Мѣ́сѧца деке́мврїа въ г҃і-й де́нь.

Слꙋ́жба прпⷣбномꙋ ге́рманꙋ, а҆лѧ́скинскомꙋ чꙋдотво́рцꙋ.

На ма́лѣй вече́рни.

На Гдⷭ҇и, воззва́хъ: стїхи̑ры на д҃, гла́съ а҃҃.

Подо́бенъ: Нбⷭ҇ныхъ чинѡ́въ:

Цр҃кве хрⷭ҇то́вы ра́дованїе,* проповѣ́давъ сла́вꙋ бж҃їю,* сла̑внаѧ наслѣ́довалъ є҆сѝ на нб҃сѝ,* и҆ ѿ на́съ славле́нїе прїимѝ на землѝ,* молѧ̀ цр҃ѧ̀ сла́вы, прпⷣбне,* ѻ҆́бщники сла́вы є҆гѡ̀ на́съ сотвори́ти. Два́жды.

Цр҃кве хрⷭ҇то́вы ра́дованїе,* бл҃говѣ́стническимъ и҆ пꙋсты́ннымъ твои́мъ житїе́мъ* тьмꙋ̀ і҆́дѡльскꙋю разгна́лъ є҆сѝ,* свѣ́тꙋ хрⷭ҇то́вꙋ ꙗ҆зы́ки прїѻбща́ѧ:* прпⷣбне ге́рмане,* ѻ҆́бщники сеѧ̀ блгⷣти и҆ на́съ сотворѝ.

Мра́комъ жите́йскимъ ѡ҆держи́ми сꙋ́ще,* твои́мъ нбⷭ҇нымъ посѣще́нїемъ* внеза́пꙋ ᲂу҆мѡ́мъ на́шымъ прїѧ́хомъ ѡ҆заре́нїе,* прпⷣбне ѻ҆́тче ге́рмане:* тѣ́мже на твоѐ предста́тельство къ бг҃ꙋ* ᲂу҆пова́нїе на́ше возложи́хомъ.

Сла́ва, гла́съ и҃:

Прибли́зившꙋсѧ ѿше́ствїю прпⷣбнагѡ, свѣща́мъ горѧ́щымъ и҆ а҆пⷭ҇льскимъ дѣѧ́нїємъ ᲂу҆ ѻ҆дра̀ є҆гѡ̀ чтѡ́мымъ, ди́внѡ просїѧ̀ ст҃ы́й ге́рманъ: сла́ва тебѣ̀, гдⷭ҇и, ре́къ. и҆ є҆щѐ седми́цꙋ днӏ́й житїѧ̀ ѿ сп҃са та́йнѡ прїе́мъ, пожда̀ прорече́ннагѡ днѐ. тогда́ же па́ки свѣща́мъ горѧ́щымъ и҆ дѣѧ́нїємъ чтѡ́мымъ, почѝ во бл҃гоꙋха́нїи по́двига своегѡ̀, многопло́днѡ и҆ првⷣнѡ пожи́въ, па́ки же вѣ́чнѡ живы́й, гдⷭ҇а сла́вы молѧ̀ при́снѡ ѡ҆ на́съ. И҆ ны́нѣ, бг҃оро́диченъ:

Влⷣчце бцⷣе дв҃о, ꙗ҆́коже и҆сцѣли́ла є҆сѝ ге́рмана прпⷣбнаго, вне́млющи при́снѡ проше́нїємъ є҆гѡ̀, и҆ на́съ, воспѣва́ющихъ тѧ̀, поми́лꙋй.

На стїхо́внѣ стїхи̑ры, гла́съ в҃.

Подо́бенъ: До́ме є҆ѵфра́ѳовъ:

До́мъ блгⷣти* дх҃а бжⷭ҇твенна* гдⷭ҇ь ꙗ҆ви́ тѧ:* наꙋчѝ, ѻ҆́тче,* ꙗ҆̀же на́мъ подоба́етъ твори́ти.

Стӏ́хъ: Чтна̀ пре̾д гдⷭ҇емъ сме́рть прпⷣбныхъ є҆гѡ̀.

Бꙋ̑ри мѡрскӏ́ѧ* ничто́же тѝ бѧ́хꙋ,* хрⷭ҇тꙋ̀ сїѧ́ющꙋ,* ꙗ҆́кѡ сл҃нцꙋ свы́ше,* сегѡ̀ ра́ди, прпⷣбне, сла́вимъ тѧ̀.

Стӏ́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;

Вѣ́ры ревни́телю,* си́рыхъ защи́тниче,* мона́хѡвъ сла́во,* ᲂу҆твердѝ, ѻ҆́тче,* тебѣ̀ хвалы̑ своѧ̑ приносѧ́щихъ.

Сла́ва, гла́съ ѕ҃:

Ка̑ѧ нѣ̑дра землѝ и҆лѝ ка̑ѧ лѣ̑та, Ѽ ге́рмане прпⷣбне, возмо́гꙋтъ сокры́ти сла́вꙋ твою̀, сꙋ́щꙋю на нб҃сѣ́хъ; тѣ́мъ ны́нѣ сла́вѧще припа́даемъ тѝ, мы̀, ча̑да твоегѡ̀ наро́да, хода́таѧ тѧ̀ и҆мѣ́ѧ предꙿ гдⷭ҇емъ, є҆го́же молѝ пода́ти сп҃се́нїе многострада́льнѣй странѣ̀ рѡссӏ́йстѣй, странѣ̀ се́й бл҃годе́нствїе, и҆ дꙋша́мъ на́шымъ ве́лїю млⷭ҇ть.

И҆ ны́нѣ, бг҃оро́диченъ:

Бцⷣе, ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀, тебѣ̀ мо́лимсѧ: моли́сѧ, влⷣчце, со а҆пⷭ҇лы и҆ всѣ́ми ст҃ы́ми, поми́ловати дꙋ́шы на́шѧ.

Тропа́рь, гла́съ д҃:

Пꙋсты́ни сѣ́верныѧ подви́жниче, и҆ ѡ҆ все́мъ мӏ́рѣ блгⷣтный мл҃твенниче, правосла́вныѧ вѣ́ры ѡ҆бꙋчи́телю, и҆ бл҃гочⷭ҇тїѧ до́брый наста́вниче, а҆лѧ́ски ᲂу҆краше́нїе, и҆ всеѧ̀ а҆ме́рики ра́дованїе, прпⷣбне ге́рмане, молѝ хрⷭ҇та̀ бг҃а, да сп҃се́тъ дꙋ́шы на́шѧ.

Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́ное:

Є҆ктенїа̀, и҆ ѿпꙋ́стъ.

На вели́цѣй вече́рни.

Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ: стїхи̑ры на и҃, гла́съ г҃. Самогла̑сны:

Взыгра́йте, во́ды валаа́ма, ликꙋ́йте, ѻ҆́строви а҆лѧ́ски, по́йте, лю́дїе но́выѧ страны̀, да ра́дꙋетсѧ нб҃о и҆ землѧ̀: собесѣ́дникъ бо а҆́гг҃лѡвъ прославлѧ́етсѧ, и҆ въ концы̀ вселе́нныѧ пра́ваѧ вѣ́ра возвѣща́етсѧ, и҆ мы̀ велегла́снѡ хрⷭ҇тꙋ̀ бг҃ꙋ возопїи́мъ: мл҃твами ѻ҆тца̀ на́шегѡ ге́рмана, гдⷭ҇и, сп҃сѝ дꙋ́шы на́шѧ.

Прїиди́те всѝ, въ пѣ́нїихъ ѱало́мскихъ чⷭ҇тна́гѡ воздержа́нїѧ побѣ́дꙋ возгласи́мъ: и҆́мъ бо ѕмӏ́ѧ ѕлонача́льнаго расто́ргнꙋвъ, въ ли́цѣ а҆́гг҃лѡвъ кро́ткїй ге́рманъ вкꙋша́етъ торжество̀. восхва́лимъ ᲂ҆̀убо, бра́тїе, красѧ́щаго по́стникѡвъ сосло́вїе, и҆ ликовствꙋ́ѧ, свѣ́тлѡ возопїи́мъ: ра́дꙋйсѧ, прпⷣбне ге́рмане, а҆гг҃лоподо́бнаѧ и҆́нокѡвъ похвало̀.

