Мѣ́сѧца септе́мврїа въ д҃і-де́нь.

Слꙋ́жба прест҃ѣ́й бцⷣѣ, ꙗ҆вле́нїѧ ра́ди чꙋдотво́рныѧ є҆ѧ̀ і҆кѡ́ны, и҆менꙋ́емыѧ лѣ́сненскїѧ.

На вели́цѣй вече́рни.

Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ: стїхи̑ры на и҃, гла́съ а҃:

Ѽ днѐ сщ҃е́ннагѡ и҆ та́инственнагѡ, во́ньже бж҃є́ственнаѧ мӏ́рꙋ ꙗ҆влѧ́ютсѧ, и҆сто́чницы блгⷣти и҆стека́ютъ, ст҃ы̑ни ѡ҆брѣта́ютсѧ! се́й де́нь, во́ньже дре́вле животворѧ́щее дре́во крⷭ҇тное ѡ҆брѣ́тесѧ, се́й де́нь, во́ньже ны́нѣ і҆кѡ́на бг҃омт҃ре чꙋ́днѡ ꙗ҆ви́сѧ. и҆́мже стра́хомъ и҆ любо́вїю лю́дїе покланѧ́ютсѧ, бл҃года́рнѣ зовꙋ́ще: распны́йсѧ и҆ воскресы́й, хрⷭ҇тѐ бж҃е, бцⷣею поми́лꙋй на́съ. Два́жды.

Животворѧ́щемꙋ дре́вꙋ ны́нѣ покланѧ́емсѧ, и҆́мже мӏ́рꙋ сп҃се́нїе содѣ́ласѧ. живоно́сный же и҆сто́чникъ блгⷣти, і҆кѡ́нꙋ твою̀, влⷣчце, почита́емъ, ѿ неѧ́же неѡскꙋ̑дныѧ ми́лѡсти лю́демъ и҆сточа́еши, чꙋдеса̀ же неисчисли̑маѧ ꙗ҆влѧ́еши. тѣ́мже тѝ хрⷭ҇тїа́ны любо́вїю припа́дающе, сн҃ꙋ твоемꙋ̀ и҆ бг҃ꙋ вопїю́тъ: распны́йсѧ и҆ воскресы́й, хрⷭ҇тѐ бж҃е, бцⷣею поми́лꙋй на́съ. Два́жды.

При крⷭ҇тѣ̀ сн҃а твоегѡ̀ стоѧ́щи, бцⷣе, и҆ томꙋ̀ срⷣцемъ сраспина́ющисѧ, всыновле́нїе ро́да человѣ́ческагѡ и҆зꙿ пречⷭ҇тыхъ є҆гѡ̀ ѹ҆́стъ прїѧ́ла є҆сѝ. сегѡ̀ ра́ди тѧ̀ мт҃рь хрⷭ҇тїа́ны нарещѝ дерза́емъ. ᲂу҆млⷭ҇рдисѧ ᲂу҆̀бо, Ѽ всепѣ́таѧ мт҃и, на небл҃года̑рнаѧ и҆ ѕлонра̑внаѧ ча̑да твоѧ̑, и҆ скорбе́й на́шихъ лю́тыхъ и҆сто́чники ᲂу҆ста́ви, ꙗ҆́кѡ да бл҃годарѧ́ще те́плѣ, сн҃ꙋ твоемꙋ̀ и҆ бг҃ꙋ и҆зꙿ глꙋбины̀ дꙋшѝ возопїи́мъ: распны́йсѧ и҆ воскресы́й, хрⷭ҇тѐ бж҃е, бцⷣею поми́лꙋй на́съ. Два́жды.

Гла́съ г҃: Па́ки па́стырїе чꙋдѧ́тсѧ, па́ки мрӏ́и дв҃ѣ со бг҃омлⷣнцемъ покланѧ́ютсѧ, не въ верте́пѣ виѳлее́мстѣмъ, но въ дꙋбра́вѣ бꙋкови́чстѣй, па́ки свѣ́томъ нбⷭ҇нымъ ѡ҆блистава́ютсѧ и҆ чꙋ́до лю́демъ возвѣща́ютъ, и҆̀же вѣ́рꙋ є҆́мше бл҃говѣ́стїю, ви́дѣти пребл҃гослове́ннꙋю со тща́нїемъ текꙋ́тъ. є҆́йже и҆ мы̀ съ ни́ми возопїи́мъ: ра́дꙋйсѧ, влⷣчце, свѣ́те незаходи́мый дꙋ́шъ на́шихъ.

Ѡ҆брѣ́тше ѡ҆́бразъ тво́й чꙋ́дный, пречⷭ҇таѧ, лю́дїе стра́хомъ и҆ тре́петомъ къ тебѣ̀ взира́юще вопїѧ́хꙋ: прїидѝ къ на́мъ грѣ̑шнымъ, ст҃ы́ни златы́й кївѡ́те, прїидѝ къ на́мъ ᲂу҆бѡ́гимъ, цр҃и́це млⷭ҇рдїѧ, ꙗ҆ви́вшисѧ не сокры́й ѿ на́съ па́ки пречⷭ҇тагѡ твоегѡ̀ лица̀. ѡ҆блѧ́зи съ на́ми, ꙗ҆́кѡ къ ве́черꙋ є҆́сть и҆ преклони́лсѧ є҆́сть мӏ́ра де́нь, вни́ди въ це́рковь на́шꙋ, блгⷣть съ тобо́ю совводѧ́щи, є҆́юже дꙋ́шы на́шѧ при́снѡ врачꙋ́ющи, сотвори́ши ѧ҆̀ ѻ҆би́тєли дх҃а ᲂу҆тѣ́шителѧ.

