А҆ка́ѳїстъ прест҃ѣ́й влⷣчцѣ на́шей бцⷣѣ,

предꙿ чꙋдотво́рною і҆кѡ́ною є҆ѧ̀,

ꙗ҆́же нарица́етсѧ кꙋ́рскаѧ коренна́ѧ.

Конда́къ а҃.

Взбра́нной воево́дѣ и҆ бл҃го́й ѻ҆диги́трїи, пꙋтеводѧ́щей на́съ къ нбⷭ҇номꙋ гра́дꙋ, прїиди́те, припаде́мъ всѝ, гра́да здѣ̀ пребыва́ющагѡ не и҆мꙋ́щїи, тоѧ̀ всеси́льнагѡ застꙋпле́нїѧ просѧ́ще, чꙋдеса́ же, ѿ лѣ̑тъ дре́внихъ да́же до ны́нѣ ѿ і҆кѡ́ны є҆ѧ̀ быва́ємаѧ, помина́юще, велегла́снѡ возопїи́мъ: Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

І҆́косъ а҃.

Агг҃ли ᲂу҆диви́шасѧ, зрѧ́ще тѧ̀, влⷣчце, і҆кѡ́ною твое́ю, ꙗ҆́кѡ столпо́мъ ѻ҆́гненнымъ, на́мъ предходѧ́щꙋю въ вели́комъ и҆схо́дѣ на́шемъ и҆зꙿ землѝ, беззакѡ́нники порабоще́нныѧ: не мѡѷсе́а бо, но са́мꙋю тѧ̀ и҆́мамы пꙋтеводи́тельницꙋ въ ско́рбнѣмъ стра́нствованїи на́шемъ. Тѣ́мже тѝ бл҃года́рнѣ зове́мъ: Ра́дꙋйсѧ, бл҃гослове́ннаѧ ѻ҆диги́трїе: ра́дꙋйсѧ, и҆́стиннагѡ пꙋтѝ мт҃и. Ра́дꙋйсѧ, сквозѣ̀ пꙋсты́ню мӏ́ра сегѡ̀ на́съ провожда́ющаѧ: ра́дꙋйсѧ, а҆мали́ка мы́сленнаго пресла́внѡ побѣжда́ющаѧ. Ра́дꙋйсѧ, и҆сто́чники блгⷣти ѿ і҆кѡ́ны твоеѧ̀ и҆сточа́ющаѧ: ра́дꙋйсѧ, зако́нъ сн҃а твоегѡ̀, хрⷭ҇та̀ бг҃а на́шегѡ, на скрижа́лехъ срⷣцъ на́шихъ написꙋ́ющаѧ. Ра́дꙋйсѧ, зно́емъ страсте́й пали́мыхъ блгⷣтное ѡ҆кропле́нїе: ра́дꙋйсѧ, и҆знемога́ющихъ всемо́щное ᲂу҆крѣпле́нїе. Ра́дꙋйсѧ, срⷣцъ смѧте́нныхъ тиша́йшаѧ ᲂу҆сла́до: ра́дꙋйсѧ, стра́нныхъ и҆ си́рыхъ бжⷭ҇твеннаѧ ѿра́до. Ра́дꙋйсѧ, зе́млю ѡ҆бѣтова́ннꙋю на́мъ прїꙋготовлѧ́ющаѧ: ра́дꙋйсѧ, нбⷭ҇нагѡ і҆ерⷭ҇ли́ма врата̀ на́мъ ѿверза́ющаѧ.

Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

Конда́къ в҃.

Ви́дѣхомъ, ви́дѣхомъ вы́нꙋ чꙋдеса̀ и҆ зна́мєнїѧ твоѧ̑, влⷣчце, и҆сповѣ́дꙋемъ млⷭ҇ть, не таи́мъ бл҃годѣѧ́нїй твои́хъ, ѻ҆ба́че велегла́снѡ вопїе́мъ: А҆ллилꙋ́їа.

І҆́косъ в҃.

Ра́зꙋмъ бж҃їй кто̀ пости́же, и҆ та́йнꙋ сꙋде́бъ є҆гѡ̀ кто̀ повѣ́сть; Возво́дитъ бо и҆ низво́дитъ, смирѧ́етъ и҆ возно́ситъ, поража́етъ и҆ и҆сцѣлѧ́етъ, и҆ кто̀ бы́сть совѣ́тникъ є҆мꙋ̀; Тѣ́мже и҆ на́съ, грѣ̑хъ на́шихъ ра́ди, смирѝ, и҆ ца́рство на́ше низложѝ, сы́ны на́шѧ по всемꙋ̀ лицꙋ̀ землѝ разсѣ́ѧвъ. Къ комꙋ̀ ѹ҆́бѡ прибѣ́гнемъ въ ско́рби на́шей, къ комꙋ̀ рꙋ́цѣ простре́мъ, а҆́ще не къ тебѣ̀, всебл҃га́ѧ; ѻ҆ба́че срⷣцемъ сокрꙋше́ннымъ вопїе́мъ тѝ такова̑ѧ: Ра́дꙋйсѧ, сн҃а твоего̀ за на́съ ᲂу҆молѧ́ющаѧ: ра́дꙋйсѧ, првⷣный гнѣ́въ бж҃їй ᲂу҆толѧ́ющаѧ. Ра́дꙋйсѧ, беззако́нїй на́шихъ ѡ҆чище́нїе: ра́дꙋйсѧ, грѣ̑шнымъ хода́таице проще́нїѧ. Ра́дꙋйсѧ, свѣти́льникъ ᲂу҆пова́нїѧ неме́ркнꙋщїй на́мъ возже́гшаѧ: ра́дꙋйсѧ, во и҆схо́дѣ и҆ стра́нствованїи на́шемъ і҆кѡ́ною твое́ю на́мъ предте́кшаѧ. Ра́дꙋйсѧ, всѧ̑ разсѣ̑ѧннаѧ во є҆ди́но собира́ющаѧ: ра́дꙋйсѧ, ѡ҆мофо́ромъ твои́мъ свѣтоѡбра́знымъ всѧ̑ покрыва́ющаѧ. Ра́дꙋйсѧ, раздо́ры и҆ нестроє́нїѧ ᲂу҆мирѧ́ющаѧ: ра́дꙋйсѧ, совѣ́ты нечести́выхъ разорѧ́ющаѧ. Ра́дꙋйсѧ, пла́вающихъ въ жите́йстѣмъ мо́ри ѡ҆кормлѧ́ющаѧ: ра́дꙋйсѧ, попече́нїемъ твои́мъ ни є҆ди́нагѡ же ѡ҆ставлѧ́ющаѧ. Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

