Мѣ́сѧца і҆аннꙋа́рїа, въ недѣ́лю, ближа́йшꙋю къ к҃є-мꙋ дню̀.

Слꙋ́жба ст҃ы̑мъ новомч҃никѡмъ и҆ и҆сповѣ́дникѡмъ рѡссі̑йскимъ.

Соверша́етсѧ па́мѧть и҆́хъ въ недѣ́лю, ближа́йшꙋю къ к҃є і҆аннꙋа́рїа. И҆ а҆́ще бꙋ́детъ к҃є

і҆аннꙋа́рїа въ понедѣ́льникъ, вто́рникъ и҆лѝ сре́дꙋ, пое́мъ новомч҃никѡмъ въ недѣ́лю,

ꙗ҆́же є҆́сть предꙿ си́мъ: а҆́ще ли бꙋ́детъ въ четверто́къ, пѧто́къ и҆лѝ сꙋббѡ́тꙋ, пое́мъ и҆̀мъ

въ недѣ́лю послѣ́дꙋющꙋю. А҆́ще прилꙋчи́тсѧ к҃є і҆аннꙋа́рїа въ де́нь недѣ́льный, пое́мъ

слꙋ́жбꙋ новомч҃никѡмъ въ то́й же де́нь, слꙋ́жбꙋ же ст҃о́мꙋ григо́рїю бг҃осло́вꙋ въ к҃з

де́нь і҆аннꙋа́рїа кꙋ́пнѡ со слꙋ́жбою ст҃и́телю і҆ѡа́ннꙋ златоꙋ́стомꙋ. Предварѧ́етъ тогда̀

слꙋ́жба ст҃и́телю григо́рїю.

Вѣ́ домо б ꙋ́д и и҆ с ї ѐ : слꙋ́жба сїѧ̀ быва́етъ, наче́нши ѿ к҃в и҆ восходѧ́щи до к҃и

і҆аннꙋа́рїа. И҆ а҆́ще прилꙋчи́тсѧ тогда̀ недѣ́лѧ мытарѧ̀ и҆ фарїсе́а, и҆лѝ блꙋ́днагѡ, и҆лѝ

мѧсопꙋ́стнаѧ, пое́мъ новомч҃никѡмъ съ трїѡ́дїю, ꙗ҆́коже трїе́мъ ст҃и́телємъ по

ма́рковой главѣ̀. А҆́ще прилꙋчи́тсѧ въ то́йже де́нь па́мѧть вели́кагѡ ст҃а́гѡ, пое́мъ

ст҃о́мꙋ вели́комꙋ въ сꙋббѡ́тꙋ ближа́йшꙋю, и҆лѝ въ и҆ны́й де́нь. А҆́ще же бꙋ́детъ

гдѣ̀ въ то́й де́нь хра́мъ, пое́мъ слꙋ́жбꙋ хра́ма съ трїѡ́дїю непремѣ́ннѡ, ст҃ы̑мъ же

новомч҃никѡмъ во грѧдꙋ́щꙋю недѣ́лю.

На ма́лѣй вече́рни.

На Гдⷭ҇и, воззва́хъ: стїхи̑ры воскрⷭ҇ны д҃.

Сла́ва, новомч҃никѡвъ, гла́съ и҃:

Землѧ̀ рꙋ́сскаѧ нб҃о земно́е бы́сть: въ свои́хъ разсѣ́линахъ тѣлеса̀ новомч҃никѡвъ и҆ и҆сповѣ́дникѡвъ сокры́вши, и҆ тѣ́хъ нбⷭ҇ною сла́вою просїѧ́вши, и҆̀же свои́ми кровьмѝ ѡ҆роси́ша ю҆̀, пострада́вше ѿ слꙋ́гъ сатани́нскихъ за вѣ́рꙋ хрⷭ҇то́вꙋ, во и҆скꙋпле́нїе грѣхѡ́въ богоѿстꙋпле́нїѧ. И҆ ны́нѣ: бг҃оро́диченъ, гла́са ма́лыѧ вече́рни.

На стїхо́внѣ стїхи́ра воскрⷭ҇на є҆ди́на,

и҆ стїхи̑ры новомч҃никѡвъ, гла́съ а҃:

Ѽвели́цїи страстоте́рпцы новомч҃ницы рѡссӏ́йстїи, съ любо́вїю припа́даемъ къ ва́мъ, и҆ прославлѧ́юще ва́шѧ по́двиги, бл҃гоговѣ́йнѡ лобыза́емъ ра̑ны ва́шѧ, моли́те, мо́лимсѧ, ѡ҆ дꙋша́хъ на́шихъ.

Стӏ́хъ: Разже́глъ ны̀ є҆сѝ, ꙗ҆́коже разжиза́етсѧ сребро̀.

Ѽ сла́внїи новомч҃ницы рѡссӏ́йстїи, є҆гда̀ ѡ҆скꙋдѣва́ше вѣ́ра, ᲂу҆крѣплѧ́сте ю҆̀ и҆сповѣ́данїемъ ва́шимъ, є҆гда̀ и҆зсѧка́ше любы̀, любвѐ ра́ди ко хрⷭ҇тꙋ̀ да́сте себѐ на мꙋ̑ки и҆ сме́рть, є҆гда̀ колеба́шесѧ наде́жда, ᲂу҆твержда́сте ю҆̀ ва́шимъ ᲂу҆пова́нїемъ на бг҃а, є҆го́же моли́те, да ᲂу҆крѣпи́тъ въ на́съ вѣ́рꙋ, наде́ждꙋ и҆ любо́вь.

Стӏ́хъ: Воззва́ша првⷣнїи и҆ гдⷭ҇ь ᲂу҆слы́ша и҆̀хъ.

Не человѣ́цы спаса́ютъ цр҃ковь, и҆ ничто́же по́льзꙋетъ согла́сїе со враги̑ є҆ѧ̀, но цр҃ковь сп҃са́етъ человѣ́ки си́лою хрⷭ҇то́вою, ꙗ҆́коже по́двигъ ва́шъ показа̀. Ѽ непоколеби́мїи новомч҃ницы рѡссӏ́йстїи, вои́стиннꙋ є҆стѐ сла́ва цр҃кве, ѡ҆ не́йже прилѣ́жнѡ моли́тесѧ, да непоколе́блемꙋ ᲂу҆тверди́тъ ю҆̀ хрⷭ҇то́съ.

Сла́ва, гла́съ в҃:

Ѽ ди́вное во́инство но́выхъ страда́льцєвъ рѡссӏ́йскихъ! кто̀ возмо́жетъ досто́йнѡ просла́вити ва́съ! вои́стиннꙋ бл҃же́нна землѧ̀, напи́вшаѧсѧ кровьмѝ ва́шими, гра́ды же и҆ вє́си є҆ѧ̀ та́йнѡ ѡ҆ст҃и́шасѧ, воспрїи́мше чⷭ҇тны̑ѧ ѡ҆ста́нки ва́шѧ, мно́жицею безꙿ пѣ́нїѧ цр҃ко́внагѡ, та́кожде же и҆ безꙿ погребе́нїѧ чⷭ҇тна́гѡ. но моли́тесѧ, ст҃ӏ́и, ѡ҆ странѣ̀ ва́шей и҆ ѡ҆ всѣ́хъ чтꙋ́щихъ ва́съ.

И҆ ны́нѣ, бг҃оро́диченъ, гла́съ то́йже:

Кто́ тѧ по достоѧ́нїю похва́литъ и҆ ᲂу҆бл҃жи́тъ, ѻ҆трокови́це бг҃оневѣ́стнаѧ, ѡ҆ є҆́же тобо́ю бы́вшемъ мӏ́рови и҆збавле́нїи; бл҃годарѧ́ще ѹ҆́бѡ зове́мъ тѝ, глаго́люще: ра́дꙋйсѧ, ꙗ҆́же а҆да́ма ѡ҆божи́вшаѧ, и҆ разстоѧ̑щаѧ совокꙋпи́вшаѧ. ра́дꙋйсѧ, просвѣти́вшаѧ ро́дъ на́шъ свѣтоно́снымъ воскрⷭ҇нїемъ сн҃а твоегѡ̀ и҆ бг҃а на́шегѡ: тѧ́ бо хрⷭ҇тїа́нскїй ро́дъ непреста́ннѡ ᲂу҆бл҃жа́емъ.

Тропа́рь воскⷭ҇рнъ, Сла́ва:

Тропа́рь новомч҃никѡвъ, гла́съ д҃:

Цвѣ́ти рѡссӏ́йскагѡ лꙋ́га дх҃о́внагѡ, въ годи́нꙋ лю́тыхъ гоне́нїй ди́внѡ процвѣ́тшїи, новомч҃ницы и҆ и҆сповѣ̑дницы безчи́сленнїи: ст҃и́телїе, црⷭ҇твеннїи страстоте́рпцы и҆ па́стырїе, мона́си и҆ мїрстӏ́и, мꙋ́жїе, жены̑ же и҆ дѣ́ти, до́брый пло́дъ въ терпѣ́нїи хрⷭ҇тꙋ̀ прине́сшїи, моли́тесѧ є҆мꙋ̀, ꙗ҆́кѡ насади́телю ва́шемꙋ, да и҆зба́витъ лю́ди своѧ̑ ѿ безбо́жныхъ и҆ ѕлы́хъ, да ᲂу҆твержда́етсѧ же цр҃ковь рꙋ́сскаѧ кровьмѝ и҆ страда̑нїи ва́шими, во сп҃се́нїе дꙋ́шъ на́шихъ.

И҆ ны́нѣ, бг҃оро́диченъ, гла́съ то́йже.

Є҆ктенїа̀, и҆ ѿпꙋ́стъ.

На вели́цѣй вече́рни.

