Приложе́нїе.

А҆ка́ѳїстъ ст҃о́мꙋ првⷣномꙋ ѻ҆тцꙋ̀ на́шемꙋ і҆ѡа́ннꙋ кроншта́дтскомꙋ, чꙋдотво́рцꙋ.

Конда́къ а҃.

Избра́нномꙋ во і҆ере́ехъ, ди́вномꙋ ᲂу҆го́дникꙋ бж҃їю і҆ѡа́ннꙋ, па́стырю и҆ ᲂу҆чи́телю, ѡ҆ царе́хъ мл҃твенникꙋ, ско́рбныхъ ᲂу҆тѣ́шителю, землѝ рѡссӏ́йскїѧ свѣ́тломꙋ свѣти́льникꙋ, всѐ житїѐ своѐ на слꙋже́нїе бг҃ꙋ и҆ бли̑жнимъ посвѧти́вшемꙋ, и҆ мно́жество грѣ́шникѡвъ на покаѧ́нїе ѡ҆брати́вшемꙋ, мнѡ́гимъ же болѧ́щымъ и҆сцѣле́нїе ᲂу҆ бг҃а и҆спроси́вшемꙋ, похвалы̑ вознесе́мъ, ꙗ҆́кѡ хода́таю на́шемꙋ и҆ ско́ромꙋ помо́щникꙋ. Ты́ же, ѻ҆́тче, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свобожда́й, да зове́мъ тѝ хвале́бнѡ: Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

І҆́косъ а҃.

Агг҃ла храни́телѧ своего̀, є҆щѐ шестолѣ́тенъ сы́й, въ свѣ́тлости неизрече́ннѣй ꙗ҆́вѣ ᲂу҆зрѣ́лъ є҆сѝ, і҆ѡа́нне, и҆́же и҆ речѐ тебѣ̀, ꙗ҆́кѡ по повелѣ́нїю гдⷭ҇ню всегда̀ неви́димѡ соприсꙋ́тствꙋетъ и҆ храни́тъ тѧ̀ ѿ всѣ́хъ ѕѡ́лъ. Тѣ́мже ѿ ю҆́ности и҆збра́нника бж҃їѧ тѧ̀ вѣ́дꙋще, взыва́емъ си́це: Ра́дꙋйсѧ, ѿ младе́нства по предꙿꙋвѣ́дѣнїю бг҃омъ и҆збра́нный: ра́дꙋйсѧ, ѿ ю҆́ности въ слꙋже́нїе є҆мꙋ̀ тогѡ̀ блгⷣтїю призва́нный. Ра́дꙋйсѧ, а҆́гг҃ла храни́телѧ твоего̀ и҆зꙿ дѣ́тства до́брыми нра̑вы весели́вый: ра́дꙋйсѧ, николи́же того̀ чи́мъ ѡ҆печа́ливый. Ра́дꙋйсѧ, ꙗ҆́кѡ незри́мый храни́тель тво́й ꙗ҆́вѣ тебѣ̀ ꙗ҆ви́сѧ: ра́дꙋйсѧ, ꙗ҆́кѡ то́й всегда̀ храни́ти тѧ̀ ѡ҆бѣща́сѧ. Ра́дꙋйсѧ, бл҃гочⷭ҇ти́выхъ роди́телей ча́до возлю́бленное: ра́дꙋйсѧ тѣ́ми и҆здѣ́тска въ стра́сѣ бж҃їемъ воспита́нный. Ра́дꙋйсѧ, воздержа́нїю ѿ ю҆́ности себѐ ѡ҆бꙋчи́вый: ра́дꙋйсѧ, во ᲂу҆бо́жествѣ и҆ нищетѣ̀ млады̑ѧ дни̑ своѧ̑ препроводи́вый. Ра́дꙋйсѧ, ꙗ҆́кѡ бл҃гонра́вїѧ твоегѡ̀ ра́ди блгⷣть бж҃їѧ ꙗ҆́вѣ на тебѣ̀ почива́ше: ра́дꙋйсѧ, ꙗ҆́кѡ та̀ лицѐ твоѐ всегда̀ бл҃гоꙋмиле́нно творѧ́ше. Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

Конда́къ в҃.

Ви́димъ тѧ̀, бг҃омꙋ́дре і҆ѡа́нне, ѿ ю҆́на во́зраста блгⷣтїю бж҃їею ѡ҆сѣне́на бы́вша, и҆ є҆́ю та́инственнѡ на добродѣ́тельное житїѐ наставлѧ́ема и҆ рꙋководи́ма. Тѣ́мже, и҆мꙋ́ще тѧ̀ во ѡ҆́бразъ на́мъ и҆ подража́нїе, ᲂу҆ми́льнѡ вопїе́мъ хрⷭ҇тꙋ̀ бг҃ꙋ: А҆ллилꙋ́їа.

І҆́косъ в҃.