Конда́къ г҃.

Си̑лы тобо́ю дѣ́ютсѧ, и҆ блгⷣть ѿ чⷭ҇тны́ѧ і҆кѡ́ны твоеѧ̀ неѡскꙋ́днѡ и҆злива́етсѧ, пребл҃гослове́ннаѧ дв҃о, всѧ̑ подвиза́ющи ѡ҆ тебѣ̀ вопи́ти: А҆ллилꙋ́їа.

І҆́косъ г҃.

Имꙋ́щи млⷭ҇рдїе неизрече́нное, та́мѡ блгⷣть твою̀ возсїѧва́еши, всебл҃га́ѧ, и҆дѣ́же тьма̀ ѡ҆гꙋстѣва́етъ, и҆ скѡ́рби прїꙋмножа́ютсѧ, тѣ́мже не ѡ҆ста́вила є҆сѝ на́съ си́рыхъ, ѻ҆ба́че во і҆кѡ́нѣ твое́й къ на́мъ, ᲂу҆бѡ́гимъ, пришла̀ є҆сѝ, сла́вѧщымъ твоѐ снизхожде́нїе, и҆ вопїю́щымъ си́це: Ра́дꙋйсѧ, чꙋде́съ мо́ре: ра́дꙋйсѧ, млⷭ҇ти пꙋчи́но. Ра́дꙋйсѧ, блгⷣти приснотекꙋ́щїй и҆сто́чниче: ра́дꙋйсѧ, и҆сцѣле́нїй кла́дѧзю неисчерпа́емый. Ра́дꙋйсѧ, є҆стества̀ ᲂу҆ста́вы побѣжда́ющаѧ: ра́дꙋйсѧ, зако́ны є҆сте́ствєнныѧ премѣни́вшаѧ. Ра́дꙋйсѧ, скѡ́рби на́шѧ на ра́дость прелага́ющаѧ: ра́дꙋйсѧ, пла́чь и҆ стена́нїе въ весе́лїе дꙋхо́вное претворѧ́ющаѧ. Ра́дꙋйсѧ, ѡ҆ѕлоблє́нїѧ и҆ бѣды̑ на по́льзꙋ на́мъ ѡ҆браща́ющаѧ: ра́дꙋйсѧ, врагѝ на́шѧ пресла́внѡ смирѧ́ющаѧ. Ра́дꙋйсѧ, ча̑ѧнїѧ врагѡ́въ посрамлѧ́ющаѧ: ра́дꙋйсѧ, пою́щыѧ тѧ̀ возвеселѧ́ющаѧ. Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

Конда́къ д҃.

Бꙋ́ри и҆скꙋше́нїй на на́съ находѧ́щей, ско́рбемъ же и҆ болѣ́знемъ на́съ посѣща́ющымъ, є҆гда̀ терпѣ́нїю въ на́съ ѡ҆скꙋдѣва́ти, и҆ дꙋ́хꙋ на́шемꙋ смꙋща́тисѧ, притеце́мъ ко ѡ҆́бразꙋ пречⷭ҇тыѧ дв҃ы, и҆ сле́зы точа́ще то́й, ѿ срⷣца возопїи́мъ: бг҃оно́снѣи рꙋ́цѣ твоѝ на́мъ простира́ющи, и҆зꙿ глꙋбины̀ ѕѡ́лъ возведи́ ны, ꙗ҆́кѡ да бл҃года́рными ᲂу҆сты̀ зове́мъ: А҆ллилꙋ́їа.

І҆́косъ д҃.

Слы́шахꙋ дре́вле лю́дїе рѡссӏ́йстїи, слꙋ́хъ ꙗ҆вле́нїѧ ст҃а́гѡ твоегѡ̀ ѡ҆́браза въ дꙋбра́вѣ кꙋ́рстѣй, и҆ те́кше къ немꙋ̀ со тща́нїемъ, ᲂу҆ми́льнѡ взыва́хꙋ: ѿкꙋ́дꙋ на́мъ сїѐ, да прїи́де къ на́мъ мт҃и гдⷭ҇а на́шегѡ; ᲂу҆зрѣ́вше же і҆кѡ́нꙋ твою̀, влⷣчце, при ко́ренѣ древе́снѣмъ лежа́щꙋю, и҆ прїе́мше ю҆̀, ꙗ҆́кѡ сокро́вище вели́кое, возопи́ша тебѣ̀, первоѡбра́знѣй: Ра́дꙋйсѧ, раю̀ свѣтлѣ́йшїй, дре́во жи́зни и҆зрасти́вый: ра́дꙋйсѧ, вертогра́де бжⷭ҇твенный, дре́во цр҃кве прозѧбы́й. Ра́дꙋйсѧ, цвѣ́те бл҃гово́нный, мӏ́ръ ве́сь ѡ҆бл҃гоꙋха́ѧй: ра́дꙋйсѧ, крӏ́не непоро́чный, вселе́ннꙋю ᲂу҆краша́ѧй.

