Мѣ́­сѧ­ца і҆ꙋ́­лїа въ є҃-й де́нь, и҆ се­пте́м­врїа въ к҃и-й де́нь.

Слꙋ́жба ст҃ѣ́й прпⷣбномч҃ницѣ є҆лїсаве́тѣ.

На вели́цѣй вече́рни.

Бл҃же́нъ мꙋ́жъ: а҃-й а҆н­тї­фѡ́нъ.

На Гдⷭ҇и, воз­зва́хъ: стї­хи̑­ры на и҃, гла́съ д҃:

Бг҃о­мꙋ́­драѧ є҆лї­са­ве́­то, стѧ­жа́в­ши дер­зно­ве́­нїе предꙿ бг҃омъ, молѝ за на́съ, грѣ́ш­ныхъ ра­бѡ́въ тво­и́хъ, да ѿве́р­зетъ ᲂу҆­ста̀ на̑ша не­до­стѡ́й­наѧ, пѣ́ти тебѣ̀ по­хва́ль­нꙋю пѣ́снь.

Ѿ ю҆́но­сти воз­лю́бль­ши нбⷭ҇на­го твор­ца̀, при­лѣ­жа́­ла є҆сѝ по­ꙋ­ча́­ти­сѧ въ мл҃твѣ и҆ бг҃о­мы́­слїи, не вѣ́­дꙋ­щи є҆щѐ и҆́стин­ныѧ вѣ́ры пра­во­сла́в­ныѧ, и҆ во­спи­та́­на срѡ́д­ни­ки сво­и́­ми въ и҆но­сла́в­нѣмъ ᲂу҆­че́­нїи, бо­га́т­нѡ ѡ҆ро­ша́­ла є҆сѝ дꙋ́шꙋ свою̀ сло́­вомъ бж҃ї­имъ, и҆ пре­бы­ла̀ є҆сѝ вѣ́р­на хрⷭ҇тꙋ̀ бг҃ꙋ до кон­ца̀.

Ѻ҆́чи тѣ­ле́с­нѣи ѿве́рз­ши въ стра­нѣ̀ гер­ма́н­стѣй, во­спи­та́­ла­сѧ є҆сѝ въ не­пра́­вой вѣ́рѣ при́­сныхъ тѝ, чꙋ́в­ство же дꙋ­ше́в­ное при­ве­де́ тѧ съ сꙋ­прꙋ́­гомъ тво­и́мъ на рꙋ́сь пра­во­сла́в­нꙋю, и҆дѣ́­же тебѣ̀ ѿвер­зо́­стѣ­сѧ ѻ҆́чи дх҃о́в­нѣи, и҆ вкꙋ́­пѣ ѡ҆брѣ­ла̀ є҆сѝ вѣ́рꙋ и҆́стин­нꙋю.

И҆́ны стї­хи̑­ры, гла́съ а҃. По­до́­бенъ: Нбⷭ҇ныхъ чи­нѡ́въ:

На рꙋсѝ ѡ҆брѣ­ла̀ є҆сѝ би́­серъ без­цѣ́н­ный,* прпⷣбно­мч҃ни­це є҆лї­са­ве́­то,* пра­во­сла́в­нꙋю вѣ́рꙋ чⷭ҇тꙋю,* ю҆́же прї­ѧ́­ла є҆сѝ всѣ́мъ срⷣцемъ тво­и́мъ и҆ дх҃омъ,* ны́нѣ же пред­сто­ѧ́­щи бг҃ꙋ на нб҃сѣ́хъ,* мо­ли́­сѧ є҆мꙋ̀ за на́съ, грѣ́ш­ныхъ и҆ не­клю­чи́­мыхъ.

Ѿ ю҆́но­сти вѣ́ра въ бг҃а все­мо­гꙋ́­ща­го,* ᲂу҆­го­то́­ва тѧ̀ къ по́­дви­гꙋ люб­вѐ и҆ млⷭ҇рдїѧ,* сегѡ̀ ра́ди про­сти́­ла є҆сѝ ᲂу҆­бӏ́й­цꙋ, по­гꙋ­би́в­ша­го мꙋ́жа тво­е­гѡ̀,* и҆ пре­да­ла́­сѧ є҆сѝ жи­тїю̀ и҆́но­че­ско­мꙋ.

По­кла­нѧ́­ем­сѧ тво­е­мꙋ̀ по́­дви­гꙋ,* бг҃о­мꙋ́­драѧ є҆лї­са­ве́­то,* и҆ со­стра́­ждꙋ­ще­мꙋ млⷭ҇рдїю,* вос­хва­лѧ́­ю­ще мꙋ́­же­ство твоѐ предꙿ мꙋ­чи́­тє­ли,* и҆ да́же во стра­да́­нїи* те́­плꙋю лю­бо́вь къ бли̑ж­нимъ.

И҆́ны стї­хи̑­ры, гла́съ г҃. По­до́­бенъ: Ве́­лїѧ крⷭ҇та̀:

Прї­и­ди́­те, праз­дно­лю́б­цы, хва­лꙋ̀ при­не­се́мъ прпⷣбно­мч҃ни­цѣ є҆лї­са­ве́­тѣ, въ ѻ҆те́­че­стѣмъ є҆́й гра́­дѣ да́рм­штад­тѣ, вос­по­и́мъ ю҆̀ въ це́р­кви ст҃ы́ѧ ма­рӏ́и ма­гда­ли́­ны рав­ноапⷭ҇ль­ныѧ: здѣ̀ ма́­лое ста́­до пра­во­сла́в­ныхъ хрⷭ҇тї­а́нъ при­но́­ситъ тѝ пѣ́снь по­бѣ́д­нꙋю.

Ны́нѣ ка́­ет­сѧ гра́дъ мо­сква̀, и҆мѣ́­вый въ себѣ̀ ст҃ꙋ́ю ѻ҆би́­тель твою̀, занѐ не воз­бра­нѝ ра­зо­ре́­нїю є҆ѧ̀: ма́р­ѳа же и҆ ма­рӏ́а на нб҃сѣ́хъ ра́­дꙋ­е­тѣ­сѧ, ѡ҆брѣ́т­шѣ тѧ̀ съ вѣ́р­ною тѝ и҆́но­ки­нею вар­ва́­рою, ꙗ҆́кѡ те́­плѣи и҆̀мъ смл҃твєн­ни­цы.

Сла́­ва, гла́съ в҃. Са­мо­гла́­сенъ:

Ꙗ҆́ко­же мно­го­цѣ́н­ное мѵ́ро, кро́вь твою̀ при­нес­ла̀ є҆сѝ же­ни­хꙋ̀ тво­е­мꙋ̀ хрⷭ҇тꙋ̀, стра­сто­но́­си­це ст҃а́ѧ є҆лї­са­ве́­то, воз­да­ѧ́­нїе же прї­ѧ́­ла є҆сѝ вѣ­не́цъ не­тлѣ́­ненъ ѿ негѡ̀, до­сто­чꙋ́д­наѧ: мо­ли́­сѧ сп҃сти́­сѧ дꙋ­ша́мъ на́­шымъ.

И҆ ны́нѣ, бг҃о­ро́­ди­ченъ до­гма́­тїкъ, гла́съ то́й­же: Пре́й­де сѣ́нь за­ко́н­наѧ:

Вхо́дъ, про­кӏ́­менъ днѐ, и҆ чтє́­нїѧ г҃.

Прⷪ҇ро́­че­ства и҆са́­ї­и­на чте́­нїе:

Та́кѡ гл҃етъ гдⷭ҇ь: Всѝ ꙗ҆зы́­цы со­бра́­ша­сѧ вкꙋ́­пѣ, и҆ со­бе­рꙋ́т­сѧ кнѧ̑­зи ѿ ни́хъ. кто̀ воз­вѣ­сти́тъ сїѧ̑ въ ни́хъ; и҆лѝ ꙗ҆̀же ѿ на­ча́­ла, кто̀ слы̑­ша­на со­тво­ри́тъ ва́мъ; да при­ве­дꙋ́тъ сви­дѣ́­тє­ли своѧ̑, и҆ ѡ҆прав­дѧ́т­сѧ, и҆ да ᲂу҆­лы́­шатъ, и҆ да ре­кꙋ́тъ и҆́сти­нꙋ. Бꙋ́­ди­те мѝ сви­дѣ́­тє­ли, и҆ а҆́зъ сви­дѣ́­тель, гл҃етъ гдⷭ҇ь бг҃ъ, и҆ ѻ҆́трокъ, є҆го́­же и҆з­бра́хъ: да по­зна́­е­те, и҆ вѣ́­рꙋ­е­те мѝ, и҆ раз­ꙋ­мѣ́­е­те, ꙗ҆́кѡ а҆́зъ є҆́смь: пре́­жде менє̀ не бы́сть и҆́нъ бг҃ъ, и҆ по мнѣ̀ не бꙋ́­детъ. А҆́зъ є҆́смь бг҃ъ, и҆ нѣ́сть ра́з­вѣ менє̀ сп҃са́­ѧй. А҆́зъ воз­вѣ­сти́хъ и҆ сп҃со́хъ, ᲂу҆­ни­чи­жи́хъ, и҆ не бѣ̀ въ ва́съ чꙋ́ждїй. вы̀ мнѣ̀ сви­дѣ́­тє­ли, и҆ а҆́зъ гдⷭ҇ь бг҃ъ, И҆ є҆щѐ ѿ на­ча́­ла а҆́зъ є҆́смь, и҆ нѣ́сть ѿ рꙋ́къ мо­и́хъ и҆з­ба­влѧ́­ѧй: со­тво­рю̀, и҆ кто̀ ѿвра­ти́тъ то̀; Си́це гл҃етъ гдⷭ҇ь бг҃ъ, и҆з­ба­влѧ́­ѧй ва́съ, ст҃ы́й і҆и҃левъ.

Пре­мꙋ́­дро­сти со­ло­мѡ́­но­вы чте́­нїе:

Првⷣныхъ дꙋ́шы въ рꙋцѣ̀ бж҃ї­ей, и҆ не при­ко́с­нет­сѧ и҆́хъ мꙋ́ка. Не­пще­ва́­ни бы́ша во ѻ҆че­сѣ́хъ без­ꙋ́м­ныхъ ᲂу҆­мре́­ти, и҆ вмѣ­ни́­сѧ ѡ҆ѕло­бле́­нїе и҆с­хо́дъ и҆́хъ, и҆ є҆́же ѿ на́съ ше́­ствїе со­крꙋ­ше́­нїе: ѻ҆ни́ же сꙋ́ть въ ми́рѣ. И҆́бо предꙿ ли­це́мъ че­ло­вѣ́­че­скимъ а҆́ще и҆ мꙋ́кꙋ прї­и́­мꙋтъ, ᲂу҆­по­ва́­нїе и҆́хъ без­сме́р­тїѧ и҆с­по́л­не­но. И҆ вма́­лѣ на­ка́­за­ни бы́в­ше, ве­ли́­ки­ми бл҃го­дѣ́­тель­ство­ва­ни бꙋ́­дꙋтъ: ꙗ҆́кѡ бг҃ъ и҆с­кꙋ­сѝ ѧ҆̀, и҆ ѡ҆брѣ́­те и҆̀хъ до­стѡ́й­ны себѣ̀. Ꙗ҆́кѡ зла́­то въ гор­ни́­лѣ и҆с­кꙋ­сѝ и҆̀хъ, и҆ ꙗ҆́кѡ все­пло́­дїе же́р­твен­ное прї­ѧ́тъ ѧ҆̀. И҆ во вре́­мѧ по­сѣ­ще́­нїѧ и҆́хъ воз­сї­ѧ́­ютъ, и҆ ꙗ҆́кѡ и҆́скры по сте́­блїю по­те­кꙋ́тъ. Сꙋ́­дѧтъ ꙗ҆зы́­кѡмъ, и҆ ѡ҆бла­да́­ютъ людь­мѝ, и҆ во­цр҃и́т­сѧ гдⷭ҇ь въ ни́хъ во вѣ́ки. На­дѣ́­ю­щї­и­сѧ на́нь раз­ꙋ­мѣ́­ютъ и҆́сти­нꙋ, и҆ вѣ́р­нїи въ люб­вѝ пре­бꙋ́­дꙋтъ є҆мꙋ̀: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ по­сѣ­ще́­нїе во и҆з­бра́н­ныхъ є҆гѡ̀.

