Мѣ́сѧца ное́мврїа въ з҃і-й де́нь.

Слꙋ́жба прпⷣбномꙋ ѻ҆тцꙋ̀ на́шемꙋ паӏ́сїю величко́вскомꙋ.

На вели́цѣй вече́рни.

Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ: стїхи̑ры на и҃, гла́съ д҃.

Подо́бенъ: Да́лъ є҆сѝ зна́менїе:

Ѿ ю҆́ности, ѻ҆́тче паӏ́сїе,* кра̑снаѧ мӏ́ра преѡби́дѣвъ,* бг҃ꙋ є҆ди́номꙋ порабо́тати возжелѣ́лъ є҆сѝ* непоро́чнымъ житїе́мъ и҆́ноческимъ.* тѣ́мже рачи́тель бы́лъ є҆сѝ смире́нїѧ и҆ послꙋша́нїѧ,* нищеты̀ и҆ долготерпѣ́нїѧ,* и҆ чⷭ҇тѣ́йшїѧ любвѐ,* непреста́нною мл҃твою бг҃ꙋ присвоѧ́ѧсѧ,* и҆ ѿ негѡ̀ вѣнча́ѧсѧ свѣ́тлѡ.

Ꙗ҆́кѡ бл҃гочести́вагѡ і҆ере́йскагѡ ко́рене* пречⷭ҇тна́ѧ ѻ҆́трасль,* паӏ́сїе бл҃же́нне,* ѿ ю҆́ности возлюби́лъ є҆сѝ сло́во бж҃їе,* и҆ въ тишинѣ̀ дꙋ́ха своегѡ̀* ᲂу҆мꙋдри́въ ѹ҆́мъ ст҃ы́хъ ѻ҆тє́цъ писа́ньми,* ѡ҆брѣ́лъ є҆сѝ свѣ́тлый сп҃се́нїѧ пꙋ́ть,* и҆́мже дости́глъ є҆сѝ* ѻ҆би́тели црⷭ҇твїѧ нбⷭ҇нагѡ.

Ѻ҆те́чествїе и҆ до́мъ ма́тере своеѧ̀,* прпⷣбне ѻ҆́тче паӏ́сїе,* бг҃а ра́ди ѡ҆ста́вилъ є҆сѝ:* ᲂу҆че́нїе же сꙋ́етное вѣ́ка сегѡ̀ презрѣ́въ,* ѡ҆брѣ́лъ є҆сѝ мꙋ́дрость неꙋвѧда́емꙋю* въ житїѝ и҆́ночестѣмъ,* ꙗ҆́кѡ пчела̀, цвѣ́ты слове́съ ѻ҆те́ческихъ ѡ҆блета́ѧ,* и҆ ме́дъ ᲂу҆че́нїѧ бжⷭ҇твеннагѡ приносѧ̀,* и҆́мже пита́еши чтꙋ́щыѧ па́мѧть твою̀.

Въ землѝ не скры́лъ є҆сѝ* тебѣ̀ да́ннагѡ свы́ше,* ѿ бжⷭ҇твенныѧ блгⷣти, тала́нта:* но преꙋмно́жилъ и҆ пре́далъ є҆сѝ* и҆ мнѡ́зѣмъ незави́стнѡ,* бога́тнѡ же бжⷭ҇твенныхъ дарѡ́въ,* и҆̀мже причасти́лсѧ є҆сѝ,* ꙗ҆́кѡ вѣ́ренъ строи́тель,* ꙗ҆ви́лсѧ є҆сѝ наслѣ́дникъ бж҃їй, паӏ́сїе.

Напита́лъ є҆сѝ а҆́лчꙋщыѧ пра́вды* пи́щею нбⷭ҇ною:* хлѣ́бъ бо а҆́гг҃льскїй* бы́сть сло́во твоѐ, паӏ́сїе,* и҆зꙿима́ѧ ѿ плѣне́нїѧ грѣхо́внагѡ* дꙋ́шы ча́дъ твои́хъ,* и҆ ко хрⷭ҇тꙋ̀ тѣ́хъ приводѧ̀.* тѣ́мже тѧ̀ сла́вимъ, вопїю́ще:* молѝ сп҃сти́сѧ дꙋша́мъ на́шымъ.

И҆́ны стїхи̑ры, гла́съ то́йже.

Подо́бенъ: Зва́нный свы́ше:

Зва́нъ бы́въ свы́ше, а҆ не ѿ человѣ̑къ,* на высотꙋ̀ добродѣ́телей возше́лъ є҆сѝ, ѻ҆́тче паӏ́сїе,* тѣ́мже ꙗ҆́кѡ сотвори́вый ᲂу҆чи́ши, наказꙋ́еши и҆ вразꙋмлѧ́еши,* не пренебрега́ти вы́шнѧгѡ пꙋтѝ,* пре́даннагѡ ѿ ст҃ы́хъ ѻ҆тє́цъ,* и҆́хже житїю̀ ревнꙋ́ѧ поревнова́лъ є҆сѝ,* бѣ́ды же и҆ по́двиги подꙿѧ́лъ є҆сѝ,* терпѣ́нїемъ мно́зѣмъ и҆ любо́вїю* ѡ҆́бразъ бл҃гъ всѣ̑мъ бы́въ:* да всѣ̑мъ ѻ҆́ный пꙋ́ть ᲂу҆вѣ́риши,* свидѣ́тельствꙋѧ ѡ҆ не́мъ и҆ ѿ бжⷭ҇твенныхъ писа́нїй.

Ꙗ҆́кѡ вра́чь и҆скꙋ́сный дꙋша́мъ,* недꙋ́ги бо дꙋшє́вныѧ всѧ́чески,* ѻ҆́тче на́шъ паӏ́сїе,* врачева́лъ є҆сѝ приходѧ́щихъ къ тебѣ̀,* не ᲂу҆корѧ́ѧ тѣ́хъ ѡ҆ грѣсѣ́хъ,* но терпѣ́нїемъ и҆ сострада́нїемъ въ срⷣце* влага́ѧ, є҆́же ѿвраща́тисѧ ѻ҆́нагѡ вре́да,* соверше́ннѡ и҆сцѣлѧ́лъ є҆сѝ и҆̀хъ,* ра́достныхъ же и҆ ми́рныхъ ѿпꙋска́лъ є҆сѝ,* ꙗ҆́кѡ небоѧ́зненнѡ всѣ̑мъ притека́ти, ѻ҆́тче,* ко врачевствꙋ̀ твоемꙋ̀.

Подо́бни мнѣ̀ быва́йте, ꙗ҆́коже а҆́зъ хрⷭ҇тꙋ̀,* ᲂу҆чи́лъ є҆сѝ ᲂу҆ченикѝ своѧ̑ словесы̀,* па́че же дѣ́лы бг҃оꙋго́дными,* прпⷣбне ѻ҆́тче.* вдохнѝ ре́вность въ срⷣца̀ на̑ша, подража́ти тѝ,* да сподо́битъ на́съ всѣ́хъ* пребл҃гӏ́й влⷣка тобо́ю полꙋчи́ти* ѿ негѡ̀ на сꙋдѣ̀ млⷭ҇ть,* ꙗ҆́кѡ и҆ на́мъ вкꙋ́пѣ съ тобо́ю,* и҆ со всѣ́ми ст҃ы́ми,* сла́вити хрⷭ҇та̀ бг҃а во вѣ́ки.

Сла́ва, гла́съ ѕ҃:

Безплѡ́тнымъ во́инствѡмъ приче́лсѧ є҆сѝ, и҆ прпⷣбнымъ ликѡ́мъ сочета́лсѧ є҆сѝ, и҆ со и҆збра́нными всѣ́ми ликꙋ́еши, прича́щсѧ и҆́стинномꙋ ѡ҆бж҃е́нїю, и҆ безсме́ртнѣй, ѻ҆́тче, жи́зни. съ ни́миже ѡ҆ ста́дѣ твое́мъ непреста́ннѡ твоего̀ влⷣкꙋ молѝ.

И҆ ны́нѣ, бг҃оро́диченъ догма́тїкъ, гла́съ то́йже: Кто̀ тебє̀ не ᲂу҆бл҃жи́тъ:

Вхо́дъ, прокӏ́менъ днѐ, и҆ чтє́нїѧ г҃.

