Мѣ́сѧца ѻ҆ктѡ́врїа въ ѳ҃і-й де́нь, и҆ деке́мврїа въ к҃-й де́нь.

Слꙋ́жба ст҃о́мꙋ првⷣномꙋ ѻ҆тцꙋ̀ на́шемꙋ і҆ѡа́ннꙋ кроншта́дтскомꙋ, чꙋдотво́рцꙋ.

На ма́лѣй вече́рни.

На Гдⷭ҇и, воззва́хъ: стїхи̑ры на д҃, гла́съ в҃:

Ѽкрѣ́посте моѧ̀, і҆и҃се, сн҃е бж҃їй! Ѽ свѣ́те ᲂу҆ма̀ моегѡ̀ и҆ ми́ре и҆ ра́досте срⷣца моегѡ̀, сла́ва тебѣ̀! сла́ва тебѣ̀, и҆зба́вителю ѿ неви́димыхъ вра̑гъ мои́хъ! си́це взыва́лъ є҆сѝ, та́кѡ и҆ на́съ вразꙋмѝ гдⷭ҇а воспѣва́ти всѣ́мъ срⷣцемъ, і҆ѡа́нне првⷣне, слꙋжи́телю хрⷭ҇то́въ.

Хрⷭ҇то́съ вочл҃вѣ́чивсѧ, призва̀ къ покаѧ́нїю разбо́йники и҆ блꙋдни̑цы, и҆ ты̀, па́стырю млⷭ҇рдный, за́повѣдь пастыренача́льника и҆сполнѧ́ѧ, съ мытари̑ ꙗ҆дѧ́ше и҆ со грѣ̑шники бесѣ́доваше, всѧ̑ къ покаѧ́нїю призыва́ѧ и҆ всѧ̑ наꙋча́ѧ моли́тисѧ: бж҃е, млⷭ҇тивъ бꙋ́ди мнѣ̀, грѣ́шномꙋ, бж҃е млⷭ҇тиве, сла́ва тебѣ̀.

Ѡ҆́бразъ бж҃їй є҆сте́ вы, сегѡ̀ ра́ди храни́те вели́кїй ѡ҆́бразъ се́й, ѡ҆́бразъ красоты̀ бж҃їѧ, ѡ҆́бразъ безмѣ́рныѧ любвѐ є҆гѡ̀, да бꙋ́дете ча̑да ѻ҆ц҃а̀ на́шегѡ, и҆́же на нб҃сѣ́хъ, да бꙋ́дете ст҃и, ꙗ҆́коже и҆ ѻ҆ц҃ъ ва́шъ ст҃ъ є҆́сть: та́кѡ, па́стырю бг҃омꙋ́дрый, па́ствꙋ твою̀ ᲂу҆чи́лъ є҆сѝ, та́кѡ и҆ са́мъ ст҃ѡ пожи́лъ є҆сѝ. Сла́ва, гла́съ и҃:

Николи́же ѿпа́даетъ любы̀ твоѧ̀, Ѽ кроншта́дтскїй і҆ѡа́нне млⷭ҇тиве, ты̀ є҆сѝ наде́жда и҆справле́нїѧ жи́зни на́шеѧ, всеѡрꙋ́жїе па́стырства, широта̀ бл҃готворе́нїѧ, і҆ѡа́нне првⷣне, ᲂу҆пова́нїе на́ше.

И҆ ны́нѣ, бг҃оро́диченъ, гла́съ то́йже:

Влⷣчце, прїимѝ мл҃твы ра̑бъ твои́хъ, и҆ и҆зба́ви ны̀ ѿ всѧ́кїѧ нꙋ́жды и҆ печа́ли. И҆лѝ предпра́зднства, гла́съ в҃. Самоподо́бенъ:

До́ме є҆ѵфра́ѳовъ,* гра́де ст҃ы́й,* прⷪ҇ро́кѡвъ сла́во,* ᲂу҆красѝ до́мъ,* въ не́мже бжⷭ҇твенный ражда́етсѧ.

На стїхо́внѣ стїхи̑ры, гла́съ д҃:

Ѿпеле́нъ гдⷭ҇ꙋ присво́илсѧ є҆сѝ, и҆здѣ́тска смы́слъ мꙋ́жа соверше́нна стѧжа́въ и҆ премꙋ́дрости бж҃їи возжелѣ́въ, ве́сь бж҃їѧ ѻ҆би́тель бы́лъ є҆сѝ, ѻ҆́тче на́шъ, і҆ѡа́нне блгⷣтне.

Стӏ́хъ: Расточѝ, дадѐ ᲂу҆бѡ́гимъ, пра́вда є҆гѡ̀ пребыва́етъ во вѣ́къ.

Оу҆мо́мъ, блгⷣтїю ѡ҆сщ҃е́ннымъ, ст҃ѣ́й трⷪ҇цѣ предстоѧ̀, бл҃же́нне і҆ѡа́нне, нбⷭ҇ными зарѧ́ми сꙋ́щыѧ во тьмѣ̀ грѣхо́внѣй просвѣща́лъ є҆сѝ: ѡ҆свѣтѝ и҆ на́съ свѣ́томъ твоегѡ̀ бг҃овѣ́дѣнїѧ.

Стӏ́хъ: Гото́во срⷣце є҆гѡ̀, ᲂу҆пова́ти на гдⷭ҇а.

Непостижи́мый свѣ́тъ почѝ въ тебѣ̀, првⷣный ѻ҆́тче, и҆ свѣщꙋ̀ пресвѣ́тлꙋ поста́ви тѧ̀ гдⷭ҇ь средѝ тьмы̀ грѣхо́вныѧ. тѣ́мже и҆ мы̀ тобо́ю наꙋче́ни, блгⷣтнꙋю па́мѧть твою̀ пое́мъ, і҆ѡа́нне.

Сла́ва, гла́съ ѕ҃:

Сою́зомъ любвѐ а҆пⷭ҇лы твоѧ̑ свѧза́вый, гдⷭ҇и, и҆ ѻ҆тца̀ на́шего і҆ѡа́нна, ꙗ҆́кѡ но́ваго бл҃говѣ́стника любвѐ твоеѧ̀ поста́вивый, ᲂу҆твердѝ и҆ ны́нѣ, сп҃си́телю на́шъ, сою́зъ любвѐ цр҃ко́вныѧ, да совокꙋ́плени пое́мъ тѧ̀ и҆ неизрече́ннꙋю твою̀ бл҃гость. И҆ ны́нѣ, бг҃ородиченъ:

Никто́же, притека́ѧй къ тебѣ̀, посра́мленъ ѿ тебє̀ и҆схо́дитъ, пречⷭ҇таѧ бцⷣе дв҃о, но про́ситъ блгⷣти, и҆ прїе́млетъ дарова́нїе, къ поле́зномꙋ проше́нїю. И҆лѝ предпра́зднства, гла́съ то́йже:

По́йте гдⷭ҇ꙋ, ро́ждшемꙋсѧ ѿ дв҃ы, воспо́йте пѣ́снь, вѡ́инства нбⷭ҇наѧ, земнӏ́и, восплещи́те рꙋка́ми: бг҃ъ бо въ человѣ́цѣхъ, человѣ́къ бг҃ъ воздаѧ́нїемъ: сѐ та́инство соверша́етсѧ на́мъ дне́сь, цр҃ь і҆и҃левъ хрⷭ҇то́съ прихо́дитъ.

Тропа́рь, гла́съ д҃. Творе́нїе кѵ́ръ а҆нтѡ́нїа:

Во хрⷭ҇тѣ̀ во вѣ́ки живы́й чꙋдотво́рче,* любо́вїю ми́лꙋѧй сꙋ́щыѧ въ бѣда́хъ,* ᲂу҆слы́ши ча̑да твоѧ̑, вѣ́рою тѧ̀ призыва́ющыѧ,* ско́рыѧ по́мощи ѿ тебє̀ ча́ющыѧ,* і҆ѡа́нне кроншта́дтскїй, возлю́бленный па́стырю на́шъ.

Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́ное:

И҆лѝ предпра́зднства, гла́съ то́йже:

Гото́висѧ, виѳлее́ме, ѿве́рзисѧ всѣ̑мъ, є҆де́ме, красꙋ́йсѧ, є҆ѵфра́ѳо, ꙗ҆́кѡ дре́во живота̀ въ верте́пѣ процвѣтѐ ѿ дв҃ы: ра́й бо ѻ҆́ноѧ чре́во ꙗ҆ви́сѧ мы́сленный, въ не́мже бжⷭ҇твенный са́дъ, ѿ негѡ́же ꙗ҆́дше, жи́ви бꙋ́демъ, не ꙗ҆́коже а҆да́мъ ѹ҆́мремъ. хрⷭ҇то́съ ражда́етсѧ, пре́жде па́дшїй возста́вити ѡ҆́бразъ.

И҆́нъ тропа́рь, гла́съ и҃. Творе́нїе кѵ́ръ наѳана́ила:

Въ мл҃твахъ бо́дрствꙋѧ, чꙋде́съ дѣ́ланьми трꙋжда́ѧсѧ, ст҃ости стѧжа́лъ є҆сѝ сїѧ́нїе: тѣ́мже моли́сѧ хрⷭ҇тꙋ̀ бг҃ꙋ, ѻ҆́тче і҆ѡа́нне чꙋдотво́рче, просвѣти́ти дꙋ́шы на́шѧ, и҆ сп҃стѝ странꙋ̀ на́шꙋ ѿ ѡ҆бстоѧ́нїѧ лю́тагѡ. Є҆ктенїа̀, и҆ ѿпꙋ́стъ.

На вели́цѣй вече́рни.

Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ: стїхи̑ры ст҃о́мꙋ на и҃,

и҆лѝ предпра́зднства г҃ и҆ ст҃о́мꙋ є҃, гла́съ ѕ҃.

Подо́бенъ: Всѐ ѿло́жше:

Всѧ̑ житє́йскаѧ ѿло́жше,* є҆ди́нѣми ᲂу҆сты̀ восхва́лимъ* чꙋ́днаго свѣти́льника землѝ рѡссӏ́йскїѧ и҆ всеѧ̀ вселе́нныѧ,* па́стырѧ до́блѧго, пресвѵ́тера і҆ѡа́нна,* свѣ́тлый ѡ҆́бразъ жи́зни во хрⷭ҇тѣ̀ на́мъ ꙗ҆́вльшаго,* дꙋ́хомъ мл҃твы на землѝ пламенѣ́вшаго,* да́ръ и҆сцѣле́нїй сꙋгꙋ́бъ ѿ гдⷭ҇а прїѧ́вшаго.* є҆гѡ́же мл҃твами хрⷭ҇то́съ во бл҃гочⷭ҇тїи на́съ да ᲂу҆тверди́тъ,* и҆ ча̑да неколє́блема цр҃кве на́съ ꙗ҆ви́тъ,* во сп҃се́нїе дꙋ́шъ на́шихъ. Два́жды.

Всѣ́мъ срⷣцемъ и҆ ᲂу҆мо́мъ, бл҃же́нне і҆ѡа́нне,* житїѐ во хрⷭ҇тѣ̀ возлюби́лъ є҆сѝ,* всѧ̑ къ бг҃оꙋгожде́нїю и҆ мꙋ́дрствꙋѧ, и҆ дѣ́ѧ,* трꙋды̀ твоѧ̑ бога́тнѡ сщ҃е́нства блгⷣтїю ᲂу҆плодоноси́лъ є҆сѝ,* на ве́чери гдⷭ҇ней, ꙗ҆́кѡ на нб҃сѝ,* восхище́ннымъ дꙋ́хомъ, со ᲂу҆миле́нными слеза́ми,* ѻ҆лтарю̀ гдⷭ҇ню де́нь ѿ днѐ предстоѧ́лъ є҆сѝ.* и҆ ны́нѣ въ вы́шнихъ предстоѧ́й ст҃ѣ́й трⷪ҇цѣ,* мл҃твы вознесѝ,* да мӏ́ръ ᲂу҆мири́тъ и҆ сп҃се́тъ дꙋ́шы на́шѧ.