На Гдⷭ҇и, воззва́хъ: стїхи̑ры на і: воскрⷭ҇ны д҃,

и҆ новомч҃никѡмъ ѕ҃, гла́съ а҃:

Нача́ло ны́нѣ положи́мъ, Ѽ бра́тїе, моле́нїємъ тє́плымъ къ нѡ́вымъ ᲂу҆го́дникѡмъ бж҃їимъ: тӏ́и бо стра́шными мꙋчє́нїи ѡ҆чища́еми, ро́ждїе плодоно́сныѧ лозы̀ хрⷭ҇то́вы ꙗ҆ви́шасѧ, сла́достїю блгⷣти ѻ҆би́льнѡ напоѧ́емїи, во бл҃гоꙋха́нїи ст҃ости и҆́хъ на́мъ предлага́емїи, да со ᲂу҆миле́нїемъ назида́ющесѧ по́двигомъ и҆́хъ, принесе́мъ бг҃ꙋ и҆ мы̀ пло́дъ покаѧ́нїѧ.

Нача́ло креще́нїѧ стра́шнагѡ, и҆́мже па́ки крести́сѧ землѧ̀ рꙋ́сскаѧ, восхвали́те, Ѽ го́ры кӏ́євскїѧ, кресто́мъ а҆пⷭ҇ла а҆ндре́а бл҃гословє́нныѧ. и҆дѣ́же бо блгⷣть возсїѧ̀ ро́дꙋ на́шемꙋ, ѿ воды́ же и҆ дꙋ́ха, во ѿверзе́нїе црⷭ҇твїѧ бж҃їѧ, та́мѡ подоба́ше нача́тисѧ и҆ семꙋ̀ ѡ҆бновле́нїю, кро́вїю первозакла́ннагѡ ѿ ст҃и́телей рꙋ́сскихъ, тезоиме́ннагѡ просвѣти́телю на́шемꙋ. се́й бо влади́мїръ но́вый, и҆зꙿ вїногра́дника своегѡ̀ и҆зведе́нъ, за врата̀ сщ҃е́нныѧ ла́ѵры пече́рскїѧ, вѣнча́нїѧ стефа́нова сподоблѧ́етсѧ, проща́ѧ и҆ бл҃гословлѧ́ѧ ᲂу҆бива́ющихъ є҆го̀, ꙗ҆́кѡ кро́ткїй мл҃твенникъ ѡ҆ дꙋша́хъ на́шихъ.

Рыда́нїе, жа́лость и҆ го́ре: сѐ сви́токъ і҆езекӏ́илевъ, насы́тивый дꙋ́шꙋ твою̀, ст҃е тѵ́хѡне, патрїа́рше на́шъ! да ᲂу҆слы́шитсѧ и҆ ны́нѣ гла́съ тво́й: бра́тїе, а҆рхїпа́стырїе и҆ па́стырїе, зови́те ча̑да ва̑ша на защи́тꙋ цр҃кве правосла́вныѧ. да ᲂу҆слы́шатъ же и҆ разори́тєли хра́мѡвъ бж҃їихъ ѻ҆́гненное сло́во твоѐ: а҆́ще є҆щѐ то́кмѡ и҆́менемъ хрⷭ҇тїа́нскимъ нарица́етесѧ, вла́стїю на́мъ ѿ бг҃а да́нною а҆наѳема́тствꙋемъ ва́съ. Ѽ стра́шнагѡ ѿлꙋче́нїѧ вѣ́чнагѡ! сѐ а҆на́ѳема ники́мже разрѣша́ема! сѐ дерзнове́нїе патрїа́ршее!

Неблагода́рными є҆ди́ни ѡ҆ста́вленнїи, ст҃е царю̀ на́шъ страстоте́рпче нїко́лае, ст҃а́ѧ цари́це а҆леѯа́ндро но́ваѧ, нбⷭ҇ныхъ же наслѣ́дниче ѻ҆́троче а҆леѯӏ́е, црⷭ҇твеннїи дѣ́вственницы ѻ҆́льго, татїа́но, марӏ́е и҆ а҆настасӏ́е, седмери́це ст҃а́ѧ, мно́гими ᲂу҆нижє́нїи восхо́дъ ѡ҆брѣ́тшаѧ, сострада́льцы четы́ре съ собо́ю привле́кшаѧ, моли́тесѧ съ ни́ми всебл҃го́мꙋ бг҃ꙋ, да проще́нїѧ сподо́битъ многопрегрѣши́вшыѧ лю́ди рѡссі̑йскїѧ, ᲂу҆мири́тъ же мӏ́ръ, и҆ сп҃се́тъ дꙋ́шы на́шѧ.

И҆́ны стїхи̑ры, гла́съ д҃:

Кро́токъ, но непоколе́блемъ бы́лъ є҆сѝ, петро́ва гра́да и҆збра́нниче, сщ҃енномч҃ниче венїами́не, копронѵ́мы но́выми ѡ҆брече́нный, лжепа́стырьми пре́данный вла́сти богобо́рнѣй. тогда́ же ꙗ҆ви́ тѧ бг҃ъ ᲂу҆чи́телѧ безбоѧ́зненна, и҆ сѐ завѣ́тъ тво́й, и҆зꙿ заточе́нїѧ возвѣще́нный: да не пощади́мъ мы̀ себє̀ цр҃кве ра́ди, и҆ не предади́мъ ст҃ꙋ́ю цр҃ковь себє̀ ра́ди. на сꙋдѣ́ же беззако́ннѣмъ твоѐ сло́во бы́сть всѣ̑мъ ди́вно: жи́знь ли и҆лѝ сме́рть ны́нѣ возвѣстите́ ми, а҆́зъ же зна́меновавъ себѐ ст҃ы́мъ кресто́мъ, рекꙋ̀: сла́ва тебѣ̀, гдⷭ҇и бж҃е, ѡ҆ всѣ́хъ.

Жє́ртвы бг҃ꙋ живопогребє́нныѧ, въ кладѧзеподо́бный ро́въ низри̑нꙋтыѧ: пре́жде всѣ́хъ є҆лїсаве́та страстоте́рпица, къ гѡ́рнимъ ᲂу҆стремле́ннаѧ кнѧги́нѧ млⷭ҇рднаѧ, би́серъ правосла́вїѧ въ но́вѣмъ ѻ҆те́чествѣ ѡ҆брѣ́тшаѧ, є҆ѵⷢ҇льски ᲂу҆бӏ́йцꙋ мꙋ́жа своегѡ̀ прости́вшаѧ, мл҃твою и҆ бл҃готворе́нїемъ бг҃ꙋ ᲂу҆годи́вшаѧ, безбо́жными же непощажде́ннаѧ: помоли́тесѧ за на́съ, ст҃ӏ́и кнѧ́зїе, помоли́тесѧ за всѣ́хъ, прпⷣбнїи страстотє́рпицы, є҆лїсаве́то съ варва́рою вѣ́рною. ᲂу҆слы́шите на́съ, въ ве́си геѳсиманӏ́йстѣй погребє́нныѧ: ᲂу҆слы́шите на́съ и҆ тӏ́и, и҆́хже погребе́нїе невѣ́домо. ᲂу҆слы́шите на́съ па́ки, вкꙋ́пѣ прїѧ̑тыѧ во ѻ҆би́тєли нбⷭ҇ныѧ, ст҃а́ѧ ѻ҆смери́це, моли́те бг҃а ѡ҆ на́съ.

Сла́ва, гла́съ и҃:

А҆дама́нтово мꙋ́жество ва́ше сла́ва є҆́сть цр҃кве рѡссӏ́йскїѧ, страстоте́рпцы и҆ и҆сповѣ̑дницы но́вїи, ᲂу҆ченицы́ бо є҆стѐ фїлӏ́ппѡвы и҆ є҆рмоге́нѡвы, при́снїи же многострада́льномꙋ патрїа́рхꙋ тѵ́хѡнꙋ, и҆́же и҆ дадѐ ва́мъ и҆́мѧ своѐ. пребы́сте терпѣ́нїемъ въ бѣда́хъ, гони́ми и҆ ᲂу҆бива́еми. но кто̀ и҆зочте́тъ и҆ мꙋ́ки, го́ршыѧ сме́рти; ѻ҆ба́че ꙗ҆ви́стесѧ и҆ проповѣ́дателїе сꙋ́щымъ съ ва́ми во ѹ҆́захъ, просвѣти́телїе прежденевѣ́рꙋющихъ, строи́телїе ст҃ы́хъ та́инствъ, ве́лїѧ є҆́сть ко хрⷭ҇тꙋ̀ любы̀ ва́ша, ве́лїѧ вѣ́ра ва́ша. во все́мъ ꙗ҆ви́сте себѐ, ꙗ҆́кѡ бж҃їи слꙋги̑. И҆ ны́нѣ, бг҃оро́диченъ догма́тїкъ, гла́са.

Вхо́дъ, прокӏ́менъ днѐ, и҆ чтє́нїѧ г҃.

Прⷪ҇ро́чества и҆са́їина чте́нїе:

Та́кѡ гл҃етъ гдⷭ҇ь: Всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ̑зи ѿ ни́хъ. кто̀ возвѣсти́тъ сїѧ̑ въ ни́хъ; и҆лѝ ꙗ҆̀же ѿ нача́ла, кто̀ слы̑шана сотвори́тъ ва́мъ; да приведꙋ́тъ свидѣ́тєли своѧ̑, и҆ ѡ҆правдѧ́тсѧ, и҆ да ᲂу҆лы́шатъ, и҆ да рекꙋ́тъ и҆́стинꙋ. Бꙋ́дите мѝ свидѣ́тєли, и҆ а҆́зъ свидѣ́тель, гл҃етъ гдⷭ҇ь бг҃ъ, и҆ ѻ҆́трокъ, є҆го́же и҆збра́хъ: да позна́ете, и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь: пре́жде менє̀ не бы́сть и҆́нъ бг҃ъ, и҆ по мнѣ̀ не бꙋ́детъ. А҆́зъ є҆́смь бг҃ъ, и҆ нѣ́сть ра́звѣ менє̀ сп҃са́ѧй. А҆́зъ возвѣсти́хъ и҆ сп҃со́хъ, ᲂу҆ничижи́хъ, и҆ не бѣ̀ въ ва́съ чꙋ́ждїй. вы̀ мнѣ̀ свидѣ́тєли, и҆ а҆́зъ гдⷭ҇ь бг҃ъ, И҆ є҆щѐ ѿ нача́ла а҆́зъ є҆́смь, и҆ нѣ́сть ѿ рꙋ́къ мои́хъ и҆збавлѧ́ѧй: сотворю̀, и҆ кто̀ ѿврати́тъ то̀; Си́це гл҃етъ гдⷭ҇ь бг҃ъ, и҆збавлѧ́ѧй ва́съ, ст҃ы́й і҆и҃левъ.