Премꙋ́дрости соломѡ́новы чте́нїе:

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предꙿ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́новы чте́нїе:

Првⷣницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѡрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый, прпⷣбїе: Поѻстри́тъ же напра́сный гнѣ́въ во ѡ҆рꙋ́жїе: спобо́ретъ же съ ни́мъ мӏ́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, И҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы́кѡвъ: Ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

Премꙋ́дрости соломѡ́новы чте́нїе:

Првⷣникъ, а҆́ще пости́гнетъ сконча́тисѧ, въ поко́и бꙋ́детъ: ѡ҆сꙋ́дитъ же првⷣникъ ᲂу҆мира́ѧй живꙋ́щыѧ нечести̑выѧ. Оу҆́зрѧтъ бо кончи́нꙋ првⷣнагѡ, и҆ не разꙋмѣ́ютъ, что̀ совѣща́ша ѡ҆ не́мъ: Ꙗ҆́кѡ пове́ржетъ гдⷭ҇ь нечести̑выѧ безгла̑сны ни́цъ, и҆ поколе́блетъ и҆̀хъ ѿ ѡ҆снова́нїй, и҆ до послѣ́днѧгѡ и҆сче́знꙋтъ въ болѣ́зни, и҆ па́мѧть и҆́хъ поги́бнетъ. Прїи́дꙋтъ бо въ помышле́нїе согрѣше́нїй свои́хъ ᲂу҆жа́сни, и҆ ѡ҆бличи́тъ и҆́хъ сопроти́въ беззако́нїѧ и҆́хъ. Тогда̀ ста́нетъ въ дерзнове́нїи мно́зѣ првⷣникъ предꙿ лице́мъ ѡ҆скорби́вшихъ є҆го̀, и҆ ѿмета́ющихъ трꙋды̀ є҆гѡ̀. Ви́дѣвше же є҆го̀, смѧтꙋ́тсѧ стра́хомъ мно́гимъ, и҆ ᲂу҆жа́снꙋтсѧ ѡ҆ пресла́вномъ сп҃се́нїи є҆гѡ̀. Рекꙋ́тъ бо въ себѣ̀ ка́ющесѧ, и҆ въ тѣснотѣ̀ дꙋ́ха воздо́хнꙋтъ, и҆ рекꙋ́тъ: се́й бѣ̀, є҆го́же и҆мѣ́хомъ нѣ́когда въ посмѣ́хъ, и҆ въ при́тчꙋ поноше́нїѧ. Безꙋ́мнїи, житїѐ є҆гѡ̀ вмѣни́хомъ неи́стово, и҆ кончи́нꙋ є҆гѡ̀ безче́стнꙋ. Ка́кѡ вмѣни́сѧ въ сн҃ѣ́хъ бж҃їихъ, и҆ во ст҃ы́хъ жре́бїй є҆гѡ̀ є҆́сть; Оу҆̀бо заблꙋди́хомъ ѿ пꙋтѝ и҆́стиннагѡ, и҆ пра́вды свѣ́тъ не ѡ҆блиста̀ на́мъ, и҆ со́лнце не возсїѧ̀ на́мъ. Беззако́нныхъ и҆спо́лнихомсѧ сте́зь и҆ поги́бели, и҆ ходи́хомъ стези̑ непрохѡ́дны, пꙋти́ же гдⷭ҇нѧ не разꙋмѣ́хомъ.

На лїтӏ́и стїхи́ра хра́ма, и҆ прпⷣбнагѡ, гла́съ г҃:

Въ тебѣ̀, ѻ҆́тче паӏ́сїе, сло́во бж҃їе падѐ на до́брꙋю зе́млю, и҆ плоды̀ дадѐ стори̑чныѧ, ꙗ҆̀же любвѐ къ бг҃ꙋ и҆ къ бли́жнемꙋ, по хрⷭ҇тѡ́вымъ за́повѣдемъ, та́кожде и҆ ѹ҆́мныѧ мл҃твы ѡ҆́бразъ ꙗ҆ви́лъ є҆сѝ на́мъ. тѣ́мже не ѿве́ржи на́съ, восхвалѧ́ющихъ твоѧ̑ сла̑внаѧ и҆справлє́нїѧ. Сла́ва, гла́съ в҃:

Весе́лїемъ, прпⷣбне, съ чи́нми ст҃ы́хъ бг҃ꙋ предстои́ши, ꙗ҆̀же та́мѡ весе́лїѧ и҆ ра́дости насыща́ѧсѧ: сподо́би и҆ на́съ та́мѡшнѧѧ ра́дѡванїѧ полꙋчи́ти, да веселѧ́щесѧ тебѐ велича́емъ, ѻ҆́тче паӏ́сїе.

И҆ ны́нѣ, бг҃оро́диченъ, гла́съ то́йже:

Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ подꙿ кро́вомъ твои́мъ.

На стїхо́внѣ стїхи̑ры, гла́съ в҃.

Подо́бенъ: Кӏ́ими похва́льными вѣнцы̑:

Кі̑ѧ похва̑льныѧ по́чєсти* принесе́мъ паӏ́сїю,* преиспещре́нномꙋ дѣѧ́ньми* и҆ и҆зꙿѻби́льномꙋ блгⷣтьми,* бг҃осїѧ́нна свѣтоли́тїѧ* мече́мъ посѣ́кшемꙋ страсте́й стремлє́нїѧ,* столпꙋ̀ бг҃овидѣ́ньми сїѧ́ющꙋ,* воздержа́нїѧ свѣти́льникꙋ,* на свѣ́щницѣ дꙋше́внѣмъ* и҆спꙋща́ющꙋ зарю̀* бж҃їѧ велѣ́нїѧ,* всѣ̑мъ жи́знь подаю́щагѡ;

Стӏ́хъ: Чтна̀ предꙿ гдⷭ҇емъ сме́рть прпⷣбныхъ є҆гѡ̀.

Кӏ́ими похва́льными вѣнцы̑* паӏ́сїа вѣнча́емъ словесы̀,* сщ҃е́ннагѡ тече́нїѧ ревни́телѧ,* нбⷭ҇нымъ ᲂу҆че́нїемъ* взѧ́таго бг҃овидѣ́нїѧ* крилы̀ бжⷭ҇твенными,* столпа̀ смире́нїѧ неѡбори́маго,* стѣ́нꙋ разсꙋжде́нїѧ непоколеби́мꙋю,* нра́вомъ ᲂу҆краше́нїѧ* чⷭ҇тно́е бл҃голѣ́пїе,* ѡ҆ ча́дѣхъ свои́хъ хрⷭ҇та̀ бг҃а молѧ́щаго,* є҆ди́наго бл҃госе́рдаго;

Стӏ́хъ: Бл҃же́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Оу҆́тро присносвѣ́тлое,* прпⷣбне, показа́лсѧ є҆сѝ,* лꙋча́ми блгⷣтными:* страсте́й мгло́ю ѡ҆слѣпѣва́ющихъ* приве́лъ є҆сѝ къ свѣ́тꙋ невече́рнемꙋ,* ѻ҆́тче паӏ́сїе бг҃омꙋ́дре.* ѿню́дꙋже, ꙗ҆́кѡ возрасти́вша тала́нтъ,* дꙋша́мъ тѧ̀ цѣли́телѧ хрⷭ҇то́съ предлага́етъ,* неисцѣ̑льнымъ стрꙋ́пѡмъ согни́вшымъ,* мече́мъ слове́съ посѣка́юща,* и҆ здра́вїе при́снѡ* и҆ сп҃се́нїе всѣ̑мъ подаю́ща.

Сла́ва, гла́съ ѕ҃:

Человѣ́че бж҃їй, и҆ вѣ́рный ра́бе, слꙋго̀ гдⷭ҇ень, мꙋ́жꙋ жела́нїй, сосꙋ́де и҆збра́нный, сто́лпе и҆ ᲂу҆твержде́нїе цр҃кве, црⷭ҇твїѧ наслѣ́дниче, не премолчѝ вопїѧ̀ за ны̀ ко гдⷭ҇ꙋ. И҆ ны́нѣ, бг҃оро́диченъ, гла́съ то́йже:

Бцⷣе, ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀, тебѣ̀ мо́лимсѧ, моли́сѧ, влⷣчце, съ прпⷣбнымъ паӏ́сїемъ, поми́ловатисѧ дꙋша́мъ на́шымъ.

Тропа́рь, гла́съ а҃:

Паӏ́сїе ѻ҆́тче, рꙋсѝ ᲂу҆тѣше́нїе,* а҆ѳѡ́на сла́во и҆ молда́вїи похвало̀,* и҆́же писа́ньми бг҃одохнове́нными* напаѧ́ѧй на́съ при́снѡ ѿ и҆стѡ́чникъ и҆́стины и҆ сп҃се́нїѧ,* ны́нѣ на нб҃сѣ́хъ предстоѧ̀ хрⷭ҇тꙋ̀ бг҃ꙋ,* молѝ сп҃сти́сѧ дꙋша́мъ на́шымъ.

