Мѣ́сѧца і҆ꙋ́нїа въ а҃і-й де́нь.

Слꙋ́жба ст҃ы̑мъ первомч҃никѡмъ кита̑йскимъ.

На ма́лѣй вече́рни.

На Гдⷭ҇и, воззва́хъ: стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:

Нб҃оплетє́нныѧ вѣнцы̀ прїѧ́ли є҆стѐ ѿ подвигополо́жника хрⷭ҇та̀,* пресла́внїи новомч҃ницы землѝ кита́йскїѧ,* а҆́гг҃лѡмъ подѡ́бницы бг҃ораче́нїемъ сꙋ́ще:* ѡ҆ на́съ моли́тесѧ,* преле́стнагѡ житїѧ̀ сегѡ̀ мо́ре преплы́ти,* и҆ въ нбⷭ҇нꙋю при́стань дости́гнꙋти.

Нб҃одосто́йный ли́че,* воскре́сшемꙋ хрⷭ҇тꙋ̀ пожро́стесѧ,* да лꙋ́чшаѧ приѡбрѧ́щете,* болѣ́зньми и҆ страда̑нїи ва́шими возвесели́сте а҆́гг҃лѡвъ и҆ человѣ́кѡвъ мно́жєства:* тѣ́мже па́мѧть ва́шꙋ соверша́ющыѧ* ѿ болѣ́зней и҆ страсте́й мно́гихъ и҆сцѣли́те.

Сла́ва, гла́съ и҆ подо́бенъ то́йже:

Нб҃освѣ́тлїи восто́ка да́льнѧгѡ свѣти́льницы ꙗ҆ви́стесѧ,* и҆ мра́къ а҆́довъ дре́внѧгѡ темнонеи́стовства разори́сте:* скꙋ́дства похва́лъ на́шихъ не пре́зрите,* но лꙋча́ми нб҃омꙋ́дрїѧ дꙋ́шы чтꙋ́щихъ по́двигъ ва́шъ при́снѡ просвѣща́йте.

И҆ ны́нѣ, бг҃оро́диченъ, гла́съ и҆ подо́бенъ то́йже:

Нбⷭ҇ныхъ чинѡ́въ ра́дованїе,* на землѝ человѣ́кѡвъ крѣ́пкое предста́тельство,* пречⷭ҇таѧ дв҃о,* сп҃си́ ны, и҆̀же къ тебѣ̀ прибѣга́ющыѧ:* ꙗ҆́кѡ на тѧ̀ ᲂу҆пова́нїе* по бз҃ѣ, бцⷣе, возложи́хомъ.

На стїхо́внѣ стїхи̑ры, гла́съ в҃.

Подо́бенъ: До́ме є҆ѵфра́ѳѡвъ.

Мч҃никѡвъ кита́йскихъ* кра̑снаѧ и҆справлє́нїѧ воспѣва́юще,* и҆сто́чники росы̀ нбⷭ҇ныѧ* ѡ҆брѣта́емъ цѣльбонѡ́сныѧ,* мл҃твєнницы вѣ̑рнымъ вѣ́рнїи.

Стӏ́хъ: Ѿ востѡ́къ со́лнца до за̑падъ хва́льно и҆́мѧ гдⷭ҇не.

Ба́нею пакибытїѧ̀* ᲂу҆лꙋчи́вше просвѣще́нїе,* кро́вїю послѣдѝ* крⷭ҇ти́стесѧ, страда́льцы,* соверше́ннѣйше.

Стӏ́хъ: Ѿ стра́нъ собра̀ и҆̀хъ, ѿ востѡ́къ, и҆ за̑падъ, и҆ сѣ́вера, и҆ мо́рѧ.

На колесни́цѣ кро́ве ва́шеѧ всѣ́дше,* сла́внїи новомч҃ницы,* пꙋ́ть постиго́сте нбⷭ҇ный,* и҆ въ но́вый і҆ерⷭ҇ли́мъ* тѣ́мъ всели́стесѧ.

Сла́ва, и҆ ны́нѣ, гла́съ є҃:

Кто̀ воспое́тъ по достоѧ́нїю бл҃госе́рдїѧ твоегѡ̀ бе́зднꙋ, пренепоро́чнаѧ бг҃оневѣ́сто; мꙋ́дрїи молча́тъ, красноглаго́ливїи и҆знемога́ютъ, мы́ же, ꙗ҆́кѡ младе́нцы, вопїе́мъ тѝ: ра́дꙋйсѧ, скорбѧ́щымъ ра́досте, бога́тство ни́щымъ, си̑рымъ мт҃и, и҆ сла́во презрѣ̑ннымъ!

Тропа́рь, гла́съ є҃:

Въ странѣ̀ ꙗ҆зы́честѣй вѣ́рою правосла́вною просвѣти́стесѧ, и҆ вма́лѣ въ вѣ́рѣ пожи́вше, црⷭ҇твїе вѣ́чное наслѣ́довасте, чⷭ҇тото́ю нра́вѡвъ хрⷭ҇тїа́нскихъ лжеблагоче́стїе конфꙋцїа́нское посрами́сте, и҆ бѣсодохнове́нный бꙋддӏ́змъ попра́сте, ꙗ҆́кѡ ᲂу҆ме́ты, кро́вїю ва́шею зе́млю кита́йскꙋю ѡ҆сщ҃а́юще: тѣ́мже, мо́лимсѧ, влⷣкꙋ всѣ́хъ моли́те, странꙋ̀ ва́шꙋ въ послѣ̑днѧѧ времена̀ вѣ́рою правосла́вною просвѣти́ти, и҆ на́съ въ не́й ᲂу҆крѣпи́ти. Є҆ктенїа̀, и҆ ѿпꙋ́стъ.

На вели́цѣй вече́рни.

Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ: стїхи̑ры на и҃, гла́съ є҃.

Подо́бенъ: Ра́дꙋйсѧ:

Сѐ ны́нѣ бл҃гослови́те гдⷭ҇а, вѣ́рнїи,* сѐ ны́нѣ ра́дꙋйсѧ, правосла́внаѧ цр҃кве,* ра́дость мч҃никѡвъ* ди́внѡ воспѣва́ющи:* свѣти̑льники бо но́выми нб҃о красꙋ́етсѧ,* а҆́гг҃ли ликꙋ́ютъ, вѣнцы̀ и҆̀мъ подаю́ще,* человѣ́цы сра́дꙋютсѧ,* хвалє́нїѧ возносѧ́ще,* землѧ́ же кита́йскаѧ ѡ҆сщ҃е́нна торжествꙋ́етъ,* и҆ мы̀ мч҃никъ сла́вныхъ* свѣ́тлое прославле́нїе пра́зднꙋемъ.

Ра́дꙋйсѧ ны́нѣ, ѻ҆́тче і҆ѡа́нне,* свѣти́ло тобо́льское,* пе́рвыхъ въ кита́й проповѣ̑дникъ правосла́вїѧ посла́вый,* ра́дꙋйсѧ и҆ ты̀, и҆ркꙋ́тскїй свѣти́льниче,* і҆нноке́нтїе пречꙋ́дне,* бл҃говѣ́стникѡмъ правосла̑внымъ въ кита́и покрови́телю и҆ споспѣ́шниче:* сѐ ча̑да ва̑ша прославлѧ́ютсѧ,* ꙗ҆́кѡ до́блїи землѝ сеѧ̀ первомч҃ницы,* сѐ безча́днаѧ ражда́етъ,* безво́днаѧ пꙋсты́нѧ рѣ́ки живота̀ и҆сточа́етъ:* чꙋ́до ди́вное,* ра́дость ве́лїѧ!* ѡ҆ на́съ хрⷭ҇та̀, мч҃ницы, моли́те.

Гла́съ и҃:

Гдⷭ҇и, бл҃говоли́лъ є҆сѝ зе́млю твою̀, и҆ ꙗ҆зы́кѡмъ свѣ́тъ ꙗ҆ви́лсѧ є҆сѝ,* крила̑ про́повѣди и҆́стины и҆ надꙿ земле́ю на́шею просте́рлъ є҆сѝ: си́це мч҃ницы взыва́хꙋ, є҆гда̀ тебє̀ ра́ди, і҆и҃се сладча́йшїй, закала́хꙋсѧ, си́це и҆ мы̀ тѧ̀ прославлѧ́емъ: животѐ и҆ воскрⷭ҇нїе на́ше, гдⷭ҇и, сла́ва тебѣ̀.