Ѽ ге́рмане прпⷣбне, сꙋро́выѧ а҆лѧ́ски подви́жниче, и҆ нбⷭ҇ныхъ селе́нїй жи́телю, кӏ́ими похвала́ми почти́мъ тѧ̀, и҆лѝ кӏ́ими и҆мены̀ возвели́чимъ, и҆ что̀ славле́нїе на́ше проти́вꙋ сла́вы нбⷭ҇ныѧ; ра́дꙋйсѧ, на́шъ соплеме́нниче, вкꙋша́ѧй нбⷭ҇нꙋю сла́вꙋ, и҆спо́лни ра́дости и҆ срⷣца̀ въ смире́нїи тѝ припа́дающихъ.

И҆́ны стїхи̑ры, гла́съ ѕ҃.

Подо́бенъ: Всѐ ѿло́жше:

Ны́нѣ соше́дшесѧ,* просла́вимъ ди́внаго,* сꙋ́ща ѿ земноро́дныхъ,* нбⷭ҇ныхъ же дости́гшаго,* и҆́же свѣ́тъ хрⷭ҇то́въ дѣ́лы же и҆ словесы̀* до конє́цъ вселе́нныѧ пронесѐ* непросвѣщє́ннымъ лю́демъ,* мра́зомъ і҆дѡлослꙋже́нїѧ ѡ҆тѧгощє́ннымъ.* тогѡ̀ мл҃твами хрⷭ҇то́съ да сп҃се́тъ дꙋ́шы на́шѧ.

Ра́дꙋйсѧ, валаа́ме,* бж҃їе жили́ще,* ꙗ҆́кѡ воспита́лъ є҆сѝ* ди́внаго подви́жника хрⷭ҇то́ва,* и҆́же, ꙗ҆́кѡ свѣща̀ на свѣ́щницѣ,* просїѧ̀ на ѻ҆́стровѣхъ а҆лѧ́ски,* странѣ̀ невѣ́домѣй и҆ но́вѣй,* и҆ лю́ди невѣ̑рныѧ* къ пра́вой вѣ́рѣ приведѐ,* съ ни́миже просла́вимъ бг҃а,* ди́внаго во ст҃ы́хъ свои́хъ.

Є҆ди́но и҆мѣ́ѧ жела́нїе,* є҆́же лю́ди невѣ̑рныѧ* къ бг҃ꙋ є҆ди́номꙋ привестѝ,* всѣ̑мъ всѧ̑ бы́лъ є҆сѝ:* сщ҃е́нномꙋ писа́нїю* и҆ є҆́же по немꙋ̀ наꙋча́ѧ житїю̀,* рꙋкодѣ́ланїю же наставлѧ́ѧ,* и҆ застꙋ́пникъ быва́ѧ предꙿ властьмѝ,* всѧ́кѡ пѣ́стꙋѧ ты̑ѧ, ꙗ҆́кѡ младе́нцы,* да та́кѡ лю́ди къ бг҃ꙋ приведе́ши,* и҆ на́съ, тѧ̀ пою́щихъ, не ѡ҆ста́ви.

Сло́вꙋ а҆пⷭ҇ла послѣ́дꙋѧ,* є҆́же да́ти мѣ́сто гнѣ́вꙋ бж҃їю,* жестосе́рдїѧ мїролю́бцєвъ ᲂу҆клони́всѧ,* на ѻ҆́стровъ є҆ло́вый ᲂу҆дали́лсѧ є҆сѝ,* ѡ҆брѣ́тъ та́мѡ но́вый валаа́мъ,* съ пти́цами и҆ ѕвѣрьмѝ лѣсны́ми* предпочты́й житїѐ,* бг҃ꙋ и҆ а҆́гг҃лѡмъ собесѣ́дꙋѧ,* вы́шними видѣ́нїи ѡ҆зарѧ́емь,* ны́нѣ же въ вы́шнихъ живы́й,* моли́сѧ ѡ҆ дꙋша́хъ на́шихъ.

Что̀ є҆́сть па́че всегѡ̀:* не гдⷭ҇ь ли созда́тель,* лѣ́поты ᲂу҆краси́тель,* жи́зни пода́тель,* всѧ́ческихъ содержи́тель и҆ пита́тель,* не сего́ ли подоба́етъ люби́ти,* ꙗ҆́кѡ любвѐ досто́йнѣйшаго,* и҆ въ не́мъ сча́стїе своѐ полага́ти;* та́кѡ ᲂу҆чи́лъ є҆сѝ, прпⷣбне,* тѣ́мже и҆ на́съ наꙋчѝ,* всѣ́мъ срⷣцемъ бг҃а люби́ти.

Сла́ва, гла́съ то́йже, самогла́сенъ:

Ка̑ѧ нѣ̑дра землѝ и҆лѝ ка̑ѧ лѣ̑та, Ѽ ге́рмане прпⷣбне, возмо́гꙋтъ сокры́ти сла́вꙋ твою̀, сꙋ́щꙋю на нб҃сѣ́хъ; тѣ́мъ ны́нѣ сла́вѧще, припа́даемъ тѝ, мы̀, ча̑да твоегѡ̀ наро́да, хода́таѧ тѧ̀ и҆мѣ́ѧ предꙿ гдⷭ҇емъ, є҆го́же молѝ пода́ти сп҃се́нїе многострада́льнѣй странѣ̀ рѡссӏ́йстѣй, странѣ̀ се́й бл҃годе́нствїе, и҆ дꙋша́мъ на́шымъ ве́лїю млⷭ҇ть.

И҆ ны́нѣ, бг҃оро́диченъ догма́тїкъ, гла́съ то́йже: Кто̀ тебѐ не ᲂу҆бл҃жи́тъ:

Вхо́дъ, прокӏ́менъ днѐ, и҆ чтє́нїѧ г҃.

Премꙋ́дрости соломѡ́новы чте́нїе:

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предꙿ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́новы чте́нїе:

Првⷣницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѡрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый, прпⷣбїе: Поѻстри́тъ же напра́сный гнѣ́въ во ѡ҆рꙋ́жїе: спобо́ретъ же съ ни́мъ мӏ́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, И҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы́кѡвъ: Ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

Премꙋ́дрости соломѡ́новы чте́нїе:

Првⷣникъ, а҆́ще пости́гнетъ сконча́тисѧ, въ поко́и бꙋ́детъ: ѡ҆сꙋ́дитъ же првⷣникъ ᲂу҆мира́ѧй живꙋ́щыѧ нечести̑выѧ. Оу҆́зрѧтъ бо кончи́нꙋ првⷣнагѡ, и҆ не разꙋмѣ́ютъ, что̀ совѣща́ша ѡ҆ не́мъ: Ꙗ҆́кѡ пове́ржетъ гдⷭ҇ь нечести̑выѧ безгла̑сны ни́цъ, и҆ поколе́блетъ и҆̀хъ ѿ ѡ҆снова́нїй, и҆ до послѣ́днѧгѡ и҆сче́знꙋтъ въ болѣ́зни, и҆ па́мѧть и҆́хъ поги́бнетъ. Прїи́дꙋтъ бо въ помышле́нїе согрѣше́нїй свои́хъ ᲂу҆жа́сни, и҆ ѡ҆бличи́тъ и҆́хъ сопроти́въ беззако́нїѧ и҆́хъ. Тогда̀ ста́нетъ въ дерзнове́нїи мно́зѣ првⷣникъ предꙿ лице́мъ ѡ҆скорби́вшихъ є҆го̀, и҆ ѿмета́ющихъ трꙋды̀ є҆гѡ̀. Ви́дѣвше же є҆го̀, смѧтꙋ́тсѧ стра́хомъ мно́гимъ, и҆ ᲂу҆жа́снꙋтсѧ ѡ҆ пресла́вномъ сп҃се́нїи є҆гѡ̀. Рекꙋ́тъ бо въ себѣ̀ ка́ющесѧ, и҆ въ тѣснотѣ̀ дꙋ́ха воздо́хнꙋтъ, и҆ рекꙋ́тъ: се́й бѣ̀, є҆го́же и҆мѣ́хомъ нѣ́когда въ посмѣ́хъ, и҆ въ при́тчꙋ поноше́нїѧ. Безꙋ́мнїи, житїѐ є҆гѡ̀ вмѣни́хомъ неи́стово, и҆ кончи́нꙋ є҆гѡ̀ безче́стнꙋ. Ка́кѡ вмѣни́сѧ въ сн҃ѣ́хъ бж҃їихъ, и҆ во ст҃ы́хъ жре́бїй є҆гѡ̀ є҆́сть; Оу҆̀бо заблꙋди́хомъ ѿ пꙋтѝ и҆́стиннагѡ, и҆ пра́вды свѣ́тъ не ѡ҆блиста̀ на́мъ, и҆ со́лнце не возсїѧ̀ на́мъ. Беззако́нныхъ и҆спо́лнихомсѧ сте́зь и҆ поги́бели, и҆ ходи́хомъ стези̑ непрохѡ́дны, пꙋти́ же гдⷭ҇нѧ не разꙋмѣ́хомъ.