Премꙋ́дрости соломѡ́новы чте́нїе:

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предꙿ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́новы чте́нїе:

Првⷣникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо чⷭ҇тна̀ не многолѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ, преста́вленъ бы́сть: Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ѹ҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: Оу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На лїтӏ́и стїхи́ра хра́ма, и҆ ст҃ы́хъ, гла́съ и҃:

Агг҃ли бж҃їи ра́достнїи призыва́ютъ, да возра́дꙋемсѧ всѝ! сӏ́и бо ра́дꙋющесѧ и҆ ѡ҆ є҆ди́номъ грѣ́шницѣ ка́ющемсѧ, ликовствꙋ́ютъ ѡ҆ мно́жествѣ но́выхъ ст҃ы́хъ, ѡ҆ мч҃ницѣхъ и҆ и҆сповѣ́дницѣхъ цр҃кве рѡссӏ́йскїѧ, блиста́ющїѧсѧ страда́ньми и҆́хъ: сѐ ца́рь, и҆ сꙋ́щїи ѿ до́ма є҆гѡ̀, патрїа́рхъ, і҆ера́рси, сщ҃е́нницы, мона́си и҆ мно́жество человѣ̑къ всѧ́кагѡ зва́нїѧ, ѹ҆́зами и҆ лише́ньми и҆скꙋше́ннїи, мꙋче́ньми же лю́тыми и҆ многоѡбра́зными, и҆ сме́ртїю, ꙗ҆́же введѐ и҆̀хъ въ жи́знь безконе́чнꙋю. сегѡ́ же ра́ди по́двига и҆́хъ, даде́сѧ и҆̀мъ блгⷣть моли́тисѧ за ны̀, ца́рское бо сꙋ́ть тӏ́и сщ҃е́нїе, наде́жда ро́да на́шегѡ ѡ҆бновле́нїѧ, возвѣсти́тєли млⷭ҇ти сп҃са на́шегѡ, призва́вшагѡ и҆̀хъ въ сво́й чꙋ́дный свѣ́тъ.

Сла́ва, и҆ ны́нѣ, бг҃оро́диченъ, гла́съ то́йже:

Застꙋ́пнице ᲂу҆се́рднаѧ, скорбѧ́щихъ при́сное ра́дованїе, ᲂу҆тѣ́шительница є҆сѝ призыва́ющихъ тѧ̀ въ ча́съ и҆спыта́нїѧ, прест҃а́ѧ влⷣчце бцⷣе, ви́ждь хра́мы сн҃а твоегѡ̀ разорє́нныѧ, воззрѝ на порꙋга́нїе безбо́жными смире́нныхъ слꙋжи́телей є҆гѡ̀, ᲂу҆слы́ши стена̑нїѧ рабѡ́въ твои́хъ, и҆ сама̀ со страстотє́рпцы ст҃ы́ми застꙋпѝ и҆ поми́лꙋй на́съ.

На стїхо́внѣ стїхи̑ры воскрⷭ҇ны.

Сла́ва, гла́съ ѕ҃:

Ѽ ст҃ӏ́и смире́ннѣйшїи сщ҃е́нницы и҆сповѣ̑дницы, зри́мъ ва́съ, ка́кѡ въ стра́шнꙋю годи́нꙋ гоне́нїй дале́че ѿ домѡ́въ ва́шихъ со́слани бы́сте. зри́мъ ва́съ, гла́дныхъ, цынго́тныхъ, ви́да своегѡ̀ лише́нныхъ, стрꙋ́пїѧми кровоточа́щими покрове́нныхъ, приста̑вники бїе́мыхъ и҆ сна̀ лиша́емыхъ, пла́чꙋщихъ ѡ҆ ча́дѣхъ ѡ҆ста́вленныхъ и҆ ѡ҆ ма́терехъ и҆́хъ беззащи́тныхъ. и҆ кто̀ и҆спи́шетъ и҆мена̀ ва̑ша! кто̀ повѣ́даетъ мӏ́рꙋ всѧ̑ претерпѣ̑ннаѧ ва́ми! ѻ҆ба́че вѣ́даетъ бг҃ъ и҆збра́нныѧ своѧ̑, сохрани́вшыѧ зало́гъ, врꙋче́нный и҆̀мъ, да́же до сме́рти, и҆ сегѡ̀ ра́ди дерзнове́нїе и҆мꙋ́щыѧ моли́тисѧ ѡ҆ на́съ.

И҆ ны́нѣ, бг҃оро́диченъ, гла́съ то́йже:

Бцⷣе, безпомѡ́щнымъ по́моще! помозѝ и҆ ны́нѣ стра́ждꙋщымъ лю́демъ страны̀ рѡссӏ́йскїѧ, въ заточе́нїи, въ мꙋ́кахъ, и҆лѝ въ тѧ́жкихъ ѡ҆бстоѧ́нїихъ сꙋ́щымъ. тебѣ̀ мо́лимсѧ, моли́сѧ, влⷣчце, со ст҃ы́ми новомч҃ники и҆ и҆сповѣ̑дники ро́да на́шегѡ, и҆зба́витисѧ ѿ бѣ́дъ мно́зѣхъ рабѡ́мъ твои̑мъ.

На бл҃гослове́нїи хлѣ́бѡвъ, Бцⷣе, дв҃о: два́жды,

тропа́рь ст҃ы́хъ, є҆ди́ножды, пи́санъ на ма́лѣй вече́рни.

На ѹ҆́трени.

На Бг҃ъ гдⷭ҇ь: тропа́рь воскрⷭ҇нъ, два́жды, Сла́ва, ст҃ы́хъ новомч҃никѡвъ,

И҆ ны́нѣ, бг҃оро́диченъ.По стїхосло́вїихъ всѧ̑ воскрⷭ҇на.

Полѷеле́й, и҆ велича́нїе:

Велича́емъ ва́съ, ст҃ӏ́и новомч҃ницы и҆ и҆сповѣ̑дницы рѡссӏ́йстїи, и҆ чти́мъ чⷭ҇тна̑ѧ страда̑нїѧ ва̑ша, ꙗ҆̀же за хрⷭ҇та̀ претерпѣ́ли є҆стѐ. Ѱало́мъ

и҆збра́нный: Бг҃ъ на́мъ прибѣ́жище и҆ си́ла, помо́щникъ въ ско́рбехъ, ѡ҆брѣ́тшихъ ны̀ ѕѣлѡ̀.

А҆́гг҃льскїй собо́ръ: Посе́мъ є҆ктенїа̀ ма́лаѧ.

По полѷеле́и ѵ҆пакоѝ гла́са, та́же сѣда́ленъ ст҃ы́хъ, гла́съ а҃:

Проидо́сте сквозѣ̀ ѻ҆́гнь мꙋче́нїѧ и҆ во́дꙋ сле́зъ, и҆зведе́ вы гдⷭ҇ь въ поко́й ст҃ы́хъ, новомч҃ницы и҆ и҆сповѣ̑дницы рѡссӏ́йстїи, хода̑таи воззва́нїѧ къ бг҃ꙋ разꙋмѣ́ющымъ и҆ лобыза́ющымъ по́двигъ ва́шъ. сла́ва предꙿꙋвѣ́дѣвшемꙋ произволе́нїе ва́ше, сла́ва предꙿꙋста́вившемꙋ ва́съ къ сла́вѣ нбⷭ҇нѣй, сла́ва подаю́щемꙋ на́мъ ва́ми ве́лїю млⷭ҇ть.

И҆́нъ сѣда́ленъ, гла́съ то́йже:

Ꙗ҆́кѡ лю́бѧщымъ бг҃а, ва́мъ, Ѽ страстоте́рпцы, всѧ̑ претерпѣ̑ннаѧ на землѝ бы́ша во бл҃го́е. и҆ прешлѝ є҆стѐ, ꙗ҆́кѡ и҆збра́ннїи, къ ѡ҆бѣща́нномꙋ наслѣ́дїю вѣ́чныхъ бла̑гъ. сла́ва да́вшемꙋ ва́мъ въ тѧ́жкихъ мꙋ́кахъ крѣ́пость, сла́ва вѣнча́вшемꙋ ва́съ, сла́ва дѣ́йствꙋющемꙋ ва́ми сп҃се́нїе на́ше. Сла́ва, гла́съ г҃:

Возсїѧ́ли є҆стѐ на тве́рди цр҃ко́внѣй, ст҃и́телїе прⷭ҇то́лѡвъ рѡссӏ́йскихъ пе́рвѣйшихъ: тѵ́хѡне, ст҃ѣ́йшїй патрїа́рше, а҆на́ѳемꙋ врагѡ́мъ крⷭ҇та̀ пла́меннѣ и҆зрекӏ́й, влади́мїре, ст҃и́телю кӏ́евскїй, зрѣ́лѣйшїй нача́токъ но́выхъ плодѡ́въ са́да рꙋ́сскагѡ, и҆ венїами́не, свѣти́льниче петрогра́дскїй, и҆здѣ́тска возжелѣ́вый за хрⷭ҇та̀ страда́ти, є҆́же и҆ бы́сть. сла́вѧтсѧ же съ ва́ми и҆ всѝ страстоте́рпцы но́вїи. мы́ же со ᲂу҆миле́нїемъ ва́мъ си́це рце́мъ: ра́дꙋйсѧ, собо́ре крѣ́пкїй терпѣли́вый! бꙋ́дите мл҃твєнницы дерзнове́ннїи ѡ҆ всѣ́хъ молѧ́щихсѧ ва́мъ.

И҆ ны́нѣ, бг҃оро́диченъ, гла́съ то́йже:

Красотѣ̀ двⷭ҇тва твоегѡ̀, и҆ пресвѣ́тлой чⷭ҇тотѣ̀ твое́й, гаврїи́лъ ᲂу҆диви́всѧ, вопїѧ́ше тѝ, бцⷣе: кꙋ́ю тѝ похвалꙋ̀ принесꙋ̀ досто́йнꙋю; что́ же возꙿименꙋ́ю тѧ̀; недоꙋмѣва́ю и҆ ᲂу҆жаса́юсѧ. тѣ́мже ꙗ҆́кѡ повелѣ́нъ бы́хъ, вопїю́ ти: ра́дꙋйсѧ, блгⷣтнаѧ.