Ра́зꙋмъ тво́й и҆змлада въ и҆зꙋче́нїе свѧще́нныхъ и҆ ѻ҆те́ческихъ писа́нїй ᲂу҆глꙋби́въ, і҆ѡа́нне, и҆зꙿ ни́хъ воспрїѧ́лъ є҆сѝ ѻ҆би́льнѡ во́дꙋ жи́вꙋ, ѿ и҆сто́чника ст҃а́гѡ дх҃а проистека́ющꙋю. Тѣ́мже мо́лимъ тѧ̀: ᲂу҆молѝ бл҃га́го гдⷭ҇а, да сподо́битъ прича́стники бы́ти сеѧ̀ живи́тельныѧ стрꙋѝ и҆ на́съ, взыва́ющихъ тѝ си́це: Ра́дꙋйсѧ, ѿ младе́нства чⷭ҇та себѐ ѿ страсте́й соблюды́й: ра́дꙋйсѧ, блгⷣть ст҃а́гѡ креще́нїѧ цѣ́лꙋ и҆ невреди́мꙋ сохрани́вый. Ра́дꙋйсѧ, чте́нїе бжⷭ҇твенныхъ писа́нїй ᲂу҆се́рднѡ возлюби́вый: ра́дꙋйсѧ, сокрове́нный въ ни́хъ смы́слъ пра́вѡ и҆ до́брѣ ᲂу҆разꙋмѣ́вый. Ра́дꙋйсѧ, во ᲂу҆че́нїи кни́жнѣмъ прилѣжа́нїе примѣ́рное показа́вый: ра́дꙋйсѧ, въ любомꙋ́дрїи є҆сте́ственнѣмъ и҆ дꙋхо́внѣмъ сла́внѡ преꙋспѣ́вый. Ра́дꙋйсѧ, любомꙋ́дрїемъ твои́мъ мӏ́ра пре́лєсти ско́рѡ распозна́вый: ра́дꙋйсѧ, тѣ́хъ сѣ́тей, ꙗ҆́кѡ ѻ҆ре́лъ высокопа́рный, мꙋ́дрѣ и҆збѣжа́вый. Ра́дꙋйсѧ, сѣ́верныѧ рѡссӏ́йскїѧ страны̀ чꙋ́дное и҆ свѣ́тлое воспита́нїе: ра́дꙋйсѧ, мра́ка грѣхо́внагѡ въ лю́дехъ разгна́нїе. Ра́дꙋйсѧ, всѣ̑мъ притека́ющымъ къ тебѣ̀ ско́рое вспоможе́нїе подава́ѧй: ра́дꙋйсѧ, многомо́щное на́мъ предꙿ бг҃омъ застꙋпле́нїе ꙗ҆влѧ́ѧй. Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

Конда́къ г҃.

Си́ла блгⷣти бж҃їѧ, недостаю̑щаѧ восполнѧ́ющаѧ, ѻ҆би́льнѡ и҆злїѧ́сѧ на тѧ̀, і҆ѡа́нне приснопа́мѧтне, є҆гда̀ ѿ ст҃и́телѧ хрїстофо́ра во і҆ере́а рꙋкополо́женъ бы́лъ є҆сѝ, и҆ гра́дꙋ кроншта́дтꙋ па́стырь ᲂу҆чине́нъ: ѿто́лѣ бо нача́лъ є҆сѝ ᲂу҆чи́ти лю́ди, є҆́же вѣ́рнѡ слꙋжи́ти ст҃ѣ́й трⷪ҇цѣ, и҆ пѣ́ти є҆́й: А҆ллилꙋ́їа.

І҆́косъ г҃.

Имѣ́ѧ любо́вь бжⷭ҇твеннꙋю въ срⷣцѣ свое́мъ, мꙋ́дре і҆ѡа́нне, и҆ ᲂу҆ста́вы воздержа́нїѧ стро́гѡ соблюда́ѧ, ᲂу҆до́бь побора́лъ є҆сѝ страсте́й двиза̑нїѧ, николи́же тѣ́ми запѧ́тъ бы́въ. Тѣ́мже, ꙗ҆́кѡ мꙋ́жъ си́ленъ, и҆зше́лъ є҆сѝ на дѣ́ланїе ни́вы гдⷭ҇ни: сло́вомъ, а҆́ки ра́ломъ, разрыхлѧ́ѧ ѿвердѣ̑вшаѧ и҆ ѡ҆лѧденѣ̑вшаѧ срⷣца̀ человѣ́чєскаѧ, согрѣва́ѧ та̑ мл҃твою и҆ теплото́ю любвѐ твоеѧ̀, и҆ насѣва́ѧ въ ни́хъ сѣ́мена и҆́скреннѧгѡ покаѧ́нїѧ и҆ живы́ѧ вѣ́ры. Сегѡ̀ ра́ди восписꙋ́емъ тѝ похвалы̑ такѡвы́ѧ: Ра́дꙋйсѧ, и҆збра́нный сосꙋ́де бж҃їѧ блгⷣти: ра́дꙋйсѧ, дарѡ́въ нбⷭ҇ныхъ вмѣсти́лище. Ра́дꙋйсѧ, всѣ́мъ срⷣцемъ и҆ всѣ́мъ помышле́нїемъ твои́мъ бг҃а возлюби́вый: ра́дꙋйсѧ, сегѡ̀ ра́ди и҆ ча̑да твоѧ̑ дꙋхѡ́внаѧ и҆́скреннѣ того̀ люби́ти наꙋчи́вый. Ра́дꙋйсѧ, за́пѡвѣди бж҃їѧ и҆ ᲂу҆ста́вы цр҃кве ѡ҆ постѣ́хъ ѻ҆па́снѡ храни́вый: ра́дꙋйсѧ, любо́вь твою̀ къ бг҃ꙋ и҆ бли̑жнимъ дѣѧ́ньми и҆ ᲂу҆чє́нїи твои́ми проѧви́вый. Ра́дꙋйсѧ, ѿ ю҆́ности надꙿ страстьмѝ воцари́выйсѧ: ра́дꙋйсѧ, сла́венъ побѣди́тель надꙿ тѣ́ми ꙗ҆ви́выйсѧ. Ра́дꙋйсѧ, въ мӏ́рѣ пожи́вый премӏ́рнѡ: ра́дꙋйсѧ, на землѝ мꙋ́дрствовавый нбⷭ҇нѡ. Ра́дꙋйсѧ, ца́рства православнорѡссӏ́йскагѡ сто́лпе непоколеби́мый: ра́дꙋйсѧ, правосла́вїѧ и҆ до́брыхъ ѻ҆бы́чаєвъ блюсти́телю непозы́блемый. Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

Конда́къ д҃.

Бꙋ́рею мно́гихъ бѣ́дъ и҆ волне́нїй жите́йскихъ ѡ҆держи̑мымъ на́мъ, помога́й, ѻ҆́тче і҆ѡа́нне, ꙗ҆́коже и҆ въ животѣ̀ твое́мъ помога́лъ є҆сѝ всѣ̑мъ, съ вѣ́рою къ тебѣ̀ притека́вшымъ, да всѝ тобо́ю вспомоществꙋ́еми, бл҃года́рнѡ ѡ҆ тебѣ̀ пое́мъ бг҃ꙋ:

А҆ллилꙋ́їа.