На лїтӏ́и стїхи́ра хра́ма, и҆ прпⷣбнагѡ, гла́съ и҃:

Но́вагѡ валаа́ма подви́жниче, любе́зна тебѣ̀ бра́тїѧ бы́сть, съ не́юже на валаа́мѣ ѻ҆те́чественнѣмъ пожи́лъ є҆сѝ. стокра́тъ же вожделѣ́ннѣйше тѝ бѧ́хꙋ безпло́тнїи дрꙋ́зи, и҆̀же восхища́хꙋ къ бг҃озрѣ́нїю дꙋ́шꙋ твою̀, съ ни́миже ны́нѣ соводворѧ́ѧсѧ, ра́дꙋйсѧ, ѻ҆́тче, ѡ҆ прославлѧ́ющихъ па́мѧть твою̀, наставлѧ́ѧ неви́димѡ ны̀ къ до́бромꙋ покаѧ́нїю. рꙋ́сскїѧ землѝ прозѧбе́нїе, ла́дожскихъ во́дъ воспита́нїе, а҆леꙋ́тскихъ ѻ҆стровѡ́въ и҆ а҆лѧ́ски цр҃ко́вное бл҃гослове́нїе, а҆ме́рики до́браѧ наде́ждо, правосла́вїѧ блгⷣтное свидѣ́тельство, ге́рмане, ᲂу҆го́дниче бж҃їй, и҆спросѝ на́мъ ми́ръ бж҃їй, превосходѧ́щїй всѧ́къ ѹ҆́мъ, и҆ ве́лїю млⷭ҇ть. Сла́ва, гла́съ и҃:

Прибли́зившꙋсѧ ѿше́ствїю прпⷣбнагѡ, свѣща́мъ горѧ́щымъ и҆ а҆пⷭ҇льскимъ дѣѧ́нїємъ ᲂу҆ ѻ҆дра̀ є҆гѡ̀ чтѡ́мымъ, ди́внѡ просїѧ̀ ст҃ы́й ге́рманъ: сла́ва тебѣ̀, гдⷭ҇и, ре́къ. и҆ є҆щѐ седми́цꙋ днӏ́й житїѧ̀ ѿ сп҃са та́йнѡ прїе́мъ, пожда̀ прорече́ннагѡ днѐ. тогда́ же па́ки свѣща́мъ горѧ́щымъ и҆ дѣѧ́нїємъ чтѡ́мымъ, почѝ во бл҃гоꙋха́нїи по́двига своегѡ̀, многопло́днѡ и҆ првⷣнѡ пожи́въ, па́ки же вѣ́чнѡ живы́й, гдⷭ҇а сла́вы молѧ̀ при́снѡ ѡ҆ на́съ.

И҆ ны́нѣ, бг҃оро́диченъ, гла́съ то́йже:

Влⷣчце бцⷣе дв҃о, ꙗ҆́коже и҆сцѣли́ла є҆сѝ ге́рмана прпⷣбнаго, вне́млющи при́снѡ проше́нїємъ є҆гѡ̀, и҆ на́съ, воспѣва́ющихъ тѧ̀, поми́лꙋй.

На стїхо́внѣ стїхи̑ры, гла́съ є҃.

Подо́бенъ: Ра́дꙋйсѧ:

Ра́дꙋйсѧ, живоно́сный крⷭ҇те,* бл҃гочⷭ҇тїѧ непобѣди́маѧ побѣ́да,* тобо́ю бо две́рь ра́йскаѧ ѿве́рзесѧ,* и҆ дарова́сѧ нѡ́вымъ зе́млѧмъ ѡ҆заре́нїе,* и҆ тлѧ̀ і҆́дѡльскаѧ ᲂу҆праздни́сѧ,* и҆ попра́сѧ сме́ртнаѧ держа́ва,* и҆ земноро́днїи возно́сѧтсѧ къ нбⷭ҇нымъ:* ра́дꙋйтесѧ, вѣ́рнїи, и҆ весели́тесѧ,* ꙗ҆́кѡ сла́ва живоно́снагѡ крⷭ҇та̀,* но́выхъ мч҃никѡвъ* и҆ прпⷣбнагѡ ге́рмана ᲂу҆пова́нїе,* въ странѣ̀ но́вѣй провозглаша́етсѧ,* и҆ всѣ̑мъ вѣ̑рнымъ подае́тъ* ве́лїю и҆ бога́тꙋю млⷭ҇ть.

Стӏ́хъ: Чтна̀ предꙿ гдⷭ҇емъ сме́рть прпⷣбныхъ є҆гѡ̀.

Ра́дꙋйсѧ, прпⷣбный наста́вниче* новоизбра́ннагѡ ста́да хрⷭ҇то́ва,* блгⷣтїю сло́ва бж҃їѧ* сердца̀ невѣ̑дꙋщаѧ просвѣти́вый,* дꙋ́хомъ кро́тости и҆ смире́нїѧ* бл҃гочⷭ҇тїю наꙋчи́вый,* братолю́бїемъ и҆ млⷭ҇рдїемъ* вѣ́ры и҆́стинꙋ вкорени́вый.* Ѽ ди́вне ста́рче ге́рмане,* свѣ́та хрⷭ҇то́ва провозвѣ́стниче* и҆ тьмы̀ бѣсо́вскїѧ ѿгони́телю,* просвѣтѝ и҆ на̑ша сердца̀,* ѿгна́въ тьмꙋ̀ невѣ́рїѧ,* да ѡ҆брѧ́щемъ ᲂу҆ гдⷭ҇а ве́лїю млⷭ҇ть.

Стӏ́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;

Ра́дꙋйсѧ, застꙋ́пниче предꙿ си́льными мӏ́ра сегѡ̀* за новопросвѣщє́нныѧ лю́ди,* препрѡ́стыѧ и҆ смирє́нныѧ!* ты́ бо кро́вїю срⷣца своегѡ̀* хода́тай бы́лъ є҆сѝ си̑мъ,* ꙗ҆́кѡ пѣ́стꙋнъ и҆ слꙋга̀ нижа́йшїй ро́да и҆́хъ,* та́же дрꙋ́гъ недꙋ́гꙋющымъ ꙗ҆́звою неисцѣ́льною,* денноно́щнѡ слы́ша во́пли и҆ сто́ны и҆́хъ,* ᲂу҆тѣша́ѧ, вле́клъ є҆сѝ и҆̀хъ къ врачевствꙋ̀ нбⷭ҇номꙋ.* Ѽ безстра́шный па́стырю ста́да своегѡ̀,* а҆́ще и҆ ᲂу҆клони́лсѧ є҆сѝ са́на і҆ере́йска!* ра́дꙋйсѧ, ѕвѣ́рѧ ди́вїѧ ми́лꙋѧй,* ꙗ҆́коже серафӏ́мъ прпⷣбный:* ра́дꙋйсѧ, пла́менемъ вѣ́ры ᲂу҆кроти́вый пожа́ра веще́ственный ѻ҆́гнь.

Сла́ва, гла́съ ѕ҃:

Прпⷣбне ѻ҆́тче, во всю̀ зе́млю и҆зы́де вѣща́нїе и҆справле́нїй твои́хъ: тѣ́мже на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскаѧ разори́лъ є҆сѝ пѡ́лчища, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ непоро́чнѡ поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.

И҆ ны́нѣ, бг҃оро́диченъ, гла́съ то́йже: Творе́цъ и҆ и҆зба́витель мо́й:

Тропа́рь прбⷣнагѡ, гла́съ д҃, пи́санъ на ма́лѣй вече́рни.

Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́ное:

А҆́ще бдѣ́нїе соверша́етсѧ: тропа́рь ст҃а́гѡ два́жды,

и҆ Бцⷣе, дв҃о: є҆ди́ножды.

П одо б а́ е т ъ в ѣ́ д а т и : а҆́ще слꙋчи́тсѧ па́мѧть прпⷣбнагѡ въ недѣ́лю пра́ѻтєцъ,

пое́тсѧ возслѣ́дованїе є҆гѡ̀ вкꙋ́пѣ съ воскрⷭ҇ною слꙋ́жбою по ма́рковой главѣ̀ деке́мврїа

мцⷭ҇а въ з҃і де́нь, па́мѧти ст҃а́гѡ прⷪ҇ро́ка данїи́ла, и҆ ст҃ы́хъ трїе́хъ ѻ҆трокѡ́въ.