Сла́ва, и҆ ны́нѣ, бг҃оро́диченъ: Гаврїи́лꙋ вѣща́вшꙋ тебѣ̀, дв҃о:

На ѹ҆́трени.

На Бг҃ъ гдⷭ҇ь: тропа́рь два́жды. Сла́ва, и҆ ны́нѣ, бг҃оро́диченъ.

По а҃-мъ стїхосло́вїи сѣда́ленъ, гла́съ г҃.

Подо́бенъ: Красотѣ̀ двⷭ҇тва:

Є҆ди́ножды въ лѣ́то и҆схожда́ше и҆зꙿ ке́ллїи своеѧ̀ прпⷣбный паӏ́сїй, є҆́же назира́ти селє́нїѧ ᲂу҆ченикѡ́въ свои́хъ, посѣща́ѧ и҆ назна́менꙋѧ коегѡ́ждо и҆́хъ ке́ллїю, и҆ со слеза́ми молѧ́шесѧ, врꙋча́ѧ и҆̀хъ бг҃ꙋ, и҆ глаго́лѧ: гдⷭ҇и, сохранѝ сїѐ ма́лое ста́до ѿ волкѡ́въ, гꙋбѧ́щихъ є҆̀. Два́жды. Сла́ва, и҆ ны́нѣ, бг҃оро́диченъ:

Бцⷣе дв҃о, ро́ждшаѧ сло́во, па́че сло́ва, зижди́телѧ твоего̀, того̀ молѝ при́снѡ съ прпⷣбнымъ паӏ́сїемъ: сохрани́ти ста́до твоѐ ѿ волкѡ́въ, гꙋбѧ́щихъ є҆̀.

По в҃-мъ стїхосло́вїи сѣда́ленъ, гла́съ а҃. Подо́бенъ: Гро́бъ тво́й, сп҃се:

Вре́мени бы́вшꙋ лю́тагѡ гоне́нїѧ, и҆ кѷмва́лѡмъ возгласи́вшымъ: а҆га́рѧне предꙿ враты̀ монасты́рскими, и҆зше́лъ є҆сѝ и҆зꙿ ке́ллїи твоеѧ̀, ѻ҆́тче паӏ́сїе, и҆ ста́лъ є҆сѝ ᲂу҆ це́ркви, предꙿ людьмѝ и҆ ча́ды твои́ми, собра́вшимисѧ къ тебѣ̀, а҆́ки птенцы̀ подꙿ крылѣ̑ ко́коша своегѡ̀, гото́въ сы́й, ꙗ҆́кѡ а҆́гнецъ на заколе́нїе. Два́жды.

Сла́ва, и҆ ны́нѣ, бг҃оро́диченъ:

Мно́зи борю́щїи мѧ̀ ѿ до́льнихъ, въ болѣ́зни ѡ҆скꙋдѣ̀ жи́знь моѧ̀, понро́хъ въ про́пасть прегрѣше́нїй: сп҃си́ мѧ, влⷣчце, не пре́зри менѐ, предста́тельницꙋ бо тѧ̀ непобѣ́днꙋ и҆́мамъ.

Полѷеле́й, и҆ велича́нїе:

Оу҆бл҃жа́емъ тѧ̀, прпⷣбне ѻ҆́тче на́шъ паӏ́сїе, и҆ чти́мъ ст҃ꙋ́ю па́мѧть твою̀, наста́вниче мона́хѡвъ и҆ собесѣ́дниче а҆́гг҃лѡвъ. Ѱало́мъ и҆збра́нный:

Терпѧ̀, потерпѣ́хъ гдⷭ҇а, и҆ внѧ́тъ мѝ, и҆ ᲂу҆слы́ша мл҃твꙋ мою̀.

По полѷеле́и сѣда́ленъ, гла́съ а҃.

Подо́бенъ: Гро́бъ тво́й, сп҃се:

Вре́мѧ на́шегѡ весе́лїѧ и҆ по́двига наста̀, въ не́мже прїе́млемъ страсте́й разрѣше́нїѧ да́ръ. ꙗ҆́кѡ бо сто́лпъ ѻ҆́гненъ, ꙗ҆ви́сѧ прпⷣбный паӏ́сїй, попалѧ́ѧй беззако́ннꙋющихъ главы̑, вѣ́рныхъ же просвѣща́ѧй дꙋ́шы ᲂу҆че́ньми бг҃оразꙋ́мїѧ, и҆ въ бжⷭ҇твенный гра́дъ, го́рнїй і҆ерⷭ҇ли́мъ, ꙗ҆́кѡ дрꙋга́го і҆и҃лѧ, вводѧ́й, ꙗ҆́кѡ ᲂу҆чени́къ бж҃їѧ блгⷣти. Два́жды.

Сла́ва, и҆ ны́нѣ, бг҃оро́диченъ:

Ꙗ҆́кѡ всенепоро́чнаѧ невѣ́ста творца̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи ᲂу҆тѣ́шителѧ, всепѣ́таѧ, беззако́нїѧ мѧ̀ сꙋ́ща скве́рное ѻ҆би́телище, и҆ де́монѡвъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити, и҆ свѣ́тлое жили́ще добродѣ́телей совершѝ, свѣтоно́снаѧ нетлѣ́ннаѧ: ѿженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, мл҃твами твои́ми.

Та́же степє́нна, а҃-й а҆нтїфѡ́нъ д҃-гѡ гла́са.

Прокӏ́менъ, гла́съ д҃: Чтна̀ предꙿ гдⷭ҇емъ сме́рть прпⷣбныхъ є҆гѡ̀. Стӏ́хъ:

Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;

Є҆ѵⷢ҇лїе ѿ матѳе́а, зача́ло м҃г: Речѐ гдⷭ҇ь свои̑мъ ᲂу҆ченикѡ́мъ: всѧ̑ мнѣ̑ предана̀ сꙋ́ть:

По н҃-мъ ѱалмѣ̀: Мл҃твами прпⷣбнагѡ паӏ́сїа:

Та́же стїхи́ра, гла́съ ѕ҃:

 кѡ да́ръ и҆збра́нъ бг҃ꙋ сама́го себѐ прине́слъ є҆сѝ, коне́чное смире́нїе и҆ сокрꙋше́нїе серде́чное, трезве́нїе и҆ и҆́стинное безстра́стїе стѧжа́въ: мл҃твы же непреста́нныѧ дости́гъ, дре́внѧгѡ и҆́ночества ѡ҆бнови́тель показа́лсѧ є҆сѝ, и҆ ꙗ҆́кѡ сто́лпъ свѣтови́днѣйшїй въ нощѝ дре́вле і҆и҃лю.

Канѡ́нъ бцⷣѣ со і҆рмосо́мъ на ѕ҃: Во́дꙋ проше́дъ:

и҆ ст҃о́мꙋ канѡ́на два̀ на и҃.

Гла́съ г҃. Пѣ́снь а҃.

І҆рмо́съ: Во́ды дре́вле, ма́нїемъ бжⷭ҇твеннымъ, во є҆ди́но со́нмище совокꙋпи́вый, и҆ раздѣли́вый мо́ре і҆и҃льтєскимъ лю́демъ, се́й бг҃ъ на́шъ, препросла́вленъ є҆́сть: томꙋ̀ є҆ди́номꙋ пои́мъ, ꙗ҆́кѡ просла́висѧ.

Сло́ве бж҃їй, свѣтозаре́нїемъ ст҃а́гѡ твоегѡ̀ дх҃а, мра́чномꙋ ᲂу҆мꙋ̀ моемꙋ̀ свѣтоно́снꙋю лꙋчꙋ̀ низпослѝ, и҆ сло́во мѝ вдохнѝ восхвали́ти, є҆го́же са́мъ и҆збра́лъ и҆ прїѧ́лъ є҆сѝ, ве́рхъ ѻ҆тє́цъ, свѣтоза́рнаго паӏ́сїа.

Плотска́гѡ жела́нїѧ, прпⷣбне, ѿве́ргсѧ, го́рдость возненави́дѣлъ є҆сѝ: смире́нїемъ же и҆ нището́ю ѡ҆богати́всѧ, превысѡ́каѧ дости́глъ є҆сѝ ст҃ы́хъ жили̑ща.

