Мѣ́сѧца і҆ꙋ́нїа въ л҃-й де́нь.

Слꙋ́жба ст҃о́мꙋ мч҃никꙋ а҆леѯа́ндрꙋ,

ѿ наци́стѡвъ безбѡ́жникъ ᲂу҆бїе́нномꙋ во гра́дѣ мю́нхенѣ.

На вели́цѣй вече́рни.

Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ: стїхи̑ры на и҃, гла́съ в҃.

Подо́бенъ: Є҆гда̀ ѿ дре́ва:

Е гда̀ неразꙋ́мїѧ мра́зъ ѡ҆бдержа́ше вселе́ннꙋю, и҆ си́льнїи мӏ́ра сегѡ̀ преклонѧ́хꙋсѧ і҆́дѡлѡмъ безбо́жнагѡ безꙋ́мїѧ, тогда́ же сла́вный мч҃никъ а҆леѯа́ндръ, пла́меннымъ срⷣцемъ и҆ теплото́ю бжⷭ҇твенныѧ вѣ́ры возста̀ съ є҆диномы́сленными є҆мꙋ̀, и҆ ѡ҆бличѝ письмены̀ и҆ словесы̀ безꙋ́мїе и҆́хъ, пролива́ѧ кро́вь свою̀, дви́жимый любо́вїю, за и҆злїѧ́вшаго кро́вь свою̀ на крⷭ҇тѣ̀ всѣ́хъ ра́ди. Два́жды.

Є҆гда̀, манове́нїемъ бжⷭ҇твеннымъ, къ вышеесте́ственномꙋ по́двигꙋ а҆леѯа́ндръ сла́вный прилѣжа̀, тѣлесѐ тлѣ́ющагѡ ѿвергӏ́йсѧ, си́лою ᲂу҆крѣплѧ́емь всеси́льнагѡ, сꙋда̀ не ᲂу҆жасе́сѧ, ни меча̀ посѣка́ющагѡ. тѣ́мже бг҃ꙋ вы́ю прекло́нь бл҃же́нный, кончи́нꙋ съ ра́достїю прїѧ́тъ.

Є҆гда̀ а҆леѯа́ндръ, до́блїй страда́лецъ, ви́дѣ безбо́жныхъ свирѣ́пство, всѣ́мъ срⷣцемъ свои́мъ возненави́дѣвъ непра́вдꙋ, ѡ҆брати́сѧ къ свѣтода́вцꙋ, и҆ презрѣ́въ тьмꙋ̀ мӏ́ра сегѡ̀, тве́рдѡ ше́ствова пꙋте́мъ мч҃ничества, не прїе́млѧ ле́сти мꙋчи́телей, ѡ҆блича́ѧ ѕло́бꙋ человѣ́ческꙋю, ᲂу҆стреми́сѧ въ црⷭ҇тво нбⷭ҇нагѡ цр҃ѧ̀.

И҆́ны стїхи̑ры, гла́съ в҃. Подо́бенъ: Кӏ́ими похва́льными вѣнцы̑:

Кӏ́ими похва́льными вѣнцы̑ вѣнча́емъ пѣва́емаго, а҆леѯа́ндра, ст҃а́го мч҃ника, вѣ́рныхъ хрⷭ҇тїа́нъ те́плаго застꙋ́пника, землѝ рѡссӏ́йскїѧ и҆ герма́нскїѧ ᲂу҆добре́нїе, и҆ всеѧ̀ вселе́нныѧ наслажде́нїе, пита́емаго вѣ́рою те́плою и҆ любо́вїю ко хрⷭ҇тꙋ̀, бѣсо́вскꙋю держа́вꙋ разрꙋши́вшемꙋ, и҆ подаю́щемꙋ мӏ́рови ве́лїю млⷭ҇ть; Два́жды.

Кӏ́ими похва́льными вѣнцы̑ вѣнча́емъ тѧ̀, а҆леѯа́ндре мч҃ниче, разори́вшаго ри́торскїѧ мꙋ́дрости ѕлопи̑саннаѧ плетє́нїѧ, посѣка́ющимъ твои́мъ сло́вомъ; наꙋча́еши вѣ́рнѡ, и҆ стра́ждеши терпѣли́внѡ за хрⷭ҇та̀, бл҃гоꙋкраша́ѧсѧ и҆ вкꙋ́пѣ со страстотє́рпцы вѣнча́емь.

Кӏ́ими похва́льными вѣнцы̑ вѣнча́емъ тѧ̀, пѣва́емаго ны́нѣ, а҆леѯа́ндре мч҃ниче; ѿ пеле́нъ бо присво́илсѧ є҆сѝ хрⷭ҇тꙋ̀, и҆здѣ́тска соверше́нна мꙋ́жа смы́слъ и҆збра́въ, и҆ премꙋ́дрости бжⷭ҇твенныѧ возжелѣ́въ, ве́сь бы́лъ є҆сѝ чⷭ҇тѣ́йшее, мч҃ниче, хрⷭ҇то́во и҆ дх҃а ст҃а́гѡ ѻ҆би́телище.

Сла́ва, гла́съ в҃:

Гра́дъ на́шъ ра́кою твое́ю ѡ҆богати́сѧ, мы́ же, хрⷭ҇толюби́вꙋю па́ствꙋ созыва́юще, вопїе́мъ: прїиди́те, мч҃николю́бцы, просвѣти́тесѧ въ па́мѧти свѣ́тлѣй: прїиди́те ᲂу҆̀бо, празднолю́бцы, возвесели́тесѧ: прїиди́те, и҆ ви́дите свѣти́ло нбⷭ҇ное, на землѝ жи́тельствовавшее. прїиди́те, и҆ ᲂу҆слы́шите, каковꙋ̀ сме́рть го́рькꙋю до́блїй а҆дама́нтъ подꙿѧ́тъ, безконе́чныѧ ра́ди жи́зни: мо́литъ бо подвигополо́жника хрⷭ҇та̀, и҆зба́витисѧ на́мъ ѿ тлѝ и҆ и҆скꙋше́нїй, и҆ всѧ́ческихъ бѣ́дъ, вѣ́рою и҆ любо́вїю творѧ́щымъ па́мѧть є҆гѡ̀.

И҆ ны́нѣ, бг҃оро́диченъ догма́тїкъ, гла́съ то́йже: Пре́йде сѣ́нь зако́ннаѧ:

Вхо́дъ, прокӏ́менъ днѐ, и҆ чтє́нїѧ г҃.