Сла́ва, и҆ ны́нѣ, гла́съ є҃:

Крⷭ҇тъ хрⷭ҇то́въ сп҃се́нїѧ зна́менїе и҆ ѡ҆рꙋ́жїе побѣ́ды, і҆кѡ́на бг҃омт҃ре млⷭ҇ти зна́менїе и҆ сокро́вище ᲂу҆пова́нїѧ, ѻ҆боѧ̀ дне́сь бг҃олѣ́пнѡ почи́таемъ и҆ любо́вїю и҆ стра́хомъ лобыза́емъ, непреста́ннѡ зовꙋ́ще и҆ вопїю́ще: на крⷭ҇тѣ̀ пригвозди́выйсѧ, хрⷭ҇тѐ бж҃е, сп҃сѝ на́съ, пречⷭ҇тыѧ твоеѧ̀ мт҃ре мольба́ми. Вхо́дъ, прокӏ́менъ днѐ, и҆ чтє́нїѧ г҃.

Бытїѧ̀ чте́нїе:

Изы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нь. И҆ ѡ҆брѣ́те мѣ́сто, и҆ спа̀ та́мѡ: за́йде бо со́лнце. и҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ. И҆ со́нъ ви́дѣ: и҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до небе́съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. Гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ, ѻ҆тца̀ твоегѡ̀, и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀. И҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ возбл҃гословѧ́тсѧ ѡ҆ тебѣ̀ всѧ̑ колѣ̑на земна̑ѧ, и҆ ѡ҆ сѣ́мени твое́мъ. И҆ сѐ а҆́зъ съ тобо́ю, сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ̑ врата̀ нбⷭ҇наѧ.

Прⷪ҇ро́чества і҆езекӏ́илева чте́нїе:

Та́кѡ гл҃етъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее, сотворѧ́тъ і҆ерє́и на ѻ҆лтарѝ всесожже́нїѧ ва́шегѡ и҆ ꙗ҆̀же сп҃се́нїѧ ва́шегѡ: и҆ прїимꙋ̀ вы̀, глаго́летъ а҆дѡнаӏ́ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки: и҆ сїѧ̑ бѧ́хꙋ затворє́на. И҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆̀хъ: ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворє́на. Ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ: по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ ст҃ы́хъ сꙋ́щихъ къ сѣ́верꙋ, прѧ́мѡ хра́мꙋ: и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇ень.

При́тчей чте́нїе:

Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь: Закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑, созыва́ющи съ высо́кимъ проповѣ́данїемъ на ча́шꙋ, глаго́лющи: И҆́же є҆́сть безꙋ́менъ, да ᲂу҆клони́тсѧ ко мнѣ̀. И҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пӏ́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете: и҆ взыщи́те ра́зꙋма, да поживетѐ: и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ прїи́метъ себѣ̀ безче́стїе, ѡ҆блича́ѧй же нечести́ваго ѡ҆поро́читъ себѐ: ѡ҆бличє́нїѧ бо нечести́вомꙋ ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дршїй бꙋ́детъ: сказꙋ́й првⷣномꙋ, и҆ приложи́тъ прїима́ти. Нача́ло премꙋ́дрости стра́хъ гдⷭ҇ень, и҆ совѣ́тъ ст҃ы́хъ ра́зꙋмъ: разꙋмѣ́ти бо зако́нъ, по́мысла є҆́сть бл҃га́гѡ. Си́мъ бо ѡ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀.

На лїтӏ́и стїхи́ра хра́ма, и҆ бцⷣы, гла́съ д҃:

Внемли́те па́стырємъ бꙋкови́чскимъ бл҃говѣствꙋ́ющымъ: прїиди́те, ви́дите бг҃омлⷣнца на рꙋкꙋ̀ дѣви̑чꙋ, не во гра́дѣ виѳлее́мстѣмъ, но въ землѝ на́шей бли́зъ, при две́рехъ, не въ верте́пѣ, но въ дꙋбра́вѣ пꙋсты́ннѣй, не дре́вле, но ны́нѣ, ꙗ҆́коже ча́съ се́й живꙋ́ща. ѻ҆ба́че хрⷭ҇то́съ є҆́сть вчера̀ и҆ дне́сь то́йже, и҆ во вѣ́ки. тѣ́мже потщи́мсѧ є҆мꙋ̀ со пречⷭ҇тою мт҃рїю є҆гѡ̀ поклони́тисѧ.

Поклоне́нїе ѿ па́стырей виѳлее́мскихъ прїе́мый, и҆ ны́нѣ па̑стыри пе́рвѣе і҆кѡ́нѣ бг҃оро́дичнѣй поклони́тисѧ призыва́етъ, и҆ ѿ тѣ́хъ поклоне́нїе млⷭ҇тивнѡ прїе́млетъ, и҆ ты́ѧ посыла́етъ проповѣ́дати, ꙗ҆́кѡ ꙗ҆ви́сѧ въ дꙋбра́вѣ бꙋкови́чстѣй но́вый и҆сто́чникъ блгⷣти неизсѧка́емый, и҆ ст҃ы́ни сосꙋ́дъ бг҃олѣ́пенъ. къ немꙋ́же вѣ́рнїи притека́юще, неизчє́тныѧ да́ры бж҃є́ственныѧ тꙋ́не прїе́млютъ, цѣльбы̑ почерпа́ютъ и҆ въ не́мощи ᲂу҆крѣплѧ́ютсѧ, мрӏ́ю приснодв҃ꙋ и҆ бцⷣꙋ велича́юще.

Гла́съ в҃: Что́ ти воздади́мъ, бцⷣе; кі̑ѧ тебѣ̀ да́ры принесе́мъ; бл҃гохвалє́нїѧ ꙗ҆́коже цвѣ̑ты сладкоꙋха̑нныѧ, ᲂу҆миле́нїѧ сле́зы ꙗ҆́кѡ би́серъ свѣ́телъ, мл҃твы ꙗ҆́кѡ кади́ло бл҃гово́нное, пѣ̑сни же и҆ пѣ̑нїѧ ꙗ҆́кѡ мѵ́ро многоцѣ́нное, па́че же дꙋ́хъ смире́нъ и҆ срⷣце сокрꙋше́нное, є҆го́же не ᲂу҆ничижѝ, влⷣчце, но возда́ждь на́мъ за скѡ́рби ра́дость нетлѣ́ннꙋю: ты́ бо є҆сѝ всѣ́хъ ра́достей сокро́вище.