Ѽ ди́вное вѣ́ры та́инство, Ѽ глꙋбины̀ премꙋ́дрости твоеѧ̀, хрⷭ҇тѐ: во всѣ́хъ бо ꙗ҆зы́цѣхъ сп҃се́нїе твоѐ, и҆́бо па́дшемꙋ ро́дꙋ на́шемꙋ покаѧ́нїе тꙋ́не дарова́ти и҆зво́лилъ є҆сѝ: что̀ ᲂу҆̀бо возда́мы тебѣ̀; си́це глаго́летъ ст҃ы́хъ новомч҃никъ собо́ръ, и҆̀мже ны́нѣ со слеза́ми мо́лимсѧ: ѿ всѧ́кихъ бѣ́дъ свободи́те любо́вїю ва́съ чтꙋ́щыѧ.

Сла́ва, гла́съ в҃:

Собо́ре ст҃ы́хъ новомч҃никъ, землѝ кита́йскїѧ по́лче бжⷭ҇твенный, ᲂу҆твержде́нїе вѣ̑рнымъ, ликова́нїе всѣ́хъ ст҃ы́хъ: рѣ́занїѧ гѡ́рькїѧ болѣ̑зни, кро́ве то́ки, во главꙋ̀ ᲂу҆сѣчє́нїѧ, ѹ҆́дъ терза̑нїѧ, пло́ти раздра̑нїѧ: всѧ̑ претерпѣ́ли є҆стѐ, ди́внїи, на ка́мени вѣ́ры и҆́стинныѧ ᲂу҆тверди́вшесѧ, пѣ́нїе бг҃ꙋ въ мꙋ́кахъ возсыла́ли є҆стѐ, и҆ ꙗ҆́кѡ зла́то въ горни́лѣ, просвѣ́щшесѧ, ва́съ велича́ющихъ въ ско́рбехъ ᲂу҆крѣплѧ́ете.

И҆ ны́нѣ, бг҃оро́диченъ догма́тїкъ, гла́съ то́йже: Пре́йде сѣ́нь зако́ннаѧ:

Вхо́дъ, прокӏ́менъ днѐ, и҆ чтє́нїѧ г҃.

Прⷪ҇ро́чества и҆са́їина чте́нїе:

Та́кѡ гл҃етъ гдⷭ҇ь: Всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ̑зи ѿ ни́хъ. кто̀ возвѣсти́тъ сїѧ̑ въ ни́хъ; и҆лѝ ꙗ҆̀же ѿ нача́ла, кто̀ слы̑шана сотвори́тъ ва́мъ; да приведꙋ́тъ свидѣ́тєли своѧ̑, и҆ ѡ҆правдѧ́тсѧ, и҆ да ᲂу҆лы́шатъ, и҆ да рекꙋ́тъ и҆́стинꙋ. Бꙋ́дите мѝ свидѣ́тєли, и҆ а҆́зъ свидѣ́тель, гл҃етъ гдⷭ҇ь бг҃ъ, и҆ ѻ҆́трокъ, є҆го́же и҆збра́хъ: да позна́ете, и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь: пре́жде менє̀ не бы́сть и҆́нъ бг҃ъ, и҆ по мнѣ̀ не бꙋ́детъ. А҆́зъ є҆́смь бг҃ъ, и҆ нѣ́сть ра́звѣ менє̀ сп҃са́ѧй. А҆́зъ возвѣсти́хъ и҆ сп҃со́хъ, ᲂу҆ничижи́хъ, и҆ не бѣ̀ въ ва́съ чꙋ́ждїй. вы̀ мнѣ̀ свидѣ́тєли, и҆ а҆́зъ гдⷭ҇ь бг҃ъ, И҆ є҆щѐ ѿ нача́ла а҆́зъ є҆́смь, и҆ нѣ́сть ѿ рꙋ́къ мои́хъ и҆збавлѧ́ѧй: сотворю̀, и҆ кто̀ ѿврати́тъ то̀; Си́це гл҃етъ гдⷭ҇ь бг҃ъ, и҆збавлѧ́ѧй ва́съ, ст҃ы́й і҆и҃левъ.

Премꙋ́дрости соломѡ́новы чте́нїе:

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предꙿ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́новы чте́нїе:

Првⷣницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѡрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый, прпⷣбїе: Поѻстри́тъ же напра́сный гнѣ́въ во ѡ҆рꙋ́жїе: спобо́ретъ же съ ни́мъ мӏ́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, И҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы́кѡвъ: Ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

На лїтӏ́и стїхи́ра хра́ма, и҆ ст҃ы́хъ, гла́съ а҃.

Подо́бенъ: Всехва́льнїи мч҃ницы:

Всехва́льнїи мч҃ницы,* кита́ѧ бг҃овѣнча́нный со́нме,* ро́да ва́шегѡ не забꙋ́дите,* но ꙗ҆́кѡ зва́ннїи свы́ше, вы́шнѧго бг҃а те́плѣ ᲂу҆молѧ́йте,* ѡ҆ грѣсѣ́хъ на́шихъ не прогнѣ́ватисѧ до конца̀,* є҆ретӏ́чєскаѧ ѕлохꙋлє́нїѧ сло́вомъ премꙋ́дрости попали́ти,* и҆́стиннꙋю вѣ́рꙋ въ землѝ ва́шей ᲂу҆мно́жити,* сердца̀ на̑ша ѡ҆каменє́ннаѧ ᲂу҆мѧгчи́ти,* и҆ свѣ́томъ бжⷭ҇твеннымъ ва́съ почита́ющихъ сп҃си́тельнѣ ѡ҆зари́ти.

Гла́съ в҃. Подо́бенъ: Кӏ́ими похва́льными вѣнцы̑:

Кӏ́ими похва́льными пѣ́сньми просла́вимъ свѣ́тлое ва́ше сконча́нїе, хрⷭ҇тѡ́вы а҆́гнцы непоро́чнїи, сщ҃е́нными ᲂу҆сты̀ трⷪ҇цꙋ ны́нѣ прославлѧ́ющїи, бл҃гоче́стїѧ побѡ́рницы, сла́вы нбⷭ҇ныѧ люби́телїе, и҆сто́чницы блгⷣтныхъ и҆сцѣле́нїй неисчерпа́емїи, вѣ̑рнымъ те́плїи посѡ́бницы, молѧ́щїисѧ хрⷭ҇тꙋ̀ дарова́ти на́мъ ве́лїю млⷭ҇ть.

Гла́съ д҃:

Ꙗ҆зы́ки на землѝ наста́виши, воспѣ̀ и҆ногда̀ дв҃дъ бг҃оглаго́ливый, позна́ти пꙋ́ть тво́й: приспѣ̀ ᲂу҆̀бо и҆ землѝ кита́йстѣй вре́мѧ, согла́снѡ прⷪ҇ро́чествꙋ ѱало́мника, пло́дъ принестѝ вертогра́дарю творцꙋ̀, сла́достный и҆ до́брый, новомч҃никъ пресвѣ́тлое мно́жество, молѧ́щихсѧ хрⷭ҇тꙋ̀ ѡ҆ сп҃се́нїи дꙋ́шъ на́шихъ.

Сла́ва, гла́съ ѕ҃:

Свѣ́тлое па́мѧти ва́шеѧ торжество̀ соверша́юще, весе́лїемъ и҆сполнѧ́емсѧ: дерзновє́ннымъ моли́твенникѡмъ сꙋ́щымъ ва́мъ, ѡ҆ на́съ проле́йте те́плое моле́нїе, немощны̑ѧ ᲂу҆крѣпи́те, болѧ́щымъ здра́вїе да́рꙋйте, скорбѧ́щымъ же и҆ ѡ҆ѕло́блєннымъ ᲂу҆тѣше́нїе, ра́дꙋющымсѧ смире́нїе, ѡ҆бꙋрева́ємымъ страстьмѝ цѣломꙋ́дрїе, невѣ̑рнымъ просвѣще́нїе, вѣ̑рнымъ же всѧ́кихъ грѣхѡ́въ ᲂу҆стране́нїе.

И҆ ны́нѣ, бг҃оро́диченъ, гла́съ то́йже:

Ны́нѣ раздра́сѧ совѣ́тъ дїа́воль, ны́нѣ сокрꙋши́сѧ держа́ва сатаны̀: ржⷭ҇тво́мъ бо твои́мъ, мт҃и дв҃о, ꙗ҆́кѡ пти̑цы ѿ сѣ́ти, новомч҃ницы и҆зба́вишасѧ, свѣ́томъ и҆́стиннымъ просвѣти́шасѧ, и҆ сѐ предстоѧ́ще предꙿ прⷭ҇то́ломъ бж҃їимъ, съ тобо́ю мо́лѧтсѧ ѡ҆ сп҃се́нїи всѣ́хъ почита́ющихъ тѧ̀ бцⷣꙋ вои́стиннꙋ.