На ѹ҆́трени.

На Бг҃ъ гдⷭ҇ь: тропа́рь два́жды. Сла́ва, и҆ ны́нѣ, бг҃оро́диченъ.

По а҃-мъ стїхосло́вїи сѣда́ленъ, гла́съ г҃.

Подо́бенъ: Красотѣ̀ двⷭ҇тва:

Вне́млѧ зо́вꙋ гдⷭ҇ню, и҆ всѧ̑ кра̑снаѧ мӏ́ра въ ᲂу҆ме́ты вмѣни́въ, краснѣ́йшїѧ пꙋсты́ни дости́глъ є҆сѝ, въ странѣ̀ ди́вїей и҆ да́льней, и҆дѣ́же полкѝ де́монѡвъ мꙋ́жески ѿрази́въ, а҆́гг҃лы и҆мѣ́лъ є҆сѝ собесѣ́дники и҆ споспѣ́шники: сегѡ̀ ра́ди ꙗ҆́кѡ ди́вное ᲂу҆краше́нїе пꙋсты́ни, тѧ̀ восхвалѧ́емъ. Два́жды.

Сла́ва, и҆ ны́нѣ, бг҃оро́диченъ:

Ꙗ҆́кѡ є҆ди́но хрⷭ҇тїа́нъ ᲂу҆пова́нїе и҆ къ бг҃ꙋ предста́тельница, влⷣчце, съ прпⷣбнымъ ге́рманомъ молѝ сн҃а твоего̀ ѡ҆ рабѣ́хъ твои́хъ.

По в҃-мъ стїхосло́вїи сѣда́ленъ, гла́съ а҃.

Подо́бенъ: Гро́бъ тво́й, сп҃се:

Ꙗ҆зы́ки невѣ́дꙋщыѧ наꙋча́ѧ, ѡ҆браща́ѧ же невѣ́рꙋющыѧ, вѣ́рꙋ и҆́стиннꙋю насажда́лъ є҆сѝ, всѧ́кѡ трꙋжда́ѧсѧ и҆ бл҃гочⷭ҇тїемъ свои́мъ назида́ѧ: тѣ́мже и҆ на́съ, прпⷣбне ге́рмане, и҆́стинствовати наꙋчѝ и҆ бл҃гочє́стнаѧ твори́ти. Два́жды.

Сла́ва, и҆ ны́нѣ, бг҃оро́диченъ:

И҆мꙋ́ще тѧ̀, пречⷭ҇таѧ мт҃и, при́сное ᲂу҆пова́нїе и҆ покро́въ, на тѧ̀ надѣ́ющесѧ, вра́жїихъ навѣ̑тъ не ᲂу҆бои́мсѧ, ꙗ҆́кѡ сп҃са́еши дꙋ́шы на́шѧ ѿ всѧ́кихъ лю́тыхъ.

Полѷеле́й, и҆ велича́нїе:

Оу҆бл҃жа́емъ тѧ̀, прпⷣбне ѻ҆́тче на́шъ ге́рмане, и҆ чти́мъ ст҃ꙋ́ю па́мѧть твою̀, наста́вниче мона́хѡвъ, и҆ собесѣ́дниче а҆́гг҃лѡвъ. Ѱало́мъ и҆збра́нный:

Терпѧ̀, потерпѣ́хъ гдⷭ҇а, и҆ внѧ́тъ мѝ, и҆ ᲂу҆слы́ша мл҃твꙋ мою̀.

По полѷеле́и сѣда́ленъ, гла́съ г҃. Подо́бенъ: Красотѣ̀ двⷭ҇тва:

На бре́ннѣмъ кораблѝ, прпⷣбне, бꙋ́рнꙋю пꙋчи́нꙋ мо́рѧ пресѣка́еши, да́же до страны̀ да́льнїѧ доше́дъ, и҆дѣ́же ѻ҆́стровъ є҆ло́вый бѧ́ше тѝ дх҃о́вный кора́бль, на не́мже сло́вомъ бл҃говѣствова́нїѧ и҆ дѣ́лы бл҃гочⷭ҇тїѧ дости́глъ є҆сѝ при́стани нбⷭ҇ныѧ, ра́дꙋѧсѧ ѡ҆ гдⷭ҇ѣ. Два́жды.

Сла́ва, и҆ ны́нѣ, бг҃оро́диченъ:

Влⷣчце на́ша, бцⷣе, превѣ́чное сло́во пло́тски на́мъ ꙗ҆ви́вшаѧ, къ тебѣ̀ прибѣга́емъ, ꙗ҆́кѡ къ на́шемꙋ покро́вꙋ и҆ застꙋпле́нїю: покры́й на́съ твои́мъ мл҃твеннымъ ѡ҆мофо́ромъ ѿ всѧ́кихъ навѣ́тѡвъ вра́жїихъ, да безпреткнове́ннѡ возмо́жемъ слꙋжи́ти сн҃ꙋ твоемꙋ̀.

Прокӏ́менъ, гла́съ д҃: Чтна̀ предꙿ гдⷭ҇емъ сме́рть прпⷣбныхъ є҆гѡ̀. Стӏ́хъ:

Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;

Є҆ѵⷢ҇лїе ѿ матѳе́а, зача́ло м҃г: Речѐ гдⷭ҇ь свои̑мъ ᲂу҆ченикѡ́мъ: всѧ̑ мнѣ̀ предана̑ сꙋ́ть:

По н҃-мъ ѱалмѣ̀: Мл҃твами прпⷣбнагѡ ге́рмана:

Та́же стїхи́ра, гла́съ ѕ҃:

Ка̑ѧ нѣ̑дра землѝ и҆лѝ ка̑ѧ лѣ̑та, Ѽ ге́рмане прпⷣбне, возмо́гꙋтъ сокры́ти сла́вꙋ твою̀, сꙋ́щꙋю на нб҃сѣ́хъ; тѣ́мъ ны́нѣ сла́вѧще припа́даемъ тѝ, мы̀, ча̑да твоегѡ̀ наро́да, хода́таѧ тѧ̀ и҆мѣ́ѧ предꙿ гдⷭ҇емъ, є҆го́же молѝ пода́ти сп҃се́нїе многострада́льнѣй странѣ̀ рѡссӏ́йстѣй, странѣ̀ се́й бл҃годе́нствїе, и҆ дꙋша́мъ на́шымъ ве́лїю млⷭ҇ть.

Канѡ́нъ бцⷣѣ со і҆рмосо́мъ на ѕ҃: Во́дꙋ проше́дъ: и҆ прпⷣбномꙋ на и҃,

є҆гѡ́же краегране́сїе: Возлю́бимъ бг҃а па́че всегѡ̀, и҆ ге́рмана воспои́мъ.

Гла́съ г҃. Пѣ́снь а҃.

І҆рмо́съ: Во́ды дре́вле, ма́нїемъ бжⷭ҇твеннымъ, во є҆ди́но со́нмище совокꙋпи́вый, и҆ раздѣли́вый мо́ре і҆и҃льтєскимъ лю́демъ, се́й бг҃ъ на́шъ, препросла́вленъ є҆́сть: томꙋ̀ є҆ди́номꙋ пои́мъ, ꙗ҆́кѡ просла́висѧ.

Воспѣ́ти помозѝ мѝ, всемлⷭ҇тивый сп҃се, ᲂу҆го́дника твоего̀ ге́рмана, просвѣща́ѧ помрачє́нныѧ ѻ҆́чи дꙋшѝ моеѧ̀, да просла́витсѧ се́й въ концы̀ вселе́нныѧ, сла́вный во ст҃ы́хъ твои́хъ.

Ѻ҆те́чества нбⷭ҇нагѡ, прпⷣбне ге́рмане, ѿ ю҆́ности взыска́ти восхотѣ́въ и҆ бг҃ꙋ є҆ди́номꙋ порабо́тати, нбⷭ҇номꙋ покро́вꙋ вда́лсѧ є҆сѝ, застꙋ́пники вы́нꙋ и҆мѣ́ѧ се́ргїа и҆ ге́рмана валаа́мскихъ.

За́пѡвѣди гдⷭ҇ни, прпⷣбне, и҆мы́й вы́нꙋ въ срⷣцѣ свое́мъ, никогда́же пꙋ́тѡмъ лѣ́ности вда́лъ є҆сѝ тѣ́ло твоѐ, при́снѡ трꙋжда́ѧсѧ, и҆ бжⷭ҇твенными ѡ҆зарє́нїи просвѣща́ѧ дꙋ́шꙋ твою̀.