Сла́ва, и҆ ны́нѣ, гла́съ ѕ҃. Подо́бенъ: Всѐ ѿло́жше:

Ско́рбь ѿложи́вше, ѡ҆блече́мсѧ въ ри̑зы весе́лїѧ: наста́ бо пра́здникъ свѣ́телъ бг҃омт҃ре, созыва́ѧй вѣ̑рныѧ на пи́ръ вѣ́ры. вкꙋ́симъ ᲂу҆̀бо ѿ трапе́зы дх҃о́вныѧ, ꙗ҆́же на́мъ предлага́етсѧ, дꙋ́шꙋ напита́емъ сщ҃е́нными ѡ҆́бразы, жа́ждꙋ ᲂу҆толи́мъ ѿ и҆сто́чника блгⷣти, да не и҆зы́демъ ѿ пи́ра сегѡ̀ гла́дни и҆ дрѧ́хли, ничто́же по́льзовавшесѧ.

На стїхо́внѣ, гла́съ и҃. Подо́бенъ: Ѽ пресла́внагѡ чꙋдесѐ:

Ѽ торжества̀ свѣ́тлагѡ!* Ѽ видѣ́нїѧ пресла́внагѡ!* ка́менїе по сло́вꙋ хрⷭ҇то́вꙋ возопи́ша,* сла́вꙋ бг҃омт҃ре возвѣща́юще.* ꙗ҆влѧ́етъ бо ка́мень пречⷭ҇тагѡ є҆ѧ̀ ли́ка ѡ҆́бразъ,* и҆ блгⷣть бжⷭ҇твеннꙋю въ себѣ̀ тайнолѣ́пнѡ сокро́виществꙋетъ.* тѣ́мже первоѡбра́знѣй со тре́петомъ покланѧ́ющесѧ,* съ ли̑ки неви́димѡ на́мъ сослꙋжа́щихъ припѣва́емъ:* пребл҃гослове́ннаѧ, пречⷭ҇таѧ, съ на́ми пребꙋ́ди во вѣ́ки.

Стӏ́хъ: Слы́ши, дщѝ, и҆ ви́ждь, и҆ приклонѝ ѹ҆́хо твоѐ.

Прїиди́те, прⷪ҇ро́цы, дв҃ꙋ та́инственнꙋю возвѣсти́вшїи,* прїиди́те, а҆пⷭ҇ли, мт҃рь сло́ва вселе́ннѣй проповѣ́давшїи,* прїиди́те, ст҃и́телїе, бцⷣꙋ сїю̀ велегла́снѡ и҆сповѣ́давшїи,* и҆ несто́рїа ѕлоче́стїе посрами́вшїи,* прїиди́те, всѣ́хъ првⷣныхъ ли́цы,* съ на́ми и҆ ѡ҆ на́съ молѧ́щесѧ,* припади́те къ мрӏ́и всецр҃и́цѣ,* ли́къ бг҃окра́сный и҆ сщ҃еннолѣ́пный составлѧ́юще и҆ съ на́ми припѣва́юще:* пребл҃гослове́ннаѧ, пречⷭ҇таѧ, съ на́ми пребꙋ́ди во вѣ́ки.

Стӏ́хъ: Приведꙋ́тсѧ цр҃ю̀ дѣ́вы въ слѣ́дъ є҆ѧ̀, и҆ и҆́скрєннїѧ є҆ѧ̀ приведꙋ́тсѧ тебѣ̀.

Ѽ дѣ̑вы, въ житїѝ прпⷣбничестѣмъ подвиза́ющыѧсѧ!* въ це́рковь бг҃оро́дичнꙋю притецы́те,* свѣщеносѧ́ще ва́шѧ добродѣ́тєли,* ꙗ҆̀же въ да́ръ бг҃оѻтрокови́цѣ принеси́те,* и҆ вы̀, дще́ре фанꙋ́илевы подража́тєльницы,* прїиди́те, во хра́мѣ бл҃гослови́те мт҃рь є҆мманꙋ́илевꙋ,* ꙗ҆́кѡ да всѝ є҆ди́ный ли́къ составлѧ́юще,* любо́вїю припѣва́емъ:* пребл҃гослове́ннаѧ, пречⷭ҇таѧ, съ на́ми пребꙋ́ди во вѣ́ки.

Сла́ва, и҆ ны́нѣ, гла́съ и҃:

Прїиди́те, прїими́те ѱалти̑ри десѧтострꙋ̑нныѧ и҆ согла̑сїѧ сладкогла̑снаѧ, пѣ́снь воспо́йте дв҃ѣ и҆ бг҃омт҃ри, начина́ющꙋ ѱалмопѣ́вцꙋ царю̀, припѣва́ющꙋ: предста̀ вы́нꙋ цр҃и́ца свѣ́тлаѧ ѡ҆деснꙋ́ю тебє̀, хрⷭ҇тѐ бж҃е, рѧ̑сны златы́ми дх҃а преꙋкраше́на, и҆ добро́тою неизрече́нною преиспещре́на, млⷭ҇рдїемъ же па́че со́лнца сїѧ́юща: сїю̀ ᲂу҆̀бо, влⷣко гдⷭ҇и, млⷭ҇тивнѡ послꙋ́шати бл҃говолѝ, є҆гда̀ тѝ ѡ҆ на́съ мо́литсѧ, чл҃вѣколю́бче.

Тропа́рь, гла́съ д҃:

Къ бцⷣѣ прилѣ́жнѡ ны́нѣ притеце́мъ, грѣ́шнїи и҆ смире́ннїи, и҆ припаде́мъ, въ покаѧ́нїи зовꙋ́ще и҆зꙿ глꙋбины̀ дꙋшѝ: влⷣчце, помозѝ, на ны̀ млⷭ҇рдовавши, потщи́сѧ, погиба́емъ ѿ мно́жества прегрѣше́нїй: не ѿвратѝ твоѧ̑ рабы̑ тщы̀, тѧ́ бо и҆ є҆ди́нꙋ наде́ждꙋ и҆́мамы.

