙋ̑с­скимъ лю́­демъ, при­ста́­ни­ще ѡ҆брѣ́т­шымъ во стра­нѣ̀ чꙋ­жде́й, всѧ́­кѡ на­став­лѧ́ѧ и҆̀хъ, на­и­па́­че же люб­вѝ хрⷭ҇то́­вой, ѡ҆́бразъ є҆ѧ̀ во все́мъ по­ка­зꙋ́ѧ. тѣ́м­же, ст҃и́­те­лю ѻ҆́тче і҆ѡ́но, молѝ хрⷭ҇та̀ бг҃а сп҃сти́­сѧ дꙋ­ша́мъ на́­шымъ.

На ѹ҆́трени.

На Бг҃ъ гдⷭ҇ь: тро­па́рь два́­жды. Сла́­ва, и҆ ны́нѣ, бг҃о­ро́­ди­ченъ: Є҆́же ѿ вѣ́ка ᲂу҆­та­е́­ное:

По а҃-мъ стї­хо­сло́­вїи сѣ­да́­ленъ, гла́съ а҃:

Та́й­нꙋ люб­вѐ бж҃їѧ по­зна́въ, ст҃и́­те­лю і҆ѡ́но, гла­го́­лалъ є҆сѝ: по́­двигъ є҆́сть жи́знь за и҆ны̑ѧ по­ло­жи́­ти. ю҆́же всю̀ хрⷭ҇тꙋ̀ бг҃ꙋ пре́­далъ є҆сѝ, мо­ли́­сѧ ѡ҆ сп҃се́­нїи дꙋ́шъ на́­шихъ.

Сла́­ва:

Ꙗ҆́кѡ мно­го­цѣ́н­ный да́ръ прї­ѧ́тъ да́ль­нїй гра́дъ мань­чжꙋ́р­скїй ст҃ы̑ѧ мѡ́щи твоѧ̑, хань­ко́­ꙋ­скїй свѣ­ти́ль­ни­че, мӏ́ръ же ве́сь блгⷣтїю, ѿ тебє̀ и҆с­хо­дѧ́­щею, на­по­ѧ́­ет­сѧ, вос­пѣ­ва́ѧ: ра́­дꙋй­сѧ, ѻ҆́тче і҆ѡ́но, мл҃твен­ни­че ѡ҆ дꙋ­ша́хъ на́­шихъ.

И҆ ны́нѣ, бг҃о­ро́­ди­ченъ:

Оу҆­по­ва́­нїе хрⷭ҇тї­а́нъ, пре­ст҃а́ѧ дв҃о, є҆го́­же ро­ди­ла̀ є҆сѝ бг҃а, па́че ᲂу҆ма́ же и҆ сло́­ва, не­пре­ста́н­нѡ молѝ съ вы́ш­ни­ми си́­ла­ми, по­да́­ти ѡ҆став­ле́­нїе грѣ­хѡ́въ на́­шихъ и҆ и҆с­прав­ле́­нїе жи­тїѧ̀, при́­снѡ тѧ̀ сла́­вѧ­щымъ.

По в҃-мъ стї­хо­сло́­вїи сѣ­да́­ленъ, гла́съ ѕ҃:

Па́­стырь до́­брый и҆ на­ста́в­никъ пре­ди́в­ный па́­ствѣ бы́лъ є҆сѝ, ст҃и́­те­лю і҆ѡ́но, сегѡ̀ ра́ди и҆ мы̀, ꙗ҆́кѡ ве­ли́­ко­мꙋ свѣ­ти́ль­ни­кꙋ цр҃кве на́­шеѧ, хва­лꙋ̀ тѝ вос­пѣ­ва́­емъ и҆ взы­ва́­емъ: молѝ хрⷭ҇та̀ бг҃а, грѣ­хѡ́въ ѡ҆став­ле́­нїе да­ро­ва́­ти пра́з­днꙋ­ю­щымъ лю­бо́­вїю ст҃ꙋ́ю па́­мѧть твою̀.

Сла́­ва:

Со тща́­нї­емъ въ вї­но­гра́д­ни­цѣ хрⷭ҇то́­вомъ по­трꙋ­ди́в­сѧ, ст҃и́­те­лю і҆ѡ́но, дѡ́­брыѧ пло­ды̀ до­бро­дѣ́­тель­ми взра­сти́лъ є҆сѝ, дꙋ́шы бо па́­ствы тво­еѧ̀, въ то­чи́­лѣ го­не́­нїй и҆ и҆з­гна́­нїѧ со­крꙋ­шє́н­ныѧ, до́­брое вїно̀ и҆ска́­па­ша. тѣ́м­же гдⷭ҇ь тво́й воз­ра́­до­ва­сѧ.

И҆ ны́нѣ, бг҃о­ро́­ди­ченъ:

Не­дви́­жи­мое ᲂу҆­твер­жде́­нїе вѣ́ры и҆ чⷭ҇тны́й да́ръ дꙋ́шъ на́­шихъ, бцⷣꙋ пѣ́снь­ми ве­ли­ча́­емъ, вѣ́р­нїи: ра́­дꙋй­сѧ, жи́знь ѵ҆по­ста́с­нꙋю во чре́­вѣ тво­е́мъ вмѣ­сти́в­шаѧ: ра́­дꙋй­сѧ, скор­бѧ́­щихъ за­стꙋ­пле́­нїе: ра́­дꙋй­сѧ, бг҃о­мт҃и пре­чⷭ҇таѧ.

По­лѷ­е­ле́й, и҆ ве­ли­ча́­нїе:

Ве­ли­ча́­емъ тѧ̀, ст҃и́­те­лю ѻ҆́тче і҆ѡ́но, и҆ чти́мъ ст҃ꙋ́ю па́­мѧть твою̀, ты́ бо мо́­ли­ши за на́съ хрⷭ҇та̀ бг҃а на́­ше­го.

Ѱа­ло́мъ и҆з­бра́н­ный: Оу҆­слы́­ши­те сїѧ̑, всѝ ꙗ҆зы́­цы, внꙋ­ши́­те, всѝ жи­вꙋ́­щїи по все­ле́н­нѣй.

По по­лѷ­е­ле́и сѣ­да́­ленъ, гла́съ в҃:

Ст҃и́­те­лю хрⷭ҇то́въ и҆ ᲂу҆­го́д­ни­че і҆ѡ́но, те́­плымъ тво­и́мъ пред­ста́­тель­ствомъ ѻ҆́тро­ки и҆ ю҆́ныѧ во ѡ҆гра́­дѣ цр҃ко́в­нѣй со­блю­дѝ, да не ѡ҆мра­ча́т­сѧ раз­вра­ще́­нї­емъ мӏ́ра сегѡ̀, и҆ всѧ́­кимъ лжеꙋ­че́­нї­емъ вол­кѡ́въ лю́­тыхъ да не ᲂу҆­лов­ле́­ни бꙋ́­дꙋтъ.

