А҆ка́ѳїстъ ст҃и́телю і҆ѡа́ннꙋ, а҆рхїепⷭ҇скопꙋ шанха́йскомꙋ и҆ са́нъ франци́сскомꙋ, чꙋдотво́рцꙋ.

Конда́къ а҃.

Избра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, всемꙋ̀ мӏ́рꙋ и҆сточа́ѧй ѻ҆би̑льныѧ стрꙋи̑ дꙋхо́внагѡ наставле́нїѧ и҆ ди́вныхъ чꙋде́съ мно́жество, восхвалѧ́емъ тѧ̀ съ любо́вїю и҆ зове́мъ тѝ: Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

І҆́косъ а҃.

Агг҃ла ѻ҆́бразомъ ꙗ҆́вѝ тебѐ въ послѣ̑днѧѧ времена̀ всеѧ̀ тва́ри созда́тель, да съ млⷭ҇тїю бж҃їею пече́шисѧ ѡ҆ лю́дехъ земны́хъ. взира́юще же на добродѣ́тєли твоѧ̑, пребл҃же́нне і҆ѡа́нне, вопїе́мъ тѝ си́це: Ра́дꙋйсѧ, съ ра́ннѧгѡ дѣ́тства бл҃гочⷭ҇тїемъ ᲂу҆краше́нный: ра́дꙋйсѧ, и҆́же со стра́хомъ и҆ тре́петомъ во́лю бж҃їю и҆спо́лнивый. Ра́дꙋйсѧ, и҆́же ꙗ҆́ви́вый блⷣгть бж҃їю въ та́йныхъ бл҃годѣѧ́нїихъ: ра́дꙋйсѧ, бы́строе дале́че сꙋ́щихъ стра́ждꙋщихъ ᲂу҆слы́шанїе. Ра́дꙋйсѧ, любвеѻби́льное поспѣше́нїе бли̑жнимъ свои̑мъ во сп҃се́нїе: ра́дꙋйсѧ, ра́дованїе всѣ̑мъ съ вѣ́рою къ тебѣ̀ припа́дающымъ.

Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

Конда́къ в҃.

Ви́дѧще ѻ҆би́льное добродѣ́телей твои́хъ и҆злїѧ́нїе, ст҃и́телю сла́вный і҆ѡа́нне, просвѣща́емсѧ дх҃омъ, ꙗ҆́кѡ живоно́сный и҆сто́чникъ чꙋде́съ бж҃їихъ напаѧ́еши на́съ, вѣ́рнѡ вопїю́щихъ къ бг҃ꙋ:

А҆ллилꙋ́їа.

І҆́косъ в҃.

Ра́зꙋмъ и҆мѣ́ѧй преиспо́лненный любвѐ, кꙋ́пнѡ и҆ бг҃осло́вїѧ, бг҃омꙋ́дре і҆ѡа́нне, и҆ бг҃опозна́нїемъ ᲂу҆мꙋдре́нный, и҆ къ стра́ждꙋщымъ лю́демъ любо́вїю ᲂу҆краше́нный, познава́ти и҆́стиннаго бг҃а на́съ наꙋчѝ, да и҆ мы̀ во ᲂу҆миле́нїи вопїе́мъ тѝ: Ра́дꙋйсѧ, непоколеби́маѧ тверды́не и҆́стины правосла́вїѧ: ра́дꙋйсѧ, драгоцѣ́нный сосꙋ́де дх҃а ст҃а́гѡ. Ра́дꙋйсѧ, чⷭ҇тны́й ѡ҆бличи́телю невѣ́рїѧ и҆ лжеꙋче́нїѧ: ра́дꙋйсѧ, ре́вностный и҆сполни́телю за́повѣдей бж҃їихъ. Ра́дꙋйсѧ, подви́жниче не даѧ́й на ло́жи себѣ̀ ѿдохнове́нїѧ: ра́дꙋйсѧ, возлю́бленный па́стырю ста́да хрⷭ҇то́ва. Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

Конда́къ г҃.