Пре­мꙋ́­дро­сти со­ло­мѡ́­но­вы чте́­нїе:

Првⷣни­цы во вѣ́ки жи­вꙋ́тъ, и҆ въ гдⷭ҇ѣ мзда̀ и҆́хъ, и҆ по­пе­че́­нїе и҆́хъ ᲂу҆ вы́ш­нѧ­гѡ. Сегѡ̀ ра́ди прї­и́­мꙋтъ црⷭ҇твїе бл҃го­лѣ́­пїѧ, и҆ вѣ­не́цъ до­бро́­ты ѿ рꙋкѝ гдⷭ҇ни: занѐ де­сни́­цею по­кры́­етъ ѧ҆̀, и҆ мы́ш­цею за­щи­ти́тъ и҆̀хъ. Прї­и́­метъ все­ѡ­рꙋ́­жїе рве́­нїе своѐ, и҆ во­ѡ­рꙋ­жи́тъ тва́рь въ ме́сть вра­гѡ́мъ. Ѡ҆б­ле­че́т­сѧ въ бро­нѧ̀ пра́­вды, и҆ воз­ло­жи́тъ шле́мъ, сꙋ́дъ не­ли­це­мѣ́­ренъ. Прї­и́­метъ щи́тъ не­по­бѣ­ди́­мый, прпⷣбїе: По­ѻ­стри́тъ же на­пра́с­ный гнѣ́въ во ѡ҆рꙋ́­жїе: спо­бо́­ретъ же съ ни́мъ мӏ́ръ на без­ꙋ̑м­ныѧ. По́й­дꙋтъ пра­во­лꙋ̑ч­ныѧ стрѣ́­лы мѡ́л­нї­и­ны, и҆ ꙗ҆́кѡ ѿ бл҃го­крꙋ́­гла лꙋ́ка ѻ҆бла­кѡ́въ, на на­мѣ́­ре­нїе по­ле­тѧ́тъ. И҆ ѿ ка­ме­но­ме́т­ныѧ ꙗ҆́ро­сти и҆с­по́лнь па­дꙋ́тъ гра́­ды: воз­не­го­дꙋ́­етъ на ни́хъ вода̀ мор­ска́ѧ, рѣ́ки же по­то­пѧ́тъ ѧ҆̀ на́­глѡ. Со­про­ти́въ ста́­нетъ и҆̀мъ дꙋ́хъ си́лы, и҆ ꙗ҆́кѡ ви́­хоръ раз­вѣ́­етъ и҆̀хъ, И҆ ѡ҆пꙋ­сто­ши́тъ всю̀ зе́­млю без­за­ко́­нїе, и҆ ѕло­дѣ́й­ство пре­вра­ти́тъ пре­сто́­лы си́ль­ныхъ. Слы́­ши­те ᲂу҆̀бо, ца́­рїе, и҆ раз­ꙋ­мѣ́й­те: на­вы́­кни­те, сꙋ­дїи̑ кон­цє́въ зе­млѝ. Внꙋ­ши́­те, дер­жа́­щїи мно́­жє­ства, и҆ гор­дѧ́­щї­и­сѧ ѡ҆ на­ро́­дѣхъ ꙗ҆зы́­кѡвъ: Ꙗ҆́кѡ дана̀ є҆́сть ѿ гдⷭ҇а дер­жа́­ва ва́мъ, и҆ си́ла ѿ вы́ш­нѧ­гѡ.

На лї­тӏ́и стї­хи́­ра хра́­ма, и҆ ст҃ы́ѧ, гла́съ и҃:

Бг҃о­мꙋ́­драѧ є҆лї­са­ве́­то, въ се́рд­цы тво­е́мъ прї­е́м­ши сло́­во не­ло́ж­ное: лю­би́­те вра­гѝ ва́шѧ, до­бро̀ тво­ри́­те не­на­ви́­дѧ­щымъ ва́съ, по­сѣ­ти́­ла є҆сѝ въ тем­ни́­цѣ ᲂу҆­бӏ́й­цꙋ сꙋ­прꙋ́­га тво­е­гѡ̀, и҆ про­сти́­ла є҆сѝ є҆мꙋ̀ грѣ́хъ кнѧ­зе­ꙋ­бӏ́й­ства, про­ще́­нї­емъ все­со­вер­ше́н­нымъ.

Въ ю҆́но­сти ѡ҆ста́­вив­ши стра­нꙋ̀ свою̀, воз­лю­би́­ла є҆сѝ стра­нꙋ̀ рѡс­сӏ́й­скꙋю, и҆дѣ́­же без­цѣ́н­ный би́­серъ ѡ҆брѣ­ла̀ є҆сѝ, цр҃ковь ст҃ꙋ́ю, є҆ди́­нꙋю, а҆пⷭ҇ль­скꙋю, пра­во­сла́в­нꙋю: сꙋ­прꙋ́­га же зем­на́­гѡ ли­ши́в­ши­сѧ, не ѿвра­ти́­ла­сѧ є҆сѝ лю­де́й рѡс­сӏ́й­скихъ, но крⷭ҇тъ ѡ҆б̾­ѧ́­ла є҆сѝ хрⷭ҇то́въ, и҆ пꙋ­те́мъ тѣ́­снымъ ко сп҃се́­нїю ше́­ство­ва­ла є҆сѝ.

Въ ца́р­скихъ чер­то́­зѣхъ свѣ́тъ пре­хо­дѧ́­щїй не пре­льсти́ тѧ ги́б­нꙋ­щею кра­со­то́ю сво­е́ю, но ѡ҆ста́­вив­ши всѧ̑ и҆ вмѣ­ни́в­ши ᲂу҆­мѣ́­ты бы́ти, по­слѣ́­до­ва­ла є҆сѝ а҆вра­а́­мꙋ пра́­ѻ­тцꙋ: и҆з­ше́д­ши и҆зꙿ до́мꙋ ѻ҆́тчагѡ, и҆ стра­ны̀ сво­еѧ̀ гер­ма́н­скїѧ, при­шла̀ є҆сѝ въ зе́­млю рꙋ́с­скꙋю, и҆ ѡ҆брѣ­ла̀ є҆сѝ свѣ́тъ хрⷭ҇то́въ не­мер­ца́­ю­щїй.

Сла́­ва, гла́съ ѕ҃:

Прпⷣⷣбно­мч҃ни­ца твоѧ̀, гдⷭ҇и, є҆лї­са­ве́­та, ꙗ҆̀же зем­на́­гѡ жи­тїѧ̀ за­бве́­нїю пре­да­дѐ, ѡ҆ тѣ­ле́с­ныхъ же мꙋ́­кахъ не­бре́г­ши, бꙋ́­дꙋ­щїѧ жи́­зни ра́ди, и҆ сеѧ̀ на­слѣ́д­ни­ца ꙗ҆ви́­сѧ, тѣ́м­же и҆ со а҆́гг҃лы ра́­дꙋ­ет­сѧ: є҆ѧ́же мл҃тва­ми да́­рꙋй на́мъ ве́­лїю млⷭ҇ть.

И҆ ны́нѣ, бг҃о­ро́­ди­ченъ, гла́съ то́й­же: Тво­ре́цъ и҆ и҆з­ба́­ви­тель мо́й:

На стї­хо́в­нѣ стї­хи̑­ры, гла́съ и҃.

По­до́­бенъ: Ѽ пре­сла́в­на­гѡ чꙋ­де­сѐ:

Ѽ пре­сла́в­на­гѡ чꙋ­де­сѐ!* ꙗ҆́кѡ ѕвѣз­да̀ ѿ за́­па­да,* прпⷣбно­мч҃ни­це є҆лї­са­ве́­то,* про­воз­сї­ѧ́­ла є҆сѝ на́мъ,* и҆ прї­ѧ́в­ши и҆́но­че­скїй ѡ҆́бразъ,* была̀ є҆сѝ пра́­ви­ло до­бро­дѣ́­те­лей,* и҆ мо­на́­ше­ствꙋ­ю­щихъ ᲂу҆­твер­жде́­нїе,* по́ст­ни­кѡвъ ᲂу҆­до­бре́­нїе.* тѣ́м­же па́­мѧть твою̀ по­чи­та́­емъ, до­сто­чꙋ́д­наѧ.

Стӏ́хъ: Ди́­венъ бг҃ъ во ст҃ы́хъ сво­и́хъ, бг҃ъ і҆и҃левъ.

Є҆лї­са­ве́­то, пре­сла́в­наѧ кнѧ­ги́­не,* воз­лю­би́в­ши хрⷭ҇та̀,* по­слꙋ­жи́­ла є҆сѝ є҆мꙋ̀ и҆ при̑­снымъ тво­и̑мъ,* ѿло­жи́в­ши же мїр­скꙋ́ю ѻ҆де́­ждꙋ,* и҆ прї­ѧ́в­ши а҆́гг҃ль­скїй ѡ҆́бразъ,* бг҃о­лю­бе́з­ныхъ же́нъ при­ве­ла̀ є҆сѝ* въ чер­то́­ги нбⷭ҇на­гѡ же­ни­ха̀ тво­е­гѡ̀,* тѣ́м­же твою̀ па́­мѧть по­е́мъ,* до­сто­хва́ль­наѧ.

Стӏ́хъ: Въ це́р­квахъ бл҃го­сло­ви́­те бг҃а, гдⷭ҇а ѿ и҆стѡ́ч­никъ і҆и҃ле­выхъ.

Мч҃ни­че­скїй вѣ­не́цъ ᲂу҆­кра­ша́­етъ ве­ли́­кꙋю кнѧ­ги́­ню,* и҆ до́­брꙋю на­ча́ль­ни­цꙋ мо­на́­ше­ствꙋ­ю­щихъ,* ѕло­дѣ́ю всѧ̑ про­ща́­ю­щꙋю,* и҆ ѿре́к­шꙋ­ю­сѧ мӏ́ра сегѡ̀.* ᲂу҆­кра́­симъ ю҆̀ мно­го­пле­те́н­нымъ вѣн­це́мъ* пѣ́­сней и҆ пѣ́­нїй на́­шихъ,* и҆ по­дра­жа́­ю­ще є҆́й,* при­не­се́мъ млⷭ҇ть и҆ по́­дви­ги въ да́ръ хрⷭ҇тꙋ̀,* по­дви­го­на­ча́ль­ни­кꙋ на́­ше­мꙋ.