Пꙋте́мъ трезве́нїѧ дх҃о́внагѡ, бл҃гоговѣ́нїѧ,* та̑инъ бж҃їихъ созерца́нїѧ,* и҆справле́нїѧ дꙋше́внагѡ и҆ поко́ѧ въ бз҃ѣ* черто́га нбⷭ҇нагѡ дости́глъ є҆сѝ.* дѣѧ́ньми млⷭ҇рдїѧ и҆ чꙋде́съ твои́хъ цр҃ковь ᲂу҆краша́етсѧ,* чⷭ҇тото́ю житїѧ̀ твоегѡ̀ нече́стїе посрамлѧ́етсѧ,* словесы̀ твои́хъ писа́нїй вѣ́ра ᲂу҆твержда́етсѧ.* тѣ́мже мо́лимъ тѧ̀, всечⷭ҇тне і҆ѡа́нне:* пꙋтево́ждь на́мъ бꙋ́ди въ на́шихъ ѡ҆бстоѧ́нїихъ,* да тобо́ю наставлѧ́еми и҆ застꙋпа́еми,* црⷭ҇твїѧ нбⷭ҇нагѡ сподо́бимсѧ.

И҆́ны стїхи̑ры, гла́съ и҆ подо́бенъ то́йже:

Всѣ́мъ срⷣцемъ болѣ́знꙋѧ ѡ҆ тьмѣ̀ ꙗ҆зы́кѡвъ,* мы́слилъ є҆сѝ пе́рвѣе и҆тѝ въ востѡ́чныѧ страны̑,* зрѧ́ же па́че ги́блемь бли́зъ сы́й кроншта́дтъ,* повинꙋ́лсѧ є҆сѝ свы́ше зо́вꙋ,* видѣ́нїемъ хра́ма нѣ́когда во снѣ̀,* і҆ѡа́нне првⷣне.* зна́ю, ре́клъ є҆сѝ, сщ҃е́нства высотꙋ̀,* ᲂу҆пова́ю же на бг҃а,* вѣ́мъ бо, ꙗ҆́кѡ то́й є҆́сть крѣ́пость моѧ̀.* Ѽ любвѐ бжⷭ҇твеннаѧ си́ло,* ко хрⷭ҇тꙋ̀ влекꙋ́щаѧ и҆ ᲂу҆твержда́ющаѧ! Два́жды.

Всѣ́хъ вмѣсти́вый въ срⷣцѣ па́стырскомъ,* ѡ҆бѧзꙋ́ѧ стрꙋ́пы нищеты̀,* зва́лъ є҆сѝ ᲂу҆сты̀ твои́ми и҆ писа́ньми* къ созида́нїю жили́ща трꙋдолю́бїѧ,* да прибѣ́жище ѡ҆брѧ́щꙋтъ въ не́мъ ᲂу҆бо́зїи.* Ѽ ᲂу҆чи́телю бл҃ги́хъ ѿ вѣ́ры дѣ́лъ,* Ѽ пита́телю дꙋ́шъ и҆ тѣле́съ ᲂу҆бо́гихъ,* і҆ѡа́нне, ра́досте ѿча́ѧвшихсѧ пре́жде:* попече́нїе ѡ҆ си́хъ здѣ̀ на землѝ* ѡ҆́бразъ бы́сть твоегѡ̀ застꙋпле́нїѧ,* є҆́же ны́нѣ на нб҃сѝ.

Всѣ́мъ ѿве́рстымъ срⷣцемъ и҆ состра́стїѧ и҆спо́лненнымъ* дерзнове́ннꙋю стѧжа́въ мл҃твꙋ,* и҆ по сме́рти не престае́ши сїю̀ сверша́ѧ,* и҆ любо́вїю во вѣ́ки богатѣ́ѧ,* и҆сточа́еши цѣльбы̑ и҆ ᲂу҆тѣшє́нїѧ всегда̀,* і҆ѡа́нне, ра́достный и҆ ско́рый помо́щниче:* возложе́нїемъ рꙋкѝ цѣли́вый,* пре́жде сло́ва вѣ́дый нꙋ̑жды тѧ̀ проси́вшихъ,* ны́нѣ на́мъ неви́димѡ предста́ни,* во хрⷭ҇тѣ̀ жива́го тѧ̀ пою́щымъ,* ча́ющымъ твоеѧ̀ по́мощи и҆ застꙋпле́нїѧ. Сла́ва, гла́съ и҃:

Се́рдцемъ вѣ́ровалъ є҆сѝ въ пра́вдꙋ, сщ҃е́нниче бж҃їй, ᲂу҆сты́ же глаго́лалъ є҆сѝ во сп҃се́нїе: гдⷭ҇ь бытїѐ моѐ, гдⷭ҇ь и҆збавле́нїе ѿ вѣ́чныѧ сме́рти, гдⷭ҇ь вѣ́чный живо́тъ мо́й, гдⷭ҇ь ѡ҆чище́нїе, и҆збавле́нїе и҆ ѡ҆сщ҃е́нїе моѐ, гдⷭ҇ь си́ла въ не́мощи, простра́нство въ тѣснотѣ̀ мое́й, свѣ́тъ во тьмѣ̀, ми́ръ въ смѧте́нїи мое́мъ. сла́ва тебѣ̀, сп҃си́телю мо́й, си́ло всемогꙋ́щаѧ: сла́ва тебѣ̀, сп҃си́телю, си́ло вездѣсꙋ́щаѧ: сла́ва тебѣ̀, ᲂу҆тро́бо пребл҃госе́рдаѧ: сла́ва тебѣ̀, си́ло присноѿверза́ющаѧсѧ къ мл҃твамъ мои̑мъ: сла́ва тебѣ̀, ѻ҆́ко свѣтлѣ́йшее, вы́нꙋ на мѧ̀ зрѧ́щее, и҆ всѧ̑ сокровє́ннаѧ моѧ̑ ви́дѧщее. тѣ́мже, ст҃е і҆ѡа́нне, во слѣ́дъ тебє̀ и҆ мы̀ ко гдⷭ҇ꙋ возопїи́мъ: сла́ва тебѣ̀, бж҃е на́шъ, ди́венъ є҆сѝ во ст҃ы́хъ твои́хъ, ди́венъ є҆сѝ въ наꙋче́нїихъ и҆́хъ, сла́ва тебѣ̀.

И҆ ны́нѣ, бг҃оро́диченъ догма́тїкъ, гла́съ то́йже: Цр҃ь нбⷭ҇ный:

И҆лѝ предпра́зднства, гла́съ то́йже:

Воспрїимѝ, виѳлее́ме, бж҃їю митропо́лїю, свѣ́тъ бо незаходи́мый въ тебѣ̀ роди́тисѧ прихо́дитъ, а҆́гг҃ли, ᲂу҆диви́тесѧ на нб҃сѝ, человѣ́цы, просла́вите на землѝ, волсвѝ, ѿ персӏ́ды пресла́вный да́ръ принеси́те, па́стырїе, свирѧ́юще, трист҃о́е пѣ́нїе сла́дцѣ воспо́йте: всѧ́кое дыха́нїе да хва́литъ вседѣ́телѧ. Вхо́дъ, прокӏ́менъ днѐ, и҆ чтє́нїѧ г҃.

Прⷪ҇ро́чества і҆ѡ́илева чте́нїе:

Та́кѡ гл҃етъ гдⷭ҇ь: ѡ҆брати́тесѧ ко мнѣ̀ всѣ́мъ срⷣцемъ ва́шимъ въ постѣ̀ и҆ въ пла́чи и҆ въ рыда́нїи, и҆ расто́ргните срⷣца̀ ва̑ша, а҆ не ри̑зы ва́шѧ, и҆ ѡ҆брати́тесѧ ко гдⷭ҇ꙋ бг҃ꙋ ва́шемꙋ, ꙗ҆́кѡ млⷭ҇тивъ и҆ ще́дръ є҆́сть, долготерпѣли́въ и҆ многомлⷭ҇тивъ и҆ раскаѧва́ѧйсѧ ѡ҆ ѕло́бахъ. Кто̀ вѣ́сть, ѡ҆брати́тсѧ ли, и҆ раска́етсѧ, и҆ ѡ҆ста́витъ за собо́ю бл҃гослове́нїе и҆ же́ртвꙋ и҆ возлїѧ́нїе гдⷭ҇ꙋ бг҃ꙋ ва́шемꙋ; Вострꙋби́те трꙋбо́ю въ сїѡ́нѣ, ѡ҆свѧти́те по́стъ, проповѣ́дите цѣльбꙋ̀, собери́те лю́ди, ѡ҆ст҃и́те цр҃ковь, и҆збери́те старѣ̑йшины, совокꙋпи́те младе́нцы, ссꙋ́щыѧ сосцы̀: да и҆зы́детъ жени́хъ ѿ ло́жа своегѡ̀, и҆ невѣ́ста ѿ черто́га своегѡ̀. Междꙋ̀ степе́ньми же́ртвенника воспла́чꙋтсѧ жерцы̀, слꙋжа́щїи гдⷭ҇ꙋ, и҆ рекꙋ́тъ: пощадѝ, гдⷭ҇и, лю́ди твоѧ̑, и҆ не да́ждь достоѧ́нїѧ твоегѡ̀ на ᲂу҆кори́знꙋ, да не ѡ҆блада́ютъ и҆́ми ꙗ҆зы́цы, да не рекꙋ́тъ во ꙗ҆зы́цѣхъ: гдѣ̀ є҆́сть бг҃ъ и҆́хъ; И҆ возревнова̀ гдⷭ҇ь ѡ҆ землѝ свое́й, и҆ пощадѣ̀ лю́ди своѧ̑. И҆ ѿвѣща̀ гдⷭ҇ь лю́демъ свои̑мъ, и҆ речѐ: сѐ, а҆́зъ ва́мъ послю̀ пшени́цꙋ и҆ вїно̀ и҆ ма́сло древѧ́ное, и҆ насы́титесѧ и҆́хъ, и҆ не да́мъ ва́съ къ семꙋ̀ на порꙋга́нїе во ꙗ҆зы́цѣхъ: и҆ сꙋ́щаго ѿ сѣ́вера ѿженꙋ̀ ѿ ва́съ, и҆ ѿри́нꙋ є҆го̀ на зе́млю безво́днꙋю, и҆ погꙋблю̀ лицѐ є҆гѡ̀ въ мо́ри пе́рвѣмъ и҆ за̑днѧѧ є҆гѡ̀ въ мо́ри послѣ́днемъ, и҆ взы́детъ гни́лость є҆гѡ̀, и҆ взы́детъ смра́дъ є҆гѡ̀, ꙗ҆́кѡ возвели́чи дѣла̀ своѧ̑. Дерза́й, землѐ, ра́дꙋйсѧ и҆ весели́сѧ, ꙗ҆́кѡ возвели́чи гдⷭ҇ь, є҆́же сотвори́ти. Дерза́йте, ско́ти польстӏ́и, ꙗ҆́кѡ прозѧ́бнꙋша полѧ̀ пꙋсты́ни, ꙗ҆́кѡ дре́во принесѐ пло́дъ сво́й, вїногра́дъ и҆ смѡ́кви да́ша си́лꙋ свою̀. И҆ ча̑да сїѡ́нѧ, ра́дꙋйтесѧ и҆ весели́тесѧ ѡ҆ гдⷭ҇ѣ бз҃ѣ ва́шемъ, ꙗ҆́кѡ дадѐ ва́мъ пи́щꙋ въ пра́вдꙋ, и҆ ѡ҆дожди́тъ ва́мъ до́ждь ра́ннїй и҆ по́здный, ꙗ҆́коже и҆ пре́жде: и҆ напо́лнѧтсѧ гꙋ́мна ва̑ша пшени́цы, и҆ преизлїю́тсѧ точи̑ла вїно́мъ и҆ є҆ле́емъ. И҆ возда́мъ ва́мъ вмѣ́стѡ лѣ́тъ, въ нѧ́же поѧдо́ша прꙋ́зи и҆ мши́ца, и҆ си́плеве и҆ гꙋ́сєницы, си́ла моѧ̀ вели́каѧ, ю҆́же посла́хъ на вы̀: и҆ снѣ́сте ꙗ҆дꙋ́ще, и҆ насы́титесѧ, и҆ похвали́те и҆́мѧ гдⷭ҇а бг҃а ва́шегѡ, ꙗ҆̀же сотворѝ съ ва́ми чꙋдеса̀: и҆ не посра́мѧтсѧ лю́дїе моѝ во вѣ́къ.