Прⷪ҇ро́чества и҆са́їина чте́нїе:

Та́кѡ гл҃етъ гдⷭ҇ь: Всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ̑зи ѿ ни́хъ. кто̀ возвѣсти́тъ сїѧ̑ въ ни́хъ; и҆лѝ ꙗ҆̀же ѿ нача́ла, кто̀ слы̑шана сотвори́тъ ва́мъ; да приведꙋ́тъ свидѣ́тєли своѧ̑, и҆ ѡ҆правдѧ́тсѧ, и҆ да ᲂу҆лы́шатъ, и҆ да рекꙋ́тъ и҆́стинꙋ. Бꙋ́дите мѝ свидѣ́тєли, и҆ а҆́зъ свидѣ́тель, гл҃етъ гдⷭ҇ь бг҃ъ, и҆ ѻ҆́трокъ, є҆го́же и҆збра́хъ: да позна́ете, и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь: пре́жде менє̀ не бы́сть и҆́нъ бг҃ъ, и҆ по мнѣ̀ не бꙋ́детъ. А҆́зъ є҆́смь бг҃ъ, и҆ нѣ́сть ра́звѣ менє̀ сп҃са́ѧй. А҆́зъ возвѣсти́хъ и҆ сп҃со́хъ, ᲂу҆ничижи́хъ, и҆ не бѣ̀ въ ва́съ чꙋ́ждїй. вы̀ мнѣ̀ свидѣ́тєли, и҆ а҆́зъ гдⷭ҇ь бг҃ъ, И҆ є҆щѐ ѿ нача́ла а҆́зъ є҆́смь, и҆ нѣ́сть ѿ рꙋ́къ мои́хъ и҆збавлѧ́ѧй: сотворю̀, и҆ кто̀ ѿврати́тъ то̀; Си́це гл҃етъ гдⷭ҇ь бг҃ъ, и҆збавлѧ́ѧй ва́съ, ст҃ы́й і҆и҃левъ.

Премꙋ́дрости соломѡ́новы чте́нїе:

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предꙿ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́новы чте́нїе:

Првⷣникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо чⷭ҇тна̀ не многолѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ, преста́вленъ бы́сть: Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ѹ҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: Оу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На лїтӏ́и стїхи́ра хра́ма, и҆ ст҃а́гѡ, гла́съ д҃:

Ѡбагри́всѧ кро́вїю пло́ти твоеѧ̀, мч҃ниче а҆леѯа́ндре сла́вне, ѡ҆дѣ́ѧлсѧ є҆сѝ въ порфѵ́рꙋ бжⷭ҇твенныѧ блгⷣти, и҆ ве́рхъ тво́й вѣнце́мъ ѡ҆бложи́лъ є҆сѝ нетлѣ́нїѧ жи́зни, ѻ҆те́чествїѧ земна́гѡ не ѿлꙋчи́лсѧ є҆сѝ мы́сленнѣ, вы́нꙋ приближа́ѧсѧ къ црⷭ҇твꙋ нбⷭ҇номꙋ.

Во странѣ̀ ѻ҆тца̀ земна́гѡ твоегѡ̀ храни́лъ є҆сѝ те́плꙋю любо́вь ко бл҃гочⷭ҇тїю ма́тере твоеѧ̀, зе́млю рожде́нїѧ твоегѡ̀ почита́ѧ, и҆ ꙗ҆́кѡ и҆здѣ́тска, средѝ неразꙋмѣва́ющихъ, и҆сповѣ́днически зна́менїе крⷭ҇тное правосла́внѡ соверша́лъ є҆сѝ, та́кѡ во́зрастъ и҆мѣ́ѧ, неразлꙋ́чнѡ мл҃твосло́въ съ собо́ю носи́лъ є҆сѝ: сицево́ю же вѣ́рою ᲂу҆крѣплѧ́емь, въ пра́вдѣ хрⷭ҇то́вѣ тве́рдѣ стоѧ̀, вѣ́ренъ бы́лъ є҆сѝ хрⷭ҇тꙋ̀ до конца̀.

Во́инъ хрⷭ҇то́въ позна́нъ бы́лъ є҆сѝ, мч҃ниче сла́вне а҆леѯа́ндре, ле́сти не прїе́мъ безꙋ́мнагѡ мꙋчи́телѧ, ѿре́клсѧ є҆сѝ всѧ́кѡ мы́слити ѡ҆ поми́лованїи твое́мъ рꙋко́ю нечести́вагѡ, и҆ прїѧ́лъ є҆сѝ мч҃ничества сла́вный вѣне́цъ, бы́въ вѣ́рный сы́нъ цр҃кве правосла́вныѧ, и҆ влⷣки при́снѡ црⷭ҇твꙋющагѡ.

Сла́ва, гла́съ ѕ҃:

Ѽ мч҃ниче сла́вный и҆ и҆збра́нный гдⷭ҇ꙋ, Ѽ бл҃же́нне а҆леѯа́ндре всечⷭ҇тне, возлю́бленный хрⷭ҇тꙋ̀, кто̀ не ᲂу҆диви́тсѧ, ᲂу҆слы́шавъ твоѧ̑ дѣѧ̑нїѧ; ка́кѡ противле́нїю вла́сть и҆мꙋ́щымъ сострада́нїе приложи́лъ є҆сѝ: состра́ждꙋщꙋ бо тебѣ̀ вѣ̑рнымъ ча́дѡмъ землѝ рѡссӏ́йскїѧ, подꙿ и҆́гомъ богобо́рцєвъ сꙋ́щымъ, дерзнове́ннѡ тѣ́хъ и҆ и҆ны́хъ лю́тыхъ безбѡ́жникъ мꙋчи́тельство ѡ҆бличи́лъ є҆сѝ, не да́въ порꙋга́ти странꙋ̀ рѡссӏ́йскꙋю и҆ вѣ́рꙋ правосла́внꙋю, и҆ бг҃освѣ́тлыми глагѡ́лы сро́дники своѧ̑ ᲂу҆тѣша́ѧ, во́льнѡ прїѧ́лъ є҆сѝ кончи́нꙋ мч҃ническꙋю.

И҆ ны́нѣ, бг҃оро́диченъ, гла́съ то́йже:

Ѻ҆́ко срⷣца моегѡ̀ воспꙋща́ю къ тебѣ̀, влⷣчце: не пре́зри ма́лагѡ моегѡ̀ воздыха́нїѧ, въ ча́съ, є҆гда̀ сꙋ́дитъ сн҃ъ тво́й мӏ́рꙋ, бꙋ́ди мѝ покро́въ и҆ помо́щница.

