Мѣ́­сѧ­ца ма́р­та въ и҃і-й де́нь, и҆ се­пте́м­врїа въ г҃-й де́нь.

Слꙋ́жба ст҃о́мꙋ царю̀ мч҃никꙋ є҆дꙋа́рдꙋ.

На вели́цѣй вече́рни.

На Гдⷭ҇и, воз­зва́хъ: стї­хи̑­ры на ѕ҃, гла́съ а҃:

Ꙗ҆́кѡ лоза̀ мно­го­пло́д­наѧ, но́­ва­гѡ вї­но­гра́­да хрⷭ҇то́­ва, на зарѣ̀ про­свѣ­ще́­нїѧ во стра­нѣ̀ тво­е́й на­са­жде́н­на­гѡ, до­бро­дѣ́­тель­ми мно́­ги­ми про­сї­ѧ́лъ є҆сѝ, и҆ бг҃ꙋ ᲂу҆­го­ди́лъ є҆сѝ, тѣ́м­же тѧ̀ по­хва­ла́­ми ᲂу҆­бл҃жа́­емъ, є҆дꙋ­а́р­де, царю̀ бл҃го­чⷭ҇ти́­вѣй­шїй.

Ца́р­скимъ пꙋ­те́мъ ше́­ство­вавъ, царю̀ ст҃ы́й, цр҃и́­цею до­бро­дѣ́­те­лей, хрⷭ҇то́­вою лю­бо́­вїю ᲂу҆­кра­си́в­сѧ, ни́­щыѧ и҆ ᲂу҆­бѡ́­гїѧ при­зрѣ­ва́лъ є҆сѝ, и҆ бо­лѧ́­щыѧ по­сѣ­ща́лъ є҆сѝ, сꙋ́дъ и҆ пра́­вдꙋ тво­рѧ̀ лю́­демъ тво­и̑мъ, бг҃о­че­сти́­ве є҆дꙋ­а́р­де.

Мѡ́щи твоѧ̑ чⷭ҇тны̑ѧ, є҆дꙋ­а́р­де, ꙗ҆́кѡ со­кро́­ви­ще ве­ли́­кое, по­чи­та́­ю­щымъ па́­мѧть твою̀ да­ро­ва́лъ є҆сѝ, тѣ́м­же и҆ при­те­ка́­ю­щымъ къ ѻ҆́нымъ бо­лѣ̑­зни и҆с­цѣ­лѧ́­е­ши, и҆ про­шє́­нїѧ и҆́хъ къ по́ль­зѣ и҆с­пол­нѧ́­е­ши, къ бг҃ꙋ тво­и́­ми пред­ста́­тель­ствы.

И҆́ны стї­хи̑­ры, гла́съ в҃:

І҆е­за­ве́­ли не­че­сти́­вѣй, прⷪ҇ро́­ки бж҃їѧ ᲂу҆­мер­тви́­ти тща́­щей­сѧ, по­до́­бѧ­щи­сѧ, и҆ і҆рѡ­дӏ́и дре́в­ле гла­вы̀ прⷪ҇ро́­чи тре́­бꙋ­ю­щей, по­дра­жа́­ю­щи, со­вѣ́тъ со­тво­рѝ на тѧ̀ ца­ри́­ца без­за­ко́н­наѧ, є҆дꙋ­а́р­де, и҆ ᲂу҆­мерщ­вле́­нїе твоѐ го­тов­лѧ́­ше, не ᲂу҆­сты­дѣ́­сѧ бо ни мла́­до­сти тво­еѧ̀, нижѐ нра́­ва кро́т­кагѡ, нижѐ бл҃го­чⷭ҇тїѧ, но за́­ви­стїю го́рь­кою ѡ҆мра­чи́в­ши­сѧ, на­вѣ́­тꙋ дї­а́­воль­ско­мꙋ по­слѣ́­до­ва.

Ꙗ҆́кѡ і҆ꙋ́да, ло­бза́­нї­емъ хрⷭ҇та̀ пре­да́­вый, та́кѡ и҆ ца­ри́­ца ѕло­че­сти́­ваѧ, ѕла̑ѧ на тѧ̀ ᲂу҆­мы́­слив­ши, со кле­врє́­ты сво­и́­ми со­вѣ́тъ со­тво́р­ши, тебѐ, царю̀, ле́­стїю при­зы­ва́­етъ, вѣ́­дꙋ­щи, ꙗ҆́кѡ на ᲂу҆­бї­е́­нїе зва́нъ є҆сѝ.

Что̀ ᲂу҆̀бо ѡ҆брѣ­ла̀ є҆сѝ, Ѽ без­ꙋ́м­наѧ же́но, пре­сто́лъ ѿ царѧ̀ за­ко́н­на­гѡ ѿто́рг­ши, и҆ тогѡ̀ вѣ­не́цъ ѡ҆кро­ва́влен­ный на гла­вꙋ̀ сы́на тво­е­гѡ̀ воз­ло­жи́в­ши; се́ бо сї­ѧ́­етъ, мч҃ни­че­скимъ вѣн­це́мъ ᲂу҆­кра́­шенъ, въ нбⷭ҇нѣмъ црⷭ҇твїи є҆дꙋ­а́рдъ, ты́ же, во вре́­ти­щи и҆ пе́­плѣ ка́­ю­щи­сѧ, тогѡ̀ про­ще́­нїе и҆ пред­ста́­тель­ство ᲂу҆­лꙋ­чи́­ти мо́­ли­ши­сѧ.

Сла́­ва, гла́съ и҃:

Не на ло́въ и҆с­хо́­ди­ши, царю̀ без­ви́н­нѣй­шїй, но на со­вѣ́тъ не­че­сти́­выхъ льсти́в­нѡ при­зы­ва́­е­ши­сѧ, та́же и҆ не ѕвѣ́­рѧ лю́­та­го срѣ­та́­е­ши, но ѿ пре­да́­те­лей ѕвѣ­ро­по­до́б­ныхъ сме́рть лю́­тꙋю прї­е́м­ле­ши, ѻ҆ба́­че вѣн­це́мъ мч҃ни­че­скимъ вѣн­ча́­е­ши­сѧ, и҆ ца́р­ство зем­но́е ѡ҆став­лѧ́ѧ, нбⷭ҇ное црⷭ҇твїе на­слѣ́­дꙋ­е­ши, со ст҃ы́­ми и҆ првⷣны­ми во­дво­рѧ́­ѧ­сѧ.

И҆ ны́нѣ, бг҃о­ро́­ди­ченъ до­гма́­тїкъ, гла́съ и҃: Цр҃ь нбⷭ҇ный:

Вхо́дъ, про­кӏ́­менъ днѐ, и҆ чтє́­нїѧ г҃.

Прⷪ҇ро́­че­ства и҆са́­ї­и­на чте́­нїе:

Та́кѡ гл҃етъ гдⷭ҇ь: Всѝ ꙗ҆зы́­цы со­бра́­ша­сѧ вкꙋ́­пѣ, и҆ со­бе­рꙋ́т­сѧ кнѧ̑­зи ѿ ни́хъ. кто̀ воз­вѣ­сти́тъ сїѧ̑ въ ни́хъ; и҆лѝ ꙗ҆̀же ѿ на­ча́­ла, кто̀ слы̑­ша­на со­тво­ри́тъ ва́мъ; да при­ве­дꙋ́тъ сви­дѣ́­тє­ли своѧ̑, и҆ ѡ҆прав­дѧ́т­сѧ, и҆ да ᲂу҆­лы́­шатъ, и҆ да ре­кꙋ́тъ и҆́сти­нꙋ. Бꙋ́­ди­те мѝ сви­дѣ́­тє­ли, и҆ а҆́зъ сви­дѣ́­тель, гл҃етъ гдⷭ҇ь бг҃ъ, и҆ ѻ҆́трокъ, є҆го́­же и҆з­бра́хъ: да по­зна́­е­те, и҆ вѣ́­рꙋ­е­те мѝ, и҆ раз­ꙋ­мѣ́­е­те, ꙗ҆́кѡ а҆́зъ є҆́смь: пре́­жде менє̀ не бы́сть и҆́нъ бг҃ъ, и҆ по мнѣ̀ не бꙋ́­детъ. А҆́зъ є҆́смь бг҃ъ, и҆ нѣ́сть ра́з­вѣ менє̀ сп҃са́­ѧй. А҆́зъ воз­вѣ­сти́хъ и҆ сп҃со́хъ, ᲂу҆­ни­чи­жи́хъ, и҆ не бѣ̀ въ ва́съ чꙋ́ждїй. вы̀ мнѣ̀ сви­дѣ́­тє­ли, и҆ а҆́зъ гдⷭ҇ь бг҃ъ, И҆ є҆щѐ ѿ на­ча́­ла а҆́зъ є҆́смь, и҆ нѣ́сть ѿ рꙋ́къ мо­и́хъ и҆з­ба­влѧ́­ѧй: со­тво­рю̀, и҆ кто̀ ѿвра­ти́тъ то̀; Си́це гл҃етъ гдⷭ҇ь бг҃ъ, и҆з­ба­влѧ́­ѧй ва́съ, ст҃ы́й і҆и҃левъ.