Прⷪ҇ро́чества і҆ѡ́илева чте́нїе:

Та́кѡ гл҃етъ гдⷭ҇ь: ᲂу҆вѣ́дите, ꙗ҆́кѡ посредѣ̀ і҆и҃лѧ а҆́зъ є҆́смь, и҆ а҆́зъ гдⷭ҇ь бг҃ъ ва́шъ, и҆ нѣ́сть и҆но́гѡ ра́звѣ менє̀: и҆ не посра́мѧтсѧ ктомꙋ̀ лю́дїе моѝ во вѣ́къ. И҆ бꙋ́детъ по си́хъ, и҆ и҆злїю̀ ѿ дх҃а моегѡ̀ на всѧ́кꙋ пло́ть, и҆ прорекꙋ́тъ сы́нове ва́ши и҆ дщє́ри ва́шѧ, и҆ ста́рцы ва́ши сѡ́нїѧ ѹ҆́зрѧтъ, и҆ ю҆́нѡты ва́ши видѣ̑нїѧ ᲂу҆ви́дѧтъ: и҆́бо на рабы̑ моѧ̑ и҆ на рабы̑ни моѧ̑ во дни̑ ѻ҆́ны и҆злїю̀ ѿ дх҃а моегѡ̀: и҆ да́мъ чꙋдеса̀ на небесѝ и҆ на землѝ, кро́вь и҆ ѻ҆́гнь и҆ кꙋре́нїе ды́ма: со́лнце ѡ҆брати́тсѧ во тьмꙋ̀, и҆ лꙋна̀ въ кро́вь, пре́жде не́же прїитѝ дню̀ гдⷭ҇ню вели́комꙋ и҆ просвѣще́нномꙋ: и҆ бꙋ́детъ, всѧ́къ, и҆́же призове́тъ и҆́мѧ гдⷭ҇не, сп҃се́тсѧ.

Собо́рнагѡ посла́нїѧ і҆ѡа́ннова чте́нїе:

Возлю́бленнїи, а҆́ще кто̀ рече́тъ, ꙗ҆́кѡ люблю̀ бг҃а, а҆ бра́та своего̀ ненави́дитъ, ло́жъ є҆́сть: и҆́бо не любѧ́й бра́та своегѡ̀, є҆го́же ви́дѣ, бг҃а, є҆гѡ́же не ви́дѣ, ка́кѡ мо́жетъ люби́ти; И҆ сїю̀ за́повѣдь и҆́мамы ѿ негѡ̀, да любѧ́й бг҃а, лю́битъ и҆ бра́та своего̀. Всѧ́къ вѣ́рꙋѧй, ꙗ҆́кѡ і҆и҃съ є҆́сть хрⷭ҇то́съ, ѿ бг҃а рожде́нъ є҆́сть: и҆ всѧ́къ любѧ́й ро́ждшаго, лю́битъ и҆ рожде́ннаго ѿ негѡ̀. Ѡ҆ се́мъ вѣ́мы, ꙗ҆́кѡ лю́бимъ ча̑да бж҃їѧ, є҆гда̀ бг҃а лю́бимъ, и҆ за́пѡвѣди є҆гѡ̀ соблюда́емъ. Сїѧ́ бо є҆́сть любы̀ бж҃їѧ, да за́пѡвѣди є҆гѡ̀ соблюда́емъ: и҆ за́пѡвѣди є҆гѡ̀ тѧ̑жки не сꙋ́ть. Ꙗ҆́кѡ всѧ́къ рожде́нный ѿ бг҃а побѣжда́етъ мӏ́ръ: и҆ сїѧ̀ є҆́сть побѣ́да, побѣ́ждшаѧ мӏ́ръ, вѣ́ра на́ша. Кто̀ є҆́сть побѣжда́ѧй мӏ́ръ; то́кмѡ вѣ́рꙋѧй, ꙗ҆́кѡ і҆и҃съ є҆́сть сн҃ъ бж҃їй.

На лїтӏ́и стїхи́ра хра́ма, и҆ ст҃а́гѡ, гла́съ в҃:

Ѽкрѣ́посте моѧ̀, і҆и҃се, сн҃е бж҃їй! Ѽ свѣ́те ᲂу҆ма̀ моегѡ̀ и҆ ми́ре и҆ ра́досте срⷣца моегѡ̀, сла́ва тебѣ̀! сла́ва тебѣ̀, и҆зба́вителю ѿ неви́димыхъ вра̑гъ мои́хъ! си́це взыва́лъ є҆сѝ, та́кѡ и҆ на́съ вразꙋмѝ воспѣ́ти всѣ́мъ срⷣцемъ, і҆ѡа́нне првⷣне, слꙋ́жи́телю хрⷭ҇то́въ.

Хрⷭ҇то́съ вочл҃вѣ́чивсѧ, призва̀ къ покаѧ́нїю разбо́йники и҆ блꙋдни̑цы, и҆ ты̀, па́стырю млⷭ҇рдный, за́повѣдь пастыренача́льника и҆сполнѧ́ѧ, съ мытари̑ ꙗ҆дѧ́ше и҆ со грѣ̑шники бесѣ́доваше, всѧ̑ къ покаѧ́нїю призыва́ѧ и҆ всѧ̑ наꙋча́ѧ моли́тисѧ: бж҃е, млⷭ҇тивъ бꙋ́ди мнѣ̀, грѣ́шномꙋ, бж҃е млⷭ҇тиве, сла́ва тебѣ̀.

Ѡ҆́бразъ бж҃їй є҆стѐ вы̀, сегѡ̀ ра́ди храни́те вели́кїй ѡ҆́бразъ се́й, ѡ҆́бразъ красоты̀ бж҃їѧ, ѡ҆́бразъ безмѣ́рныѧ любвѐ є҆гѡ̀, да бꙋ́дете ча̑да ѻ҆ц҃а̀ на́шегѡ, и҆́же на нб҃сѣ́хъ, да бꙋ́дете ст҃и, ꙗ҆́коже и҆ ѻ҆ц҃ъ ва́шъ ст҃ъ є҆́сть: та́кѡ, па́стырю бг҃омꙋ́дрый, па́ствꙋ твою̀ ᲂу҆чи́лъ є҆сѝ, та́кѡ и҆ са́мъ ст҃ѡ пожи́лъ є҆сѝ.

Сла́ва, гла́съ а҃:

Молѧ́щесѧ, дх҃омъ ст҃ы́мъ мо́лимсѧ, сегѡ̀ ра́ди всѧ̑ мл҃твы цр҃кѡ́вныѧ дыха́нїе дх҃а ст҃а́гѡ сꙋ́ть, и҆ всѝ хрⷭ҇тїа́не рожде́нїе є҆гѡ̀ є҆смы̀. прїидѝ ᲂу҆̀бо и҆ всели́сѧ въ ны̀, дш҃е ст҃ы́й, поми́лꙋй и҆ сози́жди всѧ̑ ны̀, да бꙋ́демъ є҆ди́но тѣ́ло хрⷭ҇то́во. такова̀ бы́сть непреста́ннаѧ мл҃тва твоѧ̀, преди́вный і҆ѡа́нне, ѻ҆́тче на́шъ, и҆ послꙋ́ша тѧ̀ бг҃ъ, и҆ пома́за тѧ̀ є҆ле́емъ ра́дости вѣ́чныѧ.

И҆ ны́нѣ, бг҃оро́диченъ, гла́съ то́йже:

Оу҆́тро свѣтоза́рное свѣ́та невече́рнѧгѡ зри́мъ тѧ̀, дв҃о: и҆зꙿ тебє́ бо произы́де, и҆́же тьмꙋ̀ грѣхо́внꙋю разгна̀, дх҃а теплото́ю срⷣца̀ ѡ҆живи́въ. того̀ прилѣ́жнѡ молѧ́щи не преста́й ѡ҆ на́съ, тебѣ̀ мо́лимсѧ, и҆̀же и҆́стиннꙋю бцⷣꙋ и҆сповѣ́дающїи тѧ̀. И҆лѝ предпра́зднства, гла́съ то́йже:

Прїими́те, ꙗ҆́сли, є҆го́же въ кꙋпинѣ̀ мѡѷсе́й законополо́жникъ прови́дѣ въ хори́вѣ, ны́нѣ ражда́ема ѿ дв҃ы дх҃омъ бжⷭ҇твеннымъ. та̀ є҆́сть, ꙗ҆́же въ зако́нѣ рече́ннаѧ: та̀ є҆́сть прⷪ҇ро́ческаѧ печа́ть, ꙗ҆́же бг҃а пло́тїю тлѣ̑ннымъ ꙗ҆влѧ́ющи, є҆мꙋ́же поклони́мсѧ.

На стїхо́внѣ стїхи̑ры, гла́съ ѕ҃:

Ѻтче і҆ѡа́нне пребл҃же́нне, всѣ́хъ ст҃ы́хъ подража́тель бы́въ, ст҃ꙋ́ю вѣ́рꙋ патрїа́рхѡвъ стѧжа́лъ є҆сѝ, прⷪ҇ро́кѡвъ и҆ а҆пⷭ҇лѡвъ ре́вность, ст҃и́телей же прпⷣбїе и҆ бг҃омы́слїе, и҆сповѣ́дникѡвъ дерзнове́нїе, безсре́бренникѡвъ безме́зднꙋю по́мощь, прпⷣбныхъ подви́жникѡвъ непреста́ннꙋю мл҃твꙋ: сегѡ̀ ра́ди ст҃ꙋ́ю твою̀ па́мѧть свѣ́тлѡ пра́зднꙋемъ.

Стӏ́хъ: Расточѝ, дадѐ ᲂу҆бѡ́гимъ, пра́вда є҆гѡ̀ пребыва́етъ во вѣ́къ.

Ѻ҆́тче на́шъ і҆ѡа́нне бг҃омꙋ́дре, стра́хомъ наче́нъ бж҃їимъ, высоты̑ премꙋ́дрости разꙋмѣ́лъ є҆сѝ: любо́вїю же хрⷭ҇тꙋ̀ сраспѧ́всѧ, и҆ сво́йственнѣйшїй є҆мꙋ̀ бы́въ, послѣдѝ стра́хъ любо́вїю и҆згна́лъ є҆сѝ, и҆́мать бо мꙋ́кꙋ стра́хъ, ꙗ҆́коже а҆пⷭ҇лъ любвѐ наꙋчи́лъ є҆́сть на́съ: тѣ́мже, ѻ҆́тче, вѣ́рныхъ ᲂу҆краша́лъ є҆сѝ ра́зꙋмы, и҆ бг҃а люби́ти ста́до твоѐ наꙋчи́лъ є҆сѝ. Ѽ і҆ѡа́нне, хрⷭ҇та̀ бг҃а молѝ дарова́ти и҆ на́мъ блгⷣть сїю̀ и҆ ве́лїю млⷭ҇ть.