Ра́дꙋйсѧ, лозо̀ бл҃гопло́днаѧ, вїно́мъ ᲂу҆миле́нїѧ всѣ́хъ напои́вшаѧ: ра́дꙋйсѧ, розго̀ ѡ҆сщ҃е́ннаѧ, плоды̑ сла́достными ро́дъ человѣ́ческїй напита́вшаѧ. Ра́дꙋйсѧ, ко́реню домострои́тельства бж҃їѧ: ра́дꙋйсѧ, сп҃се́нїѧ на́шегѡ ве́рше и҆ глави́зно. Ра́дꙋйсѧ, ѕлы̑ѧ на́шѧ стра̑сти и҆зꙿ ко́рене посѣка́ющаѧ: ра́дꙋйсѧ, добродѣ́телей са́дъ насажда́ющаѧ. Ра́дꙋйсѧ, дѡ́брыѧ ѻ҆бы̑чаи въ на́съ вкоренѧ́ющаѧ: ра́дꙋйсѧ, прича́стники ра́йскїѧ жи́зни бы́ти на́съ сподоблѧ́ющаѧ. Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

Конда́къ є҃.

Бг҃оте́чнѣй ѕвѣздѣ̀ подо́бѧщисѧ, і҆кѡ́на твоѧ̀ чⷭ҇тна́ѧ, гпⷭ҇жѐ, зе́млю рꙋ́сскꙋю и҆ гра́ды є҆ѧ̀ ѡ҆бтека́ше, ца́рїе се́й бл҃гоговѣ́йнѡ покланѧ́хꙋсѧ, цари́цы любо́вїю тꙋ̀ бл҃гоꙋкраша́хꙋ, а҆рхїерє́и стра́хомъ срѣта́хꙋ, вѣ́рныхъ же мно́жєства, дх҃о́внѡ торжествꙋ́юще, вопїѧ́хꙋ: А҆ллилꙋ́їа.

І҆́косъ є҃.

Ви́дѧще безбо́жникѡвъ безꙋ́мный совѣ́тъ і҆кѡ́нꙋ твою̀, пречⷭ҇таѧ, разори́ти, ѿ тебє̀, дв҃о, посра́мленный, и҆ ѡ҆брѣ́тше ѡ҆́бразъ тво́й ст҃ы́й, ѿ всѧ́кагѡ дѣ́йства сокрꙋши́тельна невреди́мь, мона́си и҆ мїрстӏ́и со стра́хомъ и҆ любо́вїю возопи́ша тѝ сицева̑ѧ: Ра́дꙋйсѧ, крѣ́посте несокрꙋши́маѧ: ра́дꙋйсѧ, стѣно̀ нерꙋши́маѧ. Ра́дꙋйсѧ, лю́тыхъ безбо́жникѡвъ совѣ́тъ посрами́вшаѧ: ра́дꙋйсѧ, ча̑ѧнїѧ врагѡ́въ ѡ҆сꙋети́вшаѧ. Ра́дꙋйсѧ, хꙋли́телей ᲂу҆ста̀ загради́вшаѧ: ра́дꙋйсѧ, і҆кѡ́нꙋ твою̀ ст҃ꙋ́ю невреди́мꙋ сохра́ньшаѧ. Ра́дꙋйсѧ, ѿ рꙋкѝ ѕлодѣ́йскїѧ сїю̀ соблю́дшаѧ: ра́дꙋйсѧ, ѻ҆́чи твоѝ ѿ скве́рныхъ дѣ́лъ человѣ́ческихъ ѿврати́вшаѧ. Ра́дꙋйсѧ, лица̀ твоегѡ̀ пречⷭ҇тагѡ ѿ на́съ ᲂу҆бо́гихъ не ѿвраща́ющаѧ: ра́дꙋйсѧ, и҆зꙿ рꙋкѝ дїа́воли грѣ̑шныѧ и҆схища́ющаѧ. Ра́дꙋйсѧ, проще́нїе ка́ющымсѧ возсїѧва́ющаѧ: ра́дꙋйсѧ, двє́ри млⷭ҇рдїѧ бж҃їѧ хода́тайствомъ твои́мъ ѿверза́ющаѧ.

Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

Конда́къ ѕ҃.

Проповѣ́дꙋетъ мӏ́ръ ве́сь млⷭ҇ти, ѿ і҆кѡ́ны твоеѧ̀ и҆злива́ємыѧ, всецр҃и́це: ѿне́лѣже бо и҆зшла̀ є҆сѝ то́ю и҆зꙿ землѝ рꙋ́сскїѧ, нѣ́сть гра́дъ, нижѐ ве́сь, въ ни́хже не бѣ̀ ꙗ҆влѧ́ема си́ла твоѧ̀. Тѣ́мже ѿ всѣ́хъ ꙗ҆зы̑къ сп҃се́ннїи тобо́ю вопїю́тъ бл҃года́рнѣ бг҃ꙋ: А҆ллилꙋ́їа.

