Мѣ́сѧца феѵрꙋа́рїа въ а҃-й де́нь.

Слꙋ́жба прпⷣбнѣй брїгӏ́тѣ кїлда́рстѣй, просвѣти́тельницѣ і҆́рскїѧ землѝ.

На вели́цѣй вече́рни.

На Гдⷭ҇и, воззва́хъ: стїхи̑ры на и҃.

А҆́ще ѹ҆́бѡ є҆́сть предпра́зднство срѣ́тенїѧ гдⷭ҇нѧ,

пе́рвѣе пое́мъ стїхи̑ры предпра́зднства г҃, и҆ ст҃ы́ѧ є҃.

Гла́съ а҃:

Прїиди́те, вѣ́рнїи, ѿ за́пада и҆ сѣ́вера и҆ мо́рѧ и҆ восто́ка, на пра́здникъ свѣ́тлый стеце́мсѧ, просвѣти́тельницꙋ мꙋ́дрꙋю і҆́рскїѧ землѝ прославлѧ́юще, и҆ тоѧ̀ по́двиги восхвалѧ́юще, и҆ рꙋка́ми пле́щꙋще, велегла́снѡ возопїи́мъ: сла́ва тебѣ̀, хрⷭ҇тѐ бж҃е, ди́вный во ст҃ы́хъ твои́хъ.

Трисо́лнечный свѣ́тъ правосла́вїѧ, сп҃се́нїѧ де́нь возвѣща́ющїй, во ѻ҆те́чествїе твоѐ прине́сши, прпⷣбнаѧ, житїе́мъ твои́мъ лю́ди наꙋча́ла є҆сѝ, и҆̀же вѣ́рою просвѣти́вшесѧ взыва́хꙋ: сла́ва тебѣ̀, хрⷭ҇тѐ бж҃е, ди́вный во ст҃ы́хъ твои́хъ.

Кнѧ́жеское досто́инство ѡ҆ста́вивши, и҆ ѡ҆ сла́вѣ земнѣ́й небрегꙋ́щи, ра́бство хрⷭ҇то́во и҆ во́льнꙋю нищетꙋ̀ и҆збра́ла є҆сѝ, чи́на а҆́гг҃льскагѡ жела́ющи. тѣ́мже и҆ мы̀, ѡ҆брѣ́тше тѧ̀ но́вꙋю те́плꙋю предста́тельницꙋ, бл҃года́рнѣ зове́мъ: сла́ва тебѣ̀, хрⷭ҇тѐ бж҃е, ди́вный во ст҃ы́хъ твои́хъ.

Гла́съ є҃: А҆пⷭ҇лѡмъ хрⷭ҇тѡ́вымъ ревнꙋ́ющи, ꙗ҆́кѡ ст҃а́гѡ патрӏ́кїа ᲂу҆чени́ца, вѣ́рꙋ правосла́внꙋю насажда́ла є҆сѝ ᲂу҆се́рднѡ, брїгӏ́то всечⷭ҇тна́ѧ. тѣ́мже па́мѧть твою̀ ны́нѣ творѧ́ще, трꙋды̀ твоѧ̑ бл҃гочⷭ҇тнѡ почита́емъ, сла́вѧще хрⷭ҇та̀, да́вшаго тѝ крѣ́пость.

Гла́съ в҃: Речѐ гдⷭ҇ь свои̑мъ ᲂу҆ченикѡ́мъ: добрѣ́йше тѝ є҆́сть со є҆ди́нѣмъ ѻ҆́комъ въ живо́тъ вни́ти, не́же двѣ̀ ѻ҆́цѣ и҆мꙋ́щꙋ дꙋ́шꙋ погꙋби́ти. тѣ́мже и҆ ты̀, прпⷣбнаѧ, є҆ди́но ѻ҆́ко погꙋби́вши, ра́доваласѧ є҆сѝ, ꙗ҆́кѡ та́кѡ пꙋ́ть тво́й ко и҆́ноческомꙋ житїю̀ ᲂу҆глажда́шесѧ.

Ѕвѣздѣ̀, на за́падѣ со́лнца ꙗ҆влѧ́ющейсѧ, подобѧ́щисѧ, возсїѧ́ла є҆сѝ, прпⷣбнаѧ, но́щь невѣ́рїѧ просвѣща́ющи, и҆ ѹ҆́тро дх҃о́вное бл҃говѣ́рїѧ возвѣща́ющи. тѣ́мже тѝ велегла́снѡ зове́мъ: ра́дꙋйсѧ, брїгӏ́то, правосла́вїѧ наста́внице. Сла́ва, гла́съ ѕ҃:

Полкѡ́мъ невѣ́рныхъ гра́дъ тво́й ѡ҆бстꙋпи́вшымъ, и҆ то́й разрꙋши́ти и҆ ѻ҆гню̀ преда́ти хотѧ́щымъ, хрⷭ҇тїа́нѡмъ же стра́хомъ и҆ тре́петомъ и҆сполнѧ́ющымсѧ, и҆ твоеѧ̀ по́мощи, прпⷣбнаѧ, ᲂу҆се́рднѡ просѧ́щымъ, воево́да гро́знаѧ ꙗ҆ви́ласѧ є҆сѝ, ѡ҆рꙋ́жїе смертоно́сное проти́вꙋ самѣ́хъ врагѡ́въ ѡ҆браща́ющи, и҆ смѧте́нїе во ста́нѣ вра́жескомъ ᲂу҆строѧ́ющи. тѣ́мже сп҃се́ннїи твои́мъ предста́тельствомъ лю́дїе взыва́хꙋ: ра́дꙋйсѧ, на по́мощь на́мъ поспѣша́ющаѧ, брїгӏ́то пресла́внаѧ.

И҆ ны́нѣ, предпра́зднства, гла́съ в҃: Дне́сь сѷмеѡ́нъ на рꙋ́ки:

и҆лѝ бг҃оро́диченъ догма́тїкъ, гла́съ ѕ҃: Кто̀ тебє̀ не ᲂу҆бл҃жи́тъ:

Вхо́дъ, прокӏ́менъ днѐ, и҆ чтє́нїѧ г҃.