Сла́­ва, и҆ ны́нѣ, бг҃о­ро́­ди­ченъ:

Ра́­дꙋ­ет­сѧ ны́нѣ і҆ѡ­а́ннъ, ст҃и́­тель то­бо́ль­скїй, въ зе́­млю кита́й­скꙋю пе́р­выхъ про­по­вѣ́д­ни­кѡвъ пра­во­сла́­вїѧ по­сла́­вый, и҆дѣ́­же и҆ сла́в­ный сро́д­никъ є҆гѡ̀ про­сла́­ви­сѧ. ра́­дꙋ­ет­сѧ и҆ і҆н­но­ке́н­тїй, свѣ­ти́ль­никъ и҆р­кꙋ́т­скїй, бл҃го­вѣ́ст­ни­кѡмъ вѣ́ры хрⷭ҇то́­вы въ стра­нѣ̀ да́ль­нѣй спо­спѣ́ш­никъ. ра́­дꙋ­ют­сѧ пер­во­мч҃ни­цы кита́й­стїи, да́же до кро́­ве за хрⷭ҇та̀ по­стра­да́в­шїи, є҆го́­же мо́­лѧтъ, съ пре­бл҃го­сло­ве́н­ною бцⷣею, при́­снѡ со­грѣ­ше́­нїй ѡ҆став­ле́­нїе да­ро­ва́­ти, вос­пѣ­ва́­ю­щымъ до­сто́й­нѡ но́­ва­го ᲂу҆­го́д­ни­ка є҆гѡ̀.

Та́же сте­пє́н­на, а҃-й а҆н­тї­фѡ́нъ д҃-гѡ гла́­са.

Про­кӏ́­менъ, гла́съ д҃: Ч҇ⷭтна̀ предꙿ гдⷭ҇емъ сме́рть прпⷣбныхъ є҆гѡ̀.

Стӏ́хъ: Что̀ воз­да́мъ гдⷭ҇е­ви ѡ҆ всѣ́хъ, ꙗ҆̀же воз­да­де́ ми;

Є҆ѵⷢ҇лїе ѿ ма­тѳе́а, за­ча́­ло а҃і: Речѐ гдⷭ҇ь сво­и̑мъ ᲂу҆­че­ни­кѡ́мъ: вы̀ є҆стѐ свѣ́тъ мӏ́ра:

По н҃-мъ ѱал­мѣ̀: Мл҃тва­ми ст҃и́­те­лѧ і҆ѡ́ны:

Та́же стї­хи́­ра, гла́съ ѕ҃:

Пѣ́снь­ми вос­по­и́мъ хва­лꙋ̀ ст҃и́­те­лю бж҃їю і҆ѡ́нѣ, є҆ди́­но­мꙋ ѿ тѣ́хъ, и҆́хже мӏ́ръ не­до­сто́­инъ бѣ̀, и҆̀же во­и́­стин­нꙋ хрⷭ҇тї­а́н­скимъ жи­тї­е́мъ вѣ́р­ность хрⷭ҇тꙋ̀ по­ка­за́­ша, тер­пѣ́­нї­емъ ве́­лї­имъ ѕла́­го вра­га̀ по­сра­ми́­ша, и҆ сми­ре́­нї­емъ сво­и́мъ го́р­дость є҆гѡ̀ низ­ло­жи́­ша.

Ка­нѡ́нъ ст҃и́­те­лѧ на и҃.

Гла́съ ѕ҃. Пѣ́снь а҃.

І҆р­мо́съ: Ꙗ҆́кѡ по сꙋ́хꙋ пѣ­ше­ше́­ство­вавъ і҆и҃ль, по бе́з­днѣ сто­па́­ми, го­ни́­те­лѧ фа­ра­ѡ́­на ви́дѧ по­топ­лѧ́­е­ма, бг҃ꙋ по­бѣ́д­нꙋю пѣ́снь по­и́мъ, во­пї­ѧ́­ше.

При­пѣ́въ: Ст҃и́­те­лю ѻ҆́тче і҆ѡ́но, молѝ бг҃а ѡ҆ на́съ.

Тво­е­мꙋ̀, хрⷭ҇тѐ, ᲂу҆­го́д­ни­кꙋ хва­лꙋ̀ до­сто́й­нꙋ вос­пѣ́­ти да́­рꙋй мѝ, влⷣко, ѿ ᲂу҆­сте́нъ не­чи́­стыхъ и҆ ра́з­ꙋ­ма по­мра­че́н­на, и҆ мл҃тва­ми є҆гѡ̀ воз­дви́г­ни ѿ раз­сла­бле́­нїѧ грѣ­хо́в­на­гѡ дꙋ́шꙋ мою̀.

Ка­за́н­скїѧ зе­млѝ ᲂу҆­кра­ше́­нїе пре­сла́в­ное ꙗ҆ви́л­сѧ є҆сѝ, ѻ҆́тче і҆ѡ́но, слꙋ­же́­нї­емъ па́­стыр­ства и҆ ᲂу҆­чи́­тель­ства по­дви́г­сѧ. тѣ́м­же, свѣ́­томъ є҆ѵⷢ҇ль­скимъ ю҆́ныѧ про­свѣ­ща́ѧ, мра́къ не­вѣ́­дѣ­нїѧ да­ле́­че ѿ ни́хъ ѿгна́лъ є҆сѝ.

Ѽ гла́­са пла́­ча тво­е­гѡ̀, бл҃же́н­не і҆ѡ́но, ѡ҆ лю́­дехъ рꙋсѝ, во ѻ҆те́­че­ствїи и҆ въ раз­сѣ́­ѧ­нїи сꙋ́­щихъ! и҆́мже и҆ на́съ по­ка­ѧ́­нїю и҆ и҆с­прав­ле́­нїю на­ꙋ­ча́­е­ши, и҆ и҆зꙿ срⷣца ѡ҆ка­ме­нѣ́в­ша­гѡ сле́­зы и҆з­во́­ди­ши, ꙗ҆́ко­же дре́в­ле мѡ­ѷ­се́й и҆зꙿ ка́­ме­не во́дꙋ, да всѝ съ ни́мъ зо­ве́мъ бг҃ꙋ, сп҃са́­ю­ще­мꙋ на́съ, сла́в­нѡ бо про­сла́­ви­сѧ.