Та́же степє́нна гла́са, прокӏ́менъ и҆ є҆ѵⷢ҇лїе воскрⷭ҇ное.

З р ѝ : а҆́ щ е х р а́ м ъ с т҃ ы̑ м ъ :

Прокӏ́менъ, гла́съ д҃: Тебє̀ ра́ди, гдⷭ҇и, ᲂу҆мерщвлѧ́еми є҆смы̀ ве́сь де́нь.

Стӏ́хъ: Вмѣни́хомсѧ ꙗ҆́кѡ ѻ҆́вцы заколе́нїѧ.

Є҆ѵⷢ҇лїе ѿ матѳе́а, зача́ло л҃ѕ: Речѐ гд҃ь свои̑мъ ᲂу҆ченикѡ́мъ: сѐ а҆́зъ посыла́ю ва́съ:

По н҃-мъ ѱалмѣ̀ стїхи́ра, гла́съ ѕ҃:

Воскресе́нїѧ хрⷭ҇то́ва и҆́стиннїи свидѣ́тели ꙗ҆ви́шасѧ но́вїи страстоте́рпцы и҆ и҆сповѣ̑дницы, и҆̀мже пра́здникъ се́й соста́вихомъ. ка́кѡ бы тӏ́и понеслѝ крⷭ҇тъ сво́й, а҆́ще не бы зна́ли, ꙗ҆́кѡ недосто́йни сꙋ́ть страда̑нїѧ ны́нѣшнѧгѡ вре́мене, къ хотѧ́щей сла́вѣ ꙗ҆ви́тисѧ въ ни́хъ;

Д а́ ж е до з дѣ̀ х р а́ м а с т҃ ы̑ м ъ .

Канѡ́ны: воскрⷭ҇ный на д҃, бцⷣы гла́са на в҃, и҆ новомч҃никѡмъ на и҃.

А҆́ще въ недѣ́лю мытаре́вꙋ, и҆лѝ блꙋ́днагѡ, и҆лѝ мѧсопꙋ́стнꙋю,

смотрѝ ма́рковꙋ главꙋ̀ і҆аннꙋа́рїа въ л҃-й де́нь.

Канѡ́нъ новомч҃никѡмъ, гла́съ ѕ҃.

Пѣ́снь а҃.

І҆рмо́съ: Волно́ю морско́ю скры́вшаго дре́вле гони́телѧ мꙋчи́телѧ, подꙿ земле́ю скры́ша сп҃се́нныхъ ѻ҆́троцы: но мы̀, ꙗ҆́кѡ ѻ҆трокови̑цы, гдⷭ҇еви пои́мъ, сла́внѡ бо просла́висѧ.

Припѣ́въ: Ст҃ӏ́и новомч҃ницы и҆ и҆сповѣ̑дницы рѡссӏ́йстїи, моли́те бг҃а ѡ҆ на́съ.

Гдⷭ҇и бж҃е мо́й, помози́ ми смире́ннѡ воспѣ́ти сла́вꙋ новомч҃никѡвъ и҆ и҆сповѣ́дникѡвъ рѡссӏ́йскихъ, и҆̀мже за тѧ̑жкїѧ страда̑нїѧ любо́вїю ѿве́рзлъ є҆сѝ двє́ри нбⷭ҇ныѧ.

Гдⷭ҇и бж҃е на́шъ, сла́вꙋ сїю̀ мч҃никѡмъ ѿ вѣ́ка бы́вшымъ дарова́вый, ꙗ҆́кѡ мѡ́щи и҆́хъ сѣ́ютсѧ во хра́мѣхъ ѡ҆бновле́нїѧ на́шегѡ ра́ди, пода́ждь сла́вꙋ сїю̀ и҆ страстоте́рпцємъ нѡ́вымъ, а҆́ще и҆ невѣ̑дома сꙋ́ть мѣ̑ста погребе́нїѧ и҆́хъ.

Црⷭ҇тва земна́гѡ лише́нный, цр҃ю́ же нбⷭ҇номꙋ и҆ въ бѣ́дствїихъ свои́хъ до конца̀ вѣ́рный, моли́сѧ є҆мꙋ̀, ст҃ы́й царю̀ мч҃ниче нїко́лае, є҆́же не лиши́тисѧ и҆ на́мъ ᲂу҆тѣше́нїѧ блгⷣтнагѡ въ бѣда́хъ на́шихъ.

Ѿ рꙋкѝ сщ҃енномч҃ника влади́мїра древѧ́нный по́сохъ первопрⷭ҇то́льника ст҃и́телѧ петра̀ прїе́мый, взыщи́ мѧ, ѻ҆вцꙋ̀ заблꙋ́ждшꙋю, горохи́щнꙋю, Ѽ ст҃ы́й патрїа́рше и҆ ѻ҆́тче на́шъ тѵ́хѡне, ѡ҆бличи́телю сынѡ́въ противле́нїѧ.

Бг҃оро́диченъ: Во ᲂу҆спе́нїи твое́мъ мӏ́ра не ѡ҆ста́вила є҆сѝ, влⷣчце! не ѡ҆ста́вила є҆сѝ и҆ странꙋ̀ рѡссӏ́йскꙋю, но бл҃говоли́ла є҆сѝ прїѧ́ти хвалꙋ̀ ѿ но́выхъ ст҃ы́хъ страстоте́рпцєвъ.

Катава́сїа срѣ́тенїѧ: Сꙋ́шꙋ глꙋбороди́тельнꙋю зе́млю: Пѣ́снь г҃.

І҆рмо́съ: Тебѐ, на вода́хъ повѣ́сившаго всю̀ зе́млю неѡдержи́мѡ, тва́рь ви́дѣвши на ло́бнѣмъ ви́сима, ѹ҆́жасомъ мно́гимъ содрога́шесѧ, нѣ́сть ст҃ъ, ра́звѣ тебє̀, гдⷭ҇и, взыва́ющи.

Кꙋ́ю да́нь сло́ва принесе́мъ ва́мъ, вѣ́рнїи свидѣ́телїе сло́ва, до́блїи страстоте́рпцы и҆ па́стырїе, вмѣни́вшїисѧ, ꙗ҆́кѡ ѻ҆́вцы заколе́нїѧ;

Тебѣ̀, Ѽ влади́мїре, первост҃и́телю дре́влїѧ кӏ́евскїѧ цр҃кве, соиме́нне ст҃о́мꙋ просвѣти́телю рꙋсѝ, подоба́ше преднача́ти сла́вное по́прище боре́нїѧ и҆ страда́нїй. предво́диши ты̀ бг҃овѣнча́нный по́лкъ страстоте́рпцєвъ, и҆ да возда́стсѧ тѝ пе́рвый вѣне́цъ похвалы̀.

Посредѣ̀ ѡ҆полче́нїѧ до́блѧгѡ зри́мъ и҆ тѧ̀, сщ҃е́ннаѧ главо̀, первост҃и́телю гра́да ст҃а́гѡ петра̀, ст҃и́телю венїами́не, возлю́бленный па́ствою твое́ю, ꙗ҆́коже і҆а́кѡвомъ тезоимени́тый тѝ дре́влїй патрїа́рхъ.

Пе́рвый въ чи́нѣ пресвѵ́терстѣмъ новомч҃никѡвъ ты̀ ꙗ҆ви́лсѧ є҆сѝ, і҆ѡа́нне пресвѵ́тере, во а҆ме́рицѣ пре́жде прⷭ҇то́лꙋ бж҃їю предстоѧ́вый: ꙗ҆́кѡ лю́тыхъ безбѡ́жникъ въ ца́рскомъ селѣ̀ ѡ҆бличи́телѧ, вѣнча́ тѧ гдⷭ҇ь вѣнце́мъ мч҃ническимъ, ꙗ҆́коже и҆ дрꙋга́го і҆ѡа́нна, восторгоиме́ннаго, въ сло́вѣ и҆ въ мꙋ́жествѣ предꙿ мꙋчи́тєли ди́внаго, съ ни́ми же, всѝ сщ҃енномч҃ницы но́вїи, застꙋпи́те на́съ.

Бг҃оро́диченъ: Премлⷭ҇рдаѧ мт҃и, пречⷭ҇таѧ дв҃о, споболѣ́вшаѧ сн҃ꙋ и҆ сп҃сꙋ своемꙋ̀, вѣ́мы тѧ̀ ᲂу҆тѣ́шительницꙋ чадолюби́вꙋ: и҆ ѡ҆ста́вльшымсѧ во странѣ̀ рѡссӏ́йстѣй, и҆ въ разсѣ́ѧнїи сꙋ́щымъ рабѡ́мъ твои̑мъ.

Конда́къ ст҃ы́хъ новомч҃никѡвъ, гла́съ в҃:

Но́вїи страстоте́рпцы рѡссӏ́йстїи, и҆сповѣ́днически по́прище земно́е прете́кшїи, страда́ньми дерзнове́нїе прїи́мшїи, моли́тесѧ хрⷭ҇тꙋ̀, ва́съ ᲂу҆крѣпи́вшемꙋ, да и҆ мы̀, є҆гда̀ на́йдетъ на ны̀ и҆спыта́нїѧ ча́съ, мꙋ́жества да́ръ бж҃їй воспрїи́мемъ. ѡ҆́бразъ бо є҆стѐ лобыза́ющымъ по́двигъ ва́шъ, ꙗ҆́кѡ ни ско́рбь, ни тѣснота̀, ни сме́рть, ѿ любвѐ бж҃їѧ разлꙋчи́ти ва́съ не возмого́ша.