Премꙋ́дрости соломѡ́новы чте́нїе:

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предꙿ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́новы чте́нїе:

Првⷣницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѡрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый, прпⷣбїе: Поѻстри́тъ же напра́сный гнѣ́въ во ѡ҆рꙋ́жїе: спобо́ретъ же съ ни́мъ мӏ́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, И҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы́кѡвъ: Ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

Премꙋ́дрости соломѡ́новы чте́нїе:

Првⷣникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо чⷭ҇тна̀ не многолѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ, преста́вленъ бы́сть: Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ѹ҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: Оу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На лїтӏ́и стїхи́ра хра́ма, и҆ ст҃ы́ѧ.

А҆́ще є҆́сть предпра́зднство: стїхи̑ры предпра́зднства стїхѡ́вныѧ, и҆ ст҃ы́ѧ.

Гла́съ д҃:

Пꙋ́ть пра́вый, въ живо́тъ вѣ́чный вводѧ́й, ѡ҆брѣ́тши, прпⷣбнаѧ, привела̀ є҆сѝ ко сп҃сꙋ житїѧ̀ и҆́ноческагѡ и҆́щꙋщихъ, и҆ ты́ѧ ᲂу҆пасла̀ є҆сѝ мꙋ́дрѡ во ѻ҆би́тели кїлда́рстѣй, ꙗ҆́же а҆́ки са́дъ дх҃о́вный процвѣтѐ, твои́ми по бг҃ꙋ слеза́ми ѡ҆роша́ема, и҆ стѣно́ю мл҃твъ твои́хъ ѿ вѣ̑тръ проти́вныхъ ѡ҆гражда́ема.

Сла́ва, гла́съ то́йже:

Ви́дѧщи мно́жєства сп҃се́нїѧ и҆́щꙋщихъ, во врата̀ ѻ҆би́тели кїлда́рскїѧ толкꙋ́щихъ, съ ра́достїю ѿверза́ла є҆сѝ и҆̀мъ двє́ри и҆́ноческагѡ житїѧ̀, и҆ смиренномꙋ́дрїемъ наставлѧ́ла є҆сѝ прише́дшихъ съ тобо́ю подвиза́тисѧ, хрⷭ҇та̀ бг҃а бл҃годарѧ́щи и҆ вопїю́щи: сѐ а҆́зъ и҆ дѣ́ти, ꙗ҆̀же мѝ дадѐ бг҃ъ.

И҆ ны́нѣ, предпра́зднства, гла́съ в҃. Самогла́сенъ:

Зижди́тель нб҃сѐ и҆ землѝ на рꙋка́хъ ноша́шесѧ ст҃ы́мъ сѷмеѡ́номъ ста́рцемъ дне́сь. то́й бо дх҃омъ ст҃ы́мъ глаго́лаше: ны́нѣ свободи́хсѧ, ви́дѣхъ бо сп҃са моего̀.

И҆лѝ бг҃оро́диченъ, гла́съ д҃:

Всыновле́нїе ро́да человѣ́ческагѡ и҆зꙿ ѹ҆́стъ хрⷭ҇то́выхъ прїе́мши, всенепоро́чнаѧ, мт҃рнѧгѡ попече́нїѧ твоегѡ̀ не ѿимѝ ѿ на́съ, бцⷣе, а҆́ще и҆ нѣ́смы досто́йни нарещи́сѧ ча̑да твоѧ̑, ѻ҆ба́че на ны̀ ᲂу҆млⷭ҇рдисѧ, смирє́нныѧ и҆ ѡ҆сꙋждє́нныѧ, тѧ́ бо є҆ди́нꙋ наде́ждꙋ и҆́мамы, прест҃а́ѧ мт҃и дв҃о.

На стїхо́внѣ стїхи̑ры, гла́съ г҃:

Но́щь ѹ҆́бѡ пре́йде, и҆ де́нь прибли́жисѧ, ѿложи́мъ ѹ҆́бѡ дѣла̀ тє́мнаѧ, и҆ ѡ҆блече́мсѧ во ѡ҆рꙋ́жїе свѣ́та, вопїѧ́ла є҆сѝ, брїгӏ́то бл҃же́ннаѧ, дѣ̑вы и҆ вдови̑цы во ѻ҆би́тель твою̀ созыва́ющи, и҆ на пꙋ́ть сп҃се́нїѧ наставлѧ́ющи.

Стӏ́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Ѡ҆ сла́вѣ бж҃їей ревнꙋ́ющи, и҆ ѡ҆ просвѣще́нїи ѻ҆те́чества твоегѡ̀ пекꙋ́щисѧ, взыва́ла є҆сѝ ко се́страмъ ѻ҆би́тели твоеѧ̀, брїгӏ́то мꙋ́драѧ, и҆́стинꙋ позна́вши: ᲂу҆ста̀ на̑ша ктомꙋ̀ не затвори́мъ, но вѣ́рꙋ правосла́внꙋю велегла́снѡ да проповѣ́дꙋемъ, во сп҃се́нїе дꙋ́шъ на́шихъ.

Стӏ́хъ: Чтна̀ предꙿ гдⷭ҇емъ сме́рть прпⷣбныхъ є҆гѡ̀.

А҆враа́ма въ дꙋбра́вѣ мамврӏ́йстѣй, трѝ а҆́гг҃ла страннопрїи́мшаго, подража́ющи, въ дꙋбра́вѣ до́мъ бж҃їй ᲂу҆строѧ́ющи, трⷪ҇цѣ всест҃ѣ́й селе́нїе ᲂу҆гото́вила є҆сѝ, брїгӏ́то всечⷭ҇тна́ѧ. тѣ́мже и҆ ѡ҆ лю́дехъ твои́хъ, ꙗ҆́коже дре́вле патрїа́рхъ, хода́тайствꙋющи, гнѣ́въ бж҃їй ѿ тѣ́хъ ѿвраща́ла є҆сѝ, мл҃твами дерзнове́нными. Сла́ва, гла́съ и҃:

Ѻ҆́ко чⷭ҇то и҆мꙋ́щи, прпⷣбнаѧ, и҆ ѹ҆́мъ нескве́ренъ, сподо́биласѧ є҆сѝ зрѣ́ти сл҃нце ѹ҆́мное, хрⷭ҇та̀, є҆го́же молѝ, брїгӏ́то, дарова́ти и҆ на́мъ просвѣще́нїе, и҆ ве́лїю млⷭ҇ть.