Бг҃о­ро́­ди­ченъ: Ч҇ⷭтна́ѧ і҆кѡ́­на твоѧ̀ ка­за́н­скаѧ, влⷣчце бцⷣе, ѻ҆те́­че­ствꙋ на́­ше­мꙋ въ по­кро́въ и҆ за­стꙋ­пле́­нїе да­ро­ва́­сѧ, ꙗ҆́кѡ лю­бо́­вїю тво­е́ю сїѐ при́­снѡ ѡ҆за­рѧ́­е­ши, за­стꙋ́п­ни­це ᲂу҆­се́рд­наѧ. тѣ́м­же и҆ къ жи́­зни дꙋ­хо́в­нѣй, въ бз҃ѣ со­кро­ве́н­нѣй, лю́ди твоѧ̑ не­до­стѡ́й­ныѧ ᲂу҆­пра́­ви.

Пѣ́снь г҃.

І҆р­мо́съ: Нѣ́сть ст҃ъ, ꙗ҆́ко­же ты̀, гдⷭ҇и бж҃е мо́й, воз­не­сы́й ро́гъ вѣ́р­ныхъ тво­и́хъ, бл҃же, и҆ ᲂу҆­твер­ди́­вый на́съ на ка́­ме­ни и҆с­по­вѣ́­да­нїѧ тво­е­гѡ̀.

Ѧ҆зы́къ тво́й, дх҃омъ бжⷭ҇твен­нымъ дви́­жимь, во­и́­стин­нꙋ тро́сть кни́ж­ни­ка ꙗ҆ви́­сѧ, ска­зꙋ́­етъ бо пре­сла́в­нѡ пи­са́­нїй со­кро­вє́н­наѧ и҆ ѻ҆те́­че­скихъ сло­ве́съ по­тає́н­наѧ, є҆ре­тӏ́­че­ствꙋ­ю­щихъ и҆ без­бо́ж­ныхъ пи­са̑­нїѧ по­сра­млѧ́­етъ, ве­се­ли́тъ же дꙋ­хо́в­нѡ по­ю́­щыѧ все­чⷭ҇тнꙋ́ю па́­мѧть твою̀, ст҃и́­те­лю і҆ѡ́но.

Ꙗ҆́кѡ а҆пⷭ҇лѡмъ и҆ ѻ҆тцє́мъ дрє́в­нимъ на­слѣ́д­никъ и҆́стин­ный, и҆с­по­вѣ́­да­нїе пра́­вое вѣ́ры до́­брѣ сви­дѣ́­тель­ство­валъ є҆сѝ, и҆ во ᲂу҆­чи́­тель­ствѣ по­дви­за́­ѧ­сѧ, ю҆́ныѧ ᲂу҆­че­ни­кѝ твоѧ̑ ᲂу҆­крѣп­лѧ́лъ є҆сѝ, въ вѣ́­трѣхъ сꙋ­е­мꙋ́­дрїй не вла́­ѧ­ти­сѧ ѿню́дъ, ѻ҆ба́­че къ свѣ́­тꙋ бжⷭ҇твен­ныхъ до­гма́­тѡвъ взи­ра́­ти.

Ꙗ҆ви́л­сѧ є҆сѝ дре́в­нихъ ѻ҆тцє́въ жи­тїѧ̀ по­дра­жа́­тель и҆́сти­ненъ, слꙋ­же́­нї­емъ бли̑ж­нимъ дѣ́­ла­нїе мл҃твен­ное рас­тво­ри́въ, во ѻ҆бою́ же стра́­хомъ сы­но́в­нимъ гдⷭ҇е­ви пред­стоѧ̀, всы­но­вле́­нїе же и҆ ѡ҆бо­же́­нїе во хрⷭ҇тѣ̀ ᲂу҆­лꙋ­чи́лъ є҆сѝ.

Бг҃о­ро́­ди­ченъ: А҆́ще и҆ ѡ҆скꙋ­дѣ́­ша во дни̑ по­слѣ̑д­нїѧ на­ста̑в­ни­цы дх҃о­но́с­нїи, но ты̀, пре­чⷭ҇таѧ влⷣчце, сама̀ на­ста́в­ни­ца ко сп҃се́­нїю ра­бѡ́мъ тво­и̑мъ бꙋ́ди, смо­ле́б­ни­ки прї­и́м­ши ѻ҆тцы̀ бг҃о­мꙋ̑­дрыѧ, и҆́хже пи­са́нь­ми на­зи­да́­ем­сѧ.

Сѣ­да́­ленъ, гла́съ є҃:

Вѣ́ры ра́ди ꙗ҆́тъ бы́въ, въ тем­ни́­цꙋ вса­жде́нъ бы́лъ є҆сѝ, но бг҃ъ и҆́нъ пꙋ́ть тебѣ̀ пред­на­чер­та̀, рꙋ̑с­скимъ лю́­демъ во бл҃га̑ѧ. тѣ́м­же мо́­лимъ тѧ̀: молѝ хрⷭ҇та̀ бг҃а, на́мъ въ вѣ́рѣ ᲂу҆­твер­ди́­ти­сѧ, во сп҃се́­нїе дꙋ́шъ на́­шихъ.

Сла́­ва, и҆ ны́нѣ, бг҃о­ро́­ди­ченъ:

Сла́­до­сте а҆́гг҃лѡвъ, скор­бѧ́­щихъ ра́­до­сте, хрⷭ҇тї­а́нъ пред­ста́­тель­ни­це, дв҃о, мт҃и гдⷭ҇нѧ, за­стꙋ­пи́ ны ѿ всѧ́­кїѧ на­па́­сти, и҆ сп҃сѝ дꙋ́шы на́шѧ.

Пѣ́снь д҃.

І҆р­мо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, чⷭ҇тна́ѧ цр҃ковь бг҃о­лѣ́п­нѡ по­е́тъ взы­ва́­ю­щи, ѿ смы́­сла чⷭ҇та ѡ҆ гдⷭ҇ѣ пра́з­днꙋ­ю­щи.

Ѻ҆те́­че­скихъ пи­са́­нїй хра­ни́­тель и҆ и҆с­по́л­ни­тель тѣ́хъ, ст҃и́­те­лю і҆ѡ́но, ꙗ҆ви́л­сѧ є҆сѝ, ꙗ҆̀же ю҆́но­шамъ бл҃го­го­вѣ́й­нѣ пре­по­да́лъ є҆сѝ, бг҃о­ꙋ­го́д­нымъ же жи­тї­е́мъ си́лꙋ сло­ве́съ и҆́хъ ꙗ҆ви́лъ є҆сѝ.

Хрⷭ҇то́­во сми­ре́­нїе стѧ­жа́въ и҆ мꙋ́­же­ствомъ пре­по­ѧ́­санъ, и҆с­хо́­ди­ши на слꙋ­же́­нїе но́во, и҆ ꙗ҆́кѡ ле́въ, ᲂу҆­по­ва́ѧ на гдⷭ҇а, предꙿ скѵ̑м­ны ры­ка́­ю­щи­ми пра́­вѡ хо­ди́лъ є҆сѝ.

