Мѣ́сѧца і҆ꙋ́нїа въ є҃і-й де́нь, и҆ а҆́ѵгꙋста въ к҃и-й де́нь.

Слꙋ́жба бл҃же́нномꙋ а҆ѵгꙋстӏ́нꙋ, є҆пӏ́скопꙋ і҆ппѡнӏ́йскомꙋ.

На вели́цѣй вече́рни.

Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ: стїхи̑ры на и҃, гла́съ и҃.

Подо́бенъ: Ѽ пресла́внагѡ чꙋдесѐ:

Ѻ тче ст҃и́телю а҆ѵгꙋстӏ́не,* по и҆́мени твоемꙋ̀ бы́сть житїѐ твоѐ:* вели́чїе бж҃їе проповѣ́далъ є҆сѝ,* вели́чїемъ дѣ́лъ ᲂу҆краси́лсѧ є҆сѝ,* вели́чїемъ пѡ́двигъ вѣнча́лсѧ є҆сѝ,* вели́чїемъ любвѐ, ꙗ҆́же ко хрⷭ҇тꙋ̀,* просвѣти́лсѧ є҆сѝ:* тѣ́мже и҆ на́мъ, чтꙋ́щымъ тѧ̀,* молѝ дарова́ти ве́лїѧ млⷭ҇ти.

Ѻ҆́тче ст҃и́телю а҆ѵгꙋстӏ́не,* а҆́ще и҆ молчи́тъ і҆ппѡнӏ́йскаѧ страна̀,* но мы̀ тѧ̀ прославлѧ́емъ,* ꙗ҆́кѡ є҆ресе́й потреби́телѧ,* ꙗ҆́кѡ вѣ́ры правосла́вныѧ ᲂу҆твержде́нїе,* ꙗ҆́кѡ мона́шествꙋющихъ вели́кꙋю похвалꙋ̀,* ꙗ҆́кѡ ст҃и́телей ᲂу҆краше́нїе,* ꙗ҆́кѡ нищелю́бїѧ люби́телѧ,* ꙗ҆́кѡ писа́нїй и҆зꙿѧсни́телѧ,* ꙗ҆́кѡ моле́бника те́пла за ны̀:* моли́сѧ дарова́тисѧ на́мъ ве́лїѧ млⷭ҇ти.

Бжⷭ҇твенными глагѡ́лы а҆мврѡ́сїа ѡ҆роси́всѧ,* прозѧ́блъ є҆сѝ стори́чествꙋющїй кла́съ добродѣ́телей,* и҆ бы́лъ є҆сѝ красота̀ цр҃ко́внаѧ,* свѣти́льникъ горѧ́щїй,* пла́мѧ, ѡ҆палѧ́ющее є҆́реси,* и҆ срⷣца̀ вѣ́рныхъ согрѣва́ющее.* і҆ппѡнӏ́йскагѡ гра́да предсѣда́телю,* ѻ҆́тче ст҃и́телю бл҃же́нне,* и҆ ны́нѣ на́мъ, чтꙋ́щымъ тѧ̀, просѝ ѿ хрⷭ҇та̀ ве́лїѧ млⷭ҇ти.

И҆́ны стїхи̑ры, гла́съ в҃.

Подо́бенъ: Кӏ́ими похва́льными вѣнцы̑:

Кӏ́ими похва́льными вѣнцы̑ ᲂу҆вѧзе́мъ ст҃и́телѧ, а҆́гг҃ла земна́го и҆ нбⷭ҇наго человѣ́ка, цр҃кве хрⷭ҇то́вы і҆ера́рха велича́йшаго, і҆ппѡнӏ́йскаго предсѣда́телѧ и҆ вселе́нныѧ ᲂу҆краше́нїе, любвѐ хрⷭ҇то́вы и҆спо́лненна и҆ мꙋ́дрости высо́кїѧ, догма́тѡвъ и҆зꙿѧсни́телѧ, вѣ́ры ᲂу҆твержде́нїе, мона́шествꙋющихъ наста́вника неле́стна; є҆го́же вѣнча̀ хрⷭ҇то́съ бг҃ъ на́шъ, и҆мѣ́ѧй ве́лїю млⷭ҇ть.

Кӏ́ими чⷭ҇тны́ми вѣнцы̑ ᲂу҆бл҃жи́мъ наста́вника на́шего, є҆гѡ́же вѣща́нїе про́йде во всю̀ вселе́ннꙋю, є҆гѡ́же бг҃овѣща̑ннаѧ ᲂу҆ста̀ и҆спо́лнишасѧ дх҃а, и҆ не покры̀ ѧ҆̀ хода́тай забве́нїѧ гро́бъ, но и҆ ны́нѣ глаго́лютъ медотѡ́чнаѧ ᲂу҆чє́нїѧ, ꙗ҆̀же къ жи́зни пꙋ́ть до́бръ ᲂу҆казꙋ́ютъ; є҆го́же вѣнча̀ хрⷭ҇то́съ бг҃ъ на́шъ, и҆мѣ́ѧй ве́лїю и҆ бога́тꙋю млⷭ҇ть.

Кӏ́ими ᲂу҆кра́шенными вѣнцы̑ вѣнча́емъ і҆ера́рха, а҆мврѡ́сїа вели́кагѡ чⷭ҇тнꙋ́ю похвалꙋ̀, вселе́нныѧ свѣти́льника и҆зѧ́щна, па́стырѧ преди́вна цр҃кве, скорбѧ́щихъ ᲂу҆тѣ́шителѧ те́пла, коле́блющихсѧ ᲂу҆твержде́нїе незы́блемое, пела́гїа противоста́телѧ тве́рда, и҆ є҆ресе́й коне́чное и҆скорене́нїе, чⷭ҇тоты̀ цр҃ко́вныѧ рачи́телѧ бди́тельна; є҆го́же вѣнча̀ хрⷭ҇то́съ бг҃ъ на́шъ, и҆мѣ́ѧй ве́лїю млⷭ҇ть. Сла́ва, гла́съ ѕ҃:

Прїиди́те, мона́шествꙋющихъ мно́жєства, ᲂу҆бл҃жи́мъ наста́вника на́шего, и҆ почти́мъ ст҃ꙋ́ю є҆гѡ̀ па́мѧть, мо́литсѧ бо при́снѡ ѡ҆ на́съ, соверша́ющихъ всечⷭ҇тнꙋ́ю па́мѧть є҆гѡ̀, и҆ любо́вїю вопїю́щихъ є҆мꙋ̀: молѝ ѡ҆ на́съ всеще́драго бг҃а, є҆мꙋ́же всегда̀ рабо́талъ є҆сѝ, є҆гѡ́же ни́вꙋ воздѣ́лалъ є҆сѝ, є҆гѡ́же ѻ҆́вцы ᲂу҆па́слъ є҆сѝ, є҆гѡ́же тала́нтъ ᲂу҆мно́жилъ є҆сѝ, є҆мꙋ́же за ны̀ при́снѡ моли́сѧ, ст҃и́телю а҆ѵгꙋстӏ́не, поми́ловатисѧ дꙋша́мъ на́шымъ. И҆ ны́нѣ, бг҃оро́диченъ догма́тїкъ: Кто̀ тебє̀ не ᲂу҆бл҃жи́тъ:

Вхо́дъ, прокӏ́менъ днѐ, и҆ чтє́нїѧ г҃.