На ѹ҆́трени.

На Бг҃ъ гдⷭ҇ь: тропа́рь три́жды.

По а҃-мъ стїхосло́вїи сѣда́ленъ, гла́съ є҃:

Слы́ши, дщѝ ѻ҆ц҃а̀ нбⷭ҇нагѡ и҆ мт҃и свѣ́та, и҆ ви́ждь скѡ́рби на́шѧ и҆ ѡ҆бстоѧ̑нїѧ, и҆ приклонѝ ѹ҆́хо твоѐ къ моле́нїємъ на́шымъ: се́ бо ра́звѣ тебє̀ и҆ны́ѧ застꙋ́пницы крѣ́пкїѧ не и҆́мамы, ни и҆на́гѡ прибѣ́жища, ни ᲂу҆тѣше́нїѧ. къ тебѣ̀ є҆ди́нѣй припа́даемъ и҆ въ тебѣ̀ є҆ди́нѣй наде́ждꙋ полага́емъ: всѧ̑ бо мо́жеши, то́кмѡ є҆́же хотѣ́ти.

Сла́ва, и҆ ны́нѣ, то́йже.

По в҃-мъ стїхосло́вїи сѣда́ленъ, гла́съ є҃:

Дв҃дъ тво́й пра́ѻтецъ, чⷭ҇таѧ, дх҃омъ проразꙋмѣва́ѧ тѧ̀, хотѧ́щꙋю ѿ ро́да є҆гѡ̀ роди́тисѧ, и҆ бж҃їѧ воплоще́нїѧ та́йнѣ послꙋжи́ти, и҆́мѧ твоѐ пресла́дкое и҆здале́че цѣлꙋ́ѧ, ра́достїю и҆ бл҃гоговѣ́инствомъ возопѝ: помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.

Сла́ва, и҆ ны́нѣ, то́йже.

Полѷеле́й, и҆ велича́нїе:

Досто́йно є҆́сть велича́ти тѧ̀, бцⷣе, чⷭ҇тнѣ́йшꙋю херꙋві̑мъ и҆ сла́внѣйшꙋю безꙿ сравне́нїѧ серафі̑мъ. Ѱало́мъ и҆збра́нный: Помѧнѝ, гдⷭ҇и, дв҃да и҆

всю̀ кро́тость є҆гѡ̀:

По полѷеле́и сѣда́ленъ, гла́съ з҃:

Весели́сѧ ны́нѣ, ѻ҆би́теле бг҃омт҃ре, тебѣ́ бо ввѣ́рисѧ сокро́вище многоцѣ́нное: ст҃а́ѧ бг҃оро́дичнаѧ і҆кѡ́на, не зла́томъ то́кмѡ и҆ ка́менїемъ чⷭ҇тны́мъ сїѧ́ющаѧ, па́че же чꙋдесы̀ и҆ цѣльба́ми неисче́тными ᲂу҆краше́на, и҆ сла́вою неизрече́нною вѣнча́на, ѿ человѣ̑къ стра́хомъ и҆ любо́вїю покланѧ́ема, и҆ ѿ а҆́гг҃лъ неви́димѡ со тре́петомъ слꙋжи́ма: тѣ́мже ᲂу҆̀бо, ст҃а́ѧ ѻ҆би́теле, блюдѝ сїю̀ па́че кївѡ́та завѣ́та, па́че всѧ́кагѡ да́ра бжⷭ҇твеннагѡ и҆ всѧ́кїѧ ст҃ы́ни: ꙗ҆́кѡ да за любо́вь твою̀ и҆ ᲂу҆се́рдїе те́плое возлю́блена бꙋ́деши ѿ первоѡбра́зныѧ.

Та́же степє́нна, а҃-й а҆нтїфѡ́нъ д҃-гѡ гла́са.

Прокӏ́менъ, гла́съ д҃: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.

Стӏ́хъ: Слы́ши, дщѝ, и҆ ви́ждь, и҆ приклонѝ ѹ҆́хо твоѐ. Є҆ѵⷢ҇лїе ѿ лꙋкѝ, зача́ло д҃.

По н҃-мъ ѱалмѣ̀: Мл҃твами бцⷣы:

Та́же стїхи́ра, гла́съ ѕ҃:

Ѿпа́стырей пе́рвое поклоне́нїе прїе́мшаѧ, и҆ па́стырємъ ѡ҆́бразъ тво́й цѣльбоно́сный ꙗ҆ви́вшаѧ, ᲂу҆мꙋдрѝ, влⷣчце, па̑стыри цр҃кве, ᲂу҆пасѝ ста́до, є҆́же сн҃ъ тво́й, дв҃о, призва̀ бжⷭ҇твеннымъ свои́мъ гла́сомъ, соберѝ расточє́нныѧ ѻ҆́вцы, сп҃сѝ а҆́гнцы твоѧ̑ ѿ волкѡ́въ гꙋбѧ́щихъ ѧ҆̀, и҆ приведѝ ѧ҆̀ на па̑жити вѣ̑чныѧ. Канѡ́нъ бцⷣѣ, є҆гѡ́же краегране́сїе: Подꙿ твою̀ млⷭ҇ть притека́емъ, бцⷣе.

Гла́съ и҃. Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Припѣ́въ: Прест҃а́ѧ бцⷣе, сп҃сѝ на́съ.

Прїиди́те воспои́мъ цр҃и́цꙋ мӏ́ра, всеѧ̀ тва́ри превы́шшꙋю, вѣ́рныхъ свѣ́тлое ᲂу҆пова́нїе, и҆ мт҃рь безнача́льнагѡ.

Ѡ҆бѣтова́нїе жены̀ чꙋ́дныѧ, главꙋ̀ ѕмӏ́евꙋ сотре́ти и҆мꙋ́щїѧ, въ ско́рби прароди́телевѣй, є҆гда̀ ѿ раѧ̀ и҆зринове́ни бы́ша, ꙗ҆́кѡ ѕвѣзда̀ незаходи́маѧ возсїѧ̀.