Си́лою блⷣгти бж҃їѧ бл҃гӏ́й сиропита́тель и҆ наста́вникъ ю҆́ношамъ ҆ ꙗви́лсѧ є҆сѝ, воспитꙋ́ѧ въ стра́сѣ бж҃їемъ и҆ прїꙋготовлѧ́ѧ и҆̀хъ къ слꙋже́нїю бг҃ови. сегѡ̀ ра́ди ча̑да твоѧ̑ взира́ютъ на тѧ̀ и҆ бл҃годарѧ́ще вопїю́тъ бг҃ꙋ: А҆ллилꙋ́їа.

І҆́косъ г҃.

Имѣ́ѧше вои́стиннꙋ, ѻ҆́тче і҆ѡа́нне, съ нб҃сѐ тебѣ̀ пѣ́сни воспѣва́емѣй бы́ти, а҆ не ѿ землѝ: ка́кѡ бо кто̀ ѿ человѣ̑къ возмо́глъ бы̀ твои́хъ дѣ́лъ вели́чїе проповѣ́дати; мы́ же, приносѧ́ще бг҃ꙋ, ꙗ҆̀же и҆́мамы, вопїе́мъ тѝ си́це: Ра́дꙋйсѧ, непреста́нною мл҃твою покрыва́ѧй ча̑да твоѧ̑: ра́дꙋйсѧ, ѡ҆храни́телю ста́да твоегѡ̀ крⷭ҇тнымъ зна́менїемъ. Ра́дꙋйсѧ, любвѐ вели́кїѧ вмѣсти́лище, не взира́ѧй на ꙗ҆зы́кѡвъ разли̑чїѧ: ра́дꙋйсѧ, свѣти́льниче всесвѣ́тлый и҆ вселюби́мый. Ра́дꙋйсѧ, ѻ҆́бразе мл҃твы непреста́нныѧ и҆ млⷭ҇рдїѧ: ра́дꙋйсѧ, ᲂу҆тѣше́нїй дх҃о́вныхъ пода́телю тре́бꙋющымъ. Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

Конда́къ д҃.

Бꙋ́рею напа́стей ѡ҆долева́еми: ка́кѡ досто́йнѡ возмо́жемъ восхвали́ти чꙋдеса̀ твоѧ̑, бл҃же́нне і҆ѡа́нне; ꙗ҆́кѡ проше́лъ є҆сѝ до конє́цъ вселе́нныѧ, сп҃се́нїѧ ра́ди па́ствы твоеѧ̀ и҆ бл҃говѣствова́нїѧ є҆ѵⷢ҇лїа сꙋ́щымъ во тьмѣ̀. бл҃годарѧ́ще же бг҃а за а҆пⷭ҇льскїѧ трꙋды̀ твоѧ̑, воспѣва́емъ є҆мꙋ̀: А҆ллилꙋ́їа.

І҆́косъ д҃.

Слы́шаша бли́жнїи и҆ да́льнїи вели́чїе чꙋде́съ твои́хъ, бж҃їею млⷭ҇тїю да́же до на́шегѡ вре́мене ꙗ҆влѧ́емыхъ, тѣ́мже въ тебѣ̀ бг҃ꙋ прославлѧ́ющемꙋсѧ дивѧ́щесѧ, въ стра́сѣ вопїѧ́хꙋ: Ра́дꙋйсѧ, просвѣти́телю сꙋ́щихъ во тьмѣ̀ невѣ́рїѧ: ра́дꙋйсѧ, приведы́й люде́й твои́хъ съ восто́ка да́льнѧгѡ до за́пада. Ра́дꙋйсѧ, и҆сто́чниче чꙋде́съ и҆злива́емыхъ бг҃омъ: ра́дꙋйсѧ, съ любо́вїю вразꙋмлѧ́ѧй заблꙋ́ждшихъ. Ра́дꙋйсѧ, ско́рый ᲂу҆тѣ́шителю ка́ющихсѧ ѡ҆ грѣсѣ́хъ свои́хъ: ра́дꙋйсѧ, пꙋтевождю̀ грѧдꙋ́щихъ пꙋте́мъ пра́вымъ. Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

Конда́къ є҃.