На стїхо́внѣ стїхи̑ры, гла́съ д҃.

Подо́бенъ: Да́лъ є҆сѝ зна́менїе:

Ка́мень пресоверше́нный,* мꙋче́нїемъ сѣко́мый,* и҆ ка́зньми и҆стеса́емый, ст҃ы́й ꙗ҆ви́сѧ,* созда́сѧ въ цр҃ковь гдⷭ҇ню,* и҆ дїа́вѡльскїѧ кѡ́зни и҆ лє́сти мꙋчи́телѧ* низложи́въ на зе́млю.* того̀ ᲂу҆̀бо ᲂу҆бл҃жа́емъ,* ꙗ҆́кѡ раѧ̀ жи́телѧ,* ꙗ҆́кѡ хра́ма возложе́нїе нбⷭ҇нагѡ сꙋ́ща.

Стӏ́хъ: Првⷣникъ, ꙗ҆́кѡ фӏ́нїѯъ, процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.

Блгⷣть почерпи́те,* и҆ просвѣще́нїе прїими́те,* весе́лїе и҆ млⷭ҇ть,* ст҃ы̑мъ моще́мъ прикоснꙋ́вшїисѧ* сщ҃е́ннагѡ мч҃ника а҆леѯа́ндра,* и҆зꙿ ни́хже и҆стека́етъ бога́тнѡ и҆сцѣле́нїй бжⷭ҇твенное дѣ́йство.* и҆ сего̀ ᲂу҆бл҃жа́юще, ꙗ҆́кѡ ᲂу҆го́дника гдⷭ҇нѧ,* прилѣ́жнѡ возопїи́мъ:* бж҃е на́шъ, сла́ва тебѣ̀.

Стӏ́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.

А҆леѯа́ндръ всесла́вный,* бжⷭ҇твенными дѣѧ̑нїи просвѣ́щсѧ,* серде́чными ѻ҆чесы̀ ви́дѣти добро́тꙋ хрⷭ҇то́вꙋ сподо́бисѧ,* томꙋ̀ ᲂу҆подо́бивсѧ страда́нїемъ,* скве́рнꙋ страсте́й ѿмыва́етъ тѧ́жкихъ,* всѣ́хъ притека́ющихъ съ вѣ́рою.* тогѡ̀ мл҃твами, гдⷭ҇и,* всѣ̑мъ на́мъ молѧ́щымсѧ* пода́ждь ве́лїю млⷭ҇ть.

Сла́ва, гла́съ в҃:

Ревни́телю ст҃ы́й, всехва́льне а҆леѯа́ндре, хвала́ми досто́йными почте́нъ бꙋ́ди: ты́ бо крѣ́пкѡ подвиза́ѧсѧ, во є҆́же къ бг҃ꙋ тве́рдомъ и҆сповѣ́данїи пострада́въ, побѣ́дный вѣне́цъ ᲂу҆лꙋчѝ. тѣ́мъ со а҆́гг҃лы въ вы́шнихъ ликовствꙋ́еши, прилѣ́жнѡ молѧ̀ ст҃ꙋ́ю трⷪ҇цꙋ, ᲂу҆мири́ти мӏ́ръ и҆ странꙋ̀ твою̀, и҆ сп҃стѝ дꙋ́шы на́шѧ.

И҆ ны́нѣ, бг҃оро́диченъ: Ѽ чꙋдесѐ но́вагѡ:

Тропа́рь, гла́съ д҃:

Дне́сь мю́нхенъ красꙋ́етсѧ, сла́внѣйшїй гра́дъ, хранѧ̀ ст҃ы̑ѧ мѡ́щи твоѧ̑, мч҃ниче а҆леѯа́ндре, моли́сѧ хрⷭ҇тꙋ̀ бг҃ꙋ, во є҆́же подража́ти на́мъ мꙋ́жествꙋ твоемꙋ̀, противлѧ́ющесѧ безбѡ́жнымъ власте́мъ и҆ сꙋпоста́тѡмъ.

А҆́ще бдѣ́нїе соверша́етсѧ: тропа́рь два́жды, Бцⷣе, дв҃о: є҆ди́ножды.

На ѹ҆́трени.

На Бг҃ъ гдⷭ҇ь: тропа́рь мч҃ника, два́жды. Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́ное:

По а҃-мъ стїхосло́вїи сѣда́ленъ, гла́съ а҃:

Дне́сь возсїѧ̀ всепра́зднственный де́нь и҆ свѣтоно́сный, сла́внагѡ мч҃ника а҆леѯа́ндра: прїиди́те, всѝ мч҃николю́бцы, свѣщы̀ носѧ́ще бжⷭ҇твеннѣ, свѣ́тлѡ да пра́зднꙋимъ па́мѧть є҆гѡ̀. Два́жды.

Сла́ва, и҆ ны́нѣ, бг҃оро́диченъ:

Мт҃рь тѧ̀ бж҃їю мо́лимъ всѝ, дв҃ꙋ вои́стиннꙋ и҆ по ржⷭ҇твѣ̀ ꙗ҆́вльшꙋюсѧ, любо́вїю притѣка́ющїи къ твое́й бл҃гости: тѧ́ бо и҆́мамы ᲂу҆се́рднꙋю предста́тельницꙋ, є҆ди́на всенепоро́чнаѧ.

По в҃-мъ стїхосло́вїи сѣда́ленъ, гла́съ а҃:

Хрⷭ҇тꙋ̀ послѣ́довалъ є҆сѝ, бг҃омꙋ́дре а҆леѯа́ндре, и҆ мїрско́е мꙋдрова́нїе возненави́дѣлъ є҆сѝ, свѣ́томъ хрⷭ҇то́вымъ просвѣти́всѧ, въ вѣ̑чныѧ ѻ҆би́тєли всели́лсѧ є҆сѝ. Два́жды.Сла́ва, и҆ ны́нѣ, бг҃оро́диченъ:

Гаврїи́лꙋ вѣща́вшꙋ тебѣ̀, дв҃о, ра́дꙋйсѧ, со гла́сомъ воплоща́шесѧ всѣ́хъ влⷣка въ тебѣ̀, ст҃ѣ́мъ кївѡ́тѣ, ꙗ҆́коже речѐ првⷣный дв҃дъ, ꙗ҆ви́ласѧ є҆сѝ ши́ршаѧ нб҃съ, поноси́вши зижди́телѧ твоего̀. сла́ва все́льшемꙋсѧ въ тѧ̀: сла́ва проше́дшемꙋ и҆зꙿ тебє̀: сла́ва свободи́вшемꙋ на́съ ржⷭ҇тво́мъ твои́мъ.