Сла́­ва, гла́съ и҃:

И҆́но­че­ствꙋ­ю­щихъ и҆ мїр­ски́хъ на­ста́в­ни­цꙋ тѧ̀ по­чи­та́­емъ, прпⷣбно­мч҃ни­це є҆лї­са­ве́­то, ꙗ҆́кѡ тво­е́ю сте­зе́ю пра́­вѡ хо­ди́­ти по­зна́­хомъ: ма́р­ѳѣ и҆ ма­рӏ́и по­дра­жа́­ти на́съ ᲂу҆­чи́­ла є҆сѝ, є҆́же лю­бо́­вїю къ бг҃ꙋ и҆ млⷭ҇рдї­емъ хо­ди́­ти къ бли́ж­не­мꙋ. со­вер­ши́в­ши же те­че́­нїе твоѐ, семꙋ̀ и҆ на́съ на­ста́­ви, тво­и́мъ за­стꙋ­пле́­нї­емъ нбⷭ҇нымъ.

И҆ ны́нѣ, бг҃о­ро́­ди­ченъ, гла́съ то́й­же: Без­не­вѣ́ст­наѧ дв҃о:

Тро­па́рь, гла́съ д҃:

Кро́­тость и҆ сми­ре́­нїе и҆ лю­бо́вь все­ли́в­ши въ дꙋ́шꙋ свою̀, ᲂу҆­се́рд­нѡ по­слꙋ­жи́­ла є҆сѝ стра́­ждꙋ­щымъ, стра­сто­те́р­пи­це ст҃а́ѧ кнѧ­ги́­не є҆лї­са­ве́­то, та́же съ вѣ́­рою пре­тер­пѣ́­ла є҆сѝ стра­да̑­нїѧ и҆ сме́рть за хрⷭ҇та̀, кꙋ́п­нѡ съ и҆́но­ки­нею вар­ва́­рою, съ не́­ю­же молѝ ѡ҆ всѣ́хъ съ лю­бо́­вїю по­чи­та́­ю­щихъ ва́съ.

Сла́­ва, и҆ ны́нѣ, бг҃о­ро́­ди­ченъ, гла́съ то́й­же: Є҆́же ѿ вѣ́ка ᲂу҆­та­е́­ное:

А҆́ще бдѣ́­нїе со­вер­ша́­ет­сѧ: тро­па́рь два́­жды, и҆ Бцⷣе, дв҃о: є҆ди́­но­жды.

На ѹ҆́трени.

На Бг҃ъ гдⷭ҇ь: тро­па́рь прпⷣбно­мч҃ни­цы, два́­жды,

Сла́­ва, и҆ ны́нѣ, бг҃о­ро́­ди­ченъ.

По а҃-мъ стї­хо­сло́­вїи сѣ­да́­ленъ, гла́съ и҃:

Ѿ ю҆́но­сти бг҃а воз­лю­би́­ла є҆сѝ, и҆ зем­но́е ѻ҆те́­че­ство ѡ҆ста́­ви­ла є҆сѝ, при­не́с­ши себѐ въ же́р­твꙋ бг҃ꙋ жи­во́­мꙋ, є҆лї­са­ве́­то, прпⷣбно­мч҃це. сегѡ̀ ра́ди во­пї­е́мъ тѝ: молѝ хрⷭ҇та̀ бг҃а, со­грѣ­ше́­нїй ѡ҆став­ле́­нїе да­ро­ва́­ти чтꙋ́­щымъ лю­бо́­вїю па́­мѧть твою̀. Два́­жды.

Сла́­ва, и҆ ны́нѣ, бг҃о­ро́­ди­ченъ:

Влⷣчце, пре­ст҃а́ѧ бцⷣе, молѝ сн҃а тво­е­го̀ и҆ зи­жди́­те­лѧ, ꙗ҆́кѡ да по­ка­ѧ́­нїѧ ра́ди ѡ҆ со­дѣ́­ѧн­ныхъ лю́­тыхъ прї­и́­метъ мо­лє́­нїѧ ро́да на́­ше­гѡ, ꙗ҆́кѡ є҆ди́нъ бл҃го­ꙋ­тро́­бенъ.

По в҃-мъ стї­хо­сло́­вїи сѣ­да́­ленъ, гла́съ д҃:

Надꙿ страсть­мѝ плот­ски́­ми ца́р­ствꙋ­ю­щи, страсть­мѝ жи­во­тво́р­ны­ми во­цр҃и́­ла­сѧ є҆сѝ, тво­е́ю кро́­вїю ѡ҆ба­гри́в­ши, чⷭ҇тна́ѧ, ѻ҆де́­ждꙋ не­тлѣ́н­нꙋ, є҆лї­са­ве́­то: тѣ́м­же все­цр҃ѧ̀ не­вѣ́­ста ꙗ҆ви́­ла­сѧ є҆сѝ. и҆ ны́нѣ на нб҃сѝ дер­зно­ве́­нїе стѧ­жа́в­ши, молѝ да­ро­ва́­ти со­грѣ­ше́­нїй ѡ҆чи­ще́­нїе вѣ́­рою хва́­лѧ­щымъ ст҃ꙋ́ю па́­мѧть твою̀. Два́­жды.

Сла́­ва, и҆ ны́нѣ, бг҃о­ро́­ди­ченъ:

Ѡ҆б­но­ви́­ла є҆сѝ, чⷭ҇таѧ, бжⷭ҇твен­нымъ ржⷭ҇тво́мъ тво­и́мъ, и҆с­тлѣ́в­шее во стра­сте́хъ ме́р­твен­ное сꙋ­ще­ство̀ зем­но­ро́д­ныхъ, и҆ воз­дви́г­ла є҆сѝ ны̀ ѿ сме́р­ти къ жи­во­тꙋ̀. тѣ́м­же тѧ̀ по до́л­гꙋ ᲂу҆­бл҃жа́­емъ всѝ, дв҃о пре­не­по­ро́ч­наѧ.

По­лѷ­е­ле́й, и҆ ве­ли­ча́­нїе:

Ве­ли­ча́­емъ ва́съ, ст҃ы̑ѧ прпⷣбно­мч҃ни­цы ве­ли́­каѧ кнѧ­ги́­не є҆лї­са­ве́­то и҆ и҆́но­ки­не вар­ва́­ро, и҆ чти́мъ чⷭ҇тна̑ѧ стра­да̑­нїѧ ва̑ша, ꙗ҆̀же за хрⷭ҇та̀ пре­тер­пѣ́­ли є҆стѐ.

Ѱа­ло́мъ и҆з­бра́н­ный: Бг҃ъ на́мъ при­бѣ́­жи­ще и҆ си́ла, по­мо́щ­никъ въ ско́р­бехъ, ѡ҆брѣ́т­шихъ ны̀ ѕѣлѡ̀.

По по­лѷ­е­ле́и сѣ­да́­ленъ, гла́съ а҃:

По­гре́б­ши стра­сте́й всѐ во­ста́­нїе лю­бо́­вїю ко хрⷭ҇тꙋ̀ все­цр҃ю̀, прпⷣбно­мч҃ни­це є҆лї­са­ве́­то, жи́знь без­ко­не́ч­нꙋю прї­ѧ́­ла є҆сѝ по сме́р­ти лю́­тѣй ѿ рꙋ́къ без­бо́ж­ныхъ: тѣ́м­же дне́сь хрⷭ҇то́­ва цр҃ковь пра́з­днꙋ­етъ твою̀ до­сто­чꙋ́д­нꙋю па́­мѧть. Два́­жды.

Сла́­ва, и҆ ны́нѣ, бг҃о­ро́­ди­ченъ:

На­ста́­ви на́съ на пꙋ́ть по­ка­ѧ́­нїѧ, ᲂу҆­кло­нѧ́­ю­щих­сѧ къ ѕлы̑мъ дѣ­лѡ́мъ, не­и­скꙋ­со­бра́ч­наѧ бл҃го­сло­ве́н­наѧ дв҃о, при­бѣ́­жи­ще че­ло­вѣ́­кѡвъ мо­лѧ́­щих­сѧ тебѣ̀.

Та́же сте­пє́н­на, а҃-й а҆н­тї­фѡ́нъ д҃-гѡ гла́­са.

Про­кӏ́­менъ, гла́съ д҃: Ди́­венъ бг҃ъ во ст҃ы́хъ сво­и́хъ, бг҃ъ і҆и҃левъ.

Стӏ́хъ: Въ це́р­квахъ бл҃го­сло­ви́­те бг҃а, гдⷭ҇а ѿ и҆стѡ́ч­никъ і҆и҃ле­выхъ.

Є҆ѵⷢ҇лїе ѿ ма­тѳе́а, за­ча́­ло ѯ҃в: Во вре́­мѧ ѻ҆́но, вни́­де і҆и҃съ во стра­ны̑ тѵ̑рскїѧ и҆ сї­дѡ̑н­скїѧ:

По н҃-мъ ѱал­мѣ̀: Мл҃тва­ми прпⷣбно­мч҃ни­цы є҆лї­са­ве́­ты:

Та́же стї­хи́­ра, гла́съ ѕ҃:

Ве́­лїю вѣ́рꙋ и҆ ди́в­нꙋю лю­бо́вь ко вра­гѡ́мъ стѧ­жа́­ла є҆сѝ, прпⷣбно­мч҃ни­це є҆лї­са­ве́­то, во и҆с­пы­та́­нї­ихъ на бг҃а на­дѣ́­ю­щи­сѧ, и҆ во стра­да́­нї­ихъ мꙋ­чи́­те­лей не ѡ҆сꙋ­жда́­ю­щи, и҆ по­мо­га́­ю­щи бли̑ж­нимъ тво­и̑мъ. тѣ́м­же и҆ за на́съ молѝ все­бл҃га́­го бг҃а, да по­да́стъ на́мъ ѡ҆став­ле́­нїе грѣ­хѡ́въ, и҆ ве́­лїю млⷭ҇ть.

Ка­нѡ́нъ бцⷣѣ, со і҆р­мо­со́мъ на ѕ҃: Во́дꙋ про­ше́дъ: и҆ прпⷣбно­мч҃ни­цѣ два̀ ка­нѡ́­на, тво­ре́­нїе ма́р­ково, на и҃.

Гла́съ в҃. Пѣ́снь а҃.

І҆р­мо́съ: Грѧ­ди́­те, лю́­дїе, по­и́мъ пѣ́снь хрⷭ҇тꙋ̀ бг҃ꙋ, раз­дѣ́ль­ше­мꙋ мо́ре, и҆ на­ста́вль­ше­мꙋ лю́ди, ꙗ҆̀же и҆з­ве­дѐ и҆зꙿ ра­бо́­ты є҆гѵ́­пет­скїѧ, ꙗ҆́кѡ про­сла́­ви­сѧ.

При­пѣ́въ: Прпⷣбно­мч҃ни­це, ве­ли́­каѧ кнѧ­ги́­не є҆лї­са­ве́­то, молѝ бг҃а ѡ҆ на́съ.