Стӏ́хъ: Гото́во срⷣце є҆гѡ̀, ᲂу҆пова́ти на гдⷭ҇а.

Гдⷭ҇ь си́ла срⷣца моегѡ̀, гдⷭ҇ь свѣ́тъ ᲂу҆ма̀ моегѡ̀, гдⷭ҇ь поко́й мо́й и҆ ра́дость моѧ̀, моѧ̀ вѣ́ра, наде́жда и҆ любы̀, се́й є҆́сть пи́ща моѧ̀ и҆ питїѐ моѐ, ѻ҆де́жда моѧ̀ и҆ покро́въ: вразꙋмѝ ᲂу҆̀бо и҆ на́съ, ѻ҆́тче ст҃ы́й, сїѧ̑ словеса̀ твоѧ̑ разꙋмѣ́ти, и҆ въ гдⷭ҇ѣ полага́ти сп҃се́нїе на́ше, пода́ждь на́мъ ѿ бл҃госты́ни твоеѧ̀, ꙗ҆́коже и҆лїа̀ є҆лїсе́еви, да бꙋ́детъ въ гдⷭ҇ѣ всѧ̀ на́ша наде́жда и҆ ᲂу҆твержде́нїе. Сла́ва, гла́съ и҃:

Не ѻ҆тцы̀ на́ши возвѣсти́ша на́мъ, нижѐ ста́рцы повѣ́даша на́мъ, са́ми бо ви́дѣхомъ тобо́ю быва́ємаѧ чꙋдеса̀, са́ми и҆спыта́хомъ блгⷣть ѿ тебє̀ и҆злива́емꙋю. бли́жнїи на́ши и҆сцѣлѧ́хꙋсѧ, при кончи́нѣ сꙋ́щїи здра́ви ѿ ѻ҆дра̀ возстава́хꙋ, всѧ̑каѧ прошє́нїѧ на̑ша мл҃твою твое́ю и҆сполнѧ́хꙋсѧ. тѣ́мже почита́емъ тѧ̀, ꙗ҆́кѡ ᲂу҆го́дника бж҃їѧ и҆ предста́телѧ за на́съ предꙿ гдⷭ҇емъ. И҆ ны́нѣ, бг҃оро́диченъ, гла́съ то́йже:

Па́че всѣ́хъ тва́рей возвы́силасѧ є҆сѝ, бцⷣе дв҃о, занѐ и҆збра́ тѧ въ жили́ще себѣ̀ и҆́же въ вы́шнихъ живы́й, да возведе́тъ па́дшее є҆стество̀ на́ше. тѣ́мъ тѝ припа́даемъ, ꙗ҆́кѡ къ мт҃ри сп҃са на́шегѡ: ты̀ є҆сѝ на́ша наде́жда, ты̀ є҆сѝ на́ше ᲂу҆пова́нїе, не ѿри́ни на́съ, и҆́щꙋщихъ твоеѧ̀ по́мощи.

И҆лѝ предпра́зднства, гла́съ то́йже:

Гдⷭ҇и, въ виѳлее́мъ прише́дъ, въ верте́пъ всели́лсѧ є҆сѝ: нб҃о прⷭ҇то́лъ и҆мѣ́ѧ, въ ꙗ҆́слехъ восклони́лсѧ є҆сѝ: є҆го́же вѡ́инства ѡ҆крꙋжа́ютъ а҆́гг҃лъ, па́стырємъ снизше́лъ є҆сѝ: да сп҃се́ши, ꙗ҆́кѡ бл҃гоꙋтро́бенъ, ро́дъ на́шъ, сла́ва тебѣ̀.

А҆́ще бдѣ́нїе соверша́етсѧ: тропа́рь ст҃а́гѡ, пи́санъ на ма́лѣй вече́рни, два́жды, и҆ Бцⷣе, дв҃о:

є҆ди́ножды. А҆́ще предпра́зднство: тропа́рь ст҃а́гѡ, два́жды, и҆ предпра́зднства є҆ди́ножды.

На ѹ҆́трени.

На Бг҃ъ гдⷭ҇ь: тропа́рь ст҃а́гѡ, два́жды. Сла́ва, и҆ ны́нѣ, бг҃оро́диченъ, и҆лѝ предпра́зднства:

Гото́висѧ, виѳлее́ме: два́жды. Сла́ва, ст҃а́гѡ. И҆ ны́нѣ, предпра́зднства.

По а҃-мъ стїхосло́вїи сѣда́ленъ, гла́съ д҃:

Не презрѣ́лъ є҆сѝ, ѻ҆́тче і҆ѡа́нне, ни стра́нна, ни прише́льца, но всѣ̑мъ бы́лъ є҆сѝ бл҃гъ и҆ млⷭ҇тивъ и҆ ще́дръ, сиро́тъ ѻ҆тє́цъ и҆ вдова́мъ защи́та, наги́хъ ѡ҆дѣѧ́нїе и҆ а҆́лчꙋщихъ пи́ща. помѧнѝ и҆ на́съ, ᲂу҆бо́гихъ ча́дъ твои́хъ, и҆ не ѿри́ни ѿ блгⷣтныѧ любвѐ твоеѧ̀. Два́жды.

Сла́ва, и҆ ны́нѣ, бг҃оро́диченъ, гла́съ то́йже. Самоподо́бенъ:

Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́меннѣмъ зача́тїи твое́мъ, бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆аро́новъ прозѧ́бшїй, и҆ свидѣ́тельствꙋѧ ѡ҆брꙋ́чникъ тво́й и҆ храни́тель, сщ҃е́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃а пребыва́етъ.

И҆лѝ предпра́зднства, гла́съ а҃:

Приклони́вый нб҃са̀, и҆ въ дв҃ꙋ всели́выйсѧ, происхо́дитъ пло́тїю въ виѳлее́мстѣмъ верте́пѣ роди́тисѧ, ꙗ҆́коже писа́сѧ, ви́дѣтисѧ же млⷣнецъ, младе́нцы ѡ҆живлѧ́ѧй во ᲂу҆тро́бѣ. сего̀ ра́дꙋющесѧ ны́нѣ срѧ́щемъ всѝ срⷣца пра́востїю.

По в҃-мъ стїхосло́вїи сѣда́ленъ, гла́съ є҃:

Бжⷭ҇твенною си́лою ᲂу҆крѣплѧ́емь, побѣди́лъ є҆сѝ неви́димыхъ врагѡ́въ и҆скꙋшє́нїѧ, и҆ къ свѣ́тꙋ невече́рнемꙋ преста́вилсѧ є҆сѝ. ᲂу҆врачꙋ́й и҆ дꙋ́шъ на́шихъ стра̑сти, и҆ совѣ́томъ твои́мъ наста́ви ны̀, ты́ бо вра́чь и҆ ᲂу҆тѣ́шитель всѣ̑мъ ѿ бг҃а да́нъ бы́лъ є҆сѝ, і҆ѡа́нне ѻ҆́тче на́шъ. Два́жды.Сла́ва, и҆ ны́нѣ, бг҃оро́диченъ, гла́съ то́йже:

Неискꙋсобра́чнаѧ невѣ́сто, бг҃ороди́тельнице, ꙗ҆́же є҆́ѵинꙋ печа́ль радостотвори́вшаѧ, воспѣва́емъ тѧ̀, вѣ́рнїи, и҆ покланѧ́емсѧ тебѣ̀, ꙗ҆́кѡ и҆зба́вила є҆сѝ на́съ ѿ дре́внїѧ клѧ́твы: и҆ ны́нѣ моли́сѧ за ны̀ непреста́ннѡ, всепѣ́таѧ, во є҆́же сп҃сти́сѧ на́мъ.

И҆лѝ предпра́зднства, гла́съ д҃:

Ра́дꙋйсѧ, сїѡ́не, виѳлее́ме, ᲂу҆краси́сѧ: всѣ́хъ содержи́тель, ѕвѣздꙋ̀ предпосла́въ, возвѣстѝ безмѣ́рное своѐ схожде́нїе: є҆го́же трепе́щꙋтъ нбⷭ҇ныѧ си̑лы, вои́стиннꙋ ражда́етсѧ ѿ дв҃ы непрело́жнѡ є҆ди́нъ чл҃вѣколю́бецъ. Полѷеле́й, и҆ велича́нїе:

Велича́емъ тѧ̀, ст҃ы́й првⷣный ѻ҆́тче і҆ѡа́нне, и҆ чти́мъ ст҃ꙋ́ю па́мѧть твою̀, ты́ бо мо́лиши за на́съ хрⷭ҇та̀ бг҃а на́шего. Ѱало́мъ и҆збра́нный:

Бл҃же́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

По полѷеле́и сѣда́ленъ, гла́съ и҃:

Сло́ва бж҃їѧ пла́менный слꙋжи́тель, і҆ѡа́нне бг҃одх҃нове́нне, и҆ вмѣсти́лище вѣ́ры хрⷭ҇то́вы ты̀ бы́лъ є҆сѝ, сегѡ̀ ра́ди гдⷭ҇ь, ꙗ҆́коже но́ваго а҆враа́ма, ѻ҆тца̀ мно́гихъ поста́ви тѧ̀. молѝ ᲂу҆̀бо, ѻ҆́тче ст҃ы́й, є҆́же всѣ̑мъ на́мъ ча́дѡмъ бж҃їимъ бы́ти, и҆ дꙋша́мъ на́шымъ сп҃сти́сѧ. Два́жды.

Сла́ва, и҆ ны́нѣ, бг҃оро́диченъ:

Нбⷭ҇нꙋю две́рь, и҆ кївѡ́тъ, всест҃ꙋ́ю го́рꙋ, свѣтоза́рный ѻ҆́блакъ нарица́емъ тѧ̀, дв҃о, и҆ нбⷭ҇нꙋю лѣ́ствицꙋ, слове́сный ра́й, є҆́ѵино и҆збавле́нїе, вселе́нныѧ всеѧ̀ вели́кое сокро́вище, ꙗ҆́кѡ сп҃се́нїе въ тебѣ̀ содѣ́ласѧ мӏ́рови, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ тѝ: молѝ сн҃а твоего̀ и҆ бг҃а, прегрѣше́нїй ѡ҆ставле́нїе дарова́ти, бл҃гочⷭ҇тнѡ покланѧ́ющымсѧ прест҃о́мꙋ ржⷭ҇твꙋ̀ твоемꙋ̀.

И҆лѝ предпра́зднства, гла́съ ѕ҃. Подо́бенъ: А҆́гг҃льскїѧ си̑лы:

Свирѣ́лей па́стырскихъ преставлѧ́юще пѣ̑сни, во́инство а҆́гг҃льское возгласѝ, къ ни́мъ глаго́лѧ: преста́ните свирѧ́юще, и҆̀же надꙿ чреда́ми пасо́мыхъ старѣ̑йшины, возопӏ́йте пою́ще: ꙗ҆́кѡ роди́сѧ хрⷭ҇то́съ гдⷭ҇ь, бл҃говоли́вый сп҃стѝ, ꙗ҆́кѡ бг҃ъ, ро́дъ человѣ́ческїй.

Та́же степє́нна, а҃-й а҆нтїфѡ́нъ д҃-гѡ гла́са.

Прокӏ́менъ, гла́съ д҃: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ. Стӏ́хъ: Помѧнѝ, гдⷭ҇и, дв҃да и҆ всю̀ кро́тость є҆гѡ̀.