І҆́косъ д҃.

Слы́шавъ а҆пⷭ҇ла глаго́люща: на́ше житїѐ на нб҃сѣ́хъ є҆́сть, и҆ и҆змла́да возжела́въ наслѣ́довати є҆̀, маловре́менное сїѐ житїѐ не во ᲂу҆гожде́нїи пло́ти и҆ страсте́мъ и҆жди́лъ є҆сѝ, і҆ѡа́нне, но во ѡ҆чище́нїи дꙋшѝ ѿ по́мыслѡвъ грѣхо́вныхъ. Тѣ́мже и҆мꙋ́ще тѧ̀ во ѡ҆́бразъ бг҃оꙋго́днагѡ житїѧ̀ и҆ помо́щника во бл҃гочⷭ҇тїи, взыва́емъ тѝ си́це: Ра́дꙋйсѧ, свѣ́та є҆ѵⷢ҇льскагѡ въ на́шѧ дни̑ свѣ́тлое блиста́нїе: ра́дꙋйсѧ, ѡ҆мраче́нныхъ дꙋ́шъ вседѣ́йственное просвѣще́нїе. Ра́дꙋйсѧ, ꙗ҆́кѡ въ бжⷭ҇твєннаѧ писа̑нїѧ ве́сь ѹ҆́мъ тво́й впери́лъ є҆сѝ: ра́дꙋйсѧ, въ ни́хъ бо стезю̀ пра́вꙋю въ црⷭ҇твїе нбⷭ҇ное ѡ҆брѣ́лъ є҆сѝ. Ра́дꙋйсѧ, ꙗ҆́кѡ всѧ̑ дѣѧ̑нїѧ твоѧ̑ свѣ́тъ мӏ́рꙋ бы́ша: ра́дꙋйсѧ, ꙗ҆́кѡ тобо́ю ѻ҆ц҃ъ нбⷭ҇ный ди́внѡ просла́висѧ. Ра́дꙋйсѧ, ꙗ҆́кѡ сло́во твоѐ не бѣ̀ ꙗ҆́коже кѷмва́лъ брѧца́ѧй, ме́ртвъ, нечꙋ́вственъ: ра́дꙋйсѧ, ꙗ҆́кѡ то́е бѧ́ше вои́стиннꙋ жи́во и҆ дѣ́йственно. Ра́дꙋйсѧ, ꙗ҆́кѡ тобо́ю ме́ртвїи дꙋ́хомъ вѣ́рою ѡ҆живлѧ́ютсѧ: ра́дꙋйсѧ, ꙗ҆́кѡ па́дшїи въ бе́зднꙋ грѣхо́внꙋю тобо́ю къ покаѧ́нїю возбꙋжда́ютсѧ. Ра́дꙋйсѧ, ꙗ҆́кѡ неꙋстраши́маго ѡ҆бличи́телѧ богобо́рцєвъ лю́дїе въ тебѣ̀ ви́дѣша: ра́дꙋйсѧ, ꙗ҆́кѡ противобо́рца крѣ́пкаго врагѡ́мъ и҆́стины вѣ́рнїи тѧ̀ ѡ҆брѣто́ша. Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

Конда́къ є҃.

Ѕвѣзда̀ многосвѣ́тлаѧ землѝ рѡссӏ́йскїѧ, мра́къ грѣхо́вный просвѣща́ющаѧ, ꙗ҆ви́лсѧ є҆сѝ, сщ҃е́нне і҆ѡа́нне. Тѣ́мже и҆ ны́нѣ пода́ждь просвѣще́нїе сынѡ́мъ рѡссі̑йскимъ, тьмо́ю заблꙋжде́нїѧ ѡ҆б̾ѧ̑тымъ, и҆ во вла́сть нечести́выхъ преда́вшымсѧ, да позна́ютъ своѐ ѡ҆каѧ́нство, и҆ ѡ҆брати́вшесѧ ко гдⷭ҇ꙋ, въ покаѧ́нїи возопїю́тъ є҆мꙋ̀: А҆ллилꙋ́їа.

І҆́косъ є҃.

Ви́дѣвше рѡссӏ́йстїи наро́ди вели́каго тѧ̀ бл҃гочⷭ҇тїѧ проповѣ́дника, и҆ многомо́щна предꙿ бг҃омъ мл҃твенника и҆ предста́телѧ, во мно́жествѣ ѿовсю́дꙋ къ тебѣ̀ притека́хꙋ, и҆нӏ́и же и҆здале́ча письмена̀ тебѣ̀ посыла́хꙋ, и҆сцѣлє́нїѧ въ болѣ́знехъ, совѣ́та въ недоꙋмѣ́нїихъ и҆ ᲂу҆тѣше́нїѧ въ ско́рбехъ просѧ́ще: и҆ ᲂу҆лꙋчи́вше жела̑ннаѧ, бл҃года́рственнѡ тебѣ̀ взыва́хꙋ: Ра́дꙋйсѧ, і҆ѡа́нне, но́вый мӏ́рꙋ свѣти́льниче: ра́дꙋйсѧ, несре́дственный въ мл҃твахъ бг҃ꙋ собесѣ́дниче. Ра́дꙋйсѧ, ꙗ҆́кѡ твоѧ̑ мл҃твы си̑льны и҆ многомѡ́щны, є҆́же влⷣкꙋ ᲂу҆млⷭ҇тивлѧ́ти: ра́дꙋйсѧ, ꙗ҆́кѡ твоѐ къ немꙋ̀ предста́тельство многодѣ́йственно, бл҃гость є҆гѡ̀ на щедрода́тельство подвиза́ти. Ра́дꙋйсѧ, ꙗ҆́кѡ тобо́ю, по мѣ́рѣ вѣ́ры, подаю́тсѧ бл҃года̑тнаѧ и҆сцѣлє́нїѧ: ра́дꙋйсѧ, ꙗ҆́кѡ недꙋ́гꙋющїи прїе́млютъ тобо́ю ско́рое недꙋ́гѡвъ свои́хъ въ здра́вїе премѣне́нїе. Ра́дꙋйсѧ, ꙗ҆́кѡ грѣ́шнїи на покаѧ́нїе тобо́ю ѡ҆браща́ютсѧ: ра́дꙋйсѧ, ꙗ҆́кѡ безчи́ннїи крамѡ́льницы тобо́ю вразꙋмлѧ́ютсѧ. Ра́дꙋйсѧ, ꙗ҆́кѡ безꙋ́мнїи глꙋми́телїе надꙿ та́йнами вѣ́ры тобо́ю посрамлѧ́ютсѧ: ра́дꙋйсѧ, ꙗ҆́кѡ посмѣѧ́телїе чꙋде́сныхъ твои́хъ дѣѧ́нїй тобо́ю подоба́ющее вразꙋмле́нїе прїе́млютъ. Ра́дꙋйсѧ, скорбѧ́щихъ блгⷣтный ᲂу҆тѣ́шителю: ра́дꙋйсѧ, въ недоꙋмѣ́нїи сꙋ́щихъ бл҃гостный вразꙋми́телю. Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