Ѿве́р­зи мѝ, хрⷭ҇тѐ, ᲂу҆ст­нѣ̀, вос­пѣ́­ти по́­дви­ги ᲂу҆­го́д­ни­цы тво­еѧ̀, прпⷣбно­мч҃ни­цы є҆лї­са­ве́­ты, да мл҃тва­ми сво­и́­ми ѻ҆́блакъ ра­зо­ри́тъ мо­е­гѡ̀ не­вѣ́­дѣ­нїѧ.

Воз­лю­би́в­ши бг҃а ѿ всеѧ̀ дꙋшѝ тво­еѧ̀, томꙋ̀ ѿ ю҆́но­сти по­слꙋ­жи́­ла є҆сѝ, прпⷣбно­мч҃ни­це, всѧ̑ лѣ̑та жи­во­та̀ тво­е­гѡ̀. тѣ́м­же и҆ про­сла́­ви тѧ̀: вѣ́сть бо гдⷭ҇ь сла́­вѧ­щыѧ є҆го̀ про­слав­лѧ́­ти.

Ны́нѣ, прпⷣбно­мч҃ни­це є҆лї­са­ве́­то, съ ли̑ки прⷪ҇рѡ́къ и҆ а҆пⷭ҇лъ, мч҃никъ же и҆ прпⷣбныхъ, во свѣ́­тѣ ст҃ы́ѧ трⷪ҇цы со­во­дво­рѧ́­ю­щи­сѧ, по­ми­на́й ча̑да твоѧ̑, вѣ́­рою тво­рѧ̑­щаѧ па́­мѧть твою̀.

Бг҃о­ро́­ди­ченъ: За­ча­ла̀ є҆сѝ сло́­во ѻ҆́ч҃ее, пло́­ти со­е­ди­ни́в­ше­е­сѧ и҆зꙿ тебє̀, бжⷭ҇твен­ныѧ ѵ҆по­ста́­си не ѡ҆ста́вль, мт҃и чⷭ҇таѧ: є҆гѡ́­же воз­же­ла́в­ши прпⷣбнаѧ є҆лї­са­ве́­та, мꙋ­че́­нїѧ сла́­вꙋ стѧ­жа́­ла є҆́сть.

И҆́нъ ка­нѡ́нъ. Гла́съ д҃. Пѣ́снь а҃.

І҆р­мо́съ: Мо́рѧ черм­нꙋ́ю пꙋ­чи́­нꙋ, не­вла́ж­ны­ми сто­па́­ми, дре́в­нїй пѣ­ше­ше́­ство­вавъ і҆и҃ль, крⷭ҇то­ѡ­бра́з­ны­ма мѡ­ѷ­се́­о­вы­ма рꙋ­ка́­ма, а҆ма­ли́­ко­вꙋ си́лꙋ въ пꙋ­сты́­ни по­бѣ­ди́лъ є҆́сть.

Бл҃ги́­ми на­де́­жда­ми ᲂу҆­твер­ди́­сѧ ѹ҆́мъ тво́й, прпⷣбно­мч҃ни­це є҆лї­са­ве́­то, и҆ къ бг҃ꙋ воз­не­се́­сѧ ѿ кратко­вре́­мен­ныхъ, тебѣ̀ во ѻ҆би́­те­ли въ мл҃твѣ и҆ трꙋ­дѣ́хъ пре­бы­ва́­ю­щей.

Съ лю­бо́­вїю при­хо­ждꙋ̀ къ тебѣ̀, прпⷣбно­мч҃ни­це чⷭ҇тна́ѧ, тво­и́­ми моль­ба́­ми жи­те́й­скїѧ сꙋ­е­ты́ мѧ сп҃сѝ, и҆ стра­сте́й мо­и́хъ смꙋ­ще́­нїе ᲂу҆­ти­шѝ.

Мꙋ́­дро­стїю и҆ блгⷣтїю про­свѣ́щь­шꙋ­сѧ ᲂу҆мꙋ̀ тво­е­мꙋ̀, є҆лї­са­ве́­то, мꙋ­чи́­те­лей пре­ще́­нїй не ᲂу҆­стра­ши́­ла­сѧ є҆сѝ, прпⷣбно­мч҃ни­це ст҃а́ѧ, бжⷭ҇твен­ною си́­лою ᲂу҆­крѣп­лѧ́­е­ма.

Бг҃о­ро́­ди­ченъ: Во­пло́щ­ша­го­сѧ и҆зꙿ тебє̀, бг҃о­не­вѣ́­сто, и҆ крⷭ҇тъ и҆ сме́рть прї­и́м­ша­го, по­зна́­хомъ ꙗ҆́кѡ гдⷭ҇а, и҆ по­е́мъ є҆го̀ ꙗ҆́кѡ и҆з­ба́­ви­те­лѧ ро́да на́­ше­гѡ, тѧ̀ ᲂу҆­бл҃жа́­ю­ще.

Ка­та­ва́­сїа: Ѿве́р­зꙋ ᲂу҆­ста̀ моѧ̑:

Пѣ́снь г҃.

І҆р­мо́съ: Лꙋ́къ со­крꙋ­ши́­сѧ си́ль­ныхъ дер­жа́­вою тво­е́ю, хрⷭ҇тѐ, и҆ си́­лою не­мощ­ствꙋ́­ю­щїи пре­по­ѧ́­са­ша­сѧ.

На­ча́­ло жи­тїѧ̀ тво­е­гѡ̀ зем­на́­гѡ по­ло­жи́­ла є҆сѝ во гра́­дѣ да́рм­штад­тѣ, и҆дѣ́­же бл҃го­чⷭ҇ти́­вый ца́рь мч҃никъ ст҃ѣ́й рав­ноапⷭ҇ль­нѣй ма­рӏ́и ма­гда­ли́­нѣ хра́мъ со­зда̀.

Оу҆­по­ко­е́­нїе вѣ́ч­ное ѡ҆брѣ­ла̀ є҆сѝ въ ѻ҆би́­те­ли тоѧ́ же ст҃ы́ѧ, во ст҃ѣ́мъ гра́­дѣ і҆ерⷭ҇ли́м­стѣмъ, близꙿ це́р­кве ᲂу҆­спѣ́­нїѧ пре­ст҃ы́ѧ бцⷣы, ю҆́же всѣ́мъ срⷣцемъ тво­и́мъ воз­лю­би́­ла є҆сѝ.

Здѣ̀ ны́нѣ въ ге­ѳси­ма́н­стѣй ѻ҆би́­те­ли хра­нѧ́т­сѧ ст҃ы̑ѧ мѡ́щи твоѧ̑, и҆̀мже мы̀, не­до­сто́й­нїи и҆ не­клю­чи́­мїи рабѝ твоѝ, бл҃го­чⷭ҇тнѣ по­кла­нѧ́­ем­сѧ.

Бг҃о­ро́­ди­ченъ: Є҆ди́­на­го не­вмѣ­сти́­ма­го бг҃а во тво­е́мъ чре́­вѣ прї­ѧ́­ла є҆сѝ, пре­чⷭ҇таѧ бг҃о­ро­ди́­тель­ни­це. тѣ́м­же мы̀ вѣ́р­нїи всѝ пѣ́снь­ми тѧ̀ ᲂу҆­бл҃жа́­емъ.

И҆́нъ. І҆р­мо́съ: Ве­се­ли́т­сѧ ѡ҆ тебѣ̀ цр҃ковь твоѧ̀, хрⷭ҇тѐ, зо­вꙋ́­щи: ты̀ моѧ̀ крѣ́­пость, гдⷭ҇и, и҆ при­бѣ́­жи­ще и҆ ᲂу҆­твер­жде́­нїе.

Ѿве́рг­ши­сѧ мӏ́ра и҆ пло́­ти мꙋ­дро­ва́­нїѧ, мл҃тва­ми и҆ трꙋ­ды̑ млⷭ҇рдїѧ въ ѻ҆би́­те­ли ма́р­ѳы и҆ ма­рӏ́и стѧ­жа́­ла є҆сѝ хрⷭ҇та̀, вкꙋ́­пѣ со се­стра́­ми, ꙗ҆̀же тебѣ̀ ѿ бг҃а врꙋ­чи́­ша­сѧ.

Ꙗ҆́кѡ сто́лпъ не­по­ко­ле­би́мь, сто­ѧ́­ла є҆сѝ во вре́­мѧ тѧ́ж­кихъ ѡ҆б­сто­ѧ́­нїй, ᲂу҆­бӏ́й­цꙋ про­сти́в­ши, и҆ ѡ҆ мꙋ­чи́­те­лехъ мо­лѧ́­щи­сѧ, кнѧ­ги́­не пре­бл҃же́н­наѧ.

Ни ѻ҆́гнь, ни ме́чь, ни ᲂу҆­ни­чи­жє́­нїѧ, ни ро́въ же­сто́­кїй, ни мꙋ­чи́­те­лей сꙋ­ров­ство̀ не воз­мо­го́­ша ѿлꙋ­чи́­ти тебє̀ ѿ люб­вѐ бж҃їѧ.

Бг҃о­ро́­ди­ченъ: Сло́­во ѻ҆́ч҃ее, Ѽ чⷭ҇таѧ, предꙿѡ­чⷭ҇тив­ши­сѧ дꙋ́­хомъ, ро­ди­ла̀ є҆сѝ, на сп҃се́­нїе по­ги́б­ша­гѡ ро́да на́­ше­гѡ.

Сѣ­да́­ленъ, гла́съ з҃:

Стра­сто­те́р­пи­це ст҃а́ѧ кнѧ­ги́­не є҆лї­са­ве́­то, є҆гда́ тѧ жи́вꙋ во а҆ла­па́­ев­скꙋю ша́хтꙋ ввер­го́­ша, кꙋ́п­нѡ со ст҃ы́­ми мч҃ни­ки ца́р­скїѧ кро́­ве, ꙗ҆̀же бѧ́хꙋ кнѧ́­зїе се́р­гїй, і҆ѡ­а́ннъ, кѡн­стан­тӏ́нъ, и҆́горь и҆ вла­ди́­мїръ, та́­ко­жде мч҃ни­ца вар­ва́­ра, и҆ ст҃ы́й мч҃никъ ѳе­о́­дѡръ: и҆з­не­мо­га́­ю­щымъ же на­до́лзѣ всѣ̑мъ ѿ ра́нъ, ѡ҆блег­ча́­ла є҆сѝ, є҆́ле жива̀ сꙋ́щи, стра­да̑­нїѧ ᲂу҆­ми­ра́­ю­щихъ, вос­пѣ­ва́­ю­щи сщ҃є́н­наѧ пѣ­сно­пѣ̑­нїѧ, ꙗ҆̀же слы́­ша­хꙋ ми­мо­хо­дѧ́­щїи. сегѡ̀ ра́ди мо́­лимъ тѧ̀: мо­ли́­сѧ хрⷭ҇тꙋ̀ бг҃ꙋ, пре­грѣ­ше́­нїй ѡ҆став­ле́­нїе да­ро­ва́­ти пра́з­днꙋ­ю­щымъ лю­бо́­вїю ст҃ꙋ́ю па́­мѧть твою̀. Два́­жды.