На стїхо́внѣ стїхи̑ры, гла́съ и҃.

Подо́бенъ: Ѽ пресла́внагѡ чꙋдесѐ:

Бг҃омꙋ́дрый собо́ре,* наста̀ дне́сь па́мѧть ва́ша лꙋчеза́рнаѧ,* хрⷭ҇то́ва црⷭ҇твїѧ наслѣ̑дницы,* послꙋша́нїѧ до сме́рти и҆ любвѐ бжⷭ҇твенныѧ подви̑жницы:* всѧ̑ цр҃ковь ва́съ любо́вїю пое́тъ,* со́лнце и҆ ѕвѣ́зды вкꙋ́пѣ сликовствꙋ́ютъ,* вы́ же собра́вшымсѧ въ хра́мѣ ва́шемъ* подава́ете ми́ръ и҆ ра́дость,* и҆ наде́ждꙋ сп҃се́нїѧ.

Стӏ́хъ: Ѿ востѡ́къ со́лнца до за̑падъ хва́льно и҆́мѧ гдⷭ҇не.

Ѽ пресла́внагѡ чꙋдесѐ:* низборе́нїе де́монѡвъ, чл҃вѣ́кѡмъ застꙋ́пники* показа́лъ є҆сѝ, хрⷭ҇тѐ бж҃е на́шъ,* страстоте́рпцы землѝ кита́йскїѧ,* и҆̀же во ѡ҆рꙋ́жїе свѣ́та ѡ҆бле́кшесѧ,* лю̑тыѧ мꙋ́ки претерпѣ́ша:* вы́спрь, ꙗ҆́кѡ ѻ҆рлы̀, воспа́риша,* поднебе́сныхъ дꙋхѡ́въ посрами́ша,* и҆ въ черто́гъ нбⷭ҇ный всели́шасѧ.

Стӏ́хъ: Ѿ стра́нъ собра̀ и҆̀хъ, ѿ востѡ́къ, и҆ за̑падъ, и҆ сѣ́вера, и҆ мо́рѧ.

Ра́дꙋйсѧ, бг҃озва́нный мч҃никъ собо́ре,* ра́дꙋйсѧ, свѣтлоплодови́тый са́де бг҃оса́дный,* сꙋгꙋбосо́тный по́лче бжⷭ҇твенный:* землѧ̀ кита́йскаѧ дадѐ пло́дъ сво́й* содѣ́телю всѧ́ческихъ:* кро́вь ва́шꙋ вѣ̑рнымъ рѣ́ки цѣлє́бныѧ,* пло́ти ᲂу҆мерщвле́нїе а҆́гг҃лѡвъ весе́лїе,* моли̑твы ва́шѧ* человѣ́кѡмъ сп҃се́нїе.

Сла́ва, гла́съ є҃.

Подо́бенъ: Ра́дꙋйсѧ:

Ра́дꙋйсѧ, страстоте́рпєцъ собо́ре бжⷭ҇твенный,* ѕвѣрє́мъ неви̑димымъ зꙋ́бы сокрꙋши́вшїи,* а҆́гг҃лѡмъ подража́телїе,* человѣ́кѡмъ те́плїи предста́телїе,* цр҃кве ᲂу҆краше́нїе,* вѣ̑рнымъ приста́нище,* странѣ̀ кита́йстѣй пєча́льницы,* правосла̑внымъ въ не́й прише́льцємъ храни́телїе,* ᲂу҆се́рднѡ молѧ́щїисѧ ѡ҆ дꙋша́хъ на́шихъ.

И҆ ны́нѣ, бг҃оро́диченъ, гла́съ то́йже: Хра́мъ и҆ две́рь є҆сѝ:

На бл҃гослове́нїи хлѣ́бѡвъ, тропа́рь первомч҃никѡвъ, два́жды,

та́же Бцⷣе, дв҃о: є҆ди́ножды.

На ѹ҆́трени.

На Бг҃ъ гдⷭ҇ь: тропа́рь первомч҃никѡвъ. Сла́ва, и҆ ны́нѣ, бг҃оро́диченъ.

По а҃-мъ стїхосло́вїи сѣда́ленъ, гла́съ ѕ҃:

Ца́рствꙋющꙋ і҆мпера́торꙋ гꙋансю́ю въ землѝ кита́йстѣй, хрⷭ҇то́съ въ ва́съ, мч҃ницы крѣ́пцыи, всели́сѧ, и҆ црⷭ҇твїе своѐ неви́димѡ ва́мъ дарова̀: и҆́же бо на крⷭ҇тѣ̀ спа́сшагѡсѧ ѡ҆́бразъ на себѣ̀ носѧ́ще, во є҆ди́номъ часѣ̀ ра́еви сподо́бистесѧ: тѣ́мже и҆ на́съ помѧни́те предꙿ прⷭ҇то́ломъ влⷣчнимъ. Сла́ва:

Свѣти̑ла бг҃оѡзарє́ннаѧ, хрⷭ҇тѡ́вы мч҃ницы, просвѣти́те ро́дъ ва́шъ во тьмѣ̀ житїѧ̀, ꙗ҆́кѡ да но́щь невѣ́рїѧ преше́дше, бл҃гоѡбра́зїе хрⷭ҇то́во возлю́бѧтъ, и҆ слѣдотворе́ньми ва́шими ᲂу҆крѣ́пльшесѧ, ва́мъ бл҃года́рствєннаѧ воспою́тъ. И҆ ны́нѣ, бг҃оро́диченъ:

Немо́креннѡ дре́вле і҆и҃ль тебѐ, пречⷭ҇таѧ, проѡбразꙋ́ѧ, чермно́е пре́йде мо́ре, ны́нѣ но́вый і҆и҃ль неискꙋсобра́чїе твоѐ пое́тъ, и҆ съ мч҃ники вопїе́тъ: незаходи́мыми лꙋча́ми ро́дъ человѣ́ческїй просвѣ́щшаѧ, просвѣтѝ всѧ̑ и҆́щꙋщыѧ гдⷭ҇а и҆ сн҃а твоего̀.

По в҃-мъ стїхосло́вїи сѣда́ленъ, гла́съ г҃:

Первозва̑нныѧ ва́съ ѡ҆брѣ́те хрⷭ҇то́съ ро́да кита́йскагѡ мч҃ники, ꙗ҆́коже ᲂу҆̀бо низложи́ли є҆стѐ ѕмӏ́евꙋ горды́ню, и҆ на по́двигъ дерзнове́ннѡ поте́кше, въ тѣлесѣ́хъ ва́шихъ хрⷭ҇та̀ просла́вили є҆стѐ: того̀ ᲂу҆̀бо, ст҃ӏ́и, прилѣ́жнѡ ны́нѣ моли́те, дарова́ти на́мъ ве́лїю млⷭ҇ть.

Сла́ва:

Рожде́ннїи во тьмѣ̀ невѣ́дѣнїѧ, бг҃оза́рни по сме́рти ꙗ҆ви́стесѧ: Ѽ ва́шегѡ бг҃олю́бїѧ! а҆́ще и҆ недо́лзѣ въ вѣ́рѣ пожи́вше, крѣ́пцы въ мꙋ́кахъ за хрⷭ҇та̀ пребы́сте, тѣ́мже согла́снѡ ва́мъ пое́мъ: ра́дꙋйтесѧ, бг҃овожделѣ́ннїи ро́да кита́йскагѡ свѣти́льницы!

И҆ ны́нѣ, бг҃оро́диченъ:

Свѣтонача́льника хрⷭ҇та̀ ро́ждшаѧ, томꙋ̀ со ст҃и̑тєли да́льнѧгѡ восто́ка, і҆нноке́нтїемъ, і҆ѡа́нномъ, нїко́лаемъ, но́вымъ і҆ѡа́нномъ и҆ і҆ѡ́ною новопросла́вленнымъ, те́плѣ моли́сѧ, свѣтозаре́нїемъ бжⷭ҇твеннагѡ сло́ва, сла́вꙋ твою̀ возвѣсти́ти и҆ въ ро́дѣ кита́йстѣмъ, бцⷣе дв҃о.