Дѣ́вствомъ неизрече́ннымъ преꙋкраше́на бг҃оневѣ́ста мрӏ́а, чте́тъ и҆са́їю прⷪ҇ро́ка и҆ мꙋ́дрствꙋетъ недомышлѧ́ющисѧ: кто̀ сїѧ̀ дв҃а та́инственнаѧ, ѡ҆ не́йже прⷪ҇ро́къ глаго́летъ; ѻ҆ба́че сѐ, є҆́й а҆рха́гг҃лъ предстои́тъ, вопїѧ̀: ра́дꙋйсѧ, блгⷣтнаѧ!

Тецы́те, па́стырїе виѳлее́мстїи, поспѣша́йте, дв҃ѣ а҆́гнца бж҃їѧ воплоти́вшей поклони́тесѧ: тецы́те, па́стырїе бꙋкови́чстїи, ра́дость возвѣща́йте: ꙗ҆ви́сѧ на́мъ пресла́внѡ і҆кѡ́на бг҃омт҃ре.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Волсвѝ дре́вле сн҃ꙋ твоемꙋ̀ бжⷭ҇твенномꙋ да́ры принесо́ша: мы́ же, влⷣчце, когда́ ти такова̑ѧ принесе́мъ; ѻ҆ба́че срⷣце скорбьмѝ ѡ҆чище́нное прїимѝ ꙗ҆́коже зла́то, ꙗ҆́коже лива́нъ сладкоꙋха́нный хвале́бное пѣ́нїе, и҆ ꙗ҆́кѡ сми́рнꙋ покаѧ́нїѧ горча́йшыѧ сле́зы.

Ѡ҆рꙋ́жїю тѝ проитѝ дꙋ́шꙋ, сѷмеѡ́нъ во хра́мѣ прорека́етъ, є҆́же и҆ сбы́стсѧ, і҆и҃сꙋ пребжⷭ҇твенномꙋ на ло́бнѣмъ воздвиза́емꙋ: мы́ же чи́мъ ѡ҆правди́мсѧ, Ѽ бг҃омт҃и; сн҃а твоего̀ и҆ бг҃а грѣхи̑ на́шими при́снѡ распина́юще, непоро́чнꙋю же и҆ пречⷭ҇тꙋю твою̀ дꙋ́шꙋ ᲂу҆ѧзвлѧ́юще.

Ю҆́на хрⷭ҇та̀ во хра́мѣ бж҃їи ѡ҆брѣ́тши, ста́рцы и҆ премꙋ̑дрыѧ со вла́стїю ᲂу҆ча́ща, возра́доваласѧ є҆сѝ неизрече́ннѡ, Ѽ прест҃а́ѧ, на́съ же и҆ во хра́мѣ стоѧ́щихъ, зри́ши сꙋетѣ̀ поꙋча́ющихсѧ.

Ми́ловати человѣ́ки не престае́ши ѿ лѣ́тъ дре́внихъ да́же доны́нѣ, бцⷣе бл҃гослове́ннаѧ, въ ка́нѣ галиле́йстѣй пе́рвое чꙋ́до ᲂу҆ хрⷭ҇та̀ гдⷭ҇а и҆схода́тайствовавши, хрⷭ҇тїа́ны при́снѡ застꙋпа́ющи и҆ сп҃са́ющи, ны́нѣ же на́мъ ѡ҆́бразъ тво́й блгⷣтный ꙗ҆влѧ́ющи.

Сѣда́ленъ, гла́съ в҃:

До́мъ бг҃оро́диченъ дре́вле бы́вши, зе́мле рꙋ́сскаѧ плѣне́ннаѧ, взыва́ша вѣ́рнїи и҆ногда̀, почто̀ дїа́волꙋ въ рꙋ́цѣ предала́сѧ є҆сѝ; восклони́сѧ, воспрѧнѝ ᲂу҆̀бо вопїю́щи: всѧ̑ тѝ возмѡ́жна сꙋ́ть, хрⷭ҇тѐ бж҃е, бцⷣею сп҃си́ мѧ. Сла́ва, и҆ ны́нѣ, то́йже.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

И҆скꙋпи́вшемꙋ на́съ ѿ клѧ́твы зако́нныѧ чⷭ҇тно́ю свое́ю кро́вїю, припадѝ ѡ҆ на́съ, дв҃о бцⷣе, мл҃твою твое́ю грѣхѝ на́шѧ ѡ҆мыва́ющи.

Лю́дїе бж҃їи, ᲂу҆разꙋмѣ́йте стра́шныѧ та́йны си́лꙋ: со воскрⷭ҇нїемъ є҆ди́нагѡ живо́тъ мӏ́рꙋ всемꙋ̀ возсїѧ̀. ра́дꙋйтесѧ ᲂу҆̀бо, торжествꙋ́йте и҆ ликꙋ́йте, и҆ просла́вите воскре́сшаго ро́ждшꙋю!

Ѡ҆бра́дованнаѧ неизрече́ннѡ, дв҃а чⷭ҇таѧ, воста́нїемъ и҆ вознесе́нїемъ бжⷭ҇твеннагѡ сн҃а твоегѡ̀, ра́дость на́мъ неча́ѧннꙋю и҆ недомы́слимꙋю и҆спросѝ и҆ ꙗ҆вѝ ско́рѡ, ꙗ҆́кѡ да просла́вимъ тѧ̀, ра́дость всѣ́хъ ра́достей.