Є҆ди́­на­го сꙋ́­ща­го на нб҃сѣ́хъ па́че всѧ́­ка­гѡ стра́­ха ᲂу҆­бо­ѧ́в­сѧ, томꙋ̀ є҆ди́­но­мꙋ всѧ́­кимъ ᲂу҆­се́р­дї­емъ по­ра­бо́­талъ є҆сѝ, и҆ ко­ва̑р­ствїѧ бо­го­бо́р­цєвъ ѡ҆пле­ва́въ, со хрⷭ҇то́мъ, по­бѣ­ди́­те­лемъ сме́р­ти, на вѣ́ки во­цр҃и́л­сѧ є҆сѝ.

Бг҃о­ро́­ди­ченъ: На тѧ̀ всю̀ на­де́­ждꙋ сп҃се́­нїѧ на́­ше­гѡ воз­ло­жи́­хомъ, бг҃о­мт҃и не­и­скꙋ­со­бра́ч­наѧ, на по́­мощь при́­снѡ при­зы­ва́­емъ тѧ̀, сп҃си́ ны ѿ на­па́­стей и҆ пе­ча́­ли, и҆ вѣ́ч­на­гѡ ѡ҆сꙋ­жде́­нїѧ и҆з­ба́­ви.

Пѣ́снь є҃.

І҆р­мо́съ: Бж҃ї­имъ свѣ́­томъ тво­и́мъ, бл҃же, ѹ҆́тре­ню­ю­щихъ тѝ дꙋ́шы лю­бо́­вїю ѡ҆за­рѝ, мо­лю́­сѧ, тѧ̀ вѣ́­дѣ­ти, сло́­ве бж҃їй, и҆́стин­на­го бг҃а, ѿ мра́­ка грѣ­хо́в­на­гѡ взы­ва́­ю­ща.

Млⷭ҇тїю къ скор­бѧ́­щымъ ᲂу҆­кра­си́л­сѧ є҆сѝ, раз­да­ва́­ѧй а҆́л­чꙋ­щымъ хлѣ́бъ тво́й, бо­лѧ́­щымъ же все­ꙋ­се́рд­нѡ по­слꙋ­жи́лъ є҆сѝ сло́­вомъ па́­стыр­скимъ, мл҃твою и҆ ᲂу҆­вѣ­ща́­нї­емъ.

Гра́дъ мо­сква̀ хва́­лит­сѧ ю҆́но­стїю тво­е́ю, ка­лꙋ́­га же и҆ ка­за́нь ᲂу҆­че́­нї­емъ тво­и́мъ, ѻ҆́пти­на пꙋ́­стынь мо­на́­ше­ствомъ, но па́че всѣ́хъ мань­чжꙋ́­рїа то­бо́ю сла́­вит­сѧ, ꙗ҆́кѡ па́­сты­ремъ ре́­вност­нымъ и҆ пред­сто­ѧ́­те­лемъ люб­ве­ѻ­би́ль­нымъ.

Воз­лю­би́лъ є҆сѝ гдⷭ҇а, и҆ все́ю крѣ́­по­стїю томꙋ̀ по­ра­бо́­талъ є҆сѝ, мнѡ́­ги скѡ́р­би пре­тер­пѣ­ва́ѧ, дꙋ́шы мно́­гихъ, ст҃и́­те­лю, ко хрⷭ҇тꙋ̀ на­ста́­вилъ є҆сѝ: є҆мꙋ́­же мо­ли́­сѧ сп҃сти́­сѧ на́мъ.

Бг҃о­ро́­ди­ченъ: Про­свѣ­тѝ, дв҃о чⷭ҇таѧ, лю­бо́­вїю чтꙋ́­щихъ тѧ̀ и҆ ве­ли­ча́­ю­щихъ, раз­рѣ­шѝ стра̑­сти на́шѧ, ᲂу҆­ста́­ви и҆́хъ бꙋ́рю, и҆ лꙋ­ка́­ва­гѡ со­бла́з­ны ѿ сре­ды̀ на́­шеѧ ѿже­нѝ мл҃тва­ми тво­и́­ми.

Пѣ́снь ѕ҃.

І҆р­мо́съ: Жи­те́й­ское мо́ре, воз­дви­за́­е­мое зрѧ̀ на­па́­стей бꙋ́­рею, къ ти́­хо­мꙋ при­ста́­ни­щꙋ тво­е­мꙋ̀ при­те́къ, во­пїю́ ти: воз­ве­дѝ ѿ тлѝ жи­во́тъ мо́й, мно­го­млⷭ҇ти­ве.

Бо­го­бо́р­цємъ и҆ и҆но­вѣ̑р­нымъ вѣ́­рою крѣ́п­кою, ст҃и́­те­лю, про­ти­вꙋ­ста́лъ є҆сѝ, па́­ствꙋ твою̀ ѿ вол­кѡ́въ гꙋ­би́­тель­ныхъ ѡ҆гра­ди́­ти тща́­сѧ, гнѣ́­ва ѕло́б­ствꙋ­ю­щихъ ни­ка́­ко­же ᲂу҆­бо­ѧ́л­сѧ є҆сѝ, нижѐ ѡ҆сꙋ­жде́­нїѧ че­ло­вѣ́­че­ска.

Дол­го­тер­пѣ́­нїю тво­е­мꙋ̀ нб҃са̀ и҆ зе­млѧ̀ по­ди­ви́­ша­сѧ, ꙗ҆́кѡ въ са́­мыхъ ко­гте́хъ ѕвѣ­ри́­ныхъ пло́­тїю дер­жи́мь, не пре­ста́лъ є҆сѝ ᲂу҆­по­ва́­ти на гдⷭ҇а и҆ воз­вѣ­ща́­ти и҆́сти­нꙋ є҆гѡ̀, пре­сла́в­нѡ тѧ̀, ꙗ҆́ко­же прⷪ҇ро́­ка ѿ чре́­ва ки́­то­ва, сво­бо­ди́в­ша­го.

Ст҃и́­тель­ства и҆́стин­на­гѡ ѡ҆́бразъ бы́лъ є҆сѝ, стра­сте́й взы­гра̑­нїѧ пе́р­вѣе ѡ҆бꙋз­да́въ на стра́­жи срⷣца тво­е­гѡ̀, тѣ́м­же и҆ ѻ҆́вцы хрⷭ҇тѡ́­вы ко при­ста́­ни­щꙋ не­бꙋ́р­но­мꙋ мꙋ́­дрѣ ᲂу҆­пра́­вилъ є҆сѝ.