Є҆ѵⷢ҇лїе ѿ лꙋкѝ, зача́ло к҃҃д: Во вре́мѧ ѻ҆́но, ста̀ і҆и҃съ на мѣ́стѣ ра́внѣ:

По н҃-мъ ѱалмѣ̀: Мл҃твами ст҃а́гѡ првⷣнагѡ і҆ѡа́нна:

Та́же стїхи́ра, гла́съ ѕ҃:

Агг҃ле земны́й, дрꙋ́же человѣ́кѡвъ, ѻ҆рга́не ᲂу҆тѣ́шителѧ дх҃а, носи́телю любвѐ хрⷭ҇то́вы, печа́льниче ѡ҆ все́мъ мӏ́рѣ и҆ ᲂу҆ста̀ всѣ́хъ вѣ́рныхъ, ᲂу҆тѣше́нїе печа́льныхъ и҆ скорбѧ́щихъ, застꙋ́пниче гони́мыхъ, врачꙋ̀ дꙋ́шъ и҆ тѣле́съ, ѻ҆́тче и҆ мл҃твенниче, ст҃ы́й првⷣный і҆ѡа́нне, прїидѝ и҆ ста́ни съ на́ми, да вознесе́мъ вкꙋ́пѣ съ тобо́ю хвалꙋ̀ и҆ бл҃годаре́нїе сп҃си́телю бг҃ꙋ, сла́вное соверша́ѧ сїѐ торжество̀.

Канѡ́нъ бцⷣы и҆лѝ предпра́зднства со і҆рмосо́мъ на ѕ҃, и҆ ст҃а́гѡ на и҃,

є҆гѡ́же краегране́сїе: Моѧ̀ жи́знь во хрⷭ҇тѣ̀, є҆мꙋ́же пою̀ во всѧ̑ вѣ̑ки.

Гла́съ д҃. Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.

Припѣ́въ: Ст҃ы́й првⷣный і҆ѡа́нне, молѝ бг҃а ѡ҆ на́съ.

Моѧ̑ чꙋ̑вства и҆ ѹ҆́мъ ᲂу҆твердѝ, сп҃си́телю мо́й, да возмогꙋ̀ досто́йнѣ воспѣ́ти моли̑твы и҆ по́двиги возлю́бльшагѡ тѧ̀, и҆ тобо́ю возлю́бленнагѡ, слꙋжи́телѧ твоегѡ̀, ѻ҆тца̀ на́шегѡ і҆ѡа́нна.

Ѿ ю҆́ности первозва́нномꙋ а҆пⷭ҇лꙋ во ст҃ѣ́мъ хра́мѣ є҆гѡ̀ пѣ́ти предꙿизбра́нный, свѣ́тлостїю крⷭ҇та̀ ѡ҆зарѧ́емь, грѣхо́вныѧ мглы̀ и҆збѣ́глъ є҆сѝ, сп҃си́телю бг҃ꙋ мл҃твы и҆ пѣ́нїе возносѧ̀ непреста́ннѡ, бл҃же́нне.

Ꙗ҆́коже и҆лїа̀ колесни́цею ѻ҆́гненною, та́кѡ и҆ ты̀ колесни́цею добродѣ́телей на нб҃о возше́лъ є҆сѝ. ѿѻнꙋ́дꙋже низпосла́ти и҆ на́мъ житїѧ̀ и҆справле́нїе гдⷭ҇а ᲂу҆молѝ.

Бг҃оро́диченъ: Жи́знь вѣ́чнꙋю тобо́ю, бцⷣе дв҃о, прїѧ́хомъ, и҆̀же жи́зни ра́йскїѧ нѣ́когда лиши́вшїисѧ, занѐ родила̀ є҆сѝ є҆ди́наго безнача́льнаго и҆ всѧ̑ ѡ҆животворѧ́ющаго.

Катава́сїа: Ѿве́рзꙋ ᲂу҆ста̀ моѧ̑: и҆лѝ: Хрⷭ҇то́съ ражда́етсѧ:Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

И҆ нра́вомъ прича́стникъ, и҆ житїе́мъ подража́тель а҆пⷭ҇лѡмъ бы́въ, бг҃одх҃нове́нне, сло́во и҆́стины до конца̀ и҆спра́вилъ є҆сѝ.

Зри́тельно црⷭ҇твїѧ нбⷭ҇нагѡ бѣ̀ дꙋше́вное ѻ҆́ко твоѐ, поне́же чⷭ҇то бы́сть, сегѡ̀ ра́ди житїѐ свѣ́тлѣ ᲂу҆пра́вилъ є҆сѝ, є҆́же чтꙋ́ще ѡ҆ бз҃ѣ, тѧ̀ прославлѧ́емъ.

Не трꙋдѧ́йсѧ да не ꙗ҆́стъ, словеса̀ а҆пⷭ҇ла бра́тїи твое́й вѣща́лъ є҆сѝ, тѣ́мже и҆ до́мъ трꙋдолю́бїѧ ᲂу҆бо́гихъ ра́ди воздви́глъ є҆сѝ, въ не́мже ни́щїи и҆ немощнӏ́и возмо́гꙋтъ ᲂу҆довле́ни бы́ти, пита́ющесѧ ѿ дѣ́лъ рꙋ́къ свои́хъ.

Бг҃оро́диченъ: Всѧ̀ свѣ́тъ є҆сѝ, влⷣчце, всѧ̀ ст҃ы́нѧ, всѧ̀ бл҃гость, всѧ̀ премꙋ́дрость, всѧ̑ мо́жеши, ꙗ҆́кѡ мт҃и всемогꙋ́щагѡ, є҆ди́на и҆ та́ же всесоверше́нна, ꙗ҆́кѡ мт҃и всесоверше́ннагѡ цр҃ѧ̀ сла́вы.

Конда́къ предпра́зднства и҆ і҆́косъ.

Сѣда́ленъ, гла́съ и҃:

Пла́чь мно́зѣхъ ѡ҆ грѣсѣ́хъ къ прⷭ҇то́лꙋ вы́шнемꙋ возносѧ̀, небе́съ приклоне́нїе во ст҃ѣ́й лїтꙋргӏ́и дꙋ́хомъ созерца́ѧ, дѣѧ́нїе и҆ проповѣ́данїе неразры̑вна и҆мы́й, твои́ми дѣ́лы и҆ чꙋдесы̀ вели́кихъ ѻ҆тцє́въ наслѣ́дникъ досто́йный ꙗ҆ви́лсѧ є҆сѝ, і҆ѡа́нне бл҃же́нне, мӏ́рꙋ кроншта́дтскїй свѣти́льниче, моли́сѧ ѡ҆ дꙋша́хъ на́шихъ. Два́жды.

Сла́ва, и҆ ны́нѣ, бг҃оро́диченъ:

Недви́жимое ᲂу҆твержде́нїе вѣ́ры, и҆ бжⷭ҇твенное дарова́нїе дꙋша́мъ на́шымъ ты̀ є҆сѝ, пречⷭ҇таѧ, тѣ́мъ къ тебѣ̀ припа́дающе, кꙋ́пнѡ со а҆рха́гг҃ломъ вопїе́мъ тѝ: ра́дꙋйсѧ, роди́вшаѧ сп҃са на́шего: ра́дꙋйсѧ, застꙋ́пнице и҆ хода́таице ро́да хрⷭ҇тїа́нскагѡ. И҆лѝ предпра́зднства:

И҆зꙿ чре́ва пре́жде вѣ̑къ ѿ ѻ҆ц҃а̀ возсїѧ́въ неслїѧ́ннѣ, сло́во бж҃їе безсѣ́меннѡ предгрѧде́тъ ѿ твоеѧ̀ ᲂу҆тро́бы, пречⷭ҇таѧ, вре́менми послѣдѝ, возносѧ́й и҆́же дре́вле лю́тѣ попо́лзшагосѧ, и҆ къ дре́вней добро́тѣ возводѧ̀, ꙗ҆́кѡ млⷭ҇рдъ. є҆гѡ́же ржⷭ҇твꙋ̀ вѡ́инства безпло́тныхъ предꙿи́дꙋтъ, и҆ человѣ́кѡмъ побѣ̑днаѧ та́йнѡ возсыла́ютъ, сла́ва, взыва́юще, бг҃ꙋ, дарова́вшемꙋ на́мъ ми́ръ, разрꙋши́вшемꙋ средостѣ́нїе вражды̀, ꙗ҆́коже и҆зво́ли.

Пѣ́снь д҃.

І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце првⷣное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Ѡ҆снова́нїе тве́рдо хрⷭ҇та̀ и҆мѣ́ѧ, во страннолю́бїи а҆враа́мꙋ дре́внемꙋ ᲂу҆подо́билсѧ є҆сѝ, ѿ всѣ́хъ стра́нъ къ тебѣ̀ приходѧ́щыѧ прїе́млѧ, и҆ ко гдⷭ҇ꙋ тѣ́хъ приводѧ̀, и҆ та́кѡ ᲂу҆гѡ́днаѧ бг҃ꙋ твори́лъ є҆сѝ.

Хра́мъ бг҃ꙋ срⷣце твоѐ хотѧ̀ ᲂу҆стро́ити, въ домꙋ̀ бж҃їемъ непреста́ннѡ слꙋжи́ти возжелѣ́лъ є҆сѝ, ᲂу҆краша́ѧ дꙋ́шꙋ твою̀ нбⷭ҇ными добро́тами.

Росо́ю по́двигѡвъ твои́хъ всѧ̑ стра̑сти тѣлє́сныѧ ᲂу҆гаси́въ, возже́глъ є҆сѝ просвѣще́нїе безстра́стїѧ, тѣ́мже и҆ сы́нъ вѣ́чнагѡ днѐ ꙗ҆ви́лсѧ є҆сѝ, ѻ҆́тче бл҃же́нне.

Бг҃оро́диченъ: І҆езекӏ́иль бжⷭ҇твенный, пречⷭ҇таѧ, врата̀ заключє́нна пронарече́ тѧ, и҆́миже про́йде нерастворе́ннѡ є҆ди́ный превѣ́чный, ми́ръ сво́й да́въ на́мъ.

Пѣ́снь є҃.

І҆рмо́съ: Ты̀, гдⷭ҇и мо́й, свѣ́тъ, въ мӏ́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зꙿ мра́чна невѣ́дѣнїѧ, вѣ́рою воспѣва́ющыѧ тѧ̀.

Сподо́билсѧ є҆сѝ вы́шнихъ дарова́нїй, ѻ҆́тче, гдⷭ҇ꙋ твоемꙋ̀ непреста́ннѡ слꙋжа̀, и҆ а҆пⷭ҇льскїѧ трꙋды̀ при́снѡ подража́ѧ.

Тлѣ́нныѧ твоеѧ̀ пло́ти сладостра́стїе ᲂу҆мертви́въ, дꙋ́шꙋ нетлѣ́ннꙋю бл҃гоче́стїемъ ѡ҆живи́лъ є҆сѝ, и҆ сїю̀ до́мъ дх҃а бжⷭ҇твеннагѡ сотвори́лъ є҆сѝ.

Є҆ѵⷢ҇лїе хрⷭ҇то́во всѣ̑мъ ᲂу҆се́рднѡ проповѣ́дꙋѧ, трапе́зы гдⷭ҇ни прича́стникъ повседне́вный бы́лъ є҆сѝ, са́мъ себѐ и҆ па́ствꙋ твою̀, ꙗ҆́кѡ же́ртвꙋ жи́вꙋ, и҆ ст҃ꙋ бг҃ови ᲂу҆строѧ́ѧ.

Бг҃оро́диченъ: Є҆ди́наго ѿ трⷪ҇цы родила̀ є҆сѝ, пречⷭ҇таѧ, млⷭ҇рдїѧ ра́ди на землѝ ꙗ҆́вльшагосѧ во двою̀ є҆стествꙋ̑, є҆го́же непреста́ннѡ молѝ сп҃стѝ дꙋ́шы на́шѧ. Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.