Полѷеле́й, и҆ велича́нїе:

Велича́емъ тѧ̀, страстоте́рпче ст҃ы́й а҆леѯа́ндре, и҆ чти́мъ чⷭ҇тна̑ѧ страда̑нїѧ твоѧ̑, ꙗ҆̀же за хрⷭ҇та̀ претерпѣ́лъ є҆сѝ. Ѱало́мъ и҆збра́нный: Бг҃ъ

на́мъ прибѣ́жище и҆ си́ла, помо́щникъ въ ско́рбехъ, ѡ҆брѣ́тшихъ ны̀ ѕѣлѡ̀.

По полѷеле́и сѣда́ленъ, гла́съ д҃:

Чтнꙋ́ю твою̀ главꙋ̀, а҆леѯа́ндре сла́вне, мече́мъ ѿсѣко́ша ѡ҆каѧ́ннїи безбѡ́жницы, ю҆́же любо́вїю вѣ́рнїи лобыза́емъ. Два́жды.

Сла́ва, и҆ ны́нѣ, бг҃оро́диченъ:

Стѣна̀ непобѣди́маѧ на́мъ хрⷭ҇тїа́нѡмъ є҆сѝ, бцⷣе дв҃о, къ тебѣ́ бо прибѣга́юще, невреди́ми пребыва́емъ, и҆ па́ки согрѣша́юще, и҆́мамы тѧ̀ мл҃твенницꙋ. тѣ́мъ бл҃годарѧ́ще вопїе́мъ тѝ: ра́дꙋйсѧ, блгⷣтнаѧ, гдⷭ҇ь съ тобо́ю!

Та́же степє́нна, а҃-й а҆нтїфѡ́нъ д҃-гѡ гла́са.

Прокӏ́менъ, гла́съ д҃: Првⷣникъ, ꙗ҆́кѡ фӏ́нїѯъ, процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Стӏ́хъ: Насажде́ни въ домꙋ̀ гдⷭ҇ни, во

дво́рѣхъ бг҃а на́шегѡ процвѣтꙋ́тъ.

Є҆ѵⷢ҇лїе ѿ лꙋкѝ, зача́ло Ѯг: Речѐ гдⷭ҇ь: ничто́же покрове́но є҆́сть, є҆́же не ѿкры́етсѧ:

По н҃-мъ ѱалмѣ̀: Мл҃твами новомч҃ника а҆леѯа́ндра:

Та́же стїхи́ра, гла́съ ѕ҃:

Дне́сь вселе́ннаѧ всѧ̀ страстоте́рпца просвѣща́етсѧ зарѧ́ми, и҆ хрⷭ҇то́ва цр҃ковь, цвѣ̑ты ᲂу҆краша́ема, а҆леѯа́ндре, вопїе́тъ тѝ: ᲂу҆го́дниче хрⷭ҇то́въ и҆ застꙋ́пниче те́плый, не преста́й молѧ́сѧ ѡ҆ рабѣ́хъ твои́хъ.

Канѡ́нъ бцⷣѣ, со і҆рмосо́мъ на ѕ҃: Во́дꙋ проше́дъ: и҆ ст҃о́мꙋ.

Гла́съ в҃. Пѣ́снь а҃.

І҆рмо́съ: Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зꙿ рабо́ты є҆гѵ́петскїѧ, ꙗ҆́кѡ просла́висѧ.

Припѣ́въ: Ст҃ы́й мч҃ниче а҆леѯа́ндре, молѝ бг҃а ѡ҆ на́съ.

Свѣтоза́рными блиста̑нїи дх҃а просвѣща́емь, мра̑чныѧ ѻ҆́блаки дꙋшѝ моеѧ̀ разорѝ, ꙗ҆́кѡ да воспою̀ ра́дꙋѧсѧ свѣтоно́снꙋю и҆ чⷭ҇тнꙋ́ю твою̀ па́мѧть, мч҃ниче хрⷭ҇то́въ предо́бле.

Хвалꙋ̀ бг҃ꙋ, въ па́мѧти ликꙋ́юще страда́льца а҆леѯа́ндра, дне́сь воспое́мъ, ᲂу҆крѣ́пльшемꙋ сего̀, во є҆́же держа́вꙋ погꙋби́ти борца̀.

Да́ръ са́мъ себѐ бл҃годѣ́телю прине́слъ є҆сѝ, сщ҃е́нно возложе́нїе, и҆ добро̀ заколе́нїе, и҆ бл҃гово́ннꙋ же́ртвꙋ, зако́ннѡ пострада́въ, мч҃ниче многострада́льне.

Бг҃оро́диченъ: Всего̀ мѧ̀ сп҃са́етъ сло́во пребжⷭ҇твенное, бл҃гостїю восхотѣ́въ и҆зꙿ чре́ва твоегѡ̀ воплоти́тисѧ, чⷭ҇таѧ мт҃и дв҃о. Пѣ́снь г҃.

І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть првⷣнъ, па́че тебє̀, гдⷭ҇и.

На ка́мени непоро́чныѧ вѣ́ры, добродѣ́тельми бжⷭ҇твенными себѐ, бл҃же́нне, созда́въ, предо́бръ показа́лсѧ є҆сѝ и҆ красе́нъ хра́мъ, въ него́же ѻ҆ц҃ъ всели́сѧ, и҆ сн҃ъ, и҆ ст҃ы́й дх҃ъ.

Зако́нъ бжⷭ҇твенный и҆сполнѧ́ѧ, прехва́льне мч҃ниче а҆леѯа́ндре, а҆́лчꙋщымъ и҆́стины и҆ пра́вды бога́тнѡ хлѣ́бъ мы́сленный пода́въ, ко бл҃гочⷭ҇тїю бжⷭ҇твенномꙋ наста́вилъ є҆сѝ, сп҃се́нїѧ хода́тай тѣ̑мъ ꙗ҆ви́всѧ.