И҆ ны́нѣ, предпра́зднства, гла́съ в҃: Сщ҃е́ннаго сщ҃е́ннаѧ дв҃а:

И҆лѝ бг҃оро́диченъ, гла́съ и҃:

Влⷣчце, прїимѝ мл҃твы ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.

Тропа́рь, гла́съ и҃:

Въ тебѣ̀, мт҃и, и҆звѣ́стнѡ сп҃се́сѧ, є҆́же по ѡ҆́бразꙋ: прїи́мши бо крⷭ҇тъ, послѣ́довала є҆сѝ хрⷭ҇тꙋ̀, и҆ дѣ́ющи ᲂу҆чи́ла є҆сѝ презира́ти ѹ҆́бѡ пло́ть, прехо́дитъ бо, прилѣжа́ти же ѡ҆ дꙋшѝ, ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, прпⷣбнаѧ брїгӏ́то, дꙋ́хъ тво́й.

И҆́нъ тропа́рь, гла́съ д҃. Творе́нїе кѵ́ръ наѳана́ила:

Словесє́мъ патрӏ́кїа ст҃а́гѡ наꙋчи́вшисѧ, на за́падъ кра́йнїй пришла̀ є҆сѝ, ѡ҆ восто́цѣ, и҆́же посѣтѝ на́съ свы́ше, возвѣща́ющи. тѣ́мже и҆ ᲂу҆бл҃жа́емъ тѧ̀, прпⷣбнаѧ мт҃и брїгӏ́то, и҆ вопїе́мъ тѝ: моли́сѧ ѡ҆ дꙋша́хъ на́шихъ.

Сла́ва, и҆ ны́нѣ, предпра́зднства, гла́съ а҃: Нбⷭ҇ный ли́къ: и҆лѝ бг҃оро́диченъ воскрⷭ҇нъ.

А҆́ще бдѣ́нїе соверша́етсѧ: тропа́рь ст҃ы́ѧ, два́жды, и҆ предпра́зднства,

и҆лѝ Бцⷣе, дв҃о: є҆ди́ножды.

На ѹ҆́трени.

На Бг҃ъ гдⷭ҇ь: тропа́рь предпра́зднства, два́жды, Сла́ва: ст҃ы́ѧ, И҆ ны́нѣ: предпра́зднства.

А҆́ще нѣ́сть предпра́зднства: тропа́рь ст҃ы́ѧ, два́жды.

Сла́ва, и҆ ны́нѣ, бг҃оро́диченъ.

По а҃-мъ стїхосло́вїи сѣда́ленъ, гла́съ а҃:

Ѡ҆ чесо́мъ бо помо́лимсѧ, ꙗ҆́коже подоба́етъ; не вѣ́мы: но са́мъ ты̀, гдⷭ҇и, наꙋчѝ на́съ мл҃твѣ, взыва́ла є҆сѝ, прпⷣбнаѧ мт҃и. тѣ́мже и҆ даде́ ти бг҃ъ блгⷣть моли́тисѧ за ны̀, и҆ ны́нѣ, твоѐ предста́тельство стѧжа́вше, того̀ прославлѧ́емъ. Два́жды.

Сла́ва, и҆ ны́нѣ, предпра́зднства. И҆лѝ бг҃оро́диченъ:

Мт҃рь тѧ̀ бж҃їю свѣ́мы всѝ, дв҃ꙋ вои́стиннꙋ и҆ по ржⷭ҇твѣ̀ ꙗ҆́вльшꙋюсѧ, любо́вїю прибѣга́ющїи къ твое́й бл҃гости: тебе́ бо и҆́мамы грѣ́шныхъ предста́тельство, тебѐ стѧжа́хомъ въ напа́стехъ сп҃се́нїе, є҆ди́нꙋ всенепоро́чнꙋю.

По в҃-мъ стїхосло́вїи сѣда́ленъ, гла́съ з҃:

Что̀ ѹ҆́бѡ возмо́жетъ на́съ разлꙋчи́ти ѿ любвѐ бж҃їѧ, ꙗ҆́же ѡ҆ хрⷭ҇тѣ̀ гдⷭ҇ѣ на́шемъ; ни сме́рть, ни живо́тъ, ни высота̀, ни глꙋбина̀, ни настоѧ̑щаѧ, ни грѧдꙋ̑щаѧ, вопїѧ́ла є҆сѝ со а҆пⷭ҇ломъ, прпⷣбнаѧ, живо́тъ сво́й въ рꙋ́цѣ бж҃їѧ предаю́щи, и҆ томꙋ̀ дерзнове́ннѡ слꙋжа́щи: тѣ́мже ны́нѣ во црⷭ҇твїи є҆гѡ̀ ᲂу҆тѣша́ешисѧ. Два́жды.

Сла́ва, и҆ ны́нѣ, предпра́зднства. И҆лѝ бг҃оро́диченъ:

Ра́дꙋйсѧ, блгⷣтнаѧ бцⷣе дв҃о, приста́нище и҆ предста́тельство ро́да человѣ́ческагѡ, и҆зꙿ тебє́ бо воплоти́сѧ и҆зба́витель мӏ́ра: є҆ди́на бо є҆сѝ мт҃и и҆ дв҃а, при́снѡ бл҃гослове́на и҆ препросла́влена: молѝ хрⷭ҇та̀ бг҃а ми́ръ дарова́ти все́й вселе́ннѣй.

Полѷеле́й, и҆ велича́нїе:

Оу҆бл҃жа́емъ тѧ̀, прпⷣбнаѧ мт҃и брїгӏ́то, и҆ чти́мъ ст҃ꙋ́ю па́мѧть твою̀, ты́ бо мо́лиши за на́съ хрⷭ҇та̀ бг҃а на́шего. Ѱало́мъ и҆збра́нный: Терпѧ̀,

потерпѣ́хъ гдⷭ҇а, и҆ внѧ́тъ мѝ, и҆ ᲂу҆слы́ша мл҃твꙋ мою̀.

По полѷеле́и сѣда́ленъ, гла́съ в҃:

Крѣ́пкїй во бране́хъ, бж҃е, поразѝ врагѝ, борю́щыѧ ны̀, взыва́ла є҆сѝ, брїгӏ́то, ѡ҆ сп҃се́нїи гра́да твоегѡ̀ те́плѣ молѧ́щисѧ. Два́жды.