І҆́косъ: Є҆гда̀ начина́хꙋсѧ днӏ́е ѻ҆́гненнагѡ и҆скꙋше́нїѧ цр҃кве рѡссӏ́йскїѧ, и҆ не бл҃говолѝ гдⷭ҇ь прїѧ́ти ѿ на́съ всесожжє́нїѧ и҆ жє́ртвы, тогда̀ мно́зи а҆рхїере́є и҆ сщ҃е́нницы не приложи́шасѧ пло́ти и҆ кро́ви, но ᲂу҆разꙋмѣ́вше во́лю гдⷭ҇ню, са́ми себѐ принесо́ша, ꙗ҆́кѡ непоро́чное заколе́нїе. и҆ вслѣ́дъ первосщ҃е́нника вѣ́чнагѡ и҆ хода́таѧ но́вагѡ завѣ́та внидо́ша сӏ́и во ст҃и́лище съ кро́вїю свое́ю, да ѡ҆чⷭ҇тѧтсѧ грѣсѝ людстӏ́и. сла́вни сꙋ́ть и҆мена̀ ва̑ша, мꙋ́жественнїи страстоте́рпцы, ѡ҆́бразъ бо на́мъ є҆стѐ, лобыза́ющымъ по́двигъ ва́шъ, ꙗ҆́кѡ ни ско́рбь, ни тѣснота̀, ни сме́рть, ѿ любвѐ бж҃їѧ разлꙋчи́ти ва́съ не возмого́ша.

Сѣда́ленъ, гла́съ и҃:

Не́мощїю пло́ти на́мъ подобостра́стнїи, дꙋ́хомъ въ мѣ́рꙋ дре́влихъ ѻ҆тцє́въ тща́лисѧ є҆стѐ, Ѽ непрекло́ннїи сщ҃енноисповѣ̑дницы рѡссӏ́йстїи, и҆̀же въ разоре́ннꙋю ѻ҆би́тель солове́цкꙋю и҆ во и҆на̑ѧ мѣ̑ста заточе́нїѧ ссыла́емїи. ᲂу҆множа́ющымсѧ же страда́нїємъ ва́шымъ, и҆збы́точествоваше та́йнѡ и҆ ᲂу҆тѣше́нїе ѿ гдⷭ҇а, и҆́мже ны́нѣ и҆́стѣе ᲂу҆тѣша́етесѧ, въ невече́рнїй де́нь дости́гше црⷭ҇твїѧ хрⷭ҇то́ва, въ не́мъ же не преста́йте, мо́лимъ ва́съ, молѧ́щесѧ ѡ҆ сп҃се́нїи дꙋ́шъ на́шихъ.

Сла́ва, гла́съ а҃:

Пресвѵ́теръ а҆леѯӏ́й, ѿ ро́да крестозва́ннагѡ, ста́ростїю а҆́ннѣ прⷪ҇ро́чицѣ ра́вный, во́лею за ю҆́на па́стырѧ соꙋ́зника своего̀ сме́рть прїе́млетъ, ꙗ҆́кѡ є҆ѵⷢ҇лїа послꙋ́шатель. пе́тръ же, і҆ере́й скиптроиме́нный, во ᲂу҆ста̀ своѧ̑ ѿ ᲂу҆вѣща́емагѡ и҆́мъ застрѣлѧ́етсѧ. сла́ва да́вшемꙋ мнѡ́зѣмъ сщ҃е́нникѡмъ на безбо́жники крѣ́пость, сла́ва наста́вившемꙋ и҆ дїа́коны мч҃ники, сла́ва да́рствꙋющемꙋ такѡвы́мъ сꙋгꙋ́бꙋю блгⷣть моли́тисѧ за ны̀. И҆ ны́нѣ, предпра́зднства, гла́съ то́йже:

Ра́дꙋютсѧ новомч҃ницы и҆ и҆сповѣ̑дницы ро́да на́шегѡ, срѣта́юще гдⷭ҇а и҆ влⷣкꙋ своего̀, є҆го́же и҆ногда̀ срѣ́те ст҃ы́й ста́рецъ сѷмеѡ́нъ, прирекӏ́й: ны́нѣ ѿпꙋща́еши раба̀ твоего̀, влⷣко. сподо́би, гдⷭ҇и, и҆ на́мъ въ ча́съ и҆схо́да ѿ жи́зни сеѧ̀ вре́менныѧ прощє́ннымъ бы́ти, и҆ ѿпꙋщє́ннымъ съ ми́ромъ, мл҃твами пречⷭ҇тыѧ влⷣчцы на́шеѧ бцⷣы, и҆ ны́нѣ воспѣва́емыхъ ᲂу҆го́дникѡвъ твои́хъ, и҆ всѣ́хъ ст҃ы́хъ.

Пѣ́снь д҃.

І҆рмо́съ: На крестѣ̀ твоѐ бжⷭ҇твенное и҆стоща́нїе прови́дѧ а҆ввакꙋ́мъ, ᲂу҆жа́ссѧ вопїѧ́ше: ты̀ си́льныхъ пресѣ́клъ є҆сѝ держа́вꙋ, бл҃же, прїѡбща́ѧсѧ сꙋ́щымъ во а҆́дѣ, ꙗ҆́кѡ всеси́ленъ.

Ѡ҆скверне́ннаѧ дѣ́лы безбѡ́жникъ землѧ̀ кропле́нїемъ крове́й ва́шихъ па́ки бл҃гословлѧ́етсѧ, во́ды же морскі̑ѧ и҆ рѣ̑чныѧ тѣлеса̀ потоплѧ́емыхъ ст҃ы́хъ, ꙗ҆́кѡ сщ҃е́нїе, влага́емое въ ты́ѧ, воспрїѧ́ша.

Є҆рмоге́нꙋ моско́вскомꙋ тезоимени́те, свѣти́льниче тобо́льскїй, сщ҃енномч҃ниче но́вый, всѐ житїѐ твоѐ, ꙗ҆́кѡ пла́мень, є҆го́же рѣка̀ тꙋра̀ ника́коже ᲂу҆гасѝ: потоплѧ́емь бо возше́лъ є҆сѝ ко гдⷭ҇ꙋ твоемꙋ̀, бїе́мь же по ᲂу҆стна́ма, до конца̀ немо́лчнѡ моли́лсѧ є҆сѝ, мо́лишисѧ же и҆ ны́нѣ за ны̀.

Стра́шно є҆́сть слы́шимое ѡ҆ мꙋче́нїихъ ст҃а́гѡ а҆рхїпа́стырѧ пе́рмскагѡ а҆ндронӏ́ка, и҆́же не боѧ́сѧ мꙋ́къ, повелѐ клѧ́твꙋ и҆зрещѝ на безбо́жнꙋю вла́сть. ст҃и́тель же черни́говскїй васӏ́лїй, со и҆ны́ми по́сланными ѿ всерѡссӏ́йскагѡ собо́ра, ᲂу҆вѣ́дѣти ѡ҆ ᲂу҆бїе́нїи а҆ндронӏ́ковомъ, тогда̀ съ ни́ми пострада̀, вкꙋ́пѣ же всѝ гдⷭ҇ꙋ предстоѧ́тъ.

Ст҃и́телѧ і҆ѡ́сифа, дре́вле ѿ ра́зинцєвъ ᲂу҆бїе́ннаго, просла́вивый, а҆рхїпа́стырь митрофа́нъ же́стокѡ но́щїю ᲂу҆мерщвлѧ́етсѧ: тогда́ же и҆ соепӏ́скопъ є҆гѡ̀ лео́нтїй пострада̀. та́кѡ є҆ди́нѣмъ свѣ́томъ црⷭ҇твїѧ нбⷭ҇нагѡ сӏ́и трїє̀ сщ҃енномч҃ницы а҆страха́нстїи ѡ҆зари́шасѧ.

Бг҃оро́диченъ: Ѽ ко́ль мнѡ́ги ст҃ы̑ѧ і҆кѡ́ны ны́нѣ рꙋка́ми безбо́жныхъ ѿѧ̑ты ѿ вѣ́рныхъ, но не и҆сто́ргнетсѧ ѡ҆́бразъ бл҃гӏ́ѧ ᲂу҆тѣ́шительницы и҆зꙿ серде́цъ молѧ́щихсѧ, свобо́ды лише́нныхъ и҆сповѣ́дникѡвъ ст҃ы́ѧ вѣ́ры. Пѣ́снь є҃.

І҆рмо́съ: Бг҃оѧвле́нїѧ твоегѡ̀, хрⷭ҇тѐ, къ на́мъ млⷭ҇тивнѡ бы́вшагѡ, и҆са́їа свѣ́тъ ви́дѣвъ невече́рнїй, и҆зꙿ но́щи ѹ҆́треневавъ, взыва́ше: воскре́снꙋтъ ме́ртвїи, и҆ воста́нꙋтъ сꙋ́щїи во гробѣ́хъ, и҆ всѝ земноро́днїи возра́дꙋютсѧ.

Пе́тре и҆ кѷрӏ́лле, и҆сповѣ̑дницы вели́цыи и҆ непрекло́ннїи, нра́вомъ разли́чнїи, но є҆ди́ни въ вѣ́рѣ и҆ тве́рдости дꙋ́ха, а҆́ще и҆ со́слани бы́сте, ѻ҆ба́че всю̀ пра́вдꙋ цр҃ко́внꙋю ᲂу҆держа́ли є҆стѐ, ны́нѣ же, ꙗ҆́кѡ наслѣ̑дницы црⷭ҇тва нбⷭ҇нагѡ, моли́те бг҃а, ѡ҆ є҆́же сохрани́тисѧ и҆ на́мъ въ пра́вдѣ се́й.

А҆гаѳанге́ле, а҆́гг҃ле ꙗ҆росла́вльскїѧ цр҃кве, ра́дꙋйсѧ со дрꙋ́ги свои́ми: ѿложе́нїе бо ва́ше ѿ собра́тїй, въ пра́вдѣ цр҃ко́внѣй не ᲂу҆стоѧ́вшихъ, ра́дость а҆́гг҃лѡмъ бы́сть. не восхотѣ́ли є҆стѐ покори́ти себѐ нече́стїю: сегѡ̀ ра́ди и҆ и҆зыдо́сте на ско́рбь и҆ лишє́нїѧ, крⷭ҇тъ сво́й носѧ́ще.

А҆рсе́нїе, вели́кагѡ нова́града сла́во, є҆ди́не ѿ столпѡ́въ собо́ра всерѡссӏ́йскагѡ, приско́рбна бѣ̀ привре́меннѡ дꙋша̀ твоѧ̀, въ темни́цѣ тѝ сꙋ́щꙋ, но просїѧ̀ вско́рѣ побѣ́днѡ вѣ́ра твоѧ̀, побѣжда́ющаѧ всѧ̑ и҆скꙋшє́нїѧ: и҆ ꙗ҆ви́лсѧ є҆сѝ до конца̀ непрекло́ненъ.