Любо́вь къ бг҃ꙋ и҆мѣ́ѧй превы́ше всегѡ̀, томꙋ̀ всѐ житїѐ своѐ пре́далъ є҆сѝ, бесѣ́дꙋ съ вы́шними ли̑ки наипа́че возлю́бль. ѻ҆ба́че и҆ ꙗ҆́же къ бра́тїи любвѐ не чꙋжда́лсѧ є҆сѝ, прпⷣбне, кꙋ́пнѡ молѧ́сѧ и҆ вопїѧ̀ съ ни́ми: і҆и҃се сладча́йшїй, сп҃сѝ на́съ, грѣ́шныхъ.

Бг҃оро́диченъ: Ю҆́наго ге́рмана, бцⷣе, ѿ сме́ртнагѡ недꙋ́га и҆сцѣли́ла є҆сѝ, тогѡ̀ горѧ́чемꙋ моле́нїю вне́млѧ: тѣ́мже и҆ на́съ не пре́зри, къ тебѣ̀ припа́дающихъ, и҆ въ мл҃твꙋ къ тебѣ̀ того̀ призыва́ющихъ.

Катава́сїа: Хрⷭ҇то́съ ражда́етсѧ: Пѣ́снь г҃.

І҆рмо́съ: И҆́же ѿ не сꙋ́щихъ всѧ̑ приведы́й, сло́вомъ созида́ємаѧ, соверша́ємаѧ дх҃омъ, вседержи́телю вы́шнїй, въ любвѝ твое́й ᲂу҆твердѝ менѐ.

Бг҃омꙋ́дрый наза́рїй на валаа́мъ и҆зꙿ саро́ва прише́дъ, къ внꙋ́треннемꙋ дѣ́ланїю любо́вь водворѝ: тѣ́мже и҆ ты̀, прпⷣбне, прїѡбщи́всѧ сеѧ̀ блгⷣти, дх҃о́вными ѡ҆зарє́нїи ᲂу҆гото́валъ є҆сѝ дꙋ́шꙋ твою̀ на по́двигъ бл҃говѣ́стїѧ.

И҆̀же вїногра́да хрⷭ҇то́ва ро́ждїе плодоно́снїи сꙋ́ще, се́ргїе и҆ ге́рмане валаа́мстїи, гроздьмѝ добродѣ́телей но́ваго ге́рмана напита́вшїи, вїно́мъ бжⷭ҇твеннагѡ весе́лїѧ и҆спо́лните и҆ на̑ша сердца̀.

Мл҃твою и҆ дѣѧ́нїемъ ᲂу҆гото́валъ є҆сѝ дꙋ́шꙋ твою̀ на всѧ́кое послꙋша́нїе, тѣ́мже и҆ страны̀ да́льнїѧ дости́глъ є҆сѝ, кꙋ́пнѡ съ бра́тїею бл҃говѣ́стническою, приводѧ̀ жи́тєли а҆лѧ́ски ко і҆и҃сꙋ сладча́йшемꙋ.

Бг҃оро́диченъ: Бл҃га́гѡ цр҃ѧ̀ бл҃га́ѧ мт҃и, бл҃годѣѧ̑нїѧ на рабы̑ твоѧ̑ при́снѡ и҆злива́ющаѧ, на всѧ́кое бл҃го́е дѣ́ло наста́ви на́съ, ѿ всѧ́кихъ дѣ́йствъ ѕлы́хъ ѡ҆гражда́ющи.

Сѣда́ленъ, гла́съ г҃.

Подо́бенъ: Красотѣ̀ двⷭ҇тва:

Приспѣ̀ дне́сь па́мѧть твоѧ̀, ѻ҆́тче ге́рмане прехва́льне, веселѧ́щи и҆збра́нное твоѐ ста́до: просвѣща́й на́съ чꙋде́съ твои́хъ свѣтлостьмѝ, ѿ чⷭ҇тны́хъ твои́хъ моще́й и҆сходѧ́щихъ, погаша́й пла́мень страсте́й на́шихъ, и҆ ѡ҆роша́й вѣ́рныхъ ра́зꙋмы, любо́вїю при́снѡ тѧ̀ сла́вѧщихъ. Два́жды.

Сла́ва, и҆ ны́нѣ, бг҃оро́диченъ:

Ра́дꙋйсѧ, блгⷣтнаѧ дв҃о, ꙗ҆́кѡ и҆збра́нника твоего̀ но́ваго на́мъ ꙗ҆влѧ́еши, въ сѣ́верной пꙋсты́ни прозѧ́бшаго, и҆ нбⷭ҇ными да̑ры новопросвѣще́нный кра́й ѡ҆бл҃гоꙋха́вшаго: тѣ́мъ тѧ̀, влⷣчцꙋ мӏ́ра, бл҃года́рными пѣ́сньми почти́мъ.

Пѣ́снь д҃.

І҆рмо́съ: Положи́лъ є҆сѝ къ на́мъ тве́рдꙋю любо́вь, гдⷭ҇и: є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ, бл҃годарѧ́ще: сла́ва си́лѣ твое́й, гдⷭ҇и.

Ѡ҆́бразъ до́брагѡ па́стырѧ и҆ чадолюби́вагѡ ѻ҆тца̀ ꙗ҆ви́лъ є҆сѝ на́мъ, прпⷣбне, ꙗ҆́кѡ ᲂу҆бѡ́гимъ, немѡщны́мъ и҆ болѧ́щымъ бы́лъ є҆сѝ по́мощь и҆ и҆сцѣле́нїе, сирота́мъ же кро́въ и҆ наꙋче́нїе. тѣ́мже и҆ на́съ, ꙗ҆́кѡ си́рыхъ, не лишѝ своегѡ̀ мл҃твеннагѡ покро́ва.

Ге́рмане прпⷣбне, дивлѧ́хꙋсѧ лю́дїе, ка́кѡ мо́жеши въ лѣсꙋ̀ є҆ди́нъ жи́ти; не є҆ди́нъ а҆́зъ, ре́клъ є҆сѝ, но со мно́ю бг҃ъ, и҆́же вездѣ̀ сы́й, и҆ а҆́гг҃ли є҆гѡ̀ ст҃ӏ́и, тѣ́мже ка́кѡ возмо́жно ᲂу҆ныва́ти, такѡвы́ѧ собесѣ́дники и҆мѣ́ѧ; ны́нѣ же нбⷭ҇ныхъ сожи́телю, на́съ, сꙋ́щихъ на землѝ, не ѡ҆ста́ви.

А҆лѧ́ски храни́телю, но́выхъ наро́дѡвъ слꙋгꙋ̀ и҆ пѣ́стꙋна себѐ и҆менова́вый, и҆ по сме́рти своѐ попече́нїе ѡ҆ си́хъ простира́еши. сѐ ны́нѣ и҆ мы̀ твои́ми словесы̀ взыва́емъ тѝ: бꙋ́ди на́мъ ѻ҆́те́цъ и҆ покрови́тель, ѡ҆трѝ сле́зы беззащи́тныхъ сиро́тъ, прохладѝ сердца̀, жа́ромъ печа́ли та̑ющаѧ, да́ждь разꙋмѣ́ти, что̀ є҆́сть ѿра́да гдⷭ҇нѧ.

Бг҃оро́диченъ: Прїиди́те, воспои́мъ пречⷭ҇тꙋю дв҃ꙋ, свои́мъ смире́нїемъ є҆́же є҆́ѵы преле́стное и҆спра́вившꙋю, и҆ но́ваго а҆да́ма на́мъ ꙗ҆́вльшꙋю, да но́вое всыновле́нїе воспрїи́мше, наслѣ̑дницы бꙋ́демъ вѣ́чныѧ жи́зни.

Пѣ́снь є҃.

І҆рмо́съ: Къ тебѣ̀ ѹ҆́тренюю, всѣ́хъ творцꙋ̀, преимꙋ́щемꙋ всѧ́къ ѹ҆́мъ мӏ́рови: занѐ свѣ́тъ повелѣ̑нїѧ твоѧ̑, въ ни́хже наста́ви мѧ̀.

А҆да́мꙋ первозда́нномꙋ ᲂу҆подо́билсѧ є҆сѝ, є҆гда̀ мно́гими скорбьмѝ, бдѣ̑нїи и҆ мл҃твами ѡ҆чⷭ҇тившꙋ тѝ дꙋ́шꙋ твою̀, и҆ въ красотꙋ̀ пе́рвꙋю ѡ҆бле́кшꙋ, лѣснӏ́и ѕвѣ̑ри повинова́хꙋсѧ тебѣ̀, є҆́же ра́йское и҆ ца́рское въ тебѣ̀ ѡ҆бонѧ́въ.