Полѷеле́й, и҆ велича́нїе:

Велича́емъ ва́съ, страстоте́рпцы ст҃ӏ́и, первомч҃ницы кита́йстїи, и҆ чти́мъ чєстна́ѧ страда̑нїѧ ва̑ша, ꙗ҆̀же за хрⷭ҇та̀ претерпѣ́ли є҆стѐ.

Ѱало́мъ и҆збра́нный: Бг҃ъ на́мъ прибѣ́жище и҆ си́ла, помо́щникъ въ ско́рбехъ, ѡ҆брѣ́тшихъ ны̀ ѕѣлѡ̀.

По полѷеле́и сѣда́ленъ, гла́съ и҃:

Высо́кими ᲂу҆мы̀ дре́вомъ крⷭ҇тнымъ просвѣти́вшесѧ, во главѣ̀ съ митрофа́номъ нача́ло свѣ́тлое, въ мꙋ́кахъ ѡ҆сщ҃е́нный со́нме, положи́сте ро́дꙋ ва́шемꙋ: да не ѡ҆скꙋдѣ́ютъ ᲂу҆̀бо ѿ ва́съ слє́знаѧ молє́нїѧ, во є҆́же сле́зъ и҆спо́лненное житїѐ прейтѝ сп҃си́тельнѣ всѣ̑мъ чтꙋ́щымъ ва́съ любо́вїю. Сла́ва, и҆ ны́нѣ:

Непоро́чнаѧ а҆́гнице, бг҃омт҃и пречⷭ҇таѧ, кто̀ любо́вь твою̀ ко всѣ̑мъ человѣ́кѡмъ и҆зрече́тъ; тобо́ю весели́тсѧ всѧ́ка тва́рь, тебѣ̀ сра́дꙋетсѧ новопросла́вленный землѝ кита́йскїѧ первомч҃никъ собо́ръ, и҆́хже моли̑твы ѡ҆ на́съ прїе́мши, принесѝ сн҃ꙋ твое́мꙋ, да сп҃се́тъ тобо́ю дꙋ́шы на́шѧ.

Та́же стєпе́нна, а҃-й а҆нтїфѡ́нъ д҃-гѡ гла́са.

Прокӏ́менъ, гла́съ д҃: Тебє̀ ра́ди, гдⷭ҇и, ᲂу҆мерщвлѧ́еми є҆смы̀ ве́сь де́нь.

Стӏ́хъ: Вмѣни́хомсѧ ꙗ҆́кѡ ѻ҆́вцы заколе́нїѧ.

Є҆ѵⷢ҇лїе ѿ матѳе́а, зача́ло л҃ѕ: Речѐ гдⷭ҇ь ко прише́дшымъ къ немꙋ̀ і҆ꙋде́ѡмъ:

По н҃-мъ ѱалмѣ̀: Мл҃твами новомч҃никѡвъ:

Та́же стїхи́ра, гла́съ ѕ҃:

Землѧ̀ кита́йскаѧ дне́сь свѣтоно́сными ѡ҆сщ҃а́етсѧ кровьмѝ, вѣ́ка захо́дъ ѡ҆зарѧ́етсѧ мч҃ническими свѣтлостьмѝ, и҆ цр҃ковь хрⷭ҇то́ва бл҃гоза́рными красꙋ́етсѧ ѕвѣзда́ми: свѣ́томъ бо хрⷭ҇то́выхъ просвѣ́щшесѧ страсте́й, страстоно́сїе сконча́ша сла́внѡ новомч҃ницы, жи́зни вѣ́чныѧ вѣнцы̀ прїѧ́ша, и҆ свѣтонаста̑вницы всѣ̑мъ пра́вды жа́ждꙋщымъ ꙗ҆ви́шасѧ.

Канѡ́нъ ст҃ы̑мъ первомч҃никѡмъ землѝ кита́йскїѧ.

Гла́съ ѕ҃. Пѣ́снь а҃.

І҆рмо́съ: Волно́ю морско́ю скры́вшаго дре́вле гони́телѧ мꙋчи́телѧ, подꙿ земле́ю скры́ша сп҃се́нныхъ ѻ҆́троцы: но мы̀, ꙗ҆́кѡ ѻ҆трокови̑цы, гдⷭ҇еви пои́мъ, сла́внѡ бо просла́висѧ.

Припѣ́въ: Ст҃ӏ́и первомч҃ницы кита́йстїи, моли́те бг҃а ѡ҆ на́съ.

Пра́вдꙋ твою̀, хрⷭ҇тѐ бж҃е, въ срⷣцѣ мое́мъ не скры́ю, и҆ сп҃се́нїе твоѐ во всѣ́хъ ꙗ҆зы́цѣхъ воспою̀: прикосни́сѧ ᲂу҆̀бо ᲂу҆стѡ́мъ мои̑мъ, ѹ҆́глїемъ дх҃а твоегѡ̀ скве́рнꙋ мою̀ ѡ҆чища́ѧ, сло́ве, да доброслове́снѣ воспою̀ первомч҃никъ кита́йскихъ по́двигъ кра́сный.

Ст҃ы́й а҆пⷭ҇ле ѳѡмо̀, є҆ѵⷢ҇лїа въ землѝ і҆мпера́тора же́лтагѡ пе́рвый проповѣ́дниче, ра́дꙋйсѧ ны́нѣ, досто́йное ро́ждїе хрⷭ҇то́во зрѧ̀: новомч҃никѡвъ ли́къ, вѣ́ры правосла́вныѧ, тобо́ю дре́вле проповѣ́данныѧ, но́ваѧ хвала̀, вѣ̑рнымъ же ра́дованїе.

Сѣдѧ́щымъ ва́мъ во тьмѣ̀ и҆ сѣ́ни сме́ртнѣй, свѣ́томъ правосла́вїѧ ѡ҆зари́стесѧ, и҆ къ и҆́стинномꙋ бг҃ꙋ, въ трⷪ҇цѣ є҆ди́номꙋ, всѣ́мъ срⷣцемъ притеко́сте, ѿѻнꙋ́дꙋже и҆ свѣтоно́сїемъ ва́шимъ вѣ́рнїи ны́нѣ просвѣща́ютсѧ.

Сщ҃е́ннѣйшее и҆́мѧ хрⷭ҇то́во въ кита́и ва́ми ны́нѣ возвели́чисѧ, прехва́льнїи страстоте́рпцы, и҆́бо во и҆сповѣ́данїи ва́шемъ до конца̀ непоколе́блемѡ пребы́вше, а҆́гг҃лѡвъ возра́довасте и҆ человѣ́кѡвъ ᲂу҆диви́сте.

Бг҃оро́диченъ: Вои́стиннꙋ тѧ̀, дв҃о пребл҃гослове́ннаѧ, всѝ ро́ди велича́ютъ: се́ бо и҆ землѧ̀ кита́йскаѧ тебѣ̀ новомч҃никъ ᲂу҆сты̀ бл҃года́рствєннаѧ восписꙋ́етъ: ра́дꙋйсѧ, сп҃са на́шего нетлѣ́ннѡ ро́ждшаѧ.

Пѣ́снь г҃.

І҆рмо́съ: Тебѐ, на вода́хъ повѣ́сившаго всю̀ зе́млю неѡдержи́мѡ, тва́рь ви́дѣвши на ло́бнѣмъ ви́сима, ѹ҆́жасомъ мно́гимъ содрога́шесѧ: нѣ́сть ст҃ъ, ра́звѣ тебє̀, гдⷭ҇и, взыва́ющи.

А҆́ще и҆ въ странѣ̀ безбо́жнѣй роди́стесѧ, бг҃орачи́тельнѣ и҆́стинꙋ взыска́сте, и҆ во́дꙋ живꙋ́ю, въ живо́тъ вѣ́чный текꙋ́щꙋю, въ цр҃кви правосла́внѣй ѡ҆брѣто́сте.

Сни́де неча́ѧннѡ до́ждь и҆спыта́нїй, прїидо́ша рѣ́ки гнѣ́ва, ꙗ҆зы́кѡвъ бꙋ̑ри нападо́ша на вы̀, хрⷭ҇томч҃ницы до́блїи, и҆̀хже небꙋ́рнѡ, ꙗ҆́кѡ вѣ́рнїи хрⷭ҇тꙋ̀ до сме́рти, претерпѣ́сте до конца̀.