Дамаски́ново житїѐ да ᲂу҆мили́тъ всѧ̑ чтꙋ́щыѧ: ка́кѡ бѣ̀ и҆ на ѻстровѣхъ солове́цкихъ, и҆ въ казахста́нѣ, и҆ во странѣ̀ сиби́рстѣй, восходѧ̀ къ голго́ѳѣ свое́й. ка́кѡ мра́зомъ сиби́рскимъ томи́мь, при бре́зѣ рѣкѝ, неимꙋ́щемꙋ і҆ере́ю ве́рхнюю рѧ́сꙋ свою̀ ѿдадѐ, са́мъ же въ стꙋ́жѣ зи́мней на плотꙋ̀ бг҃ꙋ дꙋ́хъ предадѐ, є҆ди́нъ ѿ тѣ́хъ, и҆́хже мӏ́ръ ве́сь недосто́инъ бѣ̀.

Бг҃оро́диченъ: Наста́внице ст҃и́телей тве́рдыхъ, пречⷭ҇таѧ дв҃о, наста́ви на́съ мы́слити и҆ глаго́лати, и҆ дѣ́ѧти то́чїю пра̑ваѧ, ревнꙋ́юще не пожалѣ́вшымъ себѣ̀ и҆сповѣ́дникѡмъ. Пѣ́снь ѕ҃.

І҆рмо́съ: Ꙗ҆́тъ бы́сть, но не ᲂу҆держа́нъ въ пе́рсехъ ки́товыхъ і҆ѡ́на: тво́й бо ѡ҆́бразъ носѧ̀, страда́вшагѡ, и҆ погребе́нїю да́вшагѡсѧ, ꙗ҆́кѡ ѿ черто́га, ѿ ѕвѣ́рѧ и҆зы́де, приглаша́ше же кꙋстодӏ́и: хранѧ́щїи сꙋ́єтнаѧ и҆ лѡ́жнаѧ, млⷭ҇ть сїю̀ ѡ҆ста́вили є҆стѐ.

Є҆де́ма сладча́йшагѡ наслѣ̑дницы показа́стесѧ, новомч҃ницы землѝ рꙋ́сскїѧ: бл҃же́ни є҆стѐ, ꙗ҆́кѡ ѿ пла́ча ва́шегѡ ᲂу҆тѣ́шистесѧ на нб҃сѝ: возжада́ли є҆стѐ пра́вды, є҆ѧ́же насыща́етесѧ и҆зѻби́льнѡ въ црⷭ҇твїи нбⷭ҇нѣмъ.

Дщє́ри царє́вы, съ ма́терїю ст҃о́ю, въ заточе́нїи сꙋро́вѣмъ ᲂу҆тѣше́нїе себѣ̀ ѿ писа́нїй ст҃ы́хъ ѻ҆тє́цъ почерпа́хꙋ, и҆ та́кѡ хрⷭ҇тꙋ̀ ᲂу҆невѣ́стишасѧ: а҆леѯӏ́й же ѻ҆́трокъ, бра́тъ и҆́хъ, рꙋка́ма царѧ̀ мч҃ника внесе́нъ бы́сть та́мѡ, и҆дѣ́же сӏ́и црⷭ҇твеннїи съ четвери́цею сострада́льцєвъ ᲂу҆бїе́ни бы́вше, ꙗ҆́кѡ жє́ртвы ѡ҆дꙋшевлє́нныѧ за ро́дъ на́шъ бг҃ꙋ предста́ша.

Ша́хта гро́бъ бы́сть, въ не́йже є҆лїсаве́та прпⷣбномч҃ница сконча̀ црⷭ҇твенный пꙋ́ть сво́й, съ варва́рою, ѡ҆ гдⷭ҇ѣ сестро́ю, и҆ съ про́чими шестїю̀: та́можде кнѧги́нѧ страстоте́рпцꙋ кнѧ́зю і҆ѡа́ннꙋ ра́нꙋ ѡ҆бѧза̀. Ѽ ст҃ӏ́и а҆лапа́евстїи мч҃ницы ѻ҆смочи́сленнїи, ᲂу҆врачꙋ́йте ны́нѣ ра̑ны дꙋ́шъ на́шихъ.

Въ стра̑шныѧ дни̑ сӏ́и пострада́вшїи во странѣ̀ на́шей рѡссӏ́йстѣй ᲂу҆го́дницы бж҃їи, знамени́тїи и҆ невѣ́домїи, мона́си, и҆́нѡкини, мꙋ́жи и҆ жены̑ со ча́ды, ᲂу҆крѣпи́те ны̀ мл҃твами ва́шими, є҆́же и҆справлѧ́ти на́мъ пꙋти̑ на́шѧ предꙿ гдⷭ҇емъ, помина́юще по́двигъ ва́шъ.

Бг҃оро́диченъ: Мно́жицею и҆зба́висѧ ѿ бѣ́дъ и҆ ѕѡ́лъ ро́дъ на́шъ, молѧ́щымсѧ лю́демъ предꙿ твои́ми, Ѽ бг҃омт҃и, ст҃ы́ми і҆кѡ́нами. совокꙋпѝ и҆ ны́нѣ, влⷣчце, всѧ̑ молє́нїѧ на̑ша ѡ҆ и҆збавле́нїи ѿ лютѣ́йшїѧ бѣды̀, предста́тельствомъ твои́мъ.

По ѕ҃-й пѣ́сни, конда́къ воскрⷭ҇ный и҆ і҆́косъ є҆гѡ̀.

Пѣ́снь з҃.

І҆рмо́съ: Неизрече́нное чꙋ́до! въ пещѝ и҆зба́вивый прпⷣбныѧ ѻ҆́троки и҆зꙿ пла́мене, во гро́бѣ ме́ртвъ бездыха́ненъ полага́етсѧ, во сп҃се́нїе на́съ, пою́щихъ: и҆зба́вителю бж҃е, бл҃гослове́нъ є҆сѝ.

Страда́ньми ва́шими цр҃ковь рꙋ́сскаѧ сла́витсѧ, мч҃ницы но́вїи, срѡ́дницы на́ши, чи́на и҆ сосло́вїѧ всѧ́кагѡ, за хрⷭ҇та̀ ѿ безбо́жныхъ ᲂу҆бїе́ннїи, во сп҃се́нїе на́съ, пою́щихъ: и҆зба́вителю бж҃е, бл҃гослове́нъ є҆сѝ.

Ѡ҆рꙋ́жїе крⷭ҇тъ, и҆ щи́тъ вѣ́рꙋ во хрⷭ҇та̀, страда̑нїѧ же и҆ сме́рть прїѧ́ли є҆стѐ, во сп҃се́нїе на́съ, пою́щихъ: и҆зба́вителю бж҃е, бл҃гослове́нъ є҆сѝ.

Ѕло́бꙋ слꙋ́гъ сатани́нскихъ, сожже́ннꙋю со́вѣсть и҆мꙋ́щихъ, ѡ҆бличѝ сожига́емый си́ми ст҃и́тель і҆ѡа́ннъ ри́жскїй, та́кожде и҆ повѣ́шеннїи: ст҃и́тель воро́нежскїй тѵ́хѡнъ, и҆ пресвѵ́теръ сѷмферопо́льскїй а҆леѯӏ́й, и҆ про́чїи, ѕвѣронра́внѣ ᲂу҆мꙋ́ченнїи. тебѣ́ же, Ѽ гдⷭ҇и, сӏ́и въ црⷭ҇твѣ твое́мъ свѣ́тлѣмъ взыва́ютъ: и҆зба́вителю бж҃е, бл҃гослове́нъ є҆сѝ.

Страстоте́рпцы младе́нцы ᲂу҆бїє́нныѧ, ꙗ҆́кѡ пти̑цы чⷭ҇тыѧ, въ гнѣ́зда нбⷭ҇наѧ прїе́млетъ гдⷭ҇ь, непреста́ннѡ въ раѝ воспѣва́ющыѧ: и҆зба́вителю бж҃е, бл҃гослове́нъ є҆сѝ.

Бг҃оро́диченъ: И҆зба́вительнице люде́й твои́хъ при́снаѧ, ᲂу҆молѝ сн҃а и҆ бг҃а твоего̀, па́ки и҆зба́вити до́мъ тво́й ѿ лютѣ́йшїѧ всѣ́хъ пре́жде бы́вшихъ бѣды̀, да со ᲂу҆миле́нїемъ возглаго́лемъ є҆мꙋ̀, сп҃се́ннїи тобо́ю: и҆зба́вителю бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Оу҆жасни́сѧ боѧ́йсѧ нб҃о, и҆ да подви́жатсѧ ѡ҆снова̑нїѧ землѝ: се́ бо въ мертвецѣ́хъ вмѣнѧ́етсѧ, въ вы́шнихъ живы́й, и҆ во гро́бъ ма́лъ страннопрїе́млетсѧ: є҆го́же, ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

И҆спра́сте ри̑зы ва́шѧ кровьмѝ свои́ми, ᲂу҆бѣли́сте же и҆̀хъ кро́вїю а҆́гнца, за человѣ̑ки закла́ннагѡ, є҆го́же, ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

Оу҆бл҃жи́мъ ст҃и́телѧ і҆ѡ́сифа петрогра́дскаго, непоро́чности цр҃кве та́йныѧ ревни́телѧ, въ прогна́нїи ло́же своѐ междꙋ̀ свинїѧ́ми нечⷭ҇тыми и҆мѣ́вшаго. и҆ слы́шимъ є҆го̀, на́мъ въ слꙋ́хъ срⷣца глаго́люща: страда́ньми свои́ми и҆ вѣ́рностїю превозноси́те хрⷭ҇та̀ во всѧ̑ вѣ́ки.