Чꙋ́вствєнныѧ стра̑сти бразда́ми воздержа́нїѧ и҆ мл҃твою непреста́нною препобѣжда́ѧ, на высотꙋ̀ безстра́стїѧ дости́глъ є҆сѝ. сегѡ̀ ра́ди припа́даемъ тѝ, ꙗ҆́кѡ къ блгⷣтномꙋ врачꙋ̀: ᲂу҆врачꙋ́й на́шѧ стра̑сти, и҆ подви́гни на дѣла̀ бл҃га̑ѧ.

Є҆ди́номꙋ бг҃ꙋ та́йнѡ порабо́тати хотѧ̀, въ пеще́рѣ посели́лсѧ є҆сѝ, є҆́же стра́стное пло́ти тща́сѧ погребстѝ, да дꙋше́ю воскре́снеши, нбⷭ҇ными ѡ҆зарє́нїи ѡ҆сїѧва́емь, вѣ́чныѧ па́схи предвкꙋша́ѧ сла́дость.

Въ ра́й мы́сленный добродѣ́телей вше́лъ є҆сѝ, и҆дѣ́же произрасти́лъ є҆сѝ многоразли̑чныѧ цвѣ́ты добродѣ́ланїѧ, и҆́миже въ мӏ́рѣ бл҃гоꙋха́еши, ѻ҆́тче ге́рмане, да́же и҆ до ны́нѣ.

Бг҃оро́диченъ: Ст҃ы́хъ а҆́гг҃лѡвъ ли́цы пою́тъ бл҃голѣ́пїе твоѐ, а҆́зъ же грѣ́шный, пренепоро́чнаѧ, молю́ тѧ: ѿженѝ ѿ менє̀ нелѣ̑паѧ бѣсѡ́вскаѧ мечта̑нїѧ, въ тишинѣ̀ соблюда́ющи срⷣце моѐ.

Пѣ́снь ѕ҃.

І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ и҆счеза́етъ дꙋ́хъ мо́й: но простры́й, влⷣко, высо́кꙋю твою̀ мы́шцꙋ, ꙗ҆́кѡ петра̀ мѧ̀, ᲂу҆пра́вителю, сп҃сѝ.

Є҆ѵⷢ҇льскагѡ ра́ди бл҃говѣствова́нїѧ да́же до конє́цъ вселе́нныѧ преше́лъ є҆сѝ, и҆ мѣ́сто но́вое, ѻ҆́стровъ є҆ло́вый, но́вый валаа́мъ наре́клъ є҆сѝ, къ ѻ҆те́чественномꙋ валаа́мꙋ любо́вь показꙋ́ѧ, въ не́мъ же нѡ́выѧ бра̑тїѧ, лю́ди новопросвѣщє́нныѧ, стѧжа́лъ є҆сѝ, сло́вомъ проповѣ́данїѧ и҆ дѣ́лы бл҃гочⷭ҇тїѧ.

Гдⷭ҇ь просла́ви собра́тїй твои́хъ, прпⷣбне, ꙗ҆́кѡ вои́стиннꙋ а҆пⷭ҇льскимъ подвигѡ́мъ ᲂу҆подо́бишасѧ дѣѧ̑нїѧ и҆́хъ: въ ли́цѣ мч҃ничестѣмъ пое́тъ і҆ꙋвена́лїй, въ чи́нѣ ст҃и́тельстѣмъ і҆ѡаса́фъ и҆ і҆нноке́нтїй и҆ и҆́ны съ ни́ми, и҆ мы̀ кꙋ́пнѡ къ бг҃ꙋ воспое́мъ: сла́ва тебѣ̀, показа́вшемꙋ на́мъ свѣ́тъ.

Ѡ҆сщ҃е́нїе и҆ вѣнча́нїе прїе́млютъ трꙋды̀ твоѝ и҆ твои́хъ собл҃говѣ́стникѡвъ, прпⷣбне, и҆сповѣ́данїемъ и҆ мч҃ническими кровьмѝ а҆леꙋ́та петра̀, є҆гѡ́же крѣ́пкой вѣ́рѣ и҆ терпѣ́нїю подиви́лсѧ є҆сѝ. тѣ́мже тебѣ̀ послѣ́дꙋюще, воззове́мъ: ст҃ы́й новомч҃ниче пе́тре, молѝ бг҃а ѡ҆ на́съ.

И҆́стинныѧ вѣ́ры ѡ҆правда́нїе ꙗ҆ви́лъ є҆сѝ житїе́мъ твои́мъ, прпⷣбне, тѣ́мже и҆ наꙋче́нїе сло́ва твоегѡ̀, ꙗ҆́кѡ сотво́ршагѡ, дѣ́йствомъ проѧвлѧ́шесѧ, жа̑ждꙋщаѧ сердца̀ влекꙋ́ще ко и҆справле́нїю, тебѣ̀ зовꙋ́щꙋ: сла́ва сꙋдьба́мъ ст҃ы̑мъ млⷭ҇тивагѡ бг҃а.

Бг҃оро́диченъ: Грѧди́те, лю́дїе, да ви́димъ, ꙗ҆́кѡ во́ды бꙋ̑рныѧ, и҆мꙋ́щыѧ ѻ҆́стровъ поглоти́ти, кро́ткомꙋ ге́рманꙋ повинꙋ́ютсѧ: предꙿ і҆кѡ́ною бж҃їѧ мт҃ре смирѧ́ютсѧ, и҆ въ бе́зднꙋ ѻ҆кеа́на па́ки возвраща́ютсѧ. мы́ же, волна́ми жите́йскими ѡ҆бꙋрева́еми, со и҆збра́нникомъ бж҃їѧ мт҃ре возопїи́мъ: прест҃а́ѧ бцⷣе, сп҃сѝ на́съ.

Конда́къ, гла́съ и҃:

Валаа́ма постри́жениче и҆ бж҃їи мт҃ри возлю́бленне, подвигѡ́мъ дре́внихъ пꙋсты́нникѡвъ но́вый ревни́телю, мл҃твꙋ прїе́мъ, ꙗ҆́кѡ копїѐ и҆ щи́тъ, стра́шенъ де́монѡмъ и҆ тьмѣ̀ ꙗ҆зы́честѣй ꙗ҆ви́лсѧ є҆сѝ, сегѡ̀ ра́ди вопїе́мъ тѝ, прпⷣбне ге́рмане: молѝ хрⷭ҇та̀ бг҃а, сп҃сти́сѧ дꙋша́мъ на́шымъ.

І҆́косъ: Ѿ ро́да на́шегѡ бы́въ, и҆ ѿ ю҆́ности ко гдⷭ҇ꙋ прибѣ́гъ, ге́рманꙋ валаа́мскомꙋ и҆́менемъ и҆ по́двигомъ подо́бный, растѧ́ше въ мѣ́рꙋ дре́внихъ ѻ҆тцє́въ, въ терпѣ́нїи плодоприне́сшихъ. и҆ посла́сѧ кро́ткїй се́й ко а҆леꙋ̑тскимъ лю́демъ, є҆щѐ не просвѣщє́ннымъ: же́стоко бѣ̀ є҆гѡ̀ жи́тельство междꙋ̀ ꙗ҆зы́ка препро́ста, же́стоко же па́че и҆ ѿ соплемє́нникъ дѡ́брымъ ᲂу҆вѣща́нїємъ противле́нїе. ѻ҆ба́че и҆ тѣ́хъ и҆ си́хъ ми́лꙋѧ, пѣ́стоваше кро́тость ге́рманова. за всѧ̑ та̑ѧ сла́вѧще па́мѧть твою̀, ге́рмане прпⷣбне, взыва́емъ тѝ: молѝ хрⷭ҇та̀ бг҃а, сп҃сти́сѧ дꙋша́мъ на́шымъ.

Пѣ́снь з҃.

І҆рмо́съ: Ꙗ҆́коже дре́вле бл҃гочⷭ҇ти̑выѧ трѝ ѻ҆́троки ѡ҆роси́лъ є҆сѝ въ пла́мени халде́йстѣмъ, свѣ́тлымъ бж҃ества̀ ѻ҆гне́мъ и҆ на́съ ѡ҆зарѝ, бл҃гослове́нъ є҆сѝ, взыва́ющыѧ, бж҃е ѻ҆҆҆тє́цъ на́шихъ.