Въ заточе́нїи не ᲂу҆ныва́ѧ, сподо́билсѧ є҆сѝ бжⷭ҇твенныхъ та́инъ прича́стїѧ: ѿве́ргъ мꙋчи́телѧ ле́сть, низложи́лъ є҆сѝ безбо́жнаго бори́телѧ.

Бг҃оро́диченъ: Неискꙋсобра́чнаѧ дв҃о, є҆ѧ́же ра́ди на́мъ возсїѧ̀ сло́во, є҆́же вы́ше всѧ́кагѡ нача́ла разꙋмѣва́емо, сп҃са́й ста́до твоѐ, и҆ всѧ́къ гра́дъ и҆ странꙋ̀, ѿ всѧ́кагѡ ѡ҆бстоѧ́нїѧ, бг҃ора́дованнаѧ.

Сѣда́ленъ, гла́съ а҃:

Ѻ҆гнедохнове́нно бл҃гово́нїе показа́лсѧ є҆сѝ, а҆леѯа́ндре, страда́нїемъ веселѧ́ѧй на̑ша сердца̀, мч҃никѡвъ ᲂу҆краше́нїе, и҆ вѣ́рныхъ ᲂу҆добре́нїе. тѣ́мже дне́сь всест҃ꙋ́ю па́мѧть твою̀ пра́зднꙋюще, ѡ҆сщ҃а́емсѧ всѝ, любо́вїю чтꙋ́щїи тѧ̀. Два́жды.Сла́ва, и҆ ны́нѣ, бг҃оро́диченъ:

Всѣ́хъ творца̀, бг҃а же и҆ содѣ́телѧ, всенепоро́чнаѧ чⷭ҇таѧ, дх҃омъ бжⷭ҇твеннымъ въ ложесна́хъ зачала̀ є҆сѝ, и҆ безꙿ и҆стлѣ́нїѧ родила̀ є҆сѝ, є҆го́же сла́вѧще, тѧ̀ воспѣва́емъ, дв҃о, ꙗ҆́кѡ пала́тꙋ цр҃ѧ̀ всѣ́хъ, и҆ мӏ́ра защище́нїе. Пѣ́снь д҃.

І҆рмо́съ: Пою́ тѧ, слꙋ́хомъ бо, гдⷭ҇и, ᲂу҆слы́шахъ, и҆ ᲂу҆жасо́хсѧ: до менє́ бо и҆́деши, менѐ и҆ща̀, заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многомлⷭ҇тиве.

Ѿ ᲂу҆сте́нъ а҆пⷭ҇льскихъ и҆ ѻ҆те́ческихъ, и҆ска́пающихъ сла́дѡсти, бжⷭ҇твеннагѡ ра́зꙋма наслади́всѧ, въ пи́сьменѣхъ наставлѧ́лъ є҆сѝ сро́дники твоѧ̑ во и҆́стинѣ хрⷭ҇то́вѣ.

И҆зꙿ темни́цы писа́лъ є҆сѝ сро́дникѡмъ твои̑мъ, ꙗ҆́кѡ гдⷭ҇ь направлѧ́етъ хо́дъ веще́й, по своемꙋ̀ смотре́нїю, на бл҃го на́ше, и҆ мы̀ до́лжни є҆смы̀, ᲂу҆пова́ѧ на него̀, предава́ти себѐ въ рꙋ́цѣ є҆гѡ̀: се́й бо николи́же ѡ҆ста́витъ на́съ, но всегда̀ помо́жетъ на́мъ, и҆ ᲂу҆тѣ́шитъ.

Є҆ли́кѡ мно́житсѧ ѕлоѡбстоѧ́нїе, толи́кѡ крѣ́пльше подоба́етъ бы́ти вѣ́рѣ, є҆ли́кѡ бо мно́житсѧ томле́нїе мни́мыѧ бг҃оѡста́вленности, толи́кѡ па́че подоба́етъ на́мъ влага́ти дꙋ́шы на́шѧ въ бг҃а ѻ҆ч҃єскїѧ дла̑ни: та́кѡ ᲂу҆вѣрѧ́лъ є҆сѝ, во ѹ҆́захъ сы́й.

Бг҃оро́диченъ: Ве́лїе и҆ стра́шное та́инство ржⷭ҇тва̀ твоегѡ̀ ᲂу҆дивлѧ́етъ всѧ́къ ѹ҆́мъ, чⷭ҇таѧ, ꙗ҆́кѡ и҆зво́ли бг҃ъ и҆зꙿ тебє̀ бл҃гостїю свое́ю вочл҃вѣ́читисѧ, въ мӏ́ра сп҃се́нїе и҆ назда́нїе. Пѣ́снь є҃.

І҆рмо́съ: Просвѣще́нїе во тьмѣ̀ лежа́щихъ, сп҃се́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ѹ҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бг҃а не зна́ю.

Стра́хъ сме́рти презира́ѧ, подꙿѧ́лъ є҆сѝ ско́рбь и҆ боле́знь разлꙋче́нїѧ съ при́сными, тѣ́мже ᲂу҆̀бо го́речь ѻ҆́нагѡ ᲂу҆слажда́лъ є҆сѝ и҆̀мъ крѣ́пкою вѣ́рою въ смотре́нїе свы́ше, ᲂу҆вѣрѧ́ѧ: проти́вꙋ во́ли бж҃їей ничто́же прилꙋчи́тисѧ возмо́жетъ.

Сме́рть не страшна̀, бы́сть ре́чь твоѧ̀ ко сро́дникѡмъ твои̑мъ, сме́рть нѣ́сть живота̀ кончи́на, ѻ҆ба́че рождество̀ и҆ преставле́нїе въ живо́тъ но́вый, сла́вный, вѣ́чный.

Же́стоко и҆ тѧготы̀ полно̀ є҆́сть разлꙋче́нїе, ѻ҆ба́че врѣ́менно и҆ не на вѣ́ки, пꙋтова́нїѧ нача́лꙋ бо подо́бно, грѧдꙋ́щагѡ ра́ди срѣ́тенїѧ при́снагѡ, є҆́же не вѣ́даетъ преста́тїѧ, въ безкра́йнѣй ѻ҆бще́нїѧ красотѣ̀.

Бг҃оро́диченъ: Ѡ҆ на́съ молѝ, пречⷭ҇таѧ, пребл҃гослове́ннаѧ, и҆зꙿ тебє̀ воплоще́ннаго, ꙗ҆́кѡ да и҆зба́вимсѧ ви́димыхъ всѣ́хъ и҆ неви́димыхъ вра̑гъ, всенепоро́чнаѧ, тѧ̀ бцⷣꙋ при́снѡ и҆сповѣ́дающїи. Пѣ́снь ѕ҃.