Конда́къ ѕ҃.

Проповѣ́дникѡмъ и҆́стины, бг҃онѡ́снымъ ѻ҆тцє́мъ подража́ѧ, всего̀ себѐ на слꙋже́нїе бг҃ꙋ и҆ бли̑жнимъ вда́лъ є҆сѝ, и҆ са́нъ сщ҃е́нства носѧ̀, поко́ѧ не вѣ́далъ є҆сѝ, слꙋ̑жбы бж҃їѧ въ хра́мѣ при́снѡ соверша́ѧ, и҆ въ домѣ́хъ вѣ́рныхъ молє́бнаѧ пѣ̑нїѧ воспѣва́ѧ: нꙋжда́ющымсѧ же ще́дрѡ бл҃готворѧ̀, та́кѡ наименова́нїе бл҃готво́рца и҆ безсре́бреника стѧжа́лъ є҆сѝ, і҆ѡа́нне. Тѣ́мже и҆ по ᲂу҆спе́нїи твое́мъ, рѡссӏ́йстїи лю́дїе прославлѧ́ютъ и҆́мѧ твоѐ, и҆ вѣ́чнꙋю па́мѧть тебѣ̀ возглаша́юще, пою́тъ бг҃ꙋ: А҆ллилꙋ́їа.

І҆́косъ ѕ҃.

Возсїѧ́вый ѿ дв҃ы хрⷭ҇то́съ бг҃ъ на́шъ, и҆ тьмꙋ̀ і҆дѡлобѣ́сїѧ свѣ́томъ є҆ѵⷢ҇лїа разгна́вый, ꙗ҆ви́ тѧ, ѻ҆́тче і҆ѡа́нне, вѣ́рна и҆ ре́вностна проповѣ́дника своеѧ̀ и҆́стины, клеврє́ты лꙋка́вагѡ и҆звраща́емыѧ. Тѣ́мже, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, и҆зба́ви ѿ тѣ́хъ ѕло́бы и҆ кова́рства всѣ́хъ воспѣва́ющихъ тѝ такѡва́ѧ:

Ра́дꙋйсѧ, слꙋжи́телю хрⷭ҇то́въ и҆зрѧ́дный: ра́дꙋйсѧ, во і҆ере́ехъ ᲂу҆го́дниче тогѡ̀ преизѧ́щный. Ра́дꙋйсѧ, ꙗ҆́кѡ бы́лъ є҆сѝ до́мꙋ бж҃їѧ стра́жъ неꙋсы́пный: ра́дꙋйсѧ, ꙗ҆́кѡ пасѡ́мымъ твои̑мъ бы́лъ є҆сѝ ѿ та́тей дꙋхо́вныхъ крѣ́пкїй храни́тель. Ра́дꙋйсѧ, писа́ньми твои́ми мно́гихъ ѿ любвѐ мїрскӏ́ѧ къ любвѝ хрⷭ҇то́вѣ подви́гнꙋвый: ра́дꙋйсѧ, вѣща́ньми твои́ми любо́вь бж҃їю къ человѣ́кѡмъ, въ и҆скꙋпле́нїи и҆ промышле́нїи на́мъ ꙗ҆вле́ннꙋю, и҆зꙿѧви́вый. Ра́дꙋйсѧ, дѣ́йствїе дх҃а бж҃їѧ на срⷣца̀ человѣ́чєскаѧ ᲂу҆добопости́жнѡ сказа́вый: ра́дꙋйсѧ, та́йнꙋ мл҃твеннагѡ съ бг҃омъ собесѣ́дованїѧ ꙗ҆́вѣ ᲂу҆каза́вый. Ра́дꙋйсѧ, цѣломꙋ́дрїе въ зако́нномъ сꙋпрꙋ́жествѣ твое́мъ чꙋде́снѡ сохрани́вый: ра́дꙋйсѧ, мнѡ́гаѧ ча̑да дꙋхѡ́внаѧ покаѧ́нїемъ породи́вый. Ра́дꙋйсѧ, въ срⷣца́хъ вѣ́рныхъ бл҃гꙋ́ю па́мѧть по себѣ̀ ѡ҆ста́вивый: ра́дꙋйсѧ, ꙗ҆́кѡ па́мѧть сїѧ̀, ꙗ҆́кѡ првⷣника, незабве́нна пребꙋ́детъ во вѣ́ки. Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

Конда́къ з҃.

Хотѧ̀ всебл҃гӏ́й гдⷭ҇ь ᲂу҆тѣ́шити вѣ̑рныѧ лю́ди своѧ̑, и҆ ѿврати́ти беззако́нныхъ ѿ ѕлы́хъ дѣ́лъ и҆́хъ, воздви́же тѧ̀ прⷪ҇ро́ка землѝ на́шей, ꙗ҆́коже нѣ́когда нїнеѵӏ́и, гра́дꙋ вели́комꙋ, і҆ѡ́нꙋ: да проповѣ́си гнѣ́въ бж҃їй, грѧдꙋ́щїй вско́рѣ на зе́млю на́шꙋ, є҆́же и҆ сбы́стсѧ по твоемꙋ̀ вѣща́нїю, и҆́бо непока́ѧни въ горды́ни свое́й пребы́хомъ, и҆ не восхотѣ́хомъ съ тобо́ю смире́ннѡ пѣ́ти хрⷭ҇тꙋ̀ бг҃ꙋ: А҆ллилꙋ́їа.

