Мѣ́сѧца і҆ꙋ́лїа въ к҃з-й де́нь.

Слꙋ́жба ст҃о́мꙋ великомч҃никꙋ и҆ цѣли́телю пантелеи́монꙋ.

На ма́лѣй вече́рни.

На Гдⷭ҇и, воззва́хъ: стїхи̑ры на д҃, гла́съ а҃:

Стеце́мсѧ вѣ́рою и҆ любо́вїю, и҆ по до́лгꙋ восхва́лимъ стра́стоте́рпца пантелеи́мона, ю҆́ности ѡ҆бꙋзда́телѧ, въ ста́рости же́злъ, въ болѣ́знехъ застꙋ́пника, безсре́бреника цѣли́телѧ, ни́щихъ ѡ҆богати́телѧ, въ бл҃гоше́ствїихъ до́браго води́телѧ, въ мо́ри ко́рмчїѧ, во́инѡвъ побо́рника тве́рдаго. молѧ́щесѧ си́це рце́мъ: Ѽ пресла́вне великомч҃ниче пантелеи́моне, предварѝ и҆ и҆змѝ ѿ всѧ́кїѧ нꙋ́жды и҆ болѣ́зни, и҆ сп҃сѝ притека́ющыѧ къ тебѣ̀, мл҃твами твои́ми.

Страстоте́рпче пантелеи́моне прехва́льне, ѿ хрⷭ҇то́вы любвѐ ни ѻ҆́гнь, ни ра̑ны, ни ме́чь, ни и҆́ны мꙋ̑ки разлꙋчи́ти тѧ̀ возмого́ша, но мꙋ́жески ста́въ въ хрⷭ҇то́вомъ и҆сповѣ́данїи посредѣ̀ мꙋчи́телей, пострада́лъ є҆сѝ, бг҃омꙋ́дре, до конца̀, и҆ ны́нѣ вѣнцено́сецъ ликꙋ́ѧ на нб҃сѣ́хъ, прилѣ́жнѡ моли́сѧ ѡ҆ дꙋша́хъ на́шихъ.

Да ра́дꙋютсѧ собо́ри вѣ́рныхъ по все́й землѝ, въ пра́зднственный де́нь па́мѧти страстоте́рпца хрⷭ҇то́ва пантелеи́мона, стра́сть прїе́мшагѡ за и҆́же стра́сть крⷭ҇тнꙋю претерпѣ́вшаго цр҃ѧ̀ хрⷭ҇та̀, и҆ горды́ню безбо́жныхъ низложи́вшагѡ де́рзостнѡ, є҆го́же мо́лимъ прилѣ́жнѡ, во дворы̀ ра̑йскїѧ дости́гнꙋти вѣ́рою творѧ́щымъ па́мѧть є҆гѡ̀.

До́блѧго страда́льца пантелеи́мона, по бл҃гочⷭ҇тїи до́брѣ подвиза́вшасѧ, прїиди́те, лю́дїе, воспои́мъ глаго́люще: ра́дꙋйсѧ, тве́рдый вѣ́ры побо́рниче: ра́дꙋйсѧ, хрⷭ҇та̀ и҆мѣ́вый въ себѣ̀, ꙗ҆́коже па́ѵелъ: ра́дꙋйсѧ, пла́вающихъ небꙋ́рное приста́нище: ра́дꙋйсѧ, на́ша похвало̀ и҆ цр҃кви вѣ́рныхъ ра́дованїе. Сла́ва, гла́съ в҃:

Возсїѧ̀ дне́сь сла́внаѧ па́мѧть твоѧ̀, пантелеи́моне многострада́льне, созыва́ющи на́съ, празднолю́бцєвъ, на хвалꙋ̀ и҆ сла́вꙋ хрⷭ҇тꙋ̀ бг҃ꙋ на́шемꙋ, въ тебѣ̀ и҆сто́чникъ чꙋде́съ на́мъ ꙗ҆́вльшемꙋ. тѣ́мже притека́юще къ чⷭ҇тны̑мъ моще́мъ твои̑мъ, и҆сцѣле́нїй дарова̑нїѧ прїе́млемъ, вѣнча́вшаго тебѐ сп҃са хрⷭ҇та̀ непреста́ннѡ сла́вѧще.

И҆ ны́нѣ, бг҃оро́диченъ:

Сп҃сѝ ѿ бѣ́дъ рабы̑ твоѧ̑, бцⷣе дв҃о, ꙗ҆́кѡ всѝ по бз҃ѣ къ тебѣ̀ прибѣга́емъ, ꙗ҆́кѡ къ нерꙋши́мѣй стѣнѣ̀ и҆ предста́тельствꙋ.

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

Бл҃гочⷭ҇тїе возлюби́въ,* мч҃ниче, ма́терне,* и҆збѣжа́въ же мꙋ́жески* ѻ҆те́ческагѡ преще́нїѧ,* хрⷭ҇тꙋ̀ бг҃ꙋ послѣ́довалъ є҆сѝ.

Стӏ́хъ: Првⷣникъ, ꙗ҆́кѡ фӏ́нїѯъ, процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.

Возсїѧ́лъ є҆сѝ на́мъ* ѿ нїкомидӏ́и,* ꙗ҆́кѡ со́лнце, пребл҃же́нне,* прогонѧ́ѧ тьмꙋ̀ мӏ́ра* зарѧ́ми чꙋде́съ твои́хъ.

Стӏ́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.

Просла́ви твою̀, бг҃омꙋ́дре,* въ концѣ́хъ мӏ́ра* па́мѧть хрⷭ҇то́съ:* тогѡ́ бо жела́ѧ,* кро́вь свою̀ и҆злїѧ́лъ є҆сѝ. Сла́ва, гла́съ и҆ подо́бенъ то́йже:

Добро́то страда́льцєвъ,* бл҃голѣ́пїе мч҃никѡвъ,* царє́мъ храни́телю,* прїимѝ ны́нѣ хвалꙋ̀* вѣ́рою сла́вѧщихъ тѧ̀. И҆ ны́нѣ, бг҃оро́диченъ:

Горѣ̀ ст҃ы́хъ ли́цы,* бцⷣе дв҃о,* пою́тъ тѧ̀ съ до́льными,* сла́вѧще непреста́ннѡ* ржⷭ҇тво̀ твоѐ, пречⷭ҇таѧ.

На вели́цѣй вече́рни.

На Гдⷭ҇и, воззва́хъ: стїхи̑ры, гла́съ д҃.

Подо́бенъ: Зва́нный свы́ше:

Иже по достоѧ́нїю* зва́нъ бы́въ пантелеи́монъ,* є҆гда̀ чл҃вѣколю́бное* всѣ̑мъ просте́рлъ є҆сѝ дꙋ́шъ попече́нїе,* и҆ тѣле́съ и҆сцѣле́нїе показꙋ́ѧ:* тогда̀ тезоиме́ннымъ зва́нїемъ ѡ҆богати́лсѧ є҆сѝ,* добродѣ́тели воздаѧ́нїе,* и҆ бл҃гочⷭ҇тїѧ возме́здїе, мч҃ниче, ѡ҆брѣ́тъ,* вѣнцено́сецъ и҆ непобѣди́мь во́инъ ꙗ҆́вльсѧ* хрⷭ҇та̀ бг҃а на́шегѡ,* є҆го́же молѝ,* сп҃стѝ и҆ просвѣти́ти дꙋ́шы на́шѧ.