Прⷪ҇ро́­че­ства и҆са́­ї­и­на чте́­нїе:

Да воз­ра́­дꙋ­ет­сѧ дꙋша̀ моѧ̀ ѡ҆ гдⷭ҇ѣ: ѡ҆б­ле­че́ бо мѧ̀ въ ри́зꙋ сп҃се́­нїѧ, и҆ ѻ҆де́­ждею ве­се́­лїѧ ѡ҆дѣ́ѧ мѧ̀, ꙗ҆́кѡ же­ни­хꙋ̀, воз­ло­жѝ мнѣ̀ вѣ­не́цъ, и҆ ꙗ҆́кѡ не­вѣ́­стꙋ, ᲂу҆­кра­си́ мѧ кра­со­то́ю. И҆ ꙗ҆́кѡ зе­млѧ̀, ра­стѧ́­щаѧ цвѣ́тъ сво́й, и҆ ꙗ҆́кѡ вер­то­гра́дъ сѣ́­ме­на своѧ̑ про­зѧ­ба́­етъ: та́кѡ воз­ра­сти́тъ гдⷭ҇ь пра́­вдꙋ, и҆ ве­се́­лїе предꙿ всѣ́­ми ꙗ҆зы̑­ки. Сї­ѡ́­на ра́ди не ᲂу҆­мол­чꙋ̀, и҆ і҆ерⷭ҇ли́­ма ра́ди не по­пꙋ­щꙋ̀, до́н­де­же и҆зы́­детъ ꙗ҆́кѡ свѣ́тъ пра́­вда моѧ̀, и҆ сп҃се́­нїе моѐ ꙗ҆́кѡ свѣ­ти́­ло раз­жже́т­сѧ. И҆ ѹ҆́зрѧтъ ꙗ҆зы́­цы пра́­вдꙋ твою̀, и҆ ца́­рїе сла́­вꙋ твою̀, и҆ про­зо­вꙋ́тъ тѧ̀ и҆́ме­немъ но́­вымъ, и҆́мже гдⷭ҇ь на­и­ме­нꙋ́­етъ є҆̀. И҆ бꙋ́­де­ши вѣ­не́цъ до­бро́­ты въ рꙋцѣ̀ гдⷭ҇ни, и҆ дї­а­ди́­ма црⷭ҇твїѧ въ рꙋцѣ̀ бг҃а тво­е­гѡ̀. И҆ не про­зо­ве́­ши­сѧ кто­мꙋ̀ ѡ҆ста́в­ленъ, и҆ зе­млѧ̀ твоѧ̀ кто­мꙋ̀ не на­ре­че́т­сѧ пꙋ­ста̀: тебѣ́ бо про­зо­ве́т­сѧ во́лѧ моѧ̀, и҆ зе­млѧ̀ твоѧ̀ все­ле́н­наѧ: ꙗ҆́кѡ бл҃го­во­лѝ гдⷭ҇ь въ тебѣ̀, и҆ зе­млѧ̀ твоѧ̀ вкꙋ́­пѣ на­сели́т­сѧ. И҆ ꙗ҆́ко­же жи­вѧ́й ю҆́но­ша съ дѣ́­вою, та́кѡ по­жи­вꙋ́тъ сы́­но­ве твоѝ съ то­бо́ю: и҆ бꙋ́­детъ, ꙗ҆́ко­же ра́­дꙋ­ет­сѧ же­ни́хъ ѡ҆ не­вѣ́­стѣ, та́кѡ воз­ра́­дꙋ­ет­сѧ гдⷭ҇ь ѡ҆ тебѣ̀.

Прⷪ҇ро́­че­ства и҆са́­ї­и­на чте́­нїе:

Свѣ­ти́­сѧ, свѣ­ти́­сѧ, і҆ерⷭ҇ли́­ме, прї­и́­де бо тво́й свѣ́тъ, и҆ сла́­ва гдⷭ҇нѧ на тебѣ̀ воз­сїѧ̀. Сѐ тьма̀ по­кры́­етъ зе́­млю, и҆ мра́къ на ꙗ҆зы́­ки, на тебѣ́ же ꙗ҆ви́т­сѧ гдⷭ҇ь, и҆ сла́­ва є҆гѡ̀ на тебѣ̀ ѹ҆́зрит­сѧ. И҆ по́й­дꙋтъ ца́­рїе свѣ́­томъ тво­и́мъ, и҆ ꙗ҆зы́­цы свѣ́т­ло­стїю тво­е́ю. Воз­ве­дѝ ѡ҆́крестъ ѻ҆́чи твоѝ, и҆ ви́ждь со­бра̑­наѧ ча̑да твоѧ̑: сѐ прї­и­до́­ша всѝ сы́­но­ве твоѝ и҆з­да­ле́­ча, и҆ дщє́­ри твоѧ̑ на ра́­мѣхъ во́зьмꙋт­сѧ. То­гда̀ ѹ҆́зри­ши, и҆ воз­ра́­дꙋ­е­ши­сѧ, и҆ ᲂу҆­бо­и́­ши­сѧ, и҆ ᲂу҆­жа́с­неши­сѧ се́рд­цемъ, ꙗ҆́кѡ при­ло­жи́т­сѧ къ тебѣ̀ бо­га́т­ство мор­ско́е, и҆ ꙗ҆зы́­кѡвъ, и҆ лю­де́й. И҆ прї­и́­дꙋтъ къ тебѣ̀ ста­да̀ вель­блю̑дъ, и҆ по­кры́­ютъ тѧ̀ вель­блю́­ди ма­дї­а́м­стїи и҆ ге­фа́р­стїи: всѝ ѿ савы̀ прї­и́­дꙋтъ, но­сѧ́­ще зла́­то, и҆ лї­ва́нъ при­не­сꙋ́тъ, и҆ ка́­мень че́­стенъ, и҆ сп҃се́­нїе гдⷭ҇не бл҃го­воз­вѣ­стѧ́тъ. И҆ всѧ̑ ѻ҆́вцы кида̑р­скїѧ со­бе­рꙋ́т­сѧ тебѣ̀, и҆ ѻ҆внѝ на­ве­ѡ́­ѳстїи прї­и́­дꙋтъ къ тебѣ̀, и҆ воз­не­сꙋ́т­сѧ прї­ѧ̑т­наѧ на же́р­твен­никъ мо́й, и҆ до́мъ мл҃твы моеѧ̀ про­сла́­вит­сѧ. Кӏ́и сꙋ́ть, и҆̀же ꙗ҆́кѡ ѻ҆́бла­цы ле­тѧ́тъ, и҆ ꙗ҆́кѡ го́­лꙋ­бїе со птен­цы̑ ко мнѣ̀; Менѐ ѻ҆́стро­ви жда́­ша, и҆ ко­ра­бли̑ ѳар­сӏ́й­стїи въ пе́р­выхъ, при­ве­стѝ ча̑да твоѧ̑ и҆з­да­ле́­ча, и҆ сре­бро̀ и҆ зла́­то и҆́хъ съ ни́ми, и҆́ме­не ра́ди гдⷭ҇нѧ ст҃а́­гѡ, и҆ за є҆́же ст҃о́­мꙋ і҆и҃ле­вꙋ сла́в­нꙋ бы́ти. И҆ со­зи́­ждꙋтъ сы́­но­ве и҆но­ро́д­нїи стѣ́­ны твоѧ̑, и҆ ца́­рїе и҆́хъ пред­сто­ѧ́­ти бꙋ́­дꙋтъ тебѣ̀: за гнѣ́въ бо мо́й по­ра­зи́хъ тѧ̀, и҆ за млⷭ҇ть мою̀ воз­лю­би́хъ тѧ̀. И҆ ѿве́р­зꙋт­сѧ вра­та̀ твоѧ̑ при́­снѡ, де́нь и҆ но́щь не за­тво­рѧ́т­сѧ, вве­стѝ къ тебѣ̀ си́лꙋ ꙗ҆зы̑къ, и҆ царѝ и҆́хъ ве­дѡ́­мыѧ. Ꙗ҆зы́­цы бо и҆ ца́­рїе, и҆̀же не по­ра­бо́­та­ютъ тѝ, по­ги́б­нꙋтъ, и҆ ꙗ҆зы́­цы за­пꙋ­стѣ́­нї­емъ за­пꙋ­стѣ́­ютъ. И҆ сла́­ва лї­ва́­но­ва къ тебѣ̀ прї­и́­детъ, кѷ­па­рӏ́­сомъ, и҆ пе́ѵгомъ, и҆ ке́­дромъ вкꙋ́­пѣ, про­сла́­ви­ти мѣ́­сто ст҃о́е моѐ, и҆ мѣ́­сто но́гъ мо­и́хъ про­сла́в­лю. И҆ по́й­дꙋтъ къ тебѣ̀ бо­ѧ́­ще­сѧ сы́­но­ве сми­ри́в­шихъ тѧ̀ и҆ раз­дра­жи́в­шихъ тѧ̀, и҆ по­кло́­нѧт­сѧ слѣ­да́мъ ногꙋ̀ тво­є́ю всѝ про­гнѣ́­вав­шїи тѧ̀, и҆ на­ре­че́­ши­сѧ гра́дъ гдⷭ҇нь, сї­ѡ́нъ ст҃а́­гѡ і҆и҃ле­ва. За сїѐ, ꙗ҆́кѡ бы́лъ є҆сѝ ѡ҆ста́в­ленъ и҆ воз­не­на­ви́­дѣнъ, и҆ не бѣ̀ по­мо­га́­ю­ща­гѡ тѝ: по­ло­жꙋ́ тѧ въ ра́­дость вѣ́ч­нꙋю, ве­се́­лїе ро­дѡ́мъ ро­дѡ́въ. И҆ и҆зссе́­ши мле­ко̀ ꙗ҆зы́­кѡвъ, и҆ бо­га́т­ство ца­ре́й снѣ́­си, и҆ ᲂу҆­ра­зꙋ­мѣ́­е­ши, ꙗ҆́кѡ а҆́зъ гдⷭ҇ь сп҃са́­ѧй тѧ̀, и҆ и҆з­ба­влѧ́­ѧй тѧ̀ бг҃ъ і҆и҃левъ.