І҆́косъ з҃.

Нѡ́ва зна́мєнїѧ гнѣ́ва бж҃їѧ постиго́ша на́съ, занѐ не восхотѣ́хомъ внѧ́ти бг҃одꙋхновє́ннымъ твои̑мъ глаго́лѡмъ: держа́ва бо рѡссӏ́йскаѧ паде́сѧ, и҆ лю̑тымъ безбо́жникѡмъ во вла́сть предаде́сѧ, и҆̀же чⷭ҇тны̑ѧ ѻ҆би́тєли и҆́ночєскїѧ разори́ша, ст҃ы̑ѧ хра́мы ѡ҆скверни́ша, и҆ всѧ̑ бл҃гочⷭ҇ти̑выѧ лю́ди лю́тѣ ѡ҆ѕло́биша, и҆ мно́жество дꙋхо́внагѡ и҆ мїрска́гѡ чи́на мч҃ничестѣй сме́рти преда́ша. Тѣ́мже и҆зꙿ глꙋбины̀ дꙋшѝ покаѧ́нїе гдⷭ҇ꙋ прино́симъ, и҆ къ твое́й мл҃твѣ прибѣга́емъ, да проще́нїѧ грѣхѡ́въ на́шихъ и҆ млⷭ҇ти бж҃їѧ сподо́бимсѧ. Тебѣ́ же, ꙗ҆́кѡ предста́телю на́шемꙋ, ᲂу҆ми́льнѡ глаго́лемъ:

Ра́дꙋйсѧ, покаѧ́нїѧ велегла́сный проповѣ́дниче: ра́дꙋйсѧ, грѧдꙋ́щагѡ гнѣ́ва бж҃їѧ на лю́ди согрѣши́вшыѧ нело́жный провозвѣ́стниче. Ра́дꙋйсѧ, нече́стїѧ людска́гѡ громогла́сный ѡ҆бличи́телю: ра́дꙋйсѧ, ѡ҆ и҆справле́нїи тѣ́хъ ре́вностный рачи́телю. Ра́дꙋйсѧ, ца́рства православно рѡссӏ́йскагѡ при животѣ̀ твое́мъ крѣ́пкїй ѡ҆пло́тъ бы́вый: ра́дꙋйсѧ, ѿ крамо́лъ во дни̑ ѻ҆́ны то́е сохрани́вый. Ра́дꙋйсѧ, госꙋда́рей бл҃гочⷭ҇ти́выхъ при́сный мл҃твенниче и҆ спобо́рниче: ра́дꙋйсѧ, мꙋ́дрый тѣ́хъ наста́вниче и҆ ѡ҆храни́телю. Ра́дꙋйсѧ, ѡ҆ вла́сти ца́рстѣй, ꙗ҆́кѡ бг҃оꙋста́вленнѣй, мнѡ́гаѧ словеса̀ провѣща́вый: ра́дꙋйсѧ, къ послꙋша́нїю и҆ вѣ́рности зако́ннѣй вла́сти то́й лю́ди тщали́вѡ приводи́вый. Ра́дꙋйсѧ, мл҃твами твои́ми престо́лы царе́й бл҃гочⷭ҇ти́выхъ ѡ҆гражда́ѧй: ра́дꙋйсѧ, сꙋды̀ пра̑вы въ лю́дехъ твори́ти тѣ́хъ поꙋча́ѧй. Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

Конда́къ и҃.

Страннолѣ́пный и҆ а҆гг҃лоподо́бный пꙋ́ть житїѧ̀ земна́гѡ сверши́лъ є҆сѝ, ѻ҆́тче і҆ѡа́нне: въ мӏ́рѣ бо пожи́въ въ воздержа́нїи и҆ цѣломꙋ́дрїи, и҆ во всегда́шнемъ бг҃а славосло́вїи, вели̑кимъ ѻ҆тцє́мъ послѣ́довалъ є҆сѝ. Съ ни́ми же ны́нѣ на нб҃сѝ хрⷭ҇тꙋ̀ въ весе́лїи предстоѧ̀, и҆ мл҃твы ѡ҆ мӏ́рѣ приносѧ̀, вы́нꙋ пое́ши: А҆ллилꙋ́їа.

І҆́косъ и҃.