Возше́лъ є҆сѝ на высотꙋ̀ безстра́стїѧ, вше́лъ є҆сѝ во мра́къ бг҃овидѣ́нїѧ, прїѧ́лъ є҆сѝ въ срⷣцѣ твое́мъ бжⷭ҇твенный зако́нъ: и҆́мже ᲂу҆крѣ́пльсѧ, свѣти́льникъ пресвѣ́телъ мона́шествꙋющихъ, прпⷣбне, бы́лъ є҆сѝ.

Бг҃оро́диченъ: Ѽ свѣ́та прїѧ́телище, бг҃ора́дованнаѧ влⷣчце, прпⷣбнымъ всѣ̑мъ похвало̀! сп҃си́ ны ѿ бѣ́дъ, ѡ҆бстоѧ́нїй и҆ скорбе́й, воспѣва́ющыѧ тѧ̀, многопѣ́тꙋю.

И҆́нъ канѡ́нъ.

Гла́съ и҃. Пѣ́снь а҃.

І҆рмо́съ: Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще: пои́мъ тебѣ̀, є҆ди́номꙋ влⷣцѣ.

Стадонача́льниче бж҃їихъ дворѡ́въ, и҆́нокѡвъ чрєды̀ наставлѧ́ѧ ко ѡ҆гра́дѣ нбⷭ҇нѣй, ра́дꙋйсѧ, ѻ҆́тче паӏ́сїе прпⷣбне, ча̑да бо твоѧ̑ бы́ша, ꙗ҆́кѡ ѕвѣ̑зды небє́сныѧ, свѣтоводѧ́щыѧ концы̀ рѡссӏ́йскїѧ землѝ.

Просвѣще́нїѧ ᲂу҆ма̀ въ мл҃твѣ серде́чнѣй взыскꙋ́ѧ, пости́глъ є҆сѝ сокрове́ннꙋю глꙋбинꙋ̀ ст҃ы́хъ писа́нїй: сїѧ̑ даде́ ти бг҃ъ, ꙗ҆́кѡ крилѣ̑ голꙋби̑нѣ, да полети́ши дѣѧ́нїемъ, и҆ почӏ́еши въ видѣ́нїи.

Оу҆́тро возсїѧ́лъ є҆сѝ на́мъ, свѣ́тлыми добродѣ́тели просвѣщє́нїи, на́шѧ мы̑сли просвѣща́ѧ при́снѡ. тѣ́мже твою̀ свѣтоно́снꙋю дне́сь, ѻ҆́тче паӏ́сїе, соверша́емъ па́мѧть.

Бг҃оро́диченъ: Ра́дꙋйсѧ, ѡ҆блиста́ющаѧ бжⷭ҇твенными сїѧ́ньми, зарѐ мо́лнїйнаѧ, ѡ҆свѣти́вшаѧ землѝ концы̀, и҆́стинное зла́та блиста́нїе, вседо́браѧ и҆ пренепоро́чнаѧ, свѣ́тъ невече́рнїй вѣ̑рнымъ ѡ҆блиста́вши.

Пѣ́снь г҃.

І҆рмо́съ: Непло́днаѧ дꙋшѐ и҆ безча́днаѧ, стѧжѝ пло́дъ бл҃госла́вный, веселѧ́щисѧ возопӏ́й: ᲂу҆тверди́хсѧ тобо́ю, бж҃е, нѣ́сть ст҃ъ, нѣ́сть првⷣнъ, па́че тебє̀, гдⷭ҇и.

Ꙗ҆́коже и҆ногда̀ вели́кїй прⷪ҇ро́къ и҆лїа̀ на горѣ̀ карми́лѣ, въ а҆ѳѡ́нскꙋю го́рꙋ всели́лсѧ є҆сѝ, въ сокрꙋше́нїи серде́чнѣмъ и҆ молча́нїи радостотво́рнѣмъ ѻ҆́гнь къ ѻ҆гню̀ прилага́ѧ, и҆ видѣ́нїи бжⷭ҇твенными ѡ҆сїѧва́емь.

Въ трꙋдѣ́хъ, не́мощехъ, тѣснота́хъ и҆ кра́йнѣмъ лише́нїи бѣ̀ житїѐ твоѐ, ѻ҆́тче, є҆́же на ст҃ѣ́й горѣ̀: ѿѻнꙋ́дꙋже стѧжа́лъ є҆сѝ дх҃а ст҃а́го, положи́въ ѡ҆снова́нїе смире́нїѧ.

Помышлѧ́ѧ себѐ сꙋ́ща пра́хъ и҆ пе́пелъ, преклонѧ́лъ є҆сѝ разꙋ̑мнаѧ колѣ̑на срⷣца твоегѡ̀ предꙿ вели́чествомъ сла́вы бж҃їѧ, просѧ̀ просвѣще́нїѧ ᲂу҆ма̀ твоегѡ̀.

Бг҃оро́диченъ: Стра̑сти дꙋшѝ моеѧ̀ и҆сцѣлѝ, возраста́ющыѧ мѝ преѡкаѧ́ннѡ, по́мыслъ просвѣтѝ, дале́че ѿгонѧ́щи тьмꙋ̀, чⷭ҇таѧ, де́монѡвъ, ѡ҆скорблѧ́ющихъ мѧ̀, и҆ всегда̀ сѣ̑ти дѣ́лающихъ мѝ.

И҆́нъ. І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ, ꙗ҆́кѡ нѣ́сть ст҃ъ, па́че тебє̀, є҆ди́не чл҃вѣколю́бче.

Во́зрастъ дх҃о́вный не ѿ лѣ́тъ и҆счита́етсѧ, мꙋ́дрость же и҆́стиннаѧ сѣди́на є҆́сть. тѣ́мже во млады́хъ лѣ́тѣхъ соверше́на сꙋ́ща, ѻ҆́тче паӏ́сїе, ᲂу҆строѧ́етъ тѧ̀ гдⷭ҇ь ста́рца и҆зрѧ́днѣйша.

Насѣ́ѧвъ дѡ́браѧ сѣ́мена пꙋстыннолю́бнагѡ житїѧ̀, возрасти́лъ є҆сѝ сщ҃е́нный вертогра́дъ ᲂу҆чєни́къ твои́хъ, и҆́же прострѐ ѻ҆́трасли своѧ̑ во всѧ̑ концы̀ рѡссӏ́йскїѧ землѝ.

Вели́комꙋ въ добродѣ́телехъ поревнова́лъ є҆сѝ паӏ́сїю, и҆ сегѡ̀ дх҃о́внѡ стопа́мъ возслѣ́дꙋѧ, воздержа́нїемъ, прпⷣбне, верхо́венъ ꙗ҆ви́лсѧ є҆сѝ, и҆ ѡ҆́бразъ ста́дꙋ твоемꙋ̀.

Бг҃оро́диченъ: Мꙋ́дрость бж҃їѧ ѵ҆поста́снаѧ и҆зꙿ тебє̀, чⷭ҇таѧ, роди́сѧ, и҆ ѕловѣ̑рныѧ мꙋдрецы̀ потребѝ, и҆ ᲂу҆мꙋдрѝ мно́жество мона́шествꙋющихъ и҆ прпⷣбныхъ, воспѣва́ти блгⷣтїю: бл҃гослове́ннаѧ, ꙗ҆́же бг҃а пло́тїю ро́ждшаѧ.

Сѣда́ленъ, гла́съ и҃.

Подо́бенъ: Премꙋ́дрости:

Ѿ ю҆́ности всѧ̑ ѡ҆ста́вль мїрска̑ѧ, ᲂу҆се́рднѡ послѣ́довалъ є҆сѝ зва́вшемꙋ тѧ̀, прпⷣбне, и҆ на ра́мо взе́мъ крⷭ҇тъ гдⷭ҇а твоегѡ̀, въ постѣ́хъ, ѻ҆́тче, тѣ́ло и҆знꙋри́лъ є҆сѝ: тѣ́мъ и҆ па́стырѧ тѧ̀ свои̑мъ ѻ҆вца́мъ до́брѣ ᲂу҆строѧ́етъ всебл҃гӏ́й гдⷭ҇ь, паӏ́сїе бл҃же́нне. тѣ́мже молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти, чтꙋ́щымъ любо́вїю ст҃ꙋ́ю па́мѧть твою̀. Сла́ва, и҆́нъ сѣда́ленъ, гла́съ и҆ подо́бенъ то́йже:

Ѻ҆́тче бл҃же́нне паӏ́сїе, въ мл҃твахъ и҆ бдѣ́нїихъ, тѣ́ло съ дꙋше́ю гдⷭ҇еви чⷭ҇то предста́вилъ є҆сѝ, и҆ ѿтꙋ́дꙋ жили́ще и҆ до́мъ дх҃а прест҃а́гѡ бы́лъ є҆сѝ. тѣ́мже ꙗ҆́кѡ прпⷣбнымъ сожи́тель и҆ првⷣнымъ, вѣне́цъ ѿ рꙋкѝ гдⷭ҇ни досто́йнѡ прїѧ́лъ є҆сѝ: є҆го́же молѝ, прегрѣше́нїй ѡ҆ставле́нїе дарова́ти, чтꙋ́щымъ любо́вїю ст҃ꙋ́ю па́мѧть твою̀.

И҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безꙿ сѣ́мене ро́ждшꙋю бг҃а пло́тїю, всѝ ᲂу҆бл҃жа́емъ, ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца, млеко́мъ пита́еши зижди́телѧ и҆ гдⷭ҇а. тѣ́мъ, а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти, покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.

Пѣ́снь д҃.

І҆рмо́съ: Положи́лъ є҆сѝ къ на́мъ тве́рдꙋю любо́вь, гдⷭ҇и: є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ бл҃годарѧ́ще: сла́ва си́лѣ твое́й, гдⷭ҇и.

Съ ᲂу҆се́рдїемъ те́плымъ, ѻ҆́тче, стра́нствовалъ є҆сѝ, и҆ща̀ ᲂу҆чи́телей вѣ́рныхъ житїѧ̀ и҆́ноческагѡ, но ѡ҆брѣ́лъ є҆сѝ и҆ собра́лъ є҆сѝ крӏ́ны сє́льныѧ, ст҃ы́хъ ѻ҆тє́цъ писа́нїѧ, и҆спꙋща̑ющаѧ бл҃гоꙋха̑нїѧ мꙋ́дрости неле́стныѧ.

Бг҃одохнове́нный а҆́вва дѡроѳе́й бѣ̀ наста́вникъ тво́й въ нача́лѣ пꙋтѝ и҆́ноческагѡ, є҆гѡ́же кни́жномꙋ наꙋче́нїю ѿ ю҆́ности поревнова́въ, сохрани́лъ є҆сѝ за́пѡвѣди є҆гѡ̀ да́же до ста́рости твоеѧ̀.

Возлюби́лъ є҆сѝ, прпⷣбне, всѧ̑ ѻ҆тцы̀ ст҃ы̑ѧ, и҆ писа̑нїѧ и҆́хъ и҆зслѣ́довавъ, и҆звлека́лъ є҆сѝ, ꙗ҆́кѡ пче́лъ не́ктаръ сла́достный, наꙋче́нїе сщ҃е́нное, прелива́ѧ сїѐ въ твоѧ̑ медотѡ́чнаѧ наставлє́нїѧ, во ᲂу҆слажде́нїе ча́дъ твои́хъ.

Бг҃оро́диченъ: Є҆ди́нꙋ голꙋби́цꙋ чⷭ҇тꙋ тѧ̀ жени́хъ мы́сленный ѡ҆брѣ́те, всенепоро́чнаѧ, крӏ́нъ бл҃гово́ннѣйшїй, цвѣ́тъ прекра́снѣйшїй, и҆ свѣтоно́сенъ черто́гъ. тѣ́мже тѧ̀, дв҃ꙋ, пое́мъ, и҆ превозно́симъ во всѧ̑ вѣ́ки.

И҆́нъ. І҆рмо́съ: И҆зꙿ горы̀ прїѡсѣне́нныѧ, сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ, бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

Добро́та гдⷭ҇а твоегѡ̀ распалѝ любо́вь въ срⷣцѣ твое́мъ, є҆́же трезви́тисѧ и҆ бо́дрствовати, да не вни́деши въ напа́сть. ᲂу҆че́нїе сїѐ ѿ писа́нїй ѻ҆те́ческихъ ѡ҆ста́вилъ є҆сѝ на́мъ, є҆́же добротолю́бїе є҆́сть.

А҆́ще и҆ ѡ҆́бразъ тво́й къ подража́нїю и҆́мамы, и҆ ст҃ы́хъ ѻ҆тє́цъ писа̑нїѧ, но неиспра́влени є҆смы̀. ѻ҆ба́че не пре́зри на́съ, къ тебѣ̀ прибѣга́ющихъ, и҆ мл҃твами твои́ми на пꙋ́ть сп҃се́нїѧ напра́ви.

Въ кни́зѣ живо́тнѣй написа́лсѧ є҆сѝ досто́йнѡ, напи̑саннаѧ всѧ̑ въ бжⷭ҇твенныхъ кни́гахъ сконча́въ. тѣ́мже вопїю́ ти: рꙋкописа́нїе, ѻ҆́тче, ѕѡ́лъ мои́хъ, твои́ми расто́ргни ко всеви́дцꙋ бг҃ꙋ мольба́ми.

Бг҃оро́диченъ: Стопа́мъ послѣ́дꙋѧ, собо́ръ прпⷣбныхъ, и҆зꙿ чре́ва твоегѡ̀ возсїѧ́вшемꙋ неизрече́ннымъ ржⷭ҇тво́мъ, дв҃о мт҃и, съ нбⷭ҇ными ли̑ки сочета́сѧ: съ ни́миже моли́сѧ, и҆ и҆спросѝ на́мъ ѡ҆чище́нїе, чтꙋ́щымъ тѧ̀.

Пѣ́снь є҃.

І҆рмо́съ: Къ тебѣ̀ ѹ҆́тренюю, всѣ́хъ творцꙋ̀, преимꙋ́щемꙋ всѧ́къ ѹ҆́мъ мӏ́рови: занѐ свѣ́тъ повелѣ̑нїѧ твоѧ̑, въ ни́хже наста́ви мѧ̀.

Ѿ ю҆́ности воспита́нъ добродѣ́телїю, воздержа́нїѧ болѣ́зньми и҆ пѡ́ты по́стными въ мꙋ́жа дости́глъ є҆сѝ, и҆ въ мѣ́рꙋ дх҃о́внꙋю во́зраста хрⷭ҇то́ва.

Ѡ҆бновле́нїе внꙋ́треннѧгѡ человѣ́ка, и҆ свобо́дꙋ дꙋ́ха твоегѡ̀, ꙗ҆́же во хрⷭ҇тѣ̀, стѧжа́лъ є҆сѝ, ѻ҆́тче прпⷣбне, прилѣплѧ́ѧсѧ бг҃ꙋ въ мл҃твѣ вы́нꙋ, глаго́лѧ: гдⷭ҇и і҆и҃се хрⷭ҇тѐ, поми́лꙋй мѧ̀, грѣ́шнаго.

Бжⷭ҇твенный ра́зꙋмъ, ѻ҆́тче, стѧжа́въ, и҆́мже пра́вѡ разꙋмѣва́ѧ, ꙗ҆́кѡ зѣ́ницꙋ ѻ҆́ка, храни́лъ є҆сѝ правосла́вныѧ вѣ́ры догма́ты, та́же є҆ѵⷢ҇лїа писа̑нїѧ, є҆ще́ же ст҃ы́хъ а҆пⷭ҇лъ и҆ ѻ҆тє́цъ.

Бг҃оро́диченъ: Не раздѣлѧ́юще соединє́ннаѧ, нижѐ слива́юще, є҆ди́наго во двꙋ̀ є҆стєствꙋ̀ хрⷭ҇та̀ сла́вимъ, и҆зꙿ тебє̀ воплоще́ннаго сло́ва, зовꙋ́ще: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

И҆́нъ. І҆рмо́съ: Ѿ но́щи невѣ́дѣнїѧ, по дꙋшелови́тельномꙋ пꙋтѝ при́снѡ блꙋдѧ́щаго, свѣ́томъ ра́зꙋма твоегѡ̀, гдⷭ҇и, преднаставлѧ́ѧ мѧ̀, на стезю̀ за́повѣдей твои́хъ напра́ви.

Житїѐ нескве́рно, терпѣ́нїе и҆ кро́тость, и҆ любо́вь нелицемѣ́рнꙋ, воздержа́нїе безмѣ́рно, всено́щное стоѧ́нїе, ᲂу҆миле́нїе бжⷭ҇твенное, вѣ́рꙋ и҆ наде́ждꙋ и҆́стиннꙋ, съ ми́лованїемъ, ѻ҆́тче, до́брѣ стѧжа́лъ є҆сѝ.

А҆́ще и҆ бли́зокъ бы́лъ є҆сѝ къ бг҃ꙋ, ѻ҆ба́че негото́ва и҆ не сконча́вша ꙗ҆̀же ко сп҃се́нїю мни́лъ є҆сѝ себѐ, при́снѡ трꙋжда́ѧсѧ, вы́нꙋ мл҃твꙋ і҆и҃совꙋ творѧ̀, и҆ въ па́мѧти держа̀ послѣ̑днѧѧ своѧ̑.