На лї­тӏ́и стї­хи́­ра хра́­ма, и҆ ст҃а́­гѡ, гла́съ д҃:

Прї­и­ди́­те, при­те­це́мъ къ ра́цѣ мо­ще́й мно­го­цѣ­ле́б­ныхъ, царѧ̀ є҆дꙋ­а́р­да, бг҃ꙋ ᲂу҆­го­ди́в­ша­гѡ, и҆ вѣ­не́цъ мч҃ни­че­скїй въ лѣ̑та ю҆́на прї­ѧ́в­ша­гѡ, ꙗ҆́кѡ да ѡ҆ лю́­дехъ сво­и́хъ пред­ста́­тель­ствꙋ­етъ, нбⷭ҇но­мꙋ цр҃ю̀ вы́нꙋ пред­стоѧ̀, и҆ мл҃твы тво­рѧ̀ не­ꙋ­сы́п­нѡ.

Сла́­ва, гла́съ ѕ҃:

Да ры­да́­етъ ᲂ҆̀убо ца­ри́­ца не­че­сти́­ваѧ, ѻ҆дє́­жды со вла­сы̑ тер­за́­ю­щи, ви́­дѧ­щи тѧ̀, є҆дꙋ­а́р­де, не­пра́­вед­нѡ ᲂу҆­бї­е́н­на­го, и҆ чꙋ­де­сы̀ ѿ бг҃а про­слав­лѧ́­е­ма­го, ты́ бо вѣн­ца̀ мч҃ни­че­ска­гѡ спо­доб­лѧ́­е­ши­сѧ, ѻ҆на́ же, ᲂу҆­ра­зꙋ­мѣ́в­ши винꙋ̀ свою̀ ве­ли́­кꙋю, и҆ сꙋ­дїѝ не­ꙋ­мы́т­на­гѡ тре­пе́­щꙋ­щи, по­ка­ѧ́­нї­емъ дꙋ́шꙋ свою̀ ѡ҆мы́­ти тщи́т­сѧ.

И҆ ны́нѣ, гла́съ то́й­же:

Всѧ̑ въ жи­тїѝ зем­нѣ́мъ скѡ́р­би пре­тер­пѣ́в­шыѧ, срѣ­та́­е­ши и҆ ᲂу҆­тѣ­ша́­е­ши, бг҃о­не­вѣ́­сто чⷭ҇таѧ, ѿра́­дꙋ тѣ̑мъ по­да­ю́­щи, и҆ всѧ́­кꙋ сле́­зꙋ ѿ ѻ҆че́съ и҆́хъ ѡ҆сꙋ­ша́­ю­щи: тѣ́м­же и҆ ны́нѣ всѣ́хъ въ бѣ­да́хъ и҆ ѕло­стра­да́­нї­ѧхъ сꙋ́­щихъ за­стꙋ­пѝ, и҆з­ба­вле́­нїе ско́­рое тѣ̑мъ по­да­ю́­щи, ты́ бо є҆сѝ всѧ́­кїѧ пе­ча́­ли ᲂу҆­то­ле́­нїе.

На стї­хо́в­нѣ стї­хи̑­ры, гла́съ и҃.

По­до́­бенъ: Ѽ пре­сла́в­на­гѡ чꙋ­де­сѐ:

Ѽ пре­сла́в­на­гѡ чꙋ­де­сѐ!* Ѽ смо­тре́­нїѧ бжⷭ҇твен­на­гѡ!* со­кро́­ви­ще мно­го­цѣ́н­ное,* подꙿ зе­мле́ю ѿ по­рꙋ­га́­нїѧ со­кро­ве́н­ное,* на ко­не́цъ вре­ме́нъ ѡ҆брѣ­та́­ет­сѧ,* се́ бо ст҃ы̑ѧ мѡ́щи царѧ̀ мч҃ни­ка ꙗ҆в­лѧ́­ют­сѧ,* ꙗ҆́кѡ и҆с­то́ч­никъ но́­вый мно­го­цѣ­ле́б­ный,* всѣ̑мъ вѣ́р­нѡ тѣ̑мъ по­кла­нѧ́­ю­щым­сѧ,* и҆ бг҃а во ст҃ы́хъ ди́в­на­го сла́­вѧ­щымъ.

Стӏ́хъ: Воз­не­со́хъ и҆з­бра́н­на­го ѿ лю­де́й мо­и́хъ, ѡ҆брѣ­то́хъ дв҃да, раба̀ мо­е­го̀.

Ѽ тор­же­ства̀ чꙋ́д­на­гѡ!* Ѽ пра́з­дни­ка все­ра́­дост­на­гѡ!* па́­мѧть бо свѣт­лѣ́й­шꙋю* царѧ̀ є҆дꙋ­а́р­да тво­ри́мъ,* не­мощ­ны́хъ и҆ бо­лѧ́­щихъ млⷭ҇ти­ва­гѡ цѣ­ли́­те­лѧ,* си́­рыхъ за­щи́­ти­те­лѧ и҆ пе­ча́ль­ныхъ ᲂу҆­тѣ́­ши­те­лѧ,* ѕло­че́­стїѧ и҆с­ко­ре­ни́­те­лѧ,* и҆ бл҃го­чⷭ҇тїѧ на­са­ди́­те­лѧ,* дер­зно­ве́н­на­гѡ мл҃твен­ни­ка и҆ пред­ста́­те­лѧ за ро́дъ на́шъ.

Стӏ́хъ: Сегѡ̀ ра́ди по­ма́­за тѧ̀, бж҃е, бг҃ъ тво́й є҆ле́­емъ ра́­до­сти, па́че при­ча̑ст­никъ тво­и́хъ.

Ѽ бо­га́т­ства пре­мꙋ́­дро­сти бж҃їѧ!* Ѽ про́­мы­сла бжⷭ҇твен­на­гѡ!* ст҃ы̑ѧ мѡ́щи пра­во­сла́в­на­гѡ царѧ̀ мч҃ни­ка* цр҃кви пра­во­сла́в­нѣй врꙋ­ча́­ют­сѧ,* тѣ́м­же тѣ̑мъ ны́нѣ вѣ́р­нѡ по­кла­нѧ́­ю­ще­сѧ,* и҆ въ мл҃твꙋ стра­сто­те́рп­ца вѣн­ча́н­на­го при­зы­ва́­ю­ще,* бл҃го­да­ре́­нїе те́­плѣ при­но́­симъ хрⷭ҇тꙋ̀ бг҃ꙋ,* то­ли́­кое со­кро́­ви­ще на́мъ да­ро­ва́в­ше­мꙋ,* и҆ млⷭ҇ть свою̀ на́мъ при́­снѡ ꙗ҆в­лѧ́­ю­ще­мꙋ.