Є҆стества̀ чи́нъ премѣнѧ́етсѧ, дх҃ꙋ бжⷭ҇твенномꙋ дѣ́йствꙋющꙋ: є҆гѡ́же ѡ҆зарє́нїи, прпⷣбне, просвѣти́въ дꙋшє́вныѧ ѻ҆́чи твоѝ, зрѣ́лъ є҆сѝ да̑льнѧѧ, ꙗ҆́кѡ бли́зъ сꙋ̑щаѧ, и҆ бꙋ̑дꙋщаѧ, ꙗ҆́кѡ настоѧ̑щаѧ, сꙋдьбы̑ бжⷭ҇твєнныѧ повѣ́даѧ къ назида́нїю и҆ и҆справле́нїю.

Ревнꙋ́ѧ ѡ҆ нбⷭ҇ныхъ, на нб҃сѝ сокрѡ́вища своѧ̑ полага́лъ є҆сѝ: тѣ́мже и҆́щꙋщїи земны́хъ сокро́вищъ ничто́же ѡ҆брѣто́ша въ ке́ллїи твое́й. и҆ на́съ ны́нѣ, ѻ҆́тче безсре́бренниче, наꙋчѝ нбⷭ҇наѧ сокро́виществовати, и҆ срⷣце своѐ къ є҆ди́номꙋ безцѣ́нномꙋ прилага́ти.

Мнѡ́ги скѡ́рби првⷣникꙋ, и҆ ѿ всѣ́хъ и҆́хъ и҆збавлѧ́ше тѧ̀ гдⷭ҇ь, нбⷭ҇ною ра́достїю наполнѧ́ѧ срⷣце твоѐ, є҆ѧ́же ны́нѣ наслажда́ешисѧ въ невече́рнемъ днѝ црⷭ҇твїѧ хрⷭ҇то́ва. и҆ ѡ҆ на́съ моли́сѧ, прпⷣбне, да на́шѧ скѡ́рби гдⷭ҇ь въ ра́дость претвори́тъ.

Бг҃оро́диченъ: А҆́гг҃лѡвъ ра́дованїе, и҆ мона́шескагѡ чи́на наста́вницꙋ, и҆ всегѡ̀ ро́да хрⷭ҇тїа́нскагѡ покрови́тельницꙋ, прїиди́те всѝ, почти́мъ и҆ поклони́мсѧ, ꙗ҆́кѡ цр҃и́цѣ нб҃сѐ и҆ землѝ, и҆ земноро́дныхъ къ бг҃ꙋ непреста́нной предста́тельницѣ.

Пѣ́снь и҃.

І҆рмо́съ: Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́нѡши, пла́менемъ же неврежде́ни, бжⷭ҇твеннꙋю пѣ́снь поѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.

Не́мощь твоѧ̀, ста́рость и҆ слѣпота̀ ѻ҆чи́ма, ничто́же можа́ше возбрани́ти тѝ, хода́тайствꙋющꙋ за лю́ди предꙿ вла́сть и҆мꙋ́щими, и҆̀хже моли́лъ є҆сѝ млⷭ҇ть твори́ти па́че же́ртвы, да са́ми ᲂу҆ гдⷭ҇а ѡ҆брѧ́щꙋтъ ю҆̀. ны́нѣ же сы́й на нб҃сѝ, та́кожде и҆ на́съ не лишѝ своегѡ̀ хода́тайства.

А҆́гг҃льскимъ пѣ́нїемъ ѡ҆глаша́шесѧ лѣсна́ѧ ке́ллїа твоѧ̀, тебѣ̀ є҆ди́номꙋ пою́щꙋ, ꙗ҆́кѡ лю́демъ диви́тисѧ ѕѣлѡ̀. та́же слꙋжа́ше тѝ а҆́гг҃лъ, бл҃гослове́нїемъ і҆ѻрда́новымъ ѡ҆ст҃и́въ вѡ́ды, ꙗ҆́кѡ зва́ти тѝ: бл҃гослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.

Въ ри́зꙋ сп҃се́нїѧ и҆ въ ѻ҆де́ждꙋ весе́лїѧ ѡ҆бо́лксѧ, сотка́ннꙋю ѿ мно́гихъ трꙋдѡ́въ и҆ скорбе́й, вше́лъ є҆сѝ въ нбⷭ҇ный черто́гъ цр҃ѧ̀ хрⷭ҇та̀, и҆дѣ́же кꙋ́пнѡ съ ли̑ки а҆пⷭ҇лѡвъ и҆ прпⷣбныхъ пи́ра ра́дости вѣ́чнѡ наслажда́ешисѧ.

Бг҃оро́диченъ: Ѻ҆гнѧ̀ нестерпи́магѡ подо́бїемъ, грѣсѝ на́ши сожига́ютъ дꙋшѝ бл҃га̑ѧ начина̑нїѧ: сегѡ̀ ра́ди припа́даемъ тѝ, ꙗ҆́кѡ къ влⷣчцѣ нб҃сѐ и҆ землѝ, ѡ҆росѝ на̑ша сердца̀, да произрасте́тъ всѧ́кое дѣ́ло бл҃го́е. Пѣ́снь ѳ҃.

І҆рмо́съ: Но́вое чꙋ́до и҆ бг҃олѣ́пное: дв҃ческꙋю бо две́рь затворе́ннꙋю ꙗ҆́вѣ прохо́дитъ гдⷭ҇ь, на́гъ во вхо́дѣ, и҆ плотоно́сецъ ꙗ҆ви́сѧ во и҆схо́дѣ бг҃ъ, и҆ пребыва́етъ две́рь затворе́на: сїю̀ неизрече́ннѡ ꙗ҆́кѡ бг҃омт҃рь велича́емъ.

Сла́ва тебѣ̀, бж҃е, ꙗ҆ви́вшемꙋ на́мъ ди́внаго ᲂу҆го́дника твоего̀, є҆гѡ́же мл҃твами сохранѝ на́съ ѿ всѧ́кагѡ навѣ́та вра́жїѧ и҆ дꙋшетлѣ́нныхъ страсте́й, всѧ́комꙋ же бл҃гꙋ наста́ви, да вѣ́чнагѡ мꙋче́нїѧ и҆збѣ́гше, дости́гнемъ црⷭ҇твїѧ твоегѡ̀.

Приспѣ̀ ве́черъ живота̀ твоегѡ̀, прпⷣбне: кни́га твои́хъ дѣѧ́нїй а҆пⷭ҇льскихъ заверши́сѧ въ невече́рнемъ ѡ҆сїѧ́нїи лица̀ твоегѡ̀, зна́менꙋѧ сла́вꙋ твою̀ въ ѻ҆би́телехъ нбⷭ҇ныхъ, и҆́хже и҆ на́мъ помозѝ дости́гнꙋти твои́мъ предста́тельствомъ.

Ѻ҆́гненный сто́лпъ ви́денъ бы́сть, зна́менꙋѧ ѿше́ствїе прпⷣбнагѡ ѿ землѝ на нб҃о, ꙗ҆́кѡ ѕѣлѡ̀ диви́тисѧ лю́демъ. сегѡ̀ ра́ди къ немꙋ̀ воззове́мъ: бꙋ́ди на́мъ при́снѡ ѻ҆́гненный сто́лпъ, свѣтѧ́й и҆ ᲂу҆казꙋ́ѧй пꙋ́ть въ гѡ́рнѧѧ.

И҆́стинномꙋ ᲂу҆ченикꙋ̀ твоемꙋ̀, гдⷭ҇и, недосто́йными ᲂу҆сты̀ вознесо́хомъ хвалы̑, сла́вѧще тѧ̀, ди́внаго во ст҃ы́хъ твои́хъ: є҆гѡ́же мл҃твеннымъ предста́тельствомъ, сохранѝ странꙋ̀ сїю̀ и҆ гра́ды є҆ѧ̀ ѿ бѣ́дъ и҆ гꙋби́тельства, подаѧ̀ на́мъ ве́лїю млⷭ҇ть.

Бг҃оро́диченъ: Мрӏ́е, бж҃їе жили́ще и҆ чⷭ҇тоты̀ наста́внице, менѐ ста́вша жили́ще грѣхо́вныхъ скве́рнъ и҆ нечистоты̀, и҆ впа́дша въ сѣ́ти нечи́стыхъ дꙋхѡ́въ, твои́мъ застꙋпле́нїемъ чⷭ҇та покажѝ, и҆ па́ки жили́ще бг҃ꙋ сотворѝ, да тѧ̀ бл҃гочⷭ҇тнѡ велича́ю.