І҆рмо́съ: Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆зꙿ глꙋбины̀ а҆́да, молю́сѧ, да ꙗ҆́кѡ и҆зба́вителю, во гла́сѣ хвале́нїѧ, и҆́стины же дꙋ́хомъ, пожрꙋ̀ тебѣ̀.

Ѿсѣче́нїемъ главы̀ твоеѧ̀, и҆ кропле́нїемъ крове́й твои́хъ, потопи́лъ є҆сѝ де́мѡнскїѧ полкѝ, во́ине до́блїй: и҆ вѣне́цъ носѧ̀, къ бг҃ꙋ восте́клъ є҆сѝ, побѣдоно́сецъ бы́въ и҆зрѧ́денъ.

А҆́ще не была̀ бы си́ла свы́ше подана̀ мнѣ̀, мꙋчи́телю взыва́ше добропобѣ́дный а҆леѯа́ндръ, ка́кѡ ᲂу҆̀бо мо́глъ бы́хъ, пло́ть сы́й, ра́достнѡ взы́ти ко ѿсѣче́нїю главы̀;

Главѣ̀ твое́й ѿсѣ́ченѣ, главꙋ̀ і҆́дѡльскагѡ слꙋже́нїѧ сокрꙋши́лъ є҆сѝ, ле́сти мꙋчи́телей не внѧ́въ, преше́лъ є҆сѝ къ нбⷭ҇нымъ черто́гѡмъ, хрⷭ҇тꙋ̀ бг҃ꙋ ᲂу҆годи́въ.

Бг҃оро́диченъ: Зако́ны є҆стества̀ въ тебѣ̀ ѡ҆бновлѧ́ютсѧ, приснодв҃о: па́че бо є҆стества̀, є҆стество́мъ непостижи́маго, бг҃а є҆мманꙋ́ила пресла́внѡ родила̀ є҆сѝ, въ на́ше вѣ́рныхъ порожде́нїе.

Конда́къ, гла́съ д҃:

Ѿма́тере любо́вь ко хрⷭ҇тꙋ̀ прїи́мъ, ѿ лю́бѧщїѧ тѧ̀ вмѣ́стѡ ма́тере воспита́нъ є҆сѝ въ стра́сѣ бж҃їемъ, пресла́вне, къ томꙋ̀ прите́клъ є҆сѝ всецѣ́лѡ, а҆леѯа́ндре всечⷭ҇тне, и҆ со а҆́гг҃лы мо́лишисѧ прилѣ́жнѡ: просѝ всѣ̑мъ почита́ющымъ па́мѧть твою̀ ѡ҆ставле́нїѧ грѣхѡ́въ.

І҆́косъ:

Сего̀ вели́каго въ страстоте́рпцѣхъ, мч҃ника а҆леѯа́ндра, землѝ рѡссӏ́йскїѧ и҆ герма́нскїѧ застꙋ́пника, въ пѣ́снехъ восхвалѧ́емъ, и҆ пѣ̑нїи бжⷭ҇твенными главꙋ̀ є҆гѡ̀ всечⷭ҇тнꙋ́ю вѣнча́емъ, и҆́бо тьмꙋ̀ безбо́жныѧ пре́лести погꙋбѝ, съ не́юже и҆ де́монское дѣ́йство ᲂу҆мертвѝ. тѣ́мъ трꙋды̀ претерпѣ́въ, крѣ́пкимъ по́мысломъ и҆ блгⷣтїю, хрⷭ҇тꙋ̀ ны́нѣ мо́литсѧ, во є҆́же сп҃сти́сѧ на́мъ.

Пѣ́снь з҃.

І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆҆҆тє́цъ на́шихъ.

Ника́коже ᲂу҆страши́всѧ преще́нїй и҆ ѕлохꙋле́нїй, доблемꙋ́дренне, а҆́гг҃лы ᲂу҆диви́лъ є҆сѝ, зрѧ́щыѧ твоѐ терпѣ́нїе: и҆́мже врагѝ безплѡ́тныѧ погꙋби́въ, побѣдоно́сенъ мч҃никъ ꙗ҆ви́лсѧ є҆сѝ.

Сы́й бжⷭ҇твенныѧ росы̀ и҆спо́лненъ, проше́лъ є҆сѝ доблемꙋ́дреннѡ пе́щь слове́сныхъ и҆спыта́нїй, въ не́йже зри́мь, а҆леѯа́ндре мꙋ́дре, со а҆́гг҃лы ра́дꙋѧсѧ, ника́коже, бл҃же́нне, ѡ҆палѧ́емь быва́ѧ.

Хрⷭ҇то́вою ѡ҆кормлѧ́емь дла́нїю бл҃гочⷭ҇тнѡ, безбо́жїѧ пꙋчи́нꙋ преше́лъ є҆сѝ, а҆леѯа́ндре, и҆ ко приста́нищꙋ ти́хомꙋ вы́шнїѧ свѣ́тлости, страда́льче, ᲂу҆стреми́лсѧ є҆сѝ.

Бг҃оро́диченъ: Сщ҃е́ннїи прⷡ҇ⷪ҇рцы провозвѣсти́ша, чⷭ҇таѧ, ꙗ҆вле́ннѡ та́инство чⷭ҇тна́гѡ ржⷭ҇тва̀ твоегѡ̀: и҆ ны́нѣ мы̀ сбытїѧ̀ и҆здале́ча смотрѧ́юще, бл҃гочⷭ҇тнѡ тѧ̀ ᲂу҆бл҃жа́емъ. Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Непобѣди́ма зрѧ̀ безꙋ́мный мꙋчи́тель тѧ̀, доблемꙋ́дренне, и҆ ᲂу҆крѣплѧ́ема бжⷭ҇твенными та́инствы, приложѝ главы̀ ѿсѣче́нїю тѧ̀ преда́ти, но ничто́же возмо́же ѿто́ргнꙋти тѧ̀ ѿ любвѐ хрⷭ҇то́вы.

Текꙋ̑щаѧ и҆ тлѣ̑ннаѧ презрѣ́въ, нетлѣ̑ннаѧ сподо́билсѧ є҆сѝ зрѣ́ти, а҆леѯа́ндре, мч҃ниче прехва́льне: и҆скꙋше́нїй ᲂу҆̀бо и҆зба́ви и҆ бѣ́дъ, вѣ́рою тѧ̀ призыва́ющыѧ.