Сла́­ва, гла́съ г҃:

Во­и́­тель хра́­брый со­про­ти́въ ра́­тей вра́­же­скихъ бы́въ, є҆дꙋ­а́р­де, на стра̑­сти грѣ­хѡ́в­ныѧ па́че ѡ҆пол­ча́л­сѧ є҆сѝ, по­бѣ­ди́­тель же сла́в­ный во ѻ҆бою̀ ꙗ҆ви́в­сѧ, сми­рен­но­мꙋ́­дрї­емъ, ꙗ҆́кѡ бро­не́ю, ѡ҆дѣ́­ѧв­сѧ, че́сть и҆ сла́­вꙋ хрⷭ҇тꙋ̀ бг҃ꙋ воз­да­ва́лъ є҆сѝ.

И҆ ны́нѣ, бг҃о­ро́­ди­ченъ, гла́съ той­же: Бе́зꙿ сѣ́­ме­не ѿ бжⷭ҇твен­на­гѡ дх҃а:

Тро­па́рь, гла́съ д҃:

Ст҃а́­гѡ є҆дꙋ­а́р­да, до­бро­дѣ́­тель­ми дре́в­ле про­сї­ѧ́в­ша­гѡ, и҆ без­ви́н­нѡ по­стра­да́в­ша­гѡ, ново­ѧв­ле́н­нꙋю па́­мѧть со­вер­ша́­ю­ще, и҆ чⷭ҇тны̑мъ є҆гѡ̀ мо­ще́мъ по­кла­нѧ́­ю­ще­сѧ, въ ве­се́­лїи во­зо­пї­и́мъ: во­и́­стин­нꙋ ди́­венъ є҆сѝ, бж҃е, во ст҃ы́хъ тво­и́хъ. Два́­жды.

И҆ Бцⷣе, дв҃о: є҆ди́­но­жды.

На ѹ҆́трени.

На Бг҃ъ гдⷭ҇ь: тро­па́рь два́­жды. Сла́­ва, и҆ ны́нѣ, бг҃о­ро́­ди­ченъ: Є҆́же ѿ вѣ́ка ᲂу҆­та­е́­ное:

По а҃-мъ стї­хо­сло́­вїи сѣ­да́­ленъ, гла́съ а҃:

Вре́­мѧ по́ст­ное пре­хо­дѧ̀ по­дви­за́­ѧ­сѧ, дꙋ́шꙋ твою̀ прї­ꙋ­го­тов­лѧ́лъ є҆сѝ, є҆дꙋ­а́р­де, ко срѣ́­те­нїю до­сто́й­но­мꙋ пра́з­дни­кѡвъ пра́з­дни­ка, ст҃ы́ѧ па́­схи, вне­за́­пꙋ же жи­тїѧ̀ зем­на́­гѡ и҆з­ше́дъ, во­скрⷭ҇нїе хрⷭ҇то́­во во црⷭ҇твїи є҆гѡ̀ про­сла́­вилъ є҆сѝ, со а҆́гг҃лы и҆ првⷣны­ми ли­кꙋ́ѧ, и҆ лю́ди твоѧ̑ ѿ нб҃съ на­зи­ра́ѧ.

Сла́­ва, и҆ ны́нѣ, бг҃о­ро́­ди­ченъ:

Ра́­дꙋй­сѧ, блгⷣт­наѧ бцⷣе дв҃о, при­ста́­ни­ще и҆ пред­ста́­тель­ство ро́да че­ло­вѣ́­че­ска­гѡ, и҆зꙿ тебє́ бо во­пло­ти́­сѧ и҆з­ба́­ви­тель мӏ́ра, є҆ди́­на бо є҆сѝ мт҃и и҆ дв҃а, при́­снѡ бл҃го­сло­ве́­на и҆ пре­про­сла́в­ле­на, молѝ хрⷭ҇та̀ бг҃а, да­ро­ва́­ти ми́ръ все́й все­ле́н­нѣй.

По в҃-мъ стї­хо­сло́­вїи сѣ­да́­ленъ, гла́съ є҃:

Сѐ ве­сна̀ на зе­млѝ про­цвѣ­тѐ, зимы̀ ко­не́цъ воз­вѣ­ща́­ю­щи, и҆ ве­сна̀ дх҃о́в­наѧ, хрⷭ҇то́­ва во­скрⷭ҇нїѧ тор­же­ство̀, мӏ́рꙋ воз­сїѧ̀, лю́­дїе же твоѝ, царю̀, пе­ча́­ли и҆с­пол­нѧ́­ют­сѧ, ѡ҆ без­вре́­мен­нѣй кон­чи́­нѣ тво­е́й бо­лѣ́знꙋ­ю­ще. тѣ́м­же ᲂ҆̀убо по­тщи́­сѧ, и҆ ско́­рѡ ᲂу҆­тѣ́­ши ѧ҆̀, ꙗ҆в­лѧ́ѧ и҆̀мъ, ꙗ҆́кѡ ты̀ со во­скре́с­шимъ влⷣкою въ нбⷭ҇нѣмъ црⷭ҇твїи є҆гѡ̀ во­дво­рѧ́­е­ши­сѧ, да́­рꙋй и҆̀мъ ѡ҆брѣ­стѝ твоѧ̑ мѡ́щи сщ҃є́н­ныѧ, ꙗ҆́кѡ за­ло́гъ тво­е­гѡ̀ по­пе­че́­нїѧ ѡ҆ лю́­бѧ­щихъ тѧ̀, да къ тѣ̑мъ бл҃го­го­вѣ́й­нѡ при­те­ка́­ю­ще, и҆с­цѣ­лє́­нїѧ и҆ да́ры дх҃ѡ́в­ныѧ прї­е́м­лютъ.

Сла́­ва, и҆ ны́нѣ, бг҃о­ро́­ди­ченъ:

Не­и­скꙋ­со­бра́ч­наѧ не­вѣ́­сто, бг҃о­ро­ди́­тель­ни­це, ꙗ҆́же є҆́ѵи­нꙋ пе­ча́ль ра­до­сто­тво­ри́в­шаѧ, вос­пѣ­ва́­емъ, вѣ́р­нїи, и҆ по­кла­нѧ́­ем­сѧ тебѣ̀, ꙗ҆́кѡ воз­ве­ла̀ є҆сѝ на́съ ѿ дре́в­нїѧ клѧ́т­вы, и҆ ны́нѣ мо­ли́­сѧ не­пре­ста́н­нѡ, все­пѣ́­таѧ пре­ст҃а́ѧ, во є҆́же сп҃сти́­сѧ на́мъ.

По­лѷ­е­ле́й, и҆ ве­ли­ча́­нїе:

Ве­ли­ча́­емъ тѧ̀, стра­сто­те́рп­че ст҃ы́й царю̀ є҆дꙋ­а́р­де, и҆ чти́мъ чⷭ҇тна̑ѧ стра­да̑­нїѧ твоѧ̑, ꙗ҆̀же за хрⷭ҇та̀ пре­тер­пѣ́лъ є҆сѝ.

Ѱа­ло́мъ и҆з­бра́н­ный: Бг҃ъ на́мъ при­бѣ́­жи­ще и҆ си́ла, по­мо́щ­никъ въ ско́р­бехъ, ѡ҆брѣ́т­шихъ ны̀ ѕѣлѡ̀.

По по­лѷ­е­ле́и сѣ­да́­ленъ, гла́съ и҃:

Сме́рть пре­тер­пѣ́въ без­вре́­мен­нѣ, и҆ ча́шꙋ пре­да́­тель­ства и҆с­пи́въ, бл҃же́н­не, ча́шꙋ не­ꙋ­пи­ва́­е­мꙋю ра́­до­сти вмѣ́­стѡ тоѧ̀ ѿ рꙋкѝ сп҃со­вы прї­ѧ́лъ є҆сѝ, и҆ ны́нѣ ᲂ҆̀убо на ве́­че­ри хрⷭ҇то́­вой зрѣ́­нї­емъ пре­свѣ́т­ла­гѡ лица̀ є҆гѡ̀ на­сла­жда́­ѧ­сѧ, ѡ҆ чтꙋ́­щихъ тѧ̀ мо­ли́­сѧ, ᲂу҆­лꙋ­чи́­ти и҆ тѣ̑мъ нбⷭ҇ное црⷭ҇твїе.

Сла́­ва, и҆ ны́нѣ, гла́съ то́й­же:

Влⷣчце, прї­и­мѝ мл҃твы ра̑бъ тво­и́хъ, и҆ и҆з­ба́­ви ны̀ ѿ всѧ́­кїѧ нꙋ́­жды и҆ пе­ча́­ли.

Та́же сте­пє́н­на, а҃-й а҆н­тї­фѡ́нъ д҃-гѡ гла́­са.

Про­кӏ́­менъ, гла́съ д҃: Воз­не­со́хъ и҆з­бра́н­на­го ѿ лю­де́й мо­и́хъ.

Стӏ́хъ: Сегѡ̀ ра́ди по­ма́­за тѧ̀, бж҃е, бг҃ъ тво́й є҆ле́­емъ ра́­до­сти, па́че при­ча̑ст­никъ тво­и́хъ.