Бг҃одарова́нный свѣ́тъ ꙗ҆ви́лсѧ є҆сѝ, бꙋ̑ри всѣ́хъ лю́тыхъ разгонѧ́ѧй, сꙋ́щихъ на ѻ҆́стровѣ ѿ ви́хрей смертоно́сныхъ мл҃твами твои́ми ѡ҆хранѧ́ѧй, ст҃и́телю і҆ѡа́нне, и҆ крⷭ҇тнымъ зна́менїемъ ѡ҆гражда́ѧй. наꙋчѝ и҆ на́съ, призыва́ющихъ тѧ̀ въ по́мощь, чꙋдотво́рче ст҃ы́й, къ бг҃ꙋ со дерзнове́нїемъ взыва́ти: А҆ллилꙋ́їа.

І҆́косъ є҃.

Ви́димъ мно́гꙋю по́мощь твою̀ въ напа́стехъ и҆ ѡ҆бстоѧ́нїихъ, пребл҃же́нне ѻ҆́тче і҆ѡа́нне, дерзнове́нный бо хода́тай предꙿ прⷭ҇то́ломъ бж҃їимъ и҆ ско́рый въ бѣда́хъ помо́щникъ є҆сѝ. тогѡ̀ ра́ди и҆ мы̀ на твоѐ предста́тельство предꙿ бг҃омъ ᲂу҆пова́емъ и҆ вопїе́мъ тѝ: Ра́дꙋйсѧ, стїхӏ́й ѡ҆па́сныхъ прогони́телю: ра́дꙋйсѧ, мл҃твою твое́ю ѿ нꙋ́ждъ и҆збавлѧ́ѧй. Ра́дꙋйсѧ, а҆́лчꙋщымъ хлѣ́ба при́сный пода́телю: ра́дꙋйсѧ, прїꙋготовлѧ́ѧй просѧ́щымъ и҆зꙿѻби́лїе. Ра́дꙋйсѧ, ᲂу҆тѣ́шителю въ ско́рбехъ сꙋ́щихъ: ра́дꙋйсѧ, мно́гихъ па́дшихъ ѿ поги́бели и҆схи́тивый. Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

Конда́къ ѕ҃.

Проповѣ́дꙋѧ сп҃се́нїе, ꙗ҆́кѡ но́вый мѡѷсе́й гꙋгни́вый ꙗ҆ви́лсѧ є҆сѝ, и҆зводѧ̀ лю́ди твоѧ̑ и҆зꙿ плѣ́на безбо́жныхъ, пребл҃же́нне і҆ѡа́нне. и҆зба́ви и҆ на́съ ѿ рабо́ты грѣхо́вныѧ и҆ врагѡ́въ неви́димыхъ, да ра́дꙋющесѧ вопїе́мъ къ бг҃ꙋ: А҆ллилꙋ́їа.

І҆́косъ ѕ҃.

Возсїѧ́въ првⷣностїю твое́ю, соверши́лъ є҆сѝ неисполни́мое, Ѽ до́брый па́стырю: преклони́лъ бо є҆сѝ вла̑сти мїрскі̑ѧ сострада́ти ѡ҆ лю́дехъ твои́хъ: тогѡ̀ ра́ди съ ни́ми кꙋ́пнѡ и҆ мы̀ бл҃года́рственнѡ вопїе́мъ тѝ: Ра́дꙋйсѧ, па́стырю до́брый, па́ствѣ твое́й, пресе́льникѡмъ, ти́хое приста́нище ᲂу҆гото́вавый: ра́дꙋйсѧ, ѡ҆ дѣ́техъ и҆ болѧ́щихъ наипа́че попече́нїе и҆мѣ́вый. Ра́дꙋйсѧ, ᲂу҆се́рднѡ тѧ̀ призыва́ющымъ вѣ́рнѡ помога́ѧй: ра́дꙋйсѧ, ꙗ҆́кѡ въ немощнѣ́мъ тѣлесѝ твое́мъ си́ла бж҃їѧ незави́стнѡ соверша́шесѧ. Ра́дꙋйсѧ, ѿрази́телю нападе́нїѧ нечести́выхъ: ра́дꙋйсѧ, помрачи́телю лжѝ и҆ проѧви́телю и҆́стины. Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

Конда́къ з҃.