Кра́сное ва́ше къ го́рнемꙋ і҆ерⷭ҇ли́мꙋ ше́ствїе воспѣва́емъ, мꙋжедо́блести диви́мсѧ, бг҃олю́бїемъ ва́шимъ дꙋ́шы на́шѧ, досточꙋ́днїи, ᲂу҆слажда́ютсѧ: тѣ́мъ ᲂ҆̀убо бꙋ́дите на́мъ и҆ въ ра́достехъ и҆ въ ско́рбехъ соше́ствєнницы.

А҆́ще посредѣ̀ те́рнїй крӏ́нꙋ прозѧ́бшемꙋ диви́мсѧ, кольмѝ па́че свѣ̑тлымъ си̑мъ ѕвѣзда́мъ, въ бе́зднѣ ꙗ҆зы́ческагѡ мра́ка ꙗ҆́снѡ возблиста́вшымсѧ: ва́съ пое́мъ, восто́ка да́льнѧгѡ бг҃оза́рнїи свѣти́льницы.

Бг҃оро́диченъ: Бг҃ъ посредѝ тебє̀ всели́всѧ, ника́кѡ дѣ́вства твоегѡ̀ ключи̑ поколеба̀, чⷭ҇таѧ: є҆го́же прилѣ́жнѡ молѝ, ᲂу҆тверди́ти всѧ̑ пою́щыѧ тѧ̀. Сѣда́ленъ, гла́съ и҃:

Свѣ́томъ нбⷭ҇нымъ сїѧ́етъ дне́сь хра́мъ се́й: недꙋгоцѣли́тельный кла́дѧзь неисчерпа́емый, новомч҃никъ собо́ръ, во́дъ свои́хъ подае́тъ живоро́днꙋю сла́дость любо́вїю чтꙋ́щымъ ѧ҆̀, и҆ сласте́й напое́нїе го́рькое сꙋши́тъ. Сла́ва, и҆ ны́нѣ:

Земна́гѡ житїѧ̀ преле́стныхъ ѿто́ргшесѧ, и҆ пло́ти, мꙋ́ками крествꙋ́еми, ѿрѣ́шшесѧ, крⷭ҇тоно́сномꙋ бг҃ꙋ на́шемꙋ вѣ́рни до сме́рти пребы́ша, ѿ тебє̀ пло́тїю рожде́нномꙋ, мт҃и дв҃о: и҆́хъ моли́твами, ꙗ҆́кѡ бл҃га́ѧ, ѡ҆чи́сти ны̀ ѿ всѧ́кагѡ грѣха̀, крⷭ҇то́мъ бж҃е́ственнымъ.

Пѣ́снь д҃.

І҆рмо́съ: На крⷭ҇тѣ̀ твоѐ бжⷭ҇твенное и҆стоща́нїе прови́дѧ а҆ввакꙋ́мъ, ᲂу҆жа́ссѧ вопїѧ́ше: ты̀ си́льныхъ пресѣ́клъ є҆сѝ держа́вꙋ, бл҃же, прїѡбща́ѧсѧ сꙋ́щымъ во а҆́дѣ, ꙗ҆́кѡ всеси́ленъ.

Мч҃ницы пребл҃же́ннїи, са́ми себѐ на во́льное преда́сте заколе́нїе, и҆ зе́млю кита́йскꙋю кровьмѝ свои́ми ѡ҆ст҃и́сте: и҆ ны́нѣ ѡ҆ всѣ́хъ, любо́вїю па́мѧть ва́шꙋ пра́зднꙋющихъ, моли́те хрⷭ҇та̀ бг҃а.

Припѣ́въ: Ст҃ы́й мч҃ниче па́ѵле, молѝ бг҃а ѡ҆ на́съ.

Па́ѵлꙋ вели́комꙋ, ꙗ҆зы̑къ а҆пⷭ҇лꙋ, тезоимени́те, мч҃ниче па́ѵле, ра́дости и҆спо́лнь, про́повѣди послꙋжи́лъ є҆сѝ є҆ѵⷢ҇льстѣй, и҆ съ моли́твою во ᲂу҆стѣ́хъ дꙋ́шꙋ свою̀ бг҃ꙋ, возлю́бленномꙋ ѿ тебє̀, преда́лъ є҆сѝ.

Припѣ́въ: Ст҃а́ѧ мч҃нице і҆́е, молѝ бг҃а ѡ҆ на́съ.

І҆́е, бл҃же́ннаѧ вѣ́ры наста́внице, не ᲂу҆боѧ́ласѧ є҆сѝ за хрⷭ҇та̀ пострада́ти, и҆ два́жды замꙋ́чена бы́вши, кра́сное по́прище, ꙗ҆́кѡ а҆́гница хрⷭ҇то́ва непоро́чнаѧ, въ чⷭ҇тѣй вѣ́рѣ сконча́ла є҆сѝ.

Припѣ́въ: Ст҃ы́й мч҃ниче і҆ѡа́нне, молѝ бг҃а ѡ҆ на́съ.

Ѻ҆́троче і҆ѡа́нне, ѻ҆́смь лѣ́тъ ѿ рождества̀ твоегѡ̀ въ мӏ́рѣ се́мъ пожи́въ, въ мѣ́рꙋ во́зраста хрⷭ҇то́ва дости́глъ є҆сѝ, ꙗ҆́кѡ за хрⷭ҇та̀ закла́нъ бы́лъ є҆сѝ, та́же ꙗ҆́кѡ а҆́гнецъ всесожже́нъ: ра́дꙋйсѧ ны́нѣ, но́вый і҆саа́че, ра́дꙋйсѧ, мч҃ниче всечꙋ́дне!

Бг҃оро́диченъ: Бг҃ороди́тельнице пречꙋ́днаѧ, просвѣще́нїе мӏ́рꙋ ро́ждшаѧ, не преста́й молѧ́щи, вкꙋ́пѣ съ новомч҃ники, ны́нѣ прославлѧ́емыми, сн҃а и҆ бг҃а твоегѡ̀: дарова́ти и҆ ро́дꙋ кита́йскомꙋ, въ і҆дѡлослꙋже́нїи ᲂу҆глѣ́бшемꙋ ѕѣлѡ̀, понѐ на коне́цъ просвѣще́нїе.

Пѣ́снь є҃.

І҆рмо́съ: Бг҃оѧвле́нїѧ твоегѡ̀, хрⷭ҇тѐ, къ на́мъ млⷭ҇тивнѡ бы́вшагѡ, и҆са́їа свѣ́тъ ви́дѣвъ невече́рнїй, и҆зꙿ но́щи ѹ҆́треневавъ взыва́ше: воскре́снꙋтъ ме́ртвїи, и҆ воста́нꙋтъ сꙋ́щїи во гробѣ́хъ, и҆ всѝ земноро́днїи возра́дꙋютсѧ.

Сїѧ́етъ па́мѧть ва́ша, рабѝ хрⷭ҇тѡ́вы вѣ́рнїи, и҆ вѣ́рныхъ срⷣца̀ те́плѣ ѡ҆зарѧ́етъ, покланѧ́ющихсѧ любо́вїю ѡ҆́бразꙋ чⷭ҇тно́мꙋ ва́шемꙋ, и҆ пою́щихъ ва́мъ: ра́дꙋйтесѧ, ве́лїѧ бо є҆стѐ вѣ́ры правосла́вныѧ похвала̀!

Ѽ пребл҃же́ннїи хрⷭ҇тѡ́вы ᲂу҆гѡ́дницы, не забꙋ́дите ѻ҆те́чества ва́шегѡ земна́гѡ: мра́къ бг҃опротивле́нїѧ ѿжени́те, въ невѣ́дѣнїи коснѧ́щыѧ просвѣти́те, и҆ покаѧ́нїѧ вре́мени всѣ̑мъ дарова́тисѧ ᲂу҆ хрⷭ҇та̀ неѿстꙋ́пнѡ проси́те.

Воспои́мъ свѣ̑тлыѧ ѻ҆́троки кита̑йскїѧ, ѿ возбѣснѣ́вшихсѧ ꙗ҆зы̑чникъ за хрⷭ҇та̀ закла̑нныѧ: тѣ́хъ па́мѧть ны́нѣ соверша́емъ, виѳлее́мское по́двига и҆́хъ подо́бїе тайнозрѧ́ще: тацѣ́хъ бо є҆́сть црⷭ҇твїе нбⷭ҇ное! Припѣ́въ: Ст҃ы́й мч҃ниче і҆ѡа́нне, молѝ бг҃а ѡ҆ на́съ.