Є҆ѵⷢ҇лїе ѿ лꙋкѝ, за­ча́­ло р҃ѕ: Речѐ гдⷭ҇ь сво­и̑мъ ᲂу҆­че­ни­кѡ́мъ: вне­мли́­те ѿ че­ло­вѣ̑къ:

По н҃-мъ ѱал­мѣ̀: Мл҃тва­ми ст҃а́­гѡ царѧ̀ є҆дꙋ­а́р­да:

Та́же стї­хи́­ра, гла́съ ѕ҃:

А҆́ще и҆ кратко­вре́­мен­нѣ на ни́вѣ хрⷭ҇то́­вой ра­бо́­тавъ, ѻ҆ба́­че по­трꙋ­ди́в­сѧ не­лѣ́­ност­нѣ, ѡ҆бѣ­то­ва́н­ный пѣ́нѧзь ѿ рꙋкѝ бж҃їѧ прї­ѧ́лъ є҆сѝ, и҆ до­мо­пра­ви́­тель вѣ́­ренъ ꙗ҆ви́л­сѧ є҆сѝ, тѣ́м­же и҆ въ ра́­дость гдⷭ҇а тво­е­гѡ̀ вше́лъ є҆сѝ, и҆ къ томꙋ̀ дер­зно­ве́­нїе стѧ­жа́лъ є҆сѝ, пред­ста́­тель­ствꙋѧ при́­снѡ ѡ҆ лю́­дехъ тво­и́хъ.

Ка­нѡ́нъ бцⷣѣ со і҆р­мо­со́мъ на ѕ҃: Во́дꙋ про­ше́дъ: и҆ ст҃о́­мꙋ на и҃, є҆гѡ́­же кра­е­гра­не́­сїе: Є҆дꙋ­а́р­да царѧ̀ бг҃о­че­сти́­ва­гѡ па́­мѧть пою̀.

Гла́съ и҃. Пѣ́снь а҃.

І҆р­мо́съ: По­и́мъ гдⷭ҇е­ви, про­ве́д­ше­мꙋ лю́ди своѧ̑ скво­зѣ̀ черм­но́е мо́ре, ꙗ҆́кѡ є҆ди́нъ сла́в­нѡ про­сла́­ви­сѧ.

При­пѣ́въ: Ст҃ы́й царю̀ мч҃ни­че є҆дꙋ­а́р­де, молѝ бг҃а ѡ҆ на́съ.

Є҆дꙋ­а́р­да царѧ̀, бл҃го­чⷭ҇тї­емъ про­сї­ѧ́в­ша­го, и҆ чꙋ­де­сы̀ мно́­ги­ми бг҃омъ про­сла́в­лен­на­го, пѣ́снь­ми до­сто́й­нѡ вос­пѣ­ва́­емъ.

Да тор­же­ствꙋ́­етъ ны́нѣ стра­на̀ бри­та́н­скаѧ, и҆ цр҃ковь пра­во­сла́в­наѧ да воз­ве­се­ли́т­сѧ, царѧ̀ бг҃о­мꙋ́­дра­гѡ па́­мѧть про­слав­лѧ́­ю­щи.

Оу҆­мерщ­вле́­нїе не­пра́­вед­ное без­вре́­мен­нѣ пре­тер­пѣ́­вый, дер­зно­ве́­нїе къ бг҃ꙋ стѧ­жа́лъ є҆сѝ, є҆дꙋ­а́р­де, тѣ́м­же и҆ и҆с­цѣ­лє́­нїѧ тѧ̀ по­чи­та́­ю­щымъ по­да­е́­ши.

Бг҃о­ро́­ди­ченъ: А҆́гг҃ль­стїи чи́ни и҆ првⷣныхъ ли́цы, мо­на́­си и҆ мїр­стӏ́и, ᲂу҆­бо́­зїи и҆ ца́­рїе бцⷣꙋ вкꙋ́­пѣ вос­пѣ­ва́­ютъ.

Ка­та­ва́­сїа: Ѿве́р­зꙋ ᲂу҆­ста̀ моѧ̑:

Пѣ́снь г҃.

І҆р­мо́съ: Ты̀ є҆сѝ ᲂу҆­твер­жде́­нїе при­те­ка́­ю­щихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мра­че́н­ныхъ, и҆ по­е́тъ тѧ̀ дꙋ́хъ мо́й.

Ро­ди́в­сѧ бж҃ї­имъ про­мыш­ле́­нї­емъ, ꙗ҆́кѡ да до­бро­дѣ́­тель­ми про­сї­ѧ́­е­ши, и҆ лю́­демъ бл҃го­чⷭ҇тїѧ ѡ҆́бразъ ꙗ҆ви́­ши, кра́т­кое те­че́­нїе жи­тїѧ̀ тво­е­гѡ̀ до́­брѣ со­вер­ши́лъ є҆сѝ.

До́­брый ра́бъ и҆ вѣ́р­ный все­цр҃ю̀ хрⷭ҇тꙋ̀ бы́лъ є҆сѝ, ѿ тогѡ̀ тебѣ̀ да́н­ный та­ла́нтъ преꙋ­мно́­живъ, є҆дꙋ­а́р­де, мꙋ́­дрый царю̀, тѣ́м­же и҆ въ ра́­дость гдⷭ҇а тво­е­гѡ̀ вше́лъ є҆сѝ.

А҆́ве­лю без­ви́н­нѡ за­кла́н­но­мꙋ ᲂу҆­по­до́­бив­сѧ, ᲂу҆­бї­е́­нїе не­пра́­вед­ное пре­тер­пѣ́лъ є҆сѝ, жи­тїѧ́ же вре́­мен­на­гѡ ли­ши́в­сѧ, въ нбⷭ҇ныѧ ѻ҆би́­тє­ли все­ли́л­сѧ є҆сѝ.

Бг҃о­ро́­ди­ченъ: Цр҃и́­цꙋ нб҃сѐ и҆ ца­ре́й зем­ны́хъ по­хва­лꙋ̀, цр҃кве хрⷭ҇то́­вы не­по­ко­ле­би́­мый сто́лпъ, и҆ црⷭ҇твїѧ бж҃їѧ не­рꙋ­ши́­мꙋю стѣ́­нꙋ, дв҃ꙋ бцⷣꙋ не­мо́лч­нѡ вос­пѣ­ва́­емъ.

Сѣ­да́­ленъ, гла́съ г҃:

Ꙗ҆́ко­же речѐ пер­во­вер­хо́в­ный пе́тръ, во всѧ́­цѣмъ ꙗ҆зы́­цѣ бо­ѧ́й­сѧ бг҃а и҆ дѣ́­ла­ѧй пра́­вдꙋ прї­ѧ́­тенъ бг҃ꙋ є҆́сть: та́же во црⷭ҇твїе нбⷭ҇ное ст҃ӏ́и и҆ првⷣнїи ѿ ко­не́цъ зе­млѝ прї­и­до́­ша. тѣ́м­же и҆ ты̀, ст҃ы́й стра­сто­те́рп­че царю̀, ѿ за́­па­да при­ше́дъ, срѣ­та́й ст҃ы́хъ бо­ри́­са и҆ глѣ́­ба, ѿ зе­млѝ рꙋ́с­скїѧ про­сї­ѧ́в­шихъ, тӏ́и бо, ꙗ҆́ко­же и҆ ты̀, првⷣнѡ по­жи́в­ше, ѿ за́­ви­сти го́рь­кїѧ не­пра́­вед­нѡ ᲂу҆­бї­е́­ни бы́ша. ны́нѣ ᲂ҆̀убо вкꙋ́­пѣ ра́­до­сти вѣ́ч­ныѧ при­ча­ща́­ю­ще­сѧ, по­ми­на́й­те ны̀, по­чи­та́­ю­щыѧ вы̀ и҆ во­пї­ю́­щыѧ: во­и́­стин­нꙋ ди́­венъ є҆сѝ, бж҃е, во ст҃ы́хъ тво­и́хъ.

Сла́­ва, и҆ ны́нѣ, бг҃о­ро́­ди­ченъ:

Ꙗ҆́кѡ не­воз­дѣ́­лан­наѧ, дв҃о, лоза̀, крас­нѣ́й­шїй гро́здъ про­зѧб­ла̀ є҆сѝ, и҆с­то­ча́­ющь на́мъ вїно̀ сп҃се́­нїѧ, всѣ́хъ ве­се­лѧ́­щее дꙋ́шы же и҆ тѣ­ле­са̀. тѣ́м­же ꙗ҆́кѡ винꙋ̀ тѧ̀ до́­брыхъ бла­жа́­ще при́­снѡ, со а҆́гг҃ломъ во­пї­е́мъ тѝ: ра́­дꙋй­сѧ, блгⷣт­наѧ.

Пѣ́снь д҃.