И҆́же ѿ невеще́ственныхъ и҆стѡ́чникъ сп҃си́телѧ,* бжⷭ҇твенныхъ и҆сцѣле́нїй при́снѡ блгⷣть почерпа́ѧ,* и҆ бога́тнѡ и҆злива́ѧ, и҆ подава́ѧ пристꙋпа́ющымъ къ тебѣ̀, всебл҃же́нне,* всѣ́хъ сла́вное твоѐ и҆ всесщ҃е́нное* и҆ свѣтоно́сное торжество̀ вѣ́рнѡ соверша́ющихъ,* блгⷣтїю бжⷭ҇твенною си́хъ ѡ҆зарѝ,* бг҃оподо́бнымъ пома́занъ и҆менова́нїемъ,* ꙗ҆́вѣ и҆ бл҃гостїю,* є҆́йже молѝ всѣ̑мъ дарова́тисѧ пою́щымъ тѧ̀.

Мꙋ́ками мно́гими и҆скꙋси́сѧ* твоѧ̀ ны́нѣ ѻ҆гнепа́льнаѧ любо́вь,* ко є҆́же сꙋ́щемꙋ жела́нїю,* мо́ремъ и҆ ѻ҆гне́мъ зави́стнѡ бори́мь:* тѣ́мже ѕлонача́льнаго и҆спрове́ргъ,* живоно́сное дѣ́йство ᲂу҆тѣ́шителѧ* ꙗ҆́вѣ прїѧ́тъ богатода́тельное:* є҆ю́же и҆ жи́ва пресла́внѡ* ᲂу҆ме́ршаго, бг҃омꙋ́дре, показа́лъ є҆сѝ,* и҆ разли̑чнаѧ и҆сцѣлє́нїѧ содѣ́лалъ є҆сѝ, пребл҃же́нне.

И҆́ны стїхи̑ры, гла́съ в҃. Самогла̑сны. А҆нато́лїево:

Безме́зднѡ блгⷣть дае́ши человѣ́кѡмъ, пантелеи́моне мч҃ниче сла́вне, и҆ дꙋ́хи ѿго́ниши призыва́нїемъ хрⷭ҇то́вымъ, и҆ слѣпы̑мъ ви́дѣти да́рꙋеши, ꙗ҆́кѡ тогѡ̀ ᲂу҆го́дникъ и҆́скреннїй: но молѝ, врачꙋ̀ всебл҃же́нне, дарова́ти мӏ́рꙋ ми́ръ тве́рдъ, и҆ тѧ̀ лю́бѧщымъ ве́лїю млⷭ҇ть.

Ма́тере бл҃гочⷭ҇ти́выѧ возжела́лъ є҆сѝ вѣ́рꙋ, ѻ҆́тчее и҆спра́вилъ є҆сѝ нече́стїе: є҆рмола́а бо ᲂу҆тве́рждьсѧ ᲂу҆чє́нїи, си́мъ и҆ креще́нїе соверши́лъ є҆сѝ, пантелеи́моне мч҃ниче сла́вне: млⷭ҇тиваго бг҃а, недꙋ́гꙋющихъ врачꙋ̀ и҆ страсте́й ѿгони́телю, молѝ, и҆зба́витисѧ ѿ напа́стей вѣ́рою творѧ́щымъ пречⷭ҇тнꙋ́ю па́мѧть твою̀.

Ѿри́нꙋлъ є҆сѝ пре́лесть ѻ҆тца̀, всесла́вне, и҆ словеса̀ ма́тєрнѧ смы́сленнѡ прїе́мъ, па́че зла́та пло́дъ прине́слъ є҆сѝ, по гдⷭ҇ню гла́сꙋ, и҆ вра́чь и҆зрѧ́денъ ꙗ҆ви́лсѧ є҆сѝ, пантелеи́моне мч҃ниче сла́вне: ше́ствꙋѧ же блгⷣти пꙋте́мъ, ѡ҆брѣ́лъ є҆сѝ лежа́ща ни́зꙋ младе́нца, є҆хӏ́дною ᲂу҆грызе́на, и҆ къ бг҃ꙋ мл҃твꙋ сотвори́въ, и҆ прилѣ́жнѡ помоли́всѧ, а҆́бїе ѻ҆́трока воскреси́лъ є҆сѝ, и҆ ѕвѣ́рѧ растерза́лъ є҆сѝ. тѣ́мже помина́й на́съ, вѣ́рою творѧ́щихъ твою̀ па́мѧть, ꙗ҆́кѡ да ѡ҆брѧ́щемъ млⷭ҇ть въ де́нь сꙋ́дный.

Сла́ва, гла́съ ѕ҃. Вѷзантӏ́ево:

Возсїѧ̀ дне́сь чⷭ҇тна́ѧ па́мѧть безсре́бреника, вѣ̑рныѧ созыва́ющи на трапе́зꙋ та́йнꙋю, и҆ къ торжествꙋ̀ пра́зднственномꙋ водѧ́щи празднолю́бныхъ составлє́нїѧ: наста́ бо ны́нѣ на́мъ чꙋдодѣ́йственный вра́чь, недꙋ́ги всѣ̑мъ и҆сцѣлѧ́ѧй, пантелеи́монъ тве́рдый страда́лецъ, и҆ мо́литсѧ прилѣ́жнѡ гдⷭ҇еви, сп҃сти́сѧ дꙋша́мъ на́шымъ.

И҆ ны́нѣ, бг҃оро́диченъ догма́тїкъ, гла́съ то́йже: Кто̀ тебє̀ не ᲂу҆бл҃жи́тъ:

Вхо́дъ, прокӏ́менъ днѐ, и҆ чтє́нїѧ г҃.

Прⷪ҇ро́чества и҆са́їина чте́нїе:

Та́кѡ гл҃етъ гдⷭ҇ь: Всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ̑зи ѿ ни́хъ. кто̀ возвѣсти́тъ сїѧ̑ въ ни́хъ; и҆лѝ ꙗ҆̀же ѿ нача́ла, кто̀ слы̑шана сотвори́тъ ва́мъ; да приведꙋ́тъ свидѣ́тєли своѧ̑, и҆ ѡ҆правдѧ́тсѧ, и҆ да ᲂу҆лы́шатъ, и҆ да рекꙋ́тъ и҆́стинꙋ. Бꙋ́дите мѝ свидѣ́тєли, и҆ а҆́зъ свидѣ́тель, гл҃етъ гдⷭ҇ь бг҃ъ, и҆ ѻ҆́трокъ, є҆го́же и҆збра́хъ: да позна́ете, и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь: пре́жде менє̀ не бы́сть и҆́нъ бг҃ъ, и҆ по мнѣ̀ не бꙋ́детъ. А҆́зъ є҆́смь бг҃ъ, и҆ нѣ́сть ра́звѣ менє̀ сп҃са́ѧй. А҆́зъ возвѣсти́хъ и҆ сп҃со́хъ, ᲂу҆ничижи́хъ, и҆ не бѣ̀ въ ва́съ чꙋ́ждїй. вы̀ мнѣ̀ свидѣ́тєли, и҆ а҆́зъ гдⷭ҇ь бг҃ъ, И҆ є҆щѐ ѿ нача́ла а҆́зъ є҆́смь, и҆ нѣ́сть ѿ рꙋ́къ мои́хъ и҆збавлѧ́ѧй: сотворю̀, и҆ кто̀ ѿврати́тъ то̀; Си́це гл҃етъ гдⷭ҇ь бг҃ъ, и҆збавлѧ́ѧй ва́съ, ст҃ы́й і҆и҃левъ.