Сла́ва, и҆ ны́нѣ, предпра́зднства. И҆лѝ бг҃оро́диченъ:

Щи́тъ и҆ забра́ло и҆мꙋ́ще твоѐ застꙋпле́нїе, бцⷣе, воево́до держа́внаѧ, ѿ вра̑гъ ви́димыхъ и҆ неви́димыхъ, да не ᲂу҆бои́мсѧ.

Прокӏ́менъ, гла́съ д҃: Чтна̀ предꙿ гдⷭ҇емъ сме́рть прпⷣбныхъ є҆гѡ̀. Стӏ́хъ:

Въ це́рквахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.

Є҆ѵⷢ҇лїе ѿ матѳе́а, зача́ло р҃д: Речѐ гдⷭ҇ь при́тчꙋ сїю̀: ᲂу҆подо́бисѧ црⷭ҇твїе нбⷭ҇ное:

По н҃-мъ ѱалмѣ̀: Мл҃твами прпⷣбныѧ брїгӏ́ты:

Та́же стїхи́ра, гла́съ ѕ҃:

Сїѧ̀ глаго́летъ со а҆пⷭ҇ломъ брїгӏ́та прпⷣбнаѧ, ꙗ҆́кѡ вре́мѧ прекраще́но є҆́сть про́чее, да бꙋ́дꙋтъ ᲂу҆̀бо пла́чꙋщїисѧ ꙗ҆́кѡ не пла́чꙋщїи, и҆ кꙋпꙋ́ющїи ꙗ҆́кѡ не содержа́ще, и҆ тре́бꙋющїи мӏ́ра сегѡ̀ ꙗ҆́кѡ не тре́бꙋюще, прехо́дитъ бо ѡ҆́бразъ мӏ́ра сегѡ̀, па́че же бл҃га̑ѧ нетлѣ̑ннаѧ на нб҃сѝ сокро́виществꙋюще, гдⷭ҇еви да послꙋ́жимъ любо́вїю, дрꙋ́гъ дрꙋ́га ᲂу҆крѣплѧ́юще и҆ взыва́юще: црⷭ҇твїѧ твоегѡ̀, сп҃се, не лишѝ на́съ.

Канѡ́нъ предпра́зднства, и҆лѝ бцⷣѣ со і҆рмосо́мъ на ѕ҃: Во́дꙋ проше́дъ:

и҆ прпⷣбнѣй на и҃, є҆гѡ́же краегране́сїе: Брїгӏ́тꙋ, ѿ за́пада къ на́мъ прише́дшꙋю, пое́мъ.

Гла́съ в҃. Пѣ́снь а҃.

І҆рмо́съ: Нетре́нꙋ, неѻбы́чнꙋ, немо́креннѡ морскꙋ́ю ше́ствовавъ стезю̀, и҆збра́нный вопїѧ́ше і҆и҃ль: гдⷭ҇еви пои́мъ, ꙗ҆́кѡ просла́висѧ.

Припѣ́въ: Прпⷣбнаѧ ма́ти брїгӏ́то, молѝ бг҃а ѡ҆ на́съ.

Бж҃їимъ про́мысломъ води́ма, прпⷣбнаѧ, ꙗ҆́коже и҆збра́ннїи лю́дїе въ пꙋсты́ни, невѣ́рїѧ тьмы̀, ꙗ҆́кѡ во́инства фараѡни́тскагѡ, и҆збѣ́гши, вопїѧ́ла є҆сѝ: гдⷭ҇еви пою̀, ꙗ҆́кѡ просла́висѧ.

Ре́вностїю а҆пⷭ҇льскою распала́ема, брїгӏ́то чⷭ҇тна́ѧ, вѣ́рꙋ правосла́внꙋю во ѻ҆те́чествїи твое́мъ насажда́ющи, ра́дꙋющисѧ воспѣва́ла є҆сѝ: гдⷭ҇еви пою̀, ꙗ҆́кѡ просла́висѧ.

И҆́ноческагѡ житїѧ̀ жела́ющи, мл҃твꙋ ᲂу҆се́рднꙋю бг҃ꙋ приноси́ла є҆сѝ. тѣ́мже и҆ ѡ҆брѣ́тши жела́емое, взыва́ла є҆сѝ: гдⷭ҇еви пою̀, ꙗ҆́кѡ просла́висѧ.

Бг҃оро́диченъ: Гпⷭ҇жѐ бцⷣе, брїгӏ́тꙋ вѣ́рнꙋю прїимѝ за ны̀ молѧ́щꙋюсѧ, ꙗ҆́кѡ да тоѧ̀ предста́тельство и҆мꙋ́ще, тебѐ пое́мъ и҆ сла́вимъ.

Катава́сїа срѣ́тенїѧ: Сꙋ́шꙋ глꙋбороди́тельнꙋю зе́млю: и҆лѝ катава́сїа по ᲂу҆ста́вꙋ.

Пѣ́снь г҃.

І҆рмо́съ: Лꙋ́къ сокрꙋши́сѧ си́льныхъ держа́вою твое́ю, хрⷭ҇тѐ, и҆ си́лою немощствꙋ́ющїи препоѧ́сашасѧ.

І҆́рскїѧ землѝ просвѣти́телей, брїгӏ́тꙋ и҆ патрӏ́кїа просла́вимъ, невѣ́рствїѧ і҆́дѡлѡвъ сокрꙋши́вшихъ, си́лою хрⷭ҇то́вою препоѧ́савшесѧ.

Тѣле́снагѡ ѻ҆́ка лиши́вшисѧ, зрѣ́нїе нбⷭ҇ныхъ и҆ недовѣ́домыхъ ᲂу҆лꙋчи́ла є҆сѝ, прпⷣбнаѧ, си́ла бо бж҃їѧ въ не́мощи соверша́етсѧ.

Оу҆́зкимъ пꙋте́мъ во црⷭ҇твїе нбⷭ҇ное ше́ствовати и҆зво́лила є҆сѝ, брїгӏ́то, блгⷣтїю бж҃їею ᲂу҆крѣплѧ́ема: ты̀ є҆сѝ, хрⷭ҇тѐ, крѣ́пость немощствꙋ́ющихъ, взыва́ющи.