Бг҃о­ро́­ди­ченъ: И҆́сти­ны сви­дѣ́­те­лїе и҆ сн҃а тво­е­гѡ̀ слꙋ­жи́­те­лїе вѣ́р­нїи на тѧ̀, бг҃о­мт҃и, ᲂу҆­по­ва́­нїе своѐ воз­ло­жи́­ша, и҆ подꙿ кро́­вомъ тво­и́мъ со­хра­нѧ́­е­ми, на ѻ҆́гнь и҆ сме́рть дер­за́­хꙋ. и҆́хже мл҃тва­ми и҆ на́съ ᲂу҆­крѣ­пѝ, влⷣчце на́ша все­пѣ́­таѧ.

Кон­да́къ, гла́съ г҃:

Дѣ́­темъ не воз­бра­ни́лъ є҆сѝ при­хо­ди́­ти къ тебѣ̀, бг҃о­бл҃же́н­не, пе­кӏ́й­сѧ ѡ҆ на­сꙋ́щ­ныхъ и҆́хъ, и҆ хра́­ми­нꙋ и҆̀мъ со­зда́лъ є҆сѝ, по кон­чи́­нѣ же тво­е́й си́хъ не ѡ҆ста́­вилъ є҆сѝ, ѻ҆́тро­ка бо раз­сла́б­лен­на въ со́н­номъ ви­дѣ́­нїи и҆с­цѣ­ли́въ. сегѡ̀ ра́ди во­пї­е́мъ тѝ: ра́­дꙋй­сѧ, чꙋ­до­дѣ́й­ствен­ни­че і҆ѡ́но пре­сла́в­ный.

І҆́косъ: Къ бг҃ꙋ и҆ лю́­демъ стѧ­жа́въ лю­бо́вь и҆́стин­нꙋю и҆ не­ли­це­мѣ́р­нꙋю, ст҃и́­те­лю, да лю́­би­те дрꙋ́гъ дрꙋ́­га, дѣ́­темъ взы­ва́лъ є҆сѝ, и҆̀мже ѡ҆́бразъ бы́лъ є҆сѝ сло́­вомъ и҆ жи­тї­е́мъ, лю­бо́­вїю, дꙋ́­хомъ, вѣ́­рою и҆ чⷭ҇то­то́ю. сегѡ̀ ра́ди чꙋ­до­тво­рє́­нїѧ мнѡ́­га и҆ зна́­мє­нїѧ бж҃їѧ си́лы вѣ̑р­нымъ ѡ҆ тебѣ̀ ꙗ҆ви́­ша­сѧ, и҆ со без­пло́т­ны­ми ны́нѣ ли­ков­ствꙋ́ѧ, не­ѿ­лꙋ­че́нъ ѿ ча̑дъ сво­и́хъ пре­бы­ва́­е­ши. Ѽ со­при­ча́ст­ни­че ст҃ы́мъ! ѿ бѣ­со́в­скихъ на­си́­лїй сво­и́мъ пред­ста́­тель­ствомъ на́съ ѡ҆гра­дѝ, и҆ къ го́р­нѣй люб­вѝ срⷣца̀ ᲂу҆­ѧз­вѝ, бл҃го­да́р­ствен­нѡ тѧ̀ вос­пѣ­ва́­ю­щихъ: ра́­дꙋй­сѧ, чꙋ­до­дѣ́й­ствен­ни­че і҆ѡ́но пре­сла́в­ный.

Пѣ́снь з҃.

І҆р­мо́съ: Ро­со­да́­тель­нꙋ ѹ҆́бѡ пе́щь со­дѣ́­ла а҆́гг҃лъ прпⷣбнымъ ѻ҆тро­кѡ́мъ, хал­дє́и же ѡ҆па­лѧ́­ю­щее ве­лѣ́­нїе бж҃їе мꙋ­чи́­те­лѧ ᲂу҆­вѣ­ща̀ во­пи́­ти: бл҃го­сло­ве́нъ є҆сѝ, бж҃е ѻ҆҆҆тє́цъ на́­шихъ.

Во́­инъ хрⷭ҇то́въ не­по­бѣ­ди́мь по­ка­за́л­сѧ є҆сѝ, про­ти́­вꙋ без­бо́ж­ныхъ тве́р­дымъ и҆с­по­вѣ́­да­нї­емъ во­ѡ­рꙋ­жи́в­сѧ и҆ ѿстꙋ́пль­шымъ па́­ли­цею сло­ве́съ тво­и́хъ про­ти­вꙋ­ста́въ, вѣн­це́мъ и҆с­по­вѣ́д­ни­ка ѿ гдⷭ҇а ᲂу҆­вѣн­ча́л­сѧ є҆сѝ.

Є҆ди́­на­го на по­тре́­бꙋ ᲂу҆­се́рд­нѡ взы­ска́въ, жи­тїѧ̀ сегѡ̀ сласть­мѝ не пре­льсти́л­сѧ є҆сѝ, тѣ́м­же и҆ по­став­лѧ́­етъ тѧ̀ на свѣ́щ­ни­цѣ а҆р­хї­е­ре́й­ства гдⷭ҇ь, да свѣ­то­на­ста́в­никъ бꙋ́­де­ши лю́­демъ є҆гѡ̀.

Дне́сь, вѣ̑р­наѧ ѻ҆вча́­та хрⷭ҇тѡ́­ва, па́­сты­рѧ до́­бра­го про­слав­лѧ́­емъ, предꙿ ѻ҆вца́­ми сво­и́­ми дер­зно­ве́н­нѡ хо­ди́в­ша­го, и҆ тѣ́хъ по и҆́ме­ни гла­ша́в­ша­го, и҆ ко ѻ҆би́­те­лемъ нбⷭ҇нымъ ди́в­нѡ на­ста́вль­ша­го.

Бг҃о­ро́­ди­ченъ: По­е́мъ тѧ̀, бг҃о­не­вѣ́­сто, мт҃и хрⷭ҇та̀ бг҃а, сла́­вѧ­ще ржⷭ҇тво̀ твоѐ не­по­сти­жи́­мое, и҆́мже и҆з­ба́­ви­хом­сѧ ѿ всѧ́­кїѧ бѣды̀, влⷣчце, и҆ вѣ́р­нѡ во­пї­е́мъ: по­ми́­лꙋй ста́­до твоѐ, є҆ди́­на все­пѣ́­таѧ.

Пѣ́снь и҃.