Оу҆клонѧ́ющїисѧ свѣ́та, во тьмѣ̀ ходѧ́щїи мꙋчи́телїе твоѝ, при и҆схо́дѣ днѐ казни́ша тѧ̀, глава́ же твоѧ̀ возсїѧ̀, ꙗ҆́кѡ ши́покъ бл҃гово́ненъ, и҆ ѡ҆зарѝ всѣ́хъ съ любо́вїю притека́ющихъ.

Бг҃оро́диченъ: Бг҃ороди́тельнице, хрⷭ҇тїа́нъ предста́тельнице и҆ похвало̀, и҆зба́ви ны̀ всѧ́кїѧ нꙋ́жды и҆ бѣды̀, да тѧ̀, пренепоро́чнꙋю, пое́мъ во всѧ̑ вѣ́ки. Пѣ́снь ѳ҃.

І҆рмо́съ: Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.

Да сла́вꙋ бꙋ́дꙋщꙋю и҆ несказа́ннꙋю добро́тꙋ хрⷭ҇та̀ подвигополо́жника ви́дѣти сподо́бишисѧ, прекланѧ́еши вы́ю, и҆ прїе́млеши ме́чное ᲂу҆сѣче́нїе, и҆ ра́дости мч҃никъ и҆сполнѧ́еши бжⷭ҇твєнныѧ полкѝ.

Ꙗ҆́коже сладкодохнове́нное мѵ́ро, достохва́льне а҆леѯа́ндре, бл҃гово́нствꙋющее сердца̀ вѣ́рныхъ, достохва́льнаѧ па́мѧть твоѧ̀ жела́ющымъ наста̀, въ не́йже торжествꙋ́ющихъ на́съ бл҃гово́нїѧ бжⷭ҇твеннагѡ твои́ми мл҃твами и҆спо́лни.

Твои́ми пелена́ми гра́дъ ѻ҆ренбꙋ́ргъ хва́литсѧ, до́блїй гдⷭ҇нь страда́льче, мно́жае же кра́ситсѧ гра́дъ мю́нхенъ страда̑нїи твои́ми, многострада́льное тѣ́ло держа̀, ꙗ҆́кѡ бога́тство и҆́стинное, и҆ и҆сто́чникъ и҆сцѣле́нїй, и҆ недꙋ́гѡвъ ѡ҆чисти́лище.

Бг҃оро́диченъ: Гла́съ вопїе́мъ тѝ всѝ а҆́гг҃ловъ, дв҃о, пала́то и҆ прⷭ҇то́ле бж҃їй, ра́дꙋйсѧ, є҆́юже сподо́бихомсѧ нбⷭ҇нагѡ црⷭ҇твїѧ, дре́вле ѿринове́ннїи тлѣ́нїемъ, и҆ добро́тꙋ пе́рвꙋю несмы́сленнѡ погꙋби́вшїи.

Свѣти́ленъ:

А҆леѯа́ндра мч҃ника до́блѧго вѣнча́емъ пѣ́сньми, и҆́бо вра́жїю ле́сть ѡ҆бличѝ сꙋемꙋ́дреннꙋю, и҆ и҆стѧза̑нїѧ и҆ главы̀ ѿсѣче́нїе за хрⷭ҇та̀ претерпѣ́въ, неизрече́нныѧ сла́вы сподо́бисѧ. Два́жды.

Сла́ва, и҆ ны́нѣ, бг҃оро́диченъ:

Ра́дꙋйсѧ, бж҃їѧ пала́то: ра́дꙋйсѧ, горо̀ ѡ҆сѣнѧ́ема: ра́дꙋйсѧ, кꙋпино̀ неѡпали́маѧ: ра́дꙋйсѧ, прⷭ҇то́ле сла́вы: ра́дꙋйсѧ, бжⷭ҇твеннаѧ трапе́зо: ра́дꙋйсѧ, рꙋ́чко всезлата́ѧ: ра́дꙋйсѧ, свѣ́щниче ѻ҆гнезра́чный: ра́дꙋйсѧ, ле́гкїй ѻ҆́блаче, дв҃о мт҃и марӏ́е.

На хвали́техъ стїхи̑ры на д҃, гла́съ в҃:

Кро́вными тѡ́ки тѣ́ло ѡ҆багри́въ, безбѣ́днѣ пꙋ́ть мꙋче́нїѧ проше́лъ є҆сѝ, главѣ̀ тѝ ѿсѣ́ченѣ, главы̑ де́мѡнскїѧ погꙋби́лъ є҆сѝ, страстоте́рпче а҆леѯа́ндре: тѣ́мъ и҆ крѣ́постїю бжⷭ҇твенною препоѧ́савсѧ, вра̑жїѧ и҆зсѣ́клъ є҆сѝ кознодѣ̑йства. хрⷭ҇та̀ бг҃а молѝ ѡ҆ на́съ, сп҃сти́сѧ дꙋша́мъ на́шымъ.

Торжество̀ дне́сь страстоте́рпца а҆леѯа́ндра, прїиди́те, лю́дїе, воспои́мъ: того́ бо нижѐ ме́чь, нижѐ ѻ҆́гнь, нижѐ и҆на́ѧ мꙋ́ка, нижѐ многоплетє́ннаѧ вра̑жїѧ ловлє́нїѧ побѣди́ша. и҆ къ немꙋ̀ вѣ́рою возопїи́мъ: хрⷭ҇та̀ молѝ, добромч҃ниче всесла́вне, дарова́ти на́мъ ве́лїю млⷭ҇ть.

Бг҃а не забыва́йте, глаго́леши ты̀ родны̑мъ свои̑мъ, и҆зꙿ земны́ѧ жи́зни преходѧ̀ въ вѣ́чнꙋю: ѿ ѕвѣ́рѧ не прїе́мъ поми́лованїѧ непра́ведна, бг҃ꙋ є҆ди́номꙋ слꙋжа̀, при́сныхъ же твои́хъ любѧ̀, за наро́дъ рꙋ́сскїй мо́лиши бг҃а, герма́нскомꙋ же свѣ́тъ сп҃се́нїѧ и҆спросѝ, да да́рꙋетъ гдⷭ҇ь всѣ̑мъ на́мъ ве́лїю млⷭ҇ть.