Бг҃оро́диченъ: Ѽ мт҃и и҆ дв҃о, не мꙋ́дростїю и҆ си́лою, ни бога́тствомъ хва́лимсѧ, но тобо́ю, ро́дъ человѣ́ческїй на высотꙋ̀ возне́сшею.

Сѣда́ленъ, гла́съ и҃:

Срѣта́ютъ брїгӏ́тꙋ прпⷣбнꙋю ли́цы првⷣныхъ, па́че же и҆̀же а҆пⷭ҇льски потрꙋди́вшїисѧ: магдали́на марӏ́а, да́же до ри́ма доше́дши, хрⷭ҇то́во воскрⷭ҇нїе проповѣ́давшаѧ, и҆ нӏ́на ст҃а́ѧ, вѣ́рꙋ хрⷭ҇то́вꙋ во странѣ̀ і҆́верстѣй насади́вшаѧ, та́же ѻ҆́льга кнѧги́нѧ првⷣнаѧ, пе́рвꙋю це́рковь въ землѝ рꙋ́сской созда́ти повелѣ́вшаѧ, кѷрӏ́ллъ же и҆ меѳо́дїй, просвѣти́телїе стра́нъ слове́нскихъ ꙗ҆ви́вшїисѧ. тѣ́мже мы̀ брїгӏ́тꙋ мꙋ́дрꙋю, ꙗ҆́кѡ си́мъ поревнова́вшꙋю, почти́мъ, и҆ тоѧ̀ пра́здникъ соверша́юще, весе́лїемъ возопїи́мъ: ра́дꙋйсѧ, вѣ́рꙋ правосла́внꙋю ѿ востѡ́къ да́же до за̑падъ прине́сшаѧ, ра́дꙋйсѧ, со́нмы и҆́ночєскїѧ воспита́вшаѧ, моли́сѧ, прпⷣбнаѧ, непреста́ннѡ, сп҃сти́сѧ дꙋша́мъ на́шымъ. Два́жды.Сла́ва, и҆ ны́нѣ, предпра́зднства. И҆лѝ бг҃оро́диченъ:

Ѡ҆ тебѣ̀ ра́дꙋетсѧ, блгⷣтнаѧ, всѧ́каѧ тва́рь, а҆́гг҃льскїй собо́ръ и҆ человѣ́ческїй ро́дъ, ѡ҆сщ҃е́нный хра́ме, и҆ раю̀ слове́сный, дѣ́вственнаѧ похвало̀, и҆зꙿ неѧ́же бг҃ъ воплоти́сѧ, и҆ млⷣнецъ бы́сть, пре́жде вѣ̑къ сы́й бг҃ъ на́шъ: ложесна́ бо твоѧ̑ прⷭ҇то́лъ сотворѝ, и҆ чре́во твоѐ простра́ннѣе небе́съ содѣ́ла. ѡ҆ тебѣ̀ ра́дꙋетсѧ, блгⷣтнаѧ, всѧ́каѧ тва́рь, сла́ва тебѣ̀. Пѣ́снь д҃.

І҆рмо́съ: Оу҆слы́шахъ, гдⷭ҇и, сла́вное твоѐ смотре́нїе, и҆ просла́вихъ, чл҃вѣколю́бче, непостижи́мꙋю твою̀ си́лꙋ.

Тѣле́снꙋю красотꙋ̀ нивочто́же вмѣнѧ́ющи, и҆ ѻ҆́ко є҆ди́но погꙋби́вши, ра́доваласѧ є҆сѝ, прпⷣбнаѧ, нбⷭ҇нꙋю лѣ́потꙋ зрѣ́ти жела́ющи, и҆ бг҃а со ли̑ки првⷣныхъ сла́вити.

Земна́го ѡ҆брꙋ́чника ѿве́ргши, роди́телево же преще́нїе претвори́ти молѧ́щисѧ, свы́ше по́мощь па́че наде́жды ѡ҆брѣла̀ є҆сѝ, красы̀ тѣле́сныѧ лиши́вшисѧ.

А҆пⷭ҇лѡмъ поревнова́ла є҆сѝ, прпⷣбныѧ подража́ла є҆сѝ, страстоте́рпцємъ въ терпѣ́нїи послѣ́довала є҆сѝ, брїгӏ́то бл҃же́ннаѧ.

Бг҃оро́диченъ: Покры́й на́съ чⷭ҇тны́мъ твои́мъ ѡ҆мофо́ромъ, влⷣчце, всѧ́кїѧ нꙋ́жды и҆ печа́ли на́съ и҆збавлѧ́ющи, ꙗ҆́кѡ да согла́снѡ сла́вимъ млⷭ҇рдїе твоѐ, и҆ непостижи́мꙋю твою̀ си́лꙋ.

Пѣ́снь є҃.

І҆рмо́съ: Но́щи преше́дшей, прибли́жисѧ де́нь, и҆ свѣ́тъ мӏ́рꙋ возсїѧ̀, сегѡ̀ ра́ди хва́лѧтъ тѧ̀ а҆́гг҃льстїи чи́ни, и҆ славосло́вѧтъ тѧ̀ всѧ́чєскаѧ.

А҆́гг҃льстїи чи́ни ра́довахꙋсѧ, зрѧ́ще тѧ̀, брїгӏ́то, на ни́вѣ хрⷭ҇то́вѣй трꙋдѧ́щꙋюсѧ, и҆ стори́чный пло́дъ бг҃ꙋ приносѧ́щꙋю: тѣ́мже славосло́вїе творцꙋ̀ всѧ́ческихъ воспѣва́хꙋ.

Дво́ицꙋ сла́внꙋю просвѣти́телей почти́мъ: патрӏ́кїа, і҆́рскїѧ землѝ а҆пⷭ҇ла, и҆ брїгӏ́тꙋ, пе́рвѣйшꙋю ѻ҆би́тель во ѻ҆те́чествїи свое́мъ ѡ҆снова́вшꙋю: тӏ́и бо насади́телїе вѣ́ры правосла́вныѧ ꙗ҆ви́шасѧ.