Свѣти́ленъ. Подо́бенъ: Жєны̀, ᲂу҆слы́шите:

Свѣтода́вче гдⷭ҇и,* мл҃твами на́шегѡ свѣти́льника бл҃гочⷭ҇тїѧ,* прпⷣбнагѡ ге́рмана,* просвѣтѝ невече́рнимъ свѣ́томъ твои́мъ странꙋ̀ сїю̀ и҆ на́съ,* вѣ́рою тебѣ̀ слꙋжа́щихъ,* и҆ бл҃гочⷭ҇тнѡ пра́зднꙋющихъ свѣтоно́снꙋю па́мѧть є҆гѡ̀. Два́жды.Сла́ва, и҆ ны́нѣ, бг҃оро́диченъ:

Бг҃оневѣ́сто, свѣщѐ та́инственнаѧ, дѣ́йствомъ дх҃а бжⷭ҇твеннагѡ, предвѣ́чный свѣ́тъ мӏ́рꙋ ꙗ҆ви́вшаѧ, и҆ на́мъ, сꙋ́щымъ во тьмѣ̀ неразꙋ́мїѧ, возсїѧ́й свѣ́тъ и҆́стины, и҆ сп҃сѝ всѣ́хъ, бл҃гочⷭ҇тнѡ тѧ̀, ꙗ҆́кѡ мт҃рь бж҃їю, велича́ющихъ.

На хвали́техъ стїхи̑ры на д҃, гла́съ и҃.

Подо́бенъ: Ѽ пресла́внагѡ чꙋдесѐ:

Кро́ткїй и҆ смире́нный ге́рманъ,* сла́вы бж҃їѧ ревни́тель сы́й,* на бл҃говѣ́стїе хрⷭ҇то́во посыла́етсѧ:* ᲂу҆сты̀ ѹ҆́бѡ бл҃говѣствова́ше,* бл҃гочⷭ҇тїемъ же ᲂу҆твержда́ше,* тѣ́мже сла̑внаѧ наслѣ́дова на нб҃сѝ,* и҆ ѿ на́съ да бꙋ́детъ сла́вимь на землѝ,* є҆гѡ́же мл҃твами, хрⷭ҇тѐ бж҃е,* сп҃сѝ дꙋ́шы на́шѧ.

Слове́съ гдⷭ҇нихъ бл҃говѣ́стниче,* и҆ си́хъ бл҃гочⷭ҇тный дѣ́лателю,* ꙗ҆́кѡ си́ленъ дх҃а ст҃а́гѡ блгⷣтїю,* не́мѡщи немощны́хъ носи́лъ є҆сѝ:* ꙗ҆́коже пѣ́стꙋнъ ѡ҆ младе́нцѣхъ,* и҆ ꙗ҆́кѡ ѻ҆тє́цъ ѡ҆ ча́дѣхъ пекӏ́йсѧ,* дѣ́лы же и҆ словесы̀ всѧ́кѡ наставлѧ́ѧ,* тѣ́мже и҆ на́съ посѣтѝ,* и҆сцѣлѧ́ѧ не́мѡщи на́шѧ.

Ты̀ ре́клъ є҆сѝ, прпⷣбне:* ѿ сегѡ̀ днѐ и҆ ѿ сегѡ̀ часа̀,* возлю́бимъ бг҃а превы́ше всегѡ̀,* сотвори́мъ ст҃ꙋ́ю во́лю є҆гѡ̀,* да бл҃га̑ѧ наслѣ́дꙋемъ.* Ѽ ге́рмане, ди́вный наста́вниче,* правосла́вїѧ ᲂу҆твержде́нїе,* сла́вы бж҃їѧ проповѣ́данїе,* на́мъ же, грѣ̑шнымъ, наꙋче́нїе.

Ѽ пресла́внагѡ чꙋдесѐ!* но́ваѧ страна̀ ѡ҆сщ҃а́етсѧ,* и҆́бо чꙋдотво́рецъ ге́рманъ,* на высотꙋ̀ возноси́мь, ꙗ҆влѧ́етсѧ дне́сь:* ди́венъ бг҃ъ во ст҃ы́хъ свои́хъ,* съ на́ми бг҃ъ, разꙋмѣ́йте, ꙗ҆зы́цы!* правосла́вїю ѿ ге́рмана наꙋча́йтесѧ,* є҆гѡ́же мл҃твами, хрⷭ҇тѐ бж҃е,* сп҃сѝ дꙋ́шы на́шѧ.

Сла́ва, гла́съ и҃. Самогла́сенъ:

На лѣ́ствицꙋ добродѣ́телей ди́внѡ возше́лъ є҆сѝ, прпⷣбне, прїи́мъ бо мл҃твꙋ, срⷣца теплотꙋ̀ и҆ сле́зы, ѡ҆чⷭ҇тилъ є҆сѝ ѹ҆́мъ ѿ по́мыслѡвъ сꙋ́етныхъ, и҆ срⷣце ѿ многоѡбра́зїѧ чꙋ́вствъ, и҆ въ ра́йское безстра́стїе дости́глъ є҆сѝ, вы́шнихъ та́инствъ видѣ̑нїи ѡ҆зарѧ́емь, ꙗ҆̀же на нб҃са̀ возво́дѧтъ, и҆ творѧ́тъ вѣ́дѣти бг҃а. И҆ ны́нѣ, бг҃оро́диченъ:

Влⷣчце, прїимѝ мл҃твы ра̑бъ твои́хъ, и҆ и҆зба́ви ны̀ ѿ всѧ́кїѧ нꙋ́жды и҆ печа́ли.

Славосло́вїе вели́кое. Є҆ктєнїѝ, и҆ ѿпꙋ́стъ.

На лїтꙋргӏ́и слꙋ́жба всѧ̀ прпⷣбнагѡ.

Мл҃тва ко прпⷣбномꙋ ге́рманꙋ

а҆лѧ́скинскомꙋ, чꙋдотво́рцꙋ:

По́стнически пожи́вый на землѝ, ра́достнѣ же преше́дый къ жи́тельствꙋ на нб҃сѝ, прпⷣбне ѻ҆́тче ге́рмане, ты̀ пресе́льникъ въ странѣ̀ да́льней бо́дръ и҆ послꙋшли́въ показа́лсѧ є҆сѝ: въ срⷣцѣ бо свое́мъ и҆мѣ́ѧ ди́вный валаа́мъ и҆ ѻ҆те́чество твоѐ, зе́млю рꙋ́сскꙋю, вѣ́рꙋ правосла́внꙋю ты̀ съ а҆пⷭ҇льскою ре́вностїю распространи́лъ є҆сѝ, и҆ ꙗ҆́кѡ нача́тки трꙋдѡ́въ твои́хъ, а҆леꙋ̑тскїѧ и҆ а҆лѧ̑скинскїѧ лю́ди, любо́вїю въ срⷣцѣ свое́мъ нетѣ́снѡ вмѣсти́лъ є҆сѝ, пѣ́стꙋѧ и҆̀хъ, и҆ наꙋче́нїемъ є҆ѵⷢ҇льскимъ снабдѣва́ѧ. Ѹ҆слы́ши ны́нѣ молѧ́щыѧсѧ въ странѣ̀ прише́льствїѧ твоегѡ̀, слы́ши и҆ стена̑нїѧ и҆зꙿ страны̀ ѻ҆те́чествїѧ твоегѡ̀, прїимѝ молѧ́щыѧсѧ тѝ на всѧ́комъ мѣ́стѣ влⷣчествїѧ бж҃їѧ! Хода́тайствꙋй на́мъ ско́рое ᲂу҆мѧгче́нїе ѡ҆жесточе́нныхъ дꙋ́шъ на́шихъ, и҆спросѝ на́мъ разꙋмѣ́нїе: что̀ є҆́сть во́лѧ бж҃їѧ; И҆ а҆́ще ничто́же бл҃го сотвори́хомъ предꙿ бг҃омъ, да поло́жимъ нача́ло бл҃го́е: ꙗ҆́коже и҆ ты̀, кро́ткїй проповѣ́дниче, ре́клъ є҆сѝ, да понѐ ѿ сегѡ̀ днѐ и҆ часа̀ потщи́мсѧ возлюби́ти бг҃а превы́ше всегѡ̀. Бг҃ъ бо на́шъ вои́стиннꙋ любы̀ є҆́сть, є҆мꙋ́же и҆ сла́ва во вѣ́ки подоба́етъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.