Хотѧ̀ досто́йнѡ просла́вити дре́внихъ ст҃ы́хъ за́пада, ѿпа́дшагѡ ѿ и҆́стины, возстанови́лъ є҆сѝ почита́нїе и҆́хъ въ цр҃кви правосла́вной, Ѽ люби́телю ст҃ы́хъ восто́ка и҆ за́пада. дне́сь съ ни́ми на нб҃сѝ молѝ ѡ҆ на́съ, пою́щихъ на землѝ: А҆ллилꙋ́їа.

І҆́косъ з҃.

Но́ваго ви́димъ тѧ̀ и҆збра́нника бж҃їѧ, и҆́же вкꙋ́пѣ со ст҃и́тели дре́внїѧ га́ллїи ꙗ҆ви́лсѧ є҆сѝ въ послѣ̑днѧѧ времена̀ ꙗ҆́кѡ є҆ди́нъ ѿ си́хъ, вдохновлѧ́ѧ па́ствꙋ твою̀ соблюда́ти правосла́внꙋю вѣ́рꙋ, ꙗ҆́коже сӏ́и на за́падѣ и҆сповѣ́дахꙋ. сохранѝ и҆ на́съ въ вѣ́рѣ се́й пребыва́ти, вопїю́щихъ тѝ: Ра́дꙋйсѧ, но́вый марти́не въ воздержа́нїи, по́двизѣхъ и҆ чꙋдесѣ́хъ твои́хъ: ра́дꙋйсѧ, но́вый ге́рмане во и҆сповѣ́данїи твое́мъ правосла́вныѧ вѣ́ры. Ра́дꙋйсѧ, но́вый и҆ла́рїе въ бжⷭ҇твенномъ бг҃осло́вїи: ра́дꙋйсѧ, но́вый григо́рїе въ почита́нїи и҆ прославле́нїи ᲂу҆го́дникѡвъ бж҃їихъ. Ра́дꙋйсѧ, но́вый фа́ѵсте и҆́ноческимъ ᲂу҆се́рдїемъ: ра́дꙋйсѧ, но́вый кеса́рїе въ тве́рдой любвѝ ко пра́вилѡмъ цр҃кве бж҃їѧ.

Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

Конда́къ и҃.

Стра́нное видѣ́нїе предста́ ти: въ землѝ но́вѣй срѣ́тилъ є҆сѝ па́ствꙋ твою̀ бы́вшꙋю, смꙋща́емꙋ скорбьмѝ мно́гими, но ꙗ҆́кѡ ди́вный па́стырь наста́вилъ є҆сѝ ю҆̀ поꙋче́нїемъ, терпѣ́нїемъ и҆ првⷣностїю твое́ю, и҆ цр҃ковь бж҃їѧ мт҃ре, ꙗ҆́же всѣ́хъ скорбѧ́щихъ ра́дость є҆́сть, воздви́глъ є҆сѝ: мы́ же ᲂу҆дивлѧ́ющесѧ терпѣ́нїю и҆ смире́нїю твоемꙋ̀, бл҃года́рнѡ вопїе́мъ къ бг҃ꙋ: А҆ллилꙋ́їа.

І҆́косъ и҃.

Всего̀ себѐ преда́въ хрⷭ҇тꙋ̀, бы́лъ є҆сѝ дѣ́латель вїногра́да є҆гѡ̀, бг҃оно́сне ѻ҆́тче, не вѣ́далъ бо є҆сѝ поко́ѧ до конца̀ многострада́льнагѡ живота̀ твоегѡ̀. помозѝ и҆ на́мъ недосто́йнымъ въ дѣ́ланїихъ на́шихъ и҆ въ на́шемъ прилѣжа́нїи въ вѣ́рности хрⷭ҇тꙋ̀, да сла́вѧще, вопїе́мъ тѝ: Ра́дꙋйсѧ, претерпѣ́вый до конца̀ и҆ дости́гшїй сп҃се́нїѧ: ра́дꙋйсѧ, предꙿ і҆кѡ́ною бг҃омт҃ре ᲂу҆мре́ти сподо́бивыйсѧ. Ра́дꙋйсѧ, посредѣ̀ гоне́нїѧ непра́веднагѡ мꙋ́жественный пра́вды храни́телю: ра́дꙋйсѧ, соверши́вый слꙋже́нїе своѐ до конца̀ и҆ кончи́нꙋ прїе́мый сѣдѧ̀, ꙗ҆кѡ і҆ера́рхъ. Ра́дꙋйсѧ, по сме́рти ᲂу҆тѣ́шивый па́ствꙋ чꙋде́снымъ свои́мъ возвраще́нїемъ: ра́дꙋйсѧ, мно́гихъ чꙋде́съ пода́телю къ ра́цѣ твое́й съ вѣ́рою и҆ любо́вїю притека́ющымъ.

Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

Конда́къ ѳ҃.

Всѐ є҆стество̀ а҆́гг҃льское восхожде́нїемъ твоеѧ̀ дꙋшѝ въ нбⷭ҇ныѧ ѻ҆би́тєли возра́довасѧ, мы́ же дивѧ́щесѧ твои̑мъ чꙋдесє́мъ на землѝ, дѣ́йствомъ ст҃а́гѡ дх҃а ꙗ҆влѧ́ємымъ, воспѣва́емъ бг҃ꙋ:

А҆ллилꙋ́їа.

І҆́косъ ѳ҃.

Вѣтӏ́и многовѣща́ннїи не возмо́гꙋтъ и҆зꙿѡбрази́ти по достоѧ́нїю ст҃ости житїѧ̀ твоегѡ̀, Ѽ првⷣне ѻ҆́тче і҆ѡа́нне, поне́же до́мъ блⷣгти неизрече́ннагѡ бг҃а бы́лъ є҆сѝ, мы́ же не мо́жемъ ᲂу҆молча́ти, чꙋдесѝ ꙗ҆вле́нꙋ вѣ́кꙋ на́шемꙋ маловѣ́рномꙋ дивѧ́щесѧ, и҆ прославлѧ́емъ тѧ̀ си́це: Ра́дꙋйсѧ, бжⷭ҇твенныхъ наставле́нїй пала́то: ра́дꙋйсѧ, ꙗ҆́кѡ смире́ннымъ дѣ́ланїемъ а҆́гг҃лы сослꙋжи̑тели себѣ̀ сотвори́вый. Ра́дꙋйсѧ, ѡ҆брѣты́й вѣ́чное и҆ нерꙋкотво́рное жили́ще на нб҃сѣ́хъ: ра́дꙋйсѧ, враче́бнице, въ не́йже всѧ́къ недꙋ́гъ ѿ бг҃а врачꙋ́етсѧ. Ра́дꙋйсѧ, мл҃твеннагѡ по́двига храни́лище: ра́дꙋйсѧ, ѡ҆сщ҃е́нный хра́ме дх҃а ст҃а́гѡ. Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

Конда́къ і.

Сп҃стѝ хотѧ̀ мӏ́ръ, и҆́же всѣ́хъ сп҃си́тель, но́ваго ст҃а́го посла̀ на́мъ, и҆ чрезꙿ него̀ и҆зꙿ те́мныхъ глꙋби́нъ грѣхо́вныхъ воззва́ ны. слы́шаще же є҆го̀ на́съ призыва́юща, мы̀ недосто́йнїи взыва́емъ къ бг҃ꙋ: А҆ллилꙋ́їа.

І҆́косъ і.

Стѣна̀ є҆сѝ всѣ̑мъ прибѣга́ющымъ къ твоемꙋ̀ нбⷭ҇номꙋ застꙋпле́нїю, ѻ҆́тче і҆ѡа́нне, тѣ́мже и҆ на́съ ѿ де́монскихъ нападе́нїй ѡ҆гражда́й, въ бѣда́хъ и҆ нꙋ́ждахъ, стꙋжа́ющихъ на́мъ на землѝ, помога́й, да съ вѣ́рою тебѣ̀ взыва́емъ: Ра́дꙋйсѧ, ѡ҆слѣ́пшихъ прозрѣ́нїе: ра́дꙋйсѧ, си́лою мл҃твы жи́знь на сме́ртномъ ѻ҆дрѣ̀ сꙋ́щымъ подава́ѧй. Ра́дꙋйсѧ, бг҃оѿкрове́нное вразꙋмле́нїе въ смѧте́нїи и҆ сомнѣ́нїихъ сꙋ́щымъ: ра́дꙋйсѧ, сп҃си́тельнаѧ вла́го, ѡ҆роша́ющаѧ въ зно́йной печа́ли погиба́ющыхъ. Ра́дꙋйсѧ, си̑рымъ и҆ ѡ҆ста́вленнымъ ѻ҆те́ческое застꙋпле́нїе: ра́дꙋйсѧ, ст҃ы́й ᲂу҆чи́телю и҆́щꙋщихъ и҆́стины.

Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

Конда́къ а҃і.

Пѣ́нїе непреста́нное ко прест҃ѣ́й трⷪ҇цѣ, пребл҃же́нне ѻ҆́тче і҆ѡа́нне, мы́слїю, сло́вомъ и҆ добродѣ́ланїемъ прине́слъ є҆сѝ: мно́гимъ разꙋмѣ́нїемъ и҆́стинныѧ вѣ́ры бж҃їѧ повелѣ̑нїѧ ᲂу҆ѧсни́лъ є҆сѝ, вѣ́рою, наде́ждею и҆ любо́вїю наставлѧ́ѧ на́съ въ трⷪ҇цѣ є҆ди́номꙋ бг҃ꙋ воспѣва́ти: А҆ллилꙋ́їа.

І҆́косъ а҃і.

Свѣтода́тельна свѣти́льника правосла́вїѧ сꙋ́щымъ во мра́цѣ невѣ́дѣнїѧ зри́мъ тѧ̀, ста́да хрⷭ҇то́ва до́брый па́стырю. та́кѡ и҆ по ᲂу҆спе́нїи твое́мъ ꙗ҆влѧ́еши и҆́стинꙋ невѣ́дꙋщымъ є҆ѧ̀, просвѣща́ѧ дꙋ́шы вѣ́рныхъ, вопїю́щихъ тѝ такова̑ѧ: Ра́дꙋйсѧ, просвѣще́нїе мꙋ́дростїю бж҃їею сꙋ́щихъ въ невѣ́рїи: ра́дꙋйсѧ, ра́дꙋго ти́хїѧ ра́дости кро́ткихъ. Ра́дꙋйсѧ, гро́ме, ᲂу҆страша́ѧй во грѣсѣ̀ ᲂу҆по́рствꙋющихъ: ра́дꙋйсѧ, мо́лнїе, є҆́рєси пожига́ющаѧ. Ра́дꙋйсѧ, ѡ҆дожде́нїе догма́тѡвъ правосла́вїѧ: ра́дꙋйсѧ, ѡ҆роше́нїе бг҃омы́слїѧ. Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

Конда́къ в҃і.

Блⷣгть, да́ннꙋю тѝ ѿ бг҃а вѣ́дающе, сїю̀ съ бл҃гоговѣ́нїемъ и҆ бл҃года́рностїю прїе́млемъ, къ застꙋпле́нїю твоемꙋ̀ чꙋ́дномꙋ притека́юще, Ѽ всехва́льне ѻ҆́тче і҆ѡа́нне, твоѧ̑ же чꙋдеса̀ прославлѧ́юще, взыва́емъ къ бг҃ꙋ: А҆ллилꙋ́їа.

І҆́косъ в҃і.