А҆́дскїѧ си̑лы во тьмꙋ̀ кромѣ́шнꙋю ѿсылаю́щи, хрⷭ҇то́ва вѣ́ра трисо́лнечнаѧ во ѻ҆те́чествїи твое́мъ возсїѧ̀, трꙋды̑ твои́ми, прпⷣбнаѧ мт҃и: тѣ́мже тѧ̀ велегла́снѡ прославлѧ́емъ.

Бг҃оро́диченъ: Къ комꙋ̀ ѹ҆́бѡ прибѣ́гнемъ, а҆́ще не къ тебѣ̀, бцⷣе, свѣ́те помраче́нныхъ дꙋ́шъ на́шихъ; ты́ бо є҆сѝ ненаде́жныхъ наде́жда и҆ бори́мыхъ по́мощь, и҆ на тѧ̀ всѐ ᲂу҆пова́нїе возлага́емъ.

Пѣ́снь ѕ҃.

І҆рмо́съ: Гла́съ глагѡ́лъ моле́бныхъ, ѿ болѣ́зненныѧ, влⷣко, дꙋшѝ ᲂу҆слы́шавъ, ѿ лю́тыхъ мѧ̀ и҆зба́ви: є҆ди́нъ бо є҆сѝ на́шегѡ сп҃се́нїѧ вино́венъ.

Немощна́ѧ жена̀ сꙋ́щи, неви̑димыѧ врагѝ поража́ла є҆сѝ, прпⷣбнаѧ, ꙗ҆́коже дв҃дъ голїа́ѳа, пра́щею мл҃твъ твои́хъ ко сп҃сꙋ и҆ бг҃ꙋ всеси́льномꙋ.

А҆́ки вѣ́но ѻ҆́ко твоѐ прине́сши нетлѣ́нномꙋ женихꙋ̀ нбⷭ҇номꙋ, брїгӏ́то, томꙋ̀ и҆́стиннѡ ѡ҆брꙋчи́ласѧ є҆сѝ, и҆ томꙋ̀ во срѣ́тенїе и҆зшла̀ є҆сѝ, въ полꙋ́нощи грѧдꙋ́щемꙋ, свѣти́льникъ вѣ́ры и҆ любвѐ вже́гши.

Мы́сленныѧ бра́ни побѣди́тельница ꙗ҆ви́вшисѧ на полкѝ, гра́дъ тво́й ве́лїй ѡ҆бстꙋпи́вшыѧ, возста́ла є҆сѝ, прпⷣбнаѧ, и҆ ты́ѧ въ смѧте́нїе привела̀ є҆сѝ, твои́мъ къ бг҃ꙋ предста́тельствомъ, лю́демъ ѿ болѣ́зненныѧ дꙋшѝ къ томꙋ̀ взыва́ющымъ.

Бг҃оро́диченъ: Пречⷭ҇таѧ, пребл҃гослове́ннаѧ, премлⷭ҇тиваѧ, дв҃о бцⷣе, при́зри на ны̀, во глꙋбинѣ̀ ѕѡ́лъ пребыва́ющыѧ, и҆ ѿра́дꙋ пода́ждь на́мъ, рабѡ́мъ твои̑мъ.

Конда́къ, гла́съ ѕ҃. Творе́нїе кѵ́ръ наѳана́ила:

Кнѧ́жеское зва́нїе ѿри́нꙋвши, и҆ житїѐ мона́шеское є҆́же по бг҃ꙋ возлюби́вши, ѿ древе́съ дꙋбра́вныхъ ѻ҆би́тель воздви́гла є҆сѝ, пе́рвѣйшꙋю во странѣ̀ то́й, и҆ та́мѡ и҆́нокинь мно́жество бг҃ꙋ совокꙋпи́вши, наꙋчи́ла є҆сѝ ѡ҆крє́стныѧ страны̑ гдⷭ҇ꙋ вопи́ти: поми́лꙋй на́съ.

І҆́косъ: Помѧнѝ лю́ди, ꙗ҆̀же просвѣти́ла є҆сѝ, брїгӏ́то прпⷣбнаѧ, на пꙋ́ть пра́вый ты́ѧ наставлѧ́ющи: и҆зы́ди на сп҃се́нїе заблꙋ́дшихъ ѻ҆ве́цъ, и҆зꙿ пꙋсты́ни во ѡ҆гра́дꙋ цр҃ко́внꙋю и҆̀хъ приводѧ́щи, ꙗ҆́кѡ да є҆ди́нымъ срⷣцемъ и҆ є҆ди́ными ᲂу҆сты̀ зове́мъ: всеси́льне сп҃се, поми́лꙋй на́съ. Пѣ́снь з҃.

І҆рмо́съ: Тѣ́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: ᲂу҆слы́шасѧ ᲂу҆жѐ ѹ҆́стъ ва́шихъ мл҃тва.

Рꙋ́цѣ твоѝ прпⷣбнѣи къ бг҃ꙋ простира́ющи, брїгӏ́то, ꙗ҆́коже данїи́лъ льво́вꙋю лю́тость, та́кожде и҆ ты̀ ѕвѣроѡбра́знꙋю ꙗ҆́рость вра́жїю ᲂу҆кроти́ла є҆сѝ. тѣ́мже сп҃се́ннїи лю́дїе дрꙋ́гъ ко дрꙋ́гꙋ взыва́хꙋ: ᲂу҆слы́шасѧ ᲂу҆жѐ ѹ҆́стъ на́шихъ мл҃тва.

И҆збавле́й ѻ҆́троки ѿ рꙋкѝ мꙋчи́телѧ халде́йскагѡ, и҆зба́ви и҆ гра́дъ тво́й ѿ наше́ствїѧ ва́рварскагѡ, твои́ми мл҃твами, брїгӏ́то, на млⷭ҇рдїе преклонѧ́емь, бл҃гослове́нный бг҃ъ ѻ҆҆҆тє́цъ на́шихъ.

Шꙋмѧ́щей бра́ни, и҆ лю́демъ пла́чꙋщымъ, возвы́сила є҆сѝ гла́съ тво́й, прпⷣбнаѧ, ко є҆ди́номꙋ во бране́хъ крѣ́пкомꙋ, и҆ то́й, ꙗ҆́кѡ дре́вле мѡѷсе́ю, ѿвѣщава́ѧ тѝ речѐ: что̀ вопїе́ши ко мнѣ̀; ѻ҆ба́че па́ки сп҃сꙋ̀ лю́ди, на ты́ѧ млⷭ҇рдствꙋѧ.