Всѝ правосла́внїи лю́дїе, ꙗ҆́коже въ животѣ̀ твое́мъ, та́кѡ и҆ по преставле́нїи, съ ве́лїею любо́вїю чтꙋ́тъ тѧ̀, ѻ҆́тче і҆ѡа́нне, ꙗ҆́кѡ ве́лїе дерзнове́нїе къ бг҃ꙋ и҆́маши, и҆ мо́лиши бл҃гость є҆гѡ̀ ѡ҆ всѣ́хъ къ тебѣ̀ притека́ющихъ, и҆ та́кѡ взыва́ющихъ: Ра́дꙋйсѧ бл҃га́гѡ ко́рене до́брое прозѧбе́нїе: ра́дꙋйсѧ, бл҃гочⷭ҇ти́выхъ роди́телей чⷭ҇тно́е рожде́нїе и҆ бл҃го́е воспита́нїе. Ра́дꙋйсѧ, ꙗ҆́кѡ ма́лаѧ ве́сь сꙋ́ра, твоегѡ̀ ра́ди въ не́й рожде́нїѧ и҆ воспита́нїѧ, все́й землѝ рѡссӏ́йстѣй вѣ́дома сотвори́сѧ: ра́дꙋйсѧ, ꙗ҆́кѡ гра́дъ кроншта́дтъ твои́мъ въ не́мъ слꙋже́нїемъ просла́висѧ. Ра́дꙋйсѧ, ꙗ҆́кѡ милосе́рдыми дѣ́лы твои́ми всѧ̀ землѧ̀ рѡссӏ́йскаѧ напо́лнисѧ: ра́дꙋйсѧ, ꙗ҆́кѡ вѣ́сть ѡ҆ чꙋ́днѣмъ и҆ ст҃ѣ́мъ житїѝ твое́мъ и҆ за предѣ́лы є҆ѧ̀ распространи́сѧ. Ра́дꙋйсѧ, ꙗ҆́кѡ писа́ньми твои́ми та́йна блгⷣтнагѡ съ бг҃омъ ѡ҆бще́нїѧ и҆зꙿѧснѧ́етсѧ: ра́дꙋйсѧ, ꙗ҆́кѡ си́ми писа́ньми свѣ́тъ дꙋхо́внагѡ ѡ҆заре́нїѧ въ срⷣца̀ чтꙋ́щихъ ѧ҆̀ и҆злива́етсѧ. Ра́дꙋйсѧ, ꙗ҆́кѡ въ писа́нїихъ твои́хъ чⷭ҇тота̀ дꙋшѝ твоеѧ̀ ꙗ҆́вѣ прозрѣва́етсѧ: ра́дꙋйсѧ, ꙗ҆́кѡ въ ни́хъ, ꙗ҆́коже въ зерца́лѣ, бг҃оподо́бїе дꙋшѝ человѣ́ческїѧ ѿѡбража́етсѧ. Ра́дꙋйсѧ, ꙗ҆́кѡ бг҃омꙋ́дрыми писа́ньми твои́ми не то́кмѡ лю́дїе рѡссӏ́йстїи, но и҆ и҆нозе́мнїи ко бл҃гочⷭ҇тїю своемꙋ̀ назида́ютсѧ: ра́дꙋйсѧ, ꙗ҆́кѡ тѣ́ми писа́ньми и҆́стиннаѧ вѣ́ра возсїѧва́етъ, и҆ мра́къ є҆ресе́й разгонѧ́етсѧ.

Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

Конда́къ ѳ҃.

Всѧ́кое сло́во не довлѣ́етъ къ похвалѣ̀ твое́й, ѻ҆́тче і҆ѡа́нне, ты́ бо дх҃омъ ст҃ы́мъ дви́жимь, ѿ ю҆́ности бг҃ꙋ ᲂу҆се́рднѡ послꙋжи́лъ є҆сѝ: въ и҆зꙋче́нїи сщ҃е́нныхъ писа́нїй мнѡ́га лѣ̑та ᲂу҆се́рднѡ трꙋжда́ѧсѧ, и҆ ра́зꙋмъ глꙋбо́къ стѧжева́ѧ, та́же ѡ҆ наꙋче́нїи ѻ҆трокѡ́въ и҆ ѡ҆ па́ствѣ твое́й прилѣ́жнѡ пекӏ́йсѧ, всѣ́хъ поꙋча́лъ є҆сѝ разꙋ́мнѡ пѣ́ти бг҃ꙋ: А҆ллилꙋ́їа.

І҆́косъ ѳ҃.

Витӏ́и нечести́вїи и҆ сꙋемꙋ́дреннїи, и҆ вѣ́ры хꙋли́телїе, тобо́ю ꙗ҆́вѣ посра́млени бы́ша во ѕлоче́стїи свое́мъ, правосла́внїи же въ вѣ́рѣ ᲂу҆тверди́шасѧ, бг҃овѣща́нными твои́ми глаго́лы наставлѧ́еми. Тѣ́мже, восхвалѧ́юще тѧ̀, взыва́емъ си́це: Ра́дꙋйсѧ, цѣвни́це бг҃овѣща́ннаѧ: ра́дꙋйсѧ, гꙋ́сль дх҃а сладкозвꙋ́чнаѧ. Ра́дꙋйсѧ, словесы̀ и҆ писа́ньми твои́ми догма́ты вѣ́ры ᲂу҆ѧсни́вый: ра́дꙋйсѧ, вѣща́ньми твои́ми вѣ́рныхъ смы́слы въ правосла́вїи ᲂу҆крѣпи́вый. Ра́дꙋйсѧ, мно́гихъ коле́блющихсѧ въ и҆́стиннѣй вѣ́рѣ ᲂу҆тверди́вый: ра́дꙋйсѧ, гордели́ваго въ сꙋемꙋ́дрїи хꙋли́телѧ та́инствъ цр҃кве хрⷭ҇то́вы небоѧ́зненнѡ ѡ҆бличи́вый. Ра́дꙋйсѧ, ꙗ҆́кѡ тобо́ю полкѝ богобо́рцєвъ побѣжде́ни бы́ша: ра́дꙋйсѧ, ꙗ҆́кѡ со́нми пасо́мыхъ твои́мъ па́стырскимъ раче́нїемъ црⷭ҇твїе нбⷭ҇ное ᲂу҆лꙋчи́ша. Ра́дꙋйсѧ, ра́зꙋма бжⷭ҇твеннагѡ мꙋ́дрый и҆зꙿѧви́телю: ра́дꙋйсѧ, та́инствъ церко́вныхъ бл҃гоговѣ́йный соверши́телю. Ра́дꙋйсѧ, бл҃гонаде́жный на́шъ въ црⷭ҇твїе нбⷭ҇ное рꙋководи́телю: ра́дꙋйсѧ, пꙋтѝ сп҃си́тельнагѡ на́шъ и҆́стинный ᲂу҆чи́телю.

Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

Конда́къ і.