І҆р­мо́съ: И҆зꙿ пла́­ме­не прпⷣбнымъ ро́сꙋ и҆с­то­чи́лъ є҆сѝ, и҆ првⷣна­гѡ же́р­твꙋ во­до́ю по­па­ли́лъ є҆сѝ: всѧ̑ бо тво­ри́­ши, хрⷭ҇тѐ, то́­кмѡ є҆́же хо­тѣ́­ти. тѧ̀ пре­воз­но́­симъ во всѧ̑ вѣ́ки.

Ра́­до­сти при­сно­сꙋ́щ­ныѧ на­де́­ждею пре­по­ѧ́­сав­сѧ, тер­пѣ́­нї­емъ въ по́­двигъ стра­да́ль­че­скїй вше́лъ є҆сѝ, тѣ́м­же не по­сра­мѝ гдⷭ҇ь ᲂу҆­по­ва́­нїѧ тво­е­гѡ̀, съ ли̑ки ст҃ы́хъ со­че­та́въ тѧ̀, по­ю́­ща­го: бл҃го­сло­ви́­те, всѧ̑ дѣла̀ гдⷭ҇нѧ, гдⷭ҇а, по́й­те и҆ пре­воз­но­си́­те є҆го̀ во вѣ́ки.

Є҆ли́­цы пи­са́­нїй бжⷭ҇твен­ныхъ раз­ꙋ­мѣ́­нїе прї­ѧ́­сте, прї­и­ди́­те, кꙋ́п­нѡ вос­хва­ли́­те тѣ́хъ ска­за́­те­лѧ бг҃о­мꙋ́­дра­го і҆ѡ́нꙋ, во­пї­ю́­ще ᲂу҆­стѡ́мъ є҆гѡ̀ сло́­во по­да́в­ше­мꙋ: бл҃го­сло­ви́­те, всѧ̑ дѣла̀ гдⷭ҇нѧ, гдⷭ҇а, по́й­те и҆ пре­воз­но­си́­те є҆го̀ во вѣ́ки.

Во­и́­стин­нꙋ ни є҆ди́нъ же ѿ ма́­лыхъ си́хъ за­бве́нъ бы́сть ᲂу҆ тебє̀, бл҃же́н­не і҆ѡ́но, ко всѣ̑мъ бо любы̀ твоѧ̀ рас­про­стре́­сѧ, ни́­щымъ и҆ про­сте­цє́мъ, на­и­па́­че же си̑­рымъ и҆ ᲂу҆­бѡ́­гимъ. тѣ́м­же и҆ дне́сь и҆с­то́ч­никъ не­ѡ­скꙋ­дѣ­ва́­ю­щїй сло́­ва бж҃їѧ на́мъ ѿвер­за́­е­ши, взы­ва́­ю­щымъ: бл҃го­сло­ви́­те, всѧ̑ дѣла̀ гдⷭ҇нѧ, гдⷭ҇а, по́й­те и҆ пре­воз­но­си́­те є҆го̀ во вѣ́ки.

Бг҃о­ро́­ди­ченъ: А҆́ще и҆ ѻ҆те́­че­ства зем­на́­гѡ ли­ше́­нїе по­пꙋ­ще́­нї­емъ бж҃ї­имъ прї­и́­де вѣ̑р­нымъ тво­и̑мъ, ѻ҆ба́­че ꙗ҆ви́­ла­сѧ є҆сѝ млⷭ҇ти­ваѧ ᲂу҆­тѣ́­ши­тель­ни­ца и҆̀мъ, въ зна́­ме­нїи ѡ҆б­нов­ле́­нїѧ і҆кѡ́нъ тво­и́хъ, ѿ ни́х­же чꙋ­де­са̀ и҆с­то­чи́­ла є҆сѝ. тѣ́м­же и҆ мы̀ во­пї­е́мъ тѝ: нбⷭ҇на­гѡ ѻ҆те́­че­ства при­ча́ст­ни­ки со­дѣ́­лай на́съ, ꙗ҆́кѡ бл҃га́ѧ вра­та́р­ни­ца є҆сѝ, двє́­ри ра̑й­скїѧ вѣ̑р­нымъ ѿвер­за́­ю­щаѧ.

Пѣ́снь ѳ҃.

І҆р­мо́съ: Бг҃а че­ло­вѣ́­кѡмъ не­воз­мо́ж­но ви́­дѣ­ти, на не­го́­же не смѣ́­ютъ чи́ни а҆́гг҃ль­стїи взи­ра́­ти. то­бо́ю же, все­чⷭ҇таѧ, ꙗ҆ви́­сѧ че­ло­вѣ́­кѡмъ сло́­во во­пло­ще́н­но, є҆го́­же ве­ли­ча́­ю­ще, съ нбⷭ҇ны­ми вѡ́и тѧ̀ ᲂу҆­бл҃жа́­емъ.

Ѻ҆́тче ст҃и́­те­лю і҆ѡ́но! ты̀ кон­чи́­нꙋ свою̀ пред­зрѧ̀, со ᲂу҆­ми­ле́­нї­емъ и҆с­хо́д­ное пѣ́­нїе при­но­си́лъ є҆сѝ влⷣчцѣ, во ᲂу҆­спе́­нїи сво­е́мъ мӏ́ра не ѡ҆ста́вль­шей. тѣ́м­же и҆ на́съ, бѣ́д­ствꙋ­ю­щихъ скорбь­мѝ, не ѡ҆ста́­ви, вѣн­це́мъ ᲂу҆­вѧ́з­сѧ ѿ гдⷭ҇а не­тлѣ́н­нымъ во вѣ́ки.

Сме́р­ти пред­стоѧ̀, кро́­то­стїю и҆ не­ѕло́­бї­емъ всѣ́хъ про­сти́лъ є҆сѝ, ча́­дѡмъ же тво­и̑мъ, лю­бо́вь хрⷭ҇то́­вꙋ про­сти­ра́ѧ, дѣ́ти, да лю́­би­те дрꙋ́гъ дрꙋ́­га, ре́клъ є҆сѝ. тѣ́м­же и҆ на́съ съ вы­со­ты̀ сла́­вы бж҃їѧ бл҃го­сло­вѝ, да въ є҆ди­не́­нїи и҆ люб­вѝ сп҃се́м­сѧ.

И҆́стин­ныѧ сла́­вы взы­скꙋ́ѧ, ѻ҆́тче і҆ѡ́но, тлѣ́н­нꙋю и҆ зем­нꙋ́ю ни­во­что́­же вмѣ­ни́лъ є҆сѝ. тѣ́м­же и҆ на́мъ ко­е­мꙋ́­ждо по­мо­зѝ, рꙋ́цѣ раз­сла́б­лен­нѣи на мл҃твꙋ воз­дѣ́­ти, и҆ ѻ҆́чи дꙋ­ше́в­нѣи горѣ̀ воз­вѣ­стѝ, да грѧ­дꙋ́­ща­го во сла́­вѣ гдⷭ҇а бо́­дрен­нымъ срⷣцемъ ᲂу҆­срѧ́­щемъ, и҆ сла́­вы є҆гѡ̀ при­ча̑ст­ни­цы бꙋ́­демъ.