Сла́­ва, и҆ ны́нѣ, бг҃о­ро́­ди­ченъ, гла́съ то́й­же:

Є҆гда̀ пред­ста́­нꙋ предꙿ ли­це́мъ со­зда́­те­лѧ мо­е­гѡ̀ въ де́нь првⷣна­гѡ сꙋда̀ є҆гѡ̀, то­гда̀, влⷣчце, бꙋ́ди мѝ хо­да́­та­и­ца предꙿ ни́мъ, вѣ́ч­ныѧ мꙋ́ки и҆з­ба­влѧ́­ю­щи мѧ̀, да не сни́­дꙋ во а҆́дъ, но да сп҃сꙋ́­сѧ тво­и́мъ, пре­ст҃а́ѧ бцⷣе, за­стꙋ­пле́­нї­емъ.

Пѣ́снь д҃.

І҆р­мо́съ: Оу҆­слы́­шахъ, гдⷭ҇и, сла́в­ное твоѐ смо­тре́­нїе, и҆ про­сла́­вихъ, чл҃вѣ­ко­лю́б­че, не­по­сти­жи́­мꙋю твою̀ си́лꙋ.

По­ста́­вив­ши но́зѣ твоѝ на ка́­ме­ни чⷭ҇тыѧ вѣ́ры пра­во­сла́в­ныѧ, не­по­ко­ле́б­ле­ма пре­бы­ла̀ є҆сѝ ѿ и҆с­кꙋ­ше́­нїй и҆ на­вѣ́­тѡвъ без­бо́ж­ныхъ го­ни́­те­лей тво­и́хъ.

Ѿ вдовства̀ тво­е­гѡ̀ воз­лю­би́­ла є҆сѝ пре­бы­ва́­ти въ домꙋ̀ гдⷭ҇ни, ѡ҆сно­ва́в­ши ѻ҆би́­тель въ ца́р­ствꙋ­ю­щемъ гра́­дѣ мо­сквѣ̀, слꙋ­же́­нїѧ дѣ́лѧ бли̑ж­нимъ.

Оу҆­да­ли́­ла­сѧ є҆сѝ ѿ мӏ́ра сꙋ́­ет­на­гѡ сегѡ̀ во ст҃ꙋ́ю ѻ҆би́­тель ма́р­ѳы и҆ ма­рӏ́и, во є҆́же пѣ́снь­ми не­пре­ста́н­ны­ми и҆ мл҃тва­ми стра̑­сти те­лѣ̑­сныѧ всѧ̑ ᲂу҆­празд­ни́­ти, да до́­брѣ по­слꙋ́­жи­ши бг҃ꙋ и҆ бли̑ж­нимъ, съ со́н­момъ є҆ди­но­мꙋ́­дрыхъ тѝ же́нъ.

Бг҃о­ро́­ди­ченъ: Ты̀ вѣ́р­ныхъ по­хва­ла̀ є҆сѝ, бцⷣе без­не­вѣ́ст­наѧ, ты̀ пред­ста́­тель­ни­ца, ты̀ и҆ при­бѣ́­жи­ще хрⷭ҇тї­а́нъ. молѝ сн҃а тво­е­го̀ и҆ ѡ҆ на́съ, при­бѣ­га́­ю­щихъ къ по­кро́­вꙋ тво­е­мꙋ̀.

И҆́нъ. І҆р­мо́съ: Воз­не­се́­на тѧ̀ ви́­дѣв­ши цр҃ковь на крⷭ҇тѣ̀, сл҃нце првⷣное, ста̀ въ чи́нѣ сво­е́мъ, до­сто́й­нѡ взы­ва́­ю­щи: сла́­ва си́лѣ тво­е́й, гдⷭ҇и.

Стра́­хомъ бж҃ї­имъ ѡ҆гра­ди́в­ши­сѧ, бг҃ꙋ по­слꙋ­жи́­ла є҆сѝ, по­сто́мъ и҆ жа́­ждею сми­рѧ́­ю­щи тѣ́ло твоѐ, мл҃твою же чⷭ҇тою дꙋ́шꙋ твою̀ про­свѣ­ща́­ю­щи.

Ꙗ҆́ко­же чⷭ҇тны́й би́­серъ твоѧ̑ мѡ́щи пред­ле­жа́тъ, по­да­ю́­ще раз­ли̑ч­наѧ и҆с­цѣ­лє́­нїѧ съ вѣ́­рою при­стꙋ­па́­ю­щымъ и҆ мо­лѧ́­щымъ ти сѧ.

Въ ча́съ мра́­ка, ѡ҆дер­жа́­ща­гѡ зе́­млю рꙋ́с­скꙋю, гдⷭ҇ь тѧ̀ при­зва̀ на по́­двигъ мч҃ни­че­ства, є҆мꙋ́­же вѣ́р­на была̀ є҆сѝ до кон­ца̀.

Бг҃о­ро́­ди­ченъ: Не­скве́р­наѧ, не­бла́з­наѧ, ѡ҆сквер­не́н­ное моѐ срⷣце по­мыш­ле́нь­ми ма­ло­вѣ́­рїѧ и҆ лѣ́­но­сти, воз­ста́­ви къ мл҃твѣ и҆ по­ка­ѧ́­нїю, мл҃тва­ми тво­и́­ми.

Пѣ́снь є҃.

І҆р­мо́съ: Свѣ́­та по­да́­те­лю, и҆ вѣ­кѡ́въ тво́р­че, гдⷭ҇и, во свѣ́­тѣ тво­и́хъ по­ве­лѣ́­нїй на­ста́­ви на́съ: ра́з­вѣ бо тебє̀ и҆но́­гѡ бг҃а не зна́­емъ.

Пре­свѣ́т­лымъ вѣн­це́мъ ᲂу҆­вѧ­зе́­на бы́в­ши, пред­сто­и́­ши прⷭ҇то́­лꙋ всѣ́хъ цр҃ѧ̀: тѣ́м­же мо­ли́­сѧ, прпⷣбно­мч҃ни­це є҆лї­са­ве́­то, ѡ҆ вѣ́­рою и҆ лю­бо́­вїю пра́з­днꙋ­ю­щихъ ст҃ꙋ́ю па́­мѧть твою̀.

За­ко́­нѡмъ бжⷭ҇твєн­нымъ по­ви­нꙋ́в­ши­сѧ, за­ко́­нѡвъ грѣ­хо́в­ныхъ до кон­ца̀ ᲂу҆­кло­ни́­ла­сѧ є҆сѝ, и҆ ны́­нѣш­нѧ­гѡ жи­тїѧ̀ кра­со­ты̑ всѧ̑ ᲂу҆­ме́­ты вмѣ­ни́­ла є҆сѝ, да хрⷭ҇та̀ прї­ѡ­брѧ́­ще­ши: и҆ сегѡ̀ ра́ди до́­брѣ по­трꙋ­ди́­ла­сѧ є҆сѝ, вѣн­це­но́­си­це ве­ли­ко­и­ме­ни́­таѧ.

Оу҆́мъ и҆ срⷣце ѿве́рзла є҆сѝ къ все­ле́­нїю блгⷣти, є҆ди́­на­го влⷣкꙋ прї­ѧ́­ла є҆сѝ, и҆ вѣ­не́цъ не­тлѣ́­нїѧ ѡ҆брѣ­ла̀ є҆сѝ, сї­ѧ́­ю­щїй свѣ́т­лы­ми свѣ­то­ли̑­тїи и҆ бо­га́­ты­ми да­ро­ва̑­нїи.

Бг҃о­ро́­ди­ченъ: Тѧ̀, бцⷣе чⷭ҇таѧ, ѡ҆рꙋ́­жїе не­по­бѣ­ди́­мое на вра­гѝ пред­ла­га́­емъ: тѧ̀ ᲂу҆­твер­жде́­нїе и҆ на­де́­ждꙋ на́­ше­гѡ сп҃се́­нїѧ стѧ­жа́­хомъ.

И҆́нъ. І҆р­мо́съ: Ты̀, гдⷭ҇и мо́й, свѣ́тъ, въ мӏ́ръ при­ше́лъ є҆сѝ, свѣ́тъ ст҃ы́й, ѡ҆б­ра­ща́­ѧй и҆зꙿ мра́ч­на не­вѣ́­дѣ­нїѧ, вѣ́­рою вос­пѣ­ва́­ю­щыѧ тѧ̀.

Бг҃о­лѣ́п­но бы́сть во­и́­стин­нꙋ жи­тїѐ твоѐ, че­ло­вѣ́­кѡмъ и҆ а҆́гг҃лѡмъ ꙗ҆ви́­сѧ сїѐ лю­бе́з­но, слꙋ́гъ же са­та­ни́н­скихъ сви­рѣ́п­ствꙋ не­при­стꙋ́п­но по­ка­за́­сѧ.

На зе­млѝ по­дви­за́в­ши­сѧ, все­бо­га́­таѧ, съ се­стра́­ми тво­и́­ми ѡ҆ бз҃ѣ, и҆ вре́­мєн­ныѧ бо­лѣ̑­зни пре­тер­пѣ́в­ши, ны́нѣ на нб҃сѣ́хъ воз­да­ѧ̑­нїѧ прї­е́м­ле­ши со а҆́гг҃лы, мч҃ни­це не­по­бѣ­ди́­маѧ.

Пре­зрѣ́в­ши бл҃го­лѣ́­пїе мӏ́ра сегѡ̀, ꙗ҆ви́­ла­сѧ є҆сѝ на­ста́в­ни­ца за­блꙋ́жд­шымъ, и҆ при­ста́­ни­ще вѣ́р­но сп҃са́­є­мымъ, тво­и́­ми же кровь­мѝ ѡ҆ба­гри́­ла є҆сѝ ба­грѧ­ни́­цꙋ мно­го­цѣ́н­нꙋю, є҆́юже ны́нѣ на нб҃сѣ́хъ ѡ҆дѣ́­ѧ­на, же­ни­хꙋ̀ пред­сто­и́­ши.

Бг҃о­ро́­ди­ченъ: Пре­вы́ш­ша є҆сте­ства̀ бг҃а пло́­тїю по­ро­ди­ла̀ є҆сѝ, дв҃о, ꙗ҆́ко­же са́мъ вос­хо­тѣ̀. тѣ́мъ мы̀, вѣ́р­нїи, мо́­лимъ тѧ̀, и҆з­ба́­ви­ти­сѧ на́мъ ржⷭ҇тво́мъ тво­и́мъ вѣ́ч­на­гѡ мꙋ­че́­нїѧ.

Пѣ́снь ѕ҃.

І҆р­мо́съ: Гла́съ гла­гѡ́лъ мо­ле́б­ныхъ ѿ бо­лѣ́­знен­ныѧ, влⷣко, дꙋшѝ ᲂу҆­слы́­шавъ, ѿ лю́­тыхъ мѧ̀ и҆з­ба́­ви: є҆ди́нъ бо є҆сѝ на́­ше­гѡ сп҃се́­нїѧ ви­но́­венъ.

Є҆гда̀ ра̑ны тѣ­лє́с­ныѧ прї­ѧ́­ла є҆сѝ ѿ без­бо́ж­ныхъ ᲂу҆­бӏ́йцъ, во сми­ре́н­нѣй мꙋ́­дро­сти сво­е́й ꙗ҆́звꙋ тѧ́ж­кꙋю воз­ло­жи́­ла є҆сѝ вра­гꙋ̀, ра­жда́­ю­ще­мꙋ сме́рть.