Сп҃стѝ хотѧ̀ дꙋ́шꙋ твою̀, полнотꙋ̀ добродѣ́телей є҆ѵⷢ҇льскихъ въ себѣ̀ совокꙋпи́лъ є҆сѝ, ѻ҆́тче і҆ѡа́нне: а҆пⷭ҇льское и҆ ст҃оѻте́ческое вѣ́ры и҆сповѣ́данїе, мч҃ническꙋю въ бл҃гочⷭ҇тїи тве́рдость, всегда́шнее въ мл҃твахъ бо́дрствованїе, воздержа́нїе и҆ смире́нїе, вкꙋ́пѣ же и҆ по́двиги прпⷣбныхъ. Тѣ́мже ны́нѣ со ст҃ы́ми на нб҃сѝ водворѧ́ѧсѧ, и҆ непреста́ннѡ бг҃а славосло́вѧ, помина́й на́съ, сла́внꙋю па́мѧть твою̀ почита́ющихъ, и҆ пою́щихъ бг҃ꙋ: А҆ллилꙋ́їа.

І҆́косъ і.

Цр҃ѧ̀ нбⷭ҇нагѡ всеꙋсе́рдный сщ҃еннослꙋжи́тель бы́въ, ѡ҆ бл҃годе́нствїи земна́гѡ ѻ҆те́чества твоегѡ̀ ревнова́лъ є҆сѝ, правомꙋ́дреннѡ поꙋча́ѧ, є҆́же воздава́ти бж҃їе бг҃ови, и҆ ке́сареви ке́сарево. Сегѡ̀ ра́ди восхвалѧ́емъ тѧ̀ си́це: Ра́дꙋйсѧ, ра́бе бж҃їй, бл҃гӏ́й и҆ вѣ́рный: ра́дꙋйсѧ, слꙋжи́телю тогѡ̀ ᲂу҆се́рдный. Ра́дꙋйсѧ, всѧ̑ повелѣ̑ннаѧ ѿ гдⷭ҇а тщали́вѡ твори́вый: ра́дꙋйсѧ, за́повѣдей є҆гѡ̀ и҆скꙋ́сный дѣ́латель бы́вый. Ра́дꙋйсѧ, ѡ҆ вездѣсꙋ́щїи бж҃їи всегда̀ помышлѧ́вый: ра́дꙋйсѧ, ѹ҆́мнымъ ѻ҆чесє́мъ свои̑мъ того̀ вы́нꙋ представлѧ́вый. Ра́дꙋйсѧ, бл҃гочⷭ҇ти́выхъ царе́й ѻ҆те́чества твоегѡ̀, ꙗ҆́кѡ слꙋ́гъ бж҃їихъ, почита́вый: ра́дꙋйсѧ, сло́вомъ твои́мъ и҆ мл҃твами въ трꙋ́днѣмъ по́двизѣ ᲂу҆правле́нїѧ и҆̀мъ помога́вый. Ра́дꙋйсѧ, къ попече́нїю ѡ҆ бл҃ги́хъ цр҃кве и҆ наро́да тѣ́хъ подвиза́вый: ра́дꙋйсѧ, ѿ крамо́лъ и҆ мѧте́жей и҆̀хъ ѡ҆хранѧ́вый. Ра́дꙋйсѧ, и҆ ны́нѣ ѡ҆ землѝ рѡссӏ́йстѣй и҆ ѡ҆ всѣ́хъ ца́рствахъ правосла́вныхъ бг҃а ᲂу҆молѧ́ѧй: ра́дꙋйсѧ, ꙗ҆́кѡ предста́тель є҆сѝ всѣ́хъ на тѧ̀ надѣ́ющихсѧ. Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

Конда́къ а҃і.

Пѣ́сненными похвала́ми невозмо́жно є҆́сть и҆зꙿѡбрази́ти мно́жество ѡ҆ бз҃ѣ и҆справле́нїй твои́хъ, Ѽ пречꙋ́дне ѻ҆́тче і҆ѡа́нне, ꙗ҆̀же соверши́лъ є҆сѝ во все́мъ житїѝ твое́мъ: немѡщны́ѧ мл҃твами твои́ми и҆сцѣлѧ́ѧ, бѣ́сы ѿ человѣ̑къ и҆згонѧ́ѧ, недꙋ́говавшыѧ пїѧ́нствомъ и҆ и҆ны́ми страстьмѝ врачꙋ́ѧ, въ нищетѣ́ же и҆ ᲂу҆бо́жествѣ сꙋ́щыѧ ѻ҆би́льнѡ ᲂу҆щедрѧ́ѧ: и҆ всѣ̑мъ по коегѡ́ждо потре́бѣ помога́ѧ и҆ бл҃готворѧ̀, во є҆́же бл҃года́рнѡ ѡ҆ тебѣ̀ пѣ́ти бг҃ꙋ: А҆ллилꙋ́їа.

І҆́косъ а҃і.

Свѣти́льника свѣ́тла и҆ прозорли́вца ди́вна ꙗ҆вѝ тѧ̀ гдⷭ҇ь во дне́хъ на́шихъ, провозвѣсти́вша грѧдꙋ́щїй гнѣ́въ є҆гѡ̀ на ца́рство рѡссӏ́йское, занѐ не пока́ѧхомсѧ про́повѣдїю твое́ю. Тѣ́мже, ꙗ҆́кѡ прⷪ҇ро́ка бж҃їѧ и҆ провозвѣ́стника тогѡ̀ сꙋде́бъ, ᲂу҆бл҃жа́емъ тѧ̀, и҆ въ покаѧ́нїи взыва́емъ: Ра́дꙋйсѧ, прови́дче ди́вный: ра́дꙋйсѧ, бꙋ́дꙋщихъ собы́тїй предсказа́телю нело́жный. Ра́дꙋйсѧ, дрє́внимъ покаѧ́нїѧ проповѣ́дникѡмъ ра́вный: ра́дꙋйсѧ, грѧдꙋ́щагѡ гнѣ́ва бж҃їѧ на нераска̑ѧнныѧ грѣ́шники возвѣсти́телю. Ра́дꙋйсѧ, покаѧ́нїѧ сладкогла́сный глаша́таю: ра́дꙋйсѧ, смѧте́нныхъ срⷣцъ ᲂу҆мири́телю. Ра́дꙋйсѧ, многомо́щный на́шъ предꙿ бг҃омъ хода́таю: ра́дꙋйсѧ, бл҃гонаде́жный на́шъ предꙿ ни́мъ предста́телю. Ра́дꙋйсѧ, до́брый па́стырю ѻ҆ве́цъ слове́сныхъ: ра́дꙋйсѧ, мꙋ́дрый дѣтоводи́телю ѿ земны́хъ къ нбⷭ҇нымъ. Ра́дꙋйсѧ, мно́жество заблꙋ́ждшихъ дꙋ́шъ взыска́вый: ра́дꙋйсѧ, ѿ ѹ҆́зъ темни́чныхъ и҆ сме́рти мно́гихъ свободи́вый. Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

Конда́къ в҃і.