І҆́косъ ѕ҃.

Возсїѧ̀ и҆ на́мъ па́ки свѣ́тъ ᲂу҆пова́нїѧ, бцⷣе пречⷭ҇таѧ, зарю̀ сп҃се́нїѧ мӏ́рꙋ возвѣсти́вшаѧ во твое́мъ ржⷭ҇твѣ̀. Не преда́ждь на́съ до конца̀ въ рꙋ́цѣ врагѡ́въ на́шихъ, и҆ совѣ́ты нечести́выхъ и҆ лю́тыхъ ѿстꙋ́пникѡвъ ско́рѡ разорѝ. Да бꙋ́детъ и҆ страна̀ на́ша рѡссӏ́йскаѧ, ꙗ҆́коже дре́вле, до́мъ тво́й, да процвѣте́тъ въ не́й бл҃гочⷭ҇тїе, ст҃ы̑ѧ ѻ҆би́тєли и҆ хра́мы да бл҃гоꙋкрасѧ́тсѧ, лю́дїе же, ѿ лю́тыхъ безбо́жникѡвъ и҆зба́вльшесѧ, да торжествꙋ́ютъ съ весе́лїемъ, сла́вѧще твоѐ застꙋпле́нїе, и҆ зовꙋ́ще тѝ такова̑ѧ: Ра́дꙋйсѧ, любо́вїю твое́ю всемꙋ̀ мӏ́рꙋ возсїѧ́вшаѧ: ра́дꙋйсѧ, и҆зꙿ ѹ҆́стъ бжⷭ҇твенныхъ сн҃а твоегѡ̀ всыновле́нїе ро́да человѣ́ческагѡ прїѧ́вшаѧ. Ра́дꙋйсѧ, мт҃и бж҃їѧ и҆ мт҃и правосла̑внымъ хрⷭ҇тїа́нѡмъ: ра́дꙋйсѧ, недꙋ́гѡвъ ѿѧ́тїе и҆ цѣли́тельнице ра́намъ. Ра́дꙋйсѧ, въ темни́цахъ сꙋ́щихъ незаходи́мый свѣ́те: ра́дꙋйсѧ, ѹ҆́зникѡвъ ѿра́до и҆ простра́нство клѣ́тей: Ра́дꙋйсѧ, за пра́вдꙋ гони́мыхъ дерзнове́нїе: ра́дꙋйсѧ, за вѣ́рꙋ стра́ждꙋщихъ терпѣ́нїе. Ра́дꙋйсѧ, мч҃никѡвъ вѣнча́нїе: ра́дꙋйсѧ, мꙋчи́телей гро́зное воздаѧ́нїе. Ра́дꙋйсѧ, свѧ́знємъ ѹ҆́зы разрѣша́ющаѧ: ра́дꙋйсѧ, тѣ́ломъ и҆ дꙋше́ю плѣне́нныхъ свобожда́ющаѧ. Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

Конда́къ з҃.

Хотѧ́щꙋ првⷣномꙋ сꙋдїѝ и҆ бг҃ꙋ, человѣ́ки, того̀ забыва́ющыѧ, вразꙋми́ти, попꙋстѝ бра́немъ вє́лїимъ на землѝ воздви́гнꙋтисѧ: ꙗ҆зы́цы бо смѧто́шасѧ, и҆ ца̑рства поколеба́шасѧ, сме́рть и҆ ѹ҆́жасъ по лицꙋ̀ землѝ проидо́ша, пла́чь и҆ стена́нїе воздꙋ́хъ ѡ҆гласѝ. Тогда̀ ᲂ҆̀убо всѝ, и҆̀же на тѧ̀ ᲂу҆пова́нїе возложи́ша, бцⷣе, ко ѡ҆́бразꙋ твоемꙋ̀ ᲂу҆се́рднѡ притека́хꙋ, и҆ ѿ тебє̀ є҆ди́ныѧ сп҃се́нїѧ ча́юще, бг҃ꙋ, да́вшемꙋ тѧ̀ лю́демъ застꙋ́пницꙋ, вопїѧ́хꙋ:

А҆ллилꙋ́їа.

І҆́косъ з҃.