І҆р­мо́съ: Оу҆­слы́­шахъ, гдⷭ҇и, смо­тре́­нїѧ тво­е­гѡ̀ та́­ин­ство, раз­ꙋ­мѣ́хъ дѣла̀ твоѧ̑, и҆ про­сла́­вихъ твоѐ бж҃е­ство̀.

А҆́гн­цꙋ на за­кла́­нїе ве­до́­мо­мꙋ по­до́­бѧ­сѧ, є҆дꙋ­а́р­де ст҃ы́й, не про­ти­во­бо́р­ство­валъ є҆сѝ ѕло­дѣ́­ємъ, ᲂу҆­би­ва́­ю­щымъ тѧ̀, но въ рꙋ́цѣ бж҃їи дꙋ́шꙋ твою̀ во мгно­ве́­нїе пре­да́лъ є҆сѝ.

Ра­до­сто­тво́р­нꙋю твою̀ па́­мѧть со­вер­ша́­ю­ще, чꙋ­де­са̀ твоѧ̑ вос­по­ми­на́­емъ, є҆дꙋ­а́р­де, про­ка­жє́н­ныѧ бо, раз­сла́б­лєн­ныѧ и҆ слѣ­пы̑ѧ ѿ ро­жде́­нїѧ и҆с­цѣ­лѧ́­е­ши, мл҃твою тво­е́ю ко хрⷭ҇тꙋ̀ дер­зно­ве́н­нѣй­шею.

Ꙗ҆́вѣ тѧ̀ про­сла́­ви­ти хо­тѧ́й, дадѐ хрⷭ҇то́съ бг҃ъ чⷭ҇тны̑мъ мо­ще́мъ тво­и̑мъ си́лꙋ цѣль­бо­но́с­нꙋю, ꙗ҆́кѡ да ви́­дѧ­ще чꙋ­де­са̀, ѿ тѣ́хъ бы­ва́­є­маѧ, лю́­дїе бл҃го­чⷭ҇ти̑­выѧ гдⷭ҇а вос­хва́­лѧтъ во вѣ́ки.

Бг҃о­ро́­ди­ченъ: Бж҃їи прⷪ҇ро́­цы тѧ̀ про­воз­вѣ­сти́­ша, бцⷣе, а҆пⷭ҇ли про­по­вѣ́­да­ша, мч҃ни­цы и҆с­по­вѣ́­да­ша, пѣ­сно­тво́р­цы же и҆ прпⷣбныѧ въ пѣ́­снехъ бг҃о­лѣ́п­ныхъ тѧ̀ вос­пѣ́­ша.

Пѣ́снь є҃.

І҆р­мо́съ: Оу҆́­тре­ню­ю­ще во­пї­е́мъ тѝ: гдⷭ҇и, сп҃си́ ны, ты́ бо є҆сѝ бг҃ъ на́шъ, ра́з­вѣ тебє̀, и҆но́­гѡ не вѣ́мы.

Ѡ҆сїѧ̀ свѣ́тъ бжⷭ҇твен­ный женꙋ̀, слѣ­пꙋ́ю ѿ ро­жде́­нїѧ, є҆гда̀ тѣ́лꙋ тво­е­мꙋ̀, є҆дꙋ­а́р­де царю̀, при­кос­нꙋ́­сѧ, тѣ́м­же и҆ ѿвер­зо́­ша­сѧ ѻ҆́чи є҆ѧ̀, и҆ про­сла́­ви бг҃а, и҆ твоѐ за­стꙋ­пле́­нїе.

Гро́бъ тво́й и҆с­то́ч­никъ и҆с­цѣ­ле́­нїй ꙗ҆ви́­сѧ, всѣ̑мъ съ вѣ́­рою къ немꙋ̀ при­те­ка́­ю­щымъ, про­свѣ­ще́­нїѧ же и҆ ᲂу҆­тѣ­ше́­нїѧ про­сѧ́­щымъ.

Ѿве́р­зи и҆ на̑ша ѻ҆́чи сер­дє́ч­наѧ, є҆дꙋ­а́р­де, ѻ҆́чи слѣ­поро­жде́н­ныѧ про­свѣ­ти́­вый, ꙗ҆́кѡ да ѹ҆́зримъ бж҃їе ѡ҆ на́съ пре­мꙋ́­дрое смо­тре́­нїе, и҆ про­сла́­вимъ є҆гѡ̀ си́лꙋ.

Бг҃о­ро́­ди­ченъ: Ч҇ⷭтнѣ́й­шꙋю хе­рꙋ­ві̑мъ и҆ се­ра­фі̑мъ свѣт­лѣ́й­шꙋю вос­хва­лѧ́­ти не­пре­ста́н­нѡ да не ѡ҆блѣ­ни́м­сѧ, ѹ҆́м­ны­ма ѻ҆чи́­ма ве­ли̑­чїѧ є҆ѧ̀ зрѧ́­ще, се́рд­цемъ же го­рѧ́­щимъ и҆ лю­бо́­вїю те́­плою млⷭ҇рдїе є҆ѧ̀ ве­ли­ча́­ю­ще.

Пѣ́снь ѕ҃.

І҆р­мо́съ: Ꙗ҆́ко­же прⷪ҇ро́­ка и҆з­ба́­вилъ є҆сѝ и҆зꙿ глꙋ­би­ны̀ пре­и­спо́д­нїѧ, хрⷭ҇тѐ бж҃е, и҆ менѐ ѿ грѣ­хѡ́въ мо­и́хъ и҆з­ба́­ви, ꙗ҆́кѡ чл҃вѣ­ко­лю́­бецъ, и҆ ᲂу҆­пра́­ви жи­во́тъ мо́й, мо­лю́­сѧ.

Є҆гда̀ ᲂу҆­вѣ́­дѣ ца­ри́­ца ѕло­че­сти́­ваѧ ѡ҆брѣ́­те­нїе мо­ще́й тво­и́хъ, є҆дꙋ­а́р­де царю̀, и҆ чꙋ­де­са̀ бы­ва́­є­маѧ, вос­хо­тѣ̀ въ по­ка­ѧ́­нїи по­кло­ни́­ти­сѧ тѣ̑мъ, си́ла же гдⷭ҇нѧ воз­бра­нѝ є҆́й то­гда̀.

Сла́­вꙋ твою̀ со и҆ны́­ми цари̑ во і҆ерⷭ҇ли́мъ го́р­нїй при­не́слъ є҆сѝ, є҆дꙋ­а́р­де, сꙋ­гꙋ́­бый вѣ­не́цъ ца́р­скїй и҆ мч҃ни­че­скїй при ногꙋ̀ гдⷭ҇ню по­ла­га́ѧ, и҆ до­сто́й­нꙋю че́сть ѿ тогѡ̀ прї­е́м­лѧ.

Ти­ме́н­на­гѡ ро́ва по­ги́­бель­на­гѡ и҆з­бѣ́глъ є҆сѝ, сꙋ́дъ и҆ пра́­вдꙋ тво­рѧ̀, и҆ ᲂу҆­бѡ́­гїѧ пи­та́ѧ, пре­сто́­ла ца́р­ска­гѡ до­сто́й­на себѐ по­ка­зꙋ́ѧ, є҆дꙋ­а́р­де пре­мꙋ́­дре и҆ до­сто­сла́в­не.

Бг҃о­ро́­ди­ченъ: И҆̀же тебѐ бцⷣꙋ не по­чи­та́­ютъ, стꙋ­до́мъ и҆ стра́­хомъ да ѡ҆б­ле­кꙋ́т­сѧ, ѿ всеѧ̀ тва́­ри ѡ҆б­ли­ча́­е­ми, ꙗ҆́же тѧ̀ вос­пѣ­ва́­етъ не­пре­ста́н­нѡ.

Кон­да́къ, гла́съ д҃:

Ꙗ҆́кѡ бл҃го­вѣ́р­ный ца́рь и҆ свѣ́т­лый мч҃никъ, про­сї­ѧ́лъ є҆сѝ въ зе­млѝ а҆н­глӏ́й­стѣй, и҆ на­па́д­шымъ на тѧ̀ вра­гѡ́мъ цр҃кве и҆ дер­жа́­вы, пре­тер­пѣ́лъ є҆сѝ ра̑ны и҆ за­ꙋ­шє́­нїѧ, и҆ ско́­рѡ пре­ше́д­ше ко сп҃сꙋ на́­ше­мꙋ, ны́нѣ со­тво­рѧ́­е­ши мно́­же­ство чꙋ­де́съ вѣ́­рою взы­ва́­ю­щымъ: хрⷭ҇та̀ бг҃а не пре­ста́й мо­ли́­ти, ѻ҆те́­че­ствꙋ тво­е­мꙋ̀ къ вѣ́рѣ пра­во­сла́в­нѣй воз­вра­ти́­ти­сѧ.