Стека́ютсѧ вѣ́рныхъ мнѡ́жества къ чꙋдотво́рномꙋ ли́кꙋ твоемꙋ̀, влⷣчце, и҆ тогѡ̀ сла́ва зе́млю ѡ҆бтека́етъ: сщ҃е́нницы любо́вїю почита́ютъ, а҆рхїерє́и покланѧ́ютсѧ, да́ръ тво́й цѣльбоно́сный прославлѧ́юще. Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѡ҆каѧ́ннаго; но ѡ҆братѝ мѧ̀, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Теплото́ю дх҃а, дре́вле во ѻ҆́гненныхъ ѧ҆зы́цѣхъ на а҆пⷭ҇лы и҆ на тѧ̀, пречⷭ҇таѧ, соше́дшагѡ, и҆ на̑ша хла̑днаѧ срⷣца̀ согрѣ́й, Ѽ бг҃омт҃и! просвѣща́ющи тѣ́мъ на́шѧ зѣ̑ницы ѹ҆́мныѧ, и҆ бжⷭ҇твєннаѧ разꙋмѣ́ти поꙋча́ющи на́съ.

Проповѣ́дникѡмъ бг҃онѡ́снымъ жрє́бїѧ мета́ющымъ, кꙋда̀ кӏ́йждо по́йдетъ бл҃говѣсти́ти, возжела́ла є҆сѝ и҆ ты̀, пречⷭ҇таѧ, метнꙋ́ти жрє́бїѧ: и҆ бы́сть тѝ пе́рвый жре́бїй страна̀ і҆́верскаѧ, вторы́й же ст҃а́ѧ гора̀ а҆ѳѡ́нскаѧ, тре́тїй же жре́бїй страна̀ рѡссӏ́йскаѧ, ю҆́же и҆ возста́ви ѿ поги́бели ро́ва.

Ри́зꙋ твою̀, сладкоꙋха́нное и҆ нетлѣ́нное твоѐ тѣ́ло прикрыва́вшꙋю, почита́емъ, хрⷭ҇тїа́не, и҆ храни́мъ, ꙗ҆́кѡ зѣ́ницꙋ ѻ҆́ка: і҆кѡ́намъ твои̑мъ, цѣльбы̑ и҆сточа́ющымъ, покланѧ́емсѧ и҆ ты́ѧ лобыза́емъ. па́че же тебѣ̀ первоѡбра́знѣй слꙋ́жимъ стра́хомъ и҆ любо́вїю, и҆́мѧ твоѐ непреста́ннѡ призыва́юще, всепѣ́таѧ.

И҆сто́чникъ и҆сцѣле́нїй и҆ сосꙋ́дъ та́инъ блгⷣти, сокро́вище многоцѣ́нное и҆ кївѡ́тъ ст҃ы́ни, ѕвѣздꙋ̀, пꙋтеводѧ́щꙋю вѣ̑рныѧ въ црⷭ҇твїе и҆́же во виѳлее́мѣ рожде́ннагѡ, зри́мъ і҆кѡ́нꙋ твою̀, бцⷣе, ѿ неѧ́же млⷭ҇ти твоеѧ̀ да́ры на́мъ при́снѡ то́чиши.

Пѣ́снь ѕ҃.

І҆рмо́съ: Ѡ҆чⷭ҇ти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зꙿ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.

Толкꙋ́щымъ на́мъ ᲂу҆ двере́й твоегѡ̀ млⷭ҇рдїѧ, ты́ѧ ско́рѡ ѿве́рзи на́мъ, бцⷣе всепѣ́таѧ, вводѧ́щи ны̀ во ст҃а̑ѧ житїѧ̀ бл҃гочⷭ҇ти́вагѡ, совлека́ющи на́съ ри́зы грѣхо́вныѧ, и҆ ри́зою сп҃се́нїѧ ѡ҆блека́ющи ны̀.

Є҆гда̀ прешла̀ є҆сѝ ѿ житїѧ̀ земна́гѡ къ животꙋ̀ безсме́ртномꙋ, бцⷣе, тѣ́ло твоѐ пречⷭ҇тое и҆ мѷроꙋха́нное геѳсиманӏ́йскаѧ ве́сь прїѧ́тъ. ѻ҆ба́че ᲂу҆держа́ти то́е не могꙋ́щи, то́кмѡ ст҃ѣ́йшїй тво́й гро́бъ храни́тъ, да́же до днѐ сегѡ̀ хрⷭ҇тїа́нѡмъ на поклоне́нїе, ꙗ҆́кѡ и҆сто́чникъ блгⷣти неисчерпа́емый.

Кӏ́й ѧ҆зы́къ и҆зрече́тъ ра́дость ᲂу҆ченикѡ́въ хрⷭ҇то́выхъ, є҆гда̀ по ᲂу҆спе́нїи твое́мъ ви́дѣша тѧ̀ жи́вꙋ сꙋ́щꙋ, Ѽ мт҃и живота̀, при́снѡ и҆̀мъ спребыва́ющꙋ. тѣ́мже съ весе́лїемъ возопи́ша: панагӏ́а бцⷣе, помога́й на́мъ!

А҆́гг҃ли вои́стиннꙋ хранѧ́тъ се́й ѡ҆́бразъ тво́й чⷭ҇тны́й, влⷣчце, во бране́хъ бо и҆ нестрое́нїихъ и҆ лю́тыхъ напа́стехъ, во ѻ҆гни́ бо и҆ трꙋ́сѣ, въ мо́ри и҆ въ стра́нствїихъ, въ бѣда́хъ ѿ разбѡ́йникъ и҆ лю́тыхъ безбѡ́жникъ, сохрани́ла є҆сѝ то́й невреди́мь. тѣ́мже и҆ ѻ҆би́тель твою̀ тѣ́мъ ѿ всѧ́кїѧ бѣды̀ ѡ҆гражда́й при́снѡ.

Конда́къ, гла́съ г҃. Подо́бенъ: Дв҃а дне́сь:

Дв҃а дне́сь ѡ҆́бразъ сво́й вѣ̑рнымъ пресла́внѡ ꙗ҆влѧ́етъ, и҆ то́й ꙗ҆́кѡ сокро́вище вели́кое лю́демъ ѡ҆ставлѧ́етъ. па́стырїе чꙋ́до возвѣща́ютъ, вѣ́рнїи же ве́селѡ текꙋ́тъ поклони́тисѧ новоѧвле́ннѣй, бл҃года́рнѣ вопїю́ще: на́съ ра́ди ꙗ҆ви́сѧ сїѧ̀ і҆кѡ́на приснодв҃ы и҆ мт҃ре превѣ́чнагѡ бг҃а.