Є҆гда̀ ве­дѧ́­хꙋ­сѧ на за­ко­лѣ́­нїе вкꙋ́­пѣ со вѣ́р­ною тѝ и҆́но­ки­нею вар­ва́­рою и҆ ве­ли́­ки­ми кнѧ̑­зи, ты̀ со­хра­ни́­ла є҆сѝ дх҃о́в­нꙋю крѣ́­пость, не ѿре́к­ши­сѧ хрⷭ҇та̀ бг҃а, є҆мꙋ́­же слꙋ­жи́­ла є҆сѝ и҆́стин­нѡ.

Ꙗ҆̀же въ ро́вѣ а҆ла­па́­ев­стѣмъ ᲂу҆­слы́­шав­ши ᲂу҆­ѧ́з­влен­ныхъ стє­на́­нїѧ, и҆ съ лю­бо́­вїю ꙗ҆́звы тѣ­лє́с­ныѧ и҆́хъ ѡ҆б­вѧ­за́в­ши, прї­и­дѝ на по́­мощь на́мъ, ᲂу҆­ѧ́з­влєн­нымъ гор­ды́­нею и҆ киче́­нї­емъ, и҆ ѡ҆б­вѧ­жѝ стрꙋ́­пы лю̑­тыѧ дꙋ́шъ на́­шихъ.

Бг҃о­ро́­ди­ченъ: Ѡ҆ на́съ и҆зꙿ тебє̀ во­пло­ще́н­на­го, дв҃о мт҃и, все­гда̀ молѝ, бл҃го­чⷭ҇тнѡ тѧ̀ бл҃жа́­щихъ, и҆з­ба́­ви­ти­сѧ бѣ́дъ, и҆ дꙋ­ше­тлѣ́н­ныхъ стра­сте́й, и҆ вѣ́ч­на­гѡ мꙋ­че́­нїѧ.

И҆́нъ. І҆р­мо́съ: По­жрꙋ́ ти со гла́­сомъ хва­ле́­нїѧ, гдⷭ҇и, цр҃ковь во­пї­е́тъ тѝ, ѿ бѣ­со́в­скїѧ кро́­ве ѡ҆чи́щ­ши­сѧ, ра́ди млⷭ҇ти ѿ ре́бръ тво­и́хъ и҆с­те́к­шею кро́­вїю.

Чтенъ со­сꙋ́дъ ꙗ҆ви́­ла­сѧ є҆сѝ бжⷭ҇твен­на­гѡ дх҃а, но­сѧ́­щи въ срⷣцы тво­е́мъ бжⷭ҇твєн­ныѧ а҆ро­ма́­ты, и҆ ᲂу҆­сла­жда́­ю­щи срⷣца̀ вѣ́р­нѡ со­вер­ша́­ю­щихъ па́­мѧть твою̀.

Си́­лою дх҃а мы́­слен­ныхъ вол­кѡ́въ чє́­лю­сти со­крꙋ­ши́­ла є҆сѝ, прпⷣбно­мч҃ни­це є҆лї­са­ве́­то, зарю̀ не­ве­че́р­нюю ѡ҆бли­ста́­ю­щи, ведѝ и҆ на́съ по сте­зѝ не­ко­ле­би́­мыѧ люб­вѐ бж҃їѧ.

Всю̀ си­би́рь пре­ше́д­ши въ тѣ­ле­сѝ ме́р­твен­нѣмъ, мо­ща́­ми сво­и́­ми по­сѣ­ти́в­ши стра­ны̑ да̑ль­нїѧ, до­сти́г­ла є҆сѝ во ст҃ы́й гра́дъ, въ ѻ҆би́­тель, ю҆́же и҆ско­нѝ воз­лю­би́­ла є҆сѝ.

Бг҃о­ро́­ди­ченъ: Гла­го́­лѡвъ бжⷭ҇твен­ныхъ по­слꙋш­ли́­ва была̀ є҆сѝ, бцⷣе пре­чⷭ҇таѧ: и҆ пре­без­на­ча́ль­на­го сло́­ва пло́­тїю ро­ди­ла̀ є҆сѝ, без­сло­ве́­сїѧ на́съ и҆з­ба́вль­ша­го.

Кон­да́къ, гла́съ д҃:

Ѿ сла́­вы ца́р­ствен­ныѧ, взе́м­ши крⷭ҇тъ хрⷭ҇то́въ, пре­шла̀ є҆сѝ къ сла́­вѣ нбⷭ҇нѣй, мо­лѧ́­щи­сѧ за вра­гѝ, и҆ ѡ҆брѣ­ла̀ є҆сѝ ра́­дость вѣ́ч­нꙋю, ст҃а́ѧ мч҃ни­це кнѧ­ги́­не є҆лї­са­ве́­то, съ вар­ва́­рою мч҃ни­цею: тѣ́м­же мо­ли́­те ѡ҆ дꙋ­ша́хъ на́­шихъ.

І҆́косъ: Воз­лю­би́в­ши хрⷭ҇тѡ́­вы за́­пѡ­вѣ­ди, прпⷣбно­мч҃ни­це, и҆ воз­не­на­ви́­дѣв­ши мӏ́ра сегѡ̀ на­сла­жде́­нїе, при­те­кла̀ є҆сѝ ᲂу҆­се́рд­нѡ ко гдⷭ҇ꙋ, и҆ про­свѣ­ща́­ю­щи зе́­млю рꙋ́с­скꙋю бли­ста́­нї­емъ дх҃о́в­нымъ, при­ве­ла̀ є҆сѝ къ немꙋ̀ ста́­до дѣ́въ, на­ста́в­лен­ныхъ то­бо́ю въ люб­вѝ бж҃ї­ей. про­свѣ­тѝ на́ши ѻ҆́чи сер­де́ч­нѣи, во є҆́же вос­пѣ́­ти по́­дви­ги твоѧ̑, по­ще́­нїе, бдѣ́­нїе, сле́­зы, бо­лѣ̑­зни, со­стра­да́­нїе, бл҃же́н­ныѧ ра́ди жи́­зни вѣ́ч­ныѧ, є҆ѧ́же ны́нѣ на­сла­жда́­ю­щи­сѧ, не­пре­ста́н­нѡ молѝ ѡ҆ дꙋ­ша́хъ на́­шихъ.

Пѣ́снь з҃.

І҆р­мо́съ: Ѡ҆́бра­зꙋ зла­то́­мꙋ на по́лѣ де­и́­рѣ слꙋ­жи́­мꙋ, трїѐ твоѝ ѻ҆́тро­цы не­бре­го́­ша без­бо́ж­на­гѡ ве­лѣ́­нїѧ: по­сре­дѣ́ же ѻ҆гнѧ̀ вве́р­же­ни, ѡ҆ро­ша́­е­ми по­ѧ́­хꙋ: бл҃го­сло­ве́нъ є҆сѝ, бж҃е ѻ҆тє́цъ на́­шихъ.

Къ свѣ́­тꙋ не­за­хо­ди́­мо­мꙋ воз­ше́д­ши, ꙗ҆́кѡ со́лн­це, про­свѣ­ща́­е­ши все­ле́н­нꙋю, дѣла́ бо свѣ́­та со­вер­ши́­ла є҆сѝ: тѣ́м­же про­свѣ­ща́й и҆ на́съ не­до­сто́й­ныхъ, ны́нѣ зо­вꙋ́­щихъ: ѻ҆тє́цъ на́­шихъ бж҃е, бл҃го­сло­ве́нъ є҆сѝ.

Є҆ди́­но­мꙋ бг҃ꙋ воз­ло­жи́в­ши дꙋ́шꙋ и҆ по­мыш­ле́­нїе, тѣ́­сный пꙋ́ть ше́­ство­ва­ла є҆сѝ: тѣ́м­же по­лꙋ­чи́­ла є҆сѝ нбⷭ҇на­гѡ црⷭ҇твїѧ на­сла­жде́­нїе, и҆ ны́нѣ взы­ва́­е­ши: ѻ҆тє́цъ на́­шихъ бж҃е, бл҃го­сло­ве́нъ є҆сѝ.

Сї­ѧ́­ю­щи лꙋ­ча́­ми блгⷣти, прпⷣбно­мч҃ни­це є҆лї­са­ве́­то, и҆с­про­сѝ и҆ на́мъ, со­вер­ша́­ю­щымъ свѣ́т­лый пра́з­дникъ тво́й, ѡ҆став­ле́­нїе грѣ­хѡ́въ, по­ю́­щымъ: бж҃е ѻ҆тє́цъ на́­шихъ, бл҃го­сло­ве́нъ є҆сѝ.

Бг҃о­ро́­ди­ченъ: Ра́­дꙋй­сѧ, зо­ве́мъ тѝ, вкꙋ́­пѣ съ га­врї­и́­ломъ, пре­чⷭ҇таѧ, пре­бл҃го­сло­ве́н­наѧ, молѝ сн҃а тво­е­го̀, да мл҃тва­ми тво­и́­ми сп҃се́тъ дꙋ́шы на́шѧ.

И҆́нъ. І҆р­мо́съ: Въ пещѝ а҆вра­а́м­стїи ѻ҆́тро­цы пер­сӏ́д­стѣй, лю­бо́­вїю бл҃го­чⷭ҇тїѧ па́че, не́­же­ли пла́­ме­немъ, ѡ҆па­лѧ́­е­ми, взы­ва́­хꙋ: бл҃го­сло­ве́нъ є҆сѝ въ хра́­мѣ сла́­вы тво­еѧ̀, гдⷭ҇и.

Свѣ́тъ не­при­стꙋ́п­ный до­сто́й­нѡ про­свѣ­тѝ дꙋ́шꙋ твою̀, є҆лї­са­ве́­то прпⷣбно­мч҃ни­це, и҆ свѣ­ща́­ми свѣ́т­лы­ми ѡ҆за­рѝ по­ю́­щыѧ: бж҃е ѻ҆тє́цъ на́­шихъ, бл҃го­сло­ве́нъ є҆сѝ.

Тер­ни́­стый пꙋ́ть зем­на́­гѡ жи­тїѧ̀ про­ше́д­ши, ма́ти прпⷣбнаѧ, нбⷭ҇на­гѡ на­сла­жде́­нїѧ до­сти́г­ла є҆сѝ, и҆ ны́нѣ со а҆́гг҃лы ли­кꙋ́­е­ши: бж҃е ѻ҆тє́цъ на́­шихъ, бл҃го­сло­ве́нъ є҆сѝ.

Хрⷭ҇та̀ воз­лю­би́в­ши всѣ́мъ срⷣцемъ тво­и́мъ, въ свѣт­лѣ́й­шїй чер­то́гъ нбⷭ҇на­гѡ же­ни­ха̀ все­ли́­ла­сѧ є҆сѝ, бг҃о­бл҃же́н­наѧ, и҆ ꙗ҆́кѡ мч҃ни­ца не­по­бѣ­ди́­маѧ, томꙋ̀ зо­ве́­ши: бж҃е ѻ҆тє́цъ на́­шихъ, бл҃го­сло­ве́нъ є҆сѝ.

Бг҃о­ро́­ди­ченъ: Хра́мъ сщ҃е́­нїѧ сꙋ́щи, все­не­по­ро́ч­наѧ, во ст҃ы́хъ по­чи­ва́­ю­ща­го ро­ди­ла̀ є҆сѝ, все­ст҃а́­го бг҃а, всѧ̑ ѡ҆сщ҃а́­ю­ща­го, и҆ лю́­тыхъ и҆зꙿи­ма́­ю­ща­го.