Нѡ́ваѧ зна́мєнїѧ и҆ чꙋдеса̀ вє́лїѧ ꙗ҆ви́ла є҆сѝ ѿ і҆кѡ́ны твоеѧ̀ чⷭ҇тны́ѧ, бг҃омт҃и, є҆гда̀ ᲂу҆слы́шахомъ гла́съ бра́ни. Градѡ́мъ бо горѧ́щымъ, и҆ землѝ трѧсꙋ́щейсѧ, черто́гѡмъ разрꙋша́ємымъ, и҆ прꙋгѡ́мъ воздꙋ́хъ и҆сполнѧ́ющымъ, соблюла̀ є҆сѝ цр҃ковь, въ не́йже ѡ҆́бразъ тво́й, всецр҃и́це, пребыва́ше, невреди́мꙋ: вси́ же въ не́й молѧ́щїисѧ, чꙋ́до ви́дѧще, є҆ди́ными ᲂу҆сты̀ возопи́ша тѝ такова̑ѧ: Ра́дꙋйсѧ, держа́внаѧ воево́до: ра́дꙋйсѧ, на ню́же ᲂу҆пова́ютъ вси̑ ро́ди. Ра́дꙋйсѧ, цр҃кве сто́лпе и҆ ᲂу҆твержде́нїе: ра́дꙋйсѧ, всѧ́кїѧ ст҃ы́ни защи́то и҆ ѡ҆гражде́нїе. Ра́дꙋйсѧ, побѣ́до, мӏ́ръ побѣжда́ющаѧ: ра́дꙋйсѧ, и҆ не и҆мꙋ́щыѧ ᲂу҆пова́нїѧ сп҃са́ющаѧ. Ра́дꙋйсѧ, бл҃га́ѧ послꙋ́шательнице моле́нїй прилѣ́жныхъ: ра́дꙋйсѧ, безпомо́щныхъ по́моще и҆ наде́ждо ненаде́жныхъ. Ра́дꙋйсѧ, сатанꙋ̀ по́дꙿ но́ги на́шѧ сокрꙋша́ющаѧ: ра́дꙋйсѧ, ѻ҆гню̀ и҆ стїхӏ́амъ повелѣва́ющаѧ. Ра́дꙋйсѧ, і҆кѡ́ною твое́ю на́съ ѡ҆стѣнѧ́ющаѧ: ра́дꙋйсѧ, покро́вомъ твои́мъ на́съ ѡ҆сѣнѧ́ющаѧ.

Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

Конда́къ и҃.

Стра́нное и҆ стра́шное зна́менїе ꙗ҆ви́ла є҆сѝ, всест҃а́ѧ, є҆гда̀ домѡ́мъ разрꙋша́ємымъ, хра́минꙋ ма́лꙋю, ю҆́же ѡ҆ст҃и́ла є҆сѝ пре́жде і҆кѡ́ны твоеѧ̀ пребыва́нїемъ, сохрани́ла є҆сѝ невреди́мꙋ, ста́рицꙋ же и҆ сн҃а є҆ѧ̀, въ то́й кры́ющихсѧ, цѣ́лыхъ предста́вила є҆сѝ. Тѣ́мже всѝ, зрѧ́щїи и҆ слы́шащїи сїѧ̑, ᲂу҆жаса́хꙋсѧ ѹ҆́жасомъ, стра́хомъ вопїю́ще:

А҆ллилꙋ́їа.

І҆́косъ и҃.

Ве́сь мӏ́ръ любо́вїю твое́ю бг҃оподо́бною ѡ҆б̾е́млеши, приснодв҃о, бли̑жнѧѧ и҆ да̑льнѧѧ посѣща́ющи, и҆ всю̀ поднебе́снꙋю і҆кѡ́ною твое́ю приснопокланѧ́емою ѡ҆бтека́ющи. Тѣ́мже ѿ востѡ́къ да́же до за̑падъ ше́ствїе твоѐ бы́сть, да всѝ невозбра́ннѡ къ то́й припа́даютъ, тебѣ́ же первоѡбра́знѣй припѣва́ютъ сицева̑ѧ: Ра́дꙋйсѧ, всѣ́хъ ра́достей ра́досте: ра́дꙋйсѧ, ча́ше неꙋпива́емаѧ сла́дости. Ра́дꙋйсѧ, ны́нѣшнѧгѡ вѣ́ка ско́рбнагѡ ᲂу҆тѣше́нїе: ра́дꙋйсѧ, бꙋ́дꙋщїѧ жи́зни наслажде́нїе.

Ра́дꙋйсѧ, веселѧ́щихсѧ на нб҃сѝ, на́съ ра́ди, ѡ҆ставлѧ́ющаѧ: ра́дꙋйсѧ, къ землѝ многоско́рбнѣй и҆ многобѣ́дствꙋющей приника́ющаѧ. Ра́дꙋйсѧ, со і҆кѡ́ною твое́ю бл҃года́тными стопа́ми неви́димѡ въ до́мы на́шѧ входѧ́щаѧ: ра́дꙋйсѧ, бл҃гослове́нїе и҆ ра́дованїе тѣ́мъ приносѧ́щаѧ.

Ра́дꙋйсѧ, кє́ллїи мона́шєскїѧ ѡ҆́бразомъ твои́мъ чⷭ҇тны́мъ ѡ҆сщ҃а́ющаѧ: ра́дꙋйсѧ, клѣ̑ти ᲂу҆бѡ́гїѧ па́че пала́тъ ца́рскихъ тѣ́мъ ᲂу҆краша́ющаѧ. Ра́дꙋйсѧ, хра́мы бж҃їи ли́комъ твои́мъ прест҃ы́мъ ѡ҆блиста́ющаѧ: ра́дꙋйсѧ, въ жили́щахъ чтꙋ́щихъ тѧ̀ незри́мѡ пребыва́ющаѧ.

Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

Конда́къ ѳ҃.

Всѧ́къ во́зрастъ и҆ всѧ́къ чи́нъ притека́етъ къ тебѣ̀, бг҃оневѣ́сто влⷣчце, всѣ̑мъ бо простє́рты сꙋ́ть бг҃оно́снѣи твоѝ рꙋ́цѣ, всѣ̑мъ всѧ̑ подае́ши незави́стнѡ, всѧ̑ свѣ́тлиши и҆ ᲂу҆тѣша́еши, всецр҃и́це. Тѣ́мже ѡ҆ тебѣ̀ веселѧ́щесѧ, вопїе́мъ бг҃ꙋ: А҆ллилꙋ́їа.

І҆́косъ ѳ҃.