Ѻ҆́троче і҆ѡа́нне, предꙿ сме́ртїю ѡ҆склаблѧ́ѧсѧ, мꙋчи́телємъ ре́клъ є҆сѝ, ꙗ҆́кѡ нѣ́сть тѧ́жкѡ за хрⷭ҇та̀ страда́ти. Ѽ чꙋ́дное землѝ кита́йскїѧ прозѧбе́нїе! бл҃гоꙋха́нїемъ кро́тости твоеѧ̀ и҆спо́лни и҆ на̑ша срⷣца̀.

Бг҃оро́диченъ: Всѣ́хъ творца̀, бг҃а же и҆ содѣ́телѧ, всенепоро́чнаѧ чⷭ҇таѧ, дх҃омъ бжⷭ҇твеннымъ въ ложесна́хъ зачала̀ є҆сѝ, є҆го́же сла́вѧще, тѧ̀ воспѣва́емъ, дв҃о, ꙗ҆́кѡ пала́тꙋ цр҃ѧ̀ всѣ́хъ, и҆ мӏ́ра застꙋпле́нїе.

Пѣ́снь ѕ҃.

І҆рмо́съ: Ꙗ҆́тъ бы́сть, но не ᲂу҆держа́нъ въ пе́рсехъ ки́товыхъ і҆ѡ́на, тво́й бо ѡ҆́бразъ носѧ̀, страда́вшагѡ, и҆ погребе́нїю да́вшагѡсѧ, ꙗ҆́кѡ ѿ черто́га, ѿ ѕвѣ́рѧ и҆зы́де, приглаша́ше же кꙋстодӏ́и: хранѧ́щїи сꙋ́єтнаѧ и҆ лѡ́жнаѧ, млⷭ҇ть сїю̀ ѡ҆ста́вили є҆стѐ.

Припѣ́въ: Сщ҃енномч҃ниче митрофа́не, молѝ бг҃а ѡ҆ на́съ.

Досто́йно є҆́сть хвале́нїе ѻ҆со́бь тебѣ̀ воспѣ́ти, пе́рвый въ кита́и сщ҃енномч҃ниче вѣ́ры правосла́вныѧ: бл҃гослови́ ны свы́ше, ѻ҆́тче достохва́льне, и҆ мл҃твꙋ на́шꙋ бг҃ꙋ принесѝ.

Припѣ́въ: Сщ҃енномч҃ниче митрофа́не, молѝ бг҃а ѡ҆ на́съ.

Въ домꙋ̀ хрⷭ҇тїа́нъ правосла́вныхъ ро́ждьсѧ, во бл҃гоче́стїи до́брѣ воспита́нъ бы́лъ є҆сѝ, и҆ ѿ ю҆́ности твоеѧ̀ и҆́стиннꙋю вѣ́рꙋ возлюби́лъ є҆сѝ, митрофа́не достобл҃же́нне.

Припѣ́въ: Сщ҃енномч҃ниче митрофа́не, молѝ бг҃а ѡ҆ на́съ.

Въ вѣ́рѣ хрⷭ҇то́вѣ непоколеби́мь пребы́въ, ᲂу҆досто́илсѧ є҆сѝ до сме́рти за хрⷭ҇та̀ пострада́ти: тѣ́мже, ра́дꙋйсѧ, пра́вило вѣ́ры, ѡ҆́бразе кро́тости, бл҃гоче́стїѧ похвало̀!

Припѣ́въ: Сщ҃енномч҃ниче митрофа́не, молѝ бг҃а ѡ҆ на́съ.

Сщ҃е́ннагѡ зва́нїѧ а҆́ще и҆ недосто́йна себѐ непщева́лъ є҆сѝ, возведе́ тѧ а҆пⷭ҇лъ ꙗ҆по́нїи, вели́кїй нїкола́й, на го́рꙋ па́стырскагѡ ро́дꙋ твоемꙋ̀ слꙋже́нїѧ: ны́нѣ же съ равноапⷭ҇ломъ трⷪ҇цѣ кꙋ́пнѡ предстоѧ̑ща, моли́тасѧ ᲂу҆се́рднѡ, сп҃сти́сѧ дꙋша́мъ на́шымъ.

Припѣ́въ: Сщ҃енномч҃ниче митрофа́не, молѝ бг҃а ѡ҆ на́съ.

Пе́рвѣе пѡ́ты слꙋже́нїѧ ни́вꙋ дꙋ́шъ напаѧ́ѧ, по́слѣжде кро́ве проли́тїемъ ѕла́ки немощны̑ѧ ᲂу҆крѣплѧ́ѧ, и҆ по сме́рти ѡ҆ ро́дѣ твое́мъ пече́шисѧ, сла́вне.

Бг҃оро́диченъ: Ст҃ѣ́йшꙋ а҆́гг҃лѡвъ и҆ всеѧ̀ тва́ри вы́шшꙋ и҆зꙿ тебє̀ пло́тїю роди́выйсѧ тѧ̀ содѣ́ла: тѣ́мже ꙗ҆́кѡ влⷣчца, съ новомч҃ники землѝ кита́йскїѧ, ѡ҆ на́съ сн҃а и҆ бг҃а твоего̀ молѝ.

Конда́къ, гла́съ а҃:

Мч҃ницы послѣ́днихъ време́нъ, въ кро́ви а҆́гнчей ри̑зы своѧ̑ ᲂу҆бѣли́ли є҆стѐ, любвѐ ра́ди ко хрⷭ҇тꙋ̀ кро́вь ва́шꙋ пролїѧ́ли є҆стѐ, сегѡ̀ ра́ди ны́нѣ въ цр҃кви нбⷭ҇нѣй де́нь и҆ но́щь є҆мꙋ̀ слꙋ́жите: тѣ́мже за ны̀ хрⷭ҇та̀ моли́те, мч҃ницы сла́внїи, ѿ прельще́нїѧ а҆нтӏ́хрїста да сокры́етъ ма́лое ста́до своѐ, и҆ ѿ ско́рби вели́кїѧ да на́съ всѣ́хъ приведе́тъ ко странѣ̀ невече́рнѧгѡ свѣ́та.

І҆́косъ: А҆́гг҃льстїи вѡ́и возра́довахꙋсѧ, є҆гда̀ ѿ мра́ка ꙗ҆зы́чества къ свѣ́тꙋ правосла́вїѧ притеко́сте, ст҃ы́мъ креще́нїемъ дꙋ́шы и҆ тѣлеса̀ ва́шѧ ѿ грѣхѡ́въ ѡ҆чища́юще. Мы́ же, жре́бїй тѧ́жкїй, въ вѣ́цѣ се́мъ но́вагѡ ꙗ҆зы́чества, хрⷭ҇тꙋ̀ слꙋжи́ти ᲂу҆лꙋчи́вше, предꙿ і҆кѡ́ною ва́шею пѣ́нїе возно́симъ сицево́е: Ра́дꙋйтесѧ, и҆сповѣ̑дницы хрⷭ҇тѡ́вы въ вѣ́цѣ се́мъ богохꙋ́льнѣмъ: ра́дꙋйтесѧ, свѣ̑тлыѧ ѕвѣ́зды восто́ка. Ра́дꙋйтесѧ, и҆́стинномꙋ бг҃ꙋ поклѡ́нницы вѣ́рнїи: ра́дꙋйтесѧ, си́льнїи бѣсѡ́мъ сопротивобо́рцы. Ра́дꙋйтесѧ, свѣти́льницы, тьмꙋ̀ ꙗ҆зы́ческꙋю разгна́вшїи: ра́дꙋйтесѧ, і҆́дѡлы сквє́рныѧ попра́вшїи. Ра́дꙋйтесѧ, землѝ кита́йскїѧ крӏ́ни пречꙋ́днїи: ра́дꙋйтесѧ, ѡ҆ просвѣще́нїи ро́да ва́шегѡ те́плѣ молѧ́щїисѧ. Ра́дꙋйтесѧ, ѻ҆́вцы многострада̑льныѧ па́стырѧ, за ны̀ закла́вшагѡсѧ: ра́дꙋйтесѧ, терпѣ́нїѧ столпѝ бг҃орачи́тельнагѡ. Ра́дꙋйтесѧ, бж҃е́ственныѧ любвѐ сѡ́лнца ѻ҆гнезра̑чнаѧ: ра́дꙋйтесѧ, ѿ но́щи невѣ́дѣнїѧ ко ѹ҆́трꙋ бг҃озна́нїѧ дости́гшїи. Ра́дꙋйтесѧ, сла́внїи первомч҃ницы кита́йстїи, на́съ до конца̀ претерпѣ́ти ᲂу҆крѣплѧ́ющїи!