Бг҃оро́диченъ: Є҆ди́нꙋ тѧ̀ покро́въ и҆ застꙋпле́нїе и҆́мамы, бцⷣе, всест҃а́ѧ, пренепоро́чнаѧ, поборѝ ᲂу҆̀бо держа́внѡ борю́щыѧ ны̀ врагѝ, ви̑димыѧ и҆ неви̑димыѧ. Пѣ́снь и҃.

І҆рмо́съ: Въ кꙋпинѣ̀ мѡѷсе́ю дв҃ы чꙋ́до, на сїна́йстѣй горѣ̀, проѡбрази́вшаго н҆ногда̀, по́йте, бл҃гослови́те, и҆ превозноси́те во всѧ̑ вѣ́ки.

Дво́ица сла́внаѧ, хрⷭ҇то́выхъ проповѣ̑дникъ, трⷪ҇ческое поклоне́нїе и҆ вѣ́рꙋ правосла́внꙋю возвѣсти́ша. тѣ́мже новопросвѣще́ннїи лю́дїе взыва́хꙋ: по́йте, бл҃гослови́те гдⷭ҇а, и҆ превозноси́те во всѧ̑ вѣ́ки.

Шꙋ́їѧгѡ стоѧ́нїѧ на стра́шнѣмъ сꙋди́щи хрⷭ҇то́вѣ, и҆ ѻ҆гнѧ̀ вѣ́чнꙋющагѡ неꙋгаси́магѡ, и҆зба́ви на́съ твои́мъ предста́тельствомъ, брїгӏ́то сла́внаѧ, ꙗ҆́кѡ да гдⷭ҇а пое́мъ, и҆ превозно́симъ во всѧ̑ вѣ́ки.

Оу҆зрѣ́вше тѧ̀, брїгӏ́то, ѡ҆рꙋ́жїе смертоно́сное ѿ гра́да ѿвраща́ющꙋю, вра́жєскїѧ же полкѝ въ смѧте́нїе приводѧ́щꙋю, сп҃се́ннїи па́че наде́жды лю́дїе взыва́хꙋ: гдⷭ҇а по́йте, бл҃гослови́те, и҆ превозноси́те во всѧ̑ вѣ́ки.

Бг҃оро́диченъ: Ю҆́же кꙋпина̀ неѡпали́маѧ мѡѷсе́ови проѡбразова̀, бцⷣꙋ пречⷭ҇тꙋю въ мл҃твахъ призове́мъ, вопїю́ще: пла́мень страсте́й и҆ напа́стей лю́тыхъ ᲂу҆гасѝ, да тѧ̀, цр҃и́це, пое́мъ и҆ превозно́симъ во всѧ̑ вѣ́ки.

Пѣ́снь ѳ҃.

І҆рмо́съ: Ве́сь є҆сѝ жела́нїе, ве́сь сла́дость, сло́ве бж҃їй, дв҃ы сн҃е, бж҃е богѡ́въ, гдⷭ҇и, ст҃ы́хъ прест҃ы́й: тѣ́мъ тѧ̀ всѝ съ ро́ждшею велича́емъ.

Пою́ще твоѧ̑ по́двиги, брїгӏ́то, и҆ па́мѧть твою̀ свѣ́тлѡ соверша́юще, тѧ̀, ꙗ҆́кѡ вѣ́рꙋ пра́вꙋю во страна́хъ за́падныхъ насади́вшꙋю, вседꙋ́шнѡ велича́емъ.

Ѡ҆ст҃ѝ прише́ствїемъ твои́мъ хра́мъ тво́й, прпⷣбнаѧ, мл҃твы въ не́мъ приноси̑мыѧ прїе́млющи, и҆ да́ры блгⷣтныѧ лю́демъ раздаю́щи, ꙗ҆́кѡ да хрⷭ҇та̀, тебѐ да́вшаго на́мъ предста́тельницꙋ, велича́емъ.

Є҆да̀ тѧ̀ по до́лгꙋ просла́вихомъ, прпⷣбнаѧ мт҃и, є҆да̀ тѝ хвалꙋ̀ досто́йнꙋю принесо́хомъ; ѻ҆ба́че пѣ̑нїѧ на̑ша, ꙗ҆́кѡ ка́плю ро́снꙋю на цвѣты̀ добродѣ́телей твои́хъ, прїимѝ, ꙗ҆́кѡ да смиренномꙋ́дрїе твоѐ велича́емъ.

Бг҃оро́диченъ: Мт҃рнее дерзнове́нїе къ сн҃ꙋ твоемꙋ̀ и҆мꙋ́щи, чⷭ҇таѧ, молє́нїѧ на̑ша, тебѣ̀ приноси̑маѧ, не пре́зри, но та̑ѧ хрⷭ҇тꙋ̀ бг҃ꙋ принесѝ, є҆го́же съ тобо́ю, влⷣчце, велича́емъ.

Свѣти́ленъ:

Свѣти́льникъ вѣ́ры правосла́вныѧ вже́гши, подꙿ спꙋ́домъ съ тѣ́мъ сокры́тисѧ не возмогла̀ є҆сѝ, брїгӏ́то сла́внаѧ. тѣ́мже и҆ на свѣ́щницѣ ѻ҆те́чествїѧ твоегѡ̀ поста́ви тѧ̀ хрⷭ҇то́съ бг҃ъ, и҆ свѣ́тиши всѣ̑мъ, и҆̀же ѿ за́пада и҆ сѣ́вера и҆ восто́ка приходѧ́щымъ. Два́жды.

Сла́ва, и҆ ны́нѣ, предпра́зднства. И҆лѝ бг҃оро́диченъ:

Зарѐ сл҃нца пра́вды, свѣ́та трисо́лнечнагѡ, тьмꙋ̀ всеконе́чнѡ разсѣ́ѧвшагѡ, бцⷣе пренепоро́чнаѧ, просвѣтѝ дꙋ́шы на́шѧ.

На хвали́техъ стїхи̑ры на д҃, гла́съ и҃.