Въ темни́цѣ претерпѣва́ѧ, ѡ҆ бли́жнихъ мо́лиши бг҃а, свобо́дꙋ во хрⷭ҇тѣ̀ и҆ща̀, взира́ѧ на терпѣ́нїе наро́да своегѡ̀, и҆ вѣ́рꙋ и҆ любо́вь є҆гѡ̀ похвалѧ́ѧ, въ та́инствахъ хрⷭ҇то́выхъ наше́дъ ᲂу҆тѣше́нїе, ѿхо́диши въ вѣ́чность, на бг҃а є҆ди́наго ᲂу҆пова́ѧ. Сла́ва, гла́съ ѕ҃:

Враче́бномꙋ и҆скꙋ́сствꙋ наꙋчи́всѧ, люво́вь къ бг҃ꙋ и҆ лю́демъ не забы́въ, ше́ствовалъ є҆сѝ страда́льческимъ пꙋте́мъ, и҆ вше́лъ є҆сѝ во дворы̀ гдⷭ҇а твоегѡ̀, и҆ ꙗ҆́кѡ мч҃никъ мꙋ́жественъ, блгⷣть прїѧ́лъ є҆сѝ, цѣли́ти плотскі̑ѧ стра̑сти и҆ дꙋшє́вныѧ. и҆ на́съ, любо́вїю воспѣва́ющихъ тѧ̀, дꙋше́вныхъ болѣ́зней и҆зба́ви, къ бг҃ꙋ мл҃твами твои́ми. И҆ ны́нѣ, бг҃оро́диченъ, гла́съ то́йже:

Преложе́нїе скорбѧ́щихъ, премѣне́нїе болѧ́щихъ є҆сѝ, бцⷣе всепѣ́таѧ, сп҃сѝ странꙋ̀ на́шꙋ, и҆ бл҃говѣ̑рныѧ лю́ди є҆ѧ̀, бори́мыхъ ᲂу҆мире́нїе, ѡ҆бꙋрева́емыхъ тишина̀, є҆ди́на предста́тельнице вѣ́рныхъ.

На лїтꙋргӏ́и, бл҃жє́нна ѿ канѡ́на ст҃а́гѡ, пѣ́снь г҃ и҆ ѕ҃.

Прокӏ́менъ, гла́съ д҃: Тебє̀ ра́ди, гдⷭ҇и, ᲂу҆мерщвлѧ́еми є҆смы̀ ве́сь де́нь.

Стӏ́хъ: Вмѣни́хомсѧ ꙗ҆́кѡ ѻ҆́вцы заколе́нїѧ. А҆пⷭ҇лъ ко є҆фесе́ємъ, зача́ло сл҃г.

А҆ллилꙋ́їа, гла́съ д҃: Првⷣникъ, ꙗ҆́кѡ фӏ́нїѯъ, процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Стӏ́хъ: Насажде́ни въ домꙋ̀ гдⷭ҇ни, во дво́рѣхъ бг҃а

на́шегѡ процвѣтꙋ́тъ.Є҆ѵⷢ҇лїе ѿ і҆ѡа́нна, зача́ло н҃в.

Прича́стенъ: Ра́дꙋйтесѧ, првⷣнїи, ѡ҆ гдⷭ҇ѣ:

Мл҃тва ко ст҃о́мꙋ мч҃никꙋ а҆леѯа́ндрꙋ:

Ѽст҃ы́й мч҃ниче а҆леѯа́ндре, дне́сь всечⷭ҇тнꙋ́ю твою̀ па́мѧть пра́зднꙋюще, помина́емъ пресвѣ́тлый по́двигъ тво́й въ землѝ герма́нстѣй, ю҆́же ви́дѣлъ є҆сѝ и҆ногда̀ мра́комъ безбо́жїѧ и҆ і҆дѡлонеи́стовства ѡ҆б̾ѧ́тꙋю. Враче́бномꙋ и҆скꙋ́сствꙋ наꙋчи́всѧ, ра́достнѡ спѣши́лъ є҆сѝ на по́мощь лю́демъ средѝ вое́ннагѡ лихолѣ́тїѧ, не то́кмѡ ѿ ра́нъ плотски́хъ и҆ гла́да тѣле́снагѡ, но и҆ ѿ ра́нъ дꙋхо́вныхъ и҆ гла́да любвѐ стра́ждꙋщымъ: и҆ та́кѡ, просвѣще́нїе хрⷭ҇то́во ѿ ст҃а́гѡ креще́нїѧ въ срⷣцѣ свое́мъ носѧ̀, и҆злива́лъ є҆сѝ ѡ҆́крестъ себє̀ свѣ́тъ се́й ѻ҆би́льнѡ, да́же до мч҃ническїѧ кончи́ны ᲂу҆сѣкнове́нїѧ главы̀, всецѣ́лѡ самаго̀ себѐ хрⷭ҇тꙋ̀ прине́съ. Побѣ́дою дꙋхо́вною надꙿ безбо́жїемъ, по́двигъ сво́й съ по́двигомъ ст҃ы́хъ рѡссӏ́йскихъ новомч҃никѡвъ и҆ и҆сповѣ́дникѡвъ слїѧ́въ, са́мъ ꙗ҆́кѡ дрꙋ́гъ хрⷭ҇то́въ въ со́нмѣ новомч҃никѡвъ просїѧ́лъ є҆сѝ, и҆ твои́ми мл҃твами, ᲂу҆ мѣ́ста страда́нїй твои́хъ и҆ погребе́нїѧ, чꙋде́снѡ свѣ́тлый хра́мъ ст҃ы́хъ новомч҃никъ и҆зрастѐ. Сегѡ̀ ра́ди со бл҃агодаре́нїемъ мо́лимъ тѧ̀: моли́сѧ хрⷭ҇тꙋ̀ бг҃ꙋ, да и҆зба́витъ ѿ бѣ́дъ люби̑мыѧ тобо́ю страны̑, рѡссӏ́йскꙋю и҆ герма́нскꙋю, да просвѣти́тъ свѣ́томъ правосла́вїѧ люде́й, а҆́лчꙋщихъ и҆ жа́ждꙋщихъ пра́вды, и҆ на́съ немощны́хъ на по́двигъ пра́выѧ вѣ́ры ᲂу҆крѣпи́тъ, да вы́нꙋ съ тобо́ю сла́вимъ бг҃а въ трⷪ҇цѣ, ѻ҆ц҃а̀, и҆ сн҃а, и҆ ст҃а́го дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.