І҆́косъ: Сѐ при­бли́­жи­сѧ вре­ме́нъ и҆с­пол­не́­нїе! хрⷭ҇то­и­ме­ни́­тїи лю́­дїе, вос­кло­ни́­те­сѧ: се́ бо все­ви́­децъ и҆ сꙋ­дїѧ̀ првⷣный, по­мѧ­нꙋ́въ млⷭ҇ти своѧ̑ и҆ ще­дрѡ́­ты, и҆ и҆с­то́ч­никъ бл҃го­чⷭ҇тїѧ и҆з­сѧ́к­шїй стрꙋ­ѧ́­ми жи­во­но́с­ны­ми вос­по́л­ни­ти хотѧ̀, ꙗ҆вѝ на́мъ мѡ́щи ᲂу҆­го́д­ни­ка сво­е­гѡ̀ и҆ стра­сто­те́рп­ца, є҆дꙋ­а́р­да царѧ̀, мнѡ́­га лѣ̑та подꙿ зе­мле́ю хра­ни̑­мыѧ: бꙋ́ри бо го­не́­нїй на ст҃ы́хъ ѿ царѧ̀ ѕло­че­сти́­ва­гѡ воз­дви­за́е­мѣй, и҆ ст҃ы́­нѧмъ ѿ кле­врє́тъ є҆гѡ̀ по­пи­ра́­є­мымъ, ты̑ѧ, ꙗ҆́кѡ со­кро́­ви­ще мно­го­цѣ́н­ное, со­кры́­ша­сѧ, и҆дѣ́­же пре­бы­ва́­хꙋ да́же до сегѡ̀ днѐ, ны́нѣ же про­мыш­ле́­нї­емъ и҆ бл҃го­во­ле́­нї­емъ бж҃ї­имъ, мѡ́щи ст҃ы̑ѧ сїѧ̑ па́ки вѣ̑р­нымъ да́­рꙋ­ют­сѧ, и҆ па́ки свѣ́тъ пра­во­сла́­вїѧ во стра­нѣ̀ бри­та́н­стѣй воз­сї­ѧ­ва́­етъ. сегѡ̀ ра́ди ᲂу҆­кра­си́­сѧ, Ѽ а҆́н­глїе, зе­млѐ ца­ре́й, и҆ всѝ жи­вꙋ́­щїи въ не́й, воз­ра́­дꙋй­те­сѧ бл҃же́н­но­мꙋ є҆дꙋ­а́р­дꙋ, є҆го́­же цр҃ь ца́р­ствꙋ­ю­щихъ про­сла́­ви­ти вос­хо­тѣ̀, и҆ воз­зо­ви́­те: хрⷭ҇та̀ бг҃а не пре­ста́й мо­ли́­ти, ѻ҆те́­че­ствꙋ тво­е­мꙋ̀ къ вѣ́рѣ пра­во­сла́в­нѣй воз­вра­ти́­ти­сѧ.

Пѣ́снь з҃.

І҆р­мо́съ: Въ на­ча́­лѣ зе́­млю ѡ҆сно­ва́­вый, и҆ нб҃са̀ сло́­вомъ ᲂу҆­твер­ди́­вый, бл҃го­сло­ве́нъ є҆сѝ во вѣ́ки, гдⷭ҇и бж҃е ѻ҆тє́цъ на́­шихъ.

Во́­ин­ство­вавъ на вра­гѝ, на стра̑­сти же па́че вою́ѧ, по­бѣ­ди́­тель во ѻ҆бою̀ ꙗ҆ви́л­сѧ є҆сѝ, сми­ре́­нї­емъ же по­бꙋ­жда́­емь, сла́­вꙋ бг҃о­ви воз­да­ва́лъ є҆сѝ: бл҃го­сло­ве́нъ є҆сѝ, бж҃е ѻ҆тє́цъ на́­шихъ.

А҆́гг҃лѡвъ чи́ни и҆ првⷣныхъ ли́цы, царѧ̀ ст҃а́­го во црⷭ҇твїе хрⷭ҇то́­во прї­е́м­ле­ма про­во­жда́­ю­ще, бг҃а ди́в­на­го во ст҃ы́хъ сво­и́хъ вос­пѣ­ва́­хꙋ: бл҃го­сло­ве́нъ є҆сѝ, бж҃е, взы­ва́­ю­ще.

Грѣ­хо­лю­би́­вый мӏ́ръ ѡ҆ста́вль без­вре́­мен­нѣ, нбⷭ҇на­гѡ ѻ҆те́­че­ствїѧ до­сти́глъ є҆сѝ, є҆дꙋ­а́р­де, и҆дѣ́­же ѡ҆б̾ ѻ҆те́­че­ствїи зем­нѣ́мъ не­пре­ста́н­нѡ мо́­ли­ши­сѧ бл҃го­сло­ве́н­но­мꙋ бг҃ꙋ ѻ҆тє́цъ тво­и́хъ.

Бг҃о­ро́­ди­ченъ: Ѻ҆гнѧ̀ пе́щ­на­гѡ не ᲂу҆­бо­ѧ́в­ше­сѧ, и҆̀же тебѐ, дв҃о, про­ѡ­бра­зꙋ́­ю­щїи ѻ҆́тро­цы, ѡ҆ тебѣ̀ бл҃го­да­рѧ́­ще во­пї­ѧ́­хꙋ: бл҃го­сло­ве́нъ є҆сѝ, бж҃е ѻ҆тє́цъ на́­шихъ.

Пѣ́снь и҃.

І҆р­мо́съ: На горѣ̀ ст҃ѣ́й про­сла́вль­ша­сѧ, и҆ въ кꙋ­пи­нѣ̀ ѻ҆гне́мъ при­сно­дв҃ы мѡ­ѷ­се́­о­ви та́й­нꙋ ꙗ҆́вль­ша­го, гдⷭ҇а по́й­те, и҆ пре­воз­но­си́­те во всѧ̑ вѣ́ки.

Па́­мѧть царѧ̀ бг҃о­че­сти́­ва­гѡ пра́з­днꙋ­ю­ще, и҆ чꙋ­де­сє́мъ ѿ чⷭ҇тны́хъ мо­ще́й є҆гѡ̀ бы́в­шихъ ди­вѧ́­ще­сѧ, ѡ҆ бз҃ѣ ве­се­лѧ́­ще­сѧ, взы­ва́­емъ: гдⷭ҇а по́й­те, и҆ пре­воз­но­си́­те во всѧ̑ вѣ́ки.

А҆́дѡ­вы всѧ̑ кѡ́з­ни по­бѣ­ди́въ, и҆ ѕло­че­сти́­выхъ ѕло­ꙋ­мыш­лє́­нїѧ по­сра­ми́въ, въ нбⷭ҇ное црⷭ҇твїе воз­зва́н­ный, вос­пѣ­ва́лъ є҆сѝ, цр҃ю̀ ст҃ы́й: гдⷭ҇а по́й­те, и҆ пре­воз­но­си́­те во всѧ̑ вѣ́ки.

Мо­ще́мъ тво­и̑мъ чⷭ҇тны̑мъ по­кла­нѧ́­ю­ще­сѧ, и҆ и҆́мѧ твоѐ въ мл҃твахъ при­зы­ва́­ю­ще, є҆дꙋ­а́р­де, царю̀ бг҃о­лю­бе́з­нѣй­шїй, гдⷭ҇а по­и́мъ и҆ пре­воз­но́­симъ во всѧ̑ вѣ́ки.

Бг҃о­ро́­ди­ченъ: Ꙗ҆ви́­ла є҆сѝ че­ло­вѣ́­кѡмъ, на не­го́­же а҆́гг҃ли не смѣ́­ютъ взи­ра́­ти, ꙗ҆вѝ ᲂ҆̀убо и҆ на́мъ тогѡ̀ млⷭ҇ть не­из­ре­че́н­нꙋю, ꙗ҆́кѡ да тѧ̀ пре­воз­но́­симъ во всѧ̑ вѣ́ки.

Пѣ́снь ѳ҃.

І҆р­мо́съ: Во­и́­стин­нꙋ бцⷣꙋ тѧ̀ и҆с­по­вѣ́­дꙋ­емъ, сп҃се́н­нїи то­бо́ю, дв҃о чⷭ҇таѧ, съ без­пло́т­ны­ми ли̑ки тѧ̀ ве­ли­ча́­ю­ще.

То́­чи­ши и҆с­цѣ­лє́­нїѧ, и҆ мл҃твы вѣ́р­ныхъ прї­е́м­ле­ши, ѡ҆ чтꙋ́­щихъ твою̀ па́­мѧть ᲂу҆­се́рд­нѡ мо­лѧ́­сѧ: тѣ́м­же тѧ̀, є҆дꙋ­а́р­де, бл҃го­да́р­нѡ ве­ли­ча́­емъ.