Бг҃о­ро́­ди­ченъ: Млⷭ҇ти­ва на́мъ сн҃а тво­е­го̀ по­ка­жѝ, пре­бл҃го­сло­ве́н­наѧ мт҃и, въ ча́съ сꙋ́д­ный, вѣ́р­на­го ᲂу҆­го́д­ни­ка тво­е­го̀ і҆ѡ́нꙋ смо­ле́б­ни­ка и҆ за­стꙋ́п­ни­ка те́­пла прї­и́м­ши, да грѧ­дꙋ́­ща­го во сла́­вѣ гдⷭ҇а бо́­дрен­нымъ срⷣцемъ ᲂу҆­срѧ́­щемъ, и҆ сла́­вы є҆гѡ̀ при­ча̑ст­ни­цы бꙋ́­демъ.

Свѣ­ти́­ленъ:

Въ пѣ́­снехъ до­сто́й­ныхъ по­чти́мъ сла́в­на­го і҆е­ра́р­ха хань­ко́­ꙋ­ска­го і҆ѡ́нꙋ, до­бро­дѣ́­тель­ми ᲂу҆­кра­си́в­ша­го­сѧ, ѿ во­сто́­ка да́ль­нѧ­гѡ дне́сь воз­сї­ѧ́в­ша­го, и҆ въ раз­сѣ́­ѧ­нїи сꙋ́­щихъ свѣ́­томъ хрⷭ҇то́­вымъ про­свѣ­ти́в­ша­го.

Сла́­ва, и҆ ны́нѣ, бг҃о­ро́­ди­ченъ:

Ще­дрѡ́­ты твоѧ̑, бж҃е, на лю́ди и҆ ста́­до твоѐ низ­по­слѝ, мл҃тва­ми пре­чⷭ҇тыѧ тво­еѧ̀ мт҃ре и҆ всѣ́хъ ст҃ы́хъ тво­и́хъ, и҆ на́мъ да́­рꙋй ве́­лїю твою̀ млⷭ҇ть.

На хва­ли́­техъ стї­хи̑­ры на д҃, гла́съ а҃:

Въ го­ди́­нꙋ го­не́­нїѧ лю́та и҆́стин­ный хрⷭ҇то́въ слꙋ­жи́­тель по­ка­за́л­сѧ є҆сѝ, є҆ѵⷢ҇ль­ское сло́­во ᲂу҆­твер­жда́ѧ, во́­и­нѡвъ на­зи­да́ѧ и҆ ᲂу҆­тѣ­ша́ѧ, и҆ бл҃го­го­вѣ́й­нѡ гдⷭ҇е­ви при­но­сѧ̀ же́р­твꙋ без­кро́в­нꙋю. тѣ́м­же во­пї­е́мъ тѝ: Ѽ ст҃е і҆ѡ́но, молѝ є҆го̀ ѿ вра̑гъ ви́­ди­мыхъ и҆ не­ви́­ди­мыхъ на́съ и҆з­ба́­ви­ти, и҆ дꙋ­ша́мъ на́­шымъ сп҃се́­нїе ᲂу҆­лꙋ­чи́­ти.

А҆́ще и҆ без­мо́лв­ствꙋ­ютъ го́ры и҆ пꙋ­сты̑­ни, и҆́ми­же, со мно́­ги­ми скорбь­мѝ, про­ше́лъ є҆сѝ въ зе́­млю кита́й­скꙋю и҆но­гда̀, съ чꙋ­до­тво́р­ною і҆кѡ́­ною бг҃о­мт҃ре та­бы́н­скою, но мы̀ тѧ̀ про­слав­лѧ́­емъ, ꙗ҆́кѡ вѣ́ры на́­шеѧ ᲂу҆­твер­жде́­нїе, и҆ пи­са́­нїй бжⷭ҇твен­ныхъ и҆зꙿѧ­сни́­те­лѧ, і҆е­ра́р­хѡвъ по­хва­лꙋ̀ и҆ прпⷣбныхъ ᲂу҆­кра­ше́­нїе, си́­рыхъ за­стꙋ́п­ни­ка и҆ ѡ҆ ни́­щихъ по­пе­чи́­те­лѧ, и҆с­по­вѣ́д­ни­ка крѣ́п­ка­го, и҆ мл҃твен­ни­ка те́­пла­го ѡ҆ дꙋ­ша́хъ на́­шихъ.

И҆с­хо́­ди твоѝ, ѻ҆́тче і҆ѡ́но, и҆с­хо́­ди жи­во­та̀ по­ка­за́­ша­сѧ, се́ бо, въ со́­нїи ле́г­цѣмъ ꙗ҆ви́в­сѧ ѻ҆́тро­кꙋ бо­лѧ́­щꙋ, ѡ҆ пре­бы­ва́­ю­щемъ жи­во­тѣ̀ сви­дѣ́­тель­ство­валъ є҆сѝ: воз­мѝ моѝ но́зѣ, свои́ же по­да́ждь мѝ, ре́клъ є҆сѝ є҆мꙋ̀, и҆ ᲂу҆­ди­вѝ всѧ̑ и҆с­цѣ­ле́­нї­емъ є҆гѡ̀. тѣ́м­же во­пї­е́мъ тѝ: мо­ли́­сѧ ѡ҆ и҆с­цѣ­ле́­нїи дꙋ́шъ на́­шихъ.

Ры­да́­нї­емъ не­ꙋ­тѣ́ш­нымъ воз­дꙋ́хъ ѡ҆гла­си́­сѧ, є҆гда̀ ты̑­сѧ­щи хрⷭ҇то­лю́б­цєвъ гро́­бꙋ тво­е­мꙋ̀ пред­ста́­ша, про­во­жда́­ю­ще нб҃о­вхо́д­ное ше́­ствїе твоѐ, но не ѡ҆ста́­вилъ є҆сѝ си́­рыхъ ча̑дъ тво­и́хъ, мл҃твою тво­е́ю, чꙋ­де­сы̀ и҆ на­став­ле́нь­ми ᲂу҆­тѣ­ша́ѧ, и҆ ᲂу҆­крѣп­лѧ́ѧ дꙋ́шы и҆́хъ во вѣ́ки.