Вѣті̑и многовѣща́ннїи ᲂу҆вѧдо́ша, и҆ ри́тори бл҃гоглаго́ливїи и҆знемого́ша, по до́лгꙋ тѧ̀ просла́вити хотѧ́щїи, мрӏ́е бцⷣе, недоꙋмѣ́етъ бо всѧ́къ ѹ҆́мъ, бл҃гохвали́ти тѧ̀ по достоѧ́нїю, ѻ҆ба́че а҆́ще мы̀ ᲂу҆мо́лкнемъ, ка́менїе возопїе́тъ. Тѣ́мже, а҆́ще и҆ недосто́йни сꙋ́ще, бре́нными ᲂу҆сты̀ дерза́емъ взыва́ти тѝ такова̑ѧ: Ра́дꙋйсѧ, прⷪ҇ро́кѡвъ ѻ҆гнедх҃нове́нный глаго́ле: ра́дꙋйсѧ, а҆пⷭ҇лѡвъ про́повѣде неꙋмолка́емаѧ. Ра́дꙋйсѧ, прпⷣбныхъ серде́чное пѣ́нїе: ра́дꙋйсѧ, и҆сповѣ́дникѡвъ крѣ́посте и҆ дерзнове́нїе. Ра́дꙋйсѧ, молча́льникѡвъ тайнолѣ́пнаѧ бесѣ́до: ра́дꙋйсѧ, ри́торѡвъ и҆ бг҃опроповѣ́дникѡвъ злата̑ѧ ᲂу҆ста̀. Ра́дꙋйсѧ, на стра̑сти подвиза́ющихсѧ превознесе́ннаѧ награ́до: ра́дꙋйсѧ, всѣ́хъ првⷣникѡвъ бжⷭ҇твеннаѧ ѿра́до. Ра́дꙋйсѧ, ма́терей сла́во и҆ дѣ́вства похвало̀: ра́дꙋйсѧ, ста́рцєвъ поко́е и҆ ю҆́ныхъ води́тельнице. Ра́дꙋйсѧ, а҆да́ма сме́ртнагѡ дщѝ, бг҃ꙋ же роди́тельнице: ра́дꙋйсѧ, сла́вою неизрече́нною бли́зъ бг҃а сїѧ́ющаѧ. Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

Конда́къ і.

Сп҃сти́сѧ мӏ́рꙋ те́плѣ помоли́сѧ, бцⷣе, по́мощи бо твоеѧ̀ тре́бꙋетъ, сѣ́темъ лꙋка́вагѡ по всемꙋ̀ лицꙋ̀ землѝ распростє́ртымъ, ꙗ҆зы́кѡмъ же шата́ющымсѧ, и҆ бꙋ́рѧмъ напа́стей на цр҃ковь бж҃їю воздвиза́ємымъ: тѣ́мже, ꙗ҆́коже въ ка́нѣ галїле́йстѣй и҆ногда̀, рцы̀ сло́во сн҃ꙋ твоемꙋ̀ и҆ бг҃ꙋ, да во́дꙋ и҆скꙋше́нїй же и҆ скорбе́й въ вїно̀ ᲂу҆миле́нїѧ и҆ весе́лїѧ бжⷭ҇твеннагѡ претвори́тъ, да пое́мъ є҆мꙋ̀ вы́нꙋ: А҆ллилꙋ́їа.

І҆́косъ і.

Стѣна̀ неѡбори́маѧ на́мъ бꙋ́ди, всенепоро́чнаѧ, сопроти́въ ѡ҆полче́нїй ви́димыхъ и҆ неви́димыхъ вра̑гъ, держа́внѡ по на́съ побора́ющи, любо́вїю вопїю́щихъ тѝ такова̑ѧ: Ра́дꙋйсѧ, бг҃оно́снѣи рꙋ́цѣ твоѝ ѡ҆ на́съ къ бг҃ꙋ при́снѡ воздвиза́ющаѧ: ра́дꙋйсѧ, дꙋхѡ́въ ѕло́бы подꙿ но́ги на́шѧ покарѧ́ющаѧ. Ра́дꙋйсѧ, кнѧ́зѧ тьмы̀ хитросплетє́нныѧ совѣ́ты посрамлѧ́ющаѧ: ра́дꙋйсѧ, тꙋ́чи помыслѡ́въ дх҃омъ бж҃їимъ развѣва́ющаѧ. Ра́дꙋйсѧ, ᲂу҆ны́нїе ѿ на́съ ѿгонѧ́ющаѧ: ра́дꙋйсѧ, треволнє́нїѧ житє́йскаѧ смирѧ́ющаѧ. Ра́дꙋйсѧ, бꙋ́рѧмъ напа́стей повелѣва́ющаѧ: ра́дꙋйсѧ, ѡ҆бꙋрева́емыхъ блⷣгтнѡ ѡ҆кормлѧ́ющаѧ. Ра́дꙋйсѧ, и҆зꙿ глꙋбины̀ ѕѡ́лъ и҆звлача́ющаѧ: ра́дꙋйсѧ, погиба́ющымъ дла̑ни млⷭ҇тивнѡ простира́ющаѧ. Ра́дꙋйсѧ, но́ги на́шѧ на пꙋ́ть сп҃се́нїѧ наставлѧ́ющаѧ: ра́дꙋйсѧ, рꙋ́цѣ на́шѧ во бране́хъ ᲂу҆крѣплѧ́ющаѧ. Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

Конда́къ а҃і.