Жела́нїемъ дх҃а пло́ти жела́нїе ᲂу҆вѧди́лъ є҆сѝ, и҆ себѣ̀, бл҃же́нне, ѡ҆брꙋчи́лъ є҆сѝ сожи́тельницꙋ чⷭ҇тотꙋ̀: ѿ неѧ́же ча̑да тебѣ̀ роди́шасѧ, всѧ̑ добродѣ́тєли.

Бг҃оро́диченъ: Дв҃о чⷭ҇тна́ѧ, неискꙋсобра́чнаѧ чⷭ҇таѧ бл҃гослове́ннаѧ, низпа́дающихъ и҆справле́нїе, согрѣша́ющихъ проще́нїе, сп҃си́ мѧ, блꙋ́днаго, ѿ вѣ́чнꙋющагѡ пла́мене, и҆ ѡ҆сꙋжде́нїѧ. Пѣ́снь ѕ҃.

І҆рмо́съ: Возведѝ ѿ тли́ мѧ, гдⷭ҇и бж҃е мо́й, і҆ѡ́на вопїѧ́ше, и҆ а҆́зъ вопїю́ ти: и҆зꙿ глꙋбины̀ и҆зба́ви мѧ̀, сп҃се, мно́гихъ мои́хъ ѕѡ́лъ, и҆ къ свѣ́тꙋ твоемꙋ̀, молю́сѧ, наста́ви.

Недосто́йна себѐ степе́нѧ сщ҃е́нства помышлѧ́лъ є҆сѝ, ѻ҆́тче паӏ́сїе, ѿ ѻ҆тцє́въ же дх҃о́вныхъ ᲂу҆вѣща́нъ, и҆ моле́нїю бра́тїи приклони́всѧ, прїѧ́лъ є҆сѝ чи́нъ се́й, послꙋшли́въ бы́въ, во є҆́же наста́вити слове́сное твоѐ ста́до ко сп҃се́нїю.

Неисхо́днѡ въ ке́ллїи сѣдѧ̀, ᲂу҆мо́мъ же всѧ̑ческаѧ ѡ҆б̾е́млѧ, разсꙋжда́лъ є҆сѝ разли̑чныѧ ꙗ҆́звы дх҃ѡ́вныѧ, и҆ всѣ̑мъ цѣли́тельный пла́стырь прилага́лъ є҆сѝ, ѻ҆́тче ст҃ы́й.

Но́ваго тѧ̀ мѡѷсе́а, ѻ҆́тче, позна́хомъ, страсте́й побѣди́телѧ. ꙗ҆́коже бо ѻ҆́нъ дре́вле а҆мали́ка побѣди́въ, лю́ди и҆зведѐ: ты́ же, ѻ҆́тче, мно́жество мона́шествꙋющихъ въ зе́млю ѡ҆бѣтова́нїѧ ра́йскагѡ приве́лъ є҆сѝ.

Бг҃оро́диченъ: Но́ва родила̀ є҆сѝ сн҃а, собезнача́льна, чⷭ҇таѧ, ѻ҆ц҃ꙋ̀ безнача́льномꙋ, и҆ ѡ҆бнови́ла є҆сѝ є҆ди́на ѡ҆бетша́вшее лю́тыми престꙋплє́нїи на́ше є҆стество̀: тѣ́мже тѧ̀ согла́снѡ пое́мъ, бцⷣе.

И҆́нъ.

І҆рмо́съ: І҆ѡ́нꙋ въ ки́тѣ, гдⷭ҇и, є҆ди́наго всели́лъ є҆сѝ, мене́ же, свѧ́заннаго мре́жами вра́жїими, ꙗ҆́кѡ ѿ тлѝ ѻ҆́наго, сп҃сѝ.

Ве́селѡ прїе́млѧ просѧ́щыѧ ᲂу҆ тебє̀ по́мощи, простира́лъ є҆сѝ рꙋ́цѣ на подꙿѧ́тїе и҆́хъ. неѕло́бивый нра́въ и҆ кро́ткое срⷣце, прпⷣбне, и҆мѣ́ѧ, бы́лъ є҆сѝ ста́рецъ ди́вный.

А҆́ще и҆ ра́ны недꙋ̑гъ на тѣлесѝ носи́лъ є҆сѝ, но ра̑ны дꙋшє́вныѧ и҆сцѣлѧ́лъ є҆сѝ приходѧ́щихъ къ тебѣ̀, бл҃ги́ми словесы̀, ѻ҆́тче паӏ́сїе.

Лицѐ твоѐ, ѻ҆́тче, свѣ́тло бѧ́ше, ꙗ҆́кѡ а҆́гг҃ла бж҃їѧ, взо́ръ же ти́хъ, сло́во смире́нно, и҆ де́рзости чꙋ́ждо. всѣ́хъ любо́вїю привлека́лъ є҆сѝ къ себѣ̀.

Бг҃оро́диченъ: Херꙋві̑мъ превы́шшꙋю тѧ̀, и҆ серафі̑мъ, пое́мъ, пречⷭ҇таѧ: є҆гѡ́же бо трепе́щꙋтъ, носи́ла є҆сѝ пло́тїю, бг҃а на́шего, на рꙋкꙋ̀ твоє́ю.

Конда́къ, гла́съ и҃. Подо́бенъ: Взбра́нной:

Ѿ ю҆́ности возлюби́лъ є҆сѝ хрⷭ҇та̀, прпⷣбне, и҆ па́че всегѡ̀ возжелѣ́лъ є҆сѝ съ бг҃омъ бы́ти: тѣ́мже ᲂу҆клони́лсѧ є҆сѝ мӏ́ра и҆ всѣ́хъ, ꙗ҆̀же въ не́мъ, посто́мъ же и҆ мл҃твою въ пꙋсты́ни подвиза́лсѧ є҆сѝ, и҆ ча̑да въ не́й возрасти́лъ є҆сѝ, наꙋча́ѧ и҆̀хъ ко сп҃се́нїю. сегѡ̀ ра́ди зове́мъ тѝ: ра́дꙋйсѧ, мл҃твы непреста́нныѧ ᲂу҆чи́телю, паӏ́сїе прпⷣбне, ѻ҆́тче на́шъ.

І҆́косъ: Въ срⷣцѣ носѧ̀ ѻ҆́гнь блгⷣти, возжига́лъ є҆сѝ свѣти́льники мꙋ́дрѡ текꙋ́щихъ въ срѣ́тенїе гдⷭ҇ꙋ хрⷭ҇тꙋ̀, попалѧ́ѧ тє́рнїѧ вселꙋка́выхъ страсте́й мл҃твою і҆и҃совою, насажда́ѧ въ срⷣца́хъ ча́дъ твои́хъ сѣ́мена бжⷭ҇твенныѧ любвѐ, да принесꙋ́тъ дꙋ́ха плоды̀. съ ни́миже вопїе́мъ тебѣ̀ си́це: Ра́дꙋйсѧ, любвѐ бж҃їѧ и҆спо́лненный: ра́дꙋйсѧ, є҆́юже согрѣва́еши къ тебѣ̀ приходѧ́щыѧ. Ра́дꙋйсѧ, всегда̀ ра́дꙋѧйсѧ съ ра́дꙋющимисѧ: ра́дꙋйсѧ, скорбѧ́щихъ бл҃годаре́нїю наꙋча́ѧй.

Ра́дꙋйсѧ, ми́ра дꙋше́внагѡ стѧжа́телю: ра́дꙋйсѧ, всѣ́хъ ѡ҆́крестъ себє̀ сп҃са́ѧй. Ра́дꙋйсѧ, сто́лпе долготерпѣ́нїѧ: ра́дꙋйсѧ, въ ско́рбехъ и҆ печа́лехъ ᲂу҆тѣше́нїе. Ра́дꙋйсѧ, во бл҃гости хрⷭ҇та̀ подража́телю: ра́дꙋйсѧ, млⷭ҇рдїѧ и҆спо́лненный. Ра́дꙋйсѧ, вѣ́ры непосты́дныѧ пра́вило: ра́дꙋйсѧ, кро́тости и҆ смире́нїѧ ѡ҆́бразе. Ра́дꙋйсѧ, мл҃твы непреста́нныѧ ᲂу҆чи́телю, паӏ́сїе прпⷣбне, ѻ҆́тче на́шъ. Пѣ́снь з҃.