Сла́­ва, гла́съ ѕ҃:

Бл҃гӏ́й и҆ вѣ́р­ный ра́бе, до́­брый дѣ́­ла­те­лю вї­но­гра́­да хрⷭ҇то́­ва, ст҃и́­тель­ство твоѐ во стра­нѣ̀ кита́й­стѣй ди́в­но бы́сть, да́н­ный бо тѝ та­ла́нтъ преꙋ­мно́­жилъ є҆сѝ, и҆ во­и́­стин­нꙋ хрⷭ҇тї­а́н­скїѧ кон­чи́­ны спо­до́­бил­сѧ є҆сѝ, тѣ́м­же и҆ во ѻ҆би́­тє­ли ра̑й­скїѧ а҆́гг҃ли тѧ̀ воз­не­со́­ша. и҆ ны́нѣ ꙗ҆́кѡ вше́­дый въ ра́­дость гдⷭ҇а сво­е­гѡ̀, ᲂу҆­мо­лѝ є҆го̀, сла́в­не і҆ѡ́но, ѡ҆ сп҃се́­нїи дꙋ́шъ на́­шихъ.

И҆ ны́нѣ, бг҃о­ро́­ди­ченъ:

Бцⷣе, ты̀ є҆сѝ лоза̀ и҆́стин­наѧ, воз­ра­сти́в­шаѧ на́мъ пло́дъ жи­во­та̀, тебѣ̀ мо́­лим­сѧ: мо­ли́­сѧ, влⷣчце, со ст҃и́­те­лемъ і҆ѡ́­ною, по­ми́­ло­ва­ти дꙋ́шы на́шѧ.

Сла­во­сло́­вїе ве­ли́­кое. Є҆ктє­нїѝ, и҆ ѿпꙋ́стъ.

На лїтꙋргӏ́и.

Бл҃жє́н­на ѿ ка­нѡ́­на ст҃а́­гѡ, пѣ́снь г҃ и҆ ѕ҃.

Про­кӏ́­менъ, гла́съ з҃: Воз­ве­се­ли́т­сѧ првⷣникъ ѡ҆ гдⷭ҇ѣ, и҆ ᲂу҆­по­ва́­етъ на него̀.

Стӏ́хъ: Оу҆­слы́­ши, бж҃е, гла́съ мо́й, вне­гда̀ мо­ли́­ти ми сѧ къ тебѣ̀.

А҆пⷭ҇лъ ко є҆вре́­ємъ, за­ча́­ло тл҃є.

А҆л­ли­лꙋ́­їа, гла́съ д҃: Сщ҃е́н­ни­цы твоѝ ѡ҆б­ле­кꙋ́т­сѧ въ пра́­вдꙋ, и҆ прпⷣбнїи твоѝ воз­ра́­дꙋ­ют­сѧ.

Стӏ́хъ: По­мѧ­нѝ, гдⷭ҇и, дв҃да и҆ всю̀ кро́­тость є҆гѡ̀.

Є҆ѵⷢ҇лїе ѿ лꙋкѝ, за­ча́­ло к҃д.

При­ча́­стенъ: Въ па́­мѧть вѣ́ч­нꙋю:

Мл҃тва ко ст҃и́­те­лю і҆ѡ́нѣ, є҆пӏ́­ско­пꙋ хань­ко́­ꙋ­ско­мꙋ:

Ѽ пре­бл҃же́н­не і҆ѡ́но, по­дви́ж­ни­че пре­ди́в­ный и҆ ѡ҆ на́съ къ бг҃ꙋ мо­ли́­твен­ни­че не­пре­ста́н­ный! Са́­номъ а҆р­хї­е­ре́й­ства по­чте́нъ бы́въ, ко хрⷭ҇тꙋ̀ ди́в­нꙋю лю­бо́вь по­ка­за́лъ є҆сѝ, и҆ блгⷣтїю є҆гѡ̀ на трꙋ­ды̀ и҆ по́­дви­ги ᲂу҆­крѣ­пи́л­сѧ є҆сѝ, па́­ствѣ же тво­е́й и҆ ѻ҆тро­кѡ́мъ по­слꙋ­жи́лъ є҆сѝ: сегѡ̀ ра́ди, є҆щѐ сы́й на зе­млѝ, ве́­лїе ко ст҃ѣ́й трⷪ҇цѣ дер­зно­вѣ́­нїе и҆мѣ́лъ є҆сѝ. Є҆гда́ же ѡ҆ пред­сто­ѧ́­щей не­ча́­ѧн­нѣй кон­чи́­нѣ вѣ́сть прї­ѧ́лъ є҆сѝ, ко гдⷭ҇ꙋ съ вѣ́­рою и҆ сми­ре́н­ною мл҃твою при­те́клъ є҆сѝ, и҆ во́лю бж҃їю прї­е́м­лѧ, ѻ҆ба́­че ѡ҆ па́­ствѣ тво­е́й скор­бѧ̀, па́че же ѡ҆ дѣ́­техъ, ѡ҆ ни́х­же по­пе­че́­нїе и҆мѣ́­вый, гдⷭ҇а про­си́лъ є҆сѝ не ѡ҆ста́­ви­ти и҆́хъ си́­рыхъ. Ны́нѣ же, при­бѣ­га́­ю­ще къ те́­пло­мꙋ пред­ста́­тель­ствꙋ тво­е­мꙋ̀, при­лѣ́ж­нѡ мо́­лимъ тѧ̀: ѻ҆́комъ бл҃го­се́р­дымъ люб­вѐ тво­еѧ̀ воз­зрѝ на на́съ грѣ́ш­ныхъ, по́­мо­щи тво­еѧ̀ тре́­бꙋ­ю­щихъ: вѣ̑р­ныѧ въ ре́­вно­сти ѡ҆ вѣ́рѣ ст҃ѣ́й под­дер­жѝ: бо­рю́­щы­ѧ­сѧ со страсть­мѝ въ по́­дви­зѣхъ ᲂу҆­крѣ­пѝ: лѣ­ни̑­выѧ ко и҆с­прав­ле́­нїю ско́­рѡ по­дви́г­ни: всѣ̑мъ же на́мъ по за́­по­вѣ­ди хрⷭ҇то́­вой лю­би́­ти дрꙋ́гъ дрꙋ́­га по­мо­зѝ, и҆ по­сѣ­ще́­нїѧ блгⷣти ст҃а́­гѡ дх҃а и҆с­про­сѝ, да всѧ̑ на­став­лє́­нїѧ твоѧ̑ хра­нѧ́­ще, спо­до́­бим­сѧ и҆ мы̀ црⷭ҇твїе хрⷭ҇то́­во на­слѣ́­ди­ти, и҆ кꙋ́п­нѡ съ то­бо́ю сла́­ви­ти, ѻ҆ц҃а̀, и҆ сн҃а, и҆ ст҃а́­го дх҃а, во вѣ́ки вѣ­кѡ́въ. А҆ми́нь.