Пѣ̑нїѧ на̑ша, ꙗ҆́коже сн҃ъ тво́й вдови́чꙋ ле́птꙋ, прїимѝ, всест҃а́ѧ, и҆ пода́ждь на́мъ всегда̀ тебѣ̀ сїѧ̑ приноси́ти, живо́тъ на́шъ въ мӏ́рѣ ᲂу҆правлѧ́ющи, и҆ грѣхѡ́мъ проще́нїе да́рꙋющи, ꙗ҆́кѡ да въ нбⷭ҇ныѧ ѻ҆би́тєли вше́дше, воскли́кнемъ бг҃ꙋ: А҆ллилꙋ́їа.

І҆́косъ а҃і.

Свѣтоѡбра́зный ѡ҆мофо́ръ тво́й, всебл҃га́ѧ, надꙿ земле́ю на́шею неви́димѡ прострѝ, нече́стїѧ безлꙋ́ннꙋю но́щь прогонѧ́ющи, зарю́ же пакибытїѧ̀ возсїѧва́ющи, да въ ра́дости немо́лчнѡ зове́мъ: Ра́дꙋйсѧ, вои́стиннꙋ въ сл҃нце ѡ҆блече́ннаѧ: ра́дꙋйсѧ, вѣнце́мъ ѿ ѕвѣ́здъ ᲂу҆вѧзе́ннаѧ. Ра́дꙋйсѧ, рѧ́сны златы́ми преиспещре́ннаѧ: ра́дꙋйсѧ, красото̀ неизрече́ннаѧ. Ра́дꙋйсѧ, свѣ́тлосте, денни́цы свѣтлѣ́йшаѧ: ра́дꙋйсѧ, теплото̀, со́лнца любе́знѣйшаѧ. Ра́дꙋйсѧ, зарни́це бꙋ́дꙋщагѡ вѣ́ка: ра́дꙋйсѧ, свѣ́те невече́рнїй а҆́гг҃лѡвъ и҆ человѣ́кѡвъ. Ра́дꙋйсѧ, тє́мныѧ де́мѡнскїѧ полкѝ дале́че ѿгонѧ́ющаѧ: ра́дꙋйсѧ, невѣ́рїѧ тьмꙋ̀ просвѣща́ющаѧ. Ра́дꙋйсѧ, во ѡ҆рꙋ̑жїѧ свѣ́та на́съ ѡ҆блека́ющаѧ: ра́дꙋйсѧ, ст҃ы́не, цвѣ̑ты всѣ́хъ добродѣ́телей бл҃гоꙋхаю́щаѧ. Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

Конда́къ в҃і.

Блⷣгть возꙿ блⷣгть ѿ і҆кѡ́ны твоеѧ̀ прїѧ́хомъ, бцⷣе пречⷭ҇таѧ: никто́же бо, съ вѣ́рою притека́ѧй къ то́й, то́щь ѿхо́дитъ, но кӏ́иждо по потре́бѣ свое́й да́ръ бжⷭ҇твенный прїе́млетъ, и҆ ра́достїю вѣнча́етсѧ, вопїѧ̀ къ бг҃ꙋ: А҆ллилꙋ́їа.

І҆́косъ в҃і.

Пое́мъ тѧ̀, велича́емъ тѧ̀, покланѧ́емъ ти сѧ, гпⷭ҇же пречⷭ҇таѧ, сы́тости похва́лъ твои́хъ ѿню́дь не зна́юще, и҆ припа́дающе предꙿ чⷭ҇тны́мъ твои́мъ ѡ҆́бразомъ, ᲂу҆ми́льнѡ взыва́емъ тѝ си́це: Ра́дꙋйсѧ, дꙋ́шъ на́шихъ сладча́йшаѧ весно̀: ра́дꙋйсѧ, серде́цъ на́шихъ свѣтлѣ́йшее ѹ҆́тро. Ра́дꙋйсѧ, высото̀ недомышлѧ́емаѧ: ра́дꙋйсѧ, сла́во неꙋвѧда́емаѧ. Ра́дꙋйсѧ, бл҃же́нство несконча́емое: ра́дꙋйсѧ, бл҃госте неизсѧка́емаѧ. Ра́дꙋйсѧ, весе́лїе неизрече́нное: ра́дꙋйсѧ, вои́стиннꙋ є҆ди́на пребл҃гослове́ннаѧ. Ра́дꙋйсѧ, превы́ше всеѧ̀ тва́ри превознесе́ннаѧ: ра́дꙋйсѧ, въ житїѝ се́мъ на́съ застꙋпа́ющаѧ. Ра́дꙋйсѧ, въ ча́съ сме́ртный вѣ̑рныѧ срѣта́ющаѧ: ра́дꙋйсѧ, ꙗ҆́кѡ и҆ на стра́шнѣмъ сꙋди́щи сп҃са́еши ны̀, на тѧ̀ ᲂу҆пова́ющыѧ. Ра́дꙋйсѧ, влⷣчце, зна́мєнїѧ млⷭ҇ти твоеѧ̀ мӏ́рꙋ при́снѡ ꙗ҆влѧ́ющаѧ.

Конда́къ г҃і.

Ѽ всепѣ́таѧ мт҃и, и҆ мт҃и всѣ̑мъ правосла̑внымъ хрⷭ҇тїа́нѡмъ, сн҃ꙋ твоемꙋ̀ и҆ бг҃ꙋ любо́вїю подража́ющи, вопїе́ши къ на́мъ млⷭ҇тивнѡ: не бо́йсѧ, ма́лое ста́до, а҆́зъ є҆́смь съ ва́ми, и҆ никто́же на вы̀. Тѣ́мже тѝ любо́вїю припа́дающе, и҆ со слеза́ми бл҃годарѧ́ще, велегла́снѡ зове́мъ: А҆ллилꙋ́їа. Три́жды. Та́же: і҆́косъ а҃, и҆ конда́къ а҃.