І҆́косъ: Никто́же да ᲂу҆ныва́етъ, никто́же да сꙋмни́тсѧ нижѐ да дрѧ́хлꙋетъ, никто́же ᲂу҆пова́нїѧ да лиша́етсѧ. нѣ́смы бо си́ри, нижѐ ѡ҆ста́влени: на́съ бо ра́ди ꙗ҆ви́сѧ сїѧ̀ і҆кѡ́на приснодв҃ы и҆ мт҃ре превѣ́чнагѡ бг҃а.

Пѣ́снь з҃.

І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.

Є҆́же ѡ҆ человѣ́цѣхъ попече́нїѧ не ѡ҆ставлѧ́ющи, въ мо́ри бѣ́дствꙋющымъ ско́рѡ помога́еши, по вода́мъ ше́ствовашаго и҆ бꙋ́ри ᲂу҆кроща́вшаго і҆и҃са ро́ждшаѧ неизрече́ннѡ: бл҃гослове́нна є҆сѝ, мт҃и ро́да хрⷭ҇тїа́нскагѡ.

Мона́хѡвъ є҆сѝ тиша́йшаѧ ра́дость, и҆ молча̑льникъ пѣ́нїе серде́чное, ѻ҆би́телей ст҃ы́хъ сла́ва и҆ ѡ҆гражде́нїе, ст҃ы́ѧ горы̀ а҆ѳѡ́нскїѧ покро́въ и҆ всѣ́хъ подвиза́ющихсѧ держа́вное вѣнча́нїе: бл҃гослове́нна є҆сѝ, мт҃и ро́да хрⷭ҇тїа́нскагѡ.

Бра̑нныѧ полкѝ на побѣ̑ды во́диши, Ѽ воево́до бжⷭ҇твеннаѧ, гра́ды, къ тебѣ̀ взыва́ющыѧ, і҆кѡ́нами твои́ми ѡ҆стѣнѧ́еши, зе́мли, тебѐ не забыва́ющыѧ, ѿ меча̀ и҆ плѣне́нїѧ и҆збавлѧ́еши: бл҃гослове́нна є҆сѝ, мт҃и ро́да хрⷭ҇тїа́нскагѡ.

Ѽ дв҃о, кꙋпино́ю неѡпали́мою проѡбразова́ннаѧ, ѻ҆гню̀ со вла́стїю повелѣва́еши. тѣ́мже и҆ ѡ҆́бразъ тво́й ст҃ы́й многоча́снѣ запале́нїѧ ѻ҆́гненнагѡ и҆збавлѧ́ла є҆сѝ, и҆ страсте́й пла́мень росо́ю блгⷣти ᲂу҆гаша́еши: бл҃гослове́нна є҆сѝ, мт҃и ро́да хрⷭ҇тїа́нскагѡ.

Пѣ́снь и҃.

І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.

Грѣ́шныхъ спорꙋ́чницꙋ и҆ ра́дость неча́ѧннꙋю, на сꙋди́щи хрⷭ҇то́вѣ є҆ди́ное ᲂу҆пова́нїе, бцⷣꙋ бл҃гослове́ннꙋю, хвали́те и҆ превозноси́те во всѧ̑ вѣ́ки.

Ѻ҆би́телей ст҃ы́хъ домострои́тельницꙋ, цр҃кве сто́лпъ и҆ црⷭ҇твїѧ стѣ́нꙋ неѡбори́мꙋю, бцⷣꙋ всепѣ́тꙋю, хвали́те и҆ превозноси́те во всѧ̑ вѣ́ки.

Рꙋ́сскꙋю зе́млю, въ разбо́йники впа́дшꙋю и҆ стра́ждꙋщꙋю лю́тѣ, и҆зꙿ глꙋбины̀ паде́нїѧ возведѝ, влⷣчце всемлⷭ҇тиваѧ, да тѧ̀ согла́снѡ превозно́симъ во всѧ̑ вѣ́ки.

Ѡ҆́бразъ тво́й, въ лѣ́снѣ просїѧ́вшїй блгⷣтїю, сохранѧ́й и҆ соблюда́й на ра́дость вѣ̑рнымъ, бцⷣе, ꙗ҆́кѡ да предꙿ тѣ́мъ тѧ̀ хва́лѧтъ и҆ бл҃гословѧ́тъ лю́дїе, и҆ превозно́сѧтъ во всѧ̑ вѣ́ки.

Пѣ́снь ѳ҃.

І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.

Да́ждь на́мъ сло́во, предвѣ́чное сло́во ро́ждшаѧ: не молча́щи мимоидѝ на́съ, ꙗ҆́кѡ да глаго́лъ тво́й въ срⷣцы ᲂу҆слы́шавше, любо́вїю и҆ тре́петомъ тебѐ пренепоро́чнꙋю велича́емъ.

И҆́же бцⷣꙋ и҆ приснодв҃ꙋ не чтꙋ́щїи, коли́кїѧ ра́дости и҆ сла́дости лиша́ютсѧ! кꙋ́ю ско́рбь и҆ тѣснотꙋ̀ себѣ̀ прїꙋготовлѧ́ютъ: мы́ же бцⷣꙋ всепѣ́тꙋю непреста́ннѡ велича́емъ.

Цр҃и́це мӏ́ра и҆ мт҃и безнача́льнагѡ, вои́стиннꙋ ѡ҆деснꙋ́ю бг҃а предстоѧ́щи: ѡ҆ на́съ многогрѣ́шныхъ и҆ ѡ҆сꙋжде́нныхъ мл҃твꙋ твою̀ непреста́ннѡ приносѝ, ꙗ҆́кѡ да тобо́ю сп҃са́еми любо́вїю и҆ тре́петомъ тѧ̀ велича́емъ.