І҆рмо́съ: Ꙗ҆́коже дре́вле бл҃гочⷭ҇ти̑выѧ трѝ ѻ҆́троки ѡ҆роси́лъ є҆сѝ въ пла́мени халде́йстѣмъ, свѣ́тлымъ бж҃ества̀ ѻ҆гне́мъ, и҆ на́съ ѡ҆зарѝ, бл҃гослове́нъ є҆сѝ, взыва́ющыѧ, бж҃е ѻ҆҆҆тє́цъ на́шихъ.

Оу҆че́ньми ст҃ы́хъ ѻ҆тє́цъ насыще́нъ, тѣ́хъ подража́ти и҆спо́лненъ бы́лъ є҆сѝ жела́нїемъ, ревнꙋ́ѧ же ѡ҆ бо́льшемъ, на слове́нскꙋю рѣ́чь преложи́лъ є҆сѝ, и҆ тѣ́хъ наставле́нїй ѻ҆рга́нъ согла́сенъ ꙗ҆ви́лсѧ є҆сѝ.

Ѡ҆брѣ́лъ є҆сѝ премꙋ́дрость, сїѧ́ бо чⷭ҇тнѣ́йши є҆́сть ка́менїй многоцѣ́нныхъ, є҆́юже наказꙋ́еши ча̑да твоѧ̑ ѿ прпⷣбныхъ ѹ҆́стъ, глаго́лѧ: да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а ст҃а.

Моли́тисѧ, ѻ҆́тче, не преста́й ѡ҆ ста́дѣ твое́мъ, є҆́же мно́гими пѡ́ты и҆ трꙋды̑ стѧжа́лъ є҆сѝ, и҆зба́вити всѣ́хъ ѡ҆бстоѧ́нїй, бѣ́дъ же и҆ скорбе́й: да всѝ тебѐ, ꙗ҆́кѡ чадолюби́ва ѻ҆тца̀, воспѣва́емъ.

Бг҃оро́диченъ: Неискꙋсомꙋ́жнѡ сло́во па́че сло́ва ро́ждшаѧ, дв҃о неискꙋсобра́чнаѧ чⷭ҇таѧ, напа́стей и҆змѝ на́съ, и҆ всѧ́кихъ бѣ́дъ, и҆ вре́да дꙋшетлѣ́нна, и҆ страсте́й.

И҆́нъ. І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀: сегѡ̀ ра́ди ѻ҆́троцы въ пещѝ, ра́дованною ного́ю ꙗ҆́кѡ во цвѣ́тницѣ, ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Сни́де блгⷣть въ дꙋ́шꙋ твою̀, прпⷣбне, ѡ҆роша́ющи добродѣ́телей свѣ̑тлаѧ прозѧбє́нїѧ, восхожде́нїе полага́ющи тѝ къ любвѐ соверше́нїю, да всѣ́хъ вмѣсти́ши въ срⷣцѣ твое́мъ.

И҆̀же де́рзостїю покꙋша́ющымсѧ къ видѣ́нїю восходи́ти, въ прельще́нїе си̑мъ впа́дати глаго́лютъ ѻ҆тцы̀ ст҃ӏ́и: сегѡ̀ ра́ди внима́лъ є҆сѝ твоемꙋ̀ ста́дꙋ, прпⷣбне, ѡ҆́бразъ трезве́нїѧ бы́въ.

Те́плымъ жела́нїемъ непреста́ннѡ призыва́лъ є҆сѝ гдⷭ҇а і҆и҃са хрⷭ҇та̀ въ срⷣцѣ твое́мъ, и҆дѣ́же всели́сѧ дх҃ъ ст҃ы́й, ѡ҆чища́ѧ, просвѣща́ѧ и҆ ѡ҆сщ҃а́ѧ тѧ̀.

Бг҃оро́диченъ: Гдⷭ҇ь и҆зꙿ тебє̀ пло́тїю ражда́етсѧ, всѣ́хъ гпⷭ҇жꙋ̀ тѧ̀ тва́рей содѣ́лавъ: є҆го́же молѝ, чⷭ҇таѧ, ꙗ҆́кѡ могꙋ́щаго и҆зба́вити дꙋ́шы на́шѧ дре́внѧгѡ врага̀. Пѣ́снь и҃.

І҆рмо́съ: На прⷭ҇то́лѣ херꙋвӏ́мстѣ носи́маго, сщ҃е́нницы, по́йте, лю́дїе, превозноси́те во всѧ̑ вѣ́ки.

Црⷭ҇твїѧ бж҃їѧ внꙋ́трь себє̀ взыска́лъ є҆сѝ, дх҃омъ и҆ и҆́стиною бг҃ꙋ покланѧ́ѧсѧ, и҆ же́ртвꙋ чⷭ҇тꙋ приносѧ̀: срⷣце сокрꙋше́нно и҆ смире́нно, восхвалѧ́ющее бг҃а, сла́вимаго во всѧ̑ вѣ́ки.

При́снымъ призыва́нїемъ и҆́мене і҆и҃сова, би́лъ є҆сѝ неви̑димыѧ сꙋпоста́ты. си́мъ всемо́щнымъ ѡ҆рꙋ́жїемъ низпрове́ргъ тѣ́хъ кова̑рствїѧ, ны́нѣ побѣ́днꙋю пое́ши бг҃ꙋ, сла́вимомꙋ во всѧ̑ вѣ́ки.

Мл҃тва непоро́чнаѧ и҆сто́чникъ всѣ́хъ бл҃ги́хъ є҆́сть: є҆́же трезве́нїе, ѡ҆чище́нїе, просвѣще́нїе и҆ восхожде́нїе къ нача́льномꙋ свѣ́тꙋ, всѣ̑мъ держа́щымсѧ є҆ѧ̀, да сы́нове бж҃їи бꙋ́дꙋтъ, восхвалѧ́юще є҆го̀ во всѧ̑ вѣ́ки.

Бг҃оро́диченъ: Просте́рши рꙋ́кꙋ бл҃гоꙋтро́бїѧ, бг҃ороди́тельнице, всѧ́кагѡ мѧ̀ и҆змѝ ѡ҆сꙋжде́нїѧ, къ тебѣ̀ прибѣга́ющаго, и҆ тебѣ̀ припа́дающа, и҆ призыва́юща твою̀ по́мощь, тебе́ же восхвалѧ́юща во всѧ̑ вѣ́ки. И҆́нъ.

І҆рмо́съ: Побѣди́тєли мꙋчи́телѧ и҆ пла́мене блгⷣтїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Смиренномꙋ́дрїемъ и҆ во́ли своеѧ̀ предꙿ бра́томъ ѿсѣче́нїемъ, дости́глъ є҆сѝ є҆динодꙋ́шїѧ со все́ю бра́тїею, ѻ҆́тче паӏ́сїе, покрыва́ѧ и҆̀хъ кро́вомъ кри́лъ мл҃твы твоеѧ̀, да всѝ є҆ди́но бꙋ́дꙋтъ, є҆ди́ными ᲂу҆сты̀ вопїю́ще: бл҃гослове́нъ є҆сѝ, бж҃е ѻ҆҆҆тє́цъ на́шихъ.

Въ вы́шнюю вше́лъ є҆сѝ бра́чнꙋю трапе́зꙋ цр҃ѧ̀ хрⷭ҇та̀, во ѻ҆де́ждꙋ ѡ҆дѣ́ѧнъ, досто́йнꙋ зовꙋ́щемꙋ. тѣ́мъ и҆ возле́глъ є҆сѝ, вопїѧ̀: бл҃гослове́нъ є҆сѝ, бж҃е ѻ҆тє́цъ на́шихъ.

Ѻ҆́ч҃е пребл҃гӏ́й, и҆ сн҃е прест҃ы́й, и҆ дш҃е ст҃ы́й: трⷪ҇це ст҃а́ѧ, нераздѣ́льный бж҃е, сп҃си́ мѧ, грѣ́шнаго! взыва́лъ є҆сѝ, паӏ́сїе, бл҃гословлѧ́ѧ бг҃а ѻ҆тє́цъ на́шихъ.

Бг҃оро́диченъ: Подꙿ кро́въ, влⷣчце, всемо́щныхъ мл҃твъ твои́хъ всѝ прибѣга́емъ, ѡ҆ѕло́бленнїи лю́тыми согрѣшє́нїи. тѧ́ бо предста́тельницꙋ и҆мꙋ́ще, вопїе́мъ: бл҃гослове́нъ є҆сѝ, бж҃е ѻ҆тє́цъ на́шихъ.

Пѣ́снь ѳ҃.