Подо́бенъ: Ѽ пресла́внагѡ чꙋдесѐ:

Ѽпресла́внагѡ видѣ́нїѧ!* Ѽ слы́шанїѧ чꙋ́днагѡ!* ѻ҆би́тель и҆́ноческаѧ, въ дꙋбра́вѣ сокрове́ннаѧ,* и҆ хра́мъ бж҃їй, ѿ древе́съ дꙋбра́вныхъ созида́емый,* во сла́вꙋ трⷪ҇цы живонача́льныѧ,* во проповѣ́данїе вѣ́ры правосла́вныѧ,* твои́ми трꙋды̑, Ѽ брїгӏ́то, ᲂу҆строѧ́емыѧ,* и҆ твои́ми мл҃твами те́плыми ѡ҆гражда́емыѧ,* во сп҃се́нїе и҆ просвѣще́нїе мнѡ́зѣмъ.

Цр҃ю̀ царе́й послꙋжи́ти хотѧ́щи,* кнѧ́жеское досто́инство презрѣ́ла є҆сѝ,* прпⷣбнаѧ мт҃и брїгӏ́то,* кнѧ́зѧ тьмы̀ пресла́внѡ побѣжда́ющи,* рꙋ́бище и҆́ноческое багрѧни́цꙋ вмѣнѧ́ющи,* и҆ ѻ҆би́тель кїлда́рскꙋю па́че пала́тъ кнѧ́жескихъ и҆збира́ющи.* тѣ́мже и҆ вѣнча́ тѧ подвигополо́жникъ хрⷭ҇то́съ бг҃ъ,* и҆ ны́нѣ тѝ всѝ взыва́емъ:* моли́сѧ, брїгӏ́то првⷣнаѧ, ѡ҆ дꙋша́хъ на́шихъ.

На ка́мени вѣ́ры правосла́вныѧ ᲂу҆твержда́ющисѧ,* каменосе́рдое же невѣ́рїе разорѧ́ющи,* хра́минꙋ свою̀ на ка́мени созида́ла є҆сѝ, прпⷣбнаѧ,* и҆ прїидо́ша рѣ́ки, и҆ возвѣ́ѧша вѣ́три напа́стей и҆ и҆скꙋше́нїй,* и҆ не паде́сѧ,* па́че же приста́нище бл҃гоꙋти́шное ꙗ҆ви́сѧ,* всѣ̑мъ къ тебѣ̀, мт҃и, притека́ющымъ,* и҆ ѿ тебє̀ сло́вꙋ бж҃їю поꙋча́ющымсѧ,* хрⷭ҇та̀ сп҃са, да́вшаго тѧ̀ наста́вницꙋ, сла́вѧщымъ.

Рцы̀ на́мъ, брїгӏ́то бл҃же́ннаѧ,* почто̀ по́честей кнѧ́жескихъ бѣ́гаеши;* почто̀ нищетꙋ̀ во́льнꙋю и҆збира́еши;* почто̀ всѧ̑ кра̑снаѧ мӏ́ра сегѡ̀ нивочто́же вмѣнѧ́еши;* ѿвѣща́етъ прпⷣбнаѧ:* возлюби́хъ сп҃са моегѡ̀ и҆ бг҃а па́че житїѧ̀ сꙋ́етнагѡ,* и҆ томꙋ̀ послꙋжи́ти тщꙋ́сѧ, вѣ́рꙋ и҆́стиннꙋю насажда́ющи,* и҆ ᲂу҆тверди́ти новопросвѣщє́нныѧ лю́ди того̀ ᲂу҆молѧ́ющи,* да вкꙋ́пѣ є҆го̀ просла́вимъ.

Сла́ва, гла́съ ѕ҃:

Всѧ̑ ѿложи́вши мїрска̑ѧ попечє́нїѧ, во слѣ́дъ хрⷭ҇та̀ ᲂу҆се́рднѡ потекла̀ є҆сѝ, брїгӏ́то прпⷣбнаѧ, мл҃твою и҆ посто́мъ на дꙋхѡ́въ ѕло́бы вою́ющи. тѣ́мже и҆ во бране́хъ хрⷭ҇тїа́нѡмъ застꙋ́пница ꙗ҆влѧ́ешисѧ, и҆ хода́таица ве́лїѧ предꙿ бг҃омъ: не ѡ҆ста́ви ᲂу҆̀бо и҆ на́съ, мт҃и, твои́мъ попече́нїемъ. И҆ ны́нѣ, предпра́зднства.

И҆лѝ бг҃оро́диченъ, гла́съ то́йже:

Всѐ ᲂу҆пова́нїе на тѧ̀ возложи́вше, бцⷣе премлⷭ҇тиваѧ, тобо́ю да сп҃се́мсѧ, и҆ проще́нїе безмѣ́рныхъ согрѣше́нїй, ᲂу҆ сн҃а твоегѡ̀ и҆ бг҃а, тебє̀ ра́ди и҆схода́тайствꙋемъ, ꙗ҆́кѡ да тѧ̀, бл҃гꙋ́ю застꙋ́пницꙋ, во вѣ́ки вели́чаемъ.

Славосло́вїе вели́кое.

Є҆ктєнїѝ, и҆ ѿпꙋ́стъ.

На лїтꙋргӏ́и.

Бл҃жє́нна ѿ канѡ́на предпра́зднства, пѣ́снь г҃, и҆ ст҃ы́ѧ, пѣ́снь ѕ҃.

А҆́ще же нѣ́сть предпра́зднства: ѿ канѡ́на ст҃ы́ѧ, пѣ́снь г҃ и҆ ѕ҃.

Прокӏ́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Стӏ́хъ:

Въ це́рквахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.

А҆пⷭ҇лъ къ гала́тѡмъ, зача́ло с҃и.

А҆ллилꙋ́їа, гла́съ а҃: Терпѧ̀, потерпѣ́хъ гдⷭ҇а, и҆ внѧ́тъ мѝ, и҆ ᲂу҆слы́ша мл҃твꙋ мою̀. Стӏ́хъ: Храни́тъ гдⷭ҇ь дꙋ́шы прпⷣбныхъ свои́хъ.

Є҆ѵⷢ҇лїе ѿ лꙋкѝ, зача́ло л҃г.

Прича́стенъ: Въ па́мѧть вѣ́чнꙋю бꙋ́детъ првⷣникъ, ѿ слꙋ́ха ѕла̀ не ᲂу҆бои́тсѧ.