Сла̑вны и҆ въ житїѝ, и҆ въ кончи́нѣ свое́й ст҃и́тєли, серафӏ́мъ ѹ҆́гличскїй и҆ маѯӏ́мъ серпꙋхо́вскїй, ѻ҆́нъ же и҆ вра́чь, на та́йное є҆пӏ́скопство бл҃гослове́нный. многотрꙋ́дно є҆́сть слꙋже́нїе цр҃кве гони́мыѧ, є҆го́же и҆ соверши́вше сӏ́и, предста́ша хрⷭ҇тꙋ̀ бг҃ꙋ, молѧ́ще є҆го̀ ѡ҆ ста́дѣ свое́мъ, сла́вѧще же є҆го̀ при́снѡ во вѣ́ки.

Нбⷭ҇ныѧ хвалы̀ ли́че неꙋсы́пный, новомч҃ницы добропобѣ́днїи землѝ рꙋ́сскїѧ, ны́нѣ при́снѡ причаща́етесѧ а҆́гнца присноживо́тнагѡ, за него́же ѿ безбо́жныхъ ᲂу҆бїе́ни бы́сте, є҆го́же, ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

Бг҃оро́диченъ: Прест҃а́ѧ влⷣчце, сп҃сѝ, свободѝ и҆ поны́нѣ стра́ждꙋщыѧ рабы̑ твоѧ̑, да́рꙋй и҆̀мъ терпѣ́нїе и҆ крѣ́пость: въ тебѣ̀ полага́емъ наде́ждꙋ всю̀, бл҃жи́мъ тѧ̀ при́снѡ, и҆ превозно́симъ сн҃а твоего̀ и҆ бг҃а во вѣ́ки. Пѣ́снь ѳ҃.

І҆рмо́съ: Не рыда́й менѐ, мт҃и, зрѧ́щи во гро́бѣ, є҆го́же во чре́вѣ безꙿ сѣ́мене зачала̀ є҆сѝ сн҃а: воста́нꙋ бо, и҆ просла́влюсѧ, и҆ вознесꙋ̀ со сла́вою непреста́ннѡ ꙗ҆́кѡ бг҃ъ, вѣ́рою и҆ любо́вїю тѧ̀ велича́ющыѧ.

Ѽ но́вїи страстоте́рпцы, и҆̀же по́двигъ проти́вꙋ ѕло́бы безбо́жныхъ подꙿѧ́ша, вѣ́рꙋ хрⷭ҇то́вꙋ ꙗ҆́кѡ щи́тъ предꙿ ᲂу҆чє́нїи мӏ́ра сегѡ̀ держа́ще, и҆ на́мъ ѡ҆́бразъ терпѣ́нїѧ и҆ ѕлострада́нїѧ досто́йнѡ ꙗ҆влѧ́юще!

Ѽ тве́рдости и҆ мꙋ́жества полка̀ мч҃никъ хрⷭ҇то́выхъ, за хрⷭ҇та̀ ᲂу҆бїе́нныхъ! тӏ́и цр҃ковь правосла́внꙋю ᲂу҆краси́ша, и҆ въ странѣ̀ свое́й крѡ́ви своѧ̑, ꙗ҆́кѡ сѣ́мѧ вѣ́ры, да́ша: кꙋ́пнѡ со всѣ́ми ст҃ы́ми досто́йнѡ да почтꙋ́тсѧ.

Слы́шимъ всѝ, ка́кѡ чꙋ́днаѧ лѷдӏ́а, въ страда́нїихъ, а҆́ще и҆ пла́чꙋщи, тве́рдаѧ, на сострада́нїе кѷрӏ́лла подви́же, и҆́же и҆ бы́сть є҆́й щи́тъ, ме́чь же мꙋчи́телємъ ѕвѣ́рствовавшымъ: и҆ сп҃сѐ хрⷭ҇то́съ кѷрӏ́лла кꙋпе́лїю кро́ве є҆гѡ̀. сїѧ̑ повѣ́давый цр҃кви а҆леѯӏ́й и҆ са́мъ пострада̀: мл҃твами си́хъ трїе́хъ, бж҃е, поми́лꙋй на́съ.

Ѽ ст҃ӏ́и, и҆̀хже здѣ̀ помѧнꙋ́хомъ, и҆ мно́жайшее мно́жество невѣ́домыхъ! прости́те ᲂу҆бо́жество слове́съ си́хъ, да напи́шꙋтсѧ є҆щѐ похвалы̑, ва́мъ подоба́ющыѧ. и҆счи́слити ва́съ невозмо́жно є҆́сть, всѣ́хъ же мл҃твами, да прїи́мꙋтъ чтꙋ́щїи ва́съ, ѿ гдⷭ҇а и҆ влⷣки живота̀ на́шегѡ, блгⷣть и҆ ве́лїю млⷭ҇ть.

Бг҃оро́диченъ: Ѽ всепѣ́таѧ мт҃и! а҆́ще и҆ разори́сѧ ѿ ѕлы́хъ вели́каѧ це́рковь твоѧ̀ пече́рскаѧ, въ не́йже сщ҃енномч҃никъ влади́мїръ, прибли́зившꙋсѧ днѝ ᲂу҆бїе́нїѧ є҆гѡ̀, со мно́гимъ ᲂу҆миле́нїемъ а҆ка́ѳїстъ чты́й, тебѣ̀ молѧ́шесѧ, но не ѡ҆скꙋдѣ́етъ во вѣ́къ къ лю́демъ ка́ющымсѧ млⷭ҇ть твоѧ̀: ра́дꙋйсѧ, ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ! Свѣти́ленъ воскрⷭ҇ный.

Сла́ва, новомч҃никѡмъ:

Вельмѝ свѣ́телъ ꙗ҆ви́сѧ на́мъ по́двигъ ва́шъ, ст҃ӏ́и новомч҃ницы и҆ и҆сповѣ̑дницы, во дни̑ сїѧ̑, малодꙋ́шїемъ ѡ҆мрачє́нныѧ, ѡ҆скꙋдѣ́ бо вѣ́ра за ᲂу҆множе́нїе беззако́нїй на́шихъ, ѡ҆хладѣ̀ любы̀, поколеба́сѧ наде́жда: до́блесть же ва́ша ѡ҆зарѝ сла́вою но́вою рꙋ́сскꙋю цр҃ковь.

И҆ ны́нѣ, бг҃оро́диченъ воскрⷭ҇ный.

На хвали́техъ стїхи̑ры на и҃: воскрⷭ҇ны д҃,

та́же новомч҃никѡмъ д҃, гла́съ ѕ҃. Подо́бенъ: Всѐ ѿло́жше:

Слы́ша стра́шнꙋ вѣ́сть* ѡ҆ гоне́нїихъ, на цр҃ковь бж҃їю воздви́гнꙋтыхъ,* всерѡссӏ́йскїй на́шъ собо́ръ, сщ҃е́нный и҆ вели́кїй,* во є҆ди́нꙋ мы́сль собо́рнꙋ всѧ̑ совокꙋпѝ,* и҆ молє́нїѧ ᲂу҆ста́ви ѡ҆ гони́мыхъ,* и҆ ѡ҆ ᲂу҆бїе́нныхъ и҆сповѣ́дницѣхъ и҆ мч҃ницѣхъ,* въ де́нь ст҃и́телѧ влади́мїра страда́нїѧ и҆ сме́рти.* мꙋ́дрствꙋѧй се́й де́нь, со цр҃ковїю мꙋ́дрствꙋетъ:* днӏ́е преставле́нїѧ ѿше́дшихъ къ бг҃ꙋ въ мꙋ́кахъ* де́ньми рождества̀ и҆́хъ нарече́ни бы́ша,* сегѡ̀ ра́ди соверша́емъ пра́здникъ се́й,* ꙗ҆́кѡ рождество̀ рѡссӏ́йскихъ но́выхъ страстоте́рпцєвъ.

Первоꙋбїе́ннїи за вѣ́рꙋ и҆ цр҃ковь,* пе́рвїи по и҆́мени поминове́ннїи ст҃ѣ́йшимъ патрїа́рхомъ:* Ѽ ст҃и́телю влади́мїре, пече́рскїй а҆́гнче,* и҆ пресвѵ́теры старѣ́йшїи сӏ́и:* і҆ѡа́нне, пе́тре же, і҆ѡ́сифе и҆ па́ѵле,* прпⷣбномч҃ницы же герва́сїе, гера́сїме,* па́ки же сщ҃енномч҃ницы па́ѵле, пе́тре и҆ ѳео́дѡре,* мїхаи́ле, и҆ влади́мїре и҆ кѡнстантӏ́не,* дїа́коне і҆ѡа́нне, послꙋ́шниче а҆нтѡ́нїе и҆ смотри́телю і҆ѡа́нне,* со мно́гимъ мно́жествомъ сщ҃е́нныхъ, и҆ мона́хѡвъ, и҆ мїрски́хъ,* и҆́хже и҆мена̀ всѧ̑ вѣ́сть гдⷭ҇ь:* моли́те є҆го̀, ѡ҆ є҆́же сп҃сти́сѧ на́мъ.

Стӏ́хъ: Бл҃же́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Вкꙋ́пѣ со ст҃ы́мъ царе́мъ на всѧ́къ де́нь ѡ҆скорблѧ́еми,* Ѽ ст҃ы̑ѧ цари́це страстоте́рпице и҆ дѣ̑вы црⷭ҇твєнныѧ,* ѻ҆́троче же црⷭ҇твенный ст҃ы́й,* и҆ послꙋжи́вшїи ва́мъ сострада́льцы вѣ́рнїи,* но́щїю непра́веднѣ всѝ ᲂу҆бїе́ни бы́сте,* та́же, ꙗ҆́кѡ жє́ртвы пра́вды, всесожже́ни,* хода̑таи є҆стѐ ѡ҆ на́съ, ꙗ҆́кѡ кади́ло бг҃ꙋ бл҃гово́нное:* съ ва́ми же и҆ во дрꙋгӏ́й де́нь въ стра́шныхъ мꙋ́кахъ живопогребе́ннїи,* со кнѧги́нею ст҃о́ю и҆ дрꙋги́нею є҆ѧ̀.* ны́нѣ же всѣ́хъ спострада́вшихъ предварѧ́ѧй, Ѽ царю̀ нїко́лае,* ро́да на́шегѡ ст҃ы́й печа́льниче,* ꙗ҆́кѡ но́вый і҆́ѡвъ, гдⷭ҇а молѝ прости́ти всѣ́хъ.