Па́­мѧть твоѧ̀ сла́в­на, и҆ ᲂу҆­спе́­нїе твоѐ со ст҃ы́­ми, бж҃їю бо прⷭ҇то́­лꙋ пред­сто­и́­ши вы́нꙋ: тѣ́м­же хрⷭ҇та̀, тебѐ лю́­демъ мл҃твен­ни­ка но́­ва­го да­ро­ва́в­ша­го, ве­ли­ча́­емъ.

Ѿ во­стѡ́къ да́же до за̑­падъ вѣ́ра хрⷭ҇то́­ва до­сти́­же, тѣ́м­же по все́й все­ле́н­нѣй ст҃ӏ́и бж҃їи про­слав­лѧ́­ют­сѧ.

Бг҃о­ро́­ди­ченъ: Ю҆́жи­ка твоѧ̀, бцⷣе, є҆ли­са­ве́­та на­ꙋ­чѝ на́съ, пре­чⷭ҇таѧ, тебѣ̀ взы­ва́­ти: бл҃го­сло­ве́н­на ты̀ въ же­на́хъ, и҆ бл҃го­сло­ве́нъ пло́дъ чре́­ва тво­е­гѡ̀, хрⷭ҇то́съ, є҆го́­же не­пре­ста́н­нѡ ве­ли­ча́­емъ.

Свѣ­ти́­ленъ:

Тебѣ̀, свѣ́тъ не­ве­че́р­нїй ᲂу҆­зрѣ́в­ше­мꙋ, царю̀ бл҃же́н­нѣй­шїй, по­до­ба́­ше и҆ пе́р­вое чꙋ́до свѣ́­томъ по­ка­за́­ти: се́ бо хра́­ми­нꙋ, и҆дѣ́­же ѕло­че­сти́­вїи тѣ́ло твоѐ со­кры́­ша, свѣ́тъ нбⷭ҇ный ѡ҆сїѧ̀, та́же и҆ ѻ҆́чи жены̀, слѣ­пы́ѧ ѿ ро­жде́­нїѧ, ѿвер­зо́­ша­сѧ, ѻ҆на́ же, бг҃а бл҃го­да­рѧ́­щи, во­зо­пѝ: бл҃го­сло­ве́нъ є҆сѝ, гдⷭ҇и, но́­ва­го ᲂу҆­го́д­ни­ка тво­е­го̀ ꙗ҆в­лѧ́­ѧй на́мъ.

Сла́­ва, и҆ ны́нѣ:

Всю̀ зе́­млю ѡ҆мо­фо́­ромъ тво­и́мъ свѣ­то­ѡ­бра́з­нымъ по­кры­ва́­е­ши, и҆ мӏ́ръ ве́сь лю­бо́­вїю тво­е́ю, бцⷣе, ѡ҆б̾­е́м­ле­ши, мл҃твы и҆ мо­лє́­нїѧ ѿ всѣ́хъ тебѐ при­зы­ва́­ю­щихъ прї­е́м­ле­ши, и҆ всѧ̑ предꙿ прⷭ҇то́­ломъ сн҃а тво­е­гѡ̀ за­стꙋ­па́­е­ши, тѧ́ бо пред­ста́­тель­ни­цꙋ че­ло­вѣ́­кѡмъ да́лъ є҆́сть во вѣ́ки.

На хва­ли́­техъ стї­хи̑­ры, гла́съ в҃:

Со цари̑ бл҃го­чⷭ҇ти́­вы­ми во црⷭ҇твїи нбⷭ҇нѣмъ во­дво­рѧ́­е­ши­сѧ, съ пѡ́ст­ни­ки и҆ воз­дє́рж­ни­ки вос­хва­лѧ́­е­ши­сѧ, съ мч҃ни­ки про­слав­лѧ́­е­ши­сѧ, и҆ со всѣ́­ми првⷣны­ми ᲂу҆­бл҃жа́­е­ши­сѧ, є҆дꙋ­а́р­де сла́в­не.

По­кла­нѧ́­ем­сѧ ра́цѣ мо­ще́й тво­и́хъ ᲂу҆­се́рд­нѡ, и҆ кон­чи́­ны тво­еѧ̀ без­вре́­мен­ныѧ па́­мѧть со­вер­ша́­ю­ще, чꙋ­де­са̀ ѿ ни́хъ бы­ва́­є­маѧ вос­по­ми­на́­ю­ще, тво­е­гѡ̀ за­стꙋ­пле́­нїѧ и҆ по́­мо­щи про́­симъ, є҆дꙋ­а́р­де, царю̀ првⷣный.

Ца́р­ское ѡ҆дѣ­ѧ́­нїе твоѐ кро́­вїю мч҃ни­че­скою ᲂу҆­кра­си́­вый, па́че ба­грѧ­ни́­цы и҆ вѵ́с­сона, и҆ вѣ­не́цъ стра­да́ль­че­скїй ѿ рꙋкѝ бж҃їѧ прї­ѧ́­вый, воз­ле́глъ є҆сѝ на ве́­че­ри хрⷭ҇то́­вой со и҆з­бра́н­ны­ми: мо­ли́­сѧ, є҆дꙋ­а́р­де, ѡ҆ дꙋ­ша́хъ на́­шихъ.

Сла́­ва, гла́съ ѕ҃:

Сѐ вре́­мѧ со­кра­ща́­ет­сѧ, при две́­рехъ сꙋ́дъ, сѐ дꙋ́ши ᲂу҆­бї­е́н­ныхъ за пра́­вдꙋ бж҃їю во­пї­ю́тъ: до­ко́­лѣ, гдⷭ҇и, не мсти́­ши за кро́вь на́шꙋ; но по­тер­пѣ́­ти на­ꙋ­ча́­ют­сѧ, до́н­де­же чис­ло̀ сп҃са́­е­мыхъ вос­по́л­нит­сѧ, и҆ та́й­на без­за­ко́­нїѧ ѿкры́­ет­сѧ. є҆гда́ же прї­и́­детъ сꙋ­дїѧ̀, ко­е­мꙋ́­ждо воз­да́­ти по дѣ­лѡ́мъ є҆гѡ̀, ты̀, царю̀ бл҃же́н­нѣй­шїи, бл҃го­сло­ве́н­ныхъ ча́сть ᲂу҆­лꙋ­чи́­ши: молѝ ᲂ҆̀убо влⷣкꙋ хрⷭ҇та̀ бг҃а, да и҆ мы̀ де­сна́­гѡ сто­ѧ́­нїѧ спо­до́­бим­сѧ.

И҆ ны́нѣ, гла́съ то́й­же:

Цр҃и́­це бцⷣе, млⷭ҇рдїѧ бж҃їѧ двє́­ри на́мъ ѿвер­за́­ю­щи, мо­ли́­сѧ сн҃ꙋ тво­е­мꙋ̀, со ца­ре́мъ стра­сто­те́рп­цемъ, по­ми́­ло­ва­ти дꙋ́шы на́шѧ.

Сла­во­сло́­вїе ве­ли́­кое. Тро­па́рь ст҃а́­гѡ, Сла́­ва, и҆ ны́нѣ, бг҃о­ро́­ди­ченъ. Є҆ктє­нїѝ, и҆ ѿпꙋ́стъ.

На лїтꙋргӏ́и.

Бл҃жє́н­на ѿ ка­нѡ́­на ст҃а́­гѡ на и҃, пѣ́снь г҃ и҆ ѕ҃.

Про­кӏ́­менъ, гла́съ з҃: Воз­ве­се­ли́т­сѧ првⷣникъ ѡ҆ гдⷭ҇ѣ, и҆ ᲂу҆­по­ва́­етъ на него̀.

Стӏ́хъ: Оу҆­слы́­ши, бж҃е, гла́съ мо́й, вне­гда̀ мо­ли́­ти ми сѧ къ тебѣ̀.

А҆пⷭ҇лъ къ ри́м­лѧ­нѡмъ, за­ча́­ло ч҃ѳ.

А҆л­ли­лꙋ́­їа, гла́съ д҃: Првⷣникъ, ꙗ҆́кѡ фӏ́­нїѯъ, про­цвѣ­те́тъ, ꙗ҆́кѡ ке́дръ, и҆́же въ лї­ва́­нѣ, ᲂу҆­мно́­жит­сѧ.

Стӏ́хъ: На­са­жде́­ни въ домꙋ̀ гдⷭ҇ни, во дво́­рѣхъ бг҃а на́­ше­гѡ про­цвѣ­тꙋ́тъ.

Є҆ѵⷢ҇лїе ѿ і҆ѡ­а́н­на, за­ча́­ло н҃в.

При­ча́­стенъ: Въ па́­мѧть вѣ́ч­нꙋю бꙋ́­детъ првⷣникъ, ѿ слꙋ́­ха ѕла̀ не ᲂу҆­бо­и́т­сѧ.