Блⷣгть бж҃їѧ, ю҆́же прїѧ́лъ є҆сѝ сꙋгꙋ́бѡ, во ст҃ѣ́мъ креще́нїи и҆ во і҆ере́йстѣмъ рꙋкоположе́нїи, не вотщѐ въ тебѣ̀ бы́сть, ѻ҆́тче і҆ѡа́нне, раче́нїемъ бо твои́мъ ᲂу҆потреби́лъ є҆сѝ сїю̀ на по́льзꙋ мнѡ́гимъ, и҆ во сла́вꙋ дарода́телѧ є҆ѧ̀: свѣ́тлостїю житїѧ̀ твоегѡ̀ и҆ дѣ́лы млⷭ҇рдными, вели́кїй ᲂу҆го́дникъ предꙿ бг҃омъ ꙗ҆ви́лсѧ є҆сѝ, и҆ ѿ мно́жества ѹ҆́стъ, тобо́ю дꙋхо́внѡ и҆ тѣле́снѡ ѡ҆бл҃годѣ́тельствованныхъ, возно́ситсѧ томꙋ̀ вели́каѧ пѣ́снь:

А҆ллилꙋ́їа.

І҆́косъ в҃і.

Пою́ще бг҃оꙋго́дное твоѐ ѿ ю҆́ности житїѐ, и҆ дꙋхо́вное ѿ си́лы въ си́лꙋ восхожде́нїе, ᲂу҆бл҃жа́емъ првⷣнꙋю твою̀ кончи́нꙋ, и҆ сла́вное погребе́нїе блгⷣтныхъ твои́хъ моще́й, вѣ́чный поко́й ѡ҆брѣ́тшихъ въ созда́ннѣй тобо́ю дѣви́чей ѻ҆би́тели. Вѣ́рꙋемъ же, ꙗ҆́кѡ и҆ ст҃а́ѧ дꙋша̀ твоѧ̀ ᲂу҆поко́исѧ въ пресвѣ́тлыхъ ра́йскихъ селе́нїихъ, ꙗ҆̀же наслѣ́довати помозѝ и҆ на́мъ, возглаша́ющымъ тѝ похвалы̑ сицєвы́ѧ: Ра́дꙋйсѧ, тече́нїе вре́менныѧ жи́зни ра́внѡ и҆ бг҃оꙋго́днѡ сконча́вый: ра́дꙋйсѧ, вѣ́рꙋ пра́вꙋю непоро́чнѡ сохрани́вый. Ра́дꙋйсѧ, ми́рною хрⷭ҇тїа́нскою кончи́ною првⷣность твою̀ и҆звѣсти́вый: ра́дꙋйсѧ, поко́й вѣ́чный на нб҃сѝ со ст҃ы́ми полꙋчи́вый.

Ра́дꙋйсѧ, ра́дости првⷣныхъ во ѻ҆би́телехъ ра́йскихъ причасти́выйсѧ: ра́дꙋйсѧ, со мно́жествомъ дꙋ́шъ, тобо́ю сп҃се́нїе ᲂу҆лꙋчи́вшихъ, бл҃же́нства вѣ́чнагѡ сподо́бивыйсѧ. Ра́дꙋйсѧ, съ ца́рственными новомч҃ники црⷭ҇тво нбⷭ҇ное наслѣ́дивый: ра́дꙋйсѧ, съ ни́ми цр҃ю̀ сла́вы предстоѧ́й, и҆ ѡ҆ и҆збавле́нїи ѻ҆те́чества на́шегѡ ѿ безбо́жныхъ вра̑гъ мл҃твы возносѧ́й. Ра́дꙋйсѧ, вели́кїй правосла́вїѧ побо́рниче: ра́дꙋйсѧ, непреѡдоли́мый бл҃гочⷭ҇тїѧ защи́тниче. Ра́дꙋйсѧ, со́нными ꙗ҆вле́ньми пресла́внѡ чꙋдотворѧ́й: ра́дꙋйсѧ, и҆носла̑вныѧ ко правосла́вїю приводѧ́й. Ра́дꙋйсѧ, і҆ѡа́нне, но́вый рѡссӏ́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.

Конда́къ г҃і.

Ѽ всечⷭ҇тны́й ѻ҆́тче і҆ѡа́нне, не кроншта́дтскїй то́кмѡ, но и҆ всерѡссӏ́йскїй, па́че же всемӏ́рный свѣти́льниче, и҆ вели́кїй хрⷭ҇то́въ ᲂу҆го́дниче и҆ чꙋдотво́рче! Прїимѝ ѿ на́съ, недосто́йныхъ, хвале́бное пѣ́нїе сїѐ, и҆ бл҃гопрїѧ́тными твои́ми къ бг҃ꙋ мл҃твами, и҆зба́ви на́съ ѿ бѣ́дъ вре́менныхъ и҆ мꙋче́нїй вѣ́чныхъ, да сподо́бимсѧ съ тобо́ю въ црⷭ҇твїи нбⷭ҇нѣ́мъ вѣ́чнѡ воспѣва́ти: А҆ллилꙋ́їа.

Се́й конда́къ глаго́ли три́жды.

Та́же: і҆́косъ а҃, и҆ конда́къ а҃.

Мл҃тва ко ст҃о́мꙋ првⷣномꙋ ѻ҆тцꙋ̀ на́шемꙋ

і҆ѡа́ннꙋ кроншта́дтскомꙋ, чꙋдотво́рцꙋ:

зрѝ ли́стъ н҃є.