Пѣ́снь з҃.

І҆рмо́съ: Неизрече́нное чꙋ́до! въ пещѝ и҆зба́вивый преподѡ́бныѧ ѻ҆́троки и҆зꙿ пла́мене, во гро́бѣ ме́ртвъ бездыха́ненъ полага́етсѧ, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.

Припѣ́въ: Ст҃а́ѧ мч҃нице татїа́но, молѝ бг҃а ѡ҆ на́съ.

Новомч҃ницꙋ татїа́нꙋ, во главꙋ̀ за хрⷭ҇та̀ ᲂу҆сѣче́ннꙋю, восхва́лимъ: та́ бо за на́съ хода́тайствꙋетъ предꙿ прⷭ҇то́ломъ трⷪ҇цы бжⷭ҇твенныѧ, є҆́же сп҃сти́сѧ всѣ̑мъ пою́щымъ ю҆̀.

Припѣ́въ: Ст҃ы́й мч҃ниче и҆са́їе, молѝ бг҃а ѡ҆ на́съ.

Ре́вность прⷪ҇ро́ческꙋю ко хрⷭ҇тꙋ̀ и҆мѣ́ѧ, бл҃же́нне и҆са́їе, не пощади́лъ є҆сѝ тлѣ́нныѧ пло́ти твоеѧ̀, недостѡ́йны непщꙋ́ѧ стра̑сти врє́менныѧ къ хотѧ́щей по ни́хъ ꙗ҆ви́тисѧ сла́вѣ нбⷭ҇нѣй.

Припѣ́въ: Ст҃а́ѧ мч҃нице марӏ́е, молѝ бг҃а ѡ҆ на́съ.

И҆са́їи пресла́внагѡ ѡ҆брꙋ́чнице, ди́внаѧ новомч҃нице марӏ́е, пречⷭ҇тѣй бг҃омт҃ри тезоиме́нна сꙋ́щи, бли́зꙿ цр҃кве є҆ѧ̀, и҆дѣ́же и҆ роди́ласѧ є҆сѝ, ᲂу҆мре́ти восхотѣ́ла є҆сѝ.

Ра́дꙋйтесѧ, а҆дама́нти тве́рдїи, хрⷭ҇тѡ́вы и҆сповѣ̑дницы, ра́дꙋйтесѧ, вѣ̑рнымъ храни́телїе неѿстꙋ́пнїи, ра́дꙋйтесѧ, ча́ши хрⷭ҇то́вѣ прича̑стницы, креще́нїемъ є҆гѡ̀ крести́вшїисѧ: вели́кꙋю ва́шꙋ къ бг҃ꙋ любо́вь всѧ̀ цр҃ковь ны́нѣ воспѣва́етъ.

Бг҃оро́диченъ: Но́въ а҆да́мъ за пе́рваго ты̀ бы́лъ є҆сѝ, ѿ дв҃ы за прама́терь, и҆зба́витель всѣ́хъ и҆ сп҃съ, за сме́рть и҆́стиннаѧ жи́знь безсме́ртнаѧ: тѣ́мже тѧ̀ ро́ждшꙋю бцⷣꙋ вѣ́дꙋще, по достоѧ́нїю всѝ вѣ́рнїи ᲂу҆бл҃жа́емъ.

Пѣ́снь и҃.

І҆рмо́съ: Оу҆жасни́сѧ боѧ́йсѧ, нб҃о, и҆ да подви́жатсѧ ѡ҆снова̑нїѧ землѝ, се́ бо въ мертвецѣ́хъ вмѣнѧ́етсѧ въ вы́шнихъ живы́й, и҆ во гро́бъ ма́лъ страннопрїе́млетсѧ: є҆го́же, ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

Бг҃оизбра́ннїи новомч҃ницы, вѣ́рою несꙋмнѣ́нною въ рꙋ́ки мꙋчи́телей вда́стесѧ: младе́нцы съ ма́терьми, ѻ҆́троцы и҆ ѻ҆трокови̑цы, ю҆́нѡши и҆ дѣ̑вы, ста́рцы съ ю҆́нотами, и҆мени́тїи и҆ безꙿиме́ннїи, бг҃ꙋ же и҆́стинномꙋ поклѡ́нницы вѣ́рнїи, гдⷭ҇а пою́ще и҆ превозносѧ́ще во всѧ̑ вѣ́ки.

Сла́вный по́лче бра̑нникъ неꙋстраши́мыхъ, ᲂу҆дѡ́въ растерза́нїемъ дїа́вѡльскїѧ сѣ̑ти растерза́сте, и҆ ꙗ҆́кѡ ѕвѣ́зды златоза̑рныѧ, зе́млю кита́йскꙋю ѡ҆зари́сте: сїѧ́нїемъ ва́шимъ и҆ на́съ просвѣти́те, гдⷭ҇а прославлѧ́ющыѧ и҆ превозносѧ́щыѧ въ хра́мѣ ва́шемъ.

Прославлѧ́емъ ва́съ, новомч҃ницы всехва́льнїи, прозна́тельнѣ чл҃вѣколю́бцемъ гдⷭ҇емъ и҆збра́ннїи, и҆ мо́лимсѧ: свѣтоза́рный со́нме, просвѣти́тельнѣ возсїѧ́йте, те́плыми къ бг҃ꙋ мл҃твами, зари̑ правосла́вїѧ и҆ странѣ̀ ва́шей.

Прорцы̀ ны́нѣ, давӏ́де бг҃огла́сне, ꙗ҆́кѡ ѿ стра́нъ собра̀ гдⷭ҇ь, и҆̀хже и҆зба́ви и҆зꙿ рꙋкѝ врага̀, ѿ востѡ́къ, и҆ за̑падъ, ѿ сѣ́вера, и҆ мо́рѧ: во́дꙋ бо жи́вꙋ сло́ва бж҃їѧ ѡ҆брѣ́тше, напаѧ́ютъ дꙋ́шы любо́вїю пою́щихъ ѧ҆̀.

Бг҃оро́диченъ: Ра́дꙋйсѧ, сл҃нце пра́вды мӏ́рꙋ возсїѧ́вшаѧ, ѕвѣздо̀ златоза́рнаѧ, ра́дости лꙋча́ми мч҃никѡвъ первозва́нныхъ землѝ кита́йскїѧ ны́нѣ ѡ҆зарѧ́ющаѧ, съ ни́миже молѝ сн҃а твоего̀, дарова́ти вселе́ннѣй ми́ръ и҆ ве́лїю млⷭ҇ть. Пѣ́снь ѳ҃.

І҆рмо́съ: Не рыда́й менѐ, мт҃и, зрѧ́щи во гро́бѣ, є҆го́же во чре́вѣ безꙿ сѣ́мене зачала̀ є҆сѝ сн҃а: воста́нꙋ бо, и҆ просла́влюсѧ, и҆ вознесꙋ̀ со сла́вою непреста́ннѡ ꙗ҆́кѡ бг҃ъ, вѣ́рою и҆ любо́вїю тѧ̀ велича́ющыѧ.

Ѽ ра́досте на́ша, собо́ре ст҃ы́хъ ди́вныхъ, вели̑кїѧ мꙋ́ки ва́шѧ, и҆ сле́зы, и҆ крове́й и҆злїѧ́нїе почита́юще, все́ю дꙋше́ю ва́съ ᲂу҆молѧ́емъ: не ѡ҆скꙋдѣва́йте молѧ́щесѧ цр҃ю̀ хрⷭ҇тꙋ̀, дарова́ти всѣ̑мъ въ хра́мѣ ва́шемъ сте́кшымсѧ сп҃се́нїе.

Столпы̀ цр҃кве правосла́вныѧ, на восто́цѣ да́льнѣмъ ᲂу҆тверждє́нныѧ, ва́съ воспѣва́емъ, прехва́льнїи: тѣ́мъ и҆ на́съ въ вѣ́рѣ ᲂу҆твержда́ете, и҆ застꙋпле́нїй рѣ́ки вѣ̑рнымъ и҆сточа́ете.