Гла́съ и҃.

Стӏ́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.

Ѿреко́шасѧ проси́ти млⷭ҇ти ѡ҆сꙋжде́ннїи ѿ безбѡ́жникъ сщ҃е́нницы бж҃їи, и҆̀хже бл҃гословѝ ст҃ы́й патрїа́рхъ на мꙋ̑ки и҆ на сме́рть за хрⷭ҇та̀. є҆гда́ же воꙋ́трїе ведо́ми бы́ша на ка́знь, не вѣ́дѧхꙋ стра́жїе, ка́кѡ срѣ́тшыѧ и҆̀хъ вѣ̑рныѧ ѿгони́ти. лобыза́хꙋ бо лю́дїе ѡ҆бречє́ннымъ сме́ртникѡмъ и҆ сщ҃є́нныѧ рꙋ́цѣ и҆́хъ, и҆ ѻ҆де́жды кра́й, ѻ҆́нѣмъ побѣ́днѡ пою́щымъ: хрⷭ҇то́съ воскре́се и҆зꙿ ме́ртвыхъ, сме́ртїю сме́рть попра́въ. гдⷭ҇и, мл҃твами сщ҃енномч҃никѡвъ си́хъ поми́лꙋй на́съ.

Сла́ва, стїхи́ра є҆ѵⷢ҇льскаѧ, и҆лѝ трїѡ́ди.

З р ѝ : А҆́ще хра́мъ новомч҃никѡмъ: Сла́ва, стїхи́ра ст҃ы́хъ, гла́съ а҃:

Не человѣ́цы спаса́ютъ цр҃ковь: пи́сана на ма́лѣй вече́рни.

И҆ ны́нѣ, бг҃оро́диченъ, гла́съ в҃: Пребл҃гослове́нна є҆сѝ, бцⷣе дв҃о:

На лїтꙋргӏ́и.

Бл҃жє́нна гла́са на ѕ҃, и҆ ст҃ы́хъ новомч҃никѡвъ на д҃:

Помѧнѝ, гдⷭ҇и, стра̑шнаѧ мꙋчє́нїѧ, и҆́миже ѡ҆ тебѣ̀ пострада́ша страстоте́рпцы но́вїи, ѿ ро́да на́шегѡ ны́нѣ прозѧ́бшїи, и҆ прїимѝ молє́нїѧ и҆́хъ ѡ҆ сп҃се́нїи на́шемъ.

Ѿве́рзлъ є҆сѝ, сꙋдїѐ првⷣный, црⷭ҇тво нбⷭ҇ное и҆сповѣ́дникѡмъ цр҃кве рѡссӏ́йскїѧ: ᲂу҆слы́ши, гдⷭ҇и, пра́вдꙋ и҆́хъ, вонмѝ моле́нїю и҆́хъ ѡ҆ сп҃се́нїи дꙋ́шъ на́шихъ.

Сла́ва: Ѽ трⷪ҇це пребжⷭ҇твеннаѧ! возвратѝ плѣне́нїе на́ше. вѣ́мы, ꙗ҆́кѡ ᲂу҆мно́жисѧ, ꙗ҆́коже николи́же пре́жде, грѣ́хъ въ странѣ̀ на́шей, но возсїѧ̀ и҆ блгⷣть въ по́двизѣ но́выхъ ст҃ы́хъ, и҆̀же и҆ мо́лѧтъ тѧ̀, трист҃ы́й бж҃е, ѡ҆ сп҃се́нїи дꙋ́шъ на́шихъ.

И҆ ны́нѣ: Расточє́нныѧ соберѝ, малодꙋ̑шныѧ возста́ви, ѿре́кшыѧсѧ же ѿ ст҃ы́ѧ вѣ́ры призовѝ и҆ ѡ҆братѝ, Ѽ блгⷣтнаѧ и҆ пречⷭ҇таѧ дв҃о мрӏ́е, со ст҃ы́ми новомч҃ники и҆ и҆сповѣ̑дники хрⷭ҇та̀ сп҃са ᲂу҆молѧ́ющи, ѡ҆ проще́нїи и҆ сп҃се́нїи дꙋ́шъ на́шихъ.

По вхо́дѣ тропари̑ по ᲂу҆ста́вꙋ ст҃ы́хъ, и҆мꙋ́щихъ бдѣ́нїе, прилꙋчи́вшихсѧ въ недѣ́лю.

А҆́ще же трїѡ́дь, смотрѝ ма́рковꙋ главꙋ̀ і҆аннꙋа́рїа въ л҃-й де́нь.

Прокӏ́менъ гла́са и҆лѝ трїѡ́ди, и҆ ст҃ы́хъ, гла́съ з҃: Тебє̀ ра́ди, гдⷭ҇и, ᲂу҆мерщвлѧ́еми є҆смы̀ ве́сь де́нь.

А҆пⷭ҇лъ рѧдовы́й, и҆ ст҃ы́хъ: къ ри́млѧнѡмъ, зача́ло ч҃ѳ.

А҆ллилꙋ́їа гла́са, и҆ ст҃ы́хъ, гла́съ д҃: Воззва́ша првⷣнїи, и҆ гдⷭ҇ь ᲂу҆слы́ша и҆̀хъ, и҆ ѿ всѣ́хъ скорбе́й и҆́хъ и҆зба́ви и҆̀хъ.

Є҆ѵⷢ҇лїе рѧдово́е, и҆ ст҃ы́хъ: ѿ лꙋкѝ, зача́ло р҃ѕ.

Прича́стенъ: Хвали́те гдⷭ҇а съ нб҃съ: и҆ ст҃ы́хъ: Ра́дꙋйтесѧ, првⷣнїи, ѡ҆ гдⷭ҇ѣ, пра̑вымъ подоба́етъ похвала̀.

На моле́бномъ пѣ́нїи.

Прокӏ́менъ: Тебє̀ ра́ди, гдⷭ҇и: во гла́съ д҃, смотрѝ стӏ́хъ на ѹ҆́трени.

Є҆ѵⷢ҇лїе ѿ матѳе́а, зача́ло л҃ѕ.

Мл҃тва ко ст҃ы̑мъ новомч҃никѡмъ

и҆ и҆сповѣ́дникѡмъ рѡссі̑йскимъ:

Ст҃ӏ́и новомч҃ницы и҆ и҆сповѣ̑дницы цр҃кве рѡссӏ́йскїѧ, ᲂу҆слы́шите ᲂу҆се́рднꙋю мольбꙋ̀ на́шꙋ! Вѣ́мы, ꙗ҆́кѡ нѣ́цыи ѿ ва́съ, є҆щѐ ѻ҆́троцы сꙋ́ще, послꙋ́шающе ѡ҆ дре́влихъ страстоте́рпцѣхъ, въ срⷣцѣ свое́мъ помы́слиша, коли́кѡ прелюбе́зно и҆ доброхва́льно є҆́сть таковы̑мъ подража́ти, и҆̀хже ни мꙋ́ки, ни сме́рть не разлꙋчи́ша ѿ любвѐ бж҃їѧ. Бла́го же ва́мъ, ꙗ҆́кѡ послѣ́довали є҆стѐ вѣ́рѣ и҆ терпѣ́нїю тѣ́хъ, ѡ҆ ни́хже слы́шасте, и҆ и҆̀хже возлюби́сте. А҆ поне́же на всѧ́кое вре́мѧ возмо́жно є҆́сть наитѝ на ны̀ и҆спыта́нїємъ неча̑ѧннымъ, и҆спроси́те ѿ гдⷭ҇а на́мъ мꙋ́жества да́ръ, и҆́же толи́кѡ бл҃гопотре́бенъ є҆́сть въ житїѝ человѣ́честѣмъ. Всѧ̑ концы̀ ѻ҆те́чествїѧ на́шегѡ страда́ньми свои́ми ѡ҆ст҃и́вшїи, ꙗ҆́кѡ ѻ҆́бщїи за всѧ̑ ны̀ мл҃твєнницы, ᲂу҆моли́те бг҃а, и҆зба́вити лю́ди своѧ̑ ѿ и҆́га, ᲂу҆жа́снѣйшагѡ па́че всѧ́кагѡ и҆но́гѡ, и҆ да ѿпꙋ́ститсѧ на́мъ и҆ всемꙋ̀ ро́дꙋ на́шемꙋ грѣ́хъ, на наро́дѣ рѡссӏ́йскомъ тѧготѣ́ющїй: ᲂу҆бїе́нїе царѧ̀, пома́занника бж҃їѧ, ст҃и́телей же и҆ па́стырей съ па́ствою, и҆ страда̑нїѧ и҆сповѣ́дникѡвъ, и҆ ѡ҆скверне́нїе ст҃ы́нь на́шихъ. Да ᲂу҆празднѧ́тсѧ раско́лы въ цр҃кви на́шей, да бꙋ́дꙋтъ всѝ є҆ди́но, и҆ да и҆зведе́тъ гдⷭ҇ь на жа́твꙋ дѣ́латєли своѧ̑, сӏ́есть да не ѡ҆скꙋдѣва́етъ цр҃ковь па́стырьми до́брыми, и҆̀же и҆́мꙋтъ просвѣща́ти свѣ́томъ и҆́стинныѧ вѣ́ры сто́ль вели́кое мно́жество люде́й, вѣ́рѣ ненаꙋче́нныхъ, и҆лѝ ѿ вѣ́ры ѿврати́вшихсѧ. Недосто́йни є҆смы̀ млⷭ҇ти бж҃їѧ, ѻ҆ба́че страда́нїй ра́ди ва́шихъ, хрⷭ҇то́съ бг҃ъ на́шъ да ᲂу҆ще́дритъ и҆ поми́лꙋетъ всѣ́хъ на́съ, въ по́мощь ва́съ призыва́ющихъ. Мы́ же є҆мꙋ̀, сп҃си́телю на́шемꙋ со ѻ҆ц҃е́мъ и҆ ст҃ы́мъ дх҃омъ, сокрꙋше́нїе ѡ҆ грѣсѣ́хъ и҆ бл҃годаре́нїе за всѧ̑ всегда̀ да прино́симъ, сла́вѧще є҆го̀ во вѣ́ки вѣкѡ́въ. А҆ми́нь.