Ма́слина плодови́та въ домꙋ̀ гдⷭ҇а твоегѡ̀ бы́лъ є҆сѝ, і҆ѡа́нне бг҃оѧвле́нне, занѐ гдⷭ҇ь вѣ́дѣнїе бжⷭ҇твенное дарова́ ти, и҆ въ дѣ́ланїи а҆пⷭ҇льстѣмъ ᲂу҆крѣпи́ тѧ.

Оу҆́ди тѣ́ла хрⷭ҇то́ва є҆стѐ вы̀, та́кѡ со а҆пⷭ҇ломъ проповѣ́далъ є҆сѝ и҆ хрⷭ҇та̀ є҆ди́наго люби́ти ᲂу҆чи́лъ є҆сѝ, да всѝ є҆ди́но бꙋ́дꙋтъ.

Житїѐ твоѐ ст҃о, сло́во твоѐ, бг҃омꙋ́дре, блгⷣти бж҃їѧ и҆спо́лнено, срⷣце твоѐ мл҃твы блгⷣтныѧ сосꙋ́дъ бы́сть, сегѡ̀ ра́ди вѣ́рою и҆ любо́вїю тѧ̀ почита́емъ.

Бг҃оро́диченъ: Є҆стество̀ а҆́гг҃льское ᲂу҆диви́сѧ є҆́же въ тебѣ̀ чꙋ́дꙋ неизрече́нномꙋ, прест҃а́ѧ дв҃о, ка́кѡ ᲂ҆̀убо пло́ть воспрїѧ́тъ ѿ тебє̀, и҆́же безпло́тенъ сы́й и҆ всѧ̑ содержа́й.

Конда́къ, гла́съ д҃:

Ѿмладе́нства бг҃омъ и҆збра́нный, и҆ во ѻ҆́трочествѣ да́ръ ᲂу҆че́нїѧ чꙋде́снѡ ѿ негѡ̀ прїе́мый, и҆ къ пресвѵ́терствꙋ въ со́нномъ видѣ́нїи пресла́внѡ призва́нъ бы́въ, па́стырь ди́вный цр҃кве хрⷭ҇то́вы ꙗ҆ви́лсѧ є҆сѝ, ѻ҆́тче і҆ѡа́нне, блгⷣти тезоимени́те. молѝ хрⷭ҇та̀ бг҃а всѣ̑мъ на́мъ съ тобо́ю въ црⷭ҇твїи бж҃їемъ бы́ти.

І҆́косъ: Дх҃ъ ст҃ы́й, во прⷪ҇ро́цѣхъ глаго́лавый, и҆ а҆пⷭ҇лы всю̀ вселе́ннꙋю просвѣти́вый, мч҃никѡмъ крѣ́пость дарова́вый, и҆ чрезꙿ ст҃и́тєли вѣ́рꙋ правосла́внꙋю ᲂу҆ѧсни́вый, блгⷣть свою̀ и҆злїѧ̀ ѻ҆би́льнѡ на тѧ̀, ѻ҆́тче і҆ѡа́нне, вѣ́рꙋ бо хрⷭ҇то́вꙋ сло́вомъ, дѣ́лы и҆ всѣ́мъ житїе́мъ твои́мъ возвѣща́лъ є҆сѝ. тѣ́мже въ селє́нїѧ своѧ̑ призва́ тѧ гдⷭ҇ь, и҆ ны́нѣ ᲂу҆ прⷭ҇то́ла сла́вы є҆гѡ̀ предстоѧ̀, моли́сѧ: всѣ̑мъ чтꙋ́щымъ тѧ̀ съ тобо́ю въ црⷭ҇твїи бж҃їемъ бы́ти.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персӏ́дстѣй, любо́вїю бл҃гочⷭ҇тїѧ па́че, не́жели пла́менемъ, ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Про́мысломъ бж҃їимъ, свѣ́тъ бл҃гоче́стїѧ средѝ тѧ́жкїѧ тьмы̀ безбо́жїѧ и҆ невѣ́рїѧ ты̀ ꙗ҆ви́лсѧ є҆сѝ, ѻ҆́тче, всѧ̑ призыва́ѧ зва́ти: бл҃гослове́нъ є҆сѝ въ цр҃кви сла́вы твоеѧ̀, гдⷭ҇и.

Ѡ҆́бразъ бж҃їй человѣ́къ є҆́сть, ты́ же, ѻ҆́тче і҆ѡа́нне, зерца́ло любвѐ бж҃їѧ пресвѣ́тло бы́лъ є҆сѝ, и҆ до́мъ ст҃ы́ѧ трⷪ҇цы, ю҆́же и҆ мы̀, грѣ́шнїи, прославлѧ́емъ.

Ю҆́же ѿ гдⷭ҇а блгⷣть прїѧ́лъ є҆сѝ, во є҆́же недꙋ́ги и҆ стра̑сти и҆сцѣлѧ́ти человѣ́кѡмъ, то́ю и҆ на́съ при́снѡ посѣща́й, да всѝ съ тобо́ю є҆диномꙋ́дреннѡ пое́мъ: бл҃гослове́нъ є҆сѝ, гдⷭ҇и бж҃е, во вѣ́ки.

Бг҃оро́диченъ: Влⷣчце, сп҃сѝ ро́дъ тво́й, сп҃сѝ є҆динокрѡ́вныѧ твоѧ̑, сп҃си́ ны, мт҃и живота̀ и҆ всегѡ̀ ро́да человѣ́ча, а҆́ще и҆ недосто́йни є҆смы̀ тѧ̀ мт҃рь себѣ̀ нарещѝ, ѡ҆ст҃ѝ, ᲂу҆твердѝ и҆ сп҃сѝ на́съ мл҃твами твои́ми. Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гочⷭ҇тїѧ рачи́тєли ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Ѡ҆чⷭ҇ти срⷣца̀ и҆ мы̑сли на́шѧ мл҃твами твои́ми, и҆ ꙗ҆́кѡ зе́млю плодоно́снꙋ покажи́ ны, да добродѣ́телїю препоѧ́савшесѧ, зове́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Вѣнце́мъ блгⷣтныхъ дарѡ́въ вѣнча́лсѧ є҆сѝ, премꙋ́дрость вы́шшꙋю созерца́ѧ, и҆ при́снѡ зовы́й: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Сла́ва тебѣ̀, всест҃ы́й животворѧ́щїй дш҃е, ѿ ѻ҆ц҃а̀ и҆сходѧ́й и҆ въ сн҃ѣ при́снѡ почива́ѧй: сла́ва тебѣ̀, сн҃е бж҃їй, ст҃ы́мъ дх҃омъ ѡ҆сщ҃а́ѧй, ᲂу҆крѣплѧ́ѧй и҆ ᲂу҆мꙋдрѧ́ѧй на́съ: сла́ва тебѣ̀, ѻ҆́ч҃е, бл҃говолѧ́й ѡ҆ на́съ при́снѡ дх҃омъ ст҃ы́мъ: нераздѣ́льнаѧ трⷪ҇це є҆ди́нице, поми́лꙋй на́съ.

Бг҃оро́диченъ: Ꙗ҆́же мӏ́рꙋ ро́ждшаѧ сп҃се́нїе, ра́дꙋйсѧ, тобо́ю бо ѿ землѝ на высотꙋ̀ взѧ́ти бы́хомъ: ра́дꙋйсѧ, бл҃гослове́ннаѧ, покро́ве и҆ держа́во, стѣно̀ и҆ ᲂу҆твержде́нїе пою́щымъ: гдⷭ҇а воспѣва́йте, дѣла̀, и҆ превозноси́те є҆го̀ во вѣ́ки. Пѣ́снь ѳ҃.

І҆рмо́съ: Ка́мень нерꙋкосѣ́чный, ѿ несѣко́мыѧ горы̀, тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ тѧ̀, бцⷣе, велича́емъ.

Вои́стиннꙋ свѣ́тъ мӏ́рꙋ бы́лъ є҆сѝ, ѻ҆́тче ст҃ы́й, бжⷭ҇твенными бо дѣ́тельми дꙋ́шꙋ ᲂу҆добри́въ, па́стырь и҆зрѧ́денъ правосла́вныѧ цр҃кве ꙗ҆ви́лсѧ є҆сѝ, всѣ̑мъ вѣ̑рнымъ ѡ҆́бразъ бы́въ сло́вомъ и҆ житїе́мъ, сегѡ̀ ра́ди тѧ̀ ᲂу҆бл҃жа́емъ.

Є҆ди́наго содѣ́телѧ, и҆́мже и҆ ѡ҆ не́мже всѧ́чєскаѧ во всѣ́хъ, вы́нꙋ предзрѧ̀ предꙿ ᲂу҆мо́мъ свои́мъ, томꙋ̀ чⷭ҇тымъ срⷣцемъ и҆ небла́зненною дꙋше́ю, всѣ́мъ житїе́мъ твои́мъ порабо́талъ є҆сѝ, ꙗ҆́кѡ гдⷭ҇ꙋ своемꙋ̀, рабо́тою маммѡ́нѣ ника́коже прирази́всѧ.

Кнѧ̑зи восхвали́ша, и҆ наро́дъ мно́гъ просла́ви тѧ̀, ты́ же сла́вꙋ земнꙋ́ю презрѣ́въ, въ вѣ́чныхъ ѻ҆би́телехъ бж҃їихъ возжела́лъ є҆сѝ бы́ти, и҆ та́мѡ прославлѧ́ти гдⷭ҇а во вѣ́ки.

Бг҃оро́диченъ: И҆́же превѣ́ченъ сы́й, сни́де во ᲂу҆тро́бꙋ твою̀, прест҃а́ѧ дв҃о, и҆ неизрече́ннѡ, па́че ᲂу҆ма̀ и҆ сло́ва, роди́сѧ ѿ тебє̀, да ѡ҆бнови́тъ дре́внѧго а҆да́ма: тѣ́мъ тѧ̀, ꙗ҆́кѡ вино́вницꙋ на́шегѡ ѡ҆бновле́нїѧ, при́снѡ велича́емъ.

Свѣти́ленъ:

Въ хра́мѣ первозва́ннагѡ ᲂу҆ченика̀ хрⷭ҇то́ва сщ҃еннодѣ́йствꙋѧ, и҆ тогѡ̀ а҆пⷭ҇льское слꙋже́нїе вѣ́ры ре́вностнѡ подража́ѧ, дѣ́латель до́брый са́да хрⷭ҇то́ва бы́лъ є҆сѝ, и҆ ꙗ҆́кѡ пло́дъ мно́гъ вѣ̑рныѧ ко гдⷭ҇ꙋ твоемꙋ̀ приве́лъ є҆сѝ, чрезꙿ всѐ житїѐ вы́нꙋ вѣща́ѧ: моѧ̀ жи́знь во хрⷭ҇тѣ̀ є҆́сть. Два́жды.Сла́ва, и҆ ны́нѣ, бг҃оро́диченъ:

И҆́же ѿ тебє̀ рожде́йсѧ, прест҃а́ѧ дв҃о, и҆ ѿ дх҃а своегѡ̀ и҆злїѧ́вый на всѧ́кꙋ пло́ть, ѡ҆ст҃ѝ, просла́ви и҆ прїѧ́тъ въ селє́нїѧ своѧ̑ вѣ́рнаго слꙋжи́телѧ своего̀, мл҃твенника, проповѣ́дника, є҆ще́ же и҆ прⷪ҇ро́ка, съ ни́мже не преста́й молѧ́щи за чтꙋ́щыѧ тѧ̀. И҆лѝ предпра́зднства:

Оу҆краси́сѧ, виѳлее́ме, но́вое жили́ще, ꙗ҆́сли и҆ верте́пъ, па́стырей сѡ́нмища, волсвѝ ѿ восто́кѡвъ, въ него̀ предвари́те, ѕвѣзды̀ свѣ́тлостїю: дв҃а бо ᲂу҆жѐ всесоверше́ннаго, ꙗ҆́кѡ млⷣнца, въ то́мъ ражда́етъ.