Пѣ́снь и҃.

І҆р­мо́съ: Въ пе́щь ѻ҆́гнен­нꙋю ко ѻ҆тро­кѡ́мъ є҆врє́й­скимъ сниз­ше́д­ша­го, и҆ пла́­мень въ ро́сꙋ пре­ло́ж­ша­го бг҃а, по́й­те, дѣла̀, ꙗ҆́кѡ гдⷭ҇а, и҆ пре­воз­но­си́­те во всѧ̑ вѣ́ки.

Дне́сь про­сїѧ̀ пре­свѣ́т­лаѧ па́­мѧть твоѧ̀, є҆лї­са­ве́­то прпⷣбно­мч҃ни­це, кнѧ­ги́­не ст҃а́ѧ, ꙗ҆́же ны̀ со­зы­ва́­етъ на тор­же­ство̀, є҆́же про­сла́­ви­ти тер­пѣ́­нїе твоѐ, и҆́мже по­дви­за́­ла­сѧ є҆сѝ со и҆ны́­ми мч҃ни­ки, въ ро́вѣ а҆ла­па́­ев­стѣмъ бы́в­ши­ми, и҆ во­зо­пи́­ти: бл҃го­сло­ви́­те, всѧ̑ дѣла̀ гдⷭ҇нѧ, гдⷭ҇а.

Ꙗ҆́кѡ свѣ́тъ воз­сїѧ̀ и҆зꙿ мра́­ка лю́­та­гѡ без­бо́­жїѧ пра́з­дникъ тво́й, ново­ѧв­ле́н­наѧ прпⷣбно­мч҃ни­це. ты́ же свѣ́­томъ люб­вѐ тво­еѧ̀ про­свѣ­ща́й и҆ на́съ, во­пї­ю́­щихъ: бл҃го­сло­ви́­те, всѧ̑ дѣла̀ гдⷭ҇нѧ, гдⷭ҇а.

Ца́р­скїѧ чер­то́­ги ѡ҆ста́­вив­ши, до­сти́г­ла є҆сѝ чер­то́­га нбⷭ҇на­гѡ, ᲂу҆­го­то́­ван­на­гѡ тебѣ̀ же­ни­хо́мъ, воз­лю́б­лен­нымъ тѝ хрⷭ҇то́мъ, є҆го́­же ви́­дѧ­щи, зо­ве́­ши: бл҃го­сло­ви́­те, всѧ̑ дѣла̀ гдⷭ҇нѧ, гдⷭ҇а.

Бг҃о­ро́­ди­ченъ: Тебє̀ ра́ди, пре­чⷭ҇таѧ бг҃о­не­вѣ́­сто, пе­ча́ль пре­ста̀, и҆ клѧ́т­ва во­и́­стин­нꙋ не­пло́д­ствомъ и҆з­не­мо́­же, и҆ бл҃го­сло­ве́­нїе про­цвѣ­тѐ вѣ̑р­нымъ во вѣ́ки.

И҆́нъ. І҆р­мо́съ: Рꙋ́цѣ рас­про­сте́ръ да­нї­и́лъ, львѡ́въ зї­ѧ̑­нїѧ въ ро́вѣ за­тчѐ: ѻ҆́гнен­нꙋю же си́лꙋ ᲂу҆­га­си́­ша, до­бро­дѣ́­те­лїю пре­по­ѧ́­сав­ше­сѧ, бл҃го­чⷭ҇тїѧ ра­чи́­тє­ли ѻ҆́тро­цы, взы­ва́­ю­ще: бл҃го­сло­ви́­те, всѧ̑ дѣла̀ гдⷭ҇нѧ, гдⷭ҇а.

Вол­нꙋ́­ю­ще­е­сѧ мо́ре на­па́­стей и҆ мꙋ́къ, воз­дви­за́­е­мыхъ без­бо́ж­ны­ми го­ни́­тє­ли на вѣ́рꙋ хрⷭ҇то́­вꙋ, не­вре́д­нѡ пре­плы­ла̀ є҆сѝ, и҆ ра́й­ска­гѡ при­ста́­ни­ща до­сти́г­ла є҆сѝ, во­пї­ю́­щи: сщ҃е́н­ни­цы, вос­по́й­те, лю́­дїе, пре­воз­но­си́­те во всѧ̑ вѣ́ки.

Ꙗ҆́кѡ пра́­вды свѣ­ща̀ воз­сї­ѧ́в­ши, мра́къ без­бо́­жїѧ раз­сѣ́­ѧла є҆сѝ, бг҃о­мꙋ́­драѧ є҆лї­са­ве́­то, и҆ ко хрⷭ҇тꙋ̀ при­ве­ла̀ є҆сѝ мно́­же­ство же́нъ бг҃о­лю­би́­выхъ, во­пї­ю́­щихъ: сщ҃е́н­ни­цы, вос­по́й­те, лю́­дїе, пре­воз­но­си́­те во всѧ̑ вѣ́ки.

Пре­сла́в­нѡ про­сла́­ви тѧ̀ бжⷭ҇твен­наѧ блгⷣть, є҆лї­са­ве́­то кнѧ­ги́­не, съ вар­ва́­рою и҆́но­ки­нею и҆ мно́­жай­ши­ми и҆ны́­ми мч҃ни­ки но́­вы­ми, и҆ свѣ́т­лѡ во­пи́­ти ва́съ на­ꙋ­чи́в­ши: сщ҃е́н­ни­цы, вос­по́й­те, лю́­дїе, пре­воз­но­си́­те во всѧ̑ вѣ́ки.

Бг҃о­ро́­ди­ченъ: Ка́­плѧ бг҃о­то́ч­наѧ, ꙗ҆́же ѿ тебє̀ ро́жд­ши­сѧ, мӏ́ръ ѡ҆ст҃и́в­шаѧ, бцⷣе дв҃о, ка́­плю млⷭ҇ти мѝ и҆с­то­чѝ, ѡ҆сщ҃а́­ю­щꙋю дꙋ́шы на́шѧ и҆ по­мыш­лє́­нїѧ.

Пѣ́снь ѳ҃.

І҆р­мо́съ: Ве́сь є҆сѝ же­ла́­нїе, ве́сь сла́­дость, сло́­ве бж҃їй, дв҃ы сн҃е, бж҃е бо­гѡ́въ, гдⷭ҇и, ст҃ы́хъ пре­ст҃ы́й: тѣ́мъ тѧ̀ всѝ съ ро́жд­шею ве­ли­ча́­емъ.

Всѧ̀ въ го́р­нїй і҆ерⷭ҇ли́мъ ᲂу҆­стрѣ­ми́в­ши­сѧ, прпⷣбно­мч҃ни­це є҆лї­са­ве́­то, ѡ҆ста́­ви­ла є҆сѝ ст҃ы̑ѧ мѡ́щи твоѧ̑ въ до́ль­нѣй ге­ѳси­ма́­нїи, и҆дѣ́­же вы́нꙋ сла́­вѧтъ бг҃а, тѧ̀ про­сла́вль­ша­го, въ и҆́но­че­стѣмъ жи­тїѝ бл҃го­чⷭ҇ти̑­выѧ сє­стры̀ твоѧ̑.

Жи́знь вѣ́ч­нꙋю, мч҃ни­це хрⷭ҇то́­ва, при­лѣ́ж­нѡ стѧ­жа́­ла є҆сѝ, мч҃ни­че­ски­ми кровь­мѝ сї­ѧ́­ю­щи и҆з­да­ле́­ча, тѣ́м­же и҆ на пра́з­дникъ тво́й зо­ве́­ши ны̀, на­ча́ль­ни­це мо­на́­ше­ствꙋ­ю­щымъ, ст҃а́ѧ є҆лї­са­ве́­то.

Мл҃тва­ми тво­и́­ми, не­вѣ́­сто хрⷭ҇то́­ва бг҃о­из­бра́н­наѧ, раз­рѣ­ши́ ми со­грѣ­ше́­нїй плє­ни́­цы, и҆ стра­сте́й мо­и́хъ мглꙋ̀ ра­зо­рѝ.

Бг҃о­ро́­ди­ченъ: Свѣ́тъ бли­ста́­нїѧ ржⷭ҇тво́мъ тво­и́мъ воз­сїѧ̀, и҆ про­свѣ­тѝ всю̀ под­со́л­неч­нꙋю, и҆ пред­ста́­те­лѧ тьмы̀ по­гꙋ­бѝ, бг҃о­ро­ди́­тель­ни­це все­чⷭ҇таѧ, не­пре­ста́н­ны­ми гла̑­сы всѣ̑мъ вос­хва­лѧ́­ю­щымъ тѧ̀.

И҆́нъ. І҆р­мо́съ: Ка́­мень не­рꙋ­ко­сѣ́ч­ный ѿ не­сѣ­ко́­мыѧ горы̀, тебє̀, дв҃о, кра­е­ꙋ­го́ль­ный ѿсѣ­че́­сѧ, хрⷭ҇то́съ, со­во­кꙋ­пи́­вый раз­сто­ѧ̑­ща­ѧ­сѧ є҆стє­ства̀. тѣ́мъ ве­се­лѧ́­ще­сѧ, тѧ̀, бцⷣе, ве­ли­ча́­емъ.

До­бро­дѣ́­тель­ми мно́­ги­ми ᲂу҆­кра́­ше­на, че­ло­вѣ­ко­не­на­ви́ст­ни­ка кѡ́з­ни по­гꙋ­би́­ла є҆сѝ, ко хрⷭ҇тꙋ̀ лю­бо́­вїю при­лѣ­пи́в­ши­сѧ, и҆ хрⷭ҇то­лю́­бицъ со́нмъ къ бг҃ꙋ при­ве́д­ши.

Со­во­кꙋ­пи́в­ши­сѧ съ без­пло́т­ны­ми ли̑ки, сла́в­наѧ, и҆ со стра­да́ль­че­ски­ми со­бѡ́­ры, молѝ хрⷭ҇та̀ бг҃а ѡ҆ ѿстꙋ́пль­шихъ и҆ не­на­ви́­дѧ­щихъ є҆го̀.

Стра­ны̑ раз­ли̑ч­ны пре­шла̀ є҆сѝ въ жи­тїѝ тво­е́мъ вре́­мен­нѣмъ, и҆ ны́нѣ бли­ста̑­нїи дх҃а про­свѣ­ща́­е­ши на́съ, во мно́­зѣхъ гра́­дѣхъ и҆ ѻ҆би́­те­лехъ тѧ̀ сла́­вѧ­щихъ.

Бг҃о­ро́­ди­ченъ: Гла́съ во­пї­е́мъ тѝ всѝ а҆́гг҃ловъ, дв҃о, па­ла́­то, и҆ прⷭ҇то́­ле бж҃їй: ра́­дꙋй­сѧ, є҆́юже спо­до́­би­хом­сѧ нбⷭ҇на­гѡ црⷭ҇твїѧ, дре́в­ле ѿрино­ве́н­нїи тлѣ́­нї­емъ, и҆ до­бро́­тꙋ пе́р­вꙋю не­смы́­слен­нѡ по­гꙋ­би́в­шїи.