При́тчей чте́нїе:

Па́мѧть првⷣнагѡ съ похвала́ми, и҆ бл҃҃҃҃҃гослове́нїе гдⷭ҇не на главѣ̀ є҆гѡ̀. Бл҃же́нъ человѣ́къ, и҆́же ѡ҆брѣ́те премꙋ́дрость, и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же чⷭ҇тно́е недосто́йно є҆ѧ̀ є҆́сть. Долгота́ бо дне́й и҆ лѣ̑та живота̀ въ десни́цѣ є҆ѧ̀, въ шꙋ́йцѣ же є҆ѧ̀ бога́тство и҆ сла́ва: ѿ ѹ҆́стъ є҆ѧ̀ и҆схо́дитъ пра́вда, зако́нъ же и҆ млⷭ҇ть на ѧ҆зы́цѣ но́ситъ. Послꙋ́шайте ᲂу҆̀бо менѐ, Ѽ ча̑да, чⷭ҇тна̑ѧ бо рекꙋ̀: и҆ бл҃же́нъ человѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ, премꙋ́дрость, ᲂу҆стро́ихъ совѣ́тъ, и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ блгⷣть. Разꙋмѣ́йте ᲂу҆̀бо, неѕло́бивїи, кова́рство, ненака́заннїи же, прилага́йте срⷣца̀. Послꙋ́шайте менѐ и҆ па́ки, чⷭ҇тна̑ѧ бо рекꙋ̀, и҆ ѿве́рзꙋ ѿ ᲂу҆сте́нъ пра̑ваѧ: ꙗ҆́кѡ и҆́стинѣ поꙋчи́тсѧ горта́нь мо́й, мє́рзки же предо мно́ю ᲂу҆стны̑ лжи̑выѧ. Съ пра́вдою всѝ глаго́лы ѹ҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋчꙋ́ бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.

Премꙋ́дрости соломѡ́новы чте́нїе:

Оу҆ста̀ првⷣнагѡ ка́плютъ премꙋ́дрость: ᲂу҆стнѣ́ же мꙋже́й мꙋ́дрыхъ вѣ́дѧтъ блгⷣть. Ѹ҆ста̀ мꙋ́дрыхъ поꙋча́тсѧ премꙋ́дрости, пра́вда же и҆збавлѧ́етъ и҆̀хъ ѿ сме́рти. Скон ча́вшꙋсѧ мꙋ́ жꙋ првⷣнꙋ, не поги́бнетъ наде́жда. Сы́нъ бо првⷣнъ ражда́етсѧ въ живо́тъ, и҆ во бл҃ги́хъ свои́хъ, пло́дъ пра́вды ѡ҆б̾и́метъ. Свѣ́тъ првⷣнымъ всегда̀, и҆ ѿ гдⷭ҇а ѡ҆брѧ́щꙋтъ блгⷣть и҆ сла́вꙋ. ѧ҆зы́къ мꙋ́дрыхъ дѡ́браѧ свѣ́сть, и҆ въ срⷣцѣ и҆́хъ почӏ́етъ мꙋ́д рость. Лю́битъ гдⷭ҇ь преподѡ́бнаѧ сердца̀, прїѧ́тни же є҆мꙋ̀ всѝ непо ро́чнїи въ пꙋтѝ. Мꙋ́дрость гдⷭ҇нѧ просвѣща́етъ лицѐ разꙋ́м нагѡ. Постига́етъ бо жела́ющыѧ ю҆̀, пре́жде да́же разꙋмѣ́ти ю҆̀: и҆ ᲂу҆до́бь ѹ҆́зритсѧ ѿ лю́бѧщихъ ю҆̀. Ѹ҆́треневавый къ не́й не ᲂу҆трꙋди́тсѧ: и҆ бдѧ́й є҆ѧ̀ ра́ди, вско́рѣ безꙿ печа́ли бꙋ́детъ. Ꙗ҆́кѡ досто́йныхъ є҆ѧ̀ сама̀ ѡ҆бхо́дитъ и҆́щꙋщи: и҆ во стезѧ́хъ є҆ѧ̀ ꙗ҆влѧ́етсѧ и҆̀мъ бл҃гопрїе́мнѣ. Мꙋ́дрости никогда́же ѡ҆долѣ́етъ ѕло́ба. Си́хъ ра́ди и҆ рачи́тель бы́хъ добро́ты є҆ѧ̀: и҆ воз люби́хъ ю҆̀, и҆ поиска́хъ ѿ ю҆́ности моеѧ̀: И҆ взыска́хъ невѣ́стꙋ привестѝ себѣ̀, ꙗ҆́кѡ всѣ́хъ влⷣка возлюбѝ ю̀. Таи́бница бо є҆́сть бж҃їѧ хи́трости, и҆ ѡ҆брѣта́тельница дѣ́лъ є҆гѡ̀. Трꙋды̀ є҆ѧ̀ сꙋ́ть добродѣ́тєли: цѣломꙋ́дрїю же и҆ ра́зꙋмꙋ та̀ ᲂу҆чи́тъ, пра́вдѣ и҆ мꙋ́жествꙋ, и҆́хже потре́бнѣе ничто́же є҆́сть въ житїѝ человѣ́кѡмъ. А҆́ще же и҆ мно́ гагѡ и҆скꙋ́сства жела́етъ кто̀, вѣ́сть дрє́внѧѧ, и҆ бы́ти хотѧ̑щаѧ разсмо́тритъ: Свѣ́сть и҆зви̑тїѧ слове́съ, и҆ разрѣ шє́нїѧ гада́нїй: зна́мєнїѧ и҆ чꙋдеса̀ проразꙋмѣ́етъ, и҆ сбытїѧ̑ време́нъ и҆ лѣ́тъ: и҆ всѣ̑мъ совѣ́тникъ є҆́сть бл҃гъ, ꙗ҆́кѡ безсме́ртїе є҆́сть въ не́й, и҆ бл҃госла́вїе во ѻ҆бще́нїи слове́съ є҆ѧ̀. Сегѡ̀ ра́ди бесѣ́довахъ ко гдⷭ҇ꙋ, и҆ помоли́хсѧ є҆мꙋ̀, и҆ рѣ́хъ ѿ всегѡ̀ срⷣца моегѡ̀: Бж҃е ѻ҆тцє́въ, и҆ гдⷭ҇и млⷭ҇ти, сотвори́вый всѧ̑ сло́вомъ твои́мъ, и҆ мꙋ́дростїю твое́ю ᲂу҆стро́ивый человѣ́ка, да владѣ́етъ бы́вшими ѿ тебє̀ тварьмѝ, и҆ да ᲂу҆правлѧ́етъ мӏ́ръ въ пре по до́бїи и҆ пра́вдѣ: Да́ждь мѝ твои́хъ прⷭ҇то́лѡвъ присѣдѧ́щꙋю премꙋ́дрость, и҆ не ѿлꙋчѝ менє̀ ѿ ѻ҆́трѡкъ твои́хъ, ꙗ҆́кѡ а҆́зъ ра́бъ тво́й, и҆ сы́нъ рабы́ни твоеѧ̀. Послѝ ю҆̀ съ небе́съ ѿ ст҃а́гѡ жили́ща твоегѡ̀, и҆ ѿ прⷭ҇то́ла сла́вы твоеѧ̀, да сꙋ́щи со мно́ю наꙋчи́тъ мѧ̀, что̀ бл҃гоꙋго́дно є҆́сть предꙿ тобо́ю: и҆ наста́витъ мѧ̀ въ ра́зꙋмъ, и҆ сохрани́тъ мѧ̀ въ сла́вѣ свое́й. По мышлє́нїѧ бо сме́ртныхъ всѧ̑ боѧзли̑ва, и҆ погрши́тєльна ᲂу҆мышлє́нїѧ и҆́хъ.