На хвали́техъ стїхи̑ры, ст҃а́гѡ на д҃,

и҆лѝ на ѕ҃: предпра́зднства г҃ и҆ ст҃а́гѡ г҃, гла́съ и҃.

Подо́бенъ: Ѽ пресла́внагѡ чꙋдесѐ:

Ѽпрера́достныѧ по́вѣсти:* бг҃а мо́литъ ѻ҆́трокъ і҆ѡа́ннъ,* бж҃їѧ про́ситъ млⷭ҇ти,* є҆́же просвѣти́ти є҆мꙋ̀ смы́слъ,* ни́цъ простре́сѧ предꙿ і҆кѡ́ною,* ско́рбь дꙋшѝ предꙿ бг҃омъ и҆сповѣ́дꙋѧ.* и҆ сѐ пелена̀ ѿ ѻ҆́чїю ᲂу҆ма̀ ѻ҆́троча снима́етсѧ,* и҆ свѣ́томъ хрⷭ҇то́вымъ ѻ҆́трокъ ѡ҆зарѧ́етсѧ,* да вє́лїѧ сотвори́тъ и҆ мнѡ́ги наꙋ́читъ. Два́жды.

Ѽ чꙋде́съ преизѻби́лїе!* Ѽ любвѐ живо́е ѡ҆блиста́нїе!* кто̀ не подиви́тсѧ твоемꙋ̀ бл҃готворе́нїю,* и҆ є҆́же къ ᲂу҆бѡ́гимъ млⷭ҇рдїю;* сла́вномꙋ лѷкӏ́йскихъ мѵ́ръ ст҃и́телю* неисче́тностїю чꙋде́съ подо́билсѧ є҆сѝ.* тѣ́мже гра́ды и҆ ве́си землѝ рꙋ́сскїѧ,* і҆ѡа́нне првⷣне,* ви́дѣша тобо́ю свѣ́тъ хрⷭ҇то́въ.

Ꙗ҆́коже свѣ́тъ и҆ теплота̀* со́лнцꙋ неразлꙋ́чни,* та́кѡ и҆ тебѣ̀ ст҃ость и҆ ᲂу҆чи́тельство,* любы̀ и҆ млⷭ҇рдїе присꙋ́ще бы́ша,* і҆ѡа́нне сщ҃е́ннѣйшїй,* лю́демъ бг҃одарова́нне.* тѣ́мже, Ѽ па́стырю,* бꙋ́ди согрѣва́ѧ и҆ просвѣща́ѧ на́съ,* бꙋ́ди ꙗ҆́коже со́лнце дꙋша́мъ на́шымъ. Сла́ва, гла́съ з҃:

Покланѧ́ѧсѧ ст҃ы̑мъ і҆кѡ́намъ, сла́влю хрⷭ҇та̀ бг҃а воплоще́нна, ѡ҆́бразъ сла́вы ѻ҆́ч҃їѧ. и҆сповѣ́дꙋю ѻ҆ц҃а̀, безнача́льнѡ сн҃а роди́вшаго. прославлѧ́ю бг҃оподо́бїе человѣ́кѡвъ, и҆̀же хра́мы ст҃а́гѡ дх҃а сꙋ́ть. зрѧ́ же крⷭ҇та̀ ѡ҆́бразъ, въ чꙋ́вствѣ и҆́мамъ си́лꙋ крⷭ҇та̀ животворѧ́щагѡ: сѐ є҆́сть бг҃осло́вїе твоѐ, ѻ҆́тче ст҃ы́й, и҆́мже вели̑кимъ ᲂу҆чи́телємъ цр҃кве ᲂу҆подо́билсѧ є҆сѝ, ѡ҆́бразы і҆кѡнопи́снїи во сла́вꙋ первоѡбра́зныхъ почита́ѧ. И҆ ны́нѣ, бг҃оро́диченъ, гла́съ то́йже:

Роди́лсѧ є҆сѝ ѿ дв҃ы несказа́ннѡ, хрⷭ҇тѐ, и҆ просвѣти́лъ є҆сѝ сꙋ́щыѧ во тьмѣ̀, вопїю́щыѧ: гдⷭ҇и, сла́ва тебѣ̀.

И҆лѝ предпра́зднства, гла́съ в҃.

Подо́бенъ: До́ме є҆ѵфра́ѳовъ:

Прїиди́те, земноро́днїи,* согла́снѡ дв҃ꙋ* бцⷣꙋ мрӏ́ю* воспое́мъ непреста́ннѡ,* и҆зꙿ неѧ́же хрⷭ҇то́съ ражда́етсѧ.

Славосло́вїе вели́кое. Є҆ктєнїѝ, и҆ ѿпꙋ́стъ.

На лїтꙋргӏ́и.

Бл҃жє́нна ѿ канѡ́на ст҃а́гѡ на и҃, пѣ́снь г҃ и҆ ѕ҃,

и҆лѝ предпра́зднства, пѣ́снь г҃ на д҃, и҆ ст҃а́гѡ і҆ѡа́нна, пѣ́снь ѕ҃ на д҃.

Прокӏ́менъ, гла́съ з҃: Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на него̀. Стӏ́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀.

А҆пⷭ҇лъ, собо́рнагѡ посла́нїѧ і҆ѡа́ннова, зача́ло ѻ҃г.

А҆ллилꙋ́їа, гла́съ д҃: Гото́во срⷣце є҆гѡ̀ ᲂу҆пова́ти на гдⷭ҇а. Стӏ́хъ: Бла́гъ

мꙋ́жъ, ще́дрѧ и҆ даѧ̀. Є҆ѵⷢ҇лїе ѿ лꙋкѝ, зача́ло к҃ѕ.

Прича́стенъ: Въ па́мѧть вѣ́чнꙋю бꙋ́детъ првⷣникъ, ѿ слꙋ́ха ѕла̀ не ᲂу҆бои́тсѧ.

П одо б а́ е т ъ в ѣ́ д а т и: Па́мѧть ст҃а́гѡ првⷣнагѡ і҆ѡа́нна кроншта́дтскагѡ

соверша́етсѧ ѳ҃і ѻ҆ктѡ́врїа, є҆гда̀ и҆ па́мѧть нбⷭ҇нагѡ є҆гѡ̀ покрови́телѧ, прпⷣбнагѡ

і҆ѡа́нна ры́льскагѡ, и҆ к҃ деке́мврїа, въ де́нь є҆гѡ̀ преставле́нїѧ.

ѳ҃і ҆ ѻ к т ѡ́ в р ї а соверша́емъ па́мѧть є҆гѡ̀, соединѧ́ѧ слꙋ́жбꙋ є҆гѡ̀ со слꙋ́жбою

ст҃а́гѡ прⷪ҇ро́ка і҆ѡ́илѧ, є҆гѡ́же прее́мникъ по дх҃ꙋ въ рѡссӏ́йстѣй землѝ бы́сть ст҃ы́й

првⷣный і҆ѡа́ннъ, и҆лѝ со слꙋ́жбою прпⷣбнагѡ і҆ѡа́нна ры́льскагѡ, и҆ли́ же твори́мъ

бдѣ́нїе є҆ди́номꙋ првⷣномꙋ і҆ѡа́ннꙋ, є҆́же въ рꙋ́сской цр҃кви прили́чно є҆́сть.

Н а в е ч е́ р н и. На Гдⷭ҇и, воззва́хъ: пое́мъ стїхи̑ры прⷪ҇ро́ка г҃ и҆ і҆ѡа́нна

кроншта́дтскагѡ г҃, и҆лѝ є҆ди́номꙋ і҆ѡа́ннꙋ кроншта́дтскомꙋ на и҃. На лїтӏ́и и҆

стїхо́внѣ стїхи̑ры првⷣномꙋ. Тропа́рь првⷣнагѡ і҆ѡа́нна, а҆́ще бдѣ́нїе, два́жды, и҆

Бцⷣе, дв҃о: є҆ди́ножды. а҆́ще нѣ́сть бдѣ́нїѧ: Сла́ва, и҆ ны́нѣ, Є҆́же ѿ вѣ́ка ᲂу҆тае́ное:

Н а ѹ҆́ т р е н и. Тропа́рь два́жды: Сла́ва, и҆ ны́нѣ, Є҆́же ѿ вѣ́ка ᲂу҆тае́ное:

Сѣда́льны првⷣнагѡ два́жды: Сла́ва, и҆ ны́нѣ, бг҃оро́диченъ. Канѡ́нъ бцⷣы

пара́клисїсъ и҆ ст҃а́гѡ, и҆лѝ ст҃ы́хъ. Катава́сїа: Ѿве́рзꙋ ᲂу҆ста̀ моѧ̑: Свѣти́ленъ првⷣнагѡ

два́жды: Сла́ва, и҆ ны́нѣ, бг҃оро́диченъ. Хвали̑тны на д҃: Сла́ва, првⷣнагѡ, И҆ ны́нѣ,

бг҃оро́диченъ. Славосло́вїе вели́кое.

к҃ д е к е́м в р ї а соединѧ́емъ слꙋ́жбꙋ ст҃а́гѡ првⷣнагѡ і҆ѡа́нна со слꙋ́жбою

предпра́зднства ржⷭ҇тва̀ хрⷭ҇то́ва, и҆ а҆́ще хра́мъ и҆лѝ пра́здникъ є҆гѡ̀ твори́тсѧ,

сщ҃енномч҃ника і҆гна́тїа бг҃оно́сца, на него́же хрⷭ҇то́съ ᲂу҆каза́въ, речѐ: а҆́ще не бꙋ́дете,

ꙗ҆́кѡ ѻ҆троча̀ сїѐ, не вни́дете въ црⷭ҇твїе нбⷭ҇ное.

Н а в е ч е́ р н и. На Гдⷭ҇и, воззва́хъ: стїхи̑ры на і: предпразднства г҃, сщ҃енномч҃ника і҆гна́тїа г҃, и҆ првⷣнагѡ і҆ѡа́нна д҃. Чтє́нїѧ ст҃а́гѡ првⷣнагѡ і҆ѡа́нна. На

лїтӏ́и: стїхи́ра хра́ма и҆ ст҃а́гѡ і҆ѡа́нна. Стїхѡ́вны ст҃а́гѡ првⷣнагѡ і҆ѡа́нна, Сла́ва:

і҆гна́тїа, И҆ ны́нѣ: предпра́зднства. На бл҃гослове́нїи хлѣ́бѡвъ: првⷣнагѡ два́жды,

предпра́зднства є҆ди́ножды.

Н а ѹ҆́ т р е н и. Тропа́рь предпра́зднства а҃-жды, і҆гна́тїа а҃-жды, Сла́ва: првⷣнагѡ,

И҆ ны́нѣ: предпра́зднства. Канѡ́нъ предпра́зднства со і҆рмосо́мъ на ѕ҃, і҆гна́тїа на

д҃ и҆ і҆ѡа́нна на д҃. Катава́сїа: Хрⷭ҇то́съ ражда́етсѧ: Свѣти́льны: і҆гна́тїа, і҆ѡа́нна

и҆ предпра́зднства. Хвали̑тны предпра́зднства г҃, і҆ѡа́нна г҃, Сла́ва: і҆гна́тїа, И҆

ны́нѣ: предпра́зднства. Славосло́вїе вели́кое. Тропа́рь ст҃а́гѡ првⷣнагѡ і҆ѡа́нна,

Сла́ва, и҆ ны́нѣ, предпра́зднства.

Н а л ї т ꙋ р г ӏ́ и. Бл҃жє́нна предпра́зднства пѣ́снь г҃, и҆ првⷣнагѡ і҆ѡа́нна пѣ́снь ѕ҃.