Мл҃тва ко прест҃ѣ́й влⷣчцѣ на́шей бцⷣѣ:

Ѽцр҃и́це нбⷭ҇наѧ! кто̀ и҆зочте́тъ вели́кое мно́жество чꙋде́съ твои̑хъ; кто̀ и҆счи́слитъ вѡ́пли мл҃твенныхъ проше́нїй, то́ки ᲂу҆миле́нныхъ сле́зъ, бл҃года́рныхъ воздыха́нїй, пролиты́хъ предꙿ і҆кѡ́ною твое́ю; Ѡ҆вѣ́ѧна ᲂ҆̀убо всѧ̑ ѻ҆на̀ ско́рбїю наро́дною, пла́чемъ ᲂу҆гнете́нныхъ, и҆ ра́достною хвало́ю ᲂу҆тѣ́шенныхъ. Припа́дахꙋ къ не́й лю́дїе, поне́сшїи а҆га́рѧнское и҆́го, пла́каше москва̀ въ смꙋ́тное вре́мѧ, взыва́ше кꙋ́рскъ въ наше́ствїе вра́жеское, и҆ска́хꙋ ю҆̀ ѻ҆те́чествїѧ лише́ннїи въ годи́нꙋ лю́тыхъ гоне́нїй: вопїѧ́ше всѧ́каѧ ѻ҆́бласть во дни̑ смертоно́сныхъ болѣ́зней и҆ бѣ́дъ, и҆ всѧ̑ скѡ́рби во дни̑ ты́ѧ на ра́дость прелага́ла є҆сѝ. Тѣ́мже и҆ ны́нѣ бл҃гословѝ зе́млю рꙋ́сскꙋю, сп҃сѝ ѿ грѣха̀, поги́бели и҆ собла́знѡвъ странꙋ̀ на́шꙋ, и҆зле́й блгⷣть на трꙋ́дъ земледѣ́льческїй, и҆ на всѧ́кое бл҃го́е начина́нїе ѻ҆бще́ственное, помѧнѝ, прест҃а́ѧ дв҃о, по и҆́мени всѣ́хъ предстоѧ́щихъ и҆ молѧ́щихсѧ, и҆ всѧ̑ лю́ди, тре́бꙋющыѧ твоегѡ̀ ᲂу҆тѣше́нїѧ, по́мощи и҆ млⷭ҇рдїѧ. Ты̀ ѹ҆́бѡ вѣ́си та̑йнаѧ серде́цъ на́шихъ: тѣ́мже всѣ̑мъ по потре́бѣ прошє́нїѧ и҆спо́лни. И҆зрѧ́днѣе же заблꙋ́ждшихъ ѡ҆братѝ къ покаѧ́нїю, на́съ же всѣ́хъ ᲂу҆мꙋдрѝ свѣ́томъ є҆ѵⷢ҇льскїѧ любвѐ и҆ до́брыхъ дѣ́лъ. А҆рхїпа̑стыри, и҆ па̑стыри, и҆ всѧ̑ вѣ̑рныѧ въ правосла́вїи до сме́рти твє́рды покажѝ, въ црⷭ҇тво нбⷭ҇ное ᲂу҆пра́ви, и҆ со хрⷭ҇то́мъ жи́ти сотворѝ, во вѣ́ки вѣкѡ́въ. А҆ми́нь.

Мл҃тва и҆на́ѧ:

Цр҃и́це на́ша пребл҃га́ѧ, наде́ждо на́ша бцⷣе, прїѧ́телище си́рыхъ, и҆ стра́нныхъ предста́тельнице, скорбѧ́щихъ ра́досте, ѡ҆би́димыхъ покрови́тельнице! зри́ши на́шꙋ бѣдꙋ̀, зри́ши на́шꙋ ско́рбь: помозѝ на́мъ, ꙗ҆́кѡ немощны̑мъ, ѡ҆кормѝ на́съ, ꙗ҆́кѡ стра́нныхъ: ѡ҆би́дꙋ на́шꙋ вѣ́си, разрѣшѝ тꙋ̀, ꙗ҆́кѡ во́лиши: и҆зба́ви ѻ҆те́чествїе на́ше ѿ наслѣ́дїѧ го́рькагѡ мꙋчи́тельства лю́тыхъ безбѡ́жникъ: сп҃сѝ и҆ сохранѝ рабы̑ твоѧ̑, и҆ всѣ́хъ на́съ, здѣ̀ предстоѧ́щихъ и҆ молѧ́щихсѧ, и҆ покры́й на́съ ѿ всѧ́кагѡ ѕла̀ чⷭ҇тны́мъ твои́мъ ѡ҆мофо́ромъ. Ꙗ҆́кѡ не и҆́мамы и҆ны́ѧ по́мощи, ра́звѣ тебє̀, ни и҆ны́ѧ предста́тельницы, ни бл҃гӏ́ѧ ᲂу҆тѣ́шительницы, то́кмѡ тебѐ, Ѽ бг҃омт҃и, ꙗ҆́кѡ да сохрани́ши на́съ, и҆ покры́еши во вѣ́ки вѣкѡ́въ. А҆ми́нь.