Свѣ­ти́­ленъ:

Оу҆­крѣ́пль­ши­сѧ, прпⷣбно­мч҃ни­це є҆лї­са­ве́­то, крⷭ҇то́мъ гдⷭ҇а тво­е­гѡ̀, мꙋ­чи́­те­лей гор­ды́­ню по­гꙋ­би́­ла є҆сѝ, по­стра­да́в­ши мꙋ́­же­ски, и҆ ѿ хрⷭ҇та̀ прї­ѧ́­ла є҆сѝ по́­че­сти вѣ­не́цъ, ѡ҆ на́съ мо­лѧ́­щи, тѧ̀ по­чи­та́­ю­щихъ лю­бо́­вїю. Два́­жды.

Сла́­ва, и҆ ны́нѣ, бг҃о­ро́­ди­ченъ:

Сто­ѧ́­ще ѡ҆́крестъ тебє̀, дѣ̑вы бг҃о­мꙋ̑­дрыѧ, бг҃о­ро­ди́­тель­ни­це мр҃ӏ́е, ꙗ҆́кѡ цр҃и́­цы ро́да, тво­е­мꙋ̀ сн҃ꙋ при­ве­до́­ша­сѧ, пре­чⷭ҇таѧ, ꙗ҆́кѡ цр҃ю̀ всѧ́­че­скихъ: є҆го́­же, мт҃и дв҃о, ѡ҆ на́съ ᲂу҆­мо­лѝ.

На хва­ли́­техъ стї­хи̑­ры на д҃, гла́съ и҃.

По­до́­бенъ: Ѽ пре­сла́в­на­гѡ чꙋ­де­сѐ:

Ꙗ҆́кѡ на ка́­ме­ни тве́р­дѣ,* во и҆с­по­вѣ́­да­нїи бж҃їи и҆з­вѣ­сти́в­ши­сѧ,* є҆лї­са­ве́­то ст҃а́ѧ съ вар­ва́­рою,* по­стра­да́­ла є҆сѝ въ ро́вѣ а҆ла­па́­ев­стѣмъ,* тѣ́м­же мы́­слен­на­го ᲂу҆­бӏ́й­цꙋ вра­га̀* въ бе́з­днѣ по­то­пи́­ла є҆сѝ,* и҆ вѣ­не́цъ по­бѣ́д­ный* до­сто́й­нѡ прї­ѧ́­ла є҆сѝ.

Па́­мѧть твою̀ со­вер­ша́­ю­ще,* тѧ̀ про­слав­лѧ́­емъ,* ꙗ҆́кѡ прї­е́м­шꙋю лю­бо́вь хрⷭ҇то́­вꙋ,* и҆ тогѡ̀ по­ве­лѣ̑­нїѧ,* и҆ про­по­вѣ́­дав­шꙋю, прпⷣбно­мч҃ни­це, дꙋ­ша́мъ сп҃се́­нїе.* тѣ́м­же мо­ще́й тво­и́хъ ра́кꙋ, є҆лї­са­ве́­то,* вѣ́­рою ѡ҆б­ло­бы­за́­емъ,* и҆с­то­ча́­ю­щꙋю блгⷣть не­ѡ­скꙋ́д­нꙋю,* вѣ́­рою и҆ лю­бо́­вїю при­те­ка́­ю­щымъ.

Бл҃же́нъ ст҃ы́й гра́дъ и҆ ѻ҆би́­тель ге­ѳси­ма́н­скаѧ,* въ ню́же до­сти́­гли є҆стѣ̀,* прпⷣбно­мч҃ни­це є҆лї­са­ве́­то съ и҆́но­ки­нею вар­ва́­рою,* чⷭ҇тны́й же хра́мъ, тѣ­ле­са̀ ва̑ша вос­прї­е́­мый,* ꙗ҆́кѡ вѣн­це́мъ ца́р­ствїѧ ᲂу҆­кра­си́­сѧ:* хра­ни́­тєль­ни­цы бл҃го­прї­ѧ̑т­ныѧ,* вра­гѝ ᲂу҆­стра­ша́­ю­щыѧ,* и҆ да­ле́­че ѿ ѻ҆би́­те­ли и҆ гра́­да ва́­ше­гѡ ѿго­нѧ́­ю­щыѧ,* мо­ли́­те сп҃сти́­сѧ дꙋ­ша́мъ на́­шымъ.

Въ кнѧ́­же­стѣмъ гра́­дѣ да́рм­штад­тѣ пꙋ́ть сво́й на­че́н­ши,* въ ца́р­ствꙋ­ю­щїй гра́дъ мо­сквꙋ̀ до­сти́г­ла є҆сѝ,* срⷣцемъ же и҆ ᲂу҆­мо́мъ взи­ра́­ю­щи на го́р­нїй і҆ерⷭ҇ли́мъ,* ᲂу҆­чре­ди́­ла є҆сѝ ѻ҆би́­тель ма́р­ѳы и҆ ма­рӏ́и.* є҆гда́ же въ ме́р­твен­нѣмъ тѣ­ле­сѝ тво­е́мъ* и҆́нъ пꙋ́ть чрезꙿ си­би́рь и҆ кита́й прї­ѧ́­ла є҆сѝ,* ꙗ҆́ко­же пре­не­сти́­сѧ мо­ще́мъ тво­и̑мъ въ до́ль­нїй і҆е­рꙋ­са­ли́мъ,* и҆ во ѻ҆би́­те­ли ма­рӏ́и ма­гда­ли́­ны воз­ло­жи́­ти­сѧ,* Ѽ сла́­во мч҃ни­кѡвъ и҆ по­хва­ло̀, є҆лї­са­ве́­то при­сно­па́­мѧт­наѧ!

Сла́­ва, гла́съ г҃:

Дне́сь праз­дно­лю́б­ныхъ со­бо́­ри со­ше́д­ше­сѧ, ра́­дост­нымъ ли­це́мъ и҆ чⷭ҇тымъ срⷣцемъ, дх҃о́в­нѣ со­ста́­вимъ ли́къ, по­хва­лѧ́­ю­ще хрⷭ҇та̀ бг҃а на́­ше­го, про­слав­лѧ́­ю­ща­го ст҃ы̑ѧ своѧ̑ стра­сто­нѡ́­си­цы: ве­ли́­кꙋю кнѧ­ги́­ню є҆лї­са­ве́­тꙋ съ и҆́но­ки­нею вар­ва́­рою, ꙗ҆́кѡ мно­го­цѣ́н­ное мѵ́ро, кро́вь свою̀ при­не́с­шыѧ же­ни­хꙋ̀ сво­е­мꙋ̀ хрⷭ҇тꙋ̀, и҆ воз­да­ѧ́­нїе прї­ѧ́в­шыѧ вѣ­не́цъ не­тлѣ́­ненъ ѿ негѡ̀, прпⷣбно­мч҃ни­цы до­сто­чꙋ̑д­ныѧ.

И҆ ны́нѣ, бг҃о­ро́­ди­ченъ, гла́съ то́й­же:

Безꙿ сѣ́­ме­не за­ча­ла̀ є҆сѝ ѿ дх҃а ст҃а́­гѡ, и҆ сла­во­сло́­вѧ­ще вос­пѣ­ва́­емъ тѧ̀: ра́­дꙋй­сѧ, пре­ст҃а́ѧ дв҃о.

Сла­во­сло́­вїе ве­ли́­кое. Тро­па́рь прпⷣбно­мч҃ни­цы, Сла́­ва, и҆ ны́нѣ, бг҃о­ро́­ди­ченъ. Є҆ктє­нїѝ, и҆ ѿпꙋ́стъ.

На лїтꙋргӏ́и.

Бл҃жє́н­на ѿ ка­нѡ́­на ст҃ы́ѧ, пѣ́снь г҃ и҆ ѕ҃.

Про­кӏ́­менъ, гла́съ д҃: Тебє̀ ра́ди, гдⷭ҇и, ᲂу҆­мерщ­влѧ́­е­ми є҆смы̀ ве́сь де́нь.

Стӏ́хъ: Вмѣ­ни́­хом­сѧ ꙗ҆́кѡ ѻ҆́вцы за­ко­ле́­нїѧ.

А҆пⷭ҇лъ къ ри́м­лѧ­нѡмъ, за­ча́­ло ч҃ѳ.

А҆л­ли­лꙋ́­їа, гла́съ а҃: Бг҃ъ на́мъ при­бѣ́­жи­ще и҆ си́ла, по­мо́щ­никъ въ ско́р­бехъ, ѡ҆брѣ́т­шихъ ны̀ ѕѣлѡ̀.

Стӏ́хъ: Гдⷭ҇и, сп҃сѝ цр҃ѧ̀, и҆ ᲂу҆­слы́­ши ны̀, во́нь­же а҆́ще де́нь при­зо­ве́мъ тѧ̀.

Є҆ѵⷢ҇лїе ѿ і҆ѡ­а́н­на, за­ча́­ло н҃в.

При­ча́­стенъ: Въ па́­мѧть вѣ́ч­нꙋю бꙋ́­детъ првⷣникъ, ѿ слꙋ́­ха ѕла̀ не ᲂу҆­бо­и́т­сѧ.

Мл҃тва ко ст҃ы̑мъ прпⷣбно­мч҃ни­цамъ, ве­ли́­цѣй кнѧ­ги́­нѣ є҆лї­са­ве́­тѣ и҆ и҆́но­ки­нѣ вар­ва́­рѣ:

Ѽ ст҃а́ѧ ди́в­наѧ прпⷣбно­мч҃ни­це є҆лї­са­ве́­то, съ вѣ́р­ною тѝ и҆́но­ки­нею вар­ва́­рою, пре­тер­пѣ́в­шыѧ стра­да̑­нїѧ и҆ сме́рть за хрⷭ҇та̀, мо­ли́­те­сѧ предꙿ прⷭ҇то́­ломъ все­вы́ш­нѧ­гѡ ѡ҆ на́съ, сми­ре́н­нѡ при­па́­да­ю­щихъ къ дх҃о­но́с­нымъ мо­ще́мъ ва́­шымъ, и҆ по­чи­та́­ю­щихъ лю­бо́вь ко хрⷭ҇тꙋ̀ и҆ къ лю́­демъ, и҆ по́­двигъ и҆ тер­пѣ́­нїе ва́ше. При­не́с­шыѧ себѐ въ же́р­твꙋ бг҃ꙋ жи­во́­мꙋ, ст҃ы̑ѧ прпⷣбно­мч҃ни­цы, ве­ли́­каѧ кнѧ­ги́­не є҆лї­са­ве́­то и҆ и҆́но­ки­не вар­ва́­ро, мо­ли́­те хрⷭ҇та̀ бг҃а, со­грѣ­ше́­нїй ѡ҆став­ле́­нїе да­ро­ва́­ти чтꙋ́­щымъ лю­бо́­вїю па́­мѧть ва́шꙋ, да про­сти́тъ на́мъ пре­грѣ­шє́­нїѧ на̑ша, ѻ҆би́­тель же на́шꙋ до́­брѣ ᲂу҆­крѣ­пи́тъ и҆ ᲂу҆­твер­ди́тъ, и҆ цр҃ковь рꙋ́с­скꙋю въ чⷭ҇то­тѣ̀ и҆ є҆ди­не́­нїи со­хра­ни́тъ, и҆ да сп҃се́тъ дꙋ́шы на́шѧ. А҆ми́нь.