Є҆́же ѿ ᲂу҆сте́нъ нечи́стыхъ тѝ приноси́мое хвале́нїе, не пре́зри, всенепоро́чнаѧ: ѻ҆ба́че пре́жде да́же къ тебѣ̀ воззва́ти на́мъ, ᲂу҆слы́ши на́съ: тѧ́ бо при́снѡ любо́вїю и҆ тре́петомъ велича́емъ.

Свѣти́ленъ. Подо́бенъ: А҆пⷭ҇ли ѿ конє́цъ:

Всѝ вѣ́рнїи ѿ разсѣ́ѧнїѧ конє́цъ, совокꙋ́пльшесѧ дне́сь, почти́те ѡ҆́бразъ мо́й, дꙋша́мъ цѣльбы̑ прїе́млюще. и҆ ты̀, сн҃е и҆ бж҃е мо́й, прїимѝ чтꙋ́щыѧ мѧ̀ въ твоѧ̑ кро́вы.

На хвали́техъ стїхи̑ры на д҃, гла́съ и҃:

 враа́мовы вѣ́ры не и҆́мамы, и҆ дв҃довꙋ кро́тость не стѧжа́хомъ, пꙋ̑сты є҆смы̀ добродѣ́телей: ѻ҆ба́че грѣхмѝ ѡ҆богати́хомсѧ, и҆ гнѣ́въ бж҃їй првⷣный себѣ̀ и҆схода́тайствовахомъ, ᲂу҆млⷭ҇рдисѧ ᲂу҆̀бо на ны̀, влⷣчце: ты́ бо є҆сѝ є҆ди́ное ᲂу҆пова́нїе и҆ сп҃се́нїе дꙋ́шъ на́шихъ.

Сѐ є҆динонадесѧ́тый ча́съ прїи́де: при две́рехъ сꙋдїѧ̀, и҆ не трезви́мсѧ, ни гото́вимсѧ, ри́зꙋ креще́нїѧ, грѣхо́мъ раздра́нꙋю, не сшива́емъ покаѧ́нїемъ, є҆ле́а млⷭ҇ти не кꙋпꙋ́емъ, и҆ свѣти́льникѡвъ вѣ́ры не возжига́емъ. ка́кѡ въ полꙋ́нощи предста́немъ женихꙋ̀; но ты̀, пресвѣ́тлаѧ наде́ждо ѿча́ѧнныхъ, спорꙋ́чница на́мъ бꙋ́ди, и҆скꙋпꙋ́юще на́съ грѣхо́внагѡ плѣ́на, нетлѣ́ннымъ зла́томъ дерзнове́нныхъ мл҃твъ твои́хъ, и҆ вѣ́чныѧ поги́бели на́съ и҆збавлѧ́ющи.

Оу҆скорѝ, ᲂу҆скорѝ, влⷣчце, на по́мощь къ на́мъ безпомѡ́щнымъ, тща́тсѧ бо вразѝ на́ши на́съ погꙋби́ти: ᲂу҆жѐ ѡ҆ побѣ́дѣ свое́й веселѧ́тсѧ, ᲂу҆жѐ на́мъ посмѣва́ютсѧ: не да́ждь ᲂу҆̀бо торжества̀ ѕло́бѣ и҆́хъ, да́ждь сла́вꙋ и҆́мени твоемꙋ̀ бл҃гослове́нномꙋ, потщи́сѧ, не ᲂу҆коснѝ, всемлⷭ҇тиваѧ, твои́ бо є҆смы̀ рабѝ, а҆́ще и҆ согрѣша́емъ.

Гла́съ в҃: Вскꙋ́ю є҆смы̀ дрѧ́хли; вскꙋ́ю смꙋща́емсѧ, бра́тїе; почто̀ ᲂу҆ныва́емъ; восклони́мсѧ, возведе́мъ ѻ҆́чи горѣ̀, и҆ ѹ҆́зримъ прест҃ꙋ́ю дв҃ꙋ, покро́вомъ свои́мъ свѣтоно́снымъ на́съ ѡ҆сѣнѧ́ющꙋю. тѣ́мже и҆зꙿ глꙋбины̀ срⷣца то́й возопїи́мъ: покры́й на́съ ѿ всѧ́кїѧ напа́сти, цр҃и́це нбⷭ҇наѧ.

Во броню̀ вѣ́ры ѡ҆бо́лкшесѧ, и҆ шле́мъ сп҃се́нїѧ взе́мше, мече́мъ сло́ва бж҃їѧ воѡрꙋжи́вшесѧ, на бра́нь и҆зы́демъ проти́вꙋ дꙋхѡ́въ ѕло́бы поднебе́сныхъ, и҆ дꙋ́хомъ вмꙋжи́вшесѧ, тѣ̑мъ противоста́немъ да́же до кро́ве, къ бцⷣѣ взыва́юще и҆ вопїю́ще: не преда́ждь на́съ въ рꙋ́цѣ врагѡ́въ твои́хъ, бл҃гослове́ннаѧ воево́до вѣ́рнѡ подвиза́ющихсѧ.

Сла́ва, и҆ ны́нѣ, гла́съ и҃:

Свѣ́те дꙋ́шъ на́шихъ незаходи́мый, въ нощѝ блꙋжда́ющихъ на́съ ѡ҆блиста́й, тьмꙋ̀ грѣхо́внꙋю прогонѧ́ющи, и҆ зарю̀ сп҃се́нїѧ на́мъ возсїѧва́ющи, бцⷣе всепѣ́таѧ, сл҃нца пра́вды мт҃и и҆ въ сл҃нце ѡ҆блече́ннаѧ, лꙋча́ми млⷭ҇ти твоеѧ̀ проженѝ тꙋ́чи жестосе́рдїѧ на́шегѡ, да ѹ҆́зримъ свѣ́тъ тво́й и҆ возвесели́мсѧ, любо́вїю тѧ̀, дв҃о, велича́юще.

Славосло́вїе вели́кое. Є҆ктєнїѝ, и҆ ѿпꙋ́стъ.

На лїтꙋргӏ́и слꙋ́жба всѧ̀ бцⷣы.