Стѣле́сники чл҃вѣ́кѡмъ сꙋ́ще, є҆стества̀ немощно́е превзыдо́сте, и҆ а҆́гг҃лѡмъ дивле́нїе бы́сте: тѣ́мъ и҆ немѡщны́ѧ ᲂу҆крѣплѧ́ете, болѣ̑зни вѣ́рою къ ва́мъ притека́ющихъ врачꙋ́ете, стра̑сти ва́мъ молѧ́щихсѧ потреблѧ́ете, ꙗ҆́кѡ страстоно́сцы пречꙋ́днїи.

Бг҃оро́диченъ: Ꙗ҆́кѡ всѣ́хъ предста́тельница хрⷭ҇тїа́нъ, бг҃омт҃и, всенепоро́чнаѧ влⷣчце, ꙗ҆́кѡ млⷭ҇тива, и҆зба́ви ѿ бѣ́дъ и҆ и҆скꙋше́нїй стра́ждꙋщыѧ рабы̑ твоѧ̑, и҆ недꙋ́гꙋющыѧ лю́тыхъ прегрѣше́нїй, ра́нами и҆ болѣ́зньми тѧ́жкими ѡ҆держи̑мыѧ, и҆зврачꙋ́й.

Свѣти́ленъ, гла́съ в҃. Подо́бенъ: Жєны̀, ᲂу҆слы́шите:

Дне́сь тве́рдь нбⷭ҇наѧ* ѕвѣзда́ми но́выми красꙋ́етсѧ,* и҆́хже блиста́ньми мо́ре земно́е* ра́дости лꙋчы̀ и҆спꙋща́етъ,* и҆ вѣ́рнїи ѡ҆заре́ннїи ликꙋ́ютъ,* свѣтода́вцꙋ пѣ́снь побѣ́днꙋю пою́ще.

Сла́ва, и҆ ны́нѣ:

Оу҆моле́на бы́вши, всецр҃и́це дв҃о,* мольба́ми чⷭ҇тны́хъ новомч҃никъ кита́йскихъ,* мра́къ дꙋше́вный ѿ на́съ ѿимѝ,* ꙗ҆́кѡ свѣтодѣ́телѧ є҆ди́наго всѣ̑мъ ро́ждшаѧ.

На хвали́тѣхъ стїхи̑ры на д҃, гла́съ д҃. Подо́бенъ: Ꙗ҆́кѡ до́блѧ:

Двꙋвѣко́вныхъ сѣ́ѧнїй проповѣ̑дникъ рꙋ́сскихъ* пло́дъ хрⷭ҇тꙋ̀ сꙋгꙋбосо́тный,* бл҃же́нныхъ страстоте́рпцєвъ ли́къ, ны́нѣ землѧ̀ кита́йскаѧ прино́ситъ:* сѐ разботѣ́ша кра̑сныѧ пꙋсты̑ни,* ѡ҆роше́нїемъ сщ҃е́нныхъ мч҃никъ кровьмѝ,* и҆́хже па́мѧть цѣльбоно́снꙋю* цр҃ковь хрⷭ҇то́ва ны́нѣ пра́зднꙋетъ,* и҆̀мже и҆ мы̀ хвале́нїе ᲂу҆се́рдное прино́симъ:* ра́дꙋйтесѧ, мл҃твєнницы ва́съ пою́щихъ неѿстꙋ́пнїи!

Дне́сь ли́къ ст҃ы́хъ новомч҃никъ прославлѧ́етсѧ,* въ землѝ кита́йстѣй бг҃ꙋ всѣ́хъ ᲂу҆годи́вшихъ:* предстоѧ́ще въ хра́мѣ и҆́хъ ᲂу҆ми́льнѡ чтꙋ́щымъ ѧ҆̀,* неви́димѡ за ны̀ мо́лѧтсѧ хрⷭ҇тꙋ̀,* недꙋ̑жныѧ и҆сцѣлѧ́ютъ,* скорбѧ́щыѧ ᲂу҆тѣша́ютъ,* ѡ҆бꙋрева́ємымъ ми́ръ и҆ свѣ́тъ дꙋше́вный подава́ютъ,* лꙋчи́стыми къ бг҃ꙋ* ѡ҆ на́съ грѣ́шныхъ мольба́ми.

Дне́сь восто́къ лꙋчы̀ своѧ̑ всемꙋ̀ мӏ́рꙋ подае́тъ,* дне́сь мра̑чнаѧ ᲂу҆дѡ́лїѧ пре́лести ᲂу҆пражднѧ́ютсѧ,* сꙋемꙋ́дрїе ꙗ҆зы́ческое посрамлѧ́етсѧ,* ѿ ꙗ҆зы̑къ возсїѧ́вшими свѣтода́вцꙋ поклѡ́нники:* Ѽ мч҃ницы сла́внїи,* ѕвѣ́зды, захо́дъ мӏ́ра тлѣ́ннагѡ ѡ҆зарѧ́ющыѧ,* дне́сь свѣтоли́тїемъ ва́шимъ* цр҃ковь бжⷭ҇твеннаѧ и҆сполнѧ́етсѧ,* и҆ вѣ́рныхъ собра́нїе ѡ҆ ва́съ свѣ́тлѡ ликꙋ́етъ.

Дне́сь жи̑тницы нбⷭ҇ныѧ мно́жества пшени́цы и҆сполнѧ́ютсѧ,* дне́сь землѧ̀ кита́йскаѧ прино́ситъ тѝ,* содѣ́телю всѧ́ческихъ, бж҃е, нача́тки плодоноше́нїѧ,* ꙗ҆̀же прїе́мъ въ пренбⷭ҇ный тво́й же́ртвенникъ,* ᲂу҆твердѝ сїѐ, є҆́же ѡ҆ на́съ содѣ́лалъ є҆сѝ,* ᲂу҆мно́жи на́мъ лѣ̑та покаѧ́нїѧ, проле́й млⷭ҇ть твою̀ мӏ́рꙋ всемꙋ̀,* и҆ правосла́вїѧ лꙋча́ми пре́жде конца̀ просвѣтѝ странꙋ̀ кита́йскꙋю,* и҆мѣ́ѧй мл҃твенники тє́плыѧ,* ли́къ новомч҃никъ преизрѧ́дныхъ, та́мѡ тѧ̀ просла́вившихъ. Сла́ва, гла́съ и҃:

Насажде́нный бг҃омъ вїногра́де, крⷭ҇тоно́сное мно́жество страда́льцєвъ чꙋ́дныхъ, приспѣ́вшей па́мѧти ва́шей, къ ва́мъ, бл҃госе́рднїи, прибѣга́емъ: прїими́те и҆ ѿ на́съ хвалє́нїѧ сїѧ̑ недостѡ́йнаѧ, и҆ бꙋ́дите застꙋ̑пницы и҆ неѿстꙋ́пнїи хода̑таи всѣ́мъ срⷣцемъ ва́мъ зовꙋ́щымъ: ра́дꙋйтесѧ, мч҃ницы многомлⷭ҇тивїи, ва́съ чтꙋ́щихъ никогда́же ѡ҆ставлѧ́ющїи. И҆ ны́нѣ, бг҃оро́диченъ, гла́съ то́йже:

Влⷣчце, прїимѝ мл҃твы ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.

Славосло́вїе вели́кое. Є҆ктєнїѝ, и҆ ѿпꙋ́стъ.

На лїтꙋргӏ́и.

Бл҃жє́нна ѿ канѡ́на ст҃ы́хъ, пѣ́снь г҃ и҆ ѕ҃.

Прокӏ́менъ, гла́съ з҃: Тебє̀ ра́ди, гдⷭ҇и, ᲂу҆мерщвлѧ́еми є҆смы̀ ве́сь де́нь.

Стӏ́хъ: Вмѣни́хомсѧ ꙗ҆́кѡ ѻ҆́вцы заколе́нїѧ. А҆пⷭ҇лъ къ ри́млѧнѡмъ, зача́ло ч҃ѳ.

А҆ллилꙋ́їа, гла́съ а҃: Бг҃ъ богѡ́въ гдⷭ҇ь глаго́ла, и҆ призва̀ зе́млю ѿ востѡ́къ со́лнца до за̑падъ. Стӏ́хъ: Собери́те є҆мꙋ̀ прпⷣбныѧ є҆гѡ̀, завѣща́ющыѧ

завѣ́тъ є҆гѡ̀ ѡ҆ же́ртвахъ. Є҆ѵⷢ҇лїе ѿ і҆ѡа́нна, зача́ло н҃в.

Прича́стенъ: Ра́дꙋйтесѧ, првⷣнїи, ѡ҆ гдⷭ҇ѣ, пра̑вымъ подоба́етъ похвала̀.