к҃ деке́мврїа, а҆́ще недѣ́лѧ, и҆лѝ а҆́ще и҆зво́литъ настоѧ́тель, соверша́етсѧ слꙋ́жба

то́кмѡ предпра́зднства и҆ ст҃а́гѡ првⷣнагѡ і҆ѡа́нна со слꙋ́жбою воскрⷭ҇ною, по главѣ̀

слꙋ́жбы ст҃а́гѡ петра̀ митрополӏ́та к҃а деке́мврїа. Слꙋ́жба же сщ҃енномч҃ника і҆гна́тїа

соверша́етсѧ ѳ҃і деке́мврїа со слꙋ́жбою ст҃а́гѡ мч҃ника вонифа́тїа.

Та́кожде ѳ҃і ѻ҆ктѡ́врїа мо́жетъ соверша́тисѧ слꙋ́жба то́кмѡ ст҃а́гѡ првⷣнагѡ

і҆ѡа́нна, по главѣ̀ ст҃а́гѡ а҆пⷭ҇ла і҆ѡа́нна бг҃осло́ва к҃ѕ септе́мврїа, ꙗ҆́коже и҆ па́мѧть

прпⷣбнагѡ се́ргїа ра́донежскагѡ к҃є септе́мврїа соверша́етсѧ, а҆ ст҃ы́хъ и҆ны́хъ пѣ́ти

слꙋ́жбы, є҆гда̀ настоѧ́тель и҆зво́литъ. Ѻ҆ба́че а҆́ще хра́мъ є҆́сть прпⷣбнагѡ і҆ѡа́нна

ры́льскагѡ, не до́лжно слꙋ́жбꙋ є҆гѡ̀ ѡ҆ставлѧ́ти и҆лѝ на и҆ны́й де́нь преноси́ти, но

ѻ҆бои́мъ ст҃ы̑мъ, ꙗ҆́кѡ дх҃о́внѡ є҆ди̑нымъ, пѣ́ти слꙋ́жбы до́лжно є҆́сть.

Мл҃тва ко ст҃о́мꙋ првⷣномꙋ ѻ҆тцꙋ̀ на́шемꙋ

і҆ѡа́ннꙋ кроншта́дтскомꙋ, чꙋдотво́рцꙋ:

Ст҃ы́й првⷣный ѻ҆́тче на́шъ і҆ѡа́нне, вели́кїй чꙋдотво́рче и҆ свѣти́льниче рꙋ́сскїѧ землѝ! ты̀ во свѣ́тѣ пренбⷭ҇нѣмъ хрⷭ҇та̀ бг҃а на́шего зри́ши, млⷭ҇ти є҆гѡ̀ за любо́вь твою̀ сподоблѧ́емь. Бжⷭ҇твенныѧ блгⷣти и҆спо́лненъ бы́въ, тѣ́ломъ хрⷭ҇то́вымъ и҆ кро́вїю є҆гѡ̀ при́снѡ пита́емь, и҆зше́лъ є҆сѝ на па́стырское дѣ́ланїе да́же до вѣ́чера жи́зни твоеѧ̀. Ѻ҆ба́че не преста́лъ є҆сѝ и҆ ны́нѣ ѿ дѣ́ланїѧ твоегѡ̀, во вѣ́ки живы́й во хрⷭ҇тѣ̀. Вѣ́мы, вели́кїй па́стырю на́шъ, ꙗ҆́кѡ сщ҃е́нствовавшꙋ тѝ, и҆нӏ́и млⷭ҇рдїю тобо́ю наꙋчи́шасѧ, дрꙋзӏ́и же ѿ нищеты̀ и҆ паде́нїй грѣхо́вныхъ тобо́ю возведе́ни бы́ша, и҆ ѕѣлѡ̀ возлюби́ша тѧ̀, всѧ́комꙋ добрꙋ̀ и҆̀хъ наꙋча́юща. Тѣ́мже мо́лимъ тѧ̀: наꙋчѝ и҆ на́съ добро̀ твори́ти, грѣха̀ ѡ҆греба́тисѧ, ѡ҆ сп҃се́нїи дꙋ́шъ на́шихъ пещи́сѧ, и҆ во всѧ́комъ дѣ́лѣ бла́зѣ бꙋ́ди на́мъ помо́щникъ бл҃гӏ́й, тебѣ́ бо сказа̀ бг҃ъ нꙋжды̑ люде́й свои́хъ, цѣли́телю и҆ бл҃годѣ́телю на́шъ! Вѣ́мы и҆ сїѧ̑, првⷣный ѻ҆́тче, ꙗ҆́кѡ вели́кїй мл҃твенникъ и҆ чꙋ́дный соверши́тель безкро́вныѧ же́ртвы ты̀ бы́лъ є҆сѝ, и҆спо́лненъ сы́й дꙋ́ха вѣ́ры, наде́жды и҆ любвѐ хрⷭ҇тїа́нскїѧ. Се́ бо, бжⷭ҇твеннꙋю лїтꙋргӏ́ю соверша́ѧ, и҆ ѡ҆ врꙋчи́вшихъ себѐ мл҃твенномꙋ твоемꙋ̀ застꙋпле́нїю пла́меннѡ молѧ́сѧ, ꙗ҆́кѡ ѻ҆те́цъ чадолюби́вый, всѣ́хъ любо́вїю твое́ю ѡ҆б̾има́лъ є҆сѝ, поминове́нїе ѡ҆ ни́хъ творѧ̀, да ѡ҆мы́ютсѧ грѣсѝ и҆́хъ ст҃ѣ́йшею кро́вїю хрⷭ҇то́вою. Тѣ́мже и҆ мы̀, грѣ́шнїи, ᲂу҆пова́юще на любо́вь и҆ по́мощь твою̀, ᲂу҆се́рднѡ взыва́емъ тѝ: моли́сѧ, вели́кїй па́стырю рꙋ́сскїѧ землѝ, ѡ҆ бра́тїи твое́й, а҆рхїпа́стырехъ и҆ па́стырехъ на́шихъ, да поживꙋ́тъ по во́ли бж҃їей, ꙗ҆́коже пре́жнїи па̑стыри, бг҃ꙋ ᲂу҆годи́вшїи, и҆ да внꙋши́тъ гдⷭ҇ь молє́нїѧ и҆́хъ на всѧ́къ ча́съ. Молѝ, чꙋдотво́рче преди́вный, всемлⷭ҇тиваго сп҃са на́шего, ѡ҆ всѣ́хъ недꙋ́гꙋющихъ и҆ многоѡбра́знѣ бѣ́дствꙋющихъ, ᲂу҆тѣше́нїѧ ча́ющихъ, да и҆сцѣле́нїе и҆ по́мощь прїи́мꙋтъ, и҆ да ᲂу҆тѣ́шени бꙋ́дꙋтъ. Моли́сѧ бг҃ꙋ, ѻ҆́тче і҆ѡа́нне, ѡ҆ дѣ́техъ и҆ ѻ҆́троцѣхъ ᲂу҆ча́щихсѧ, ꙗ҆́кѡ да позна́ютъ тӏ́и вѣ́рꙋ хрⷭ҇то́вꙋ, и҆ да поживꙋ́тъ по вѣ́рѣ, возлюби́въ крѣ́пкѡ гдⷭ҇а на́шего, пречⷭ҇тꙋю влⷣчцꙋ бцⷣꙋ и҆ всѧ̑ ст҃ы́ѧ, съ ни́миже и҆ тѧ̀, вои́стиннꙋ до́браго ѻ҆тца̀ и҆ наста́вника и҆́хъ, и҆ да соблюда́ютъ и҆̀хъ а҆́гг҃ли храни́тєли и҆́хъ, ꙗ҆́коже и҆ тѧ̀ а҆́гг҃лъ храни́тель тво́й соблюда́ше ѿ прираже́нїй вра́жїихъ. Дꙋ́хомъ а҆пⷭ҇льскїѧ ре́вности ѡ҆ вѣ́рѣ правосла́вной пламенѣ́ѧ, гро́знѡ и҆ непреста́ннѡ ѡ҆блича́лъ є҆сѝ хꙋлы̑ и҆скази́телей є҆ѵⷢ҇лїа хрⷭ҇то́ва. Тѣ́мже мо́лимъ тѧ̀: поразѝ и҆ ны́нѣ, ᲂу҆го́дниче бж҃їй, всѧ̑ собла́зны и҆ раздѣлє́нїѧ, толи́кѡ ᲂу҆мно́жившыѧсѧ ны́нѣ, да поживꙋ́тъ лю́дїе правосла́внїи въ є҆дине́нїи и҆ ми́рѣ, и҆ въ вѣ́рности ма́тери свое́й, цр҃кви хрⷭ҇то́вой. Къ си̑мъ же и҆ сїю̀ вели́кꙋю мольбꙋ̀ съ вѣ́рою тѝ прино́симъ: предста́тельствꙋй, вели́кїй чꙋдотво́рче и҆ прⷪ҇ро́че, ро́дꙋ твоемꙋ̀ ꙗ҆вле́нный, ᲂу҆ стра́шнагѡ прⷭ҇то́ла гдⷭ҇а сла́вы, да пощади́тъ и҆ поми́лꙋетъ зе́млю рꙋ́сскꙋю, въ не́йже толи́кѡ просїѧ̀ любы̀ твоѧ̀. И҆ да и҆зба́витъ гдⷭ҇ь лю́ди своѧ̑ ѿ наслѣ́дїѧ го́рькагѡ мꙋчи́тельства лю́тыхъ безбѡ́жникъ. Ѽ пречꙋ́дный ѻ҆́тче і҆ѡа́нне, вели́кїй і҆ере́ю бг҃а вы́шнѧгѡ! Сѐ ѡ҆́бразъ тво́й чⷭ҇тны́й лобыза́емъ, вѣ́дꙋще, ꙗ҆́кѡ вели́каго застꙋ́пника и҆ ᲂу҆тѣ́шителѧ дарова́ тѧ гдⷭ҇ь лю́демъ свои̑мъ. И҆спросѝ ᲂу҆̀бо на́мъ дꙋ́хъ покаѧ́нїѧ и҆ ѡ҆бновле́нїѧ и҆́стиннагѡ. Вѣ́мы, ꙗ҆́кѡ во дни̑ земна́гѡ житїѧ̀ твоегѡ̀ мно́гое мно́жество люде́й во ст҃ѣ́мъ хра́мѣ, го́рдость и҆ смꙋще́нїе ѿло́жше, пла́чꙋще и҆ рыда́юще, ѡ҆ та́йныхъ свои́хъ грѣсѣ́хъ ꙗ҆́вѣ ка́ющесѧ, чрезꙿ тѧ̀ живи́тельное разрѣше́нїе ѿ бг҃а сп҃са прїима́хꙋ. Ꙗ҆́коже тогда̀ надꙿ ни́ми, прострѝ и҆ ны́нѣ неви́димѡ бл҃гословлѧ́ющꙋю рꙋ́кꙋ твою̀, и҆ проще́нїе грѣхѡ́въ на́шихъ ᲂу҆ бг҃а млⷭ҇рднагѡ и҆спросѝ. Посо́бствꙋй ᲂу҆̀бо на́мъ про́чее вре́мѧ живота̀ на́шегѡ бг҃оꙋго́днѣ прейтѝ, да сподо́бимсѧ ст҃ы́ми твои́ми мл҃твами дости́гнꙋти нбⷭ҇нагѡ црⷭ҇твїѧ, и҆ та́мѡ вкꙋ́пѣ съ тобо́ю, ѻ҆тце́мъ мл҃твенникомъ и҆ застꙋ́пникомъ на́шимъ, сла́вити ди́внаго во ст҃ы́хъ свои́хъ бг҃а, ѻ҆ц҃а̀, и҆ сн҃а, и҆ ст҃а́го дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.