Премꙋ́дрости соломѡ́новы чте́нїе:

Похвалѧ́емꙋ првⷣникꙋ, возвеселѧ́тсѧ лю́дїе: Безсме́ртїе бо є҆́сть па́мѧть є҆гѡ̀, ꙗ҆́кѡ ѿ гдⷭ҇а познава́етсѧ, и҆ ѿ человѣ̑къ: и҆ ᲂу҆го́дна гдⷭ҇еви дꙋша̀ є҆гѡ̀. Возлюби́те ᲂу҆̀бо, Ѽ мꙋ́жїе, мꙋ́дрость, и҆ поживетѐ: восхощи́те є҆ѧ̀, и҆ нака́зани бꙋ́дете: нача́ло бо є҆ѧ̀ любы̀, и҆ соблюде́нїе зако́на. Почти́те премꙋ́дрость, да во вѣ́ки црⷭ҇твꙋете. Возвѣщꙋ̀ ва́мъ, и҆ не скры́ю ѿ ва́съ та̑инъ бж҃їихъ: Ꙗ҆́кѡ то́й мꙋ́дрости наста́вникъ є҆́сть, и҆ мꙋ́дрыхъ и҆спра́витель, и҆ всѧ́комꙋ смы́слꙋ и҆ дѣ́лꙋ хитре́цъ. И҆ всѣ̑мъ смы́слѡмъ наꙋчи́тъ мꙋ́дрость: є҆́сть бо въ не́й дх҃ъ разꙋ́менъ и҆ ст҃ъ, и҆ сїѧ́нїе свѣ́та присносꙋ́щнагѡ, и҆ ѡ҆́бразъ бл҃гости бж҃їѧ. Та̀ дрꙋ́ги бж҃їѧ и҆ прⷪ҇ро́ки ᲂу҆строѧ́етъ: Бл҃голѣ́пнѣйши же є҆́сть со́лнца, и҆ па́че всѧ́кагѡ сотворе́нїѧ ѕвѣ́здъ: свѣ́тꙋ сосꙋжда́ема ѡ҆брѣта́етсѧ пе́рвѣйши. Та̀ ᲂу҆гожда́ющихъ є҆́й ѿ болѣ́зней и҆зба́ви, и҆ наста́ви на стєзѝ пра̑выѧ. Дадѐ и҆̀мъ ра́зꙋмъ и҆мѣ́ти ст҃ъ, и҆ сохранѝ ѧ҆̀ ѿ ловѧ́щихъ, и҆ по́двигъ крѣ́покъ подадѐ и҆̀мъ: Да разꙋмѣ́ютъ всѝ, ꙗ҆́кѡ сильнѣ́е всегѡ̀ є҆́сть бл҃гочⷭ҇тїе. И҆ никогда́же премо́жетъ ѕло́ба мꙋ́дрости, нижѐ пре́йдетъ ѕлы̑ѧ, ѡ҆блича́ющи сꙋ́дъ. Реко́ша же въ себѣ̀, помы́сливше непра́веднѡ: наси́льствꙋемъ првⷣномꙋ, и҆ не пощади́мъ прпⷣбства є҆гѡ̀, ни ᲂу҆срами́мсѧ сѣди́нъ ста́рости многолѣ́тны. Бꙋ́детъ бо на́мъ крѣ́пость зако́нъ: и҆ ᲂу҆лови́мъ првⷣнаго, ꙗ҆́кѡ неꙋго́денъ на́мъ є҆́сть, и҆ проти́витсѧ дѣлѡ́мъ на́шымъ, и҆ поно́ситъ на́мъ ѿпаде́нїе зако́на, и҆ ѡ҆блича́етъ на́мъ согрѣшє́нїѧ наказа́нїѧ на́шегѡ. Возвѣща́етъ на́мъ ра́зꙋмъ и҆мѣ́ти бж҃їй, и҆ ѻ҆́трока гдⷭ҇нѧ себѐ и҆менꙋ́етъ. Бы́сть на́мъ на ѡ҆бличе́нїе помышле́нїємъ на́шымъ, и҆ тѧ́жекъ на́мъ є҆́сть, и҆ ви́димъ, ꙗ҆́кѡ неподо́бно и҆ны̑мъ житїѐ є҆гѡ̀, и҆ и҆змѣнє́ны стєзѝ є҆гѡ̀. Въ порꙋга́нїе вмѣни́хомсѧ є҆мꙋ̀, и҆ ᲂу҆далѧ́етсѧ ѿ пꙋте́й на́шихъ, ꙗ҆́кѡ ѿ нечистѡ́тъ, и҆ бл҃жи́тъ послѣ̑днѧѧ првⷣныхъ. Ѹ҆ви́димъ ѹ҆́бѡ, а҆́ще словеса̀ є҆гѡ̀ и҆́стинна сꙋ́ть, и҆скꙋ́симъ, ꙗ҆̀же сбыва́ютсѧ є҆мꙋ̀. Рꙋга́нїемъ и҆ мꙋ́кою и҆стѧ́жемъ є҆го̀: да разꙋмѣ́емъ кро́тость є҆гѡ̀, и҆ и҆скꙋ́симъ безѕло́бство є҆гѡ̀: сме́ртїю безꙿѡбра́зною ѡ҆сꙋ́димъ є҆го̀, бꙋ́детъ бо посѣще́нїе ѿ слове́съ є҆гѡ̀. Сїѧ̑ помы́слиша, и҆ прельсти́шасѧ: ѡ҆слѣпи́ бо ѧ҆̀ ѕло́ба и҆́хъ. и҆ не разꙋмѣ́ша та̑инъ бж҃їихъ, и҆ не разсꙋди́ша, ꙗ҆́кѡ ты̀ є҆сѝ бг҃ъ є҆ди́нъ, живота̀ и҆мѣ́ѧй и҆ сме́рти вла́сть, и҆ сп҃са́ѧй во вре́мѧ ско́рби, и҆ и҆збавлѧ́ѧй ѿ всѧ́кагѡ ѕла̀. Ще́дръ и҆ млⷭ҇тивъ, и҆ даѧ̀ прпⷣбнымъ свои̑мъ блгⷣть, и҆ свое́ю мы́шцею гѡ́рдымъ противлѧ́ѧсѧ.

На стїхо́внѣ стїхи̑ры, гла́съ д҃:

Иже ꙗ҆ви́выйсѧ въ вертогра́дѣ мрӏ́и, и҆ ѿгна́вый ѿ неѧ̀ рыда́нїе сле́зъ, то́й и҆ тебѣ̀ ꙗ҆влѧ́етсѧ въ вертогра́дѣ, и҆ повелѣва́етъ ѿве́рсти писа̑нїѧ и҆ честѝ: и҆ проче́тъ чꙋ́дный пꙋ́ть жи́зни показа́лъ є҆сѝ, є҆мꙋ́же и҆ на́мъ слѣ́довати помоли́сѧ хрⷭ҇тꙋ̀, да и҆ мы̀ ᲂу҆пра́влени бꙋ́демъ въ црⷭ҇тво нбⷭ҇ное.

Стӏ́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.

Ма́ти ᲂу҆̀бо твоѧ̀ ѕѣлѡ̀ пла́каше, є҆гда̀ ви́дѣ тѧ̀ погиба́юща, и҆ прилѣ́жнѡ молѧ́шесѧ, є҆́же спасти́сѧ тебѣ̀, и҆ не можа́ше пло́дъ таковы́хъ мл҃твъ поги́бнꙋти: тѣ́мже словесы̀ бжⷭ҇твенными ѡ҆гласи́всѧ, ѿ пꙋтѝ широ́кагѡ коне́чнѣ ᲂу҆страни́лсѧ є҆сѝ, и҆ пꙋте́мъ мона́шескимъ ше́ствꙋѧ, ст҃и́телей ве́рхъ показа́лсѧ є҆сѝ, и҆ ᲂу҆че́нїй бжⷭ҇твенныхъ сокро́вище, и҆ цѣвни́ца дх҃о́внаѧ, таи́нникъ догма́тѡвъ, и҆ цр҃кве хрⷭ҇то́вы похвала̀.

Стӏ́хъ: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ.

Сокро́вище собира́ѧ дх҃о́вное, мїрско́е тре́бꙋющымъ расточи́лъ є҆сѝ, и҆ ѡ҆блобыза́въ ра́бство свобо́дное, и҆́ноческїй чи́нъ воспрїѧ́лъ є҆сѝ, и҆ бы́лъ є҆сѝ ст҃и́телей ѡ҆́бразъ и҆ мона́шествꙋющихъ пра́вило, и҆ добродѣ́телей мѣ́ра, и҆ ча́ша любвѐ и҆спо́лнена, и҆ кро́тости ᲂу҆чи́тель и҆́стиннѣйшїй, а҆ѵгꙋстӏ́не ѻ҆́тче бл҃же́нне, молѝ ѡ҆ дꙋша́хъ на́шихъ.

Сла́ва, гла́съ є҃:

Ѳага́стъ твои́мъ рожде́нїемъ хва́литсѧ, но и҆ мада́ѵръ и҆ карѳаге́нъ тобо́ю велича́ютсѧ, ри́мъ же тобо́ю весели́тсѧ, но па́че тобо́ю медїола́нъ хва́литсѧ, ꙗ҆́кѡ въ не́мъ дх҃о́внѣ роди́лсѧ є҆сѝ, велича́йшаѧ же є҆па́рхїа і҆ппѡнӏ́йскаѧ и҆́мать тѧ̀ предсѣда́телѧ и҆ па́стырѧ до́бра, вселе́ннаѧ же всѧ̀ почита́етъ тѧ̀ ᲂу҆чи́телѧ чⷭ҇тна, и҆ вожда̀ крѣ́пка, и҆ мл҃твенника те́пла ѡ҆ дꙋша́хъ на́шихъ. И҆ ны́нѣ, бг҃оро́диченъ: Хра́мъ и҆ две́рь є҆сѝ:

Тропа́рь, гла́съ д҃:

Дне́сь вселе́ннаѧ ра́дꙋетсѧ, па́мѧть твою̀ пра́зднꙋющи, и҆ въ не́й восхвалѧ́етъ по́двиги твоѧ̑, и҆́миже трꙋди́лсѧ є҆сѝ, возвѣща́ютъ же любо́вь твою̀ ко хрⷭ҇тꙋ̀ дѣѧ̑нїѧ твоѧ̑: є҆́рєси бо попра́лъ є҆сѝ, и҆ манїхе́евꙋ ле́сть ѡ҆бличи́лъ є҆сѝ, и҆ бы́лъ є҆сѝ свѣти́льникъ цр҃кве, ст҃и́телю ѻ҆́тче а҆ѵгꙋстӏ́не, молѝ хрⷭ҇та̀ бг҃а, сп҃сти́сѧ дꙋша́мъ на́шымъ.

На бл҃гослове́нїи хлѣ́бѡвъ, тропа́рь ст҃а́гѡ, два́жды, Бцⷣе, дв҃о: є҆ди́ножды.

На ѹ҆́трени.

На Бг҃ъ гдⷭ҇ь: тропа́рь два́жды. Сла́ва, и҆ ны́нѣ, бг҃оро́диченъ.

По а҃-мъ стїхосло́вїи сѣда́ленъ, гла́съ д҃:

Собери́тесѧ, мона́хѡвъ мно́жєства, въ па́мѧть ст҃и́телѧ на́шегѡ, и҆ почти́мъ є҆го̀ пѣ́сньми чⷭ҇тны́ми, но па́че просла́вимъ є҆го̀ житїе́мъ на́шимъ, и҆́щетъ бо сп҃се́нїѧ ча́дъ свои́хъ, моле́бникъ те́плый ꙗ҆влѧ́ѧсѧ ѡ҆ чтꙋ́щихъ па́мѧть є҆гѡ̀: никто́же бо да ѿпаде́тъ ѿ ли́ка бл҃же́ннагѡ, никто́же да преда́стсѧ пꙋтѝ па́гꙋбномꙋ, никто́же да небреже́тъ сп҃се́нїѧ своегѡ̀: вси́ бо є҆смы̀ ча̑да ст҃и́телѧ бл҃же́ннагѡ.

Сла́ва, и҆ ны́нѣ, бг҃оро́диченъ:

Ка́кѡ досто́йнѡ воспою́ тѧ, ка́кѡ прославлѧ́ю тѧ̀, влⷣчце на́ша, недоꙋмѣ́юсѧ и҆ ᲂу҆жаса́юсѧ, страшꙋ́сѧ дерзнове́нїѧ, но бою́сѧ и҆ молча́нїѧ, ѻ҆҆ба́че прїимѝ ѻ҆҆бы́чнымъ млⷭ҇рдїемъ твои́мъ похвалꙋ̀ на́шꙋ, и҆ низпослѝ бога́тꙋю млⷭ҇ть пѣвцє́мъ твои̑мъ.

По в҃-мъ стїхосло́вїи сѣда́ленъ, гла́съ а҃:

Вѣтӏ́ю дх҃о́внаго, правосла́вїѧ наста́вника, ст҃и́телѧ а҆ѵгꙋстӏ́на всѝ восхва́лимъ, то́й бо є҆́рєси поразѝ, и҆ ста́до хрⷭ҇то́во до́брѣ ᲂу҆пасѐ, то́й бо и҆ лю́ди безчи́слєны приведѐ во ѻ҆би́тєли нбⷭ҇ныѧ, то́й бо и҆ ны́нѣ то́читъ и҆сцѣлє́нїѧ вѣ́рою соверша́ющымъ па́мѧть є҆гѡ̀.

Сла́ва, и҆ ны́нѣ, бг҃оро́диченъ:

Гаврїи́лъ ᲂу҆̀бо а҆рха́гг҃лъ принесѣ̀ тѝ: ра́дꙋйсѧ! мы́ же, земнӏ́и, что́ ти принесе́мъ; пѣ́снь досто́йнꙋю ка́кѡ воспои́мъ; ка́кѡ похва́лимъ, ка́кѡ просла́вимъ, ко́е бл҃годаре́нїе принесе́мъ; ѻ҆҆ба́че, по глаго́лꙋ твоемꙋ̀, ᲂу҆бл҃жа́юще вопїе́мъ тѝ: ра́дꙋйсѧ, блгⷣтнаѧ, гдⷭ҇ь съ тобо́ю.

Полѷеле́й, и҆ велича́нїе:

Велича́емъ тѧ̀, ст҃и́телю ѻ҆́тче а҆ѵгꙋстӏ́не, и҆ чти́мъ ст҃ꙋ́ю па́мѧть твою̀, ты́ бо мо́лиши за на́съ хрⷭ҇та̀ бг҃а на́шего. Ѱало́мъ и҆збра́нный:

Оу҆слы́шите сїѧ̑, всѝ ꙗ҆зы́цы, внꙋши́те, всѝ живꙋ́щїи по вселе́ннѣй.

По полѷеле́и сѣда́ленъ, гла́съ г҃. Подо́бенъ: Красотѣ̀ дв҃ства:

Красотꙋ̀ нбⷭ҇нꙋю зрѧ̀, и҆ земнꙋ́ю добро́тꙋ созерца́ѧ, прилѣпи́лсѧ є҆сѝ всѣ́мъ срⷣцемъ къ творцꙋ̀ всѧ́ческихъ, и҆ всѧ̑ небре́гъ, є҆го̀ є҆ди́наго возжелѣ́лъ є҆сѝ: тѣ́мже расточи́въ и҆мѣ̑нїѧ твоѧ̑ ни́щымъ, бога́тство дх҃о́вное стѧжа́лъ є҆сѝ, и҆ бы́лъ є҆сѝ и҆́нокъ и҆скꙋ́сенъ, вкꙋ́пѣ и҆ ст҃и́тель, и҆ сокро́вище догма́тѡвъ вели́кое. Сла́ва, и҆ ны́нѣ, бг҃оро́диченъ:

Тѧ̀ и҆зба́вльшꙋю ѿ клѧ́твы пра́ѻтца, и҆ приве́дшꙋю въ ра́й человѣ́чество, воспѣва́емъ всѝ, бцⷣе дв҃о, и҆ мо́лимъ тѧ̀ при́снѡ, рабѝ твоѝ: молѝ всеще́драго бг҃а, прегрѣше́нїй ѡ҆ставле́нїе дарова́ти, и҆ млⷭ҇рдїемъ свои́мъ сп҃сти́ ны, на тѧ̀ надѣ́ющихсѧ, препѣ́таѧ дв҃о.

Та́же степє́нна, а҃-й а҆нтїфѡ́нъ д҃-гѡ гла́са.

Прокӏ́менъ, гла́съ д҃: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе срⷣца моегѡ̀ ра́зꙋмъ. Стӏ́хъ: Оу҆слы́шите сїѧ̑, всѝ ꙗ҆зы́цы, внꙋши́те,

всѝ живꙋ́щїи по вселе́ннѣй. Є҆ѵⷢ҇лїе ѿ і҆ѡа́нна, зача́ло л҃ѕ.

По н҃-мъ ѱалмѣ̀: Мл҃твами ст҃а́гѡ а҆ѵгꙋстӏ́на:

Та́же стїхи́ра, гла́съ ѕ҃:

Прїиди́те, ст҃и́телѧ па́мѧть почти́мъ, вопїю́ще є҆мꙋ̀ вѣ́рнѡ: ѻ҆́тче ст҃и́телю а҆ѵгꙋстӏ́не, цр҃кве вели́каѧ похвало̀, наста́вниче вселе́нныѧ ди́вный, ᲂу҆чи́телю мона́хѡвъ и҆́стиннѣйшїй, ты̀ и҆ ны́нѣ предстоѧ́й прⷭ҇то́лꙋ гдⷭ҇а, назира́й ны̀, ча̑да твоѧ̑, и҆ не ѡ҆ста́ви на́съ, лю́бѧщихъ тѧ̀, но возопӏ́й проти́вꙋ борю́щымъ ны̀: а҆́зъ є҆́смь съ ва́ми, и҆ никто́же на вы̀.

Канѡ́нъ бцⷣѣ со і҆рмосо́мъ на ѕ҃: Во́дꙋ проше́дъ: и҆ ст҃и́телю а҆ѵгꙋстӏ́нꙋ на и҃,

є҆гѡ́же краегране́сїе: Ст҃и́телю а҆ѵгꙋстӏ́нꙋ канѡ́нъ приноша́емъ.

Гла́съ д҃. Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Ст҃и́телю бл҃же́нне, дне́сь соверша́ющихъ твоѐ торжество̀, помѧнѝ во ст҃ы́хъ твои́хъ мл҃твахъ, да и҆ мы̀ про́чее ѿложи́мъ мїрско́е попече́нїе и҆ па́гꙋбный пꙋ́ть, и҆ напра́вимъ стѡпы̀ на́шѧ въ црⷭ҇твїе бж҃їе.

Вели́чїѧ носѧ̀ и҆́мѧ, вели́чїе прест҃ы́ѧ трⷪ҇цы ꙗ҆́снѡ въ дꙋшѝ твое́й запечатлѣ́лъ є҆сѝ, є҆ѧ́же и҆ сокрове́ннꙋю та́йнꙋ, є҆ли́кѡ мо́щно є҆́сть, простра́ннѡ и҆зꙿѧсни́лъ є҆сѝ, ю҆́же молѝ вели́кое мно́жество грѣхѡ́въ на́шихъ презрѣ́ти.

Ꙗ҆̀же ᲂу҆мꙋ̀ тлѣ́нномꙋ непристꙋ̑пна, то̀ вѣ́рою прини́къ, ꙗ҆́снѡ проповѣ́далъ є҆сѝ, ѻ҆́тче а҆ѵгꙋстӏ́не, и҆ во всѧ̑ концы̀ вселе́нныѧ возгремѣ́лъ є҆сѝ, вели́чїе догма́тѡвъ и҆звѣствꙋ́ѧ, просѝ и҆ на́мъ, чтꙋ́щымъ тѧ̀, просвѣще́нїѧ дх҃о́внагѡ и҆ ве́лїѧ млⷭ҇ти.

Бг҃оро́диченъ: Тѧ̀ воспѣва́емъ, приснодв҃о, ро́да на́шегѡ похвалꙋ̀, тобо́ю бо бг҃ъ прише́дъ, всели́сѧ въ ны̀, да сп҃се́тъ ѿ грѣхѡ́въ человѣ́ка, и҆ сп҃съ, просла́витъ бж҃ество́мъ свои́мъ, и҆ ѡ҆божи́тъ да́ромъ блгⷣти своеѧ̀. Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бжⷭ҇твеннѣй твое́й сла́вѣ, вѣнцє́въ сла́вы сподо́би.

І҆ппѡ́нъ и҆мѣ̀ тѧ̀ свѣти́льника чⷭ҇тна, но ны́нѣ всѧ̀ вселе́ннаѧ красꙋ́етсѧ въ па́мѧти твое́й, Ѽ а҆ѵгꙋстӏ́не: бы́лъ бо є҆сѝ правосла́вїѧ тверды́нѧ и҆ цр҃кве ᲂу҆твержде́нїе, прави́ло жи́зни и҆ зако́нъ добродѣ́тели чⷭ҇тнѣ́йшїй.

Твоѧ̑ ᲂу҆ста̀ не покры̀ хода́тай забве́нїѧ гро́бъ: ᲂу҆молча̀ і҆ппѡ́нъ, но вѣща́етъ всѧ̀ вселе́ннаѧ твоѧ̑ и҆справлє́нїѧ и҆ борє́нїѧ, воспѣва́етъ трꙋды̀, и҆́миже трꙋди́лсѧ є҆сѝ, ᲂу҆ча̀ и҆ наказꙋ́ѧ, и҆ предлага́ѧ бжⷭ҇твєннаѧ ᲂу҆чє́нїѧ, и҆́миже напое́нъ бы́лъ є҆сѝ.

Є҆гда̀ на́йде на тѧ̀ бжⷭ҇твенное раче́нїе, ст҃и́телю, тогда̀ всѧ̑ мїрска̑ѧ ѿве́рглъ є҆сѝ, и҆ разда́въ тлѣ́нное бога́тство, сокро́вище стѧжа́лъ є҆сѝ, є҆́же на нб҃сѣ́хъ, и҆ ѡ҆ста́вивъ всѧ̑ сро́дники своѧ̑, а҆́гг҃лѡвъ ли́ки смоле́бники прїѧ́лъ є҆сѝ.

Бг҃оро́диченъ: Любо́вїю чтꙋ́ще, ᲂу҆бл҃жа́емъ тѧ̀, мт҃и бж҃їѧ, цвѣ́те прекра́сный нетлѣ́ннагѡ раѧ̀, вѣ́нче неꙋвѧда́емый цѣломꙋ́дрїѧ, прⷭ҇то́ле вели́кїй вседержи́телѧ, сла́во ро́да хрⷭ҇тїа́нскагѡ, и҆ а҆́гг҃лѡвъ вели́кое ᲂу҆дивле́нїе.

Сѣда́ленъ, гла́съ и҃:

Премꙋ́дрости бжⷭ҇твенныѧ и҆спо́лненъ, ᲂу҆чє́нїѧ чⷭ҇тна̑ѧ цр҃кви возвѣсти́лъ є҆сѝ, догма́тѡвъ предложи́въ и҆справлє́нїѧ, писа́нїе бжⷭ҇твенное и҆злага́ѧ, ст҃ы́хъ па̑мѧти словесы̀ почита́ѧ, мона́шествꙋющымъ пра́вило начерта́ѧ и҆ житїе́мъ, и҆ писа́нїемъ: ѿню́дꙋже и҆ возше́дъ на высотꙋ̀ бг҃осло́вїѧ, и҆ ꙗ҆́коже мѡѷсе́й, ᲂу҆да́ривъ же́злїемъ бжⷭ҇твенныѧ любвѐ, въ сокрове́нный и҆ непристꙋ́пный ка́мень бг҃осло́вїѧ, сотвори́лъ є҆сѝ потещѝ и҆сто́чникъ воды̀, текꙋ́щїй въ живо́тъ вѣ́чный, и҆́мже ѻ҆би́льнѡ напои́лъ є҆сѝ лю́ди жа́ждꙋщыѧ. тѣ́мже и҆ мы̀ вопїе́мъ тебѣ̀: ѻ҆́тче ст҃и́телю а҆ѵгꙋстӏ́не, молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти, любо́вїю чтꙋ́щымъ ст҃ꙋ́ю па́мѧть твою̀.

Сла́ва, и҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀, безꙿ сѣ́мене ро́ждшꙋю бг҃а пло́тїю, всѝ ᲂу҆бл҃жа́емъ, ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ, а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти, покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.

Ю҆рѡ́дивыѧ и҆ бꙋ̑їѧ манїхє́и ѡ҆бличи́лъ є҆сѝ, и҆ ᲂу҆чє́нїѧ и҆́хъ лє́стнаѧ, ꙗ҆́кѡ пра́хъ, возвѣ́ѧлъ є҆сѝ, вѣ́тромъ ᲂу҆че́нїй твои́хъ бжⷭ҇твенныхъ, и҆ пела́гїевꙋ горды́ню низри́нꙋлъ є҆сѝ, и҆ донатӏ́стѡвъ собо́ръ къ правосла́внѣй вѣ́рѣ приве́лъ є҆сѝ, а҆ѵгꙋстӏ́не.

А҆́ще и҆ пла́каше бл҃же́ннаѧ мо́нїка, ви́дѧщи тѧ̀ ѿ пꙋтѝ првⷣна заблꙋжда́юща, но мл҃тва є҆ѧ̀ не всꙋ́е приноша́шесѧ, и҆ прⷪ҇ро́чествова ᲂу҆̀бо є҆пӏ́скопъ бл҃же́нный, глаго́лѧ є҆́й: не мо́жетъ пло́дъ таковы́хъ мл҃твъ поги́бнꙋти, ст҃и́телѧ чⷭ҇тна тѧ̀ назна́менꙋѧ.

Вале́рїй є҆пӏ́скопъ є҆пӏ́скопа тѧ̀ поставлѧ́етъ, и҆ ꙗ҆́кѡ сы́на себѣ̀ вмѣнѧ́етъ тѧ̀: є҆мꙋ́же ᲂу҆ме́ршꙋ, предсѣда́тельство і҆ппѡнӏ́йское прїѧ́лъ є҆сѝ, три́десѧть и҆ пѧ́ть лѣ́тъ трꙋжда́ѧсѧ нелѣ́ностнѡ, ᲂу҆ча̀ и҆ наказꙋ́ѧ, и҆ себѐ ꙗ҆́кѡ ѡ҆́бразъ всѣ̑мъ предлага́ѧ добродѣ́тели.

Бг҃оро́диченъ: Гдⷭ҇оимени́таѧ влⷣчце на́ша, пречⷭ҇таѧ приснодв҃о, въ ча́съ ѡ҆бстоѧ́нїй ᲂу҆слы́ши ны̀ и҆ сп҃сѝ, прилѣ́жнѡ молѧ́щисѧ ѡ҆ на́съ со ст҃и́телемъ, въ ча́съ сꙋ́дный поми́ловати ны̀, и҆ здѣ̀ ѿ разли́чныхъ ѡ҆бстоѧ́нїй ско́рѡ и҆зба́вити. Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надꙿ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Оу҆слы́ша бг҃ъ мл҃твꙋ твою̀, ст҃и́телю, и҆ пре́жде плѣне́нїѧ гра́да твоегѡ̀ ѿ ва̑рваръ, къ себѣ̀ восхища́етъ тѧ̀, да́рꙋѧ тѝ вѣне́цъ сла́вы, ꙗ҆́кѡ па́стырю до́бромꙋ, ꙗ҆́кѡ дѣ́лателю до́брꙋ вїногра́да хрⷭ҇то́ва, ꙗ҆́кѡ рабꙋ̀ вѣ́рнꙋ, и҆́же тала́нтъ господи́на своегѡ̀ до́брѣ ᲂу҆мно́жи.

Сщ҃е́нное писа́нїе и҆злага́ѧ та́инственнѡ, і҆ѡа́нново є҆ѵⷢ҇лїе и҆ посла́нїе пе́рвое па́че возлюби́лъ є҆сѝ, но и҆ про́повѣдь наго́рнꙋю ꙗ҆́снѡ и҆звѣсти́лъ є҆сѝ, и҆ ѱалмы̀ дв҃да ᲂу҆ѧсни́лъ є҆сѝ твои́ми сщ҃е́нными толкова̑нїи, ѻ҆́тче бг҃омꙋ́дре.

Та́йнꙋ любвѐ позна́въ бж҃їѧ, глаго́лалъ є҆сѝ: не найтѝ дꙋ́хꙋ ᲂу҆покое́нїѧ, до́ндеже ѡ҆брѧ́щетъ ᲂу҆покое́нїе ᲂу҆ бг҃а, созда́вшагѡ є҆го̀: є҆́же и҆ ѡ҆брѣ́тъ, помоли́сѧ ѡ҆ на́съ, и҆ на́мъ ѡ҆брѣстѝ поко́й ѻ҆́ный, и҆̀же въ земны́хъ ве́щехъ вла́ємымъ.

Бг҃оро́диченъ: И҆́же прибѣга́етъ ко кро́вꙋ твоемꙋ̀, Ѽ влⷣчце, ско́рое ѡ҆брѣта́етъ ᲂу҆покое́нїе ѿ грѣхѡ́въ и҆ жите́йскихъ ѡ҆бстоѧ́нїй, тѣ́мже и҆ на́мъ, прибѣга́ющымъ тѝ, да́рꙋй покро́въ тво́й чⷭ҇тны́й, помо́щнице хрⷭ҇тїа́нъ те́плаѧ. Пѣ́снь ѕ҃.

І҆рмо́съ: Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃омт҃ре, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Наказꙋ́ѧ трѝ дни̑ є҆пӏ́скопы, ѿпа́дшыѧ ѿ вѣ́ры правосла́вныѧ, бжⷭ҇твенными твои́ми вѣща̑нїи просвѣти́лъ є҆сѝ: тѣ́мже ѿтри́нꙋвше ᲂу҆че́нїе ле́стное, правосла́вїе ѡ҆блобыза́вше ᲂу҆се́рднѡ, тѧ̀ ꙗ҆́кѡ вожда̀ сп҃се́нныхъ показа́ша.

Оу҆чи́лъ є҆сѝ дѣ́вство смире́нное почита́ти и҆ ѡ҆блобыза́ти, но и҆ бра́къ ᲂу҆̀бо чⷭ҇тны́й велича́лъ є҆сѝ, и҆ вдовство̀ почита́ти всѧ́чески наꙋча́лъ є҆сѝ: ѡ҆ воздержа́нїи же всѧ́чески пе́клсѧ є҆сѝ, ᲂу҆ча̀ твоѧ̑ ᲂу҆ченикѝ семꙋ̀ слѣ́довати, си́мъ сп҃са́тисѧ, ѻ҆́тче требл҃же́нне.

Карѳаге́нъ хва́литсѧ ю҆́ностїю твое́ю, ѳага́стъ же дѣ́тствомъ, ри́мъ ᲂу҆че́нїемъ твои́мъ, медїола́нъ покаѧ́нїемъ твои́мъ, но па́че всѣ́хъ і҆ппѡнӏ́йскїй гра́дъ прославлѧ́етсѧ тобо́ю, ꙗ҆́кѡ па́стыремъ бл҃же́ннымъ и҆ предсѣда́телемъ чⷭ҇тны́мъ.

Бг҃оро́диченъ: А҆рха́гг҃лъ гаврїи́лъ, предста́въ дв҃ѣ въ назаре́тѣ, возвѣстѝ та́йнꙋ всемӏ́рнꙋ, ꙗ҆́кѡ бг҃ъ хо́щетъ ѿ жены̀ роди́тисѧ, да ѡ҆божи́тъ человѣ́ки: тѣ́мже тѧ̀, ꙗ҆́кѡ винꙋ̀ сп҃се́нїѧ на́шегѡ, при́снѡ съ любо́вїю велича́емъ.

Конда́къ, гла́съ в҃:

Бг҃осло́ве ст҃и́телю, цр҃кве хрⷭ҇то́вы похвало̀, наста́вниче бл҃гоче́стїѧ, и҆ вѣ́ры правосла́вныѧ ᲂу҆твержде́нїе, и҆скорени́телю є҆ресе́й, ᲂу҆че́нїй та́инственныхъ сокро́вище, а҆ѵгꙋстӏ́не ѻ҆́тче бл҃же́нне, ст҃и́телю преди́вне, молѝ при́снѡ ѡ҆ всѣ́хъ на́съ.

І҆́косъ: Просвѣтѝ моѧ̑ тє́мныѧ зѣ̑ницы срⷣца, ст҃и́телю, и҆ наꙋчѝ досто́йнѡ воспѣ́ти па́мѧть твою̀, и҆ восхвали́ти чꙋ́дное житїѐ твоѐ, є҆́же ꙗ҆́кѡ а҆́гг҃лъ пожи́лъ є҆сѝ. наꙋчѝ воспрїѧ́ти дꙋше́ю ᲂу҆чє́нїѧ твоѧ̑, и҆ наста́ви мѧ̀ пꙋте́мъ добродѣ́тели ше́ствовати, и҆ никогда́же ѿлꙋча́тисѧ ѿ пꙋтѝ, ведꙋ́щагѡ въ жи́знь вѣ́чнꙋю: покажи́ ми, что́ ми подоба́етъ мы́слити, глаго́лати, твори́ти: свѧжѝ рꙋ́цѣ и҆ но́зѣ моѝ стра́хомъ бж҃їимъ, подви́гни мѧ̀ къ любвѝ хрⷭ҇то́вой при́снѡ зрѣ́ти, и҆ не прельща́тисѧ тлѣ́нными мӏ́ра сегѡ̀ красота́ми, но ᲂу҆крѣпѝ бꙋ́дꙋщихъ нелѣ́ностнѡ и҆ска́ти, и҆ молѝ при́снѡ ѡ҆ всѣ́хъ на́съ.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи, па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.

Никто́же та́кѡ и҆сповѣ́да грѣхѝ своѧ̑, никто́же и҆ любо́вь та́кѡ ко гдⷭ҇ꙋ возвѣстѝ свою̀, ꙗ҆́коже ты̀, ст҃и́телю: люблю̀ бг҃а моего̀, всѧ̑ же и҆на̑ѧ ꙗ҆́кѡ пра́хъ вмѣнѧ́ю, є҆го̀ є҆ди́наго и҆щꙋ̀, є҆мꙋ̀ є҆ди́номꙋ прилѣпи́тисѧ хощꙋ̀, глаго́лалъ є҆сѝ.

Ѡ҆́бразъ бы́лъ є҆сѝ твои̑мъ ᲂу҆ченикѡ́мъ, ѻ҆́тче, и҆ прїѧ́въ є҆пӏ́скопство чⷭ҇тно́е, въ по́двизѣхъ не ѡ҆слабѣ́лъ є҆сѝ и҆́ноческихъ, но па́че прилѣжа́лъ є҆сѝ, подвиза́ѧсѧ въ по́двизѣхъ и҆ бдѣ́нїихъ, поще́нїихъ и҆ трꙋдѣ́хъ, до́ндеже па́че а҆́гг҃лъ, а҆ не человѣ́къ бы́лъ є҆сѝ.

Ника́кѡ смꙋща́тисѧ дре́внѧгѡ ри́ма паде́нїю наꙋча́лъ є҆сѝ, ст҃и́телю: гра́дъ бж҃їй, цр҃ковь хрⷭ҇то́ва, не паде́тъ во вѣ́ки, є҆ѧ́же догма́ты простра́ннѡ и҆зꙿѧсни́лъ є҆сѝ, и҆ є҆ѧ̀ ча̑да бы́ти ᲂу҆се́рднѡ призыва́лъ є҆сѝ всѧ̑ лю́ди, вѣ̑рныѧ же и҆ невѣ̑рныѧ.

Бг҃оро́диченъ: Паде́сѧ а҆да́мъ, є҆́ѵинъ совѣ́тъ воспрїѧ́въ во ѹ҆́ши, но тобо́ю сп҃се́нъ, Ѽ ѻ҆трокови́це, при́снѡ воспѣва́етъ тѝ ра́достнѡ: ра́дꙋйсѧ, ро́да на́шегѡ воззва́нїе, ра́дꙋйсѧ, сокрꙋше́нїе ѕмӏ́ѧ, ра́дꙋйсѧ, є҆́ѵино и҆справле́нїе преди́вное.

Пѣ́снь и҃.

І҆рмо́съ: Ѻ҆́троки бл҃гочєсти́выѧ въ пещѝ ржⷭ҇тво̀ бг҃оро́дичо сп҃сло̀ є҆́сть: тогда̀ ѹ҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Ра́дꙋйсѧ, ѻ҆́тче, послꙋ́шалъ є҆сѝ бжⷭ҇твєннаѧ словеса̀ а҆мвро́сїа вели́кагѡ, и҆́же тѧ̀ наста́ви и҆ наꙋчѝ, ше́ствовати до́брый пꙋ́ть показа́въ. Ѽ ма́тере чⷭ҇тны́ѧ досто́йный пло́де, Ѽ ᲂу҆чи́телѧ вели́кагѡ велича́йшїй ᲂу҆ченичѐ: молѝ ѡ҆ дꙋша́хъ на́шихъ, а҆ѵгꙋстӏ́не.

И҆́же пре́жде сп҃сы́й па́ѵла на пꙋтѝ дама́сцѣмъ, то́й же посла́нїемъ тогѡ̀ тѧ̀ ᲂу҆ловлѧ́етъ, глаго́лѧй: возьмѝ и҆ чтѝ: и҆ проче́тъ, всѧ̑ мїрска̑ѧ ꙗ҆́кѡ ᲂу҆ме́ты вмѣни́лъ є҆сѝ, хрⷭ҇та́ же, гдⷭ҇а на́шего, ѡ҆брѣ́тъ, ꙗ҆́кѡ би́серъ чⷭ҇тнѣ́йшїй, є҆мꙋ̀ невозвра́тною любо́вїю прилѣпи́лсѧ є҆сѝ.

Наꙋча́лъ є҆сѝ млⷭ҇тыни соверша́тисѧ въ подаѧ́нїи тре́бꙋющымъ, и҆ въ проще́нїи ѡ҆би́дѧщымъ, и҆ са́мъ бы́лъ є҆сѝ бл҃гӏ́й наста́вникъ семꙋ̀: всѧ̑ бо, ꙗ҆̀же и҆мѣ́лъ є҆сѝ, ни́щымъ расточи́въ, кро́тость стѧжа́лъ є҆сѝ ѻ҆би́льнꙋ, ю҆́же кто̀ и҆зочте́тъ; и҆ любо́вь твою̀ кто̀ ѿ земны́хъ досто́йнѡ возвѣсти́тъ;

Бг҃оро́диченъ: Ѽ мт҃и бж҃їѧ, всѣ́хъ бл҃ги́хъ вина̀, млⷭ҇рдꙋеши ѡ҆ на́съ, въ бѣ́дствїи сꙋ́щихъ, и҆ всѣ̑мъ твори́ши сп҃сти́сѧ, любо́вїю чтꙋ́щымъ тѧ̀: предста́ни на́мъ, въ бѣ́дствїѧхъ сꙋ́щымъ, возьмѝ и҆́го на́ше грѣхо́вное, и҆ сп҃сѝ на́съ, дв҃о всепѣ́таѧ. Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Ше́ствꙋѧ пꙋте́мъ добродѣ́тели, взыва́лъ є҆сѝ къ соше́ственникѡмъ твои̑мъ, никогда́же ѡ҆станови́тисѧ, глаго́лѧ: рцы̀, довлѣ́етъ, и҆ поги́блъ є҆сѝ. но и҆ на́съ, ᲂу҆ченикѡ́въ твои́хъ, ѻ҆́тче, ᲂу҆крѣпѝ доброше́ствовати пꙋ́ть сп҃си́тельный въ црⷭ҇тво нбⷭ҇ное.

А҆ѵгꙋстӏ́не, ст҃и́телю чⷭ҇тны́й, свѣти́льниче вселе́нскїй, наста́вниче преди́вный, на́съ, соверша́ющихъ дне́сь ст҃о́е твоѐ торжество̀, ᲂу҆крѣпѝ на стра̑сти, помозѝ въ бѣ́дствїѧхъ, наста́ви на добродѣ́тель, и҆ моли́сѧ гдⷭ҇ꙋ, дарова́ти на́мъ дꙋшѝ сп҃се́нїе.

Є҆гда̀ мо́лимсѧ тебѣ̀, ст҃и́телю, при́зри на ны̀ съ высоты̀ нбⷭ҇ныѧ, и҆ млⷭ҇тивнѡ посѣтѝ: ви́диши бо ѕло̀, невѣ́рїе и҆ волне́нїе мо́рѧ жите́йскагѡ, слы́шиши бо во́пли церкве́й разоре́нныхъ, помозѝ на́мъ, немощны̑мъ, и҆́маши бо дерзнове́нїе ко гдⷭ҇ꙋ, ꙗ҆́кѡ ст҃и́тель чⷭ҇тенъ.

Бг҃оро́диченъ: Мт҃и вседержи́телѧ, чⷭ҇таѧ приснодв҃о, врата̀ жи́зни на́мъ ѿве́рзшаѧ, при́зри на ны̀, и҆ покры́й чⷭ҇тны́мъ твои́мъ покро́вомъ, застꙋпѝ, Ѽ влⷣчце, немощна̑ѧ ча̑да твоѧ̑, на тѧ́ бо надѣ́емсѧ, и҆ тобо́ю хва́лимсѧ при́снѡ.

Свѣти́ленъ:

А҆ѵгꙋстӏ́на ст҃и́телѧ, прїиди́те, при́снѡ всѝ ᲂу҆бл҃жи́мъ, ꙗ҆́кѡ па́стырѧ до́бра, ꙗ҆́кѡ наста́вника мꙋ́дра, ꙗ҆́кѡ свѣти́льника правосла́вныѧ на́шеѧ вѣ́ры, ꙗ҆́кѡ мл҃твенника ѡ҆ дꙋша́хъ на́шихъ.

Сла́ва, и҆ ны́нѣ:

Дв҃о, хрⷭ҇тїа́нъ похвало̀, защи́тнице ѡ҆ѕло́бленныхъ, немощны́хъ ᲂу҆крѣпле́нїе и҆ и҆сцѣле́нїе, ѡ҆бремене́нныхъ грѣхи̑ ско́раѧ и҆зба́вительнице, сп҃сѝ на́съ, ᲂу҆пова́ющихъ на тѧ̀.

На хвали́техъ стїхи̑ры на д҃, гла́съ и҃.

Подо́бенъ: Что́ вы нарече́мъ;

Что́ тѧ нарече́мъ, ст҃и́телю;* і҆ппѡнӏ́йскагѡ ли гра́да ᲂу҆краше́нїе;* но всеѧ̀ вселе́нныѧ є҆сѝ похвала̀.* человѣ́ка ли чⷭ҇тна; но а҆́гг҃лъ житїе́мъ бы́лъ є҆сѝ.* свѣти́льника ли свѣ́тла; но свѣ́тъ тво́й никогда́же ᲂу҆гасѣ̀.* ᲂу҆ста́ ли бг҃овѣща̑ннаѧ; но не затворѝ ѧ҆̀ хода́тай забве́нїѧ гро́бъ.* вели́каѧ твоѧ̀ добродѣ́тель, вели́ки и҆ вѣнцы̀, и҆́миже вѣнча́ тѧ хрⷭ҇то́съ:* молѝ сп҃сти́сѧ дꙋша́мъ на́шымъ.

Что́ тѧ ны́нѣ, а҆ѵгꙋстӏ́не, провѣща́емъ;* ст҃и́телѧ ли вели́каго, и҆лѝ сла́вꙋ мона́шествꙋющихъ;* па́стырѧ ли и҆зрѧ́дна, и҆лѝ по́стникѡвъ похвалꙋ̀;* є҆ресе́й ли дерзнове́нна ѡ҆бличи́телѧ, и҆лѝ кро́тости наста́вника и҆́стинна;* добродѣ́телей ли начерта́нїе, и҆лѝ покаѧ́нїѧ пра́вило;* любомꙋ́дрїѧ ли рачи́телѧ, и҆лѝ ѿше́льникѡвъ сла́вꙋ;* ни́щихъ ли люби́телѧ и҆зрѧ́дна, и҆лѝ всѧ̑ мїрска̑ѧ коне́чнѣ ѡ҆ста́вльша;* мона́шествꙋющихъ красото̀, ст҃и́телей ᲂу҆краше́нїе,* наста́вниче любомꙋ́дрїѧ,* молѝ сп҃сти́сѧ дꙋша́мъ на́шымъ.

Что́ тѧ ны́нѣ, а҆ѵгꙋстӏ́не, и҆менꙋ́емъ;* а҆мвро́сїа ли вели́кагѡ возлю́бленна ᲂу҆ченика̀;* но глꙋбина́ми бг҃осло́вїѧ превозше́лъ є҆сѝ є҆го̀.* вале́рїа ли ди́внагѡ прее́мника;* но па́че негѡ̀ просвѣти́лсѧ є҆сѝ.* мо́нїки ли ст҃ы́ѧ ст҃ы́й пло́дъ; но па́че є҆ѧ̀ ѡ҆ст҃и́лсѧ є҆сѝ,* и҆ возше́дъ на высотꙋ̀ нбⷭ҇нꙋю, ра́дости вѣ́чныѧ вкꙋси́лъ є҆сѝ:* молѝ сп҃сти́сѧ дꙋша́мъ на́шымъ.

Гра́дъ бж҃їй и҆звѣствꙋ́ѧ, є҆гѡ́же граждани́нъ вели́кїй бы́лъ є҆сѝ,* и҆ сказа́тель неизрече́нныхъ бж҃їихъ та́инъ,* цр҃кви правосла̑вныѧ ᲂу҆тверди́лъ є҆сѝ,* наказꙋ́ѧ и҆ ᲂу҆ча̀ твои́ми дѣѧ̑нїи и҆ словесы̀,* и҆ ны́нѣ, ꙗ҆́кѡ со́лнце на за́падъ заше́дъ,* просвѣща́еши на́съ писа́ньми твои́ми,* ᲂу҆ча̀ на́съ блгⷣти хрⷭ҇то́вы и҆ска́ти, и҆ не мꙋ́дрствовати себѐ̀ вели́ки,* но па́че дх҃омъ и҆сполнѧ́тисѧ, є҆гѡ́же дохнове́нїю ѻ҆би́льнѡ причасти́лсѧ є҆сѝ,* и҆ бы́лъ є҆сѝ таи́нникъ бг҃осло́вїѧ:* молѝ сп҃сти́сѧ дꙋша́мъ на́шымъ. Сла́ва, гла́съ ѕ҃:

Кто̀ по достоѧ́нїю воспое́тъ трꙋды̀ твоѧ̑, и҆́миже трꙋди́лсѧ є҆сѝ во все́й цр҃кви, є҆́рєси безбѡ́жныѧ ѿсѣка́ѧ мече́мъ и҆справле́нїй твои́хъ, а҆рїа́ны ѡ҆блича́ѧ, манїхє́и низлага́ѧ, донатӏ́сты пребыва́ти въ вѣ́рѣ правосла́внѣй ᲂу҆вѣща́ѧ, пела́гїа де́рзость сокрꙋша́ѧ, и҆ правосла́вїе насажда́ѧ, до́ндеже мнѡ́га ча̑да собра́лъ є҆сѝ во ѻ҆би́тєли цр҃кѡ́вныѧ, и҆ наставлѧ́ѧ и҆̀хъ и҆ пꙋтево́дствꙋѧ, во ѻ҆би́тєли нбⷭ҇ныѧ вве́лъ є҆сѝ. соберѝ и҆ на́съ, расточе́нныхъ лю́тѡ, и҆ приведѝ ко хрⷭ҇тꙋ̀ бг҃ꙋ на́шемꙋ, молѧ̀ є҆го̀ при́снѡ, сп҃сти́сѧ дꙋша́мъ на́шымъ.

И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:

Славосло́вїе вели́кое. Є҆ктєнїѝ, и҆ ѿпꙋ́стъ. На лїтꙋргӏ́и слꙋ́жба всѧ̀ ст҃и́телѧ.