І҆рмо́съ: На сїна́йстѣй горѣ̀ ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бжⷭ҇тва̀ заче́ншꙋю во чре́вѣ: данїи́лъ же тѧ̀ ви́дѣ го́рꙋ несѣко́мꙋю, же́злъ прозѧ́бшїй и҆са́їа взыва́ше, ѿ ко́рене дв҃дова.

Є҆гда̀ на вели́чїе трꙋдѡ́въ твои́хъ взира́емъ и҆ блгⷣть, ѿ гдⷭ҇а да́ннꙋю тѝ, прпⷣбне, ᲂу҆жаса́етсѧ срⷣце на́ше: ка́кѡ ча́сть и҆мѣ́ти и҆́мамы съ тобо́ю, небрегꙋ́ще ѡ҆ сп҃се́нїи свое́мъ;

На́съ, престꙋпи́вшихъ твоѧ̑ велѣ̑нїѧ, зави́стливыхъ, лꙋка́выхъ и҆ неключи́мыхъ рабѡ́въ, простѝ, неѕло́биве ѻ҆́тче, и҆ моли́сѧ бг҃ꙋ, дарова́ти на́мъ вре́мѧ къ покаѧ́нїю.

Жи́знь на́ша и҆ждива́етсѧ, днӏ́е на́ши преполови́шасѧ, наде́жды ѡ҆кра́даеми є҆смы̀, грѣхѡ́въ на́шихъ ра́ди, и҆ недоꙋмѣ́емъ: ка́кѡ и҆́мамы ѿвѣща́ти ѡ҆ дѣ́лѣхъ на́шихъ; но мо́лимъ тѧ̀, ѻ҆́тче, моли́сѧ вы́нꙋ за грѣ̑шнаѧ ча̑да твоѧ̑!

Бг҃оро́диченъ: Лѣ́ностнѡ живо́тъ на́шъ и҆жди́въ, и҆ страстьмѝ срⷣце ѡ҆скверни́въ, пристꙋпа́емъ къ тебѣ̀, влⷣчце, ᲂу҆миле́нїемъ дꙋшѝ, и҆ мо́лимсѧ, ᲂу҆ще́дрити и҆ сп҃сти́ ны, покаѧ́нїѧ ѡ҆́бразы ᲂу҆тве́рждши.

И҆́нъ. І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀, бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Оу҆вы̀ на́мъ! такова́го наста́вника и҆мꙋ́щымъ, и҆ въ неразꙋ́мїи пребыва́ющымъ, и҆ въ нерадѣ́нїи. но ꙗ҆вѝ на́мъ любо́вь свою̀, бл҃же́нне ѻ҆́тче, и҆ и҆сто́ргни на́съ и҆зꙿ глꙋбины̀ ᲂу҆ны́нїѧ, мо́лимтисѧ.

Не ѿчаѧва́йтесѧ, Ѽ бра́тїе! печа́ль на ра́дость преложи́те, трꙋбы̀ дх҃о́вныѧ гла́сомъ на бра́нь но́вꙋю со враго́мъ ѡ҆полчи́тесѧ, бг҃оно́снаго ѻ҆тца̀ на́шего паӏ́сїа призови́те, и҆ поꙋче́нїемъ є҆гѡ̀ срⷣца̀ ва̑ша ᲂу҆крѣпи́те, сла́вѧще бг҃а ди́внаго во ст҃ы́хъ свои́хъ.

Житїѐ твоѐ, рыда́ѧ при́снѡ, сконча́лъ є҆сѝ: жела́нїе бо бжⷭ҇твенное тѧ̀, ѻ҆́тче, внꙋ́трь распалѝ. и҆ ны́нѣ на нб҃сѣ́хъ ѡ҆брѣ́лъ є҆сѝ ᲂу҆тѣше́нїе, кꙋ́пнѡ съ прпⷣбными ли̑ки ра́дꙋѧсѧ: ны́нѣ же не забꙋ́ди и҆ на́съ, восхвалѧ́ющихъ па́мѧть твою̀ вѣ́рнѡ.

Бг҃оро́диченъ: Вѣті̑йскаѧ ᲂу҆ста̀ не возмо́гꙋтъ досто́йнѡ восхвали́ти тѧ̀, Ѽ всепѣ́таѧ, ꙗ҆́же херꙋві̑мъ и҆ всеѧ̀ тва́ри превы́шшаѧ, но моли́сѧ съ паӏ́сїемъ прпⷣбнымъ влⷣцѣ всѣ́хъ, сп҃сти́сѧ рабѡ́мъ твои̑мъ.

Свѣти́ленъ.

Подо́бенъ: Жєны̀, ᲂу҆слы́шите:

Просвѣтѝ на́съ* повелѣ̑нїи твои́ми, хрⷭ҇тѐ бж҃е,* мл҃твами свѣтоно́снагѡ нача́льника* на́шегѡ паӏ́сїа,* и҆ напра́ви стєзѝ на́шѧ,* Ѽ сп҃се, по словесѝ твоемꙋ̀. Два́жды.Сла́ва, и҆ ны́нѣ:

Ѿ мӏ́ра сокры́вшисѧ, ми́ра ра́ди, и҆́же внꙋ́трь, всели́ласѧ є҆сѝ, прест҃а́ѧ, во ст҃а̑ѧ ст҃ы́хъ, въ сщ҃е́нномъ молча́нїи, и҆ въ мл҃твѣ непреста́ннѣй, и҆ въ поꙋче́нїи писа́нїѧ пребыва́ющи, и҆ ѿ дѣѧ́нїѧ къ видѣ́нїю восходѧ́щи. си̑мъ ᲂ҆̀убо навы́че ѿ тебє̀ паӏ́сїй прпⷣбный.

На хвали́техъ стїхи̑ры на д҃, гла́съ и҃.

Подо́бенъ: Ѽ пресла́внагѡ чꙋдесѐ:

Сла́ва тебѣ̀, хрⷭ҇тѐ бж҃е,* свѣ́те превѣ́чный,* ꙗ҆́кѡ показа́лъ є҆сѝ на́мъ,* во тьмѣ̀ глꙋбо́цѣй сѣдѧ́щымъ,* такова́го свѣти́льника,* зарѧ́ми ѡ҆блиста́юща* свѣ́тлыхъ дѣѧ́нїй,* и҆ ѡ҆зарѧ́юща вѣ́рныхъ срⷣца̀* свѣ́томъ ᲂу҆че́нїй свои́хъ. Два́жды.

Сла́ва тебѣ̀, хрⷭ҇тѐ бж҃е,* неисчерпа́емаѧ млⷭ҇ти бе́здно!* ꙗ҆́кѡ дарова́лъ є҆сѝ на́мъ,* жа́ждею и҆стаѧва́ющымъ,* такова́го и҆сто́чника,* и҆́же дово́льнѣ напои́лъ є҆́сть на́съ,* воды̀, текꙋ́щїѧ въ живо́тъ вѣ́чный,* ю҆́же пїю́ще, не вжа́ждемсѧ во вѣ́ки,* нижѐ преста́немъ велича́ти твоего̀ ᲂу҆го́дника.

Прїиди́те, бра́тїе,* сни́демъ въ клѣ́ть дꙋше́внꙋю,* мл҃твы творѧ́ще и҆ вопїю́ще:* ᲂу҆чи́телю дх҃о́вный,* соберѝ на́шъ ѹ҆́мъ расточе́нный,* да низложи́мъ противобо́рца,* и҆́менемъ гдⷭ҇нимъ,* ѡ҆бога́щшесѧ нетлѣ́нїемъ,* мл҃твами твои́ми, прпⷣбне.

Сла́ва, гла́съ и҃:

Зако́нѡмъ бжⷭ҇твеннымъ послѣ́дꙋѧ, и҆ повелѣ́нїємъ повинꙋ́ѧсѧ сотво́ршагѡ, законополо́жникъ ꙗ҆ви́лсѧ є҆сѝ мона́хѡмъ, и҆ пра́вило и҆звѣ́стнѣйшее, наказа́тель безꙋ̑мнымъ, и҆ наста́вникъ заблꙋ́ждшымъ, и҆ свѣти́льникъ во тьмѣ̀ сꙋ́щымъ, пресла́вне.

И҆ ны́нѣ, бг҃оро́диченъ, гла́съ то́йже:

Влⷣчце, прїимѝ мл҃твы ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.

Славосло́вїе вели́кое. Є҆ктєнїѝ, и҆ ѿпꙋ́стъ.

На лїтꙋргӏ́и слꙋ́жба всѧ̀ прпⷣбнагѡ.

Є҆ѵⷢ҇лїе ѿ лꙋкѝ, зача́ло к҃д.