Премꙋ́дрости соломѡ́новы чте́нїе:

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предꙿ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́новы чте́нїе:

Првⷣницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѡрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый, прпⷣбїе: Поѻстри́тъ же напра́сный гнѣ́въ во ѡ҆рꙋ́жїе: спобо́ретъ же съ ни́мъ мӏ́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, И҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы́кѡвъ: Ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

На лїтӏ́и стїхи́ра хра́ма, и҆ ст҃а́гѡ, гла́съ а҃. Вѷзантӏ́ево:

По́двигомъ до́брымъ подвиза́лсѧ є҆сѝ, и҆ тече́нїе сконча́лъ є҆сѝ мꙋче́нїѧ твоегѡ̀, мч҃ниче пантелеи́моне: тѣ́мже въ вы́шнихъ со а҆́гг҃лы ликꙋ́еши, досто́йнѡ болѣ́зней твои́хъ прїе́мъ вы́шнее црⷭ҇тво: молѝ ᲂу҆̀бо, врачꙋ̀ всебл҃же́нне, дарова́ти на́мъ ве́лїю млⷭ҇ть.

Гла́съ в҃: Кӏ́ими пѣ́сненными добро́тами тебѐ, пантелеи́моне, почти́мъ: тѣле́сною красото́ю и҆ дꙋше́вною добро́тою свѣ́тлѡ просїѧва́юща, ѹ҆́мнымъ раче́нїемъ просвѣще́нна и҆ ра́зꙋма хи́тростїю ᲂу҆кра́шенна, ю҆́на во́зрастомъ, вѣ́дца же смы́сломъ, возра́стшаго бжⷭ҇твенными ᲂу҆чє́нїи, и҆ стѧжа́вшаго хрⷭ҇та̀ ᲂу҆се́рдною любо́вїю;

Кӏ́ими пѣ́сньми тебѐ, пантелеи́моне, возвели́чимъ, є҆го́же па́че є҆стества̀ словесы̀ и҆ дѣ́лы просла́ви гдⷭ҇ь, и҆ мно́жествомъ возвы́си чꙋде́съ, є҆го́же заре́ю мно́гихъ дарѡ́въ просвѣтѝ, и҆ сла́вою вѣнцє́въ бжⷭ҇твенныхъ ᲂу҆красѝ, є҆го́же въ бѣда́хъ предста́телѧ тре́бꙋющымъ дарова̀ хрⷭ҇то́съ бг҃ъ на́шъ, и҆мѣ́ѧй ве́лїю млⷭ҇ть;

Кӏ́ими похва́льными пѣ́сньми тебѐ, пантелеи́моне, возвели́чимъ, хрⷭ҇топодо́бною бл҃госты́нею ѡ҆заре́нна, и҆ подаю́ща всѣ̑мъ просѧ́щымъ ве́лїю млⷭ҇ть, бжⷭ҇твеннымъ тезоимени́тствомъ ᲂу҆кра́шенна, и҆ дѣ́лы всемлⷭ҇тиваго показа́нна, ꙗ҆́кѡ приснотекꙋ́щаѧ рѣка̀ воды̀ живы́ѧ, и҆сцѣлє́нїѧ пролива́юща притека́ющымъ къ тебѣ̀ съ вѣ́рою;

Гла́съ є҃: Всесвѣ́тлаѧ мч҃ника па́мѧть сїѧ́етъ, ꙗ҆́кѡ со́лнце, концє́мъ, и҆ непреста́ннѡ подава́етъ вѣ̑рнымъ и҆сцѣлє́нїѧ, недꙋ́ги ѿгонѧ́ющи, и҆ стра̑сти и҆сцѣлѧ́ющи: мо́литсѧ бо при́снѡ пантелеи́монъ хрⷭ҇тꙋ̀ бг҃ꙋ, дарова́ти дꙋша́мъ на́шымъ ве́лїю млⷭ҇ть.

Сла́ва, гла́съ то́йже. Вѷзантӏ́ево:

Прїиди́те, мч҃николю́бцы, є҆диномꙋ́дреннѡ всѝ восхва́лимъ страстоте́рпца хрⷭ҇то́ва, по бл҃гочⷭ҇тїи до́брѣ подви́гшасѧ, и҆ по́честїю побѣ́дною ѡ҆дѣ́ѧвшасѧ, свѣти́льника вселе́нныѧ, и҆ присносїѧ́ющꙋю ѕвѣздꙋ̀ цр҃кве. тѣ́мже и҆ къ немꙋ̀ вопїю́ще рце́мъ: пантелеи́моне мч҃ниче сла́вне, бꙋ́ди на́мъ дꙋша́мъ же и҆ тѣ́лѡмъ сп҃се́нїе, и҆ покро́въ недви́жимь, молѧ́сѧ ко гдⷭ҇ꙋ ѡ҆ на́съ непреста́ннѡ, во є҆́же сп҃стѝ на́съ.

И҆ ны́нѣ, бг҃оро́диченъ:

Бл҃жи́мъ тѧ̀, бцⷣе дв҃о, и҆ сла́вимъ тѧ̀, вѣ́рнїи, по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ, и҆ прибѣ́жище дꙋ́шъ на́шихъ.

На стїхо́внѣ стїхи̑ры, гла́съ а҃:

До́блѧго страда́льца пантелеи́мона, по бл҃гочⷭ҇тїи подвиза́вшасѧ, прїиди́те, лю́дїе, воспои́мъ глаго́люще: ра́дꙋйсѧ, тве́рдый вѣ́ры побо́рниче по прⷪ҇ро́цѣхъ и҆ а҆пⷭ҇лѣхъ: ра́дꙋйсѧ, хрⷭ҇та̀ въ себѣ̀ и҆мѣ́вый, подо́бѧсѧ дѣ́лы па́ѵлꙋ: ра́дꙋйсѧ, пла́вающымъ небꙋ́рное приста́нище: ра́дꙋйсѧ, на́ша похвало̀ и҆ цр҃кве вѣ́рныхъ ра́дованїе.

Стӏ́хъ: Првⷣникъ, ꙗ҆́кѡ фӏ́нїѯъ, процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.

Ѿ младе́нчества до́брꙋю стезю̀ ѡ҆брѣ́тъ, млⷭ҇тїю хрⷭ҇то́вою пома́завъ срⷣце, бѡлѣ́зни цѣли́ши просѧ́щымъ ᲂу҆се́рднѡ, ѿню́дꙋже и҆ ᲂу҆ме́ршаго воздви́глъ є҆сѝ мл҃твами твои́ми, и҆ воспрїѧ́лъ є҆сѝ нбⷭ҇ное црⷭ҇твїе, пантелеи́моне всебл҃же́нне.

Стӏ́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.

Страстоте́рпца хрⷭ҇то́ва похва́лимъ, мꙋ́драго пантелеи́мона, и҆́же ѕмӏ́ѧ ᲂу҆бѝ си́лою крⷭ҇тною, и҆ мл҃твами є҆рмола́евыми ѻ҆́трока воскресѝ, и҆ несвѧще́нныѧ посрамѝ мꙋ́дрости словеса̀, и҆́же и҆ мо́литсѧ непреста́ннѡ, всѣ̑мъ пода́ти согрѣше́нїй проще́нїе.

Сла́ва, гла́съ и҃.

Вѷзантӏ́ево:

Ма́тернее возлюби́въ бл҃гочⷭ҇тїе, ѻ҆́тчимъ же безбо́жїемъ возгнꙋша́всѧ, врачꙋ̀ дꙋ́шъ во́инъ бы́въ, враче́бнѣ себѐ наказа́лъ є҆сѝ: и҆ бжⷭ҇твенною блгⷣтїю во ѻ҆бои́хъ бл҃гоискꙋ́сенъ, страсте́й всегꙋби́тель, и҆ дꙋ́шъ вра́чь показа́лсѧ є҆сѝ: но ꙗ҆́коже въ страда́нїихъ тве́рдое, и҆ въ мл҃твахъ приснопребыва́тельное стѧжа́въ, пантелеи́моне мч҃ниче хрⷭ҇то́въ, прилѣ́жнѡ молѝ, сп҃сти́сѧ дꙋша́мъ на́шымъ.

И҆ ны́нѣ, бг҃оро́диченъ, гла́съ то́йже: Безневѣ́стнаѧ дв҃о:

Тропа́рь, гла́съ г҃:

Страстоте́рпче ст҃ы́й и҆ цѣле́бниче пантелеи́моне, молѝ млⷭ҇тиваго бг҃а, да прегрѣшенїй ѡ҆ставле́нїе пода́стъ дꙋша́мъ на́шымъ.

На ѹ҆́трени.

На Бг҃ъ гдⷭ҇ь: тропа́рь великомч҃ника, два́жды.

Сла́ва, и҆ ны́нѣ, бг҃оро́диченъ.

По а҃-мъ стїхосло́вїи сѣда́ленъ, гла́съ а҃:

Ма́тернее бл҃гочⷭ҇тїе соблю́лъ є҆сѝ, бл҃же́нне, ѻ҆́тчее же нече́стїе бл҃гочⷭ҇тнѡ и҆спра́вилъ є҆сѝ, сегѡ̀ ра́ди и҆ блгⷣть прїѧ́лъ є҆сѝ ѿ бг҃а вседержи́телѧ, врачева́ти немощствꙋ́ющихъ бѡлѣ́зни, мч҃ниче сла́вне пантелеи́моне, всѣ́хъ съ вѣ́рою и҆ любо́вїю къ тебѣ̀ прибѣга́ющихъ. Два́жды.Сла́ва, и҆ ны́нѣ, бг҃оро́диченъ:

Наде́ждо хрⷭ҇тїа́нъ, всест҃а́ѧ дв҃о, є҆го́же родила̀ є҆сѝ, бг҃а, па́че ᲂу҆ма̀ и҆ сло́ва, непреста́ннѡ молѝ съ нбⷭ҇ными си́лами, дарова́ти ѿпꙋще́нїе согрѣше́нїй всѣ̑мъ на́мъ, и҆ и҆справле́нїе житїѧ̀, вѣ́рою и҆ любо́вїю тѧ̀ сла́вѧщымъ.

По в҃-мъ стїхосло́вїи сѣда́ленъ, гла́съ д҃:

Ꙗ҆́кѡ во́ина хрⷭ҇то́ва непобѣди́маго, и҆ борца̀ мꙋ́жественнѣйшаго, тѧ̀, всѝ вѣ́рнїи, восхвалѧ́емъ, мч҃никѡвъ добро́то, вѣ́рою пра́зднꙋюще ст҃ꙋ́ю па́мѧть твою̀, мч҃ниче всехва́льне: чⷭ҇тны̑ѧ же по́двиги согла́снѡ славосло́вимъ, мꙋ́дре, и҆ сп҃си́телѧ хрⷭ҇та̀ велича́емъ.

Сла́ва:

Пострада́лъ є҆сѝ мꙋ́жественнѣ за хрⷭ҇та̀, и҆ вѣ́рꙋ проповѣ́давъ ѻ҆тцꙋ̀ твоемꙋ̀, и҆звле́клъ є҆сѝ того̀, всехва́льне, и҆зꙿ ро́ва нече́стїѧ, и҆ мꙋчи́телей не ᲂу҆боѧ́всѧ безбо́жнагѡ ᲂу҆мышле́нїѧ, де́монѡвъ посрами́лъ є҆сѝ безси́льнꙋю де́рзость. сегѡ̀ ра́ди блгⷣть ѿ хрⷭ҇та̀ стѧжа́лъ є҆сѝ, врачева́ти бѡлѣ́зни и҆ и҆згони́ти дꙋ́хи вра̑жїѧ, пантелеи́моне всехва́льне, моли́сѧ хрⷭ҇тꙋ̀ бг҃ꙋ, прегрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.

И҆ ны́нѣ, бг҃оро́диченъ:

Родила̀ є҆сѝ неизрече́ннѡ бг҃а, пре́жде вѣ̑къ ѿ ѻ҆ц҃а̀ возсїѧ́вшаго, и҆ въ послѣ̑днѧѧ времена̀ ѿ чре́ва твоегѡ̀, бцⷣе, ꙗ҆́вльшагосѧ: свѣ́тъ во ѿкрове́нїе ꙗ҆зы́кѡвъ, и҆ сп҃се́нїе всегѡ̀ мӏ́ра, въ просвѣще́нїе во тьмѣ̀ сѣдѧ́щымъ, и҆ ᲂу҆тѣше́нїе вѣ́рою пою́щымъ тѧ̀. сего̀ ᲂу҆̀бо молѝ просвѣти́ти мѧ̀, влⷣчце, свѣ́томъ ра́зꙋма, и҆ пода́ти срⷣцꙋ моемꙋ̀ ᲂу҆миле́нїе, да ѡ҆мы́ю слеза́ми грѣхѝ моѧ̑.

Полѷеле́й, и҆ велича́нїе:

Велича́емъ тѧ̀, страстоте́рпче ст҃ы́й, великомч҃ниче и҆ цѣле́бниче пантелеи́моне, и҆ чти́мъ чⷭ҇тна̑ѧ страда̑нїѧ твоѧ̑, ꙗ҆̀же за хрⷭ҇та̀ претерпѣ́лъ є҆сѝ. Ѱало́мъ и҆збра́нный: Бг҃ъ на́мъ прибѣ́жище и҆ си́ла, помо́щникъ въ

ско́рбехъ, ѡ҆брѣ́тшихъ ны̀ ѕѣлѡ̀.

По полѷеле́и сѣда́ленъ, гла́съ д҃:

Торжествꙋ́ютъ дне́сь собо́ри вѣ́рныхъ чⷭ҇тны̑ѧ по́двиги твоѧ̑, пантелеи́моне страстоте́рпче, прославлѧ́юще животода́вца, ꙗ҆ви́вшаго тебѐ крѣ́пкаго на́мъ предста́телѧ. Два́жды.

Сла́ва, и҆ ны́нѣ, бг҃оро́диченъ:

Мт҃рь бж҃їю тѧ̀ свѣ́мы всѝ, дв҃ꙋ вои́стиннꙋ и҆ по ржⷭ҇твѣ̀ ꙗ҆́вльшꙋюсѧ, любо́вїю притека́ющїи къ твое́й бл҃гости: тебе́ бо и҆́мамы, грѣ́шнїи, предста́тельницꙋ, тебѐ стѧжа́хомъ въ напа́стехъ сп҃се́нїе, є҆ди́нꙋ всенепоро́чнꙋю. Та́же степє́нна, а҃-й а҆нтїфѡ́нъ д҃-гѡ гла́са.

Прокӏ́менъ, гла́съ д҃: Првⷣникъ, ꙗ҆́кѡ фӏ́нїѯъ, процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Стӏ́хъ: Насажде́ни въ домꙋ̀ гдⷭ҇ни, во дво́рѣхъ

бг҃а на́шегѡ процвѣтꙋ́тъ.

Є҆ѵⷢ҇лїе ѿ лꙋкѝ, зача́ло р҃ѕ: Речѐ гдⷭ҇ь свои̑мъ ᲂу҆ченикѡ́мъ: внемли́те ѿ человѣ̑къ:

По н҃-мъ ѱалмѣ̀: Мл҃твами ст҃а́гѡ великомч҃ника пантелеи́мона:

Та́же стїхи́ра, гла́съ г҃:

Возсїѧ̀ дне́сь сла́внаѧ па́мѧть твоѧ̀, пантелеи́моне многострада́льне, созыва́ющи на́съ, празднолю́бцєвъ, на хвалꙋ̀ и҆ сла́вꙋ хрⷭ҇тꙋ̀ бг҃ꙋ на́шемꙋ, въ тебѣ̀ и҆сто́чникъ чꙋде́съ на́мъ ꙗ҆́вльшемꙋ: тѣ́мъ притека́юще къ ра́цѣ моще́й твои́хъ, и҆сцѣле́нїй дарова̑нїѧ прїе́млемъ, вѣнча́вшаго тебѐ сп҃са хрⷭ҇та̀ воспѣва́юще во вѣ́ки, непреста́ннѡ сла́вѧще.

Канѡ́нъ бцⷣы со і҆рмосо́мъ на ѕ҃, и҆ ст҃а́гѡ на и҃, творе́нїе ѳеофа́ново.

Гла́съ в҃. Пѣ́снь а҃.

І҆рмо́съ: Во глꙋбинѣ́ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.

Припѣ́въ: Ст҃ы́й великомч҃ниче и҆ цѣле́бниче пантелеи́моне, молѝ бг҃а ѡ҆ на́съ.

Пристꙋ́пль ᲂу҆се́рднѡ ко хрⷭ҇тꙋ̀, пре́жде сконча́нїѧ, є҆́же ѡ҆ хрⷭ҇тѣ̀, мертвеца̀ пе́рвѣе воздви́глъ є҆сѝ: ны́нѣ же мѧ̀, пребога́те, ᲂу҆мерщвле́на грѣхо́внымъ ᲂу҆грызе́нїемъ, твои́ми мл҃твами, Ѽ пантелеи́моне, ѡ҆животворѝ.

Возсїѧ̀, ꙗ҆́коже ѕвѣзда̀, носѧ̀ во ю҆́ности ста́ростный и҆ бг҃омꙋ́дрый ра́зꙋмъ: добро́тою же тѣ́ла бл҃голѣ́пїе дꙋшѝ стѧжа́въ, препросла́вленномꙋ сло́вꙋ ꙗ҆ви́лсѧ є҆сѝ прекра́сенъ.

Оу҆мертви́всѧ мӏ́рꙋ, и҆ во хрⷭ҇та̀, бл҃же́нне, ѡ҆дѣ́ѧвсѧ ба́нею креще́нїѧ, бы́лъ є҆сѝ бг҃оно́сенъ ѻ҆рга́нъ, и҆ прїѧ́телище дѣ́йства дх҃ꙋ, всѣ̑мъ ᲂу҆гожда́ѧ, всѣ́хъ ᲂу҆врачꙋ́ѧ недꙋ́ги.

Премꙋ́дрость сестрꙋ̀ себѣ̀ притвори́въ, и҆ прича́стникъ жи́зни ведо́мъ, ѿ неѧ̀ почти́лсѧ є҆сѝ, и҆ вѣнце́мъ дарова́нїй ᲂу҆краси́лсѧ є҆сѝ, бжⷭ҇твенныѧ зарѝ, бл҃же́нне, ѡ҆блиста́ѧ свѣ́тлостїю.

Бг҃оро́диченъ: Бл҃гослове́ньми, прест҃а́ѧ чⷭ҇таѧ, є҆стество̀, ᲂу҆да́лено преслꙋша́нїемъ бы́вшее ѿ зижди́телѧ, хрⷭ҇та̀ ро́ждши, вѣнча́ла є҆сѝ, и҆ тлѣ́нїѧ свободи́ла є҆сѝ. тѣ́мже ра́дꙋющесѧ, всѝ вѣ́рнїи, тѧ̀ ᲂу҆бл҃жа́емъ. Пѣ́снь г҃.

І҆рмо́съ: Процвѣла̀ є҆́сть пꙋсты́нѧ, ꙗ҆́кѡ крӏ́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ срⷣце.

Словеса̀ дх҃а ᲂу҆слы́шавъ, бы́лъ є҆сѝ ꙗ҆́кѡ землѧ̀ до́браѧ и҆ бл҃гопло́днаѧ, прїе́мый сѣ́мѧ многоцѣ́нно, и҆ роди́вый, требл҃же́нне, сп҃се́нїе дꙋша́мъ.

Оу҆мертви́лъ є҆сѝ мꙋдрова́нїе ѕмїи́на ᲂу҆грызе́нїѧ, и҆ дꙋ́шꙋ ѡ҆живи́лъ є҆сѝ, бг҃одохнове́ннѡ возроди́всѧ, и҆ цр҃ю̀ всѣ́хъ предстоѧ̀.

Посрами́лъ є҆сѝ безбо́жное мꙋчи́телей повелѣ́нїе, и҆ ко хрⷭ҇тꙋ̀ прите́клъ є҆сѝ, вмѣ́стѡ всѣ́хъ сего̀ стѧжа́въ, и҆ бы́лъ є҆сѝ, бг҃омꙋ́дре, вели́кїй кꙋпе́цъ.

Мт҃ре твоеѧ̀ бл҃гочⷭ҇тїе возлю́бль, сла́вне, ѻ҆́тчее же возненави́дѣлъ є҆сѝ безбо́жїе многомѧте́жное, ꙗ҆́кѡ и҆мѣ́ѧ ра́зꙋмъ, лꙋ́чшее и҆збра́лъ є҆сѝ.

Бг҃оро́диченъ: Носѧ́й бжⷭ҇твеннымъ манове́нїемъ всю̀ тва́рь, гдⷭ҇ь, на рꙋкꙋ̀ но́ситсѧ твоє́ю, дв҃о: є҆го́же ны́нѣ молѝ, и҆зба́вити ѿ бѣ́дъ пою́щыѧ тѧ̀.

Сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ:

До́блѧго страда́льца бл҃гочⷭ҇тїѧ хрⷭ҇то́ва восхва́лимъ свѣ́тлѡ, пантелеи́мона, вѣ́рнїи, ѱалмы̑ и҆ пѣ́ньми и҆ пѣ́сньми дх҃о́вными, и҆́мже мꙋчи́тельство неви́димагѡ врага̀ си́лою бжⷭ҇твенною попра́сѧ, и҆ недꙋ́гѡвъ и҆сцѣле́нїе бога́тнѡ ѿ гдⷭ҇а дарова́сѧ, творѧ́щымъ вѣ́рнѡ бжⷭ҇твенный и҆ чⷭ҇тны́й пра́здникъ є҆гѡ̀.

Сла́ва, гла́съ то́йже:

Є҆рмола́а мꙋ́драгѡ, мч҃ниче, слове́съ послꙋ́шалъ є҆сѝ, и҆ ѡ҆ста́вилъ є҆сѝ а҆́бїе хꙋдо́жество земно́е, ꙗ҆́кѡ ме́рзско, ꙗ҆́кѡ некрѣ́пко, ꙗ҆́кѡ гꙋби́тельно, и҆мѣ́ѧ хрⷭ҇тѡ́вы стра̑сти ᲂу҆чє́нїѧ жи́зни въ срⷣцѣ твое́мъ, неисцѣ́льнѡ стра́ждꙋщымъ здра́вїе, пантелеи́моне, да́рꙋѧ. тѣ́мже моли́сѧ ѡ҆ творѧ́щихъ любо́вїю па́мѧть твою̀.

И҆ ны́нѣ, бг҃оро́диченъ:

Треволнє́нїи стра́стными безсо́вѣстный а҆́зъ ѡ҆бꙋрева́емь, чⷭ҇таѧ, призыва́ю тѧ̀ те́плѣ: да не пре́зриши менѐ ѡ҆каѧ́ннаго поги́бнꙋти, бе́зднꙋ млⷭ҇рдїѧ ро́ждши, ра́звѣ бо тебє̀ наде́жды не и҆́мамъ, да не врагѡ́мъ ѹ҆́бѡ ѡ҆бра́дованїе и҆ смѣ́хъ, надѣ́ѧвсѧ на тѧ̀, ꙗ҆влю́сѧ: и҆́бо мо́жеши, є҆ли́кѡ хо́щеши, ꙗ҆́кѡ мт҃и сꙋ́щи всѣ́хъ бг҃а.

Пѣ́снь д҃.

І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щьсѧ, и҆ сп҃слъ є҆сѝ всего̀ мѧ̀ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Послѣ́дꙋѧ влⷣцѣ любо́вїю, расточи́лъ є҆сѝ бога́тство ни́щымъ, себѐ ѡ҆бнажа́ѧ къ страда́нїю, є҆́же и҆ проше́лъ є҆сѝ, вѣ̑чныѧ надє́жды прови́дѣвъ.

Хвале́нїѧ бг҃ꙋ же́ртвꙋ прине́слъ є҆сѝ, ꙗ҆́вѣ возгнꙋша́всѧ і҆́дѡльскихъ тре́бъ: все́ же шата́нїе нечести́выхъ, страстоте́рпче, попра́лъ є҆сѝ.

Снѣда́ємымъ за́вистїю, и҆ гнѣ́вомъ бори̑мымъ, непобори́мꙋю си́лꙋ си̑мъ предста́вилъ є҆сѝ, мч҃ниче, и҆ побѣди́лъ є҆сѝ ѕлочести́вое томле́нїе, воѡрꙋжи́всѧ.

И҆́же ста́рца сѷмеѡ́на рꙋка́ми держи́мый, ста́рца тѧ̀ глагѡ́лы, пантелеи́моне, ᲂу҆ловѝ къ бжⷭ҇твенномꙋ разꙋмѣ́нїю, и҆ ко мно́гихъ сп҃се́нїю и҆ и҆збавле́нїю.

Бг҃оро́диченъ: Ю҆́ныѧ и҆ дѣ̑вы во слѣ́дъ тебє̀ потеко́ша, дв҃ꙋ и҆ ѻ҆трокови́цꙋ тѧ̀ и҆ мт҃рь зрѧ́ще: є҆ди́на бо ѻ҆боѧ̑ во є҆ди́но собра́ла є҆сѝ несказа́ннѡ, бг҃оневѣ́сто.

Пѣ́снь є҃.

І҆рмо́съ: Просвѣще́нїе во тьмѣ̀ лежа́щихъ, сп҃се́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ѹ҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бг҃а не зна́ю.

Ра́достнѡ по́двиги подꙿѧ́лъ є҆сѝ мꙋче́нїѧ, ѡ҆гражде́нъ си́лою бжⷭ҇твенною, и҆ терпѣ́нїемъ тве́рдѡ мꙋчє́нїѧ подꙿе́млѧ, ра́дꙋѧсѧ вопїѧ́лъ є҆сѝ: и҆но́гѡ бо, ра́звѣ тебє̀, бг҃а не зна́емъ.

На по́двигъ борьбы̀ встꙋпи́въ, бл҃же́нне, бжⷭ҇твенною си́лою превозмо́глъ є҆сѝ безбо́жныхъ нечести́вое тѷра́нство, и҆ неи́стовство і҆дѡлослꙋже́нїѧ, ѡ҆бле́ксѧ во хрⷭ҇та̀, сꙋдїю̀ и҆ вѣнча́телѧ по́двигѡвъ.

Ю҆́ношеско ты̀ противле́нїе и҆мѣ́ѧ, и҆ тве́рдостїю дꙋшѝ возставле́нїе стѧжа́въ, всѧ́кꙋ ꙗ҆́звꙋ до́блественнѣ претерпѣ́лъ є҆сѝ, и҆ мꙋ́жескимъ, бл҃же́нне, ᲂу҆мо́мъ, блгⷣтїю бжⷭ҇твеннагѡ крⷭ҇та̀ ᲂу҆крѣплѧ́емь.

Несогла́сное ѿри́нꙋ вѣща́нїе заблꙋ́ждшихъ, нбⷭ҇нымъ ᲂу҆че́нїемъ, страда́лецъ, и҆ мнѡ́гимъ сп҃се́нїю пресла́внꙋ бы́сть вино́вникъ, твои́мъ дѣ́йствомъ, хрⷭ҇тѐ, ᲂу҆крѣплѧ́емь.

Бг҃оро́диченъ: Речє́нїѧ премꙋ́дрыхъ, и҆ гада̑нїѧ всѧ̑, препросла́вленнаѧ, и҆ прⷪ҇рѡ́къ проречє́нїѧ, тѧ̀ проѡбража́хꙋ проѧвле́ннѡ напослѣ́докъ бы́ти бж҃їю роди́тельницꙋ: и҆ны́ѧ бо, ра́звѣ тебє̀, чⷭ҇тыѧ не зна́емъ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

І҆́дѡлы лє́стныѧ ѡ҆плева́лъ є҆сѝ, и҆ возноси́мꙋю пре́лесть ᲂу҆праздни́лъ є҆сѝ, чꙋдодѣ́йствꙋѧ ди̑внаѧ, и҆ творѧ̀ и҆сцѣлє́нїѧ, бг҃омꙋ́дре.

Вѣне́чникъ показа́лсѧ є҆сѝ, всеизрѧ́дне, сквозѣ́ бо ѻ҆́гнь ты̀ проше́лъ є҆сѝ и҆ во́дꙋ: и҆ на колесѝ протѧза́емь, пресла́внѡ погꙋби́лъ є҆сѝ безꙋ̑мныѧ.

Мꙋчи́телей сꙋровство̀ низложи́въ, неꙋдо́бь носи̑маѧ бїє́нїѧ тѣлє́снаѧ дꙋше́вною крѣ́постїю пострада́лъ є҆сѝ, бг҃омꙋ́дре, блгⷣтїю.

Бг҃оро́диченъ: Содержа́й концы̀ землѝ, ꙗ҆́кѡ бг҃ъ, твои́ми рꙋка́ми, чⷭ҇таѧ, держи́тсѧ ѡ҆писа́нїемъ тѣ́ла, и҆́же бжⷭ҇твеннымъ зра́комъ неѡпи́санный.

Конда́къ, гла́съ є҃:

Подража́тель сы́й млⷭ҇тивагѡ, и҆ и҆сцѣле́нїй блгⷣть ѿ негѡ̀ прїе́мъ, страстоте́рпче и҆ мч҃ниче хрⷭ҇та̀ бг҃а, мл҃твами твои́ми дꙋшє́вныѧ на́шѧ недꙋ́ги и҆сцѣлѝ, ѿгонѧ̀ при́снѡ борца̀ собла́зны ѿ вопїю́щихъ вѣ́рнѡ: сп҃си́ ны, гдⷭ҇и.

І҆́косъ: Безсре́бреника па́мѧть, до́блѧгѡ страда́льца, вѣ́рнагѡ цѣле́бника, бл҃гочⷭ҇тнѡ воспое́мъ, хрⷭ҇толю́бцы, да прїи́мемъ млⷭ҇ть, па́че же ѡ҆скве́рнши, ꙗ҆́коже и҆ а҆́зъ, своѧ̑ хра́мы: дꙋша́мъ бо и҆ тѣ́лѡмъ, возлю́бленнїи, и҆сцѣлє́нїѧ подава́етъ. потщи́мсѧ ᲂу҆̀бо, вѣ́рнаѧ бра́тїѧ, въ сердца́хъ на́шихъ и҆мѣ́ти є҆гѡ̀ крѣ́пость, и҆збавлѧ́юща ѿ ле́сти вопїю́щыѧ: сп҃си́ ны, гдⷭ҇и. Пѣ́снь з҃.

І҆рмо́съ: Тѣ́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: ᲂу҆слы́шасѧ ᲂу҆жѐ ѹ҆́стъ ва́шихъ мл҃тва.

Зако́ннѡ стражда̀, и҆ побѣди́въ врага̀, приста́нище бл҃гоꙋти́шно сꙋ́щымъ въ мо́ри, сла́вне, ѡ҆бꙋрева́ємымъ бы́лъ є҆сѝ, свѣ́тъ же сꙋ́щымъ во тьмѣ̀ житїѧ̀, и҆ пѣ́ти наꙋчи́лъ є҆сѝ: бл҃гослове́нъ бг҃ъ ѻ҆тє́цъ на́шихъ.

Бл҃же́нъ є҆сѝ, и҆ добро̀ тебѣ̀ є҆́сть ны́нѣ, пребл҃же́нне, воспрїи́мшемꙋ пребога́тꙋю и҆ бл҃же́ннꙋю наде́ждꙋ твою̀, ᲂу҆гото́ваннꙋю вѣ́рою гдⷭ҇еви зовꙋ́щымъ: бл҃гослове́нъ бг҃ъ ѻ҆тє́цъ на́шихъ.

Ст҃ы́хъ дꙋ́ши, и҆ првⷣныхъ ли́цы, и҆ безпло́тныхъ чи́ни а҆́гг҃льстїи прїѧ́ша слико́вника тѧ̀, бл҃же́нне, мече́мъ бо ᲂу҆сѣ́ченъ бы́въ во главꙋ̀, пое́ши ра́дꙋѧсѧ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Ѡ҆рꙋ́жїе, є҆́же пре́жде дре́ва живо́тнагѡ на́съ ѿлꙋчи́вшее, ны́нѣ ѡ҆браща́емо, прїе́млетъ зна́менавшыѧсѧ кро́вїю, и҆зꙿ ре́бръ сн҃а твоегѡ̀ и҆зше́дшею, пренепоро́чнаѧ: бл҃гослове́на є҆сѝ, бг҃а пло́тїю ро́ждшаѧ. Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Бл҃гопрїѧ́тное твоеѧ̀ хи́трости, дꙋше́вное ѡ҆слѣпле́нїе ѻ҆́тчее и҆сцѣлѧ́етъ, подаю́щее свѣ́тъ вѣ́рою, пребл҃же́нне, притека́ющымъ, и҆ ко сп҃сꙋ хрⷭ҇тꙋ̀ наставлѧ́ющее.

За хрⷭ҇та̀ закла́нъ бы́въ, къ вѣ́чнѣй жи́зни преминꙋ́лъ є҆сѝ, и҆ бг҃озва́ненъ ꙗ҆ви́лсѧ є҆сѝ и҆менова́нїемъ бж҃їимъ, бг҃омꙋ́дре. тѣ́мъ почита́емъ тѧ̀, и҆ превозно́симъ хрⷭ҇та̀ во вѣ́ки.

Витӏ́йское ѿложи́въ лю́тое мꙋ́дрыхъ глꙋмле́нїе, хрⷭ҇то́вымъ призыва́нїемъ болѣ́зненныхъ страсте́й корє́нїѧ посѣка́еши, и҆сцѣлѧ́ѧ превозносѧ́щыѧ хрⷭ҇та̀ во вѣ́ки.

Бг҃оро́диченъ: Безсме́ртїѧ зарю̀ вѣ́мы и҆сто́чника тѧ̀, бцⷣе, ꙗ҆́кѡ ро́ждшꙋю сло́во безсме́ртнагѡ ѻ҆ц҃а̀, всѣ́хъ сме́рти и҆збавлѧ́ющагѡ, превозносѧ́щихъ є҆го̀ во вѣ́ки.

Пѣ́снь ѳ҃.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Преста́вилсѧ є҆сѝ ра́дꙋѧсѧ къ жела́нїю коне́чномꙋ, и҆дѣ́же всели́всѧ, пребл҃же́нне, бл҃же́нный коне́цъ прїѧ́ти вои́стиннꙋ сподо́билсѧ є҆сѝ, сы́й со влⷣкою твои́мъ, во вѣ́ки безконє́чныѧ.

Жела́нїе полꙋчи́лъ є҆сѝ, и҆ любвѐ твоеѧ̀ и҆сполне́нїе, ка́плющей є҆щѐ те́плѣй кро́ви, за хрⷭ҇та̀ и҆злїѧ́вшейсѧ: ѿ негѡ́же ра́дꙋѧсѧ прїѧ́лъ є҆сѝ вѣнцы̀ по́двигѡвъ твои́хъ.

Львѡ́въ ᲂу҆ста̀, и҆ ѕвѣре́й зїѧ̑нїѧ, ꙗ҆́коже данїи́лъ дре́вле, ты̀ ѡ҆бꙋзда́лъ є҆сѝ: вѣ́сть бо стыдѣ́тисѧ, мч҃ниче, добродѣ́тели и҆ безслове́сное є҆стество̀. тѣ́мже тѧ̀, пресла́вне, соше́дшесѧ ᲂу҆бл҃жа́емъ.

Бога́тнꙋю бл҃гость тебѣ̀ хрⷭ҇то́съ да́рꙋетъ, сокро́вище и҆сцѣле́нїй на́мъ да́рꙋѧ, и҆ всемлⷭ҇тива и҆зволе́нїемъ тѧ̀ пода́въ всѧ́комꙋ скорбѧ́щемꙋ, и҆ приста́нище ти́хое, и҆ предста́телѧ и҆ защи́тителѧ.

Бг҃оро́диченъ: Ꙗ҆́кѡ рꙋно̀, всенепоро́чнаѧ, до́ждь нбⷭ҇ный во ᲂу҆тро́бѣ заче́нши, на́мъ родила̀ є҆сѝ тишинꙋ̀ даю́щаго, ꙗ҆́кѡ бг҃а того̀ пою́щымъ, и҆ тѧ̀ всепѣ́тꙋю бцⷣꙋ проповѣ́дающымъ.

Свѣти́ленъ.

Подо́бенъ: Оу҆ченикѡ́мъ:

Млⷭ҇тивнꙋю твою̀ дꙋ́шꙋ прови́дѣ бг҃ъ, пантелеи́мона тѧ̀ проповѣ́да: безсре́бреннѡ бо тре́бꙋющымъ и҆сцѣле́нїе и҆сточа́еши, ст҃е, мꙋчи́телей свирѣ́пство терпѣ́нїемъ твои́мъ побѣди́вый.

Сла́ва:

Пантелеи́моне всемꙋ́дре, чⷭ҇тны́хъ безсре́бреникѡвъ сщ҃е́ннаѧ красото̀, и҆ бжⷭ҇твенныхъ мч҃никѡвъ великопобѣ́днаѧ сла́во, свы́ше побѣ̑ды и҆спросѝ правосла̑внымъ хрⷭ҇тїа́нѡмъ, и҆ мӏ́рꙋ ми́ръ, и҆ вѣ́рнѡ сла́вѧщымъ тѧ̀, ст҃е, сп҃се́нїе, съ бцⷣею ѡ҆ всѣ́хъ молѧ́сѧ.

И҆ ны́нѣ, бг҃оро́диченъ:

Бцⷣꙋ пѣ́сньми немо́лчными бл҃гочⷭ҇тнѡ пое́мъ, вопїю́ще: ра́дꙋйсѧ, горо̀ ст҃а́ѧ: ра́дꙋйсѧ, прⷭ҇то́ле ѻ҆гнено́сный всѣ́хъ цр҃ѧ̀: ра́дꙋйсѧ, похвало̀ а҆́гг҃лѡвъ, и҆ ст҃ы́хъ сла́во.

На хвали́техъ стїхи̑ры на д҃, гла́съ и҃.

Подо́бенъ: Ѽ пресла́внагѡ чꙋдесѐ:

Дѣ́ло промышле́нїѧ вы́шнѧгѡ,* є҆́же на тебѣ̀ бы́вшее,* свѣ́тлѡ показа́сѧ:* тѣлє́сныѧ бо стра̑сти цѣли́ти ꙗ҆́вственнѡ,* пантелеи́моне, наꙋча́емь,* дꙋ́шъ ѡ҆брѣ́лсѧ є҆сѝ вра́чь и҆зрѧ́денъ,* сло́вомъ блгⷣти ᲂу҆врачꙋ́ѧ всѧ̑,* и҆ мра́чныѧ ле́сти и҆збавлѧ́ѧ* къ тебѣ̀ притека́ющыѧ.

Млⷭ҇ти бж҃їи подо́бѧсѧ,* пантелеи́монъ ꙗ҆́вѣ и҆менова́сѧ,* сꙋгꙋ́бо прїе́мъ и҆́мѧ,* и҆ подо́бное ве́щи.* ꙗ҆́кѡ сострада́теленъ бо, ми́лꙋеши всѣ́хъ,* сꙋгꙋ́бо подаѧ̀ си̑мъ и҆сцѣле́нїе,* пита́ѧ и҆ цѣлѧ̀,* и҆ къ ра́зꙋмꙋ, сла́вне, наставлѧ́ѧ бжⷭ҇твенномꙋ,* и҆ пресвѣ́тломꙋ хрⷭ҇то́вꙋ, пребога́те.

Добро́тою, бг҃омꙋ́дре, тѣле́сною* дꙋше́внꙋю добро́тꙋ бл҃годꙋ́шнѡ премѣни́лъ є҆сѝ,* и҆ ѹ҆́мное бл҃голѣ́пїе* плотско́ю красото́ю:* и҆ зрѧ́щыѧ, мч҃ниче, ᲂу҆диви́лъ є҆сѝ,* зна́меньми сїѧ́ѧ и҆ чꙋдесы̀,* цвѣ́томъ ю҆́ности* состарѣ́вшихсѧ ра́зꙋмъ прїе́мъ,* вѣ́рою же и҆ блгⷣтїю просвѣща́емь. Гла́съ є҃. Самогла́сенъ. Ге́рманово:

Всесвѣ́тлаѧ мч҃ника па́мѧть сїѧ́етъ, ꙗ҆́кѡ со́лнце, концє́мъ, и҆ непреста́ннѡ подава́етъ вѣ̑рнымъ и҆сцѣлє́нїѧ, недꙋ́ги ѿгонѧ́ющи, и҆ стра̑сти и҆сцѣлѧ́ющи: мо́литсѧ бо при́снѡ пантелеи́монъ хрⷭ҇тꙋ̀, дарова́ти дꙋша́мъ на́шымъ ве́лїю млⷭ҇ть.

Сла́ва, гла́съ д҃. Вѷзантӏ́ево:

Дне́сь просїѧ̀ страстоно́сца па́мѧть, прїиди́те, вѣ́рнїи, дх҃о́внѡ возвесели́мсѧ, и҆ пѣ́сньми сего̀ вѣнча́емъ: и҆́бо неви́димаго врага̀ си́лою крⷭ҇тною мꙋ́жески побѣди́лъ є҆́сть, и҆ мꙋчи́телей безмѣ́рныхъ мꙋ́къ не ᲂу҆боѧ́всѧ, зако́ннѡ по́честь прїѧ́тъ вы́шнѧгѡ зва́нїѧ, и҆ ны́нѣ со а҆́гг҃лы вѣ́чнѡ почива́етъ. но, Ѽ мч҃ниче хрⷭ҇то́въ пантелеи́моне, врачꙋ̀ недꙋ́гꙋющихъ, и҆ приста́нище ѡ҆бꙋрева́емыхъ, не преста́й молѧ́сѧ млⷭ҇тивомꙋ бг҃ꙋ, сп҃сти́сѧ дꙋша́мъ на́шымъ.

И҆ ны́нѣ, бг҃оро́диченъ, гла́съ то́йже:

Бцⷣꙋ пѣ́сньми немо́лчными бл҃гочⷭ҇тнѡ пое́мъ, вопїю́ще: ра́дꙋйсѧ, горо̀ ст҃а́ѧ: ра́дꙋйсѧ, прⷭ҇то́ле ѻ҆гнено́сный всѣ́хъ цр҃ѧ̀: ра́дꙋйсѧ, похвало̀ а҆́гг҃лѡвъ, и҆ ст҃ы́хъ сла́во.

На лїтꙋргӏ́и.

Бл҃жє́нна ѿ канѡ́на ст҃а́гѡ, пѣ́снь г҃ и҆ ѕ҃.

Прокӏ́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Стӏ́хъ: Въ це́рквахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.

А҆пⷭ҇лъ къ тїмоѳе́ю, зача́ло сч҃в.

А҆ллилꙋ́їа, гла́съ в҃: Првⷣникъ, ꙗ҆́кѡ фӏ́нїѯъ, процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Стӏ́хъ: Насажде́ни въ домꙋ̀ гдⷭ҇ни, во дво́рѣхъ бг҃а

на́шегѡ процвѣтꙋ́тъ.

Є҆ѵⷢ҇лїе ѿ і҆ѡа́нна, зача́ло н҃в.

Прича́стенъ: Въ па́мѧть вѣ́чнꙋю бꙋ́детъ првⷣникъ, ѿ слꙋ́ха ѕла̀ не ᲂу҆бои́тсѧ.