Пою́ще хвалꙋ̀ бг҃ꙋ, нбⷭ҇ный со́нмъ ст҃ы́хъ ра́дꙋетсѧ, ꙗ҆́кѡ не ѡ҆ста́ви гдⷭ҇ь па́дшїй и҆ безвѣ́рный мӏ́ръ, но ꙗ҆ви́лъ є҆́сть всемогꙋ́щꙋю си́лꙋ свою̀ на тебѣ̀, кро́ткомъ и҆ смире́нномъ слꙋжи́телѣ, Ѽ бл҃же́нне ѻ҆́тче і҆ѡа́нне, и҆ мы̀ со всѣ́ми ст҃ы́ми ра́дꙋющесѧ, чти́мъ тѧ̀ си́це: Ра́дꙋйсѧ, но́ваѧ звѣздо̀ првⷣности, на нб҃ѣ возсїѧ́вшаѧ: ра́дꙋйсѧ но́вый прⷪ҇ро́че, по́сланный предꙿ коне́чнымъ воцаре́нїемъ ѕла̀. Ра́дꙋйсѧ, ꙗ҆́коже і҆ѡ́на ѡ҆ возме́здїи за грѣхѝ предрекӏ́й: ра́дꙋйсѧ, ꙗ҆́коже крⷭ҇ти́тель всѣ́хъ къ мл҃твѣ и҆ покаѧ́нїю призыва́вый. Ра́дꙋйсѧ, ꙗ҆́коже па́ѵелъ мно́гѡ терпѣ́вый ра́ди є҆ѵⷢ҇лїа и҆ проповѣ́данїѧ вѣ́ры: ра́дꙋйсѧ, а҆пⷭ҇ле но́вый, свои́ми чꙋдесы̀ вселѧ́ѧй въ на́съ бл҃гоговѣ́йный тре́петъ и҆ вѣ́рꙋ. Ра́дꙋйсѧ, ст҃и́телю ѻ҆́тче і҆ѡа́нне, въ бѣда́хъ ско́рый помо́щниче.

Конда́къ г҃і.

Ѽ пресвѣ́тлый и҆ преди́вный ᲂу҆го́дниче бж҃їй, ст҃и́телю ѻ҆́тче на́шъ і҆ѡа́нне, ᲂу҆тѣше́нїе всѣ̑мъ въ скорбе́хъ сꙋ́щымъ, ны́нѣшнее на́ше мл҃твенное прїимѝ приноше́нїе, да мл҃твами твои́ми ѿ гее́нны ѻ҆́гненныѧ и҆зба́вимсѧ и҆ бг҃опрїѧ́тнымъ твои́мъ хода́тайствомъ сподо́бимсѧ во вѣ́ки воспѣва́ти бг҃ꙋ: А҆ллилꙋ́їа.

Се́й конда́къ глаго́ли три́жды.

Та́же: і҆́косъ а҃, и҆ конда́къ а҃.

Мл҃тва ко ст҃и́телю і҆ѡа́ннꙋ шанха́йскомꙋ

и҆ са́нъ франци́сскомꙋ, чꙋдотво́рцꙋ:

Ѽ ст҃и́телю ѻ҆́тче на́шъ і҆ѡа́нне, па́стырю до́брый и҆ тайнови́дче дꙋ́шъ человѣ́ческихъ! ны́нѣ ᲂу҆ прⷭ҇то́ла бж҃їѧ за на́съ мо́лишисѧ, ꙗ҆́коже и҆ са́мъ посме́ртнѣ и҆зре́клъ є҆сѝ: а҆́ще и҆ ᲂу҆мро́хъ, но жи́въ є҆́смь. ᲂу҆молѝ всеще́драго бг҃а проще́нїе на́мъ во грѣсѣ́хъ дарова́ти, да бо́дреннѡ воспрѧ́немъ, и҆ бг҃ꙋ возопїе́мъ ѡ҆ дарова́нїи на́мъ дх҃а смире́нїѧ, стра́ха бж҃їѧ и҆ бл҃гочⷭ҇тїѧ во всѧ́ческихъ пꙋте́хъ жи́зни на́шеѧ, ꙗ҆́кѡ млⷭ҇тивый сиропита́тель, и҆ и҆скꙋ́сный наста́вникъ на землѝ бы́въ, ны́нѣ бꙋ́ди на́мъ пꙋтеводи́тель и҆ въ смꙋ́тахъ цр҃ко́вныхъ хрⷭ҇то́во вразꙋмле́нїе. ᲂу҆слы́ши стена́нїе смѧте́нныхъ ю҆́ношей лихолѣ́тїѧ на́шегѡ, ѡ҆бꙋрева́емыхъ бѣснова́нїемъ вселꙋка́вымъ, и҆ при́зри на ᲂу҆ны́нїе па́стырей и҆знемога́ющихъ ѿ ᲂу҆тѣсне́нїѧ тлетво́рнагѡ дх҃а мӏ́ра сегѡ̀ и҆ томѧ́щихсѧ въ нерадѣ́нїи пра́здномъ, и҆ ᲂу҆скорѝ на мл҃твꙋ, сле́знѡ вопїе́мъ тѝ, Ѽ те́плый мл҃твенниче: посѣтѝ на́съ си́рыхъ, по всемꙋ̀ лицꙋ̀ вселе́нныѧ разсѣ́ѧнныхъ и҆ во ѻ҆те́чествїи сꙋ́щихъ, во тьмѣ̀ страсте́й блꙋжда́ющихъ, но сла́бою любо́вїю ко свѣ́тꙋ хрⷭ҇то́вꙋ влекꙋ́щихсѧ и҆ ждꙋ́щихъ твоегѡ̀ ѻ҆те́ческагѡ наставле́нїѧ, да бл҃гочⷭ҇тїю навы́кнемъ и҆ наслѣ́дницы црⷭ҇твїѧ нбⷭ҇нагѡ ꙗ҆ви́мсѧ, и҆дѣ́же ты̀ пребыва́еши со всѣ́ми ст҃ы́ми, сла́вѧще гдⷭ҇а на́шегѡ і҆и҃са хрⷭ҇та̀, є҆мꙋ́же че́сть и҆ держа́ва ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Мл҃тва и҆на́ѧ:

Ѽ ст҃и́телю чꙋ́дне і҆ѡа́нне, толи́кѡ распространи́лъ є҆сѝ срⷣце своѐ, ꙗ҆́кѡ нетѣ́снѡ вмѣща́етсѧ въ не́мъ мно́жество почита́ющихъ тѧ̀ человѣ̑къ ѿ разли́чныхъ племе́нъ и҆ наро́дѡвъ. При́зри на ᲂу҆бо́жество слове́съ на́шихъ, ѻ҆ба́че ѿ любвѐ тебѣ̀ приноси́мое и҆ помозѝ на́мъ, ᲂу҆го́дниче бж҃їй, понѐ ѿны́нѣ ѡ҆чища́ти себѐ ѿ всѧ́кїѧ скве́рны пло́ти и҆ дꙋ́ха, рабо́тающе гдⷭ҇еви со стра́хомъ и҆ ра́дꙋющесѧ є҆мꙋ̀ съ тре́петомъ. И҆ что̀ возда́мы тебѣ̀ за ра́дость ѻ҆́нꙋю, ю҆́же ѡ҆щꙋти́хомъ, зрѧ́ще въ хра́мѣ ст҃ѣ́мъ мѡ́щи твоѧ̑ ст҃ы̑ѧ, и҆ прославлѧ́юще па́мѧть твою̀; Вои́стиннꙋ, не и҆́мамы чи́мъ возда́ти, то́чїю: а҆́ще на́чнемъ себѐ и҆справлѧ́ти, быва́юще но́вїи вмѣ́стѡ ве́тхихъ. Сеѧ̀ блгⷣти ѡ҆бновле́нїѧ бꙋ́ди на́мъ хода́тай, ст҃е і҆ѡа́нне, помозѝ на́мъ въ не́мощехъ, и҆сцѣлѝ бѡлѣ́зни, помозѝ въ дѣ́лѣхъ жите́йскихъ и҆ семе́йныхъ, ᲂу҆толѝ раздо́ры цр҃кѡ́вныѧ, ᲂу҆врачꙋ́й стра̑сти мл҃твами твои́ми: преста́вленный же ѿ сегѡ̀ вре́меннагѡ во и҆но́е житїѐ вѣ́чное, въ не́же наста́ви тѧ̀ пречⷭ҇таѧ влⷣчца, ѻ҆диги́трїа разсѣ́ѧнїѧ рꙋ́сскагѡ, чꙋдотво́рною свое́ю і҆кѡ́ною кореннокꙋ́рскою, є҆ѧ́же спꙋ́тникъ ты̀ ꙗ҆ви́лсѧ є҆сѝ въ де́нь преставле́нїѧ своегѡ̀, ра́дꙋешисѧ ны́нѣ въ ли́цѣ ст҃ы́хъ, сла́вѧщихъ є҆ди́наго въ трⷪ҇цѣ сла́вимаго бг҃а, ѻ҆ц҃а̀ и҆ сн҃а